Sustapeneko kontseilari Luis Zarraluqui Ortigosa-k Santa Lucía fundazioari lagatako lau etxebizitzetatik bat bisitatu du gaur eguerdian. Haietan, datorren astelehenetik aurrera, hiru gazte bizitzen jarriko dira, eta haien atzetik beste pertsona batzuk joango dira, gainerako pisuak birgaitzeko obrak amaitu ahala.

2013ko azaroaren 11n Navarra de Suelo y Vivienda (Nasuvinsa) enpresa publikoak Santa Lucía-Adsis fundazioarekin etxebizitzen prekariozko lagapeneko lau kontratu sinatu zituen okupatu aurretik aurrez berritze-lanak behar zituztenak. Fundazioak ez du ezer ordaintzen alokairuagatik, eta konpontzeko nahiz komunitateko gastuak, hornidurak eta IBIa ordaintzeko konpromisoa hartzen du.

Lau etxebizitzak "Emantzipazio Prozesurako Laguntza" proiekturako dira; haren helburua adingabeen zentroetatik datozen gazte nafarrei ostatu ematea da, irteten dutenean, adinez nagusiak direnean, helduen bizitzarako trantsizio-aldi horretan laguntza eman diezaieketen familia edo adiskideen harreman-euskarririk ez dutenak. Bizpahiru urteko egonaldiak dira eta gazteekin batera Santa Lucía-Adsis fundazioko teknikari bat dago laguntza emateko.

Nasuvinsak lagatako etxebizitza horiek bigarren eskukoak dira eta 62 nahiz 81 metro koadro artekoak dira. Indarrean dagoen legeriak eskatzen dituen bizitzeko baldintzak dituzte eta bizigarritasun-zedula nahiz eraginkortasun energetikoko ziurtagiria dituzte.

Kontratuan zehazten da Santa Lucía fundazioari hamar urterako lagako zaiola, eta trukean berritzeko lanak egingo dituela. Epe hori igarota, kontratua urtero luzatu ahalko da eta, gehienez ere, bost urtera arte. Ondoren, Santa Lucía-Adsis fundazioak Nasuvinsari itzuli beharko dio etxebizitza baldintza egokietan alokairu edo salerosketako merkatuan jartzeko.