18 ikaslek parte hartzen dute Foru Gobernuak eta Nafarroako Volkswagen-ek elkarrekin sustatutako lanbide-espezializazioko lehen programan. Espainian aitzindaria den ekimena Landabengo fabrikan egiten da; hala, ikasleek beraien ezagutzak zabal ditzakete ekoizpeneko eta mantentze-laneko munduari aplikatutako azken belaunaldiko teknologiak erabiliz.

1.000 orduak gainditzen dituen prestakuntza teoriko-praktikoa da, alemán estilora, eta Lanbide Heziketako (LH) gradu ondoko titulu ofizial bat lortzeko balioko du, Foru Gobernuak eta Nafarroako Volkswagen-ek emandakoa eta Espainian homologatuta dagoena. Gainera, titulua Alemaniako ziurtagiri-sistemarekin baliozkotzeko aukera eskainiko du, Alemaniako Merkataritza Ganberak deitutako azterketa baten bidez.

Ematen diren espezialitateak honako hauek dira: mekatronika industrialean aditua, automatizazio industrialean aditua eta moldeak mantentzeko eta birdiseinatzeko aditua.

Iragan ekainean bi aldeek izenpetutako lankidetza-hitzarmenaren barnean sartzen den programa alemanaren irakaskuntzarekin osatzen da. Eskola horiek udan hasi ziren Nafarroako Enplegu Zerbitzuak antolatutako ikastaro trinko batekin, eta haren helburua gazte parte-hartzaileen lehiakortasuna eta enplegu-maila hobetzea da.