Miguel Sanz Sesma Nafarroako Lehendakaria Autonomia Erkidegoen eta Garapenerako Lankidetzaren IV. Topaketa irekitzeko ekitaldiaren buru izan da gaur goizean. Bilera apirilaren 14an eta 15ean egingo da Kondestablearen Jauregian, Iruñean. Bertan, Espainiako autonomia-erkidegoetako arduradun politiko eta teknikoek lankidetza deszentralizatuaren eta emaitzetara bideratutako kudeaketaren garrantzia aztertuko dute.

Topaketaren irekitze-ekitaldian Soraya Rodriguez Ramos Nazioarteko Lankidetzako Estatu idazkaria eta María Isabel García Malo Nafarroako Gobernuko Familia, Gazteria, Kirol eta Gizarte Gaietako kontseilaria ere egon dira. Sarrera Andrés Carbonero Martínez Nafarroako Gobernuko Garapenerako Nazioarteko Lankidetza Zerbitzuko zuzendariak egin du.

Espainiako autonomia-erkidegoek 2011n Espainiako garapenerako laguntza osoaren %11 ematen dute. Herrialde hartzaileen arabera, ehuneko hori %30etik gorakoa da eskualde batzuetan, besteak beste, Erdialdeko Amerikan. Espainiako autonomia-erkidego guztiek garapenerako lankidetzaren lege autonomikoak eta funtsak esleitu eta kudeatzeko plan gidariak dituzte.

Espainian egiten den lankidetza-formula deszentralizatua Koldo Unzeta Euskal Herriko Unibertsitateko Ekonomia Aplikatuko katedradunak eta Hegoa Institutuko kideak eta José Mª Fernández López de Turiso Kanpo Arazoetarako eta Lankidetza Ministerioko Garapenerako Politiken Planifikazio eta Ebaluazio zuzendari nagusiak aztertuko dute.

Jesús Gamallo Aller Galiziako Xuntako Kanpo Arazoen eta EBrekiko Harremanen zuzendari nagusiak Eskualdeen Batzordeak "EBko garapen-politiken" Liburu Berdeari buruz emandako irizpenaren berrikuspena egingo du, Europako eskualdeek garapen-politiketan duten parte-hartzea aztertuz, eta Enrique del Olmo Administrazioaren eta Politika Publikoen Nazioarteko eta Iberoamerikako Fundaziokoak Espainiaren nazioarteko lankidetzaren esparruan diru-laguntzak eta laguntzak arautzen dituen Errege Dekretua aztertuko du.

Gaien bigarren blokeak Milurtekoko Garapen Helburuak betetzeko emaitzetara bideratutako kudeaketa du oinarri. Hitzaldia Carola Calabuig Kanpo Arazoetarako eta Lankidetza Ministerioko Garapenerako Politikak Planifikatzeko Arloko buruak emango du. Horrez gain, programan tailer sektorialak egingo dira bi gai horien inguruan.

Topaketa bihar amaituko da. García Malo kontseilariak parte-hartzaileak Nafarroako Jauregian hartuko ditu.