Nafarroako Gobernuak gaurko lansaioan baimendu du bi urtetan 420.000 euroko inbertsioa egitea, Nafar Lansareak (Nafarroako Enplegu Zerbitzua) egiten dituen enplegurako laguntzen deialdiak kudeatzeko eta horien jarraipena egiteko sistema informatiko berria gara dezan.

Maria Solana Gobernuko bozeramaileak Gobernuaren lansaioaren ondorengo prentsaurrekoan azaldu duen bezala, inbertsio hori Eskubide Sozialetako Departamentuaren mendeko Nafar Lansare zerbitzuaren modernizazio teknologikoko prozesuaren barruan sartzen da; zerbitzu horren informatikara bideratutako aurrekontua nabarmen igo da 2015etik (105.000 euro) 2017ra (505.000 euro).

Faseka ezarriko da tresna berri hori, eta 2019ko lehenengo seihilekoan egongo da erabat ezarrita. Gaur egun, hainbat aplikazio eta programaren bitartez egiten da laguntza horien kudeaketa informatikoa: Access, Word edo Excel. Zatiketa horrek zaildu egiten du laguntzen jarraipena egitea edo laguntza horiei buruzko informazioa eskuratzea.

Nafar Lansare zerbitzuak uste du jarduketak edo programak eraginkorrak izateko eta horien inpaktua ezagutzeko, ezinbestekoa dela emaitzak kuantitatiboki neurtzea eta jarraipen bat egitea; eta horretarako ezinbestekoa da laguntza guztien kudeaketa homogeneoa egitea ahalbidetuko duen sistema bat, informazioa herritarren eta organismoaren beraren eskura jarriko duena, kudeaketa gardena egin ahal izan dadin.

Bulkada teknologiko horrek eskatzen dituen beharrak definitzeko, Nafar Lansarek Informatikako Zuzendaritza Nagusiaren laguntzarekin diseinatu du tresna hori; halaber, inguruko erkidegoetako enplegu zerbitzuekin hainbat batzar egin ditu –hala nola Euskadi, Aragoi eta Errioxa–, informazioa elkartrukatzeko eta jardunbide egokiak partekatzeko helburuz.