Atsekabe handiz hartu du jaialdiak Luce Vigoren heriotzaren berria; Luce Vigok lanean jarraitzen zuen, Parisetik Nafarroako jaialdiarekin kolaboratzen ari zen. Bere oroimenez, hari eskainiko dio jaialdiak hamaikagarren edizio hau, eta omenaldi-saio bat programatuko du, bi lan eskainita: L’Atalante, Jean Vigoren film mitikoa, eta Cruzando caminos con Luce Vigo, Luce Iruñan egon zen aldi batean Jem Cohenen filmatutako erretratua.

Bederatzi luzemetrai eta bederatzi laburmetrai lehiatuko dira Punto de Vista Zinema Dokumentalaren Nazioarteko Jaialdiaren Atal Ofizialean-Eskualde Nagusian; martxoaren 6tik 11ra izango da jaialdia.

Europan, Amerikako Estatu Batuetan, Tunisian edo Brasilen, gaur egungo krisiak, ezegonkortasunak eta erresistentzia politikoak argiztatzen dituen aukeraketa bat da aurtengoa; non Treblinkarako trenen iragana Greziako eskuin muturrekoen manifestazioen kontrapuntua baiten; non ezgaitasuna eta haurtzaroa filmatzeko modua birplanteatzen baiten; non itxuraz kontrajarriak diren kulturen arteko elkarrizketa saiakerak frogatzen baitiren; non ama galtzearen min unibertsalari hitzak eta irudiak jartzen baitzaizkion, eta non errefuxiatuen Mediterraneoko dramari heltzen baitzaion.

Luciano Emmer egileari eskainitako atzerabegirakoa

2017ko edizioan, Punto de Vista jaialdiak atzerabegirakoa eskainiko dio Luciano Emmer (1918-2009) zinema- eta telebista-lan oparoaren egileari: hirurogeita hamar dokumental baino gehiago, fikziozko hamaika luzemetrai, eta publizitate-iragarki mordoxka. Bere lanik ezagunenak fikziozko film batzuk dira; berrogeita hamarreko hamarraldian, arrakasta handiz batu zituen film horietan neoerrealismoa eta italiar komedia. Hala ere, bere bizitzaren amaieran, Con aura… senz’aura bere autoerretratu sortzailea den filmean bere lana gogora ekartzean, temati jokatu zuen bere filmografiaren zati bat bakarrik gogoratzeko eta nabarmentzeko: arteari buruzko filmak. Horiekin iritsi zen zinemagintza profesionalera hogei urterekin, eta fikziozkoa ez zen zinemagintzaren lerro oso baten iraultza ekarri zuen.

Maria Cañas, Pilar Monsell eta Omar Razzak, gonbidatutako errealizadorean X Filmetan

Zazpigarren deialdi honetan, X Films proiektuak Espainian, fikziozkoa ez den zinemagintzaren panoraman egiten den zinemarik alternatiboaren onena ordezkatzen duten hiru gazte aukeratu ditu. Maria Cañas, Pilar Monsell eta Omar Razzak gazteek jaialdian zehar filmatutako entsegu-proiektu bat aurkeztuko due, Nafarroa izango duena oinarri geografikotzat.

Gainera, Velasco Brocaren Nuevo altar eskainiko du jaialdiak, 2016rako aukeratutako eta egindako proiektua; Tubal figura mitikoa aurkezten digu proiektu horrek, eta pertsonaia horrek bere tribuarekin batera zeharkatu zituen paisaiak eta lekuak erakusten ditu.

Bederatzi programatan banatutako berrogei film; horiexek osatzen dute, dagoeneko iragarritako inaugurazioko –II Castello (Massimo D´Anolfi, Martina Parenti, 2011)– eta itxierako –Nuestro siglo, Artavazd Pelechian, 1982– saioekin batera, Punto de Vista jaialdiaren aurtengo atzerabegirako tematikoa, HEGAN izenekoa, eta gizakiak hegan egiteko duen nahiari eskainitakoa, baina baita hegaztien hegaldiak ezkutatzen duenari, airearen osaerari, aireportuen egunerokotasunari, astronauta baten sentipenei, tranpolin-jauzilarien akrobaziei, lainoen botere hipnotikoari, xeke arabiarren zapelatzekiko pasioari, hegaldun izaki bihurtzeko saiakerei, zinemagilearen begirada bertikalari eta zeruko beste ibiltari batzuen abenturei eskainitakoa ere.

Filmen atal hori hainbat programatan dago banatuta, eta hegan egiteari buruz hausnartzeko gonbita egiten du: grabitatearen legea, erorketa, droneak, jauzi egitea, zeruaren azterketa, lainoen atzealdea, hegaztiak eta zeruko beste ibiltariak aztergai izango dira, bere saioen bitartez aireratze progresiboa proposatzen duen ideien azterketa honetan. Hasteko, bidaiariak lurrean atxikita, Italiako aireportu batean. Amaitzeko, kosmonauta sobietarrak, airean zintzilik. Tartean, hegaldia eta haren inguruabarrak. Zikloko bi film: Massimo D’Anolfiren eta Martina ParentirenII Castello, eta Artavazd Pelechianen Nuestro siglo izango dira inaugurazio- eta itxiera-saioetako protagonistak.

Zinemagile handien erretratuen zikloa

Dokumentalgile bikainen bost aurpegi edo profil aurkeztuko ditu Punto de Vista jaialdiak bere XI. edizio honetan, metazinema eskainiz, bere bertsiorik pertsonalenean: berak filmatu ordez, zinemagilea denean filmatua.

Bost musika-emanaldi egongo dira jaialdian, zinemaz harago doazen arte-adierazpideetara irekitzeko bere asmoan: Sherpa, Kokoshca, Gari, Cabezafuego eta Amorante izango dira edizio honetako bost kontzertuen protagonistak.

Gainera, ostiralean, hilak 10, Baluarteko Kongresuen Jauregiko sarrera nagusian, Amoranteren emanaldia egongo da; sarrera, irekia. 21:30ean hasiko da kontzertua.

Kirol horri eskainitako saio berezia antolatu du Punto de Vista jaialdiak. Jørgen Leth daniarraren bi film ikusteko aukera egongo da, 30 urteko aldearekin filmatutakoak, gure tradizioan denboraren joanak izan duen eragina ikusteko. Hori guztia, protagonista diren pilotarien parte-hartzearekin; filmaren ondoren egingo den eztabaidan izango dira. Baita Olatz Gonzalez Abrisketa antropologoa ere, gure frontoietan ibili zenean zinemagile daniarraren gidari izan zena, eta berarekin batera zuzendu zuena.

Hirian zehar hedatzeko helburuz, Punto de Vista Zinema Dokumentalaren Nazioarteko Jaialdiak, aldi bereko hainbat jarduera antolatu ditu XI. edizio honetan, Iruñeko eta eskualdeko 12 kultura-gunetan egingo direnak. Gayarre antzokian, La quinta pared izeneko antzerki dokumental zikloa eskainiko da; bi antzezlan aurkeztuko dira, errealitatea kontatzeko beste modu batzuk aldarrikatzen dituztenak. Otsailaren 5ean eta 7an, Maruja enamorada eta Nadia lanak taularatuko dituzte, fikziorik gabe, bere bizitza propioak protagonizatuko dituzten aktoreek. Bestalde, Niza eta Plaza Baluarte kafetegiek eta Civican zentroak, programa horren beste zati bat eskainiko dute; hain zuzen ere, Etiquette izeneko auto-antzerki lan bat. Ikusleek, bikoteka, mahaietako batean garatzen den ikuskizunean parte hartzeko aukera izango dute, aurikularren bitartez jasotzen dituzten jarraibideen arabera.

Gainera, Huarte Arte Garaikideko guneak zinema dokumentalari buruzko tailerra eskainiko du, Sergio Oksman zinemagile brasildarraren eskutik.

Jaialdiaren beste eginkizun sozial bat izango da ikastetxeetan egingo duen lana; zinema kontatzeko moduari buruz Oskar Alegria jaialdiaren zuzendari artistikoak prestatu duen tailerra eskainiko dute ikastetxeetan. Vazquez de Mella ikastetxe publikoan eta Jaso Ikastolan hasiko da ekimena, eta egitarauan "Inoiz ikusi gabeko filma" bezala iragarritako saio batean ikusi ahal izango dira ekimenaren emaitzak, ekimenaren ezustekoa gordetzeko.