Nafarroako Lehendakari Yolanda Barcinak Radako araztegia (Murillo el Cuende) inauguratu du ostiral honetan. Bertan udalerriko bostehun bat bizilagunen hondakin-urak tratatzen dira eta orain arte Celadillako sakanera isurtzen zirenak.

Instalazioan 893.773 euro inbertitu dira, eta kopuru horren % 80 Nafarroako Gobernuak finantzatu du, eta % 20 herritarrek zuzenean ur-ordainagiriarekin ordaintzen den saneamenduko kanonaren bitartez.

Sistema biologiko osoa du urak ingurune naturalera baldintza egokietan itzul daitezen. Bi dekantagailu eta iragazki biologiko bat ditu, 530 metro kubiko edukierarekin, ibaietako emarien arazketa naturaleko zirkuitua imitatzen duena; horrez gain, gordetzeko bi urmael ditu, 300 metro koadroko azalerarekin, eta bertara eramaten da ura ingurunera 390 metroko hustubide baten bidez itzuli aurretik.

Instalazioan segundoko batez beste 1,46 litroko emaria tratatzea aurreikusten da, zenbaitetan segundoko 3,5 litrora ere iritsiz. Nolanahi ere, segundoko 10,21 litro arteko gehieneko edukierarekin prestatu da etorkizuneko eskaeran gehikuntzak badaude behar bezala erantzuteko.

Biztanleriaren % 97aren urak tratatzen dira

Nafarroako Gobernua, NILSA enpresa publikoaren bidez, une hauetan araztegien eraikuntzan ari da lanean 500 edo biztanle gutxiagoko udalerrien hondakin-urak tratatzeko, eta haien artean kokatzen da Radakoa.

1989ko Ibaien Saneamenduko Plan Zuzentzailean zehaztutako prozesua biztanle gehieneko udalerrietatik hasita egin da, biztanle gutxienekoak amaierarako utziz. Hala, gaur egun Nafarroan dauden ehun bat araztegik nafarren % 97 baino gehiagoren urak tratatzen dituzte ingurumenera itzuli aurretik. Zehazki, Nafarroa guztian iaz araztutako ur-bolumena 85,6 milioi metro kubiko izan zen.

NILSAk lan egiten duen egungo beste proiektu batzuk ondorengoak dira: Erro, Artieda (Urraulbeiti), Irañeta, Figarol (Zarrakaztelu) eta Liedena. Haiek guztiak gehienez ere bostehun biztanleko tarte horretan daude.