Hezkuntza Departamentuak, Nafarroako Urruneko Hizkuntzen Eskola Ofizialaren bitartez (EOIDNA), atzerriko hizkuntzak egiaztatzeko aukera emango die Nafarroako Unibertsitate Publikoko (NUP) ikasleei, DBH eta Batxilergoko ikasleekin dagoeneko egiten duen moduan azterketa ofizial eta bateratuen bidez, eta Nafarroa guztian aldi berean egiten direnak.

Lankidetza horren oinarriak finkatzeko, Hezkuntza kontseilari José Iribasek ostiral honetan hitzarmen bat izenpetu du aipatutako zentroko Ikasketen Antolamenduko errektoreorde Jesús María Pintorekin.

NUPeko ikasleek ziurtagiri ofiziala eskuratzeko aukera ematen duten azterketa horietara aurkeztu ahal izatea da kontua, Nafarroako hizkuntza ofizialen eskoletan izena emandako beste edozein ikasle bezala.

Horretarako, aurreikusita dago EOIDNAk NUPko irakasleei eta Nafarroako Unibertsitate Publikoko Hizkuntzen Goi Mailako Zentroko irakasleei aholkularitza eman diezaien eta ziurtagiri ofizial horiek eskuratzeko probetarako ikasleak prestatzen laguntzen dutenak. Aholkularitza hori bi eratara emango dute: alde batetik, proba edo azterketen ezaugarri eta berezitasunen berri emanez, eta bestetik, prestakuntzako materialak ematen.

Ekimena datorren ikasturtean, 2014-2015ean, jarriko da abian era esperimental batean, eta NUPko ikasleei C1-eko ziurtagiri ofizialak (maila handia) eskuratzeko aukera emango zaie bereziki, eta baita B1-ekoak ere (aurreratua) ingeles, frantses eta alemaneko hizkuntzetan.

Ekimena ezarriko den lehen ikasturtean zehar guztira 200 plaza eskainiko dira, 120 ingeles-maila egiaztatzeko (C1 mailarako 80 eta B2 mailarako 40), eta 40 aleman eta frantseseko ezagutza egiaztatzeko (hizkuntza bakoitzean, 20 C1 mailarako eta beste 20 B2 mailarako).

Plaza horietako bat eskuratzeko zentroko edozein ikasle aurkeztu ahalko da, nahiz eta Haur Hezkuntzako eta Lehen Hezkuntzako Irakasle graduko ikasleak lehenetsiko diren, bai eta Bigarren Hezkuntzako Irakasleen Prestakuntzako Unibertsitate Masterrekoak ere, hezkuntza-sistemarekin zer lotura duten ikusirik.