Sustapen kontseilari Luis Zarraluqui eta Eusko Jaurlaritzako Ingurumen eta Lurralde Politikako kontseilari Ana Oregik gaur, ostirala, Prestazio Handiko Trenaren bidez (PHT) bi komunitateak lotzeko garrantzia azpimarratu dute. Biek ala biek nabarmendu dute, Ebro "funtsezko ardatz estrategikoa" dela, Europarako bi korridore lotzen dituena: Kantabriko-Mediterraneoa eta Atlantikoa. Gainera, bi kontseilariak bat etorri dira esatean 2015ean, Ministerioak, bi komunitateen arteko lotunea nola gauzatu behar den zehaztu beharko duela.

Nafarroako Unibertsitateko Ingurumen eta Eraikuntza Diseinuari buruzko jardunaldiaren esparruan egindako bilkuran, Zarraluqui kontseilariak adierazi du, loturen etorkizuna "trenbidearen bidez egindako hirien sare batekin" eraikiko dela eta, horretarako, "funtsezkoa" dela aurrera bizkor egitea.

Bestalde, Oregik aipatu du "oso garrantzitsua" dela "Y"-a Nafarroarekin lotzea; izan ere, "era honetako azpiegitura baten onurak kalkulaezinak dira, bi komunitateetarako eta Penintsulako iparraldeko eta Akitaniako gure inguru geografikorako ere"; bi eskualdeek duten kokapen geografikoa azpimarratu behar da salgaiak Europara zama-hausturatik gabe atera daitezen.

Alde horretatik, Eusko Jaurlaritzako Euskotreneko zuzendari Imanol Lezak aipatu du Paris eta Tours arteko ibilbidea 2017rako amaituta izatea aurreikusten dela; beraz, bi administrazioek garrantzitsua ikusten dute beraien proiektuak "lehenbailehen" sustatzea.

Gainera, Oregik Zarraluquiri azaldu dio Eusko Jaurlaritza Estatuak emandako agindua betetzen ari dela "Y"-a edo abiadura handiko euskal trenbide-sare berria Gipuzkoako zatian eraikitzeko, eta Gobernu zentralari behartzen dio "bere konpromisoa lehenbailehen bete dezan Bizkaiko eta hiru hiriburuetarako sarbideko lanak garatzeko, Bergarako lotunekoak eta hiru adarren elkargune-puntukoez gain". Lotune hori, jakina denez, bost azpizatitan banatuta dago, eta haietatik bat esleituta dago eta beste bat lizitatzen ari dira.

Azkenik, gogora ekarri behar da Sustapen Ministerioak, Adif Alta Velocidad Estatuko enpresaren bidez, Castejon-Iruña abiadura handiko etorkizuneko linea Zaragoza-Altsasu egungo linea arruntaren ibilbideari lotzeko proiektuaren idazketa, Saitec eta Pedeltak osatutako ABEEri 216.217,7 euroan (BEZa gabe) eta 18 hilabeteko epearekin esleitu ziola berriki.