Estrategia horrek zenbait gai jasoko ditu, esaterako: Pirinioetako iragazkortasuna; lanbide-heziketako eta mugikortasuneko trukeak; zientzia, teknologia eta enpresetako ekintza integratuak abian jartzea; elkartasuna eta Pirinioetako identitatea garatzea; eta, azkenik, ingurumena, klima, lurraldearen plangintza eta turismoa.

PLEren asmoa plana inplikatutako eskualdeetako eragile nagusien laguntzarekin egitea da ardatz estrategikoek lurraldeetako benetako kezkak sar ditzaten.

Bileran izandako agintariek adierazpen instituzional bat izenpetu dute ere; haren barnean, Pirinioetako Plan Estrategikoko lanen hasiera iragartzeaz gain, beste gai batzuk sartzen dira, esaterako: enpresen berrikuntza eta lehiakortasuna indartzeko nahia, PLEko lurraldeko hizkuntzekiko konpromisoa, Klima Aldaketaren Pirinioetako Behatokiari jarraipena ematea, Pirinioak gurutzatzeko arazoari erantzuna emango dion garraio iraunkor bat garatzea, eta POCTEFA proiektuen bigarren deialdian parte hartzeko gonbita.

Nafarroako ordezkaritzaz gain, hitzorduan izan dira ere PLEko egungo lehendakari eta Nouvelle-Aquitanie-ko Eskualde Kontseiluko presidentea Alain Rousset; Euskal Autonomia Erkidegoko Kanpo Harremanetarako idazkari nagusi Marian Elorza; Occitanie/Pyrénées-Méditerranée Eskualde Kontseiluko Europako Gaietarako lehendakariorde Guillome Cros; Andorrako mugaz gaindiko erakundeko idazkari nagusi Pere Roquet; Aragoiko Lurralde Antolaketako kontseilari Jose Luis Soro eta Kataluniako Sustapen Ekonomikoa Konpetentzia eta Erregulazioko zuzendari nagusi Albert Castellanos.

Pirinioetako Lan Elkartea mugaz gaindiko lankidetzarako eskualde arteko erakunde bat da, 1983an sortu zen, eta haren barnean Pirinioetako katean elkarrekin bizi diren lurralde-kolektibitateak daude. Kideak dira: Nouvelle-Aquitanie eta Occitanie/Pyrénées-Méditerranée Frantziako eskualdeak, Aragoi, Katalunia, EAE eta Nafarroako autonomia erkidegoak eta Andorrako Printzerria.

PLEren helburu nagusia Pirinioen garapenean laguntza ematea da bertako erronkak kontuan hartuz eta hango aberastasunak babestuz, eta herritarren bizi-kalitatea hobetzeko asmoz. Haren kokapen geografiko eta politikoaren berezitasunagatik, PLEk hainbat legedi jaso behar ditu eta erakunde askorekin lan egin behar du (Estatuak, Frantziako toki-erakundeak, autonomia erkidegoak eta gainerako eragile publiko eta pribatuak). Testuinguru horretan, trukerako gune bihurtzen da alor hauetan arazo komunak konpontzeko helburuarekin: garraioa, prestakuntza, ikerketa, ondarea, garapen iraunkorra, turismoa eta beste batzuk; horretarako, kideek gaien araberako batzordeetan lan egiten dute. Gainera, proposamenak sortzeko gune da, ukitzen duten gaietan estatuko eta Europako eztabaidetan eragina izan dezan.

PLEri bultzada berri bat emateko asmoz, kideek 2005ean mugaz gaindiko lankidetzarako administrazio arteko hitzarmen bat sinatu zuten eta, horri esker, PLEren Partzuergoa eratu zen.

Izaera juridikoari esker, Partzuergoak hainbat alor garrantzitsutan eskumenak eta ardurak izan ditzake, esaterako: Europako programen kudeaketa haren finantzaketan, bai eta proiektu komunak abian jartzeko ere. Gaur egun, 2014-2020 epeko Espainia-Frantzia-Andorra Lurralde Lankidetzarako Programa Eragilea (POCTEFA) Kudeatzeko Aginpidea da.

Gogora ekarri behar da Nafarroa lehen deialdi honetan hautatutako proiektuen erdietan dagoela ia. Zehazki, 25 proiektuk bazkide nafarrak dituzte eta haiek egikaritzeko 8,7 milioiko diru-laguntza dute, Eskualde Garapeneko Europako Funtsetik jasotakoak.