Musika-kontzertuak eta ekitaldi instituzionalak izango dira Gobernuak Nafarroaren Eguna dela eta antolatutako ospakizunen protagonista. Barkos Lehendakaria izango da Nafarroako Erresumari egingo zaion omenaldiaren buru, Nafarroako Errege Artxibo Nagusiaren parean (Iruñeko Nafarroako erregeen jauregi zaharra); ondoren, Nafarroako Urrezko Domina emango dio Saray Bularreko Minbiziaren Nafarroako Elkarteari.

Kultura-ekitaldien programaren barnean ia ehun kontzertu izango dira abesbatza eta musika-banden eskutik, eta bai Nazioen Jaialdia ere, doakoa. Azken horretarako, Gayarre Antzokiko leihatiletan jaso ahalko dira gonbidapenak.

Lehen ekitaldi instituzionala abenduaren 3an ospatuko da, astelehenez, goizeko 11:15etan, Nafarroako Artxibo Nagusiaren kanpoaldean. Barkos Lehendakariarekin batera izango dira bertan Ainhoa Aznárez Parlamentuko lehendakaria eta merindadeetako hiri nagusietako alkateak (Iruña, Tutera, Lizarra, Zangoza eta Erriberri). Lore-eskaintza egingo diote Nafarroako Erresumari, egungo Nafarroaren sustrai den heinean, haren omenez eraikitako monolitoan. Ekitaldia irekia izango da eta gaiteroek parte hartuko dute bertan, bost merindadeetako eta Nafarroa Behereko dantzarien taldeekin batekin batera.

Barkos Lehendakaria izango da, eguerdiko 12:00etan, Nafarroako Urrezko Dominaren entregaren ekitaldi instituzionalaren buru. Saray Bularreko Minbiziaren Nafarroako Elkarteari emango zaio aurten domina. Hitzordua Kultura, Kirol eta Gazteria Saileko klaustro isabeldarrean ospatuko da. Zangozako Nora Abesbatzaren esku egingo dira ekitaldiaren parte musikalak, Bruno Jiménezen gidaritzapean.

Sari-ematea zuzenean emango da streaming bidez Nafarroako Gobernuaren youtube-ko kanalean eta aurrez grabatuta astelehen arratsaldean, Nafarroako Telebistan.

Nazioen Jaialdia ere abenduaren 3an bertan abiatuko da Gayarre Antzokian, eguerdiko 12:00etan. Egun Nafarroan bizi diren pertsonen jatorrizko kultura desberdinen erakustaldia izango da. Ostiraletik abiatuta (azaroak 30), antzokiko leihatiletan jaso ahal izango dira doako gonbidapenak.

Jaialdian zortzi talde folkloriko izango dira, Peru, Venezuela, Bolivia, Bulgaria, Ukraina eta Ginea Konakryko elkarteetakoak, eta baita Nabda Kultura Elkarte Arabiarrekoak eta Afrikako Flora Elkartekoak, Ginea Bissau, Liberia, Ginea Konakry, Mali, Boli Kosta, Ghana eta Saharako emakumeak biltzen dituztenak. Pilar Chozasek zuzenduko du ikuskizuna.