Jarduteko hiru ardatz

Egindako diagnostikoaren arabera, oinarrizko premiei erantzun ezin dieten pertsona kopuruak gora egin du egungo krisia dela-eta. Egoera horretan, gainera, aurrez aipatu den Nafarroako gizartearen kohesioa hausteko arriskua dago. Zehazki, AROPE tasaren arabera (Europar Batasunak ezarritako adierazleak baliatzen dituena), Nafarroan 60.000 pertsona inguru daude pobrezian bizitzeko arriskuan.

Gauzak horrela, agiriak guztiek oinarrizko premiei erantzuteko gaitasuna duten egoera irudikatzen du. Hori lortzeko hiru jarduera-ardatz proposatu dira. Lehena pertsonen gaitasunak hobetzea da, oinarrizko premiak betetzea lor dezaten, adibidez, bizilekua eta enplegua.

Bigarren ardatza gizarteratzearen alorrean lan egiten duten administrazio eta erakunde sozialen arteko koordinazioa lortzea da. Hala, sare-lana egitea, koordinazio-protokoloak prestatzea, gizartearen sentsibilizazioa sustatzea etab. bultzatuko da.

Azkenik, hirugarren ardatza jarraipena eta ebaluazioa egiteko sistema sortzea da, helburuak betetzen direla gainbegiratzeko. Horretarako, urteroko plan eraginkorrak, emaitzen kudeaketa edo adierazleen sistema bat bezalako bitartekoak erabiliko direla aurreikusi da.

Sendotasunak eta aukerak

Alli kontseilariak aurkeztu duen agiriak orain arte Nafarroan izan den gizartearen babeserako sistemaren sendotasunak eta aukerak ere aztertu ditu.

Sendotasun nagusien artean Foru Komunitateko gizarte-zerbitzuen sare deszentralizatua da aipagarrienetako bat. Gainera, zerbitzu horien neurriek profesionalei euren artean ezagutzeko eta haien eta garatzen dituzten ekimenen artean zuzenean koordinatzeko aukera ematen diete. Halaber, Nafarroako eragile sozialek eta profesionalek lanerako duten gaitasuna baloratzen da; oinarri sozial oso aktiboa dute.

Diagnostikoak egungo krisi-egoera ere hartzen du egun eskura dauden gizarte-baliabideen asmo eta helburuak berrikusteko aukeratzat, bai baliabideak osatzeko eta koordinatzeko, bai plangintza eraginkorragoa lortzeko.

Pobreziari aurre egiteko ezarritako babes sozialaren sistema osoa berrantolatzeko aukera ere nabarmentzen du, itundutako lehentasun sozialeko ìrizpideak oinarri hartuta, alor horretan konprometituta dauden eragile guztientzat. Halaber, baztertuta geratzeko arriskuan daudenek enplegua lortzeko duten aukera prestakuntza-ekintzen bidez hobetzeko beharrizana ere aipatu da.

Ahultasunak eta mehatxuak

Diagnostikoak babes sozialaren sistemako ahultasunak ere azaltzen ditu. Honako hauek dira horietako batzuk: burokrazia gehiegik ekimen batzuk moteltzea, baliabide ekonomikoen edo teknikarien egonkortasunik eza eta sistemaren hainbat mailatan koordinazio-falta eta esku-hartzeen bikoiztasuna.

Mehatxuen artean, agiriak babes sozialeko sistemak pixkanaka eta oro har gainezka egin izana ere aipatzen du, egungo krisiaren sakontasun, larritasun eta iraupenagatik. Horrez gain, elkartasunaren sare informalek ere gainezka egin dute. Sare horiek senide eta lagunek osatzen dituzte batik bat, urrakortasun-egoeretan berehalako eta hurbileko erantzuna emanez.

Mehatxutzat ere agertzen du pobreziaren eta bazterkeriaren kontra borroka egiteko diseinaturiko babes-sistema langabezian daudenen prestazioak amaitzeak eragiten duen egoerari aurre egiteko erabiltzea. Izan ere, sistema zurruna da krisiaren eta krisiaren luzapenaren ondorioz sortutako premia berrietara egokitzeko.

Gizarteratzearen alde lan egiteko taldea

Alli kontseilariak aurkeztutako diagnostikoa eta azterketa Gizarte Politiketako Departamentuak prestatu du gizarteratzearen aldeko lana egiten duen taldearekin. Lan-talde horrek gaur goizean bilera egin du Nafarroako Jauregian bertan. Parlamentuko taldeak ere gonbidatu dira topaketara.

Honako erakunde hauetako ordezkariek osatzen dute taldea: Nafarroako Enplegu Zerbitzua, Nafarroako Udalerrien eta Kontzejuen Federazioa, Oinarrizko Gizarte Zerbitzuak, Nafarroako Elikagaien Bankua, Cáritas, Nafarroako Gurutze Gorria, Gaztelan Fundazioa, Nafarroako pobreziari eta gizarte-bazterkeriari aurre egiteko sarea, Nafarroako Enpresaburuen Konfederazioa, UGT eta CCOO.