Ostiral honetan, irailak 21, Europako Lankidetzaren Eguna ospatzen zela eta, Pirinioetako Lan Elkartearen (PLE) idazkari nagusi Cristina Arcaya-k ospakizun hau zergatik egin den azaldu du prentsaurrekoan, eta Nafarroako mugaz haraindiko lankidetzaren balantzea egin du Espainia-Frantzia -Andorra arteko Lurralde Lankidetzako 2007-2013 Programaren bidez (POCTEFA).

Nafarroari dagokionez, eta Arcaya-k azaldu duenez, gaur egun Europako lurralde-lankidetzarako 77 programa abian daude. Nafarroak 39 proiektutan parte hartzen du, eta haietatik 22ren buru da. POCTEFAren bitartez, Foru Komunitateak ia 18,5 milioi euro jasotzen ditu (18. 494 000 €) FEDER funtsetatik, prestakuntza, ikerketa, garapena ekonomikoa, garapen turistikoa, natur eta kultur mailako ondarea babestu eta baloratzeko, ingurumena babesteko… lurralde-lankidetzarako proiektuak abian jartzeko.

Ekitaldian izan da ere, Midi-Pyrénées eskualdeko kontseilari Michel Pérez, eta hark lurralde frantseseko lankidetzaren balantzearen berri eman du; Andorrako Mugaz Haraindiko Erakundearen zuzendari Pere Roquet ere bertan izan da, eta azken horrek Andorrak Baionako Tratatuari erakutsitako atxikimenduaren inguruan Frantziak egindako berrespenaren garrantziaz aritu da, PLEaren partzuergoan sartzea ahalbidetzen diona. (Berrespen horren aurretik, Andorrak zenbait neurri onartu zituen, esaterako, iragan urrian mugaz haraindiko lankidetzarako Andorrako Erakundea sortzea; erakunde horren bidez, Estatu hori PLEan sartu zen, nahiz eta, orain, Andorrak bere mihiztadura instituzionala Partzuergoaren barnean duen. Egoera berri hori ere islatuko da 2013-2014 aldian Andorrak bere gain hartuko duen txandakako PLEaren lehendakaritza hartze aldera).

Europako Lankidetzaren Eguna

Bertaratutakoek estreinakoz egiten den ospakizun honen arrazoia zein den argitu dute, eta haren inguruan tokiko 200 ekintzatik gora antolatu dira Europa guztian irailaren 17tik 23rako astean, ekintza-mota askorekin: mugaz haraindiko lasterketak, haur-antzerkiak, naturako eskaladak eta argazki-lehiaketak, besteak beste.

Europako Batzordearekin elkarlanean eta Eskualdeen Batzordearen nahiz Europako Parlamentuaren laguntzarekin INTERACT programak koordinatutako kanpaina horren helburua da, kontinenteko herrialde eta eskualdeen arteko lankidetzaren lorpenak ospatzea. Iragan mendeko 90ko hamarkadaren hasieratik, Europar Batasunak kofinantzatutako 20.000 proiektu baino gehiagok bertako hiritarren bizimodua hobetzen lagundu dute honako era honetan: lanpostuak sortuz, ingurumena babestuz, osasun-zerbitzuak hobetuz, garraioaren edo energiaren zerbitzuak hobetuz.

Dominoari bultzada

Ondoren, 11:30ak aldera, urtemuga hori iragan asteazkenetik ospatzeko egin diren kaleko artearen ekintzei amaiera eman zaie, dominoko pieza erraldoiei bultza eginez; pieza horietan Nafarroako artistak eta graffiti-egileak eta baita POCTEFA programak finantzatutako erakundeetako ordezkariek ere beren iritzia jasota utzi dute askatasun osoz.

Bigarren lehendakariordeak eta Kulturako, Turismoko eta Erakunde Harremanetako kontseilari Juan Luis Sánchez de Muniáin-ek fitxei emandako bultzada horrekin (mugen desagerpena sinbolizatzen duen domino efektua sortu du) ospakizun horri amaiera eman zaio.