Nafarroako Lehendakariak, Uxue Barkosek, Nafarroak FITURREN goizean egindako ekitaldi instituzionalean nabarmendu du Foru Erkidegoak iaztik %30 gehitu duela Turismorako jarritako aurrekontua, eta proiektu estrategiko bat abian jarri duela, Nafarroako ekonomian eta gizartean duen tarte eta garrantzia estrategikoa ematen diona, proiektu parte-hartzailea eta orekatua, esandakoaren arabera, etorkizunera begira urratsak markatuko dituena.

"Baina, eta batez ere, benetan harro gaude Nafarroako turismoak bere lekua hartu duelako Erkidegoaren egitura eta estrategia ekonomiko eta sozialaren barnean", esan du Barkos Lehendakariak. S3-n duen espazioa eta protagonismoa azpimarratu nahi izan ditu, Nafarroako Estrategia Adimentsua, Nafarroako sektore giltzarriak jasotzen dituen plana. "Eta hori egingo du –gehitu du- turismoak hazteko gaitasuna duelako eta errentagarritasun ekonomikoa eta soziala eskaintzen dituelako".

Jarraian, Lehendakariak turismoaren zeharkako jardueraren izaera azpimarratu du. "Ekonomia eta enplegua da, ondarea, gizartea eta kultura. Eta, aldagai horiek guztiak jokoan jartzen dituenez, Nafarroa kanpora proiektatzen laguntzen digu. Baita pentsatzen ere. Modu horretan, hausnarketa kolektibo eta estrategiko horren ondorioz, Nafarroako Gobernuak etorkizuneko lurraldearen eredua zutik jartzeko egiten duen apustua adierazten eta islatzen du, ziurrenik sektore gutxi batzuek bezala, gazteak oinarri hartuta eta dikotomia faltsuak gainditzeko gaitasunarekin, globala edo tokikoa, beltza edo zuria edo teknologikoa edo gizatiarra edo apokaliptikoa edo integratua esaten diguten horiek, hain zuzen".

"Dikotomia horiek barnean hartzen eta gainditzen dituen lurralde-ereduaren aldeko apustua egiten dugu guk", ziurtatu du Uxue Barkosek, "Kultura aldetik, adimentsua eta iraunkorra den Lurraldea deituriko Nafarroaren aldeko apustua. Lurralde irekia, inklusiboa, landa eta hiri arteko orekarekin, nafarra izatearen modu ezberdinak errespetatuaz. Zentzu zabalean ulertuta, prestakuntza teknologikoa zein gizatiarra oso baliagarriak dituena. Halaber, lehiakortasuna bultzatuko da sormen-inguruneetan. Globala eta tokikoa ez dira bateraezinak izango, eta, azkenik, Nafarroako gizarte osoa iraunkortasunaren, ingurumenaren, kulturaren eta gizartearen gainean sentsibilizatzearen aldeko apustua burutuko da. Belaunaldien arteko ituna, gazteengan eta etorkizunean pentsatuaz. Egoera horretan, turismoak eta Nafarroak asko dute esateko. Eta ze hobeto gai hau jorratzeko FITURREN edizio hau baino; izan ere, turismo iraunkorraren aldeko apustua egiten du; hain zuzen ere, Turismo Iraunkorraren Urtea izango den urte honetan".

Ondoren, Lehendakariak stand-aren gaia aipatu du: "Nafarroa eratzen duten bideak; Nafarroa ezagutzeko hamaika modu". "Iparretik hegora eta ekialdetik mendebaldera –esan du-, Nafarroa natura, kultura eta historia da. Batuketa horri esker, Foru Erkidegoa lurralde aproposa da ibilbideak, bideak eta bidezidorrak egiteko, tartean Donejakuerako Bidea protagonista handia izanik. Dakizuen moduan, Nafarroan frantsesa eta aragoiera batzen dira. Horrez gain, Mendi-ibilien Sarea dugu; hau da, erkidegoko altxor natural guztiak jasotzen dituzten ia 230 kilometro, basoak, ur-jauziak, ibaiko paseoak edo igoerak, gailurrak, hegaztiak behatzeko aukera, formazio geologikoak, mitologia, trikuharriak".

Uxue Barkosek, halaber, ondorengoa nabarmendu du: "landa-bideak, bide berdeak, Erriberako paisaia historikoak, edo Ederbidea eta Eurovelo bezalako proiektu berriak, Europako hainbat herrialdek mugikortasun iraunkorraren alde egindako proiektua, Inaziotar Bidea. Baliabide horiek ezinbesteko hitzorduak dira erromes, ibiltari eta txirrindularientzat". "Ibiltzea edo lurralde bat bizikletan egitea ez da berriketako gauza –esan du-. Kirola da, baina, aldi berean, askoz ere gehiago da. Gizarte garaikidearen zorigaitzentzat "antidotorik" onenetarikoa da. Bideak sokak bezala dira, gure geografia eta gure kultura kolektiboki ehuntzeko eta egituratzeko lotzen direnak; gainera, geure burua eta besteak deskubritzen eta aurkitzen laguntzen digute".

Azkenik, Barkos Lehendakariak azpimarratu nahi izan du Juan Mari Feliú, Carlos Aurensanz edo Gloria Gaztelu bezalako pertsonen erreferentzia; "gure paisaiak, gure historia, gure jendeak, batzuetan kosta ahala kosta, begiratzeko eta ulertzeko eta bisitatzen gaituztenak hartzeko moduaren zaindari arduratsuen eta eskuzabalen belaunaldiak eta belaunaldiak ordezkatzen dituzte. Aurten, ospatu egiten dugu eta saritzen ditugu. Halaber, aberastasun horri eusteko eta etorkizuneko bide berri horiek sortzeko konpromisoa hartzen dugu".

Beste esku-hartze batzuk

Ekitaldi instituzionalean zehar, Garapen Ekonomikoko lehendakariordea den Manu Ayerdik ere esku hartu du, Nafarroa egiten duten bideak, ondare-legatu bezala ulertuta, urte askotan zaindu dituzten elkarteen, taldeen eta pertsonen ordezkariekin batera. 

Modu horretan, Tuterako Carlos Aurensanz idazleak Erriberako paisaia historikoak aipatu ditu, Juan Mª Feliúk Nafarroa bidexken bitartez nola ezagutu azaldu du, eta Done Jakue Bideko Garesko Lagunen Elkarteko kideak, Gloria Gazteluk, ibilbide horrek Foru Erkidegoko arterako, kulturarako eta ondare historikorako duen garrantziaz hitz egin du.

Ekitaldia amaitzeko, "Caminos, cruces, cuerdas y nudos" dantza, musika eta poesia ikuskizuna izan dugu, Helena Lizari eta Laida Aldaz dantzarien eskutik. Silvia Munárrizek eta Mikel Casanellasek txalaparta jota, bideek lurralde bat eratzeko eta lurralde hori ezagutzea errazteko duten garrantzia antzeztu dute.

Azkenik, Cadreitako Marisol Jatetxeak Nafarroako gastronomiako honako hauek bezalako osagaiekin egindako pintxoak eskaini ditu; besteak beste, zainzuriak, Erronkariko eta Idiazabalgo gaztak, olioa, ziazerbak, borrajak, potxak, pikillo piperrak, txistorra, odolkia, txekorra eta arkumea.