Horregatik, esan bezala, Osasun Departamentuak Iruñeko herritar guztiei gomendioa egin die oinarrizko osasun-laguntza behar izanez gero Osasunbidea-Nafarroako Osasun Zerbitzuak haien eskura jarritako sistema erabiltzeko, haien osasun-zentroetan eta horiek laguntza ematen duten ordutegian, arrunta zein presazkoa den edozer artatzeko. Larrialdiren batean osasun-zerbitzuak behar izanez gero, aldiz, San Martín zentrora (erdigunean) edo kanpoaldeko zentroetara (Ermitagaña, Arrotxapea eta Burlata) joatea gomendatu dute. Horrez gain, Iruñeko eta eskualdeko herritarrei zein bisitariei eskatu zaie jaietan NOGeko larrialdi-zerbitzuetara, lehengo Nafarroako Ospitalea eta Virgen del Camino ospitalea, jotzea saihesteko, ahal den neurrian, izan ere, bertan, kasu larriak artatzen dituzte bereziki.

Luxazioek, ebakiek, kontusio txikiek eta bestelako ezbehar arinek benetan presazko ospitale-laguntza behar dutenak artatzea eragotz dezakete. Halakoak ospitalez kanpoko instalazioetan arta daitezke behar bezala.

Iruñeko eta eskualdeko osasun-garraioaren sare arruntari dagokionez, bizi-euskarri aurreratuko 3 anbulantzia, oinarrizko bizi-euskarriko 3 anbulantzia eta osasun-laguntza emateko prestatuta dagoen helikoptero bat egon ohi dira, baina, jaietan, bizi-euskarri aurreratuko beste anbulantzia bat, oinarrizko bizi-euskarriko beste 3 anbulantzia eta laguntzeko beste ibilgailu batzuk erabiliko dira. Gainera, asteburuetan, oinarrizko bizi-euskarriko beste bi anbulantzia jarrita indartuko dira baliabideak.

Entzierroetarako antolaketa berezia

Entzierroetako zaurituak artatzeko antolaketa berezia hesien ondoko 16 sorospengunek osatzen dute. Horietatik 12 arreta medikoa emateko prestatuta egongo dira. Entzierroaren ibilbideak 848,6 metro ditu, beraz, sorospengune bat egongo da 53 metro inguruko tarte bakoitzeko. Arreta emateko antolaketa osoa Nafarroako Larrialdietako Agentziaren egoitzako 112 SOS Nafarroa zentrotik koordinatuko da.

Entzierroetako sorospenguneak Santo Domingo aldaparen hasieran (Hezkuntza Departamentuaren egoitza), Nafarroako Museoko eskaileretan, Santiago plazan (udaletxearen atzealdea), San Zernin elizako eskaileretan, udaletxean (2), Mercaderes kalean (2), Xabier Jaitsiera (2), Espoz y Mina zeharkalea, Telleria, Ahumada dukea, Labriteko aldapa, Nafarroako Gorteak (telefonoak edo hegoaldeko etxartea) eta Hemingway (iparraldeko etxartea).

Gainera, arreta medikoa emateko prestatuta dagoen sorospengune bakoitzak osasun-garraioa izango du: bizi-euskarri aurreratuko 9 anbulantzia eta oinarrizko bizi-euskarriko 6 anbulantzia. Azken horietatik 2 Gaztelu plazan jarriko dira, 112 SOS Nafarroa zentroak aginduta osasun-garraio gehiago behar dituen ibilbideko gunera eramateko.

Laguntza emateko antolaketan, gutxienez 12 mediku, 12 EUD, 21 garraio-teknikari, 50 sorosle 8 komunikazio-langile eta 8 gune-koordinatzaile izango dira. Ibilbideko osasun-laguntza Gurutze Gorriko, DYAko, suhiltzaileen parkeko eta Osasunbideko baliabide eta osasun-langileen bidez emango da. Lurreko osasun-laguntza eman eta esleituko zaien eremutik ospitalera anbulantzia eraman beharko dute eta, bitartean, 112 SOS Nafarroa zentro koordinatzaileari artatzen diren pertsonen zaurien eta lesioen inguruko informazioa eman beharko diote denbora errealean.

112 SOS Nafarroa zentro koordinatzailea arduratuko da osasun-laguntza antolatzeaz eta zaurituak osasun-zentroetara eramateko moduaz, hiru helburu betetzea oinarri hartuta: zauriturik larrienak izatea osapitaleetara iristen diren lehenak, ospitale bakoitzera ezaugarri teknikoei eta gaitasunei dagokienez egokienak direnak iristea eta zaurituak laguntza-premien arabera bideratzea ospitaleetara.

Aurten, lehen aldiz, entzierroetan arreta emateko antolaketan parte hartzen duten Osasunbidea-NOZeko profesionalak eta zezen-plazako erizaintza eta 112 zentro koordinatzailea komunikatuta egongo dira euren artean, langile guztiek izan dezaten gorabeheren berri, zauritu larrienen arretari lehentasuna eman eta arreta hori koordinatzeko eta lekualdatzeak bizkor eta modu eraginkorrean egin daitezen.

Vázquez de Mella, asteburuetan

Asteburuetan, aurreko urteetan bezala, Oinarrizko Osasun Laguntzako unitate bat jarriko da Vázquez de Mella ikastetxeko patioan, jaietan gerta daitezkeen patologia arinak artatzeko.

Bertan, lehen mailako arreta eskainiko da eta, behar izanez gero, larritasun handiagoko ezaugarriak dituzten pazienteak Dr. San Martín anbulatoriora edo Nafarroako Ospitalegunera bideratuko dira. Ospitalean, bertako medikuek, erizainek eta laguntzaileek etengabeko arreta eskainiko dute uztailaren 5eko (larunbata) 21:00etatik uztailaren 7ko (astelehena) 9:00etara, eta uztailaren 11ko 21:00etatik uztailaren 14ko 9:00etara, etenik egin gabe, Osasunbideren laguntzarekin.

Entzierroko zaurituei buruzko informazioa

Osasun Departamentuak prentsa-areto bat prestatu du NOGeko larrialdien eraikin berrian. Bertan, egunero, entzierroan zauritutakoei buruzko informazio guztia emango da. Kokapen hori aukeratu da aldapatik eta A ospitaleko larrialdi-zerbitzutik gertu dagoelako, izan ere, ekitaldiaren berri egunero ematen duten hedabideak han egoten dira.

Nahi duten kazetariek entzierroa zuzenean jarraitu ahal izango dute prentsa-aretotik bertatik, telebista-pantaila bat jarri dute bertan eta. Gainera, egunero bi aldiz eskainiko da informazioa: lehenengo, 8:25-8:30ean, goiz horretan izandako zaurituen lehen aurrerapen bat egingo dute eta, bigarren, 9:00etan, egun horretako zaurituei buruzko informazio guztia emango da. Oscar Gorría NOGeko Zerbitzu Kirurgikoetako zuzendariordea eta Inmaculada Gimena NOGeko Zerbitzu Medikoen zuzendariordea azalduko dira egunero.

Prentsa-aretoa izango da Sanferminetan osasunaren inguruan sortzen den informazio guztia emateko tokia.