Nafarroako Lehendakari Yolanda Barcinak Zientzia, Teknologia eta Berrikuntzaren XII. Astea inauguratu du gaur goizean. Ekimen hori azaroaren 6tik 15era bitarte ospatuko da eta Nafarroako Gobernuak antolatzen du CEIN eta Iruñeko Planetarioaren bidez, Nafarroako Unibertsitate Publikoarekin eta Nafarroako Unibertsitatearekin batera.

Planetarioan egindako ekitaldian, Lehendakariarekin batera Hezkuntzako kontseilari José Iribas eta Planetarioko zuzendari Javier Armentia izan dira, besteak beste.

San Cernin eta Rochapea ikastetxeetako ikasleen aurrean, Lehendakariak azpimarratu du zientziak eguneroko bizimoduan zer garrantzia duen eta haurrei animatu die zientifiko bihur daitezen. Alor horretan erakunde publiko eta pribatuen artean beharrezkoa den elkarlanaz ere aritu da, eta gogora ekarri du Nafarroa I+G+Bn pisu handieneko bigarren komunitatea dela.

Aurtengo programak 50 ekintza baino gehiago jasotzen ditu agertoki ezberdinetan era guztietako jendearentzat (eskolakoak, unibertsitatekoak, familiakoak, espezializatua…), eta helburu komun batean oinarrituta: zientzia gizartean sustatzea eta gizarteari hurbiltzea, eta bereziki edizio honetan, hiri inteligentearen kontzeptua eramatea (smart city, ingelesez).

Aurtengo edizioko asteko ekintza nagusia Órbita inteliCiencia programa da, Iruñeko Planetarioak bereziki hartzen duena eta zenbait ekintza batzen dituena: zientziari lotuta ikasten duten kontzeptuak esperimentatu eta aplikatuko dituzten lehen hezkuntzako nahiz bigarren hezkuntzako ikasleentzako tailerrak, eta baita berrikuntza ere; familientzako ikuskizunak eta tailerrak; "do it yourself" (Zerorrek egin) ekintza, non parte-hartzaileek beren asmakariak landu eta eraikitzen dituzten; edo "Hiri inteligentea" erakusketa, Planetarioan ere.

Gainera, Nafarroako teknologia-zentroetara eta I+Geko zentroetara egindako bisitak barnean hartzen ditu programak, esaterako: CENER, CNTA, CIMA, FIDENA, CEMITEC, INTIA, AIN, Idab, L´Urederra edo NASERTIC. Hala, interesa duten pertsonek beren egunerokoa ezagutu ahalko dute. Ate irekiko jardunaldien programak beste ekintza batzuk ere barnean hartzen ditu, NILSAk sustatutako ibaiaren inguruko ekintza adibidez, edo Nafarroako Unibertsitateko Natur Zientzien museora edo Nafarroako Unibertsitate Publikoko Industria Ingeniarien eta Telekomunikazioko Goi Eskola Teknikoko museora egindako bisitak.

Ekintzen katalogoa hainbat gairi buruzko hitzaldi espezializatuekin osatzen da: adimen artifiziala (Nafarroako Ateneok antolatuta), GPSz lagundutako ibilgailu inteligenteak gidatzea (Ribera del Argako BHIak antolatuta), buru eta gizarte-sareak (Dédalo fundazioak antolatuta), material berriak aplikazio elektronikoetarako (CEMITECek antolatuta) edo berrikuntza zabalaren adibideak (EURISek, Nafarroako Gobernuak eta CEINek antolatuta), besteak beste. Aldiz, sortu berri den Zientziaren Adiskideak klubak hiru hitzaldi antolatu ditu Planetarioan aste horren barnean.

"Inteligenteak gara… eta baita gure hiriak ere" da, hain zuzen ere, "Hiri Inteligentea" erakusketak bisitariari helarazten dion lehen mezua. Erakusketa horrek Iruñeko Udalaren eta Iruñerriko Mankomunitatearen laguntza du, beste enpresa nahiz erakundeen artean. Hiri inteligenteen azken helburua herritar guztien bizi-kalitatea hobetzea da eta baliabideen aprobetxamendu hobea sustatzea.

Erakusketaren asmoa adin guztietako jendeari hiri inteligentearen kontzeptua hurbiltzea da lau arlotan bizi ditugun aurrerapenen bidez (mugikortasuna, iraunkortasuna, konektibitatea eta bizi-kalitatea), Nafarroako hiriburuko hurbileko adibideen bitartez, eredu horri erantzuten dion hiria den aldetik.