navarra.es
Castellano | Euskara | Français | English
Ezagutzera eman
13/1992 Foru Legea, azaroaren 19koa, Ondarearen Gaineko Zergari buruzkoa
(Jatorrizkoa 1992ko 145. NAOn argitaratua, abenduaren 2an. Aldaketak: 18/2006 Foru Legea, abenduaren 27koa; 20/2000 Foru Legea, abenduaren 29koa; 22/2008 Foru Legea, abenduaren 24koa; 14/1995 Foru Legea, abenduaren 29koa; 16/2003 Foru Legea, martxoaren 17koa; 23/1998 Foru Legea, abenduaren 30ekoa; 13/2000 Foru Legea, abenduaren 14koa; 19/2005 Foru Legea, abenduaren 29koa; 22/1997 Foru Legea, abenduaren 30ekoa; 20/2011 Foru Legea, abenduaren 28koa; 23/2012 Foru Legea, abenduaren 26koa; 38/2013 Foru Legea, abenduaren 28koa; 29/2014 Foru Legea, abenduaren 24koa)
Atarikoa
Foru Komunitateko tributu esparruan, Ondarearen gaineko Zerga, Foru Diputazioak 1977.eko abenduaren 28an hartutako Erabakiaren bidez, ez-ohizkotasunez ezarri zuen.
Ondarearen gaineko Zerga berri honen arauek egoera horri bukaera ematen diote eta ondoko oinarrizko helburuak onartzen:
Lehena.-Zergaren egitura tributuaren norbanakotasunari egokitzea, Konstituzio Auzitegiak 1989.eko otsailaren 20an emandako Epaia betez eta beraz, famili unitatearen ondareen metatzeko asmoak baztertuz.
Bigarrena.-Kapitala kargatzearen bidez tributu sistemaren progresibitatea indartzeak, ahalmen ekonomikoaren berariazko agerpen gisa, berarekin dakar laneko errenten alde jartzea, kapitalaren errenten ondorio direnen kaltetan.
Tributuaren progresibitate hori, ematen dion ukaezinezko alderdi birbanatzaileaz, argi gelditzen da zerga-oinarriaren murriztapena ezarri eta %0,2 eta %2,5en arteko zerga-tasak dituen tarifa aplikatzerakoan.
Hirugarrena.-Merkatu-balioetatik gertuagoko balorazio erregelak ezartzea ondare elementuak baloratzeko.
Laugarrena.-Ondarearen gaineko Zerga hau beste zerga batzurekin armonizatzea, batez ere Oinordetza, Ondare Eskualdaketa eta Egintza Juridiko Dokumentatuen gaineko Zerga eta Pertsona Fisikoen Errentaren gaineko Zergarekin.
Foru Legearen I. Kapituluak, Pertsona Fisikoen Errentaren gaineko Zergari buruzko 6/1992 Foru Legearekin batera, zerga galdatu beharra jasotzen du, Hitzarmen Ekonomikoan ezarritakoari lotuz.
Zergaren izaera eta xedeari dagokienean, Zerga norberaren eta zuzenekotzat hartzen da; ez da "subjektibotzat" hartzen Pertsona Fisikoen Errentaren gaineko Zergan bezala, ez baita norberaren eta familiaren egoera kontutan hartuko, pertsona fisiko bakoitzaren ondare garbiaren zenbatekoa baizik. Ondare garbi hau subjektu pasiboa titularraren izaera ekonomikoko ondasun eta eskubideen osotasuna da, horien balioa guttitzen duten karga eta grabamenen, eta subjektu pasibo horrek aurre egin behar dien zor eta obligazio pertsonalen kenketa egin ondoren.
Foru Legearen II. Kapituluak lantzen duen zergagaiari dagokionean, batetik subjektiboa da, subjektu pasiboa ondare baten titular baita, eta bestetik, denborarekin du zerikusia, ondare hau Zerga sortzen den egunarekin lotzen baita.
Zergagaia zer den zehaztearekin batera, salbuespenak ezartzen dira, aurreko erregelekin konparatuz gero, haundiagoak baitira honetan.
III. Kapituluak Zergaren subjektu pasiboak zehazterakoan, Pertsona Fisikoen Errentaren gaineko Zergari buruzko Foru Legearen 4. artikulua aipatzen du, Hitzarmen Ekonomikoko 15. artikuluaren edukia zehatz-mehatz betetzearren, artikulu horrek Errentaren gaineko Zerga baitu aipagai.
Ondare elementuak subjektu pasiboari esleitu eta egoztea erregulatzen du, horien titulartasun juridikoaren arabera.
Zerga-oinarriari dagokionean, Foru Legearen IV. Kapituluak horren definizioa ematen du, baita ondare elementuak baloratzeko erizpideak zehaztu ere.
Foru Legearen 10. artikulutik 24.erartekoetan dauden balorazio erregela zehatzei dagokienean, Foru Lege honek ez dauka balorazio erizpide bakar bat; ondare elementuaren izaeraren arabera mota askoren aukera egiten du. Ikuspuntu teoriko soil batetik pentsa liteke merkatuko balorazioa onartzea komenigarri izanen litzatekeela; hala ere, praktikotasunetik begiratuta, halako kasu batzuetan zenbatespenak balorazio hori zehazterakoan arazo larriak sortuko lituzke eta hori dela eta, Administrazioaren eta zergadunaren artean maiz eztabaidak emanen.
Ondare elementuak baloratzeko berariazko erregelak behin ezarririk, nola ez, Foru Legeak itxitura erregela baten bidez, espreski bildu ez diren eta izaera ekonomikoa duten beste ondasun eta eskubide batzuk baloratzen ditu. Honetarako hautatu den irizpidea Zergaren sortzapenaren egunean haiek denek duten merkatu baliora jotzea da.
Ondare pasiboari dagokionean, zorrak, duten nominalaren arabera baloratuko dira. Horri gehitzen zaio behar bezala egiaztaturik daudenak bakarrik izanen direla kengarri.
V. Kapituluak Zergaren likidazio-oinarria arautzen du eta zerga-oinarriaren murriztapenaren bidez horren kuantifikazioa ezartzen. Aipatu murriztapenak gehikuntza dakar berarekin, aurreko arautegian ezarritako zenbatekoarekin konparatuz gero; bestalde, Zergaren norbanakotasun izaerari jarraikiz, seme-alabengatiko kenkaria desagertzen da.
Zergaren kuotaren mugari dagokionean, Pertsona Fisikoen Errentaren gaineko Zergarekin batera, Zerga honen arautze berriarekin guttieneko kuota ezarri nahi da, ondare garrantzitsuak kargarik gabe egiazki geldi ez daitezen, Errentaren gaineko Zergara, zerga-oinarri huts edo hutsaren hurrengoekin agertzeagatik.
Azkenekoa den VIII. Kapituluak Zergaren kudeaketa arautzen du.
Zerga ordainarazteko eskumena Ekonomia eta Ogasun Departamentuari esleitzen zaio.
Aitorpena egiteko beharkizunari dagokionean, nafar lurretan egoitza duten subjektu pasiboendako aitorpen muga bikoitza ezartzen da. Muga hori iraganez gero, aitorpena egin beharko litzateke.
Nafarroako Ogasun Publikoari zergak ordaindu behar dizkioten atzerriko egoiliarrei dagokienean, ez da guttieneko mugarik ezartzen.
I. KAPITULUA. Zergaren erregimen juridiko, izaera, xede eta aplikazio-esparrua
1. artikulua. Lege erregimena.
Foru Komunitateak Ondarearen gaineko Zerga galdatuko du, Nafarroako Foru Eraentza Birrezarri eta Hobetzeari buruzko abuztuaren 10eko 13/1982 Lege Organikoaren 45. artikuluak aipatu Hitzarmen Ekonomikoaren arauei, Foru Lege honek xedatutakoari, hura garatzeko luzatuko diren erregelamendu-arauei eta hura aplikatzeko emanen diren gainontzeko xedapenei lotuz.
2. artikulua. Zergaren izaera eta xedea.
Ondarearen gaineko Zerga pertsona fisikoen ondare garbia Foru Lege honetan aurrikusitakoari jarraikiz zergapetzen duen tributua da, zuzenekoa eta norberarena dena.
Zerga honen ondorioetarako, pertsona fisikoaren ondare garbia osatuko du pertsona hori titular den eta izaera ekonomikoa duten ondasun eta eskubideen osotasunak, horien balioa gutitzen duten karga eta grabamenen eta aurre egin beharreko zor eta obligazio pertsonalen kenketa egin ondoren.
3. artikulua. Aplikazio eremua.
Nafarroako Foru Komunitateari dagokio zergaren ordainarazpena, Hitzarmen Ekonomikoaren 17. artikuluan aurreikusitakoarekin bat.
II. KAPITULUA. Zergagaia
4. artikulua. Zergagaia.
Zerga honen gaia da Foru Lege honen 2. artikuluko bigarren lerroaldeak aipatu duen ondarearen gain, subjektu pasiboak sortzapenaren unean duen titulartasuna.
Administrazioak, subjektu pasiboaren ondaretzat, aurreko sortzapena eman zen unean zituen ondasun eta eskubideak har ditzake, subjektu pasiboak haien eskualdaketa eman edo ondare ga-lera gertatu dela frogatzen ez badu bederen.
5. artikulua. Ondasun eta eskubide salbuetsiak.
Zerga ordaintzetik salbuetsita daude:
1. Etxeko altzariak, horien artean, subjektu pasiboaren gauza pertsonalak eta etxeko gauzak, etxeko tresnak eta erabilera partikularreko gainontzeko ondasun higigarriak, Foru Lege honetako 18. artikuluak aipatzen dituen ondasunak izan ezik.
2. Eduki ekonomikoko eskubideak, ondoko tresnen arabera:
a) Pentsio plan bateko onuradunen eskubide ekonomikoak eta partaideen eskubide kontsolidatuak.
b) Eduki ekonomikoko eskubideak, estatuko araudian definitutako aseguratutako aurreikuspen planetarako ordaindutako primei dagozkienak.
c) Eduki ekonomikoko eskubideak, estatuko araudian definitutako enpresako gizarte-aurreikuspen planetarako subjektu pasiboek eginiko ekarpenei dagozkienak, hartzailearen kontribuzioak barne.
d) Subjektu pasiboak aseguru kolektiboko kontratuetarako ordaindutako primetatik heldu diren eduki ekonomikoko eskubideak, enpresako gizarte-aurreikuspeneko planez bestelakoak, pentsioak direla-eta enpresek hartutako konpromisoak gauzatzen dituztenak, Pentsio-plan eta -funtsak arautzen dituen Legearen Testu Bateginean eta hura garatzen duen araudian ezarri bezala, bai eta enpresaburuek aipatu aseguru kolektiboko kontratuetarako ordaindutako primetatik heldu direnak ere.
e) Eduki ekonomikoko eskubideak, estatuko araudian definitutako aseguratutako aseguru pribatuetarako ordaindutako primei dagozkienak, baldin eta menpekotasuna estaltzen badute
3. Jabetza intelektual edo industrialaren ondoriozko eskubideak, egilearen ondarean badaude eta jabetza industriala denean, enpresa iharduerei atxiki gabekoak direnean.
4. Etekinak salbuetsirik dituzten baloreak, Ez-egoiliarren gaineko Zergari buruzko Legearen Testu Bateginaren 14. artikuluan xedatutakoarekin bat. Martxoaren 5eko 5/2004 Legegintzako Errege Dekretuaren bidez onetsi zen.
5. Foru Komunitateko edo Autonomia Elkarteetako Ondare Historikoaren ondasunak, alor horretan berariazkoak diren arauei jarraikiz kalifikatu eta inskribatutakoak; Espainiako Estatuko Ondare Historikoaren ondasunak, Interes Kulturaleko Ondasunen Erregistro Orokorrean edo Espainiako Estatuko Ondare Historikoari buruzko ekainaren 25eko 16/1985 Legeak aipatzen duen Ondasun Higigarrien Inbentario Orokorrean inskribatutakoak. Baita aipatu Legeko Bigarren Xedapen Gehigarrian sartutakoak ere, beti ere Kultura Ministraritzak Interes Kulturaleko Ondasun kalifikatu eta behar den Erregistroan inskribatuta badaude.
Hala ere, Arkeologialde edo Toki edo Multzo Historikoen kasuan, horien mugen barnean kokaturiko ondasun higiezin guztiak ez dira salbuetsirik gertatuko, baizik eta, bakar bakarrik, ondorengo baldintzak betetzen dituztenak:
a) Arkeologialdeetan, ekainaren 25eko 16/1985 Legearen 20. artikuluak aipatzen duen hirigintza planeamendurako tresnan babes berezia dutenak.
b) Toki edo Multzo Historikoetan, berrogeitamar urteko edo gehiagoko antzinatasuna dutenak eta Hiri Planeamendurako Erregelamenduaren 86. artikuluan aurrikusitako Katalogoan babes osokotzat harturik badaude, ekainaren 25eko 16/1985 Legearen 21. artikuluan ezarritakoari jarraikiz.
6. Artelan eta antzinatekoak, Espainiako Estatuko Ondare Historikoari buruzko ekainaren 25eko 16/1985 Legearen 26.4 artikuluan aurrikusitakoaren ondorioetarako, ezartzen diren zenbatekoak baino balio ttikiagoak dituztenean.
Era berean, salbuetsirik gertatuko dira:
a) Foru Lege honetako 18. artikuluan sartutako artelan eta antzinatekoak, beraien jabeek Museo edo irabazi asmorik gabeko Kultur Erakundeei laga badizkiete gordailu iraunkor bat eginez, hiru urteko epea baino haundiagorako eta jendaurrean jartzeko, gordailu modura dauden bitartean.
b) Artisten lana, egilearen ondarean dagoen bitartean.
7. Subjektu pasiboaren ohiko etxebizitza, Pertsona Fisikoen Errentaren gaineko Zergari buruzko Foru Legearen Testu Bateginaren 62. artikuluan definitzen denaren arabera (ekainaren 2ko 4/2008 Legegintzako Foru Dekretuaren bidez onetsi zen), 250.000 euro arte gehienez ere.
Salbuespena aplikatuko da enpresa-jarraitutasuna badagoenean baina, arrazoi ekonomikoak tarteko, errenta-iturri nagusia izatearen baldintza ez dagoenean betetzerik galerak daudelako edo jardueraren etekin positiboek modurik ematen ez dutelako errenta-iturri nagusia izateko.
Salbuetsita egonen dira, halaber, bi ezkontideen ondasun eta eskubide komunak, bi ezkontideetako edozeinen enpresa- edo lanbide-jarduera garatzeko erabiltzen direnean, betiere aurreko lerrokadako baldintzak betetzen badituzte.
9. Entitateen partaidetzen gaineko jabetza osoa, jabetza soila eta biziarteko usufruktu eskubidea, entitate horiek merkatu antolatuetan kotizatu ala ez, baldintza hauek guztiak gertatzen badira:
a) Entitateak, sozietate bat izan nahiz ez izan, enpresa- edo lanbide-jardueraren bat benetan gauzatzea eta jarduera nagusitzat ez izatea ondare higigarri edo higiezinen baten kudeaketa. Entitate batek ondare higigarri edo higiezin bat kudeatzen duela ulertuko da, eta horrenbestez, enpresa- edo lanbide-jarduera bat egiten ez duela, ekitaldi sozialeko 90 egun baino gehiagotan ondoko baldintzetako edozein gertatzen denean:
a’) Bere aktiboaren erdia baino gehiago baloreek osatua izatea, edo bestela
b’) Bere aktiboaren erdia baino gehiago ez egotea lanbide- edo enpresa-jarduerei atxikia.
Idatz-zati honetan adierazitako ondorioetarako, enpresa- edo lanbide-jarduerarik ba ote den edo ondare-elementu bat halako jarduera bati lotuta ote dagoen finkatzeko, Pertsona Fisikoen Errentaren gaineko Zergan xedatutakoari segituko zaio. Nolanahi ere, ulertuko da entitate batek enpresa- edo lanbide-jarduera bat egiten duela, baldin eta aurreko a’) eta b’) azpiletrak aplikatuz ezartzen bada ez duela ondare higigarri nahiz higiezinik kudeatzen.
Bai aktiboaren balioa, bai jarduera ekonomikoei loturik ez dauden ondare-elementuena, kontabilitateak adierazten duena izanen da, baldin eta horrek sozietatearen egiazko ondare-egoera zintzoki adierazten badu.
Aurreko jarduerei atxikirik ez dauden balore edo ondare-elementuek osatutako aktibo-partea zehazteko:
Lehena. Honako balore hauek ez dira kontatuko:
Legezko eta erregelamenduzko betebeharrak betetzeko edukitzen direnak.
Enpresa- edo lanbide-jarduerak garatzean ezarririko kontratu harremanen ondoriozko kreditu eskubideak biltzen dituztenak.
Balore-sozietateek beren xedea den jardueran aritzearen ondorioz dauzkatenak.
Gutxienez ere bozketa-eskubideen % 5 ematen dutenak eta partaidetzaren zuzendaritzarako eta kudeaketarako edukitzen badira, betiere, horretarako, baliabide material eta langile aski badaude eta parte harturiko entitatea letra honetan agertzen ez bada.
Bigarrena. Ez dira balore gisa kontatuko, ez eta enpresa- nahiz lanbide-jarduerei atxikita ez dauden elementu gisa ere, eskurapen-prezioa entitateek lorturiko etekin banatu gabeen zenbatekoa baino txikiagoa dutenak, baldin eta etekin horiek jarduera ekonomikoen ondoriozkoak badira; horretarako muga izanen da bai urte berean bai azken hamar urteetan lorturiko etekinen zenbatekoa. Ondorio horietarako, aurreko lerrokadako azken zatian aipatutako baloreetatik heldu diren dibidenduak enpresa- edo lanbide-jardueretatik etorritako etekintzat hartuko dira, baldin eta parte hartutako entitateak lortutako diru-sarreren % 90, gutxienez, enpresa- edo lanbide-jarduerak egitetik heldu badira.
b) Subjektu pasiboak entitatearen kapitalean duen partaidetza % 5 izatea, gutxienez, banaka zenbatua, edo % 20, batera zenbaturik ezkontideak, aurreko edo ondorengo ahaideek edo hirugarren gradurainoko albo-ahaideek dutenarekin, berdin delarik ahaidetasuna odolkidetasunetik, ezkontza-ahaidetasunetik edo seme-alabaordetzatik etortzea.
c) Subjektu pasiboak entitatean zuzendaritza eginkizuna betetzea egiazki, eta horretatik jasotzen duen ordainsaria enpresa- zein lanbide-etekin eta lan pertsonaleko etekin guztien % 50 baino gehiagokoa izatea.
Aurreko kalkulua egiteko, artikulu honetako 8. idatz-zatiak aipatzen duen enpresa-jardueraren etekinak ez dira zenbatuko enpresa- edo lanbide-jardueretatik eta lan pertsonaletik bereganatutako etekin gisa.
Entitatean duen partaidetza aurreko letran aipatutako pertsona batekin edo batzuekin baterakoa bada, gutxienez ahaidetasun-taldeko pertsona batek bete beharko ditu zuzendaritza-zereginei eta haren ondoriozko ordainsariei buruzkoak, pertsona horiek guztiek salbueste-eskubidea izatearen kalterik gabe.
Salbuesteak partaidetzen balioari aplikatuko zaio -balio hori foru lege honen 15. eta 16. artikuluek ezarritako arauekin bat finkatuko da- parte honetan soilik: lanbide- edo enpresa-jarduera gauzatzeko behar diren aktiboei jarduera horretatik heldu diren zorrak kendu ondoren ateratzen den kopuruaren eta entitateak duen ondare garbiaren balioaren artean dagoen proportzioari dagokiona. Arau horiexek aplikatuko dira entitate partaidetuetako partaidetzak baloratzean, entitate edukitzailearen partaidetzen balioa zehazte aldera.
10. Erregelamendu bidez zehaztuko dira honakoak:
a) Enpresa- edo lanbide-jarduera garatzeko behar diren ondasun, eskubide eta zorrei dagokien salbuespena aplikatu ahal izateko betebeharrak.
b) Entitateetako partaidetzek bete behar dituzten baldintzak.
III. KAPITULUA. Subjektu pasiboa Ondare elementuak leporatu eta egoztea
Lehen saila. Arau orokorrak
6. artikulua. Subjektu pasiboa.
1. 3. artikuluan ezarritakoaren arabera, ondarearen gaineko zerga Nafarroako Foru Komunitatean ordaindu behar dutenak dira zerga honen subjektu pasibo.
2. Hitzarmen Ekonomikoaren 17.1 artikuluan eta Pertsona Fisikoen Errentaren gaineko Zergari buruzko Foru Legearen Testu Bateginaren 4. artikuluan xedatutakoarekin bat betebehar pertsonalarengatik zergak Foru Komunitateari ordaindu behar dizkioten subjektu pasiboek ondare garbi guztiarengatik ordainduko dute, alde batera utzirik non dauden ondasunak edo non erabil daitezkeen eskubideak.
3. Hitzarmen Ekonomikoaren 17.2 artikuluan xedatutakoarekin bat betebehar errealarengatik zergak Foru Komunitateari ordaindu behar dizkioten subjektu pasiboek Espainiako lurraldean dauden ondasun eta eskubideengatik ordainduko dituzte zergak, edo lurralde horretan erabiltzen ahal diren edo bete behar direnengatik.
Hartarako, aipatutako subjektu pasiboek, izaera hori hartu eta bi hilabeteko epean, helbidea Espainian duen pertsona fisiko edo juridiko bat izendatu beharko dute, zerga honen betebeharrekin loturik Nafarroako Zerga Ogasunaren aurrean ordezka ditzan. Aipatutako izendapenaren egunetik bi hilabeteko epean frogatu beharko da izendapen hori aipatutako ogasunean.
Aurreko betebeharretako edozein ez betetzea zerga arloko arau-hauste arina izanen da, eta 1.000 euroko isunaren bidez zehatu daiteke. Zehapen hori mailakatu eginen da, eta ondoriozko zenbatekoa %100 handituko da baldin eta tributu arloko arau-haustea behin baino gehiagotan egiten bada.
Bigarren saila. Ondare elementuak leporatu eta egoztea
7. artikulua. Ondare elementuen titulartasuna.
Ondasun eta eskubideak subjektu pasiboei leporatuko zaizkie, kasu bakoitzean aplikagarri diren titulartasun juridikoko arauei jarraikiz eta subjektu pasiboek ekarritako frogen edo Administrazioak aurkitutakoen arabera.
Beharrezkoa bada, aplikagarri izanen dira, ezkontzako ondasun erregimena edo ezkontzaren erregimen ekonomikoa arautzen dituzten xedapenetan eta familiakideen arteko ondare harremanei kasuan kasu, aplikagarri zaizkien legeria zibileko aginduetan ondasun eta eskubideen titulartasun juridikoari buruz agertzen diren arauak.
Ezkontzako ondasun erregimena edo ezkontzaren erregimen ekonomikoa arautzen dituzten xedapen edo itunei jarraikiz, bi ezkontideenak diren ondasun eta eskubideen titulartasuna amankomunean erdi bana leporatuko zaio bakoitzari, bestelako partaidetza kuotarik dagoela egiaztatzen ez bada behinik behin; horrela bada, azkeneko hori hartuko da kontutan.
Ondasun edo eskubideen titulartasuna behar bezala egiaztaturik ez badago, Zerga Administrazioak eskubidea izanen du zerga erregistro batean edo publikoak diren beste batzutan titular gisa ageri direnak titulartzat hartzeko.
Kargak, grabamen, zor eta obligazioak subjektu pasiboei leporatuko zaizkie, aitzineko lerroaldeetako erregela eta erizpideei jarraikiz.
8. artikulua. Balizko partikularrak.
1. Eskuratzaileari ondasun eta eskubideak eskualdatzen ez zaizkion bitartean, Zerga sortzen den eguna arte eman dituen zenbatekoen osotasuna konputatuko du. Zenbateko horiek eskualdatzailearen zortzat hartuko dira. Zergaren arauen ondorioz ondare elementuak hartzen duen balioa hari egotziko zaio.
2. Ondasun eta eskubide guztiak edo horien zati bat kontraprestazio geroratuaren bidez eskuratu badira, Zergaren arauen ondorioz ondare elementuari emandako balioa, ondare horren eskuratzaileari egotziko zaio oso-osorik, zeinek kontraprestazio geroratua dituen zorren artean sartuko baitu.
Bestalde, eskualdatzaileak kontraprestazio geroratuari dagokion kreditua bere ondarearen eskubideen artean sartuko du.
IV. KAPITULUA. Zerga-oinarria
9. artikulua. Kontzeptua.
1. Zerga honen zerga-oinarritzat hartzen da Zerga sortzen den egunean subjektu pasiboak duen ondare garbiaren balioa, hurrengo artikuluetan xedatutakoari jarraikiz zehazten dena.
2. Ondare garbia ondoko puntuen arteko kenketa egin ondoren aterako da:
a) Subjektu pasiboa titular den ondasun eta eskubideen balioa, hurrengo artikuluetako erregelei jarraikiz zehaztutakoa, eta
b) Karga eta grabamen errealak, ondasun eta eskubideen balioa ttikitzen badute, eta subjektu pasiboak aurre egin behar dien zor eta obligazio pertsonalak.
3. Aurreko zenbakiak xedatutakoa galerazi gabe, ondare garbia zehazteko ez dira ondasun eta eskubide salbuetsiei dagozkien karga eta grabamenak kengarri izanen.
4. Foru Lege honetako 6. artikuluko 3. zenbakiak aipatzen dituen subjektu pasiboei dagokienean, Espainiako Estatuko lurretan egon, erabili edo bertan bete beharreko ondasun eta eskubideek ukitzen dituzten karga eta grabamenak soilik izanen dira kengarri. Baita aipatu ondare elementu horiek erosterakoan izan diren zorrak ere.
10. artikulua. Ondasun higiezinak.
Ondasun higiezinak baloratzeko ondoko erregela hauei jarraikiko zaie:
1. Ondoko hiru balioen arteko haundiena hartuko da:
a) Hirilur Kontribuzioaren, Nekazaritza eta Abeltzaintzako Ihardueren gaineko Kontribuzioaren edo Ondasun Higiezinen gaineko Zergaren ondorioetarako duten katastro-balioa.
b) Eroste prezioa, kontraprestazioa edo balioa.
c) Edozein zergaren ondorioetarako, Administrazioak frogatutako balioa.
Hala ere, 1985eko maiatzaren 9a baino lehenago sinatutako errentamendu kontratua duten errentan emandako higiezinei, hots, Hiri Errentamenduei buruzko azaroaren 24ko 29/1994 Legearen xedapen iragankorretako bigarrenak, hirugarrenak eta laugarrenak aipatzen dituztenei dagokienez, errentan emandako higiezinaren balioa aterako da urte bakoitzean sortutako errentaren 100eko 4 kapitalizatu ondoren, beti ere horrela zehaztutako balio hori aurreko letretan dauden erregelak aplikatu ondoren aterako litzatekeena baino txikiagoa bada eta errentan emandakoa etxebizitza denean, kontratua azaroaren 24ko 29/1994 Legeko xedapen gehigarrietako seigarrenean aipatutako hiri-errentamenduen zentsuan sarturik badago.
2. Ondasun higiezinak eraikitzen ari badira, ondare baliotzat hartuko da Zerga sortzen den eguna arte eraikitzean egiazki inbertitutakoa, gehi orubearen ondare balioa. Jabetza horizontala bada, orubearen balioaren zati proportzionala, tituluan finkatutako portzentaiaren arabera zehaztuko da.
3. Jabetza anitzeko, aldi baterako jabetzako edo antzeko formulak dituzten kontratuen bidez eskuratutako ondasun higiezinen gaineko eskubideak, ondoko erregelen arabera baloratuko dira:
a) Higiezinaren titulartasun partziala bada, aurreko 1. zenbakiko erregelei jarraikiko zaie.
b) Higiezinaren titulartasun partzialik ez badago, horien ziurtagiri edo gainontzeko titulu adierazleen eskurapen prezioaz.
11. artikulua. Enpresa eta lanbide iharduerak.
Enpresa edo lanbide iharduerei atxikitako ondasun eta eskubideak kontabilitate-balioaren arabera konputatuko dira, aktibo errealaren eta galda daitekeen pasiboaren arteko aldeaz, beti ere hori Merkataritza Kodean xedatutakoari egokitzen bazaio.
Aurreko lerroaldean xedatutakoa galerazi gabe, enpresa edo lanbide iharduerei atxikitako ondasun higiezinak beti aurreko artikuluan xedatutakoari jarraikiz baloratuko dira. Aktibo zirkulatzaileko zati badira eta horien xedea soilik eraikuntzako enpresa iharduerak edo higiezinak sustatzea bada, ez dira aurreko artikuluko erregelak aplikatuko.
Merkataritza Kodean xedatutakoari egokitutako kontabilitaterik ez bada, Zerga honen gainontzeko arauak aplikatu ondorengo balorazioa hartuko da kontutan.
Enpresa edo lanbide iharduerak kalifikatu eta ondare elementuak horiei atxikirik daudela kontutan hartzeko, Pertsona Fisikoen Errentaren gaineko Zergaren arautegian ezarritakoari jarraituko zaio.
12. artikulua. Kontu korronte, aurrezki kontu, ageriko kontu edo eperako kontuetan egindako gordailuak.
Kontu korronte, aurrezki kontu, ageriko kontu edo eperako kontuetan nahiz diruzaintza kudeatzeko kontuetan, finantza kontuetan eta antzekoetan egindako gordailuak, Zerga sortzen den egunean duten saldoaz konputatuko dira, saldo hori urteko azken hiruhilekoari dagokion batezbestekoa baino tikiagoa ez bada behintzat. Hala bada, azken hori hartuko da kontutan.
Batezbesteko saldo hori kalkulatzeko, ondoko erregelak hartuko dira kontutan:
Lehena.-Zergaren zerga-oinarria osatzen duten ondasun eta eskubideak eskuratzeko edo zorrak kitatu edo murrizteko fondoak ez dira konputatuko.
Bigarrena.-Mailegu edo kreditu baten ondorio den zorraren zenbatekoa, artikulu honetako lehen lerroaldeak aipatzen dituen kontu horietako batean urteko azkeneko hiruhilekoan sartu bada, ez da batezbesteko saldoa zehazteko konputatuko, ezta zor modura kenketa eginen ere.
13. artikulua. Kapital berekiak hirugarrenei lagatzearen ondoriozko baloreak, bigarren mailako balore-merkatu ofizialetan negoziatuak.
Kapital berekiak hirugarrenei lagatzearen ondoriozko baloreak, Europako Parlamentuaren eta Kontseiluaren 2004ko apirilaren 21eko 2004/39/EE Zuzentarauan definitutako bigarren mailako balore-merkatu ofizialetan negoziatutakoak, edozein izanik ere horiek ekarritako etekinen izendapena, ordezkapena eta izaera, urteroko laugarren hiruhilekoaren batez besteko negoziazio-balioaren arabera zenbatuko dira.
14. artikulua. Kapital berekiak hirugarrenei lagatzearen beste balore adierazle batzuk.
Aurreko artikuluan aipatu ez diren kapital berekiak hirugarrenei lagatzearen balore adierazleak, duten nominalaren arabera baloratuko dira eta, behar bada, horiek amortizatu edo berreskuratzeko primak gehituko zaizkie.
Hala ere, Pertsona Fisikoen Errentaren gaineko Zergaren arautegiari jarraikiz, etekin inplizituak sortzen dituzten baloreak izanez gero, subjektu pasiboak hurrengoa konputatzeko aukera izan dezake, alegia, lagatutako kapitalaren zenbatekoa gehi jaulkipen, lehen ezartze edo endosuko egunetik Zerga sortzen den eguna arte proportzioz dagokion etekina.
15. artikulua. Edonolako entitateren funts berekien partaidetzaren balore adierazleak, bigarren mailako balore-merkatu ofizialetan negoziatutakoak direnean.
1. Entitate juridikoen akzioak edo haien kapital sozialeko edo funts berekietako partaidetzak, Europako Parlamentuaren eta Kontseiluaren 2004ko apirilaren 21eko 2004/39/EE Zuzentarauan definitutako bigarren mailako balore-merkatu ofizialetan negoziatutakoak, Inbertsio Kolektiboko Erakundeei dagozkienak izan ezik, urteroko laugarren hiruhilekoaren batez besteko negoziazio-balioaren arabera zenbatuko dira.
2. Kotizazio ofizialerako oraindik onartu gabeko akzio berriak harpidetzen direnean -Europako Parlamentuaren eta Kontseiluaren 2004ko apirilaren 21eko 2004/39/EE Zuzentarauan definitutako bigarren mailako balore-merkatu ofizialetan kotizatzen duten entitate juridikoek jaulkitako akzioak-, harpidetzaldiko titulu zaharren azkeneko negoziazioan akzio horiek izandako balioa hartuko da akzio horien baliotzat.
3. Oraindik ordaindu gabeko kapitala zabaltzen denean, akzioak baloratzerakoan aurreko arauei jarraituko zaie, osotara ordaindurik bailiren. Ordaindu gabeko zatia subjektu pasiboaren zortzat hartuko da.
16. artikulua. Entitate orotako fondo berekien partaidetzaren beste balore adierazle batzuk.
1.-Aurreko artikuluak aipatzen dituen akzio eta partaidetzak ez diren beste batzuei dagokienez, onetsitako azken balantzean zuten balio teorikoaren arabera baloratuko dira, beti ere aipatu balantze hori, beharrez edo borondatez, berrikusi eta egiaztatu bada eta auditoretzak adostasun txostena luzatzen badu.
Balantzea ikuskatu ez bada edo auditoretzak adostasun txostenik eman ez badu, kontuan hartuko den balorazioa ondoko hiruretan baliorik haundiena duena izanen da: balio izenduna; zerga sortzen den eguna baino lehenago onetsitako azken balantzeko balio teorikoa edo zerga sortzen den eguna baino lehenago itxitako hiru ekitaldi sozialetako emaitzen batezbestekoa 100eko 20ko tasaren arabera kapitalizaturik ateratakoa.
Azken honen ondorioetarako, mozkintzat banatutako dibidenduak eta erreserbatarako esleipenak hartuko dira, balantzeak erregularizatu edo gaurkotzekoak izan ezik.
2.-Talde-inbertsioko erakundeen kapital sozialeko eta ondare-fondoko akzio eta partaidetzak, Zerga sortzen den egunean duten balio likidagarriaren arabera konputatuko dira; balantzeko aktiboak horri dagokion berariazko legeriari jarraikiz baloratuko dira eta hirugarrenendako obligazioak kengarri izanen.
3.-Kooperatibetako kapital sozialean bazkide edo elkartekide direnen partaidetzen balorazioa, Zerga sortzen den eguna baino lehenago onetsitako azken balantzeko nahitaezko edo borondatezko ekarpen sozialen kopuru osoaren arabera zehaztuko da, itzuli gabeko galera sozialen kenketa eginez, beharrik bada.
4.-Artikulu honetan aurrikusitako ondorioetarako, entitateek bazkide, elkartekide edo partaideei behar diren balorazioak azalduko dituzten ziurtagiriak eman beharko dizkiete.
17. artikulua. Bizitza-aseguru eta aldibaterako edo biziosoko errentak.
1. Bizitza-aseguruak duten berreskurapen balioaz konputatuko dira Zerga sortzen den egunean.
2. Aldibaterako edo biziosoko errentak, diru, ondasun higigarri edo higiezinez osatutako kapitala ematearen ondorio direnak, Zerga sortzen den egunean Espainiako Bankuko oinarrizko korrituaren araberako kapitalizazio balioaz konputatuko dira, atera den kapital horretatik, errenta biziosokoa denean, errentadunaren adinari dagokion zatia edo, errenta aldibaterakoa denean, horren iraupenari dagokiona, hartuz, gozamenak baloratzeko 19. artikuluko 1. zenbakian ezarritako erregelei jarraikiz. Errentaren zenbatekoa moneda-unitateetan gauzatzen ez denean, atera den kapitalaren balioa Profesioarteko Soldata Minimoaren urteko kopurua kapitalizatu ondorengoa izanen da.
18. artikulua. Artelan, antzinateko, bitxi, luxuzko larru, ibilgailu, itsasontzi eta hegazkinak.
1. Artelan, antzinateko, bitxi, luxuzko larru, auto, 125 zentimetro kubikoko edo gehiagoko zilindrada duten bi edo hiru gurpileko ibilgailu, aisi edo itsas kiroletarako itsasontzi, hegazkin, hegazkintxo, belauntzi eta gainontzeko aireuntziak Zerga sortzen den egunean duten merkatu-balioaz konputatuko dira.
Subjektu pasiboek, erabilitako ibilgailuen merkatu-balioa zehazteko erabil ditzakete, Oinordetza, Ondare Eskualdaketa eta Egintza Juridiko Dokumentatuen gain Zerga sortzen den egunean indarra izanen duten Zergen ondorioetarako Ekonomia eta Ogasun Departamentuak onetsitako taulak.
) Ondokoak artelantzat hartuko dira: margo, eskultura, marrazki, grabatu, litografia edo antzekoak, beti ere, jatorrizko lanak badira.
b) Ondokoak antzinatekotzat hartuko dira: ehun urtez gorako antzinatasuna izan eta jatorrizko ezaugarriak azken ehun urte hauetan egindako aldaketa edo konponketak direla eta aldatu ez zaizkien ondasun higigarriak, bai erabilgarri, bai edergailu direnean. Artelanak ez dira kontuan hartuko.
19. artikulua. Eskubide errealak.
Erabilpeneko eskubide errealak eta jabetza hutsa baloratuko dira, kasuan kasu, behar den ondasunari eman zaion balioa abiapuntutzat harturik, Foru Lege honetan ezarritako erregelei jarraikiz eta hurrengo erizpideen arabera:
1. Gozamena.
a) Aldibaterako gozamenetan, ondasunen balio osoaren arabera kalkulatuko da, urte beteko aldi bakoitzeko ehuneko 2a aplikatuz eta ehuneko 70a gainditu gabe.
b) Biziarteko usufruktuetan joko da balioa ondasunen balio osoaren %70ekoa dela usufruktudunak hogei urte baino gutxiago dituenean; adinean goiti joan ahala urteko %1 murriztuko da, eta gutxieneko muga balio osoaren %10 izanen da.
2. Baliapen eta ostatzea.
Baliapen eta ostatzeko eskubide errealei dagokienean, horien baliotzat hartuko da, kasuan kasu, aldibaterako edo biziosoko gozamenen balorazioari dagozkion erregelak ezarri zaizkien ondasunen balioaren ehuneko 75a aplikatu ondorengoa.
3. Jabetza hutsa.
Jabetza hutseko eskubidearen balioa, ondasunaren balioaren eta eskubide horren jabaria mugatzen duten hirugarrenen aldeko erabilpen eskubideen arteko aldeaz konputatuko da.
Aldi berean biziosoko eta aldibaterako diren gozamenetan, jabetza hutsa, aurreko 1. zenbakiko erregeletatik baliorik ttikiena ematen diona aplikatuz baloratuko da.
4. Aurreko zenbakietan sartu gabeko eskubide errealak, eratzerakoan aldeek itundutako kapital, prezio edo balioaz konputatuko dira, balio hori eta urteko errenta edo pentsioari Espainiako Bankuaren oinarrizko korritua aplikatu ondorengo kapitalizaziotik ateratako balioaren adinakoa edo haundiagoa bada edo, azken hau, lehena baino ttikiagoa bada.
20. artikulua. Administrazio kontzesioak.
1. Irizpide orokorra.
Jabari edo titulartasun publikoa duten zerbitzu edo ondasunak ustiatzeko administrazio prestazioak, edozein izanik ere horien iraupena, horrelaxe baloratuko dira:
a) Administrazioak kontzesiodunak ordaindu beharreko prezio edo kanon modura zenbateko osoa ezarriko balu, horren zenbatekoaz.
b) Administrazioak kontzesiodunak aldiorotasunez ordaindu behar duen guttieneko kanon, prezio, pardaidetza edo mozkina ezarriko balu eta kontzesioaren epea urtea baino ttikiagoa balitz, aldikako ekarpenen kopuru osoaz baloratuko lirateke.
Kontzesioak urte bete baino gehiago iraunen balu, kontzesiodunak urteko ordaintzen duen zenbatekoa 100eko 10ean kapitalizatuz.
Erregela hau aplikatzeko urtero aldatzen ahal den zenbatekoa kapitalizatu behar bada, soilki, aldaketa hori zenbateko horren bilakaeraren indize objektiboak abiapuntu izanen dituzten prezioak berrikusteko klausulak aplikatzearen ondorio denean, lehenengo urteari dagokion zenbatekoa kapitalizatuko da. Aldaketa prestazioa ematerakoan ezagun diren arrazoi matematiko batzuren ondoriozko aferen menpe badago, kapitalizatu beharreko zenbatekoa, kontzesiodunak prestazio-aldian kapitalizatu beharreko zenbatekoen batezbestekoa izanen da.
c) Kontzesioduna Administrazioari ondasun zehatzak itzultzera beharturik badago, horrek eratu beharko duen Berritzultze Fondoaren balioa hartuko da kontutan, abenduaren 20ko 1643/1990 Errege Dekretuan edo hori ordezkatzen duen arauean xedatutakoa betez.
2. Irizpide bereziak.
Kontzesioaren izaera dela eta, aurreko zenbakiko erregelen bidez zerga-oinarria finkatzerik ez dagoen kasu berezietan, ondoko erregelei jarraikiko zaie:
a) Kasuan kasuko ustiapen, erabilpen edo aprobetxamenduari atxikitako aktibo finkoen balioari, Foru Lege honetan ezarritako erregelei jarraikiz zehaztuko denari, prestazioak irauten duen urte bakoitzeko ehuneko 2a aplikatuz; guttienekoa ehuneko 10a izanen da eta gehienekoa ez da aktiboen balioa baino haundiagoa izanen.
b) Aurreko baloraziorik ez dagoenean, behar den Administrazio Publikoak emandakoa hartuko da kontutan.
c) Aurreko bi erregela horien ezean, interesatuek berek aitortutako balioa, Ondare Eskualdaketa eta Egintza Juridiko Dokumentatuen gaineko Zergari buruzko Arauaren 37. artikuluak ezartzen dituen bideak erabiliz, Administrazioak horiek frogatzeko duen eskubidea galerazi gabe.
21. artikulua. Jabego intelektual eta industrialen ondoriozko eskubideak.
Jabego intelektual eta industrialen ondoriozko eskubideak, hirugarrenengandik eskuratutakoak direnean, eskuratzailearen ondarean sartuko dira, haien eskurapen balioaz.
22. artikulua. Kontratu aukerak.
Kontratu aukerak hitzartutako prezioaz baloratuko dira eta hau ez badago edo ttikiagoa bada, kontratu horiek beren baitan hartzen dituzten ondasunen balioaren ehuneko bosta hartuko da. Balio hori Foru Lege honetan ezarritako erregelak aplikatu ondoren aterako da.
23. artikulua. Izaera ekonomikoko beste ondasun eta eskubide batzuk.
Subjektu pasiboari lepora dakizkiokeen izaera ekonomikoko beste ondasun eta eskubide batzuk, Zerga sortzen den egunean merkatuan duten balioaz konputatuko dira.
24. artikulua. Zorren balorazioa.
Zorrak, Zerga sortzen den egunean duten nominalaz baloratuko dira; kengarri izanen dira soilik behar bezala egiaztaturik daudenak.
25. artikulua. Kontzeptu ez-kengarriak.
Ondoko hauek izanen dira:
a) Abalatutako zenbatekoak, abal-emaileak zorra ordaindu behar duen arte, zordun nagusiaren aurkako eskubidea erabili eta horrek huts egiteagatik. Abal solidarioaren kasuan, abalatutako zenbatekoak ez dira kengarriak izanen abal-emailearen aurkako eskubidea erabili arte.
b) Bermearen eskubide errealak, ezertan ukatu gabe bermatutako zorra kengarria izateko aukera.
c) Ondasun edo eskubide salbuetsiak eskuratzeko hartutako zorrak. Salbuespena partziala denean, zorren zati proportzionala izan ahalko da kengarria.
26. artikulua. Zerga-oinarria zehaztea.
Orokorki, zerga-oinarria zenbatespen zuzeneko erregimenaz zehaztuko da.
Hala ere, tributu oinarrien zeharkako zenbatespen erregimena legez ezarritako kasuetan aplikatuko da.
27. artikulua. Kontrako peritu tasazioa.
Kontrako peritu tasazioa soilik 18 eta 23. artikuluetan aipatutako ondasun eta eskubideei izanen zaie aplikagarri, 18. artikuluko 1. zenbakiko bigarren lerroaldean aurrikusitakoa erabiltzen denean izan ezik.
V. KAPITULUA. Likidazio-oinarria
28. artikulua. Likidazio-oinarria.
1. Likidazio oinarria kalkulatzeko, zerga-oinarria 800.000 euro murriztuko da salbuetsita dagoen gutxienekoagatik.
2. Aurreko idatz-zatian ezarritakoa aplikatzekoa izanen zaie tributuak bai betebehar pertsonalarengatik bai betebehar errealarengatik ordaintzen dituzten subjektu pasiboei.
VI. KAPITULUA. Zergaren sortzapena
29. artikulua. Zergaren sortzapena.
Zerga, urte bakoitzeko abenduaren 31n sortuko da eta egun horretan subjektu pasibo titularraren ondarea ukituko du.
VII. KAPITULUA. Tributu zorra
30. artikulua. Kuota osoa.
Zergaren likidazio-oinarriari ondoko eskalan adierazten diren karga-tasak aplikatuko zaizkio:
|
LIKIDAZIO-OINARRIA, ZENBATERAINO (eurotan) |
KUOTA |
LIKIDAZIO-OINARRIAREN GAINERAKOA, |
APLIKATZEKOA |
|
0,00 |
0,00 |
155.511,88 |
0,16 |
|
155.511,88 |
248,82 |
155.511,88 |
0,24 |
|
311.023,76 |
622,04 |
311.023,76 |
0,40 |
|
622.047,53 |
1.866,13 |
622.047,53 |
0,72 |
|
1.244.095,06 |
6.344,87 |
1.244.095,06 |
1,04 |
|
2.488.190,11 |
19.283,46 |
2.488.190,11 |
1,36 |
|
4.976.380,22 |
53.122,84 |
4.976.380,22 |
1,68 |
|
9.952.760,45 |
136.726,02 |
Hortik gora |
|
31. artikulua. Kuota osoaren muga.
1. Zerga honen kuota osoa, Pertsona Fisikoen Errentaren gaineko Zergaren kuota osoarekin batera, ez da azken horren zerga-oinarriko baturaren % 65etik goitikoa izaten ahal, eta, ondorio hauetarako, ez da kontuan hartuko izaeragatik edo xedeagatik Pertsona Fisikoen Errentaren gaineko Zergaren kargapean dauden etekinak sortzeko ahalmenik ez duten ondare-elementuei dagokien kuotaren zatia.
Aurrezkiari dagokion zerga-oinarriko zati berezia, ondare gehikuntza eta murrizketen ondoriozkoa, eskualdatze egunaren aurretik gutxienez ere urtebete lehenago eskuratutako ondare elementuen eskualdaketaren edo horietan egindako hobekuntzen saldo positiboari dagokiona ere ez da kontuan hartuko, ez eta Pertsona Fisikoen Errentaren gaineko Zergaren kuota osoan aurrezkiaren zerga-oinarriko zati bereziari dagokion zatia ere.
Pertsona Fisikoen Errentaren gaineko Zergako zerga-oinarrian aurrezkiari dagokion zati bereziari gehituko zaio Sozietateen gaineko Zergari buruzko abenduaren 30eko 24/1996 Foru Legearen hogeita seigarren xedapen iragankorreko 6. artikuluko a) letrak aipatzen duen mozkinetako partaidetzen eta dibidenduen zenbatekoa.
2. Bi kuoten baturak 1. idatz-zatian aipatzen den muga gainditzen baldin badu, zerga horren kuota gutxituko da muga horretara iritsi arte; gutxitze hori ezin izanen da % 75 baino handiagoa izan.
3. Pertsona Fisikoen Errentaren gaineko Zergari buruzko Foru Legearen Testu Bateginaren 71. artikuluan aipatzen diren familia unitateen kasuan, aurreko zenbakietan zehaztutako mugak banaka kalkulatuko dira, alde batera utzita pertsona fisikoen errentaren gaineko zergan aukeratu den zerga ordainketa mota -banakakoa edo baterakoa-.
4. Artikulu honetan xedatutakoa ez zaie 6. artikuluko 3. zenbakiak aipatzen dituen subjektu pasiboei aplikatuko.
32. artikulua. Atzerrian ordaindutako zergak.
1. Barne Antolamenduko diren Nazioarteko Itun edo Hitzarmenetan xedatutakoa galerazi gabe, Zerga honen kuotatik ondokoetan ttikiena den zenbatekoaren kenketa eginen da, Espainiako Estatutik at kokaturik dauden ondasun eta erabili edo bete behar diren eskubideak direla eta:
a) Atzerrian ordaindutakoaren egiazko zenbatekoa, Zergan konputatutako ondare elementuak ukitzen dituen izaera pertsonaleko karga dela eta.
b) Zergaren egiazko batezbesteko tasa atzerrian kargatutako likidazio-oinarriaren zatiari aplikatu ondoren ateratakoa.
Zenbaki honetan xedatutakoa ez zaie 6. artikuluko 3. zenbakiak aipatzen dituen subjektu pasiboei aplikatuko.
2. Egiazko batezbesteko karga-tasatzat hartuko da, eskala aplikatu zaion kuota osoa, likidazio-oinarriaz zatitu ondoren ateratako kozientea 100ez biderkatu ondoren atera emaitza.
33. artikulua. Kenduta.
33.bis. artikulua (indargabetua)
34. artikulua. Ondare erantzukizuna
1. Ondarearen gaineko Zergari dagozkion tributu zorrak Nafarroako Foru Zuzenbide Zibilaren Bildumako 84. legeak eta Kode Zibileko 1365. artikuluak aipatzen dituzten beste horien gisakotzat hartuko dira eta, hortaz, konkista-ondareak edo irabazizko ezkontz ondasunak, hurrenez hurren, zuzenean Nafarroako Ogasun Publikoaren aitzinean dauden zorren kargu eginen dira.
2. 6.3 artikuluan aipatutako subjektu pasiboen ondasunen edo eskubideen gordailuzainak edo kudeatzaileak solidarioki ordainduko du zerga honi dagokion zorra, gordailututako ondasun edo eskubideengatik, edo haren esku utzitako ondasun edo eskubideen kudeaketagatik.
3. (indargabetua)
VIII. KAPITULUA. Zergaren kudeaketa
35. artikulua. (indargabetua)
36. artikulua. Aitorpena aurkezteko betebeharra duten pertsonak.
Haien tributu-kuota (zergaren arauekin bat zehaztua, behin bidezkoak diren kenkariak edo hobariak aplikaturik) ordaindu beharrekoa ateratzen denean aurkeztu beharko dute nahitaez aitorpena subjektu pasiboek, edo, kasu hori gertatzen ez denean, haien ondasun edo eskubideen balioa (zergaren arauekin bat kalkulaturik) 1.000.000 eurotik gorakoa denean.
37. artikulua. Autolikidazioa.
1. Aitorpena aurkeztu behar duten subjektu pasiboek dagokion autolikidazioa egin beharko dute, eta, behar denean, zerga zorra ordaindu, Ekonomia eta Ogasun Departamentuak ezartzen duen lekuan, moduan eta epean.
2. Ondasunak emanez ordaindu daiteke tributu zorra, Tributuei buruzko abenduaren 14ko 13/2000 Foru Lege Orokorraren 51.4 artikuluarekin bat.
38. artikulua. Aitorpenaren aurkezpena.
Ekonomia eta Ogasun Departamentuak ezarritako moduan eta epean eta hark ezarritako inprimakien bidez eginen da aitorpena.
Ekonomia eta Ogasun Departamentuak zergaren aitorpen bateratua egiteko ereduak onets ditzake, Pertsona Fisikoen Errentaren gaineko Zergari buruzko Foru Legearen Testu Bateginaren 71. artikuluak aipatutako familia unitateetako subjektu pasiboek erabil ditzaten, hala nahi badute. Halaber, aitorpenaren modalitate sinplifikatuak edo bereziak erabiltzea ere onets dezake.
Aitorpenetan, subjektu pasiboek berei dagozkien datu guztiak jarri beharko dituzte, eta ezarritako dokumentu eta frogagiri guztiak erantsi, sinatu eta aurkeztu beharko dituzte, Ekonomia eta Ogasun Departamentuak ezarritako tokietan.
Lehen Xedapen Gehigarria (indargabetua)
Bigarren Xedapen Gehigarria
Beharrezko izan daitezkeen egokitzapenak galerazi gabe, Foru Komunitateko tributu antolamenduak Pertsona Fisikoen Ondarearen gaineko Ez-ohizko Zergari edo Ondare Garbiaren gaineko Zergari egindako aipamenak, Foru Lege honetan erregulatutako Ondarearen gaineko Zergari egiten zaizkiola usteko da.
Hirugarren Xedapen Gehigarria
Zergak ordaintzeko betebehar errealari Foru Lege honetan egiten zaizkion aipamenak, lurralde amankomuneko arautegian une bakoitzean zehazturik dagoen kontzeptuari egiten zaizkiola usteko da.
Laugarren Xedapen Gehigarria
Nafarroako Aurrekontuei buruzko Foru Legeak honako hauek alda ditzake:
a) Zerga-oinarriaren murriztapenak.
b) Aitorpena egiteko beharraren muga.
c) Likidazio-oinarriaren tarteak eta karga-tasak.
d) Zergaren gainontzeko parametro kuantitatiboak.
Bosgarren Xedapen Gehigarria. Bikote egonkorrak eta ezkontideak parekatzea.
Zerga honen araudian ezarritako ondorioetarako, bikote egonkor bateko kideak ezkontideen parekoak izanen dira, baldin eta horixe eskatu badute eta Tributuei buruzko abenduaren 14ko 13/2000 Foru Lege Orokorraren hogeita batgarren xedapen gehigarriak ezarritako baldintzak betetzen badira.
Horrekin bat, araudi horretan bikote egonkorrak aipatzen diren orotan, aurreko lerroaldean agertzen diren bikote egonkorrak aipatuko dira soilik.
Lehen Xedapen Iragankorra
31. artikuluaren 1. zenbakian xedatutakoa 1992.eko ekitaldian aplikagarri izanen da.
Bigarren Xedapen Iragankorra
6.3 artikuluan aipatzen diren subjektu pasiboek bi hilabeteko epea izanen dute, 2012ko urtarrilaren 1etik aurrera, beren ordezkaria izanen den pertsona izendatzeko eta hori hala dela frogatzeko, zerga honen ondorioetarako, Nafarroako Zerga Ogasunean.
Bigarren Xedapen Iragankorra (indargabetua)
Azken Xedapenetan Lehena
Lehendabiziko Xedapen Iragankorrean xedatutakoa galerazi gabe, Foru Lege honetako xedapenek 1993.eko urtarrilaren 1etik aitzina izanen dute indarra. Egun horretatik aitzina indarrik gabe geldituko dira Foru Diputazioak 1977.eko abenduaren 28an eta 1978.eko otsailaren 9an hartutako Akordioak, Pertsona Fisikoen Ondarearen gaineko Ez-ohizko Zerga erregulatzen zutenak, eta Foru Lege honetan ezarritakoari aurka egiten dioten xedapen guztiak. Hau hala izanik ere, Administrazioak indargabetzen den arauteriaren ondorio diren tributu betebeharrak eska ditzake.
Azken Xedapenetan Bigarrena
Nafarroako Gobernuak eta Ekonomia eta Ogasun Departamentuak emanen dituzte Foru Lege hau garatu eta aplikatzeko behar izanen diren xedapen guztiak.
