Nafarroako Gobernuak Kalitate Plan bat abian jarri du Nafarroako Enplegu Zerbitzurako (NEZ) 2012-2014 aldirako, eta bi helburu ditu: alde batetik, zerbitzu horren erabiltzaileentzako arreta hobetzea, eta bestetik, prozedurak hobetzea eta homogeneizatzea enplegua bultzatzeko eta lanpostu bat eskuratzeko aukera-berdintasuna sustatzera zuzenduta dauden programak kudeatzeko.

Hala, Nafarroako Aldizkari Ofizialean gaur argitaratu den Kalitate Plan hori NEZaren Enplegu eta Aukera Berdintasuna Sustatzeko Zerbitzurako egin da batez ere, eta haren helburua da, enplegua izatea eta enplegu-mailaren hobekuntza sustatzeko balio duten programak diseinatu eta gauzatzea, laneratzeko zailtasun handiena duten pertsonena bereziki. Horretarako, kohesio handiko taldea izango da, prestatua, sormen handikoa eta motibatua, helburu hori era eraginkorrean, sistematikoki eta zorrotz egingo duena. Halaber, planak hura zuzentzen duten balioak jasotzen ditu: gardentasuna, objektibitatea, tratu-berdintasuna eta irisgarritasun globala, eraginkortasuna, eraginkortasuna baliabideak ematean eta kudeaketan, enpatia, sormena, inplikazioa eta konpromisoa, eta parte-hartzea, bai eta hobetzeko ekintzak ere (informazioa bateratzeko sistema bat sortzea eta erabiltzaile-bezeroari arreta emateko prozeduraren eskuliburu ezberdinak lantzea) eta plana neurtzeko adierazleak.

NEZaren Enplegu eta Aukera Berdintasuna Sustatzeko Zerbitzuak honako programak hauek kudeatzen ditu, esate baterako: enpleguaren zentro bereziak, gizarteratzeko eta laneratzeko zentroak, enpleguaren eskola-tailerrak eta tailerrak, autonomien inbertsioetarako diru-laguntzak edo laguntzak toki-erakundeek egindako kontratazioetan, besteak beste.