Iruñeko San Martin Doktorea osasun-zentroak larrialdi pediatrikoetarako berariazko gune bereizi bat irekiko du gaur, zerbitzu eta tratamendu berriak emateko prestatua, behaketa-gela bat egokitzeari esker, non arnas terapiak eta zain barneko tratamenduak eman ahal izango baitira aurrerantzean.

Hala, adin txikikoentzako larrialdiak ez dira Traumatologia-kontsulten leku berean egongo, eta beharrezko bitartekoak eta gelak izango dituzte, adin pediatrikoan dauden pazienteak eraikineko helduen arretaguneetara lekualdatzen ibili beharrik gabe, edo Nafarroako Ospitalegunera (NOG) bidali beharrik gabe, orain arte gertatzen zen bezala.

Osasuneko kontseilari Fernando Domínguez gaur goizean izan da instalazioetan Osasunbideko kudeatzaile Oscar Morachorekin, Lehen Mailako Arretako zuzendari kudeatzaile Santos Induráinekin, Ospitalez Kanpoko Larrialdi Zerbitzuetako buru Kiko Betelurekin eta San Martingo pediatria-ataleko koordinatzaile Noelia Álvarezekin. Adin txikikoentzako instalazio berriak ezagutu dituzte, zeinak lehenengo solairuan baitaude, ezkerretara —orain arte, eskuinetara zeuden—.

"Instalazio berriei esker, paziente pediatrikoari egokitutako gune bat izango dugu, eta haren aldaketarik garrantzitsuena da behaketarako gune bat izango duela.

Joan den urriaren 31ra arte, San Martingo larrialdi pediatrikoen zerbitzuan, 18.043 larrialdi pediatriko artatu dira, 15:00etatik 20:00etarako ordutegian, lanegunetan, eta 8:00etatik 20:00etarako ordutegian larunbatetan, igandetan eta jaiegunetan.

Haur-dekorazioa, klimatizazioa eta wifi bidezko Interneterako sarbidea

San Martinen larrialdi pediatrikoak artatzeko berariazko gune berri bat sortzearen ondorioz, berrantolatu eta birmoldatu egin behar izan dira zentroko lehenengo, bigarren eta laugarren solairuak. Horretarako, 407.654　euro inbertitu dira: 302.901　euro obretarako, 91.053　euro ekipamendu orokorrerako, eta 13.700　euro ekipamendu informatikorako.

Guneak egokitu egin dira, hara joango direnentzat erosoagoak eta atseginagoak izan daitezen, Osasunbideren Humanizazio Estrategiari jarraikiz.

Haurren larrialdiak pediatriako hiru gelatan eta erizaintzako hiru kontsultatan artatuko dira.

Larrialdi pediatrikoak birkokatzeari eta zabaltzeari esker, zerbitzu berriak eman daitezke, eta pazienteentzako eta haien familientzako arreta-zirkuitu integratuagoa eta erosoagoa sor daiteke.

Bestalde, erizaintzako beste gela batean sendaketa eta tratamendu jakin batzuk egin ahal izango dira, hala nola bendatzeak eta suturak —orain arte, helduen gunera bideratu behar ziren, edo triaje-geletan egin behar ziren, eta, ondorioz, kontsulta-erritmoa moteldu egiten zen une batzuetan—.

Intimitatea zaintzeko gela berri bat, eta laugarren solairuaren erabateko birmoldaketa

San Martin Doktorea osasun-zentroko lehenengo solairuaren birmoldaketa-lanak aprobetxatu dira, gainera, Zuzendaritza-bulego bat, bilera-gela txiki bat eta arreta berezirako itxarongela bat gaitzeko, azken hau pazienteak intimitate handiagoko gune batean egon nahi duenerako (genero-indarkeria eta bestelako arrazoiak).

Larrialdi pediatrikoetarako gune berri hori sortzearen ondorioz, bigarren solairura aldatu dira gune horretan zeuden Oftalmologia-kontsultak, eta Otorrinolaringologia eta Anestesia laugarren solairura pasatu dira, erabat birmoldatutako gune berri batera.

Laugarren solairuko gune berriak 11 gela ditu: lau Anestesia-kontsultetarako (Erizaintzako bi eta Medikuntzako bi), beste lau Otorrinolaringologiarako, miatzeen gela bat, eta audiometriak egiteko bi gela.