Ikastaroa doakoa da, Nafar Lansarek hartuko baitu bere gain irakasleen kostua, eta Ultzama Fundazioak materialena. "Arlo publikoaren eta pribatuaren arteko lankidetzaren beste adibide bat da, alde biak ateratzen dira irabazten, eta kasu honetan, gainera, efektu biderkatzailearekin; izan ere, Espezialitateen Katalogo Nazionalean sartuko dugu ikastaroa, eta Estatu osora heda daiteke", adierazi du Ignacio Catalan Nafar Lansareko Gaitasun Profesionalen Garapenerako zerbitzuaren zuzendariak.

Abeltegi Eskolako Beatriz Otxotorenak, berriz, ikastaro honek Ultzamaren garapen jasangarrian eta nekazal turismoan izango duen eragina azpimarratu du, eraikuntza-proiektuak onurak ekarriko baitizkio eskualdeari, "ahaztu gabe bertako janariei buruzko sentsibilizazio-lana egiten ari garela". Eskualdeko udal ordezkariak egon dira prentsaurrekoan.

Hautapen-prozesua

630 bat orduko iraupena izango du ikastaroak eta praktikoa izango da batez ere. Igeltserotzako (zimenduak, lastozko hormak, entokadura buztintsuak, karea eta sabai biziak), arotz-lanetako (egitura, lurzorua eta teilatua) eta berogailu- eta hozte-sistema pasiboetako (naturalak) prestakuntza eskainiko zaie ikasleei, bai eta lan-arriskuen prebentzioko gaiak.

Interesatuek izena eman dezakete www.formaccion.info atarian, cenifer.com webgunean eta enplegu-agentzietan. Izena ematen dutenen artean hautapen-prozesu bat egingo da; eraikuntzaren arloan duten esperientzia eta ibilbidea eta izangaien motibazioa hartuko dira kontuan. 07:00etatik 15:00etara izango dira eskolak, maiatzaren 9tik irailaren 8ra.

Hamar ikasleko bi talde egingo dira, eta bi irakasle izango ditu talde bakoitzak. "Oso ikastaro osoa eta praktikoa izango da, eta arreta ia pertsonalizatua eskainiko zaie ikasleei", adierazi du CENIFER zentroko Alberto Diazek.

Haurrei, ikasleei, familiei eta nekazaritzako turistei zuzenduta dago Slow Food Eskola. Janari egokiari (osasungarria eta kalitatezkoa) buruz sentsibilizatzeaz gain, janari zuzenari (prezio egokia nekazari eta abeltzainentzat) eta garbiari (pestizidarik gabe) eta hurbilekoari (100 kilometro baino gutxiago) buruz sentsibilizatuko du eskolak. "Bizitza-filosofia bat ere erakutsiko du: erritmoak eta denborak errespetatzearen, aniztasunaren, kontzientziaren garapenaren, parte-hartzearen eta beste hainbat alderdiren garrantzia", esan du Otxotorenak. Urrian inauguratuko dutela aurreikusten dute.

Ez dago mundu osoan ikaskuntza horiek biztanleria osoari eskaintzen dizkion horrelako zentrorik; izan ere, dagoen unibertsitate bakarra Italian dago, eta sukaldariei bakarrik zuzendutakoa da. Ultzama Fundazioak eskola eraikitzeko Slow Fooden baimena eskuratu du eta, Caja Navarra Fundazioaren laguntzarekin, era guztietako erakundeen laguntza jasotzen ari da (Nafarroako Gobernua, tokiko administrazioak, elikadurarekin lotutako enpresak, ikerkuntza-zentroak, unibertsitateak, etab.).

Eraikuntza konbentzionalaren aldean (hormigoia eta adreiluak), ingurumenarekiko errespetua (aztarna ekologiko txikiagoa), osasunarekiko errespetua (material toxiko gutxiago), energia-eraginkortasuna (isolamendu termikoa, berogailu eta hozte-sistema artifizialaren erabilera txikiagoarekin) eta obraren kostua (kalitate/prezio harremana) dira eskaintzen dituen abantailak.

Nafarroan, sistema hori erabili da zuzkidura-eraikin batzuetan (Lorenean, Noaingo Zentzuen Parkean; Berriozarko gaztetxean), turismo-erabilerako eraikinetan (Arbizuko kanpina), bai eta etxebizitza batzuetan ere (Usun). Frantzian, eskola publikoak ere eraiki dituzte material horiekin. "Bioeraikuntza ez da turismo-azpiegituretan bakarrik aplikatzen. Bizitegien eta zuzkidura publikoen esparrura ere ari da hedatzen. Gero eta jende gehiagok eskatzen du, alergia, kontzientzia edo energia-gastu txikiagoa tarteko", azpimarratu du Iñaki Uriak.