Gainera, Alex Múgica eta Arantxa Sagastibelza sukaldariek (Iruñeko La Perla hoteleko Alex Mugica jatetxekoak) astelehen eta asteartean lau erakustaldi gastronomiko egingo dituzte (show cooking) Nafarroako produktu bereizgarriekin. Produktu horiek kalitatezko honako marka hauetakoak dira: Reyno Gourmet, Nafarroako Zainzuria, Lodosako Pikillo Piperrak, Tuterako Orburua, Nafarroako Olioa, Txistorra eta Mamia.

Plater tradizionalak egin dira (zainzuriak tomate eta tipulinaren ozpin-olioarekin, eta txistor karraskatua Erronkariko gaztarekin), bai eta abangoardiako beste batzuk ere eta Nafarroakoak diren produktuak beste kultura batzuetako jakiekin nahastuz (zainzuriaren gazpatxoa itsaski eta koroneikien salpikoiarekin eta mamiarekin egindako postrea, sagar-konpotarekin, intxaurraren opil gorriarekin eta basoko fruituekin).

Erakustaldi horiek amaitu dira kokteleriako dastatze batekin. Carlos Rodriguez tabernari nafarrak egin du ardo gorria eta Nafarroako patxarana oinarri izanik. Koktel horien artean, bertaratutakoek mojitoaren aldagai bat dastatu ahal izan dute, mentarekin, lima, izotz xehatuarekin eta Nafarroako Ardo Gorriarekin.

Nafarroa Milango Erakusketan igandera arte presente izango den arren, jardunaldi nagusia astearte honetan egingo da, eta bertan izango dira jarduneko Lehendakari Yolanda Barcina eta jarduneko lehendakariorde Juan Luis Sánchez de Muniáin, bai eta Espainiak Milanen duen kontsul nagusi Antonio Cosano eta Espainiako Pabiloiko komisariorde Cándido Creis ere.

Ekitaldi instituzionala goizeko 11:00etan hasi da banderak igoz eta Espainiako eta Nafarroako ereserkiak interpretatuz. Nafarroakoa Iruñeko Udaleko Txistularien Bandak interpretatu du.

Ondoren, Lehendakariak Pabiloiko Ohorezko Liburuan sinatu du, eta bere eskaintzan Gobernu zentralari eskerrak eman dizkio Nafarroari munduan sustatzeko eman dion "aukera paregabeagatik".

Jarraian egindako agerraldian, Yolanda Barcinak azpimarratu du Milango Erakusketa zer erakusleiho egokia den Nafarroako ekonomia, turismoa, kultura eta gastronomia ezagutarazteko; Nafarroari buruz esan du Foru Komunitate "aurreratu, dinamiko eta irekia" dela.

Programa Iruñeko Txistularien Bandaren emanaldiarekin amaitu da, honako hauek osatutako banda: Fermin Garaikoetxea eta Eiande Aramburu (txistua), Alejandro Martínez (silbotea) eta Iñaki Letamendia (tinpanoa); gastronomia eta kokteleriako erakustaldiak ere izan dira. Jarraian, ordezkaritzak Espainiako pabiloia bisitatu du eta erakusketa-barrutiko beste eraikin batzuk.

Gogora ekarri behar da Nafarroak Milango Erakusketarako prestatutako eskaintza Erakunde Harremanetako eta Turismoa eta Merkataritzako zuzendaritza nagusiek eta INTIA enpresa publikoak antolatu dutela.