navarra.es

Castellano | Euskara | Français | English

Bilatzaile erabili!

86/1993 Foru Dekretua, martxoaren 8koa, Balio Erantsiaren Gaineko Zergari Buruzko Erregelamendua onesten duena

 

(Testu bateratua. Jatorrizkoa 1993ko 45. NAOn argitaratua, apirilaren 14an. Aldaketak: 83/1998 Foru Dekretua, martxoaren 16koa; 128/1996 Foru Dekretua, martxoaren 4koa; 206/2004 Foru Dekretua, maiatzaren 17koa; 96/2005 Foru Dekretua, uztailaren 4koa; 63/2001 Foru Dekretua, martxoaren 12koa; 79/2011 Foru Dekretua, uztailaren 18koa; 176/1997 Foru Dekretua, ekainaren 30ekoa; 165/1994 Foru Dekretua, irailaren 12koa; 58/2002 Foru Dekretua, martxoaren 25ekoa; 59/2008 Foru Dekretua, ekainaren 9koa; 1/2009 Foru Dekretua, urtarrilaren 12koa; 35/2010 Foru Dekretua, maiatzaren 31koa; 2/2012 Foru Dekretua, urtarrilaren 18koa; 242/1999 Foru Dekretua, ekainaren 28koa; 103/2012 Foru Dekretua, irailaren 12koa; 77/2013 Foru Dekretua, abenduaren 30ekoa; 102/2014 Foru Dekretua, azaroaren 5ekoa; 43/2015 Foru Dekretua, uztailaren 16koa )

Atarikoa

Balio Erantsiaren gaineko Zergaren arauketak 1993.eko urtarrilaren 1etik aitzina aldaketa sakonik jasan du, Elkarte barnean Barne Merkatua erdietsi asmoz bertako arauterian sartutako aldaketak direla medio.

Abenduaren 30eko 19/1992 Foru Legeak aldaketa horiek gure tributu antolaketan sartzen ditu, baita Zerga zehazten duten elementu desberdinak arautzeko puntuetan berritasun ugari ere.

Aipatu lege testuko Azken Xedapenetako Hirugarrenak Nafarroako Gobernuari ahalmena ematen dio hura garatu eta aplikatzeko beharrezkoak diren xedapen oro eman dezan. Ahalmen hau oinarritzat harturik, Zergari buruzko Erregelamendua onesteari ekin zaio, Foru Legean dauden gaiak garatu eta osatzen baititu. Erregelamendu honen helburua da legezko aginduek behar den zabaltasunaz landu ez dituzten arazo edo alderdi zehatzak soilik arautzea.

Erregelamenduak hamaika Titulu ditu; Foru Legeak ezarritako punturik berarizkoenak aipatzen ditu eta bertan aurrikusitako ordenari jarraitzen: zergagaia mugatzea, salbuespenak, Zergari ez atxikitzeko aukera, zerga oinarria, Zergaren erasapena, zerga tasak, kenkari eta itzulketak, erregimen bereziak, faktura, erregistro eta kontabilitate arloko betebeharrak eta Zergaren kudeaketa.

Interes berezia dute salbuespen eta erazko betebeharrei buruzko Tituluek.

Bi horietatik lehendabizikoan, salbuespen jakin batzuen norainokoa zehazten duten kontzeptu batzuk daude, salbuespen inmobiliarioei uko egiteko prozedura arautzen da eta hirugarren herrialdeekin burututako eragiketei dagozkien salbuespenak aplikatzeko prozedurak ezartzen dira. Denetan, onura fiskal horiek arautzen dituen Elkarteko arauteriari egokitzeko modua hobetu da.

Betebehar formalei dagokienean, Zergari buruzko Erregelamendutik ezabatu da, bestelako xedapen berariazkoen xede diren gaien arauketa; Zergaren kontabilitate betebeharrei, kudeaketa eta likidazioari mugatuko zaizkie soilik; gai horien arauketan BEZ arloko Seigarren Artezpideko xedapenak, geroago 91/680/EEE Artezpideak aldatutakoak, errespetatu dira.

Horrenbestez, Ekonomia eta Ogasun Kontseilariak proposaturik eta Nafarroako Gobernuak mila bederatziehun eta laurogeita hamahiruko martxoaren zortzian egindako bilkuran hartutako Erabakiarekin bat etorriz, dekretatu dut:

Artikulu Bakarra

Balio Erantsiaren gaineko Zergari buruzko Erregelamendua onestea. Berorren testua ondorengoa da.

BALIO ERANTSIAREN GAINEKO ZERGARI BURUZKO ERREGELAMENDUA

I. TITULUA. ZERGAGAIA MUGATZEA

I. KAPITULUA. Ente publikoen eragiketak

1. artikulua. (indargabetua).

II. KAPITULUA. Elkarte barneko eragiketak

2. artikulua. Garraiagailu berriak.

Zergari buruzko Foru Legearen 13. artikuluko 2. atalak aipatzen dituen garraiagailuak berritzat hartuko dira, horiei dagokienean, ondoren azaltzen diren inguruabarretako baten bat ematen denean:

1go. Zerbitzuan lehen aldiz jarriko den egunetik hasi eta hurrengo hiru hilabeteetan horren emanaldia burutzea edo sei hilabeteetan, motor bidez mugitzen diren lurreko ibilgailuen kasuan.

Garraiagailu bat zerbitzuan jartzeko eguntzat hartuko da, Elkartearen barnean, lehen aldiz, behin betiko edo behin-behineko izaeraz, matrikulatu denari dagokiona eta, horren ezean, behar den garraiagailuari dagokion aseguru kontratu zaharrenean jartzen duena, aseguru horrek garraiagailu hori erabiltzearen ondorioz eman daitekeen erantzukizun zibila babesten badu, edo zuzenbidean onartutako edozein frogabideren ondoriozkoa, duen erabilpen egoera kontutan harturik.

2garren. Lur gaineko ibilgailuak 6.000 kilometro baino gehiago ez ibili, itsasuntziak 100 ordu baino gehiago ez nabigatu eta aireuntziak 40 ordu baino gehiago airean ez ibiltzea.

Inguruabar hau zuzenbidean onartutako ezein frogabidez egiaztatuko da eta, bereziki, garraiagailuek dituzten kontagailuen bidez, eskukatu ez direla zehazteko egin daitezkeen frogak galarazi gabe.

3. artikulua. Zergaren aplikazio eremuan zergak ordaintzeko aukera.

1. Zergari buruzko Foru Legearen 14. artikuluko 1. zenbakian aipatzen diren pertsona edo entitateek zergari lotzea aukeratzen ahal dute Batasun barnean egiten dituzten ondasun-eskurapenengatik, urte natural berean edo aurrekoan 10.000 euroko muga gainditu ez badute ere.

2. Aukera hori edozein unetan har daiteke; horretarako, nahikoa izanen da Ekonomia eta Ogasun Departamentuaren aitzinean behar den idazkia aurkeztea. Burutzen dituzten Elkarte barneko ondasun eskuraketa guztiak ukituko ditu.

3. Aukera hau hartu dela usteko da, aurreko zenbakiak aipatzen duen aitorpena aurkezten ez bada ere, aitorpen-aldian burutu diren Elkarte barneko eskuraketei dagokien aitorpen-likidazioa aurkezten den unean berean.

4. Aukera horren barnean guttienez unean uneko urtea iragateko falta den denbora eta hurrengo bi urteak sartuko dira eta aukera hori errebokatu arte, hurrengo urteetan ere ondorioak izanen ditu.

5. Arestion aipatu den guttieneko epe hori iraganik, 2. zenbakian aipatzen den idazkiaren bidez, erreboka daiteke.

II. TITULUA. SALBUESPENAK

I. KAPITULUA. Ondasun emanaldiak eta zerbitzu prestazioak

4. artikulua. Prezio baimenduen kontzeptua, ospitaleratze edo osasun laguntzako zerbitzuen salbuespenaren ondorioetarako.

Zergari buruzko Foru Legearen 17. artikuluko 1. zenbakiaren 1go atalean xedatutakoak ondoriorik izan dezan, prezio baimendu edo jakinarazitzat hartuko dira, horiek aldatzeko Administrazioko ezein Organok aurretik baimendu edo jakinarazteko izapidaketa behar dutenak.

5. artikulua. (indargabetua)

6. artikulua. Izaera sozialeko entitate edo establezimendu pribatuaren kalifikazioa.

Nafarroako Zerga Ogasunari egindako eskaeraren bidez eskuratzen ahalko da izaera sozialeko entitate edo establezimendu pribatuaren kalifikazioa.

Nolanahi ere, izaera sozialeko entitateek edo establezimenduek egindako zerbitzuei dagozkien salbuespenak aplikatzeko, Zergari buruzko Foru Legearen 17.3 artikuluan ezarritako baldintzak bete beharko dira, alde batera utzita kalifikazio hori noiz eskuratu den, aurreko lerroaldean xedatutakoaren arabera.

7. artikulua. Hezkuntza eta irakaskuntzari buruzko eragiketen salbuespenak.

Balio Erantsiaren gaineko Zergari buruzko Foru Legearen 17. artikuluko 1. zenbakiaren 6garren idazatiak aipatzen dituen entitate pribatu baimendutzat hartuko dira, Foru Komunitateak, Estatuak, Autonomi Elkarteek edo hezkuntza alorrean gaituta dauden -edo ikastetxe bakoitzean ematen diren irakaskuntzei buruz eskumen berezia duten- bestelako ente publikoek onartu edo baimendutako jardueran diharduten ikastetxeak.

8. artikulua. Eragiketa inmobiliario batzuetan salbuespenak aplikatzea.

1. Zergari buruzko Foru Legearen 17. artikuluko 1. idatz-zatiaren hamargarren eta hamabigarren puntuek araututako salbuespenei uko egiten bazaie, eskuratzaileari horren berri eman beharko zaio, modu frogagarrian, kasuko ondasunak entregatu aurretik edo unean berean.

Subjektu pasiboak egindako eragiketa bakoitzeko eginen da ukapena eta, betiere, eskuratzaileak izenpetutako aitorpen baten bidez frogatu beharko da; bertan azaldu beharko du behar diren ondasun higiezinak eskuratzeagatik jasandako zergaren kenkari osoa edo zati batekoa izateko eskubidea duen subjektu pasiboa dela, edo, bestela, eskuratutako ondasunetarako aurreikusi den destinoak eskubidea ematen diola kenkari osoa edo zati batekoa izateko

.

2. Balio Erantsiaren gaineko Zergari buruzko Foru Legearen 17.1.12.A) artikuluan xedatutakoaren ondorioetarako, 12. idatz-zatiko B) letran zaharberritzearen definizioan erabilitako irizpideak aplikatuko dira.

8. bis artikulua (indargabetua)

II. KAPITULUA. Esportazioak eta horrelatsuko eragiketak

9. artikulua. Esportazioei dagozkien salbuespenak.

1. Esportazioei edo Elkartetik kanpora bidalitako igorpenei dagozkien salbuespenak emanen dira ondoren ezartzen diren betebeharrak diren heinean:

Lehenengo. Eskualdatzaileak edo honen izen eta kontura ari den hirugarren batek esportatu edo bidalitako ondasun emanaldiak.

Kasu hauetan, salbuespena emanen da ondasunak Elkartearen eremutik kanpora egiazki ateratzen badira; hori eman dela usteko da aduana legeriak hala dionean.

Salbuespena aplikatu denekoa egiaztatu ahal izateko, eskualdatzaileak Administrazioaren esku izan beharko ditu, Zergak indarra duen aldian, fakturen kopiak, kontratuak edo eskarien notak, garraio agiriak, ondasunen irteera egiaztatzen duten agiriak eta eragiketaren gainontzeko egiaztagiriak.

Bigarren. Zerga aplikatzen den lurraldean egoitzarik ez duen erostunak edo haren ordez eta haren izenean diharduen hirugarren batek esportatu edo bidalitako ondasunen entregak, honako kasuotan:

A) Araubide komertzialeko entregak.

Entregatzen diren ondasunak igorpen komertziala direnean, zergaz salbu egoteko honako baldintzak bete beharko dira:

a) Aurreko lerroaldean ezarri direnak.

b) Hurrengo 3. puntuko laugarren lerroaldeko d) letrak agintzen duena ezertan galarazi gabe, ondasunak aduanara eraman beharko dira jasokizun daudenetik hilabeteko epean, eta aduanan erostunak aduanaren esportazio dokumentua aurkeztuko du.

Dokumentu horretan jasoko ere da Komunitate horretan egoitza duen hornitzailearen izena, zeinari baitagokio esportatzaile izaera, haren identifikazio fiskaleko zenbakiarekin eta berak eman duen fakturaren erreferentziarekin; erostunak hornitzaile horri dokumentuaren kopia bat bidali beharko dio, irteerako aduanak dilijentziatua.

B) Bidaiari erregimeneko emanaldiak.

Zergari buruzko Foru Legeak ezarritako betebeharren betetzea, emanaldi horien salbuespenari dagokionean, ondoko arauei egokituko zaie:

a) Salbuespena aplikatzeko, ondasun ematea faktura baten bidez frogatuko da, zeinaren zenbateko osoa, zergak barne direla, 90,15 eurotik gorakoa izanen baita.  

b) Bidaiarien ohizko helbidea pasaporte, nortasun agiri edo zuzenbidean onartutako ezein frogabideren bidez egiaztatuko da.

c) Saltzaileak behar den faktura luzatu beharko du eta bertan azalduko dira eskuratutako ondasunak eta, bereizirik, horiei dagokien Zerga.

d) Ondasunek, faktura luzatu eta hurrengo hiru hilabeteetako epean, Elkarteko lurraldetik atera beharko dute.

Horretarako, bidaiariak ondasunak esportaziorako Aduanan aurkeztuko ditu eta Aduanak horien irteera egiaztatuko, fakturan behar den eginbidea jarriz.

e) Aduanak eginbidetutako faktura igorriko dio bidaiariak hornitzaileari. Azken honek, jasandako kuota itzuliko dio hurrengo hamabost eguneko epean, txeke zein banku transferentzia bidez, kreditu txartelean abonatuz edo errenboltsoa froga dezakeen beste edozein bitarteko erabiliz.

Zergaren errenboltsoa Nafarroako Zerga Ogasunak baimendutako entitate laguntzaileen bidez ere egiten ahalko da, eta hark ezarriko du zer baldintzak bete beharko dituzten entitate horiek aritzeko eta zenbateko komisioak jasoko dituzten.

Bidaiariek entitate horiei igorriko dizkiete eginbidetutako fakturak, eta entitateek kasuan kasuko zenbatekoa ordainduko dute, bidaiariaren adostasuna agerraraziz.

Ondoren, aipatutako entitateek fakturak igorriko dizkiete hornitzaileei, paperean edo formatu elektronikoan, eta berauek errenboltsoa egitera beharturik izanen dira.

C) Zergarik gabeko dendetako emanaldiak.

Emanaldi horien salbuespena emanen da bidaiaria bertatik berehala ateratzen bada; garraio txartelaren bidez egiaztatuko da hori.

Hirugarren. Esportatzen diren ondasun higigarrien gaineko lanak.

Zergari buruzko Foru Legeko 21.1 artikuluko 3. ataleko g) letrak agintzen duena ezertan galarazi gabe, ondasun higigarrien gainean egindako lanak zergaz salbu egonen dira, ondasun horiek lanok egin dituenak, zergaren aplikazio eremuan egoitzarik ez duen lan hartzaileak edo haietako baten ordez eta haren izenean diharduen beste norbaitek helburu horrekin erosi edo inportatu eta gero Nafarroatik kanpora esportatu edo aldatu egiten baditu.

Lan horiek ondasunak hobetu, eraldatu, mantendu edo konpontzeko lanak izan daitezke, bai eta ondasunei jatorri diferenteko beste ondasun batzuk eranstearen bidez egiten direnean ere eta ez da egonen obligaziorik ondasunak zergari buruzko Foru Legeko 21. artikuluan aipatzen diren aduana araubideari lotzeko.

Atal honetan aipatzen den salbuespenean honakoak ez dira sartzen: Aldi bateko inportazioaren aduana araubidean (inportazio eskubideetatik partez nahiz osorik salbu) edo aldi bateko inportazioaren zerga araubidean dauden ondasunen gaineko lanak.

Lanok zergaz salbu egoteko, honako baldintzak bete beharko dira:

a) Zenbaki honetako 2. atalean ezartzen diren baldintzak, kasuan kasu zergaren aplikazio lurraldean egoitzarik ez duen lan hartzaileak nahiz lanen egileak betetakoak.

b) Ondasunak zergaren aplikazio lurraldean egoitzarik ez duten pertsonek edo pertsona horien ordez eta haien izenean dihardutenek erosi edo inportatu beharko dituzte, ondasunei lan jakin batzuek eranstea helburu.

c) Balio Erantsiaren gaineko Zergari dagokionez zergaren aplikazio lurraldean egoitzarik ez duten erostunek edo inportatzaileek eginen dituzte lanak.

d) Lanak egiteko epea, lanen egileak ondasunak jasotzen dituenetik sei hilekoa izanen da; egile horrek hartu izanaren agiria bidali beharko dio zergaren aplikazio lurraldean egoitzarik ez duen ondasun erostunari edo, hala tokatzen bada, hornitzaileari.

Zilegi izanen da, interesatuak hala eskatzen badu, aurreko lerroaldean agindu den epea luzatzea lanak egiteko behar den adina denboran. Hartarako eskaera Ekonomi eta Ogasun Departamentuan aurkeztuko da eta hark emanen du baimena, eskaera arrazoizkoa bada egin behar diren lanak ikusita; eskaera aurkeztu, eta Administrazioak hurrengo hilabetean ezer erantzuten ez badu, luzapena eman dela ulertuko da.

e) Lanak amaitu direlarik, ondasunak hurrengo hilabeteko epean bidali beharko dira atzera aduanara, esportatzeko.

Esportazio hori lanen hartzaileak edo egileak egin beharko du, esportazio dokumentuan hornitzailea nor den eta hark emandako fakturaren erreferentzia jasota.

Zilegi izanen ere da hirugarren batek egitea esportazioa lanen hartzaile edo egilearen ordez eta haren izenean.

f) Zergaren aplikazio lurraldean egoitzarik ez duen lan hartzaileak edo, hala tokatzen bada, lanen egileak, esportazio dokumentuaren kopia bat bidaliko dio hornitzaileari, irteerako aduanak dilijentziatua.

Laugarrena. Egiaztatutako erakundeei ondasunak ematea, haien esportaziorako.

Salbuespen honek ondorioak izan ditzan, Zerga Administrazioari dagokio ongintza edo hezkuntza arloko jardueretan edo jarduera humanitarioetan aritzen diren erakundeak ofizialki egiaztatzea, haiek eskatu ondoren eta kasuko departamentuak txostena emanda, aipatu erakunde horiek irabazi-asmorik gabekoak direla ziurtatuz.

Entrega horiei dagokienez, idatz-zati honetako lehen puntuan xedatutakoa ere aplikagarri izanen zaie.

Ondasunak erkidegotik kanpora esportatuko dira horiek eskuratu eta ondorengo hiru hilabeteko epean, edo zerga administrazioak baimendutako epe luzeagoan, hala eskatu ondoren. Baimendutako erakundea beharturik dago hornitzaileari irteerako agiriaren kopia igortzera, egin ondoko hamabost eguneko epean.

Bosgarren. Esportazioekin zerikusi zuzena duten zerbitzuak.

A) Esportazioekin zerikusi zuzena duten zerbitzutzat hartuko dira hurrengo betebeharrak biltzen dituztenak:

a) Honako hauei ematea: ondasunak esportatzen edo bidaltzen dituztenei, ondasun horiek eskuratzen dituztenei, edo batzuen edo besteen kontura ari diren bitartekariei edo aduanako ordezkariei.

b) Aipatu esportazio horiek direla eta burutzea.

c) Ondasunak Elkartetik kanpoko toki batera edo zamak gehitu edo sendotzeko eragiketak burutzen diren portu, aireportu edo mugetako toki batera zuzenean igortzen diren unetik aitzina burutzea, nahiz eta beste toki batzutan bitarteko eskalak burutu.

Letra horrek aipatzen duen baldintza ez da galdatuko garraiagailuak errentan eman, zama enbalatu eta egokitu, eskuratzaileen kontura salgaiak berrezagutu eta beste antzeko zerbitzuei dagokienean, aurretik igorpena egiteko horiek burutzea nahitaezkoa bada.

B) Zenbaki honetan jasotako salbuespenak aplikatu ahal izateko, ondoko eskakizunak beteko dira:

a) Ondasunak erkidegotik ateratzeko hiru hilabete izanen dira, zerbitzua eskaintzen denetik aurrera.

b) Zuzenbideak onartutako edozein frogabidez justifikatuko da ondasunak ateratzea.

c) Ondasunak ateratzea justifikatzen duten agiriak zerbitzua eskaintzen duenari bidaliko zaizkio. Horretarako, hiru hilabete izanen dira, ondasunak ateratzen direnetik aurrera.

C) Zenbaki honetan sartzen diren zerbitzuen artean honako hauek egonen dira: ondasunen garraioa; zamalanak eta mantentzea; zainketa, biltegiratzea eta enbalatzea; garraiobideak alokatzea; edukiontziak eta salgaiak babesteko materialak eta antzeko beste batzuk.

2. 1. zenbakian ezarritako betebeharrak ez badira betetzen, subjektu pasiboa beharturik egonen da Zerga likidatu eta burututako eragiketen hartzaileari Zerga erasatera.

10. artikulua. Esportazioei asimilatutako eragiketetako salbuespenak.

1. Untzi haundi eta aireuntziekin, horietan sartutako objektuekin eta aipatu garraiagailu horien hornimenduekin zerikusirik duten eragiketetako salbuespenak emanen dira ondoko betebeharrak betetzen badira:

Lehenengo. Zergari buruzko Foru Legearen 19. artikuluko 1. zenbakitik 7.era bitartekoek aipatzen dituzten garraiagailuen eskualdatzaileek, ondasunen hornitzaileek edo zerbitzuak ematen dituztenek beraien esku gorde beharko dituzte, Zergaren preskripzio epean, behar den fakturaren ale bikoiztua eta, kasuan kasu, pleitamendu edo errentamenduko kontratuak eta itsasuntzia edo aireuntzia Matrikula Erregistroan inskribatu izanaren kopia baimendu bat, Zergari buruzko Foru Legearen 19. artikuluko 1 eta 4. zenbakiek aipatzen dituzten helburuetarako erabiltzeko gaitasuna emanen dietenak.

Halaberean, aurreko lerroaldean adierazitako pertsonek ondasunen eskuratzaileei edo zerbitzuen hartzaileei galdatu beharko diete, beroriek izenpetutako aitorpena; bertan salbuespena aplikatzea justifikatzen duen ondasunen afektazio edo destinoa agertuko da.

Itsasuntzia edo aireuntzia egiten denean, eskuratzaileak eskualdatzaileari matrikulazioaren kopia baimendua eman beharko dio, idazati honetan aipaturiko Erregistroko inskribapenaren egunetik hasita hilabeteko epean.

Bigarren. Itsasuntzi edo aireuntzi bat egina dagoela ulertuko da aurreko idazatian aipaturiko Erregistroan matrikulatzen den unean.

Hirugarren. Untzi haundi edo aireuntzi batek eraldakuntzarik jasan duela usteko da, horietan burututako lanen kontraprestazioa, untzitegi edo lantegian sartu den unean duten balioaren 100eko 50a baino haundiagoa ez bada.

Balio hori zehaztuko da, aduana legeriak inportatu beharreko salgaiak aduanan duten Balioa zehazteko erabiltzen dituen arauei jarraikiz.

Laugarren (indargabetua).

Bosgarren. Objektuak itsasontzietan sartzeko hiru hileko epea egonen da, objektu horiek eskuratzen direnetik aurrera, eta dagokion ontziratzeko administrazio-dokumentuaren bidez frogatuko du hori hornitzaileak. Garraiobideen titularrak dokumentu horren kopia bat igorriko dio objektuen hornitzaileari, objektuak ontziratu ondoko hamabost eguneko epean.

Aireuntzietan, objektuak sartuko dira horiek eskuratu eta hurrengo urteko epean, eta aurreko lerroaldean ezarritako gainerako baldintza guztiak bete beharko dira sartzean.

Aurreko lerroaldeetan aipatutako epeak luzatu ahal izanen dira interesatuak eskaturik; ezinbesteko arrazoiengatik edo halabeharrez, edo objektuak egin edo eraldatzeko prozesu teknikoari atxikitako betebeharrengatik.

Salbuespenaz balia daitezkeen objektuen artean sartuko dira, untzi haundi edo aireuntzietan sar daitezkeen ondasun guztiak, horien elementu edo zatiak, baita horien zati banaezinak izan edo horietan itsasten direnak ere, horiek ustiatzeko ohizkotasunez erabili edo beharrezkoak badira.

Bereziki, ondorengoak horrelakotzat hartuko dira: barruko aparailu eta tresnak, horien tresneriako osagai direnak, horiek jantzi edo dekoratzekoak eta arrantzan erabilitako tresna, ekipo, material eta sareak, hala nola, beitak, amuak, amu hariak, arraina enbalatzeko kaxak eta antzekoak. Beti ere, objektu hauek untzi haundien barruan behar bezala sartu edo kokaturik egon eta horien ondasun inbentarioaren zati izan beharko dute.

Zergaren salbuespenaz baliatu diren untzi haundi eta aireuntzietan sartutako objektuak horien barruan egon beharko dute, ez badira behinik behin beste batzuetara lekualdatzen eta azken hauen helburuek ere aipatu objektuak horietan sartzeak dakarren salbuespena egiaztatzen badute.

Salbuespena aplikatuko zaie soilik itsasuntzi edo aireuntzi horietan, arestiko 1. idazatian aipaturiko Erregistroan matrikulatu ondoren, gehitzen diren objektuei.

Seigarren. Hornitzaileak ontziratzeko administrazio-dokumentuaren bidez frogatuko du hornigaiak itsasontzietan eta aireontzietan sartu direla, eta garraiobideen titularrak dokumentu horren kopia bat igorriko dio aipatu produktuen hornitzaileari hilabeteko epean, produktuak entregatzen direnetik zenbatzen hasita.

Dena den, Ekonomi eta Ogasun Departamentuak prozedura sinplifikatuak ezarri ahalko ditu aurreko lerroaldean aipatu hornimendu gaiak untziratu izana frogatzeko.

Zazpigarren. Aireuntziak merkantzien edo bidaiarien garraio ordainduko merkataritza jardueretan soilik erabiltzearen baldintza betetzat joko da, nahiz eta horien erabilpena hirugarrenei utzi errentamendu edo azpierrentamenduz, urte natural bakoitzean guztira hogeita hamar egunetik gorakoak izanen ez diren denboraldietarako.

2. Untzi haundi eta aireuntzien zuzeneko beharrak asetzeko burutzen diren zerbitzuen artean sartuko dira ondokoak, untzi haundi edo aireuntzi horien helburuek salbuespena egiaztatzen badute:

a) Untzi haundiei dagokienean: praktikatu, atoean eraman eta lotzeko zerbitzuak; portuko instalazioak erabiltzea; untzi haundia eta barneko materiala mantentzeko eragiketak, hala nola, sotoen desintsektaketa, desarratoiketa eta garbiketa; zainketa eta suei aurre egiteko zerbitzuak; segurtasun bisitaldiak eta peritaia teknikoak; untzi haundiko laguntza eta salbamendua eta itsas korredore eta interpretariek, itsas kontsignatarioek eta agenteek duten lanbidea burutzerakoan egindako eragiketak.

b) Untzi haundien zamari dagokionean: untzi haundiaren zamalanak; salgaien edukinontzi eta babes materialaren alogera; salgaien zaintze lanak; kaibideen gainean salgaientzako bagoiak kokatu eta erakartzea; bidaiariak eta horien ekipaiak untziratu eta desuntziratzea; bidaiariak eta horien ekipaiak untziratu eta desuntziratzeko erabilitako material, makineria eta ekipoak alokatzea, albaiteroen azterketak, azterketa fitosanitarioak eta Esportazioak Ikuskatu, Begiratu eta Arautzeko Zerbitzu Ofizialak egindakoak.

c) Aireuntziei dagokienean: lur hartu eta aireratzeko zerbitzuak; argiteria zerbitzuak erabiltzea; aireuntziak kokatu, lotu eta leku estalian sartzea; bidaiari edo salgaiak hartzeko instalazioak erabiltzea; aireuntziak hornitzeko instalazioak erabiltzea; aireuntziak eta horien barneko material eta ekipoak garbitu, mantendu eta konpontzea; zainketa eta suei aurre hartzea; segurtasun bisitaldiak eta peritaia teknikoak; aireuntzien salbamendua eta aireuntzietako kontsignatario eta agenteek duten lanbidea burutzerakoan egindako eragiketak.

d) Direuntzien zamari dagokionean: bidaiariak eta horien ekipaiak untziratu eta desuntziratzeko eragiketak; aireuntzien zamalanak; bidaiariei arreta egitea; bidaiari eta horien ekipaien erregistroa; trafiko seinaleak igorri eta hartzea; posta leku batetik bestera eramatea; aire trafikorako beharrezko izan eta aireportuetan erabilitako material eta ekipoen alogera; salgaien edukinontzi eta babes materialak alokatzea; salgaien zainketa eta albaiteroen azterketak, azterketa fitosanitarioak eta Esportazioak Ikuskatu, Begiratu eta Arautzeko Zerbitzu Ofizialak egindakoak.

3. Bidaiari eta horien ekipaien itsaso edo airezko nazioarteko garraioen salbuespena ondoko baldintzei egokituko zaie:

1go. Salbuespenak bere baitan hartuko ditu, Zerga aplikatzeko eremutik kanpo kokaturik dauden lurraldeetan eskala egiten duen joan-etorriko garraioak.

2garren. Salbuespenak ez ditu bere baitan hartuko bidaiari eta horien ekipaien garraioak, bidaia penintsulan edo Balear Irletan hasi eta horietan beretan bukatzen badira, untzi haundi edo aireuntziek aipatu lurralde horietatik kanpo dauden portu edo aireportuetarainoko bidea segitu arren.

III. KAPITULUA. Eremu eta etendura erregimen jakin batzuei dagozkien eragiketak

11. artikulua. Zerga gabeko eremuei eta zerga gabeko gordailuei dagozkien salbuespenak.

1.-Zerga gabeko eremuetarako eta zerga gabeko gordailuetarako ondasunen edo aldi baterako gordailu egoeran jartzen direnen entregak salbuetsirik gertatuko dira, baldin eta ondasunak adierazitako eremuetan edo egoeran sartu edo ezartzen badira. Hori egiaztatuko da aduanetako legeriak zehazten duen moduan.

Hornitzaileak, eskuratzaileak edo horietako edozeinen kontura beste batzuek garraiatuko dituzte ondasunak adierazitako eremu horietara.

2.-1. zenbakian adierazitako eremuetan edo egoeran dauden ondasunen entregak eta ondasun horiei dagozkien zerbitzuak salbuetsirik gertatuko dira honako kasuan soilik: ondasunak, aduanetako legeriaren aurreikuspenei jarraikiz, zerga gabeko eremu edo gordailu horietan edo aldi baterako gordailuetan dauden bitartean.

Aurreko lerroaldeko betebeharra betetzat emanen da ondasunak aipatu leku horietatik ateratzen direnean era bereko beste batzuetan sartzeko.

3. Ondasunak eskuratzen dituenak edo zerbitzuak hartzen dituenak aitorpen sinatua eman beharko dio ondasunak igorri edo zerbitzuak eman dizkionari, non salbuespena justifikatzen duten ondasunen egoera adieraziko duen.

Ondorio horietarako, eskuratzaileak edo hartzaileak Zerga Administrazioko Estatu Agentziaren egoitza elektronikoan horretarako eskuragarri dagoen inprimakia erabiltzen ahalko du.

12. artikulua. Etendura erregimenei dagozkien salbuespenak.

1. Aduanetakoa ez den beste gordailu erregimen bat izan ezik, Zergari buruzko Foru Legearen 21. artikuluan sartutako erregimenekin zerikusia duten ondasunen entregak eta emandako zerbitzuak salbue- tsita egonen dira betebehar hauek betetzen badira: 

Lehenengo. Aipatutako eragiketak aduana edo zerga erregimenen babesean egiten diren prozesuetan erabili edo erregimen horietan mantendutako ondasunei buruzkoak izatea, kasu bakoitzari aplikatzen zaion aduana edo zerga legerian xedatutakoaren arabera. 

Bigarren. Ondasunen eskuratzaileak edo zerbitzuen hartzaileak aitorpen sinatua ematea ondasunak igorri edo zerbitzuak eman dizkionari, non salbuespena justifikatzen duten ondasunen egoera adieraziko duen.

Ondorio horietarako, eskuratzaileak edo hartzaileak Zerga Administrazioko Estatu Agentziaren egoitza elektronikoan horretarako eskuragarri dagoen inprimakia erabiltzen ahalko du.

2. Aduanetakoa ez den beste gordailu erregimen batekin zerikusia duten ondasunen entregak eta emandako zerbitzuak salbuetsita geratuko dira eragiketa horiek aipatu erregimenaren babesean ezarri nahi diren edo ezarrita diren ondasunei buruzkoak badira, Zergari buruzko Foru Legearen 21. artikuluko 2. zenbakian xedatutakoaren arabera. 

IV. KAPITULUA. Elkarte barneko eragiketak

13. artikulua. Beste Estatu Elkartekide baterako diren ondasun emanaldiei dagozkien salbuespenak.

1. Enpresari edo profesionari batek beste Estatu Elkartekide batera destinatutako ondasun emanaldiak Zerga ordaintzetik salbuetsirik gertatuko dira, Zergari buruzko Foru Legearen 22. artikuluan ezarritako baldintza eta betebeharrak betetzen badira.

2. Destinoko Estatu Elkartekide batera ondasunak igorri edo garraiatu direla egiaztatuko da zuzenbideak onartutako edozein frogabidez eta, bereziki, ondoko eraz:

1go. Saltzaileak edo horren kontura beste norbaitek burutzen badu, garraiariak luzatutako garraio kontratu edo fakturen bidez.

2garren. Erosleak edo horren kontura beste norbaitek burutzen badu, eskuratzailearen hartuagiriaren, eskuratzailearen zigilua duen fakturaren bikoizkiaren, garraio agirien kopiekin edo eragiketaren bestelako egiaztagirien bidez.

3. Eskuratzailearen izaera saltzaileari emandako identifikazio fiskaleko zenbakiaren bidez egiaztatuko da. Horretarako, Ekonomia eta Ogasun Departamentuari eskatzen ahal zaio EEEko edozein Estatu Elkartekidek aipatu eragiketen hartzaileei esleitutako identifikazio fiskaleko zenbakiaren baiespena.

4. Zergari buruzko Foru Legearen 9. artikuluko 3garren atalean sartutako ondasun transferentziei dagokienean, salbuespena emanen da enpresari edo profesionariak ondokoak egiaztatzen baditu:

1go. Ondasunen igorpen edo garraioa destinoko Estatu Elkartekidera.

2garren. Destinoko Estatu Elkartekidean Elkarte barneko ondasunen eskuraketei dagokien karga.

3garren. Destinoko Estatu Elkartekideak Balio Erantsiaren gaineko Zergaren ondorioetarako identifikazio zenbakia esleitu diola.

III. TITULUA. ZERGARI EZ ATXIKITZEKO AUKERA

14. artikulua. Emanaldi jakin batzuk Zergari ez atxikitzeko aukera.

Balio Erantsiaren gaineko Zerga erregimen arruntean arautzen duen Legearen 68. artikuluaren Lau zenbakian sartutako ondasun emanaldiek destinoan zerga ordaintzeko aukeraz baliatzeko Ekonomia eta Ogasun Departamentuari idazkia igorri beharko zaio, indarra hartu behar duen urte naturalaren aurreko urteko abenduan. Hori hala izanik ere, iharduera urtarrilaren 1a ez den beste egun batean hasten bada, aukera hori eragiketa horiek burutu baino lehenago gauzatu beharko da.

Subjektu pasiboak tributu Administrazioaren aitzinean egiaztatu beharko du burututako emanaldi horiek beste Estatu Elkartekide ba- tean aitortu direla.

Behin bi urte naturaleko epea iraganik, aukera hori berriro eskatu beharko da; bestela, errebokaturik geldituko da.

IV. TITULUA. ZERGA OINARRIA

15. artikulua. Zerga oinarria aldatzea.

1. Zergari buruzko Foru Legearen 28. artikuluan aipatzen diren kasuetan, subjektu pasiboa beharturik dago eragiketen hartzailearentzako faktura berria eman eta hari igortzera; faktura horretan jasanarazitako kuota zuzendu edo, kasua bada, bertan behera utziko da, Fakturazio betebeharrak arautzen dituen Erregelamenduaren 15. artikuluan aurreikusten den moduan. Erregelamendu hori apirilaren 10eko 23/2013 Foru Dekretuaren bidez onetsi zen. Zergari buruzko Foru Legearen 28.3 artikuluko kasuetan, aipatu faktura egin beharko da, eta haren kopia bat igorri beharko zaio konkurtso administrazioari epe berean.

Zerga-oinarria murrizteko edo, kasua bada, eragiketaren hartzaileak kengarri dituen kuotak handitzeko, aurreko faktura zuzenduko duen faktura berria eman eta igorri beharko da. Zergari buruzko Foru Legearen 28. artikuluaren 3. eta 4. idatz-zatietako kasuetan, subjektu pasiboak ere frogatu beharko du igorri izana.

 

2. Zergaren kargapeko eragiketetako hartzailearen konkurtsoa deklaratzeko auto judiziala ematen denean, eta jasanarazitako kuotei dagozkien kredituak osorik edo hein batean kobraezinak diren gainerako kasuetan, zerga-oinarriaren aldaketa jarraian ematen diren arauei lotuko zaie:

a) Baldintza hauek bete beharko dira:

1. Zerga-oinarria zuzendu nahi zaien eragiketek behar diren garaian eta moduan fakturatuak eta hartzekodunak luzatutako fakturen liburuan idatziak izan behar dute.

2. Hartzekodunak hilabeteko epea izanen du, zuzenketa-faktura igortzen denetik aurrera, bide elektronikoen bidez, Interneten bidez, horretarako prestatutako inprimakia erabilita, zerga-oinarriari egindako aldaketaren berri emateko, eta adieraziko du aldaketa horrek ez dituela ukituko kreditu bermatuak, finkatutako kredituak edo segurtatutako kredituak, edo elkarri lotutako pertsonen edo entitateen arteko kredituak, ezta zergaren aplikazio lurraldean, Kanarietan, Ceutan edo Melillan kokatzen ez den hartzailea duten eragiketak ere, Zergari buruzko Foru Legearen 28. artikuluan aurreikusitako moduan, eta kreditu kobraezinen kasuan, zorduna ez dagoela konkurtsopean edo, kasua bada, luzatutako zuzenketa-faktura konkurtsoa deklaratu zueneko autoa baino lehen luzatu zela.

Jakinarazpen horri, jarraian adierazten diren agiriak erantsiko zaizkio, Nafarroako Zerga Ogasunaren erregistro telematikoaren bidez:

–Zuzenketa-fakturen kopiak. Zuzenketa-fakturetan zuzendutako fakturak zein egunetan luzatu ziren jarri behar da.

–Zordunari edo konkurtsoko administratzaileari zuzenketa-faktura igorri zaiola frogatzen duen agiria, zuzenbidean frogatako onartzen den edozein baliabideren bidez.

–Kreditu kobraezinak badaude, hartzekoduna zordunari erreklamazio judizialaren bidez edo notarioaren aginduei bidez kreditua kobratzen saiatu dela frogatzen duten agiriak.

–Erakunde publikoek zorretan dituzten kredituei dagokienez, erakunde publiko zordunaren organo eskudunak egindako ziurtagiria, Zergari buruzko Foru Legearen 28.4.A) artikuluaren 4. baldintzari dagokiona.

b) Eragiketetako hartzailea enpresaburua edo profesionala bada:

1. Hartzekodunak igorri dizkion zuzenketa-fakturak jaso izana jakinaraziko du bide telematikoen bidez Interneten bidez, horretarako prestatutako inprimakia erabilita, eta kuota zuzenduen zenbateko osoa jarriko du, baita, halakorik bada, kendu ezin diren kuotena ere, hurrengo lerroaldean aipatzen den aitorpen-likidazioa aurkezteko ezarritako epe berean. Betebehar hori ez betetzeak ez dio hartzekodunari zerga-oinarria aldatzea galaraziko, betiere a) letran aipatu baldintzak betetzen badira.

2. Aurreko lerroaldean aipatu jakinarazpenaz gain, eragiketen zuzenketa-fakturak jaso diren aldiari dagokion aitorpen-likidazioan, aipatu hartzaileak kuota zuzenduen zenbatekoa jarri beharko du kendutako kuoten murrizketa gisa.

3. Zergari buruzko Foru Legearen 28.3 artikuluan aurreikusitako kasuan, zuzendutako kuotak honako hauetan adieraziko dira berariaz:

a’) Jasandako kuotak murrizteko eskubidea erabili den aldiei dagozkien aitorpen-likidazioetan.

b’) Aurrekoaren salbuespen gisa, erregelamendu honen 62.5 artikuluan araututako konkurtsoa deklaratu aurreko zergapeko egintzei dagokien aitorpen-likidazioan, baldin eta:

a’’) Eragiketen hartzaileak eskubiderik ez badu zerga osorik kentzeko eta kengarria ez den kuota zuzenduaren zatiari dagokionez.

b’’) Eragiketen hartzaileak zerga kentzeko eskubidea badu eta Zerga Administrazioak tributu zorra zehazteko duen eskubideak preskribitu baldin badu, hots, zuzentzen diren jasandako kuotak kentzeko eskubidea baliatu den likidazio-aldiari dagokiona.

4. Aldaketa edo aldaketak aurkezteko epea zuzenketa-fakturak jaso diren aldiari dagokion aitorpen-likidazioa egiteko epe bera izanen da.

Eragiketen hartzailea konkurtsopean badago, aurreko lerroaldeetan ezarritako betebeharrak hari egokituko zaizkio, eta hura izan ezean, konkurtsoko administrazioari, baldin eta haren ahalmenetan esku hartzeko araubidearen mende badago eta, betiere, bere administrazio- eta xedatze-ahalmenak bertan behera utzi badira.

c) Hartzailea enpresaburua edo profesionala ez denean, Zerga Administrazioak eskatzen ahalko dio hartzekodunak bidaltzen dizkion zuzenketa-fakturak aurkezteko.

d) Hartzekodunen hitzarmena onesten bada, horrek ez du eraginik izanen aurretik zerga-oinarrian egindako aldaketan.

3. Batasunaren barneko ondasun-eskuraketetan, eskuratzaileak zerga berezien itzulketa lortzen badu ondasunen bidalketa edo garraioa abiatzen den Estatu kidean, itzulketaren zenbatekoari dagokion heinean murriztuko da zerga oinarria.

Hala ere, ez da bidezkoa izanen Erregelamendu honetako 67. artikuluan aipatutako Batasun barneko eragiketei buruzko aitorpen laburtuan jarritako zenbatekoak aldatzea.

Sortutako kuotaren zenbatekoaren aldaketa itzulketa lortu den aldiari dagokion aitorpen-likidazioan agertuko da, subjektu pasiboak dagoeneko osorik kendu ez badu. Azken kasu horretan ez da bidezkoa izanen aitortutako datuak inola ere erregularizatzea.

IV. BIS TITULUA. Subjektu pasiboa

15. bis artikulua. Zenbait eragiketaren zerga oinarria.

Zenbait eragiketatan, zerga oinarria Zergari buruzko Foru Legearen 27.10 artikuluan xedatutako moduan zehaztu behar da. Artikulu horretan azaltzen diren baldintzak bete direla edo ez direla bete egiaztatzeko, zilegi izanen da aitorpen idatzia aurkeztea, eragiketako hartzaileak sinatua eta subjektu pasiboari zuzendua. Bertan hartzaileak adieraziko du, bere erantzukizunaren pean, ekarri dioten urrea Zergatik salbuetsirik eskuratu edo inportatu zela, Zergari buruzko Foru Legearen 85 bis.1.1 artikuluan xedatutakoa aplikaturik, edo ez zela hala izan.

15. ter artikulua. Maniatu gabeko urrearen eta urrezko produktu erdi-maniatuaren kontzeptua.

Zergari buruzko Foru Legeko 31.1 artikuluko 2. idatz-zatiko b) letrak agintzen dituenetarako, maniatu gabeko urretzat edo urrezko produktu erdi-maniatutzat hartzen da eskuarki lehengaitzat erabiltzen dena urrezko produktu akabatuak sortzeko, hala nola lingoteak, laminatuak, xaflak, orriak, ziriak, hariak, bandak, hodiak, urre legarra, kateak edo bere ezaugarri objetiboengatik eskuarki azken buruko kontsumorako ez diren beste guztiak.

15. quater artikulua. Subjektu pasiboaren inbertsio arauak aplikatzea.

1. Zergari buruzko Foru Legearen 31.1.Bigarrena e).b’) artikuluan aipatutako entrega egiten duen enpresaburuak edo profesionalak eskuratzaileari berariaz eta sinesgarriro jakinarazi beharko dio egindako eragiketa bakoitzaren salbuespenari uko egiten diola.

Zergari buruzko Foru Legearen 108. sexies. Bost artikuluan xedatutakoa galarazi gabe, eskualdatzaileak aurreko lerroaldeko uko egitea gauzatzen ahalko du baldin eta eskuratzaileak frogatzen badu subjektu pasiboa dela eta erregelamendu honen 8.1 artikuluan aipatzen den ezaugarriak betetzen dituela

.

 

2. Zergari buruzko Foru Legearen 31.1.2.e).c’) artikuluan aipatutako eragiketen hartzaileek entrega gauzatzen duen enpresaburuari edo pofesionalari berariaz eta sinesgarriro jakinaraziko diote enpresaburu edo profesional izaera duten aldetik ari direla.

3. Zergari buruzko Foru Legearen 31.1.2.f) artikuluaren lehen lerroaldean aipatutako eragiketen hartzaileek, kasua bada, berariaz eta sinesgarriro jakinarazi beharko dizkiote inguruabar hauek kontratista nagusiari (edo kontratista nagusiei):

a) Eragiketa horiei dagokienez, enpresaburu edo profesional izaera duten aldetik jardun dutela.

b) Eragiketa horiek lursailak urbanizatzeko edo eraikinak eraiki edo zaharberritzeko prozesu baten barnean gauzatu direla.

4. Zergari buruzko Foru Legearen 31.1.2.ºf) artikuluaren bigarren lerroaldean aipatutako eragiketen hartzaileek berariaz eta sinesgarriro jakinarazi beharko dizkiete artikulu honen aurreko zenbakiko b) letran aipatutako inguruabarrak azpikontratistei.

5. Zergari buruzko Foru Legearen 31.1.Bigarrena.g) artikuluaren bigarren eta hirugarren marratxoetan aipatutako eragiketen hartzaileek, kasua bada, berariaz eta sinesgarriro jakinarazi beharko dizkiote inguruabar hauek entrega egiten duen enpresaburuari edo profesionalari:

a) Eragiketa horiei dagokienez, enpresaburu edo profesional gisa jarduten dutela.

b) Eragiketa horiei dagokienez, birsaltzaile gisa jarduten dutela, eta, hala dela frogatzeko, berariazko ziurtagiri bat aurkeztu beharko dute, erregelamendu honen 15. quinquies artikuluan aipatzen den Zerga Administrazioak ondorio horietarako emandakoa.

6. Aurreko zenbakietan aipatutako jakinarazpenak eragiketa horien xedeko ondasunak edo zerbitzuak jaso aurretik edo jasotzen diren une berean eginen dira.

7. Aurreko zenbakietan aipatutako eragiketen hartzaileek, beren erantzukizunpean frogatzen ahalko dute, haiek berek sinatutako eta entrega egiten duen edo zerbitzua ematen duen enpresaburuari edo profesionalari zuzendutako aitorpenaren bidez, honako inguruabar hauek suertatu direla:

a) Eragiketa horiei dagokienez, enpresaburu edo profesional izaera duten aldetik jardun dutela.

b) Kasuan kasuko ondasun higiezinak erosteagatik jasandako zerga osorik kentzeko eskubidea dutela.

c) Eragiketa horiek lursail batzuk urbanizatzeko edo eraikinak eraiki edo zaharberritzeko prozesu baten barnean gauzatu direla.

8. Zergari buruzko Foru Legearen 33. Bat artikuluan aurreikusitako inguruabarrak suertatuz gero, aipatu hartzaileek solidarioki ordainduko dute kasuan kasuko tributu zorra, Foru Legearen 115.2. artikuluaren 2., 6. eta 7. idatz-zatietan xedatutakoa aplikatzea galarazi gabe.

15. quinquies artikulua. Enpresaburu edo profesional birsaltzailearen kontzeptua eta betebeharrak.

Zergari buruzko Foru Legearen 31.1.Bigarrena.g) artikuluan, bigarren eta hirugarren marratxoetan, xedatutakoaren ondorioetarako, birsaltzailea izanen da eragiketa horien xede diren ondasun eskuratuak birsaltzen aritu ohi den enpresaburua edo profesionala.

Enpresaburu edo profesional birsaltzaile horrek Nafarroako Zerga Ogasuneko organo eskudunari birsaltzaile izaeraren berri eman beharko dio, jarduera hasieran zentsu aitorpena aurkeztuta edo, bestela, ondorioak sortuko dituen urte naturala hasi aurreko azaroan.

Jakinarazpena hurrengo urteetarako ere luzatzen dela ulertuko da izaera hori galtzen ez den bitartean; birsaltzaile izateari uztearen berri ere eman beharko zaio Nafarroako Zerga Administrazioari, aldaketaren zentsu aitorpena aurkeztuta.

Enpresaburu edo profesional birsaltzaileak Nafarroako Zerga Ogasunak emandako ziurtagiri bat eskuratzen ahalko du, eta hura ematen den eguneko urte naturalerako balioa izanen du.

V. TITULUA. ZERGAREN ERASAPENA

16. artikulua. Erasapenaren gaineko arau bereziak.

 Zergari buruzko Foru Legearen 34. artikuluko 1. zenbakian xedatutakoari dagokionean, administrazio mailako kontratazioan aurrikusitako baldintza partikularren pleguetan espresuki agertu beharko du, ondorio guztietarako enpresarien eskaintzetan kontrataren prezioaz gain Zergari dagokion zenbatekoa ere bertan jarri beharko duela.

VI. TITULUA. ZERGA TASAK

17. artikulua. Zerga-tasa murriztua.

Zergari buruzko Foru Legearen 37.Bat.2. artikuluko 10. idatz-zatian aurreikusitakoaren ondorioetarako, hartzailea enpresaburu edo profesional izaerarik gabe jarduten ari dela frogatzeko, edo etxebizitza erabilera partikularrerako erabiltzen duela eta etxebizitzaren eraikuntza edo zaharberritzea obrak hasi baino bi urte lehenago gutxienez bukatu dela frogatzeko, obren hartzaileak subjektu pasiboari zuzendutako aitorpen idatzia eginen da, bertan adierazita, bere erantzukizunpean, aurretik adierazitako inguruabar horiek.

Zergari buruzko Foru Legearen 33.Bat artikuluan aurreikusitako inguruabarrak suertatuz gero, aipatu hartzaileak solidarioki ordainduko du kasuan kasuko tributu zorra, foru legearen 115.2.2 artikuluan xedatutakoa aplikatu ahal izatea galarazi gabe.

17. bis artikulua. %4ko zerga tasa murriztua.

Bat.

Zergari buruzko Foru Legearen 37. artikuluko Bi.1.6 ataleko bigarren paragrafoan zenbait etxebizitza-emateri buruz ezarritakoari dagokionez, hartzaileak sinatu eta subjektu pasiboari zuzendutako aitorpen idatziaren bidez egiaztatzen ahal dira ondoko inguruabar hauek: hartzaileak Sozietateen gaineko Zergari buruzko Legearen Testu Bategineko VII. tituluko III. kapituluan aurreikusitako araubide berezia edo Sozietateen gaineko Zergari buruzko abenduaren 30eko 24/1996 Foru Legearen X. tituluko V. kapituluan aurreikusitakoa aplikatzeko eskubidea duela, eta ondorengo errentamendutik ateratako errentei aplikatzen ahal zaiela, hurrenez hurren, aipatutako Legegintzako Errege Dekretuaren 54.1 artikuluak araubide arruntean ezarritako hobaria edo Sozietateen gaineko Zergari buruzko Foru Legearen 109 quinquies artikuluko 1. zenbakian ezarritakoa. Hartzailea izanen da aitorpen idatzi horretan adierazitakoaren erantzulea.

Zergari buruzko Foru Legearen 33. artikuluan aurreikusten diren inguruabarrak gertatuz gero, aipatu hartzailea tributu zorraren erantzule solidarioa izanen da, ezertan galarazi gabe, gainera, foru lege beraren 115.2.2 artikuluan xedatutakoa aplikatzea.

Bi.

1. Zergari buruzko Foru Legearen 37.Bi.1.4. artikuluko bigarren lerroaldean aurreikusitakoa aplikatuko da mugikortasun murriztua duten edo gurpil-aulkian dauden minusbaliatuak garraiatzeko ibilgailuak entregatzeko, Batasunaren barnean erosteko edo inportatzeko, betiere baldintza hauek ematen badira:

1. Gutxienez lau urte igaro izana beste ibilgailu bat antzeko baldintzetan erosi zenetik.

Nolanahi ere, baldintza hori ez da eskatuko ibilgailuen erabateko hondamenaren kasuetan (aseguru-etxeak egiaztatuta), edo ibilgailuen behin betiko baja justifikatzen bada.

Mugikortasun murriztua duten edo gurpil-aulkian dauden minusbaliatuak garraiatzeko ibilgailuak erosteko baldintzak ez dira antzekotzat hartuko, baldin eta ibilgailu horiek autonomia pertsonala sustatzeko eta mendekotasunari laguntzeko zerbitzu sozialak eskaintzen dituzten pertsona juridikoek edo entitateek erosi badituzte, hots, Autonomia pertsonala sustatzeari eta mendetasun-egoeran dauden pertsonak zaintzeari buruzko abenduaren 14ko 39/2006 Legean aipatutakoek, bai eta Minusbaliatuak gizarteratzeari buruzko apirilaren 7ko 13/1982 Legean aipatzen diren gizarte zerbitzuek ere, betiere pertsona talde jakin batzuen ohiko garraiorako erabiltzen badira, edo pertsona talde jakin batzuek erabil ditzaten erosten badira, edo aurreko ibilgailua edo ibilgailuak erostea eragin zuten horien lurralde edo geografia eremuetan erabiltzeko badira.

Nolanahi ere, eskuratzaileak aurreko ibilgailua edo ibilgailuak erosteko suertatu ziren inguruabarrak aldatu direla justifikatu beharko du.

2. Gero “Inter vivos” egintzen bidez ez eskualdatzea, erosi eta ondoko lau urteko epean.

2. Zergari buruzko Foru Legearen 37.Bi.1.4 artikuluko bigarren lerroaldean aurreikusirako zerga-tasa aplikatzeko, aldez aurretik Nafarroako Zerga Ogasunak eskubidea aitortu beharko du, eta horretarako, eskuratzaileak eta desgaitasuna duenak eskaera sinatu beharko dute. Aitorpen hori, gertatzen bada, eskatzen den egunetik beretik izanen ditu ondorioak.

Egiaztatu beharko da ibilgailua mugikortasun murriztua duten edo gurpil-aulkian dauden minusbaliatuak garraiatzeko erabiliko dela. Hona, frogagiri gisa onartuko diren agiri batzuk:

a) Ibilgailuaren titulartasuna desgaituaren izenean egotea.

b) Eskuratzailea desgaituaren ezkontidea edo senidea izatea (ahaideak lerro zuzenekoak nahiz aldamenekoak izan, hirugarren graduraino).

c) Eskuratzailea desgaitasuna duenaren bikote egonkor gisa inskribatua egotea Nafarroako Bikote Egonkorren Erregistro Fiskalean edo bizilekua duen autonomia erkidegokoan.

d) Eskuratzailea desgaituaren tutorea, legezko ordezkaria edo egitezko zaintzailea izatea.

e) Eskuratzaileak frogatzea desgaituarekin bizi dela erroldaren ziurtagiria aurkeztuz edo helbide fiskala etxebizitza berean izateagatik.

f) Ibilgailua pertsona juridiko batek erostea, pertsona horrek desgaitasuna dutenei laguntzeko jarduerak garatzen jardutea edo, kasua bada, bere plantillaren barnean langile desgaituak kontratatuak izatea, ibilgailua maiz erabiliko dutenak.

Desgaitasuna edo mugikortasun murriztua frogatzeko, Foru Komunitateko gizarte gaien zerbitzuek luzatutako ziurtagiria edo ebazpena beharko da, edo bestela Adinekoen eta Gizarte Zerbitzuen Institutuak (IMSERSO) edo autonomia erkidegoetako organo eskudunek luzatutakoa.

Nolanahi ere, ulertuko da honako hauek dutela %33ko edo gehiagoko desgaitasuna:

a) Ezintasun iraunkor osoa, erabateko ezintasun iraunkorra edo baliaezintasun handia aitortua duten Gizarte Segurantzako pentsiodunak.

b) Lanerako ezintasun iraunkorragatik edo lanerako desgaitasunagatik erretiro pentsioa aitortua duten klase pasiboetako pentsiodunak.

c) Epaile batek aitorturiko desgaitasuna dutenak. Kasu horretan, frogatutako desgaitasuna %65ekoa izanen da, maila horretara iristen ez bada ere.

Honako hauek dira mugikortasun murriztua dutenak:

a) Itsuak edo ikusmen urritasuna dutenak, betiere Espainiako Itsuen Erakundeko (ONCE) kide direnak, baldin eta dagokion egiaztagiriaren bidez erakundeko kide direla frogatzen badute.

b) Desgaitasuna dutenentzako aparkatzeko txartelen titular direnak. Toki korporazioek, edo bestela, autonomia erkidegoek luzatuko dituzte txartel horiek, eta beharrezkoa izanen da autonomia erkidegoko gizarte gaien zerbitzuen egiaztagiria edo ebazpena izatea, edo bestela, Adinekoen eta Gizarte Zerbitzuen Institutuak (IMSERSO) edo autonomia erkidego bakoitzean eskumena duen organoak luzatutakoa, mugikortasun murriztua egiaztatzen duena.

3. Zergari buruzko Foru Legearen 37. artikuluko Bi.1.4 atalean aipatzen diren ibilgailuen emateak egiten dituzten subjektu pasiboek, hots, aulki gurpildunean ibili ohi dire pertsonak edo mugikortasun urrikoak eramateko erabili ohi diren ibilgailuen emateak egiten dituztenek, zerga-tasa murriztua aplikatu ahal izanen dute baldin eta eskuratzaileak bere eskubidea frogatzen badu, Nafarroako Zerga Ogasunak hartutako erabakiaren egiaztagiriaren bidez. Agiri hori preskripzio epea amaitu arte gorde behar da.

VII. TITULUA. KENKARI ETA ITZULKETAK

I. KAPITULUA. Kenkariak

18. artikulua. Enpresa edo lanbide jarduerei dagozkien ondasun edo zerbitzuak ematen hasi baino lehen jasan edo ordaindutako kuoten kenkariak.

1. Enpresa edo lanbide jardueretan lehenago ari ez zirenek ondasun edo zerbitzu erosketa edo inportazioak egiten badituzte jarduera horietan aritzeko asmoz, elementu objektiboak behar dituzte erosketa edo inportazio horiek egitean asmo hori zutela frogatzeko, eta Zerga-Administrazioak bidezko du frogabide horiek eskatzea.

2. Aurreko zenbakian aipatzen den frogantza Zuzenbidean onartzen den edozein frogabide erabiliz egin daiteke.

Horretarako, kontuan har daitezke, besteak beste, honako gorabehera hauek:

a) Erosi edo inportatutako ondasun edo zerbitzuak zer-nolakoak diren; izan ere, aipatzen den jardueraren xedearekin bat etorri behar baitute.

b) Ondasun eta zerbitzu horiek erosi edo inportatu zirenetik enpresa edo lanbide jardueraren xedea osatzen duten ondasun edo zerbitzuak ematen hasi arteko epea.

c) Zerga arautzen duen araudiak, Merkataritza Kodeak edo enpresaburu edo profesional izaera dutenei aplikatu beharreko bestelako arau batzuek ezartzen dituzten betebehar formalak, erregistrokoak eta kontabilitatekoak betetzea.

Ildo horretatik, zehazki, honako betebehar hauek betetzen direla hartuko da aintzat:

a’) Erroldaren aitorpena aurkeztea, non administrazioari jakinaraziko zaion enpresa eta lanbide jarduerei hasiera eman zaiela eta, horretarako, ondasunak edo zerbitzuak erosi edo inportatu dituela jarduera horiek gauzatzeko, Zergari buruzko Foru Legearen 109.1.1 artikuluan aipatutakoaren arabera.

b’) Erregelamendu honen X. tituluan eskatutako kontabilitate arloko betebeharrak zuzen betetzea, eta zehazki, jasotako fakturen erregistro-liburuarena, eta betiere, inbertsio-ondasunen erregistro-liburuarena.

d) Zertan aritu nahi den, hartarako beharrezkoak diren baiespen, baimen edo lizentziak edukitzea edo eskatuak izatea.

e) Balio Erantsiaren gaineko Zerga ez beste tributu batzuei eta aipatu enpresa edo lanbide jarduerari buruzko aitorpenak aurkeztuak izatea.

3. Artikulu honetako 1 zenbakiak aipatzen dituen ondasun edo zerbitzuak erosi edo inportatu dituenak ezin badu frogatu ondasun edo zerbitzu horiek erosi edo inportatu zituenean enpresa edo lanbide jardueretan erabiltzeko asmoz egin zuela hori, erosketa edo inportazio horiek ez dira enpresaburu edo profesional gisa egindakotzat hartuko eta, horrenbestez, ezin zaie kenketarik egin eragiketa horiek direla-eta jasan edo ordaintzen dituen Zergaren kuotetan, ez eta ondasun edo zerbitzu horiek erosi edo inportatu eta gerora enpresa edo lanbide jardueran aritzeko erabiltzea erabakitzen badu ere.

4. Artikulu honen aurreko zenbakietan adierazitakoa berdin aplikatuko zaie lehendik ere enpresaburu edo profesional izan eta horrelako jardueretan ari direlarik, lehen ari ziren jardueretakoaz beste sektore bereizi batean enpresa edo lanbide jarduera berri batean hasten badira.

19. artikulua. Kenkarien arloko aukera eta eskabideak.

1. Subjektu pasiboek aukera izanen dute kenkarien arloko eskaera hauek egiteko, adierazitako epeetan eta ondorioekin:

Lehenengoa. Hainbanaketa berezia aplikatzeko aukera, Zergari buruzko Foru Legearen 49.2.1 artikuluan aipatua.

Honela gauzatzen ahalko da aukera hori:

a) Oro har, urte natural bakoitzari dagokion zergaren azken aitorpen-likidazioa aurkezteko epea bukatzen den arte; hala eginez gero, urte horretan aplikatutako kenkariak erregularizatuko dira.

b) Enpresa edo lanbide jarduerak hasten direnean, alde batera utzita aurretik egiten ziren jarduerez bestelako sektore batekoak diren, jarduera horiei dagozkien ondasunak edo zerbitzuak ohikotasunez banatzen edo ematen hasten deneko aldiari dagokion aitorpen-likidazioa aurkezteko epea bukatzen den arte.

Hainbanaketa bereziaren araua aplikatzeko aukerak ondorioak izanen ditu subjektu pasiboak errebokatzen duen arte; nolanahi ere, aplikazioak hiru urte naturaleko gutxieneko balioa izanen du, barnean sartuta baliatutako aukeraren urte naturala.

Errebokazioa egiteko, aipatutako gutxieneko epea igaro beharko da, eta urte natural bakoitzari dagokion zergaren azken aitorpen-likidazioa aurkezteko epea bukatu arte egiten ahalko da; hala eginez gero, urte horretan aplikatutako kenkariak erregularizatuko dira.

Bigarrena.-Zergaren Foru Legeko 9. artikuluko 1. idatz-zatiko c) letrako a') letrak jasotzen dituen sektore bereizientzako kenkarien araubidea aplikatzeko eskaera, Foru Lege horretako 47. artikuluaren 2 zenbakian jasoa.

2. idatz-zati honek aipatzen duen eskabidea honako epe hauetan egin daiteke:

a) Oro har, ondorioak izan ditzala nahi den urtearen aurreko azaroan zehar.

b) Enpresa edo lanbide jardueren hasiera kasuetan eta bat lehen ari zen jardueretakoaz beste sektore bereizi batean bere enpresa edo lanbide jarduera berri batean hastekoan, jarduera horiei dagozkien ondasunak edo zerbitzuak erregularki ematen hasi eta hurrengo hilabetearen bukaera bitarte.

Kenkarietarako baimentzen den araubidea soil-soilik aplika dakieke enpresa edo lanbide jarduerei dagozkien ondasun edo zerbitzuak ematen erregularki hasten denetik jasan edo pagatutako kuotei, eta aldi berean jarraian ematen diren datetatik aurrera hala direnei, bai artikulu honetako 2 zenbakiak aipatzen duen epean subjektu pasiboari Administrazioak jakinarazitako araubidea baimendutako kasuan bai Administrazioak bere ebazpena jakinarazi gabe hilabeteko epea igaro dela-eta emandakotzat ulertu behar diren baimenen kasuan:

a) Eskaera aurkeztu zen urtearen ondoko urteko urtarrilaren 1a, 2. idatz-zati honetako bigarren lerroaldeko a) letran xedatutakoaren babesean aurkeztutako eskaeren kasuan.

b) Ondasun eta zerbitzuak erregularki ematen hasitako data, 2. idatz-zati honetako bigarren lerroaldeko b) letran ezarritakoaren arabera aurkeztutako kasuetan.

Guztientzako baimendutako kenkari araubideak ondorioak izanen ditu Administrazioak errebokatu edo subjektu pasiboak uko egin arte. Uko egite hori ondorioak izan ditzala nahi den urtearen aurreko abenduan egin daiteke.

Aurreko lerroaldean esandakoaren salbuespen gisa, guztientzako kenkari araubide baimenduak ez du izanen ondoriorik honako urte hauetako bakoitzean: hura aplikatzetik sor litekeen kuota kengarriaren dirukopuru osoak sektore bereizi bakoitzari kenkari araubidea bat-banaka aplikatzetik aterako litzatekeena ehuneko hogei edo gehiagoan gainditzen duenean.

Hirugarrena.-Aurreko urterako behin betikotzat finkatutako kenkariaz bestelako behin-behineko portzentajea Zergaren Foru Legeko 51. artikuluak 2 zenbakian aipatua aplikatzeko eskabideak.

Honako epe hauetan aurkez daiteke 3. idatz-zati honek aipatzen duen eskabidea:

a) Oro har, ondorioak izatea nahi den urteko urtarrilean zehar.

b) Aurreko urtean behin betikotzat finkatutako portzentajea behin-behineko portzentaje gisa desegoki bihurtzen duten zirkunstantziak gertatzen badira eskabideak egiten diren urte berean, zirkunstantzia horiek gertatzen diren hilabetearen hurrengoaren bukaera arte.

Baimendutako behin-behineko portzentajeak honako data hauetatik aurrera izanen ditu ondorioak jasandako kuotetan:

a¿) Administrazioak subjektu pasiboari behin-behineko kenkari portzentajea jakinarazi badio artikulu honen 2 zenbakiak aipatzen duen hilabeteko epean, Administrazioak baimen horretan aipatzen duen data.

b¿) Administrazioak subjektu pasiboari behin-behineko kenkari portzentajeari buruzko ebazpena hilabeteko epean ez jakinarazteagatik baimendutzat ulertu behar den kasuetan, epe hori bete eta Zergaren hurrengo likidazio aldiaren lehen eguna.

Laugarrena. Zergari buruzko Foru Legearen 57. artikuluko 2. zenbakian aipatzen den behin-behineko kenkari portzentajea proposatzeko eskabidea; kenkari hori aplikagarria da enpresa edo lanbide jarduerak hasten direnean edo lehendik egiten ziren jardueretatik aparteko sektore berezia osatzen duten jarduerak hasten direnean, eta jarduera horiei lotutako ondasun edo zerbitzu emateak ohikotasunez hasi aurretik jasan edo ordaindu diren kuotei dagokienez.

Hasten diren jarduerei eta, kasua bada, lehendik egiten ziren jarduerei lotutako ondasun edo zerbitzu emate guztiak Zergari buruzko Foru Legearen 40. artikuluko 1. idatz-zatian aipatutako eragiketak badira, kenkarirako eskubidea sortzen dutenak, orduan ez da eskabiderik aurkeztu beharko. Horri dagokionez ez dira kontuan hartuko Zergari buruzko Foru Legearen 50. artikuluko 3. zenbakian aipatzen diren eragiketak.

Aipatutako jardueren hasiera Administrazioari jakinarazteko aitorpenarekin batera aurkeztu behar da 4. atal honetan aipatutako eskabidea.

Bosgarrena.-Zergaren Foru Legeko 51. artikuluko 3 zenbakiko bigarren paragrafoak aipatzen duen behin-behineko kenkari portzentajea, enpresa edo lanbide jarduerei hasiera ematen zaienean edo eskatzailea lehen aritzen zenaz beste sektore bereizi batekoei hasiera ematen dienean aplikatzen dena. Portzentaje hori aplikatuko da jarduera horiei dagozkien ondasun edo zerbitzuak erregularki ematen hasten den urtean, hasiera horretatik jasandako edo ordaindutako kuotei buruz zehazki, aurreko 4. idatz-zatiak aipatzen duen behin-behineko kenkari portzentajea, zehaztu ez delako, aplikatu ezin denean.

Ez da beharrezkoa eskabide hori aurkeztea, hasiera ematen zaien edota lehendik burutzen ziren jardueren xede diren ondasun edo zerbitzu emateak Zergaren Foru Legeko 40. artikuluko 1 zenbakian aipatutako kenkari eskubidea ematen duten eragiketak baizik ez direnean, eta beti ere, behin-behineko portzentajea aplikatu behar den urtean, jasotzekoa ez bada hainbanaketa arauaren zatikiaren zatitzailean sartu beharreko dirulaguntzarik, Zergaren Foru Legeko 50. artikuluko 2 zenbakiko 2. idatz-zatian xedatutakoaren arabera. Horretarako, ez dira kontuan hartuko Foru Lege bereko 50. artikuluko 3 zenbakiak aipatzen dituen eragiketak.

5. idatz-zati honek aipatzen duen eskabidea aipatu jarduerei dagozkien ondasun edo zerbitzuak erregularki ematen hasitako hilabetearen ondoko hilaren bukaera arte egin daiteke.

2. Aurreko idatz-zatian aipatutako eskaerak, uko egitea, eta horren aukera eta errebokatzea Nafarroako Zerga Ogasunaren aurrean eginen dira, horretarako prestatutako eredua aurkeztuz.

Aipatu eskabideen kasuan, Administrazioak hilabeteko epea izanen du, organo eskudunaren erregistroan tramitaziorako sarrera izan duten datatik aurrera, interesatuari haiei buruz emandako ebazpena jakinarazteko, eta eman direla ulertuko da epe hori betetzen bada aipatu jakinarazpena egin gabe.

II. KAPITULUA. Itzulketak

20. artikulua. Likidazioaldi bakoitzaren bukaerako itzulketak.

1. Zergaren Foru Legearen 62 eta 108 nonies artikuluetan ezarritako itzulketarako eskubidea gauzatzeko, artikulu honek araututako Hilabeteko Itzulketen Erregistroan izena emanik egon beharko dute subjektu pasiboek. Bestela, soilik urte natural bakoitzeko azken likidazioaldian eskatzen ahalko dute beren alde duten saldoa itzultzeko, zergaren foru legearen 61.1 artikuluan xedatutakoarekin bat.

2. Nafarroako Zerga Ogasunak kudeatuko du Hilabeteko Itzulketen Erregistroa, kontuan harturik Estatuaren eta Nafarroako Foru Komunitatearen arteko Hitzarmen Ekonomikoak mugatutako esparrua, eta horrekin bat.

3. Subjektu pasiboak, hala eskaturik, erregistroan sartuko dira, baldin eta beharkizun hauek betetzen badituzte:

1. Zentsu-aitorpen baten bidez egin beharko dute eskaera, Ekonomia eta Ogasuneko kontseilariak ezarritako moduan eta epean.

2. Zerga arloko betebeharrak beteak izanen dituzte, apirilaren 27ko 136/2005 Foru Aginduaren 11. artikuluan ezarri bezala (136/2005 Foru Agindua, apirilaren 27koa, Ekonomia eta Ogasun kontseilariak emana, Nafarroako Zerga Ogasunak zergen arloko informazioa eta ziurtagiriak emateko arauak ezartzen dituena).

3. Ez dira egonen Hilabeteko Itzulketen Erregistroan kautelaz baja emateko kasuren batean. Hona hemen kasu horiek:

a) Ekainaren 29ko 227/2004 Foru Aginduaren 3. artikuluko 2. eta 3. ataletan aurreikusitakoak (ekainaren 29ko 227/2004 Foru Agindua, Batasunaren barneko operatzaileen Erregistroa sortzen duena).

b) Identifikazio fiskaleko zenbakia eta horri lotutako errolda zehatz batzuk arautzen dituen otsailaren 22ko 8/2010 Foru Dekretuaren 13. artikuluan ezarritakoak.

4. Ez dituzte eginen zergak araubide erraztuaren bidez ordaintzen dituzten jarduerak.

5. Baldin eta entitateek erabiltzen badute zergaren foru legearen VIII. tituluaren IX. kapituluan araututako taldearen araubide berezia, erregistroan izena ematen ahalko dute baldin eta araubide berezi hori duten taldeko entitate guztiek hala adosten badute, eta atal honetan ezarritako baldintzak betetzen badituzte.

Entitate horietakoren batek ez baditu baldintzak betetzen, ez da onartuko araubide berezia duten entitateen taldeko bakar bat ere, edo, kasua bada, entitate guztiak kanporatuko dira.

Erregistroan izena emateko eskaera, eta, kasua bada, baja hartzeko eskaera, Nafarroako Zerga Ogasunean aurkeztu beharko du entitate nagusiak, eta araubide berezia duten taldeko entitate guztien izenean ariko da.

Entitate nagusiarekin eginen dira tramiteak erregistroan izena emateko edo hartan baja hartzeko, baita erregistroan irauteko baldintzak egiaztatzeko ere (jadanik inskribaturik dauden entitateen kasuan), izan ere, taldearen ordezkaritzat hartzen da, kontuan harturik zergaren foru legearen 108 nonies.Bi artikuluan xedatutakoa, eta horrekin bat.

4. Erregistroan izena emateko eskaerak azaroan aurkeztuko dira, eta hurrengo urtean izanen ditu ondorioak. Ondorioak zein urtetan izan behar dituen, urte horretako urtarrilaren 1tetik aurrera gauzatuko da izen-ematea.

Dena dela, subjektu pasiboek, ez badute izena epe horretan eman (aurreko paragrafoan ezarritakoan), eta enpresaburuek nahiz profesionalek, ez badira hasi jarduera enpresarial nahiz profesionalei dagozken ondasunak entregatzen edo zerbitzuak ematen, baina ondasunak nahiz zerbitzuak berenganatu badituzte jarduera horietarako (eta elementu objektiboen bidez egiaztatzen bada hori), aukera izanen dute, halaber, erregistroan izena emateko aldian behingo aitorpen-likidazioak aurkezteko epean. Bi kasuetan ere, aitorpen-likidazio horien likidazioaldia bukatu eta biharamunean izanen ditu ondorioak erregistroko izen-emateak.

Baldin eta talde batek hautatu nahi badu zergaren foru legearen VIII. tituluko IX. kapituluak araututako entitate taldeen araubide berezia, eta baldin eta entitate horiek denek erabaki badute, halaber, erregistroan izena ematea, taldeko entitate nagusiak batera aurkeztu beharko ditu erregistroan izena emateko eskaera eta araubide bereziaren hautua, betiere modu, leku eta epe berean, eta hurrengo urte naturalaren hasieratik izanen ditu ondorioak. Erregistroan izena emateko erabakiak geroago hartzen badira, orduan, aldian behingo aitorpen-likidazioak aurkezteko epean aurkeztu beharko da eskaera, eta, halakoetan, aitorpen-likidazio horien likidazioaldia bukatu eta biharamunean izanen dira ondorioak.

Erregistroan izena emateko eskaerak epez kanpo aurkezten badira, baztertu eta artxibatu eginen dira, eta subjektu pasiboari hala jakinaraziko zaio, beste tramiterik gabe.

5. Erregistroan izena emateko eskaera aurkeztu eta hiru hilabetean subjektu pasiboek ez badute jaso txostenaren ebazpenari buruzko berariazko jakinarazpenik, eskaera ezetsi dela ulertu beharko dute.

6. Aurreko 3. atalean ezarritako baldintzaren bat betetzen ez bada, edo egiaztatzen bada Zerga Administrazioari emandako zentsuko informazioa ez dela zehatza edo faltsua dela, hori aski izanen da erregistroan sartzeari uko egiteko, edo, izena emanik duten subjektu pasiboen kasuan, Nafarroako Zerga Ogasunak erregistro horretatik kanporatzeko.

Dagokion erabakia zein likidazioalditan jakinarazi den, likidazio horretako lehenbiziko egunetik aurrera izanen ditu ondorioak kanporatzeak.

Erregistrotik kanporatuz gero, erabakiaren ebazpena jakinarazi eta hurrengo hiru urteetan ez da onartuko izena emateko eskaerarik.

7. Hilabeteko Itzulketen Erregistroan izena emanik duten subjektu pasiboek urte bat gutxienez iraun beharko dute hartan, eskatutako urtea hain zuzen ere, edo, aldian behingo aitorpen-likidazioak aurkezteko epean egin badute eskaera, edo enpresaburuak nahiz profesionalak badira eta ez badira hasi jarduera enpresarial nahiz profesionaletarako ondasunak entregatzen edo zerbitzuak ematen, izena eman ondoko urtea iraun beharko dute.

8. Erregistroan borondatez baja hartzeko eskaerak azaroan aurkeztuko dira, eta hurrengo urtean izanen dituzte ondorioak. Baldin eta entitateek aplikatzen badute zergaren foru legearen VIII. tituluaren IX. kapituluan araututako taldearen araubide berezia, entitate nagusiak aurkeztuko du borondatezko baja hartzeko eskaera, erregelamendu honetako 50 bis. 5 artikuluan ezarritako epean, hor ezarritako ondorioekin.

Nolanahi ere, artikulu honetako 3. atalaren 4. puntuak adierazitako baldintza betetzeari uzten diotenean, subjektu pasiboek erregistroan baja eskaera aurkeztu beharko dute. Ez-betetzea gertatzen den hilari dagokion aitorpen-likidazioa aurkezteko epean aurkeztu beharko da eskaera hori, eta hil horren hasieratik izanen ditu ondorioak.

Subjektu pasiboak erregistroan baja eskatu duen urte natural berean ezin izanen du eskatu berriz ere izena ematea.

9. Subjektuak ez badaude inskribaturik Hilabeteko Itzulketen Erregistroan eta urte naturaleko azkeneko likidazioaldia ez den beste bateko aitorpen-likidazioetan egiten badu itzulketa eskaera, ez zaio hasiera emanen artikulu honek azaldutako itzulketa prozedurari.

10. Hilabeteko Itzulketen Erregistroan izena emanik duten subjektu pasiboek telematika bidez soilik aurkeztuko dituzte zergaren aitorpen-likidazioak, hilabetero.

Halaber, aitorpen informatibo bat aurkeztu beharko dute zergaren likidazioaldi bakoitzeko, erregelamendu honen 53.1 artikuluak aipatutako erregistro liburuen edukiarekin.

Aitorpen berean, eragiketa hauen berri ere eman beharko da, halakorik baldin badago:

a) Azaroaren 8ko 69/2010 Foru Dekretuaren 1.2 artikuluaren bigarren paragrafoan aipatzen diren administrazio publikoetan sartutako entitateek ordaindutako diru-laguntzak, sorospenak edo laguntzak. Foru dekretu horren bidez, hirugarrenekin egindako eragiketen urteko aitorpena arautu zen eta zerga arloko beste arau batzuk aldatu ziren.

b) 69/2010 Foru Dekretu horren 4.1. artikuluko d), e), f), g), h) eta i) letretan azaltzen diren eragiketak.

c) Ceutan eta Melillan, ekoizpenaren, zerbitzuen eta inportazioaren gaineko zergari lotutako eragiketak.

d) Nekazaritzako konpentsazioak ordaintzen dituzten enpresaburu edo profesionalen eragiketak, Fakturazio betebeharrak arautzen dituen Erregelamenduaren 16.1 artikuluan aipatutako erreziboa luzatu dutenean. Erregelamendu hori apirilaren 10eko 23/2013 Foru Dekretuaren bidez onetsi zen.

Kasuko likidazioaldiko azken egunera arte idatzitako datuak jasoko ditu aitorpen horrek, eta, epeari dagokionez, likidazioaldi horri dagokion zergaren autolikidazioa aurkezteko epean aurkeztu beharko da.

20. bis artikulua. Zergaren aplikazio lurraldean, Kanarietan, Ceutan eta Melillan finkatuta dauden enpresaburuek edo profesionalek dirua itzultzeko egindako eskaerak, Europar Batasunaren barnean egindako eragiketek jasandako kuotei dagozkienak, zergaren aplikazio lurraldean egin diren eragiketen kuotei dagozkienak izan ezik.

1. Zergari buruzko Foru Legearen 63 bis artikuluan arautzen diren itzulketa eskaerak baliabide elektronikoen bidez aurkeztuko dira, Zerga Administrazioko Estatu Agentziaren atari elektronikoan horretarako eskaintzen diren inprimakiak betez. Organo horrek berehala jakinaraziko dio eskatzaileari eskaera jaso dela, eta horretarako hartu izanaren agiri elektronikoa bidaliko dio; ondoren, kuotak jasan dituen Batasuneko estatura bidaliko du eskaera, baliabide elektronikoen bidez, jaso denetik 15 eguneko epean.

2. Hala ere, baliabide elektronikoen bidez jakinaraziko zaio eskatzaileari eskaera ez dela bidaliko, dagokion epean honako kasuren bat ematen bada:

a) Enpresaburua edo profesionala ez izatea, eta horren arabera ez jardutea.

b) Zerga osorik kentzeko eskubidea sortzen ez duten eragiketak bakarrik egitea.

c) Zergak nekazaritza, abeltzaintza eta arrantzako araubide berezian, araubide erraztuan edo baliokidetasun errekarguko araubidean ordaintzen dituzten jarduerak besterik ez egitea.

Zerga egoitza Nafarroan duten zergadunak direnean, Nafarroako Zerga Ogasunak inguruabar horiek egiaztatzen lagun dezake.

3. Eskatzaileak jakinarazpenak helbide elektronikora egiteko zerbitzuan eman behar du izena, Zerga Administrazioko Estatu Agentziak artikulu honetan aipatutako eskaerei buruz egiten dituen komunikazioak jaso nahi baditu.

21. artikulua. Garraiagailu berrien noizbehinkako emanaldiei dagozkien itzulketak.

Zergari buruzko Foru Legearen 5. artikuluko 1. zenbakiko e) letrak aipatutako enpresari edo profesionariek jasandako kuotak itzultzeko eskabidea Ekonomia eta Ogasun Departamentuak horretarako onetsiko duen ereduari lotuko zaio. Eskabide horri ondoko agiriak erantsiko zaizkio:

1go. Fakturaren jatorrizkoa; bertan agertu beharko dute eskatutako itzulketaren kuota eta eragiketaren xede den garraiagailu berriaren datu teknikoak.

2. Noizbehinkako emateari dagokion fakturaren jatorrizkoa. Eskatzaileak eman behar du eta, bertan, honakoak jaso behar dira: eragiketarako erabili den garraiobidearen datu teknikoak eta entrega hartuko duenaren identifikazio datuak.

VIII. TITULUA. ERREGIMEN BEREZIAK

I. KAPITULUA. Arau orokorrak

22. artikulua. Erregimen bereziak aplikatzeko aukera eta horri uko egitea.

1. Erregimen berezi erraztuak eta nekazaritza, abeltzaintza eta arrantzari buruzkoak aplikatuko zaizkie Balio Erantsiaren gaineko Zergari buruzko Foru Legeak horretarako propio adierazitako baldintzak betetzen dituzten subjektu pasiboei, beti ere espreski uko egin ez badiete.

Ukoa gauzatu beharko da indarra hartu behar duen urte naturalaren aurreko urteko abenduan zehar edo, jarduera hasi bada, hasiera horren ondoko hogeita hamar eguneko epean. Hala ere, erregimen berezi erraztua garatzen duen Foru Aginduak epe bereziak jarri ahalko ditu aipatu erregimenari uko egin ahal izateko.

Aukera horri egindako ukoak gutxienez hiru urteko indarraldia izanen du eta erregimen berezi bakoitza aplikagarri gertatzen denean epe horiek ondoko urteetarako luzatutzat emanen dira, uko egiten ez bazaie bederen, uko horrek indarra hartu behar duen urte naturalaren aurreko urteko abenduan.

Ukoa egindakotzat joko da epearen barnean aurkezten bada erregimen berezia aplikatzearen ondorioz indarra hartu behar dueneko urte naturaleko lehen hiruhilekoan dagokion aitorpen-likidazioa. Era berean, jarduera bat hasten denean ukoa egindakotzat joko da jarduera hasi ondoren subjektu pasiboak aurkeztu beharreko lehenbiziko aitorpen-likidazioa erregimen orokorra aplikatuz eta dagokion epearen barnean aurkezten bada.

Subjektu pasiboa jada ari bada erregimen erraztuaren edo nekazaritza, abeltzaintza eta arrantzakoaren babespeko jarduera batean eta urtean zehar aipatu erregimenetako baten barnean sartzeko moduko beste bati ekiten badio, azken jarduera horrengatik erregimen bereziari uko egiteak ez du eraginik izanen urte horretan, lehendik egiten zuen jarduerari dagokionez.

Erregimen erraztuari edo nekazaritza, abeltzaintza eta arrantzakoari eginiko ukoak eragina izan behar duen urtearen aurreko urtean gainditzen baldin bada aplikazio eremua zehazten duen muga, aipatu ukoa ez egindakotzat joko da.

Pertsona Fisikoen Errentaren gaineko Zergaren zenbatespen objektiboaren erregimenari uko egiteak erregimen berezi erraztuari eta nekazaritza, abeltzaintza eta arrantzari buruzkoari uko egitea ekarriko du, subjektu pasiboak burututako jarduera enpresarial eta profesional guztiengatiko Balio Erantsiaren gaineko Zergan.

Ondasun erabilien, artelanen, antzinatekoen eta bildumagaien erregimen berezia aplikatuko zaie Zergari buruzko Foru Legeak adierazitako baldintzak betetzen dituzten eragiketei, subjektu pasiboak aurkeztua baldin badu aipatu Legearen 109. artikuluko 1. zenbakiko 1. idatz-zatian aurreikusitako aitorpena, jarduera enpresarial edo profesionalen hasierari dagokiona. Dena den, zerga oinarria eragiketa bakoitzaren etekinen margenaren bidez zehazten den modalitatean, subjektu pasiboak uko egiten ahal dio aipatu erregimen bereziari eta erregimen orokorra aplikatu, burutzen duen eragiketa bakoitzari dagokionez, eta uko hori ez dago zertan jakinarazi espreski Administrazioari eta ez du beste ezein baldintzarik bete beharrik.

2. Artikulu honetan aurreikusitako aukerak eta ukoak eta horiei dagozkien errebokazioak, Ekonomia eta Ogasun Departamentuak onesten duen eredua betez gauzatuko dira.

Aurreko lerroaldean xedatutakoa ez da aplikatzekoa izanen aurreko zenbakiko laugarren lerroaldean aurreikusitako ukoaren modalitateari dagokionez.

II. KAPITULUA. Erregimen erraztua

23. artikulua. Luzapen subjektiboa.

Zergaren subjektu pasiboak erregimen erraztuaz baliatuko dira tributua ordaintzeko, ondoko betebeharrak betetzen badituzte:

1. Pertsona Fisikoen Errentaren gaineko Zergari dagokionean errentak esleitzeko erregimeneko pertsona fisiko edo entitateak izatea, beti ere, entitateei dagokionean, haren bazkide, oinordeko, jabekide edo partaide guztiak pertsona fisikoak badira.

Aurreko lerroaldeak aipatutako entitateei erregimen erraztua aplikatuko zaie, edozein izanik ere entitate horiek osatzen dituzten pertsonek bakarka dituzten inguruabarrak.

2. Erregelamendu honetako 26. artikuluan deskribatutako jarduera ekonomikoetan aritzea, jarduera horietan Ekonomi eta Ogasun kontseilariak horiendako ezarritako mugak gainditzen ez badituzte, beti ere.

24. artikulua. Erregimen erraztuari uko egitea.

Erregelamendu honetako 22. artikuluan aurreikusitako modu eta epeak erabiliko dira ukoa egiteko.

Erregimen berezi erraztuari errentak esleitzeko erregimena duten entitateetako bazkide, oinordeko, jabekide edo partaide guztiek egin beharko diote uko.

25. artikulua. Erregimen erraztutik kanporatzea.

1. Erregimen erraztutik kanporatzeko inguruabarren artean, ondoko hauek daude:

1go. Ekonomia eta Ogasun kontseilariak jarduera bakoitzerako ezartzen dituen mugak gainditzea. Mugak gainditu eta hurrengo urtetik aitzina sortuko dira ondorioak, salbu eta jarduera hasten den kasuetan, horrelakoetan bazterketak jardueraren hasieratik aitzina izanen baititu ondorioak. Zio horrengatik bazterturik dauden subjektu pasiboek, hurrengo ekitaldietan mugak berriro gainditzen ez badituzte, araubide berezi erraztua izanen dute, hari uko egin ezean.

2gn. Araubide erraztuaren aplikazio esparru objektiboa arau bidez aldatzea eta ondorioz araubide berezi hori gehiago ezin aplikatu izatea subjektu pasiboak egiten dituen enpresa jarduerei. Aplikazio eremu objektiboa aldatzen duen arauan bertan adieraziko da horrek noiztik aitzina izanen dituen ondorioak."

3gn. Pertsona Fisikoen Errentaren gaineko Zergako zenbatespen objektiboko erregimena aplikatzetik baztertua gertatu izana.

4gn. Erregimen berezi erraztuan eta nekazaritza, abeltzaintza eta arrantzako nahiz baliokidetasunaren errekarguaren erregimen berezietan sartu gabeko jardueretan aritzea. Hala eta guztiz ere, erregimen berezi erraztutik ez da kanporatzen ahal subjektu pasiboa beste jardueretan aritzeagatik, baldin eta horretarako Foru Lege Arau-emailearen 17. artikuluaren aplikazioz Zergatik salbuetsiak dauden eragiketak bakarrik burutzen baditu, edo ondasun higiezinak errentan jartzen baditu, beti ere hori egitea jarduera enpresariala ez bada, Pertsona Fisikoen Errentaren gaineko Zergari buruzko maiatzaren 14ko 6/1992 Foru Legearen 35. artikuluko 2. zenbakian xedatutakoaren arabera.

2. Aurreko zenbakiko 3. inguruabarrak Pertsona Fisikoen Errentaren gaineko Zergaren zenbatespen objektiboaren araubidearen aplikaziotik kanpo geratzen den urtetik aurrera izanen ditu ondorioak.

Aurreko zenbakiko 4. inguruabarrak inguruabarra gertatu eta hurrengo urtetik aurrera izanen ditu ondorioak, salbu eta subjektu pasiboak ez badu aurretik enpresa edo lanbide jarduerarik egin; kasu horretan, bazterketak jarduerak hasten diren unetik izanen ditu ondorioak.

3. Ekonomia eta Ogasun Departamentuak, subjektu pasiboaren zerga egoerari buruzko frogaketa edo ikerketen ondorioz, erregimen erraztutik kanporatzeko inguruabarrak daudela frogatuko balu, behar den erregularizazioa burutuko luke eta erregimen orokorrera pasatuko litzateke.

26. artikulua. Eremu objektiboa.

1. Erregimen erraztua Pertsona Fisikoaren Errentaren gaineko Zergako zenbatespen objektiboaren erregimenean sartutako jarduerei aplikatuko zaie, Balio Erantsiaren gaineko Zergari buruzko Foru Legearen VIII. Tituluan erregulatutako erregimen berezietarik edozein aplikagarri duten jarduerei izan ezik.

Erregimen erraztua aplikatzerakoan jarduera independentetzat hartuko dira erregimen hori erregulatzen duen Foru Aginduan berariaz bildutako bakoitza.

2. Artikulu honen 1. zenbakian biltzen den jarduera bakoitzean sartutako eragiketa ekonomikoak zehazterakoan kontuan izanen dira Jarduera Ekonomikoen gaineko Zerga erregulatzen duten arauak, aplikagarri gertatzen diren heinean.

27. artikulua. Erregimen erraztuaren edukia.

1. Subjektu pasiboek erabakiko dute Balio Erantsiaren gaineko Zergaren kontzeptuan sartu beharreko kuoten zenbatekoa, erregimen berezi hau aplikagarri zaion jarduera sektore bakoitzari dagokionean, eta, kasuan kasura, baliokidetasun errekarguaren zenbatekoa.

2. Subjektu pasiboak berak zehaztuko ditu aurreko zenbakiak aipatzen dituen kuotak, bere jarduera ekonomikoari egotziz Ekonomia eta Ogasun Departamentuak, zehazki jarduera sektore bakoitzaren eta jarduerak urtean hartzen duen denboraren arabera, ezarri dituen indize edo moduluak.

Jarduera sektore bakoitzari aplikatu beharreko modulu edo indizeak epe jakin baterako ezartzen dituen Foru Aginduak emanen ditu hori behar bezala konputatzeko argibideak.

Aurreko lerroaldean agintzen dena ez zaie aplikatuko Zergari buruzko Foru Legeko 50.2 artikuluko 2. idatz-zatiko hirugarren lerroaldeak aipatzen dituen dirulaguntzei.

3. Subjektu pasiboak eginen du hasierako egozpena, urtean erregimen berezia aplikatzeko epea hasterakoan indarra duten datuen arabera, behar diren Foru Aginduetan xedatutakoaren araberako erregularizazioa galarazi gabe.

Aurreko lerroaldeak aipatzen duen erregularizazioaren ondorioz, sartzeko zenbatekoa indize edo moduluak hasiera batez egoztean zehazten dena baino txikiagoa bada, subjektu pasiboak eskatu ahalko du diferentzia itzultzea, Zergari buruzko Foru Legearen 61. artikuluan aurreikusitako moduan, edo horren konpentsazioa izatea ondoren eginen dituen aitorpen-likidazioetan.

Dena den, Ekonomi eta Ogasun Departamentuak formula erraztuak ezarri ahalko ditu sartu beharreko kuotak, aurrekoez bestekoak, zehazteko indize edo moduluen aplikazioan, baldin eta sektore edo jarduera jakin batzuk ukitzen badituzte.

4. Urtarrilaren 1aren ondoren hasten diren jarduerak edo abenduaren 31 baino lehen gelditzen direnak, eta orobat denboraldi bateko jarduerak, dagokien Foru Aginduan ezarritakoak arautuko ditu.

5. Erregimen erraztua aplikagarri duten jardueren garapenaren kaltetan, sute, uholde edo ez-usteko beste gertaeraren batek sektore edo eremu jakin batean eragina izanez gero, Ekonomi eta Ogasun Departamentuak, salbuespen gisa, indize edo moduluak murrizteko baimena ematerik izanen du.

6. Erregimen erraztua aplikagarri duten jardueren garapenaren kaltetan, sute, uholde, erortze edo industri ekipoan matxura haundiak jasan eta horiek eragin haundia baldin badute, interesatuek Ekonomia eta Ogasun Departamentuari indize edo moduluen murrizketa eskatu ahalko diote, aipatu gertaeraren bat suertatzen denetik hasita hogeitamar eguneko epean, eta egoki iruditzen zaizkien frogak aurkeztuko dituzte. Aipatu kalteak benetan gertatu direla Departamentuaren aitzinean egiaztatuz gero, bidezkoa den indize edo moduluen murriztapena egitea erabakiko da.

Halaber, aurreko lerroaldean adierazitako prozedura berari jarraikiz, indize edo moduluak murriztea eskatu ahalko da jardueraren titularra aldi baterako ezintasun egoeran badago eta enplegatutako langilerik ez badauka.

28. artikulua. Dirusarreren aldikatzea.

Erregimen erraztuan dauden subjektu pasiboek, erregimen bereziak ukitzen dituen jarduerengatik, dagozkien kuoten diru-kopuruaren laurdena sartu beharko dute Nafarroako Ogasun Publikoan, Erregelamendu honen 30. artikuluan ezarri epe eta moduan. Kuota horiek aurreko artikuluan xedatutakoari jarraikiz ezarriko dira.

Zergari buruzko Foru Legeko 68. artikuluko 5. zenbakiko lehen lerroaldeak aipatzen dituen operazioak kitatzea zerga sortzen den kitapen aldiko aitorpen-kitapenean eginen da, eta 68.5 artikulu horretako 3. idatz-zatiak aipatzen duen erospen edo inportazioagatik jasan edo pagatutako kuotekin kenketa egiteko, zilegi izanen da zergaren araudiko arau orokorrak aintzat hartzea.

29. artikulua. Betebehar formalak.

1. Erregimen erraztu honetan dauden subjektu pasiboak ez dira egonen erregimen horretan biltzen diren jardueren erregistro liburuak edukitzera beharturik.

Aurreko lerroaldean xedatutakoaz kanpo egonen dira:

1.1. Erregimen erraztuan biltzen diren subjektu pasiboak, jarduera mota jakin batzuengatik, zeinen indize eta moduluek gauzatutako eragiketa bolumenaren gainean eragiten baitute. Horiek Erregistro Liburua eduki behar dute eta bertan jarduera horietan burututako eragiketak anotatuko dituzte.

1.2. Erregimen erraztua aplika ez dakiekeen bestelako jardueretan ari diren subjektu pasiboak. Horiek Erregistro Liburua eduki behar dute eta bertan jardueren sektore berezitu bakoitzari dagozkion erosketen fakturak berezirik anotatuko dituzte.

2. Erregimen honetan dauden subjektu pasiboek gorde beharko dituzte aplikatutako modulu edo indizeen egiaztagiriak, horiek onesten dituen Foru Aginduak aurreikusten duenaren arabera.

30. artikulua. Aitorpen-likidazioak.

1. Erregimen erraztuan dauden subjektu pasiboek lau aitorpen-likidazio aurkeztu beharko dituzte, Ekonomia eta Ogasun Departamentuak horretarako bereziki ezartzen duen ereduari jarraikiz.

2. Aitorpen-likidazioak 62. artikuluaren 4. zenbakian aipatu bezala, hiruhileko aldizkakotasunekoak direnentzako ezarritako epeetan aurkeztu beharko dira.

31. artikulua. Indize, modulu eta gainerako parametroen onespena.

1. Ekonomia eta Ogasun kontseilariak onetsiko ditu indize, modulu eta gainerako parametroak, Zergari buruzko Foru Legearen 68. artikuluko 1. zenbakian ezarritakoaren ondorioetarako.

2. Foru Aginduak dioena urte bat baino haundiagoa den aldiari egokitzen ahalko zaio; horrelakoetan berezirik zehaztuko da urte bakoitzari dagokiona kalkulatzeko erabiliko den jarraibidea.

 

III. KAPITULUA. Nekazaritza, abeltzaintza eta arrantzari buruzko erregimen berezia

32. artikulua. Aplikazio esparru subjektiboa.

1. Nekazaritza, abeltzaintza eta arrantzaren araubide berezia nekazaritza, oihangintza, abeltzaintza edo arrantza ustiategien titularrei aplikatuko zaie Zergari buruzko Foru Legean eta Erregelamendu honetan adierazitako baldintzak betetzen badituzte, salbu eta hura aplikatzeari uko egiten badiote Erregelamendu honen 22. artikuluan ezartzen den moduan.

2. Nekazaritza, abeltzaintza eta arrantzaren araubide berezitik kanpo geldituko dira honako hauek:

a) Araubide berezi horretan sartutako jardueretan, aurreko urtean, guztira 250.000 eurotik gorako eragiketak egin dituzten subjektu pasiboak, baldin eta pertsona fisikoen errentaren gaineko zergaren araudian beste kopuru bat ezartzen ez bada zenbatespen objektiboko araubidea aplikatu eta aurreko zenbakian aipatutako jardueren etekinak zehazteko; hala izanez gero, azken kopuru horri eutsiko zaio.

b) Aurreko urtean, guztira 150.000 eurotik gorako eragiketak, aurreko a) letran aipatutakoak ez direnak, egin dituzten subjektu pasiboak.

c) Subjektu pasiboaren enpresa edo lanbide jardueretarako ondasun eta zerbitzuak, ibilgetuaren osagaiak izan ezik, erosten edo inportatzen, aurreko urtean, 150.000 euroko kopurua gainditu duten subjektu pasiboak, balio erantsiaren gaineko zerga alde batera utzirik.

Aurreko urtean hasitako jardueren kasuan, goiko letretan aipatutako zenbatekoak urteari egotziko zaizkio.

3. Aurreko 2. idatz-zatiko a) eta b) letretan aipatutako eragiketen zenbatekoa kalkulatzeko ondoko arauak erabili behar dira:

a) Ekonomia, Ogasun, Industria eta Enplegu Departamentuak zehazten dituen nekazaritza, oihangintza eta abeltzaintza jarduera guztiei dagokienez, nekazaritza, abeltzaintza eta arrantzaren araubide berezia edo araubide erraztua aplikatzen ahal zaien jarduerak betetzean egindako eragiketen kasuan, hauexek baino ez dira konputatuko: Erregelamendu honen 29.1.Lehena eta 36.1 artikuluetan aipatutako erregistro liburuetan idatzi behar direnak.

b) Zergaren araubide orokorrean edo a) letran aipatutakoez beste araubide berezi batean sartutako jardueretan egindako eragiketak Zergari buruzko Foru Legearen 66. artikuluan xedatutako eran konputatuko dira. Halere, ondasun higiezinak errentan emateko eragiketak ez dira konputatuko baldin eta errentamendua inongo jarduera ekonomiko bati loturik ez badago, pertsona fisikoen errentaren gaineko zergari buruzko araudian xedatutakoaren arabera.”

4. Pertsona Fisikoen Errentaren gaineko Zergan errenten egozpenaren araubidea duten entitateek nekazaritza, abeltzaintza eta arrantzaren araubide bereziari uko egin nahi diotenean, bazkide, jaraunsle, erkide edo partaide guztiek formulatu beharko dute ukoa.

33. artikulua. Nekazaritza, oihangintza, abeltzaintza edo arrantza sektoreetako ustiategia zer den.

Nekazaritza, oihangintza, abeltzaintza edo arrantza sektoreetako ustiategiak izanen dira, lur-lanketak, ustiapenak edo harrapatze-aldiak burutu eta horietatik zuzenean produktu naturalak, landareak edo animaliak, lortzen dituztenak, eta, bereziki, honako hauek:

1. Orohar nekazaritzako ihardueretan aritzen direnak, baita landare apaingarri, lurrindun edo medizinalak, loreak, perretxikuak, espeziak edo landareak landatzen dituztenak ere, gai horiek edozein tokitan sortuak izanda ere, negutegi edo mintegiak barne.

2. Oihangintzan aritzen direnak.

3. Abeltzaintzan aritzen direnak, horren barne hegazti-hazkuntza, erlegintza, untxe-hazkuntza, zetagintza eta ehizarako espezien hazkuntza sartzen direlarik, beti ere, lurra ustiatzekin zerikusia baldin badute.

4. Ur gezazko arrantza ustiategiak.

5. Molusku edota oskoldunen haztegiak eta arrain-haztegiak.

34. artikulua. Eraldaketa prozesutzat hartzen ez diren iharduerak.

Zergari buruzko Foru Legearen 71.1 artikuluaren lehen puntuan aurreikusiak bere ondorioak izan ditzan, ez dira eraldakuntza prozesuak izanen:

a) Gaiak iraunarazteko bakarrik diren egintzak, hau da, pasteurizazioa, hozketa, izozketa, lehorketa, sailkaketa, garbiketa, estalkitan sartzea edo prestaketa, kaskala kentzea, azala kentzea, ezpalak egitea, zatikatzea, desinfekzioa eta desinsektaketa.

b) Azienda hil beharra ez duen nekazaritza eta abeltzaintzako lehengaiak eskuratze soila.

Eraldakuntza ihardueren izaera zehazteko ez da kontutan hartuko sortzaileen kopurua edo ihardueraren lan mekanikoak duen izaera eskulangintzazkoa edo tradizionala.

35. artikulua. Erregimen berezian sartutako gainerako zerbitzuak.

Zergari buruzko Foru Legearen 72. artikuluan xedatuak bere ondorioak izan ditzan, ondoko hauek izanen dira, besteak beste, gainerako zerbitzutzat hartuko direnak:

1. Landatzeko, eraiteko, uzta hartzeko eta garraiatzeko lanak.

2. Gaiak estalkitan sartzea eta prestatzea, horien barne daudela lehorketa, garbiketa, azala kentzea, zatikatzea, silotan sartzea, biltegitan sartzea eta desinfekzioa.

3. Aziendak hazi, zaindu eta gizentzea.

4. Laguntza teknikoa.

Zenbaki honetan xedatutakoaz kanpo egonen dira ingeniari edo nekazaritzako teknikoek emandako zerbitzu profesionalak.

5. Nekazaritza, oihangintza, abeltzaintza edo arrantza sektoreetako iharduerak burutzeko ohiz erabiltzen diren tresna, makina eta instalazioak.

6. Landare eta animali kaltegarriak desagertaraztea eta landa-larreak eta lurrak fumigatzea.

7. Ureztatzeko edo drenaia egiteko instalazioak ustiatzea.

8. Zuhaitzak bota edo bakantzea, ezpalak egin edota zuritzea, mendia garbitzea eta oihangintzako beste antzeko zerbitzu osagarri batzuk.

36. artikulua. Betebehar formalak.

Orokorrean, erregimen berezi honetan dauden subjektu pasiboak, Balio Erantsiaren gaineko Zergari dagokionez, Erregistro Liburu bat edukitzera beharturik daude eta bertan anotatuko dituzte erregimen berezian sartutako eragiketak.

2. Ondoren adierazten diren subjektu pasiboek betebehar hauek ere izanen dituzte:

1. Erregimen erraztua edo baliokidetasun errekarguari buruzko erregimen berezia aplikagarri duten bestelako jardueretan aritzen diren subjektu pasiboek jasotako fakturen Erregistro Liburua eduki beharko dute eta bertan jarduera-sektore berezitu bakoitzari dagozkion erosketen fakturak behar bezala bereizirik anotatuko dituzte, baita nekazaritza, abeltzaintza eta arrantzari buruzko erregimen bereziari dagozkionak ere.

2. Lehenengo idatz-zatian aipatu ez diren erregimenak aplikarri dituzten bestelako jardueretan aritzen diren enpresariak. Horiek Erregelamendu honetan orokorrean edo bereziki ezarritako betebehar formalak burututa eduki beharko dituzte.

Beti ere, jasotako fakturen Erregistro Liburuan anotatuko dira, behar den bezala bereizirik, nekazaritza, abeltzaintza eta arrantzari buruzko erregimen berezia aplikagarri duten jarduerei dagozkien fakturak.

37. artikulua. Konpentsazioak itzultzea.

1. Zergari buruzko Foru Legearen 76. artikuluaren 1go atalean xedatutakoaren arabera, Ogasun Publikoak egin beharreko konpentsazioak itzultzeko eskabideak, Ekonomia eta Ogasun Departamentuan aurkeztu beharko dira apirilean eta abuztu, urria eta urtarrilaren 10a baino lehen.

2. Araubide berezian sartuta dauden ondasunen erosleak edo zerbitzuen hartzaileak, Zergari buruzko Foru Legearen 76.2 artikuluan xedatutakoaren arabera, konpentsazioak itzuli behar dituenean, nekazaritza, oihangintza, abeltzaintza edo arrantzako produktuak edo aipatu zerbitzu osagarriak ematen diren unean eginen da itzulketa, oinarri duen prezioaren ordainketarako finkatu den eguna edozein izanik ere. Itzulketa hori ordainagiri baten bidez frogatuko da, hain zuzen ere, fakturazio betebeharrak arautzen dituen Erregelamenduaren 16. artikuluko 1. idatz-zatian aipatzen den ordainagiriaz. Erregelamendu hori apirilaren 10eko 23/2013 Foru Dekretuaren bidez onetsi zen.

Aurreko lerroaldean xedatutakoa gorabehera, interesdunak ados jartzen badira, ondasun edo zerbitzuen prezio osoa edo zati bat kobratzen den unean itzuli ahal izanen dira konpentsazioak, horren proportzioan itzuli ere

.

38. artikulua. Konpentsazioen kenketa.

1. Konpentsazioak ordaindu dituzten enpresaburu edo profesionalek, Zergari buruzko Foru Legearen 79. artikuluan azaltzen den eskubidea baliatu eta konpentsazioen kenkaria egin ahal izateko, fakturazio betebeharrak arautzen dituen Erregelamenduak, maiatzaren 17ko 205/2004 Foru Dekretuaren bidez onetsiak, 16. artikuluko 1. idatz-zatian aipatzen duen ordainagiria eduki beharko dute, berek emandakoa alegia. Agiri hori egin dituzten eskuraketen frogagiri gisa erabiliko dute, aipatu kenkariaren ondorioetarako.

2. Agiri horiek kenkarirako eskubidea dagoela frogatzeko balio izan dezaten, aipatu Erregelamenduaren 16. artikuluan xedatutakoari lotu behar zaizkio, erregistro liburu berezi batean jaso behar dira eta eskuratzaileek liburu horretan dagozkien datuak jarri behar dituzte. Erregistro liburu horri aplikagarriak izanen zaizkio, bidezkoak diren heinean, hartutako fakturen erregistro libururako ezarritako betekizun berak.

3. Aurreko 1 eta 2. zenbakietan aipatutako ordainagiriak eta horien kopiak Zergaren preskripzio epea amaitu arte eduki behar dira.

38 bis artikulua. Araubide berezia aplikatzen hastea edo amaitzea.

1. Abian diren jardueretan araubide berezi hau aplikatzen hasten denean edo amaitzen denean, nekazaritza, abeltzaintza, oihangintza edo arrantza ustiategiaren titularrak izakinen inbentarioa egin beharko du; bere jardueretan erabiltzeko diren ondasunetatik, araubide berezia aplikatzen hasten edo amaitzen den egunaren bezperan araubide hori aplikagarria dutenak sartuko ditu inbentario horretan.

Ustiategietan ekoitziak izan eta zerga araubidea aldatzen den egunean artean eman gabe dauden produktu naturalak ere inbentario horretan sartuko dira.

Inbentario hori titularrak sinatuko du eta Ekonomia eta Ogasun Departamentuan aurkeztu beharko da hamabost eguneko epean, araubide bereziaren aplikazioa hasi edo amaitzen den egunetik kontaturik.

2. Inbentario horretan aipatzen diren egoeren erregularizazioak dakarren kenkaria araubide bereziaren aplikazioa amaitu den likidazioaldiko aitorpen-likidazioan egin beharko da.

Araubide bereziaren aplikazioa hasten den kasuetan, aipatu erregularizazioaren ondorioz behar den dirusarrera egiteko, aitorpen-likidazio berezia aurkeztuko da, ez aldirokoa. Ekonomia eta Ogasun kontseilariak ezarriko ditu aitorpen hori aurkezteko tokia, modua, epeak eta inprimakiak.

IV. KAPITULUA. Ondasun erabilien, artelanen, antzinako gauzen eta bildumagaien erregimen berezia

39. artikulua. Zerga-oinarria mozkin osoko marjinaren bidez zehaztearen aukera.

Zerga-oinarria mozkin osoko marjinaren bidez zehaztearen aukera.

1.-Zergari buruzko Foru Legearen 82. artikuluko 2. zenbakiak aipatzen duen aukera, ondorioak sortu behar dituen urte naturala hasi aurreko abenduko hilabetean gauzatu beharko da. Hala ere, jarduera urtarrilaren 1a ez den beste egun batean hasten bada, aukera gauzatu beharko da jarduera hasi ondoko hogeita hamar eguneko epean, eta ondorioak jarduerari hasiera ematearekin batera sortuko dira. Arestian aipatu epe berean espreski uko egiten ez bazaio luzatutzat emanen da hurrengo urteetarako eta, gutxienez, zerga-oinarria mozkin osoko marjinaren bidez zehazteko erregimena aplikatzen hasi zen urtearen ondoko urte naturala bukatzen den arte. Horrek guztiak ez du eragozten zerga arloko Administrazioak bere ahalmena erabiltzea mozkin osoko marjinaren modalitatea aplikatzeko ematen duen baimena baliogabetzeko, Zergari buruzko Foru Legearen 82. artikuluko 2. zenbakiko 1. arauak dioenari jarraikiz.

2.-Ekonomi eta Ogasun Departamentuak baimena eman ahalko du, aldez aurretik interesatuak eskatuta, mozkin osoko marjinaren modalitatea aplikatzeko zerga-oinarria zehaztu behar denean Zergari buruzko Foru Legearen 82. artikuluko 2. zenbakiko 1. arauaren a), b) eta c) idazatietan agertzen ez diren ondasunetan; baimen hori eman ahalko da baldin eta, eragiketa asko egiteagatik eta ondasunek prezio murritza izateagatik, zailtasun bereziak badaude ondasunen entregei aplikatzeko honako modalitatea: zerga-oinarria zehaztea eragiketa bakoitzeko mozkin marjinaren bidez.

Ekonomi eta Ogasun Departamentuak eskabidea bidezkoa den ala ez adierazi beharko du aurkezten denetik hasita hiru hilabeteko epean. Epe hori bukatzean adierazpen espresik egin ez badu, ezezkoa eman zaiola ulertu beharko da.

3.-Zerga-oinarria zehazteko modalitate hau aukeratu duten subjektu pasibo birsailtzaileek Foru Legearen 82. artikuluko 2. zenbakiko 4. arauak aipatzen duen urteroko erregularizazioa urte bakoitzeko abenduaren 31n egin beharko dute, aipatu erregimenean jarraitzen duten bitartean; horren emaitza urte bereko azken denboraldiko aitorpen-likidazioari erantsi beharko diote.

Modalitate honen aplikazioa uzten denean, erregularizazioa eginen da uzte hori gertatu den denboraldiko aitorpen-likidazioan.

 40. artikulua. Berariazko betebehar formalak eta erregistroari dagozkionak.

Orokorki ezarritako betebeharrez gain, ondasun erabilien, arte-lanen, antzinako gauzen eta bildumagaien araubide berezia aplikatzen duten subjektu pasiboek, araubide berezi horren menpeko eragiketei dagokienez, betebehar zehatz hauek izanen dituzte:

a) Erregistro liburu berezi batean jaso behar dira, banan-banan eta behar bezala bereizita, subjektu pasiboak egindako eskuraketak, inportazioak eta emateak, eragiketa bakoitzaren mozkin-marjinaren bidez zerga oinarria zehazteko sistema haiei aplikatuz gero.

Liburu horretan datu hauek jaso behar dira:

1go. Eskuratu edo inportaturiko ondasunaren deskripzioa.

2gn. Fakturaren zenbakia, ondasunaren erosketari buruzko agiriarena edo inportazioari buruzko agiriarena.

3gn. Erosketa prezioa.

4gn. Ondasunaren eskualdaketa dela-eta subjektu pasiboak luzatutako fakturaren zenbakia.

5gn. Salmenta prezioa.

6gn. Salmentari dagokion Balio Erantsiaren gaineko Zergaren azalpena edo, salbuespena aplikatu bada, salbuespenaren azalpena.

7gn. Ondasun-ematean araubide orokorra aplikatu delako oharra, hala denean.

b) Beste erregistro liburu bat eduki behar da, aurreko a) letran aipatutakoaz aparte, subjektu pasiboak likidazioaldi bakoitzean eginiko eskuraketak, inportazioak eta emateak bertan jasotzeko, mozkin-marjina orokorraren bidez zerga oinarria zehazteko sistema haiei aplikatuz gero.

Liburu horretan datu hauek jaso behar dira:

1gn. Eragiketa bakoitzean eskuratu, inportatu edo emandako ondasunen deskripzioa.

2gn. Fakturaren zenbakia, ondasunen erosketari buruzko agiriarena edo inportazioari buruzko agiriarena.

3gn. Erosketa prezioa.

4gn. Ondasunen eskualdaketa dela-eta subjektu pasiboak luzatutako fakturaren zenbakia.

5gn. Salmenta prezioa.

6gn. Salbuespenaren azalpena, halakorik aplikatu bada.

7gn. Urte natural bakoitzaren hasierako izakinen eta amaierako izakinen balioak, Zergari buruzko Foru Legearen 82.2 artikuluan aipatutako erregularizazioa egiteko. Balio horiek kalkulatzean, Kontabilitate Plan Orokorrean ezarritako balorazio arauak erabiliko dira.

c) Zerga oinarria zehazteko mozkin-marjina orokorraren modalitatea aplikatzen hasten bada edo hura aplikatzeari uzten bazaio, Zergari buruzko Foru Legearen 82.2 artikuluko 6gn arauan aipatzen den erregularizazioaren ondorioetarako, subjektu pasiboek beren izakinen inbentarioak egin behar dituzte, zerga oinarria zehazteko mozkin-marjina orokorraren modalitatea aplikatu zaien izakinen inbentarioak alegia, modalitate hori aplikatu den lehen edo azken egunaren bezperan.

Subjektu pasiboak sinatu egin behar ditu inbentario horiek eta Ekonomia eta Ogasun Departamentuan aurkeztu behar dira hamabost eguneko epean, zerga oinarria zehazteko modalitate hori aplikatu den lehen edo azken egunetik hasita.

IV. BIS KAPITULUA. Inbertsioko urrearen araubide berezia

40 bis artikulua. Inbertsioko urrearen kontzeptua.

Zergari buruzko Foru Legearen Eranskineko zazpigarren idatz-zatiak agintzen duenerako, honako pisuak hartuko dira lingote merkatuetan onartzen denaren araberakotzat:

a) 12,5 kilogramoko lingoteetarako, urre hutseko edukia 350 ontzatik 430era bitartekoa dutenak.

b) Aipatu diren gainerako pisuetarako, pisu errealean beste horien alderako ehuneko bitik beherako aldea dutenak.

40 ter artikulua. Salbuespenari uko egitea.

1. Zergari buruzko Foru Legeko 85 ter artikuluko 1. zenbakian arautzen den salbuespen ukoa, eskualdatzaileak egiten duen operazio bakoitzean eginen da. Uko egite hori idatziz eman beharko zaio aditzera erostunari inbertsioko urrea entregatu aurretik edo aldi berean. Halaber, entrega hori zergaren pean sartzen denean, eskualdatzaileak idatziz eman beharko dio aditzera erostunari erostuna bera izanen dela zergaren subjektu pasibo, Zergari buruzko Foru Legeko 85 quinque artikuluan agintzen denarekin bat.

2. Zergari buruzko Foru Legeko 85 ter artikuluko 2. zenbakian aipatzen den uko egitea, zerbitzu emaileak egiten duen operazio bakoitzean eginen da, eta honek bere esku eduki beharko du zerbitzu hartzaileak sinatutako idazki bat zeinean hartzaileak aditzera ematen baitu ararteko-lanak helburu duen urre entregan uko egin zaiola Balio Erantsiaren gaineko Zergaz salbuetsita egoteari.

40. quater. Erregistro eginkizun bereziak.

Inbertsioko urrearen inguruko operazioetan eta araubide berezia aplikatzen ez zaien beste jardueretan aritzen diren enpresariek, jasotako fakturen erregistro liburuan jaso beharko dituzte, behar bezain aldendurik, jarduera sektore banakatu bakoitzari dagozkion erospenak edo inportazioak.

V. KAPITULUA. Bidaia agentzien erregimen berezia

41. artikulua. Zergaren araubide orokorra aplikatzeko aukera.

Zergari buruzko Foru Legearen 92. artikuluan azaltzen den aukera, zergaren araubide orokorra aplikatzekoa, subjektu pasiboak egindako eragiketa bakoitzeko baliatuko da. Aukera hori idatziz jakinarazi beharko zaio eragiketaren hartzaileari, ostatu, garraio zerbitzuak edo horien osagarriak eman aurretik edo aldi berean.

Nolanahi ere, jakinarazpena egina dela ulertuko da emandako fakturan ez bada jasotzen Fakturazio betebeharrak arautzen dituen Erregelamenduaren 6.1.n) eta 7.1.i) artikuluetan egiten den aipamena. Apirilaren 10eko 23/2013 Foru Dekretuaren bidez onetsi zen erregelamendu hori

.

42. artikulua. Erregistroko berarizko betebeharrak.

Subjektu pasiboek jasotako fakturen Erregistro Liburuan idatzi beharko dituzte, behar bezala bereizirik, zuzenean bidaiariarentzako mesedetan egin dituzten ondasun edo zerbitzuen eskuraketei dagozkien fakturak.

VI. KAPITULUA. Baliokidetza errekarguaren araubide berezia

43. artikulua. Eraldaketako kalifikazioa ez duten eragiketak.

Zergari buruzko Foru Legearen 94. artikuluan xedatutakoak bere ondorioak sor ditzan, honako eragiketa hauek ez dira eraldaketa eragiketatzat hartuko, eta, horrenbestez, ez dute txikizkako merkatari izaera galaraziko:

1. Produktuak sailkatu eta ontziratzea, produktuen eraldaketa ez baldin badute berekin ekartzen.

2. Marka edo etiketak jartzea, baita eskualdatu ondasunak eman aurretik prestatu eta moztea ere.

3. Elikagaien garbiketa, desinfekzioa, ehotzea, zatitzea, azala kentzea eta ikuzketa, eta, oro har, Erregelamendu honen 34. artikuluan, a) letran adierazitako eskulanak.

4. Haragi eta arrain freskoen hozte, izozte, zatitze eta erraiak kentzeko prozesuak.

5. Kortinak eta leiho-oihalak josi eta jartzea.

6. Hirugarrenek jositako jantzien egokitze soila.

44. artikulua (indargabetua)

45. artikulua. (indargabetua)

46. artikulua. (indargabetua)

47. artikulua. (indargabetua)

48. artikulua. Aplikazioaren eskakizunak.

1. Baliokidetasun errekarguari buruzko erregimen berezia txikizkako merkatariei aplikatuko zaie, Pertsona Fisikoen Errentaren gaineko Zergaren pertsona fisikoak edo errenten esleipeneko erregimena duten entitateak izan eta artikulu honen 2. zenbakian salbuetsirik ez dauden edozein motatako artikulu edo produktuak txikizka merkaturatzen baldin badituzte.

Aurreko lerroaldeak aipatzen dituen errentak esleitzeko erregimena duten entitateak erregimen honen menpean egongo dira soilik horko bazkide, oinordeko, jabekide edo partaideak pertsona fisikoak direnean.

2. Araubide berezi hau ez zaie inoiz aplikatuko honako salgai edo produktuei:

1. Errepidez joateko ibilgailu motordunak eta haien atoiak.

2. Ontziak eta itsasontziak.

3. Abioiak, abionetak, planeadoreak eta beste aireontziak.

4. Aurreko ataletan aipatu diren garraiabideetarako osagarriak eta aldagarriak.

5. Bitxiak, joiak, harri preziatuak, perla naturalak edo hazkuntzakoak, partez nahiz osorik platinoz edo urrez egindako gauzak eta harri preziatuak, perla naturalak edo metal horietakoren bat dituen bisuteria fina, nahiz eta bainatua edo txapatua bakarrik izan.

Zerga honetarako, hauek hartzen dira harri preziatu bakartzat: diamantea, errubia, zafiroa, esmeralda, aguamarina, opaloa eta turkesa.

Idatz-zati honetan agindutakoan ez dira hauek sartzen:

a) Urre edo platinozko 35 mikra baino meheagoko txapa edo bainua duten gauzak.

b) Damaskinatuak.

6. Luxuzko larruekin egindako janzkiak edo apaingarri pertsonalak.

Hartarako, honako larru iletu gabeak hartzen dira luxuzkotzat: erbinude zuria, astrakanak, breistchwaza, burundukya, kastorea, zibelina, txinako zibelina, zibeta, txintxila, txintxila handia, lepazuria, katu katamotza, katajinetak, jatuna, gepardoa, jaguarra, lehoia, elurretako leopardoa, katamotza, otsoa, martak, Kanadako martak, Japoniakoak, Mufloia, itsasoko igaraba, kanchaska igaraba, ozelotea, hartzak, panda, pantera, pekana, pisshikia, platipusa, tigrea, ipurtatsak, bikuina, bisoia, azeri urdina, azeri zuria, azeri gurutzatua, azeri zilarkara eta Shadow azeria.

Idatz-zati honetan agintzen denetik kanpo daude boltsoak, karterak eta halako objetuak, eta hondarki nahiz txatal hutsez, buru, hanka, buztan, puskila eta halakoez edo larru arrunt nahiz imitaziozkoekin egindako jazkiak.

7. Zergari buruzko Foru Legeko 84. artikuluan definitzen diren arte pieza orijinalak, zaharkiak eta bildumako objetuak.

8. Eskualdatu aurretik subjektu pasibo eskualdatzaileak edo hirugarren batek erabili dituen ondasunak.

9. Hegazti hazkuntzako eta erlezaintzako tresnak eta haien osagarriak.

10. Fabrikatu, inportatu edo saltzeko zerga berezien pean dauden petrolio produktuak.

11. Erabilera industrialeko makinak.

12. Eraikinak edo urbanizazioak egiteko material eta gaiak.

13. Mineralak, ikatza salbu.

14. Burdinak, altzairuak eta gainerako metal eta metal nahasturak, manufakturatu gabekoak.

15. Zergari buruzko Foru Legeko 85. artikuluan definitu den inbertsioko urrea.

49. artikulua. Baliokidetasunaren errekarguari buruzko erregimen bereziaren menpean dauden iharduerei hasiera eman edo uztea.

1. Erregimen berezian sartu edo hori uzten duten subjektu pasiboek merkaturatzeko dituzten ondasun-izakinen inbentarioak egin beharko dituzte, baldin eta ondasunak erregimen berezia aplikagarria duten, eta aplikazio horri hasiera eman edo uzteko egunaren bezpera hartuko dute erreferentziatzat.

Aipatu inbentarioak, subjektu pasiboak sinaturik, Ekonomia eta Ogasun Departamentuan aurkeztu beharko dira, erregimen bereziaren aplikazioa hasi edo uzten den egunetik hamabost eguneko epean.

2. Aipatu inbentarioetan azaltzen diren egoerak erregularitzatzearen ondoriozko dirusarrera edo kenkariak erregimen bereziaren aplikazioa hasi edo uzten den garaietako aitorpen-likidazioetan egin beharko dira.

50. artikulua. Baliokidetasun errekarguari buruzko erregimen bereziko forma eta erregistroko betebeharrak.

1. Erregelamendu honen 48. artikuluaren 1. zenbakiak aipatzen dituen subjektu pasiboek beren hornitzaileen aurrean edo, bestela, Aduanaren aurrean egiaztatu beharko dute egiten dituzten eskuraketa edo inportazioei dagokienean, Baliokidetasun errekarguari buruzko erregimen bereziarekiko beren atxikipena.

2. Erregimen berezi hau aplikagarri duten subjektu pasiboek ez dute Balio Erantsiaren gaineko Zergarekin zerikusirik duten erregistroak eduki beharko.

Aurreko lerroaldeaz salbuetsirik egonen dira:

1go. Nekazaritza, abeltzaintza eta arrantzari buruzko erregimen berezia edo erregimen erraztuaz beste ihardueretan aritzen diren enpresariak. Horiek jasotako fakturen Erregistro Liburua eduki beharko dute eta bertan iharduera-sektore berezitu bakoitzari dagozkion erosketen fakturak behar bezala bereizirik idatziko dituzte, baita erregimen erraztuari dagozkionak ere.

2garren. Zergari buruzko erregimen orokorra edo aurreko atalean aipatu ez diren eta erregimen horri dagozkion erregimen bereziak aplikagarri dituzten bestelako ihardueretan aritzen diren enpresariak. Horiek Erregelamendu honetan orokorrean edo bereziki ezarritako betebehar formalak burututa eduki beharko dituzte. Beti ere, jasotako fakturen Erregistro Liburuan idatziko dira, behar bezala bereizirik, erregimen erraztua aplikagarri duten iharduerei dagozkien fakturak.

3. Araubide berezia aplikagarria duten subjektu pasiboek, horrez gain, dagozkien aitorpen-likidazioak ere aurkeztu beharko dituzte ondoko kasuetan:

Lehena.–Erkidegoaren barreneko ondasun eskuraketak egiten dituztenean, edo Zergari buruzko Foru legearen 31.1.Bigarrena artikuluan aipatzen diren eragiketen hartzaileak direnean.

Horrelakoetan, aipatu aitorpenen bidez ordainduko dute zerga, bai eta, egoki denean, aipatu eragiketen xede diren ondasun edo zerbitzuei dagokien errekargua ere.

Bigarrena.–Zerga itzultzeko eskubidea duten bidaiariei ondasunak entregatzen dizkietenean.

Aipatu aitorpenen bidez bidaiariei ordaindu zaizkien diru-kopuruak itzultzea eskatuko dute, eta interesdunei edo zerga itzultzeko prozedura honetan diharduten entitate laguntzaileei eginiko eskualdaketak erabiliz frogatuko dira.

Hirugarrena.–Zergaren menpe eta hartatik salbuetsi gabe dauden ondasun higiezinen entregak egiten dituztenean, salbu eta Zergari buruzko Foru Legearen 31.1.Bigarrena. e). c’) artikuluak aipatzen dituen eragiketak direnean.

Horrelakoetan, egin diren eragiketengatik sorrarazitako zerga dagozkion aitorpenen bidez ordainduko dute.

VII. KAPITULUA. Entitate taldearen araubide berezia

50. bis artikulua. Zentsu informazioa eta loturaren definizioa.

1. Entitate talde bateko kide izan, eta Zergari buruzko Foru Legearen VIII. tituluko IX. kapituluan ezarritako araubide berezia aplikatu nahi duten entitateek hala jakinarazi behar diote Nafarroako Zerga Ogasunari.

a) Araubide berezia aplikatuko duten taldeko entitateen identifikazioa

.

b) Zergaren aplikazio lurraldeko egoiliar ez den entitate baten establezimendu iraunkor bat taldeko entitate nagusia bada, Zergaren aplikazio lurraldeko egoiliar ez den erakunde horren identifikazioa eman beharko da.

c) Entitateek araubide berezia aukeratzeko hartutako erabakien kopia.

d) Entitate nagusiak araubide berezia aplikatuko duten gainerako entitateetako bakoitzean zuzenean eta zeharka duen partaidetzaren portzentajea, eta partaidetzen eskuratze datak.

e) Entitate nagusiak eta mendeko entitate guztiek Zergari buruzko Foru Legearen 118 quinquies artikuluan ezarritako baldintzak betetzen dituztela dioen adierazpena.

f) Zergari buruzko Foru Legearen 108 sexies artikuluko Bost atalean ezarritako aukera egitea, kasua bada, eta horri uko egitea. Aukera hori egiteak Zergari buruzko Foru Legearen 108 octies artikuluko Bat eta Hiru ataletan xedatutakoa aplikatzea ekarriko du.

Nafarroako Zerga Ogasunak entitate taldeari emandako zenbakia jakinaraziko dio entitate nagusiari.

Araubide berezia aplikatzen duten taldeko entitateei eragiten dien aldaketaren bat gertatzen bada, entitate nagusiak horren jakinarazpena aurkeztu beharko du. Aldaketa gertatu den likidazio aldi bereko aitorpen-likidazioaren epean aurkeztu beharko da jakinarazpen hori.

2. Entitate talde bateko kide diren entitateek, aurreko idatz-zatian xedatutakoarekin bat, araubide berezia aplikatzea aukeratzen badute, Zergari buruzko Foru Legearen 108. sexies artikuluko Bost atalean xedatutakoa aplikatzea ere aukeratu ahal izanen dute. Aukera hori, betiere, entitate talde berekoak izan eta araubide berezia aplikatzen duten entitateen taldeari dagokio.

Aukera hori araubide berezia aplikatzeko aukerarekin batera baliatzen ahalko da, edo aplikazio hori hasi ondoren, baina, betiere, ondorioak izan behar dituen urte naturalaren aurreko abenduan jakinarazi beharko da.

Aukerak urte natural bateko indarraldia izanen du gutxienez, eta uko egiten ez bazaio, berez luzatuko da. Ukoak urtebeteko indarraldia izanen du gutxienez, eta Nafarroako Zerga Ogasuneko organo eskudunari jakinarazpena bidaliz gauzatuko da. Uko hori eginda ere, entitate taldearen araubide berezia aplikatzen jarraitu ahal izanen da, Zergari buruzko Foru Legearen 108. sexies artikuluko Bost atalean xedatutakoa izan ezik, eta ezertan ukatu gabe 50. bis artikulu honetako 1. idatz-zatian xedatutakoa.

3. Zergari buruzko Foru Legearen 108. sexies. Bost artikuluan ezarritako aukeraz baliatzen diren entitateek foru legearen 49.2. Lehena artikuluan aipatutako hainbanaketa bereziaren araua aplikatzen ahalko dute talde barruko eragiketen sektore bereiziari dagokionez, taldeko entitateetako bakoitzak izan ditzakeen gainerako sektore bereiziekin erabil daitezkeen aukerak galarazi gabe.

4. Urtero, abenduan, entitate nagusiak Nafarroako Zerga Ogasunari zerrenda baten bidez jakinarazi behar dio taldeko zein entitatek aplikatzen duten araubide berezia, eta aurreko urtetik aldaketaren bat izan dutenak identifikatuko ditu. Hala ere, abenduan bertan entitateren bat taldean sartu bada, berari buruzko informazioa hurrengo urteko urtarrilaren 20ra arte aurkeztu ahal izanen da.

Taldean sartzen diren entitateen kasuan, jakinarazpen horrekin batera, entitateok araubide berezia aukeratzeko hartutako erabakien kopia aurkeztuko da. Erabaki horiek araubide berezia aplikatu nahi den urte naturala hasi aurretik hartuak izan behar dute. Entitate sortu berri bat araubide berezia lehendik aplikatzen duen talde batean sartzen bada, ordea, nahikoa izanen da erabaki hori hartzea araubide berezia aplikatuz bakarka egiten den lehenbiziko aitorpen-likidazioa aurkezteko epea amaitu baino lehen. Halakoetan, aitorpen-likidazio horri dagokion likidazio aldiaren lehen egunetik hasita aplikatuko da araubide berezia.

5. Araubide bereziari uko egin nahi bazaio, jakinarazpena aurkeztuko zaio Nafarroako Zerga Ogasunari, abenduan, ukoak hurrengo urtetik aurrera ondorioak izan ditzan.

6. Ekonomia eta Ogasun Departamentuak berariazko eredua onetsi ahal izanen du artikulu honetan gorago aipatu diren jakinarazpenak egiteko, eta aurkezteko modua, tokia eta epeak arautuko ditu.

7. Finantza lotura dagoela ulertuko da entitate nagusiak taldeko beste entitateen gaineko egiazko kontrola duenean, haien kapitalean edo boto eskubideetan ehuneko 50etik gorako partaidetza duelako.

Lotura ekonomikoa dagoela ulertuko da taldeko entitateak jarduera ekonomiko berean aritzen direnean edo, jarduera desberdinak izanik ere elkarren osagarriak direnean edo haiek egiteko laguntzen dutenak.

Antolaketa arloko lotura dagoela ulertuko da taldeko entitateetan zuzendaritza bakarra dagoenean.

Kontrako frogarik egon ezean, finantza loturaren baldintza betetzen duen entitate nagusi batek lotura ekonomikoa eta antolaketa mailakoa ere betetzen dituela ulertuko da.

50. ter artikulua. Aitorpen-likidazioak.

1. Entitate nagusiak aitorpen-likidazio orokorrak aurkeztuko ditu, behin araubide berezia aplikatzen duten entitateen banakako aitorpen-likidazioak aurkeztutakoan, entitate nagusiarena barne.

Banakako aitorpen-likidazioren bat epean aurkeztu gabe utzi arren, taldearen aitorpen-likidazio orokorra aurkeztu ahalko da, baina horrek ez ditu inola ere eragotziko banakako aitorpen-likidazio hori epean ez aurkezteagatik bidezkoak izan daitezkeen jarduketak.

2. Araubide berezitik kanpo gelditzen diren entitateek Zergaren araubide orokorra aplikatuko dute hori gertatzen den likidazio alditik aurrera. Banakako aitorpen-likidazioak aurkeztuko dituzte, hilero edo hiru hilean behin, beren eragiketen zenbatekoaren arabera, erregelamendu honen 62. artikuluan xedatutakoari jarraituz. Batez ere, araubide berezitik kanpo gelditzearen ondorioak hiruhileko naturalaren hasierako egunean hasten ez badira eta baztertutako entitateak hiru hilean behin aurkeztu behar baditu bere aitorpen-likidazioak, entitate horrek hiru hilabeteko aitorpen-likidazio bat aurkeztu beharko du, hiruhileko naturala osatzeko geratzen zaion denboragatik.

Entitate taldearen araubide berezitik kanpo gelditzen den entitateak erregelamendu honen 20. artikuluan ezarritako baldintzak betetzen baditu, artikulu horretan arautzen den itzulketa prozedura berezia aukeratu ahalko du.

3. Ekonomia eta Ogasun Departamentuak banakako aitorpen-likidazioaren eta aitorpen-likidazio orokorraren ereduak onetsiko ditu, araubide berezia aplikatzeko erabiliko direnak. Hileko likidazio aldiaren ondorengo hilaren lehenbiziko hogei egunetan aurkeztu beharko dira aitorpen-likidazio horiek.

Ekaineko, uztaileko eta abenduko aitorpen-likidazioak, ordea, hurrenez hurren abuztuaren 5era arte, irailaren 20ra arte eta urtarrilaren 31ra arte aurkeztu ahalko dira.

Aurreko paragrafoetan ezarritakoa gorabehera, Ekonomia eta Ogasun kontseilariak, bidezko arrazoi teknikoengatik, epea luzatu ahalko die bide telematikotik aurkezten diren aitorpenei.

50 quater artikulua. Salbuespenei uko egitea.

1. Zergari buruzko Foru Legearen 108 sexies artikuluko Bost atalean salbuespenei uko egiteko ahalmena ezartzen da. Ahalmen hori erabili ahalko da baldin eta aldez aurretik entitateak epean eta behar den moduan aukeratzen badu talde barneko eragiketetarako tratamendu berezia, manu berean aipatzen dena.

Ahalmen hori eragiketaz eragiketa erabiliko da, eta hurrengo atalean adierazten den eran dokumentatuko da.

Ahalmen hori erabiltzeko ez da beharrezkoa izanen ukoaren xede diren eragiketetako hartzailea jasandako kuotak kentzeko eskubidea duen enpresaburu edo profesionala izatea.

2. Uko egiteko, faktura bat luzatuko da eta bertan agertuko dira zergaren jasanarazpena, kasua bada, eta Zergari buruzko 108 sexies artikuluko Bost atalaren aipamena.

Faktura horrek maiatzaren 17ko 205/2004 Foru Dekretuaren bidez onetsitako Fakturazio Betebeharrei buruzko Erregelamenduaren 6. artikuluan ezarritako baldintza guztiak beteko ditu, eta horri dagokionez ez da aplikagarria izanen artikulu bereko 7. atala.

3. Zergari buruzko Foru Legearen 17.2 artikuluan xedatutakoa ere aplikagarria bada ukoaren xede diren eragiketetan, foru lege horren 108 sexies artikuluko Bost atalean ezarritako ahalmenak izanen du lehentasuna.

Halakoetan, salbuespenari egindako ukoa modu sinesgarrian jakinarazi behar zaio eskuratzaileari, ondasunak ematearekin batera edo aurretik. Modu sinesgarrian jakinarazitzat joko da baldin eta Balio Erantsiaren gaineko Zerga berariaz jasanarazten bada eragiketengatik luzatzen den fakturan.

50 quinquies artikulua. Araubide bereziko betebehar formal berariazkoak.

1. Entitate taldeak Zergari buruzko Foru Legearen 108 sexies artikuluan xedatutakoa aplikatzea aukeratzen badu, entitate nagusiak informazio analitikoko sistema eduki beharko du. Horren edukia ondokoa izanen da:

a) Talde barneko eragiketetarako osorik edo zati batean, zuzenean edo zeharka erabili eta Zerga jasan edo ordaindu beharra ekarri duten ondasun eta zerbitzuen deskripzioa.

Zerrenda horretan sartuko dira hirugarrenei erositako ondasun eta zerbitzuak, eta bai hirugarrenei erosi ez zaizkienak ere, Zergaren kargapeko edozein eragiketarengatik jasan edo ordaindutako kuotak sorrarazi badituzte.

b) Zerga oinarriaren eta ondasun edo zerbitzu horiengatik jasan edo ordaindutako kuoten zenbatekoa. Egiaztagiriak gorde behar dira.

c) Ondasun eta zerbitzu horiengatik jasan edo ordaindutako kuotei kendutako kuoten zenbatekoa. Araubide berezia aplikatzen ari diren entitateetako bakoitzak erabilitako hainbanaketa erregela adieraziko da, orokorra edo berezia.

Inbertsio ondasunen kasuan, ondasun horiei dagozkien erregularizazioen zenbatekoa ere jarri behar da, halakorik egin bada, bai eta haien benetako erabilera noiz hasi den ere.

d) Ondasun eta zerbitzu horien kostua talde barneko eragiketen zerga oinarriari eta eragiketa horiek osatzen duten sektore bereziari egozteko erabilitako irizpideak. Irizpide horiek informazio sistemaren atal izanen den memoria batean zehaztu behar dira, eta kuantifikatu egin behar dira. Erabilitako magnitudeen egiaztagiri formalak gorde behar dira, halakorik bada, informazio sistemak iraun behar duen epea amaitu arte. Irizpide horiek, ahal den guztietan, aipatutako ondasun eta zerbitzuak talde barneko eragiketetan benetan nola erabili diren hartuko dute kontuan, ezertan eragotzi gabe beste edozein irizpide erabiltzeko aukera, adibidez, eragiketa horiek lehia libreko baldintzetan merkatuan izan ohi duten balioaren proportzioan egoztea, ondasun eta zerbitzuen benetako erabilera zehazterik ez dagoenean. Irizpide horiek Zerga Administrazioaren aurretiazko balorazioaren mende jarri ahalko dira. Ekonomia eta Ogasun kontseilariak aurretiazko balorazio hori garatu eta aplikatzeko behar diren xedapenak emanen ditu.

2 Erregelamendu honen 50 quater artikuluko 2. atalean xedatutakoa eragotzi gabe, Zergari buruzko Foru Legearen 108 sexies artikuluko Bost atalean xedatutakoa aplikatzen duten entitateek taldearen barnean elkarren artean egiten dituzten eragiketak faktura bidez dokumentatu beharko dira, maiatzaren 17ko 205/2004 Foru Dekretuak onetsitako Fakturazio Betebeharrei buruzko Erregelamenduaren 6. artikuluan ezarritako baldintza guztiak betez, eta horren 7. atalean xedatutakoa aplikatu gabe. Hala ere, eragiketa horien zerga oinarritzat, Zergari buruzko Foru Legearen 108 octies artikuluko Bat atalean xedatutakoa aplikatuz ateratzen dena eta foru lege beraren 26. eta 27. artikuluetan xedatutakoa aplikatuz aterako litzatekeena, biak jarri beharko dira, eta kasu bakoitzari dagokiona identifikatuko da.

Faktura horiek sail berezi batean luzatuko dira eta bereiz kontsignatuko, kasua bada, luzatutako fakturen erregistro liburuan.

50 sexies artikulua. Kontrol prozedurak.

Zerga honen egiaztapenaren haritik taldeko edozein entitaterekin hasitako egiaztapen prozeduran etenaldi justifikatuak eta Zerga Administrazioari egozten ahal ez zaizkion atzerapenak gertatzen direnean, horiek eragina izanen dute entitate taldearen prozeduraren iraupen epean, betiere entitate nagusiak horren berri formala badu.

Ikuskapen prozeduraren iraupen epearen luzapenak, taldearentzat erabakirik eta entitate nagusiarekin formalizaturik, entitate talde osoarentzat sortuko ditu ondorioak.

VIII. KAPITULUA

Kutxa-irizpidearen araubide berezia

 

50. septies artikulua. Kutxa-irizpidearen araubide berezia aplikatzeko aukera.

1. Zergari buruzko Foru Legearen 108.undecies artikuluan aipatutako aukera jardueraren hasieraren aitorpena aurkeztearekin batera baliatuko da, edo bestela, ondorioak izanen dituen urte naturala hasi aurreko abenduan, eta ulertuko da hurrengo urteetarako luzatuko dela, horri uko egin edo araubide horretatik baztertzen den arte.

2. Aukerak honakoak bilduko ditu: subjektu pasiboak egindako eta, Zergari buruzko Foru Legearen 108 duodecies artikuluko 2. idatz-zatian xedatuaren arabera, araubide berezitik baztertuak ez dauden jarduera guztiak.

50. octies artikulua. Kutxa-irizpidearen araubide berezia aplikatzeari uko egitea.

Araubide bereziari uko egiteko, jakinarazpena igorriko zaio Nafarroako Zerga Ogasunari, eta horretarako, dagokion erroldaren aitorpena aurkeztuko da ondorioak izanen dituen urte naturalaren aurreko abenduan.

Uko egiteak hiru urteko gutxieneko epe baterako izanen ditu ondorioak.

50. nonies artikulua. Kutxa-irizpidearen araubide berezitik kanpo geratzea.

Araubide berezi hori aplikatzearen alde egin duten subjektu pasiboak araubidetik kanpo geratuko dira baldin eta urte naturalean egindako jardueren bolumenak 2.000.000 euro gainditzen baditu.

Subjektu pasiboak urte naturalean hasi dituenean enpresa edo lanbide jarduerak, zenbateko hori urtebetekotzat jo beharko da.

Urte naturalean hartzaile bat berari buruzko eskudirutako kobrantzak 100.000 euroko zenbatekoa gainditzen duenean, subjektu pasiboak kutxa-irizpidearen araubide berezitik baztertuko dira.

Araubidetik kanpo geratzeak hori eragin duten inguruabarrak gertatu eta hurrengo urtean izanen ditu ondorioak. Kausa horiengatik kanpoan geratu diren subjektu pasiboek, ez badituzte aipatu zenbatekoen mugak gainditzen hurrengo ekitaldietan, araubide berezia berriro aplikatzeko aukera izanen dute 50.septies artikuluan adierazitako moduan.

50. decies artikulua. Erregistroko berariazko betebeharrak.

1. Kutxa-irizpidearen araubide bereziaren mende dauden subjektu pasiboek honako informazio hau sartu beharko dute luzatutako fakturen erregistro-liburuan, erregelamendu honen 54. artikuluan aipatzen denaren arabera:

1. Eragiketa osorik edo hein batean kobratu zeneko eguna, aparte adierazita zenbatekoa.

2. Banku-kontua edo kobratzeko erabilitako bitartekoa, eragiketa osorik edo hein batean kobratu dela egiaztatzeko.

2. Kutxa-irizpidearen araubide bereziaren mende dauden subjektu pasiboek, eta kutxa-irizpidearen araubide bereziaren mende egon gabe, araubide horren mendeko eragiketen hartzaileak diren subjektu pasiboek honako informazio hau sartu beharko dute jasotako fakturen erregistro-liburuan, erregelamenduaren 55. artikuluan adierazitakoaren arabera:

1. Eragiketa osorik edo hein batean kobratu zeneko eguna, aparte adierazita zenbatekoa.

2. Eragiketa kobratzeko erabilitako bitartekoa, eragiketa osorik edo hein batean kobratu dela egiaztatzeko.

50. undecies artikulua. Fakturatzeko berariazko betebeharrak.

1. Fakturazio betebeharrak arautzen dituen Erregelamenduaren 6. artikuluan ezarritakoaren ondorioetarako, kutxa-irizpidearen araubide bereziaren mende dauden subjektu pasiboek araubide hori aplikatzekoa zaien eragiketetan luzatutako faktura guztietan eta horien kopietan “kutxa-irizpidearen araubide berezia” aipamena agertuko da. Aipatu erregelamendua apirilaren 10eko 23/2013 Foru Dekretuaren bidez onetsi zen.

2. Fakturazio betebeharrak arautzen dituen Erregelamenduaren 11. artikuluan ezarritakoaren ondorioetarako, kutxa-irizpidearen araubide bereziaren mendeko eragiketen faktura eragiketa horiek egiten diren unean bertan luzatuko da, salbu eta eragiketaren hartzailea enpresaburua edo profesionala denean; izan ere, kasu horretan, faktura eragiketa egin eta hurrengo hileko 16a baino lehen egin beharko da. Aipatu erregelamendua apirilaren 10eko 23/2013 Foru Dekretuaren bidez onetsi zen.

 

IX. KAPITULUA

Telekomunikazioetako, irrati-difusioko edo telebistako eta bide elektronikoz ematen diren zerbitzuei aplikatzen zaizkien araubide bereziak

50. duodecies artikulua. Aukera eta ukoa. Ondorioak.

1. Zergari buruzko Foru Legearen VIII. tituluko XI. kapituluan aipatzen diren araubide berezietako bat aukeraz baliatzeko, araubide berezietan hasi izanaren aitorpena aurkeztu beharko da identifikaziorako estatu kidearen zerga administrazio eskudunean; aitorpen hori aurkeztu eta hurrengo hiruhileko naturaleko lehen egunetik aurrera izanen ditu ondorioak aukerak.

Identifikaziorako estatu kidea Espainia baldin bada, hasi izanaren aitorpena Zergari buruzko Foru Legearen 108. noniesdecies eta 108. duovicies artikuluetan arautzen da.

Aurrekoa gorabehera, enpresaburu edo profesional batek araubide berezi hauetan sartutako eragiketak lehen lerroaldean aipatzen den ondorioetarako data baino lehenago hasten baditu, araubide bereziak zerbitzuak ematen hasten den egunetik aurrera izanen ditu ondorioak, betiere enpresaburuak edo profesionalak eragiketen hasiera egunaren hurrengo hilabeteko hamargarren eguna baino lehen aurkezten badu hasi izanaren aitorpena.

Idatz-zati honetan ezarritakoak ez du galarazten identifikaziorako estatu kidearen zerga administrazio eskudunaren ahalmena, araubide berezietan erregistroa ukatzekoa, enpresaburuak edo profesionalak araubide horietan sartzeko baldintzak betetzen ez baditu.

2. Kapitulu honetan aipatzen diren araubide berezietako bati borondatez uko egiteko, identifikaziorako estatu kidearen zerga administrazio eskudunean araubide bereziak aplikatzeari uzteko aitorpena aurkeztu beharko da, betiere araubide berezia erabiltzeari utzi nahi zaion hiruhileko naturalaren aurrekoa amaitu baino hamabost egun lehenago, gutxienez; aitorpena aurkeztu eta hurrengo hiruhileko naturaleko lehen egunetik aurrera izanen ditu ondorioak.

Ukoak bi hiruhileko naturalerako izanen ditu ondorioak, gutxienez, ondorioak izaten hasten den egunetik aurrera, zein araubide berezitan aplikatzen den, hari dagokionez.

Identifikaziorako estatu kidea Espainia baldin bada, araubide bereziak aplikatzeari uzteko aitorpena Zergari buruzko Foru Legearen 108. noniesdecies eta 108. duovicies artikuluetan arautzen da.

3. Erkidegoan establezimendua duen enpresaburu edo profesional batek bere jarduera ekonomikoa estatu kide batetik bestera lekualdatzen duenean edo, identifikaziorako estatu kidean establezimendua utzita ere, Erkidegoan establezimendua izaten jarraitzen badu, eta telekomunikazioetako, irrati-difusioko edo telebistako eta bide elektronikoz Erkidegoan establezimendua duten enpresaburuek edo profesionalek ematen dituzten zerbitzuei aplikatzen zaizkien araubide bereziaren babesean jarraitzeko baldintzak betetzen baditu, baina ez kontsumoko estatu kidean, establezimendua utzi duen identifikaziorako estatu kidean aurkez dezake uzteko aitorpena, eta estatu kide berri batean hasiera aitorpen berri bat aurkeztu, egoitza edo establezimendu iraunkorraren aldaketa gertatzen den egunean.

Identifikaziorako estatu kidearen aldaketak gertatzen den egunean izanen ditu ondorioak, betiere enpresaburuak edo profesionalak egoitza edo establezimendu iraunkorraren aldaketa gertatu eta hurrengo hilabeteko hamargarren eguna baino lehen aurkezten badio identifikaziorako estatu kide ukitu bakoitzari dagokion aitorpena, identifikaziorako estatu kidearen aldaketaren berri ematen duena; kasu horretan, aurreko idatz-zatiko bigarren lerroaldean xedatutakoa ez da aplikatuko.

Idatz-zati honetan aurreikusitakoa aplikatuko da, halaber, araubide bereziaren aldaketa bat gertatzen denean, Zergari buruzko Foru Legearen VIII. tituluko XI. kapituluko 2. eta 3. sekzioetan aurreikusita dauden kasuetako bat, zehazki.

4. Aurreko 3. idatz-zatian aipatzen diren kasuetan, eta establezimendua utzi duen identifikaziorako estatu kidean araubide bereziari uzteko aitorpena hiruhileko natural bateko azken eguna ez den batean aurkezten bada, enpresaburuak edo profesionalak identifikaziorako bi estatu kideetan aurkeztu beharko du araubide berezia uzteko aitorpena aurkeztu ondoren egin beharreko lehen hiruhileko aitorpen-likidazioa, bai eta zergari dagokion diru-sarrera ere bietan egin, estatu kide bakoitza identifikaziorako estatu kide izan den aldian emandako zerbitzuak kontuan hartuta.

50. terdecies artikulua. Kanpoan gelditzea eta ondorioak.

1. Enpresaburu edo profesional bat araubide berezietatik bazter uzteko erabakia identifikaziorako estatu kidearen zerga administrazio eskudunak hartuko du; erabaki hori bide elektronikoa erabiliz jakinarazi beharko zaio enpresaburuari, eta jakinarazpen hori egin ondoko hiruhileko naturaleko lehen egunetik aurrera izanen ditu ondorioak.

Aurrekoa gorabehera, araubidetik kanpo gelditzearen arrazoia jarduera ekonomikoaren egoitza edo establezimendu iraunkorra aldatzea denean, aldaketa hori gertatzen den egunetik aurrera izanen ditu ondorioak, betiere enpresaburuak edo profesionalak egoitza edo establezimendu iraunkorraren aldaketa gertatu eta hurrengo hilabeteko hamargarren eguna baino lehen aurkezten badio identifikaziorako estatu kide ukitu bakoitzari aldaketaren aitorpena, identifikaziorako estatu kidearen aldaketaren berri ematen duena.

2. Araubide berezi horietatik baztertzeko arrazoiak hauexek dira:

a) Enpresaburuak edo profesionalak araubidea uzteko aitorpena aurkeztea, araubide berezietako edozeinetan zerbitzuak emateari utzi diolako; horretarako, enpresaburuak edo profesionalak egoera gertatu eta hurrengo hilabeteko hamargarren eguna baino lehen aurkeztu beharko dio aitorpen hori identifikaziorako estatu kideari.

Identifikaziorako estatu kidea Espainia baldin bada, uzteko aitorpena Zergari buruzko Foru Legearen 108. noniesdecies eta 108. duovicies artikuluetan arautzen da.

b) Enpresaburuak edo profesionalak araubide berezietako edozeinetan jarduerak betetzeari utzi diola pentsarazten duten egitateak egotea; hala gertatu dela ulertuko da enpresaburuak edo profesionalak zortzi hiruhileko naturaletan jarraian betetzen ez badu araubide berezietan sartutako zerbitzuetako bat, ezein kontsumoko estatu kidetan.

c) Araubide berezi horietan sartzeko beharrezkoak diren baldintzak ez betetzea.

d) Araubide berezi horietako araudiak ezarritako betebeharrak behin eta berriro ez betetzea; halaxe gertatuko da, besteak beste, kasu hauetan:

a’) Enpresaburuari edo profesionalari jakinarazpenak edo oroitzeko oharrak bidali izana aurreko hiru hiruhileko naturaletan aitorpen bat aurkezteko betebeharraz, eta zergaren aitorpena aurkeztu ez izana hamar eguneko epean, ohar edo jakinarazpen bakoitza jasotzen den egunetik aurrera;

b’) Enpresaburuari edo profesionalari jakinarazpenak edo oroitzeko oharrak bidali izana aurreko hiru hiruhileko naturaletan ordainketa bat egiteko betebeharraz, eta diru kopuru osoa ordaindu ez izana hamar eguneko epean, ohar edo jakinarazpen bakoitza jasotzen den egunetik aurrera, non eta aitorpen bakoitzari dagokion kopurua, zorretan duena, 100 eurotik beherakoa ez den;

c’) Enpresaburuak edo profesionalak bere betebeharra ez betetzea, hau da, bere erregistroak identifikaziorako estatu kidearen eskura edo kontsumoko estatu kidearen eskura ez jartzea, identifikaziorako estatu kideak igorritako oroit-oharra edo jakinarazpena egiten denetik hilabeteko epean, bide elektronikoa erabiliz.

Aurreko a) letra dela eta araubidetik kanpo geldituz gero, bi hiruhileko naturalerako izanen ditu ondorioak, gutxienez, araubidea uzten den egunetik aurrera, zein araubide berezitan aplikatzen den, hari dagokionez. Araubidetik kanpo gelditzeko arrazoia aurreko d) letrak aipatzen dituen kasuek eragin badute, zortzi hiruhileko naturalerako izanen ditu ondorioak, gutxienez, araubidetik kanpo gelditzea gertatzen den egunetik aurrera, eta bi araubide bereziei dagokienez.

50. quaterdecies artikulua. Txostena egiteko betebeharrak.

Araubide berezi horietako edozeini atxikitako enpresaburuak edo profesionalak aldaketaren aitorpen bat aurkeztu beharko dio identifikaziorako estatu kideko zerga administrazio eskudunari, aurretik emandako informazioan edozein aldaketa gertatzen bada; aitorpen hori kasuko aldaketa gertatu ondoko hilabeteko hamargarren eguna baino lehen aurkeztu beharko da.

Identifikaziorako estatu kidea Espainia baldin bada, aldaketaren aitorpena Zergari buruzko Foru Legearen 108. noniesdecies eta 108. duovicies artikuluetan arautzen da.

50. quinquiesdecies artikulua. Betebehar formalak.

1. Enpresaburuek eta profesionalek araubide berezi horietan sartutako eragiketen erregistroa eraman beharko dute, kontsumoko estatu kideko zerga administrazioak zergaren aitorpenean sartutako datuak egiaztatzeko behar bezain zehatza. Horretarako, erregistro horretan informazio hau jaso beharko da:

a) Kontsumoko zein estatu kidetan ematen den zerbitzua;

b) Emandako zerbitzu mota;

c) Zerbitzua eman zen data.

d) Zerga-oinarria, erabilitako dirua adierazita;

e) Zerga-oinarrian ondoren izandako gehikuntza edo murrizketa guztiak;

f) Aplikatutako zerga tasa;

g) Zergan zor den zenbatekoa, erabilitako dirua adierazita;

h) Jasotako ordainketen data eta zenbatekoa;

i) Zerbitzua eman aurretik jasotako aurrerakinak;

j) Fakturan ageri den informazioa, faktura eman baldin bada;

k) Bezeroaren izena, haren berri izanez gero, betiere;

l) Bezeroaren establezimendua, edo haren helbide edo ohiko bizilekua zehazteko erabilitako informazioa.

2. Aurreko informazio hori gorde beharko da halako moduan non berehala eta emandako zerbitzu bakoitza bereizirik bide elektronikotik eskuratzen ahalko baita; kontsumoko estatuaren eskura eta identifikaziorako estatuaren eskura egonen da.

3. Faktura ematea bidezkoa denean, kontsumoko estatu kideko arauekin bat eginen da.

50. sexiesdecies artikulua. Zerga Administrazioarekiko tramiteak.

Araubide berezi hauetan sartu nahi duten enpresaburuek edo profesionalek Zergari buruzko Foru Legearen kasuko artikuluetan eta kapitulu honetan aipatzen diren tramite guztiak bete beharko dituzte, nagusiki araubide berezian hasi edo hura uzteko aitorpena eta emandako informazioan gertatutako aldaketak, bai eta araubideari dagozkion aitorpen-likidazioak aurkeztea eta haien diru-sarrerak egitea; horretarako, bide elektronikoak erabiliz aurkeztuko dituzte Zerga Administrazioaren Estatuko Agentziaren atari elektronikoan dauden inprimakiak.

 

IX. TITULUA.

51. artikulua (indargabetua)

52. artikulua . (indargabetua)

X. TITULUA. SUBJEKTU PASIBOEN ERREGISTRO ETA KONTABILITATE BETEBEHARRAK

53. artikulua. Balio Erantsiaren gaineko Zergaren Erregistro Liburuak.

1. Enpresaburu edo profesionalek eta Balio Erantsiaren gaineko Zergaren beste subjektu pasibo batzuek ondoko erregistro liburu hauek erabili behar dituzte oro har, eta Erregelamendu honetan xedatutako eran:

a) Luzatutako fakturen erregistro liburua.

b) Jasotako fakturen erregistro liburua.

c) Inbertsio ondasunen erregistro liburua.

d) Batasun barneko zenbait eragiketaren erregistro liburua.

2. Aurreko zenbakian xedatutakoa ez zaie aplikatuko nekazaritza, abeltzaintza eta arrantzaren araubide berezi erraztua, baliokidetasun errekarguarena edo bide elektronikoaz emandako zerbitzuena duten jarduerei, araubide berezi horiei buruzko arauetan ezartzen diren salbuespenak salbu, ez eta garraiobide berrien noizbehinkako emateei ere, Zergari buruzko Foru Legearen 5.1.e) artikuluan aipatzen diren pertsonek eginak badira.

3. Enpresaburu edo profesionalek eta Balio Erantsiaren gaineko Zergaren beste subjektu pasibo batzuek zergei eta kontabilitateari buruzko eginbeharrak betetzeko eduki behar dituzten liburu edo erregistroak, baita liburu edo erregistro informatikoak ere, Zerga honen ondorioetarako erabiltzen ahalko dira, Erregelamendu honetan ezarritako baldintzak betez gero.

4. Espainiako lurraldean establezimendu baten baino gehiagoren titular diren subjektu pasiboek establezimendu guztietan eduki ahal izanen dituzte 1. zenbakian aipatutako erregistro liburuak, establezimendu bakoitzetik egiten diren eragiketak bereiz idazteko. Betiere, liburu horietako laburpen-idazpenak egoitza fiskalean dauden erregistro liburu nagusietan jaso beharko dira.

5. Ekonomia eta Ogasun Departamentuak, egoki iruditzen zaizkion egiaztapenak egin ondoren, artikulu honetako 1. zenbakian aipatutako erregistro liburuen ordez bestelako erregistro sistemak erabiltzeko baimena eman dezake, bai eta erregistro idazpenei buruzko baldintzak aldatzeko ere. Betiere, ordezko sistemek subjektu pasiboen antolaketa administratibo eta kontabilitatezkoei erantzun beharko diete eta, horrekin batera, Balio Erantsiaren gaineko Zergaren tributu betekizunak betetzen direla frogatzeko berme osoa emanen dute. Baimen horiek noiznahi ezeztatu ahal izanen dira.

 54. artikulua. Luzatutako fakturen Erregistro Liburua.

1. Enpresaburu edo profesionalek erregistro liburu bat eduki eta erabili behar dute luzatzen dituzten fakturetarako. Bertan, behar bezala bereizirik, agiri horien guztien idazpenak eginen dituzte.

Gauza bera egin beharko dute, Balio Erantsiaren gaineko Zergaren ondorioetarako enpresaburu edo profesional izan ez arren, zerga horren subjektu pasiboak direnek, subjektu pasibo gisa luzatzen dituzten fakturei dagokienez.

2. Idaztoharrak edo idazpenak edozein prozedura egokiz orri berezietan egiteak, ordea, balio izanen du, gero zenbakiak jarri eta ongi ordenaturik azaleztatzen badira aurreko zenbakian aipatutako liburua haiekin osatzeko.

3. Luzatutako fakturen erregistro-liburuan inskribatuko dira banan-banan luzatutako fakturak, bai eta honako datu hauek ere: fakturaren zenbakia, eta kasua bada, seriea, eman zeneko data, egindako eragiketen eguna (baldin eta aurrekoaren desberdina bada), hartzailearen izen-abizenak, sozietate-izena edo entitatearen izena osorik, eta identifikazio fiskaleko zenbakia, eragiketen zerga-oinarria (Zergari buruzko Foru Legearen 26. eta 27. artikuluen arabera zehaztua), eta kasua bada, zerga-tasa, zerga-kuota eta eragiketa kutxa-irizpidearen araubide bereziaren arabera gauzatu den ala ez, eta kasu horretan, erregelamendu honen 50 decies.1 artikuluan adierazitako aipamenak sartu beharko dira.

4. Fakturen idatzoharra banan-banan egin beharrean, laburpen-idazpenak egin daitezke. Horietan agerraraziko da zein data edo alditan luzatu diren, zerga-oinarri osoa, zerga-tasa, hurrenez hurren zenbakitutako eta data berean luzatutako fakturen kuota osoa, eta idatzoharrean jasotako fakturen lehen eta azken zenbakiak, eta eragiketak kutxa-irizpidearen araubide bereziaren arabera egin ote diren; hala bada, 50 decies.1 artikuluaren adierazitako aipamenak sartu beharko dira, betiere aldi berean baldintza hauek betetzen badira:

a) Luzatutako fakturetan ezinbestekoa ez izatea hartzailearen identifikazioa, Fakturazio betebeharrak arautzen dituen Erregelamendua onesten duen apirilaren 10eko 23/2013 Foru Dekretuan xedatutakoarekin bat.

b) Dokumentatutako eragiketen sorrarazpena hilabete natural beraren barnean izatea.

c) Horietan dokumentatutako eragiketei zerga-tasa bera aplikatu ahal izatea.

Faktura beraren idatzoharra hurrenez hurreneko zenbait idazpenetan egitea ere zilegi izanen da, zerga-tasa desberdinak ordaindu behar dituzten eragiketak dituenean.

5. (indargabetua)

6. Era berean, bereizita idatzi beharko dira zuzenketa-fakturak, hots, 4. idatz-zatian aipatutako erregelamenduaren 15. artikuluan adierazitakoak, zenbakia, eman zireneko data, hartzailearen identifikazioa, zerga-oinarria, zerga-tasa eta zerga-kuota adierazita.

55. artikulua. Jasotako fakturen Erregistro Liburua.

1. Enpresaburu edo profesionalek, balio erantsiaren gaineko zergaren ondorioetarako, beren enpresa edo lanbide jardueraren barnean eskuratu edo inportatu dituzten ondasunei eta jaso dituzten zerbitzuei dagozkien faktura, kontabilitateko frogagiri eta aduana agiri guztiak zenbakitu beharko dituzte koerlatiboki. Sailka banaturik zenbakitzen ahalko dituzte, hori egiteko bidezko arrazoi objektiboak egonez gero.

2. Aurreko zenbakian aipatu agirien idazpenak egin beharko dira jasotako fakturen erregistro liburuan.

Bereziki, enpresaburu edo profesionalek, Europar Batasunaren barnean, zergari loturiko ondasun-eskuraketak eginez gero, ondasun horien emateei dagozkien fakturen idazpenak egin beharko dituzte.

Era berean, fakturak ere jasoko dira edo Zergari buruzko Foru Legearen 43. artikuluaren 1. zenbakiko 4. puntuan aipatzen diren kontabilitateko frogagiriak.

3. Idaztoharrak edo idazpenak edozein prozedura egokiz orri berezietan egiteak, ordea, balio izanen du, gero zenbakiak jarri eta ongi ordenaturik azaleztatzen badira artikulu honetan arautzen den liburua haiekin osatzeko.

4. Jasotako fakturen erregistro-liburuan inskribatuko dira, banan-banan, jasotako fakturak eta, halakorik bada, aduanako agiriak eta aurrean aipatu gainerakoak. Datu hauek jarriko dira: agiriaren harrera zenbakia, luzapen data, eragiketaren data (luzapen data bera ez bada eta aipatu agirian hala ageri bada), agiria luzatu behar duenaren izen-deiturak, izen soziala edo izen osoa eta identifikazio fiskaleko zenbakia, Zergari buruzko Foru Legearen 26. eta 27. artikuluei jarraituz zehaztutako zerga-oinarria eta, halakorik bada, zerga-tasa, zerga-kuota, eta eragiketa kutxa-irizpidearen araubide bereziaren mende dagoen ala ez; kasu horretan, erregelamendu honen 50 decies.2 artikuluko aipamenak sartu beharko dira.

Fakturak 2. zenbakiko bigarren paragrafoan aipatzen diren horietakoak izanez gero, hots, Europar Batasunaren barneko ondasun-emateen fakturak izanez gero, ondasun horien eskuraketei dagozkien tributu-kuotak kalkulatu eta fakturen idazpenetan jarri beharko dira.

Era berean, fakturei edo artikulu honen 2. paragrafoaren hirugarren lerroaldean aipatzen diren kontabilitateko frogagiriei dagokienez, faktura edo kontularitzako frogagiri horiek idaztean kalkulatu eta esleituko dira beraietan jasotako ondasun emate edo zerbitzu eskaintzei dagozkien zerga kuotak."

5. Data berean jaso diren faktura guztien laburpen-idazpen orokorra egiten ahalko da, eta bertan agertuko dira hartzaileak jasotako fakturei emandako lehen eta azken zenbakiak, hornitzaile bakar batengandik heldu badira, zerga-oinarri guztien batura, eta zerga-kuota osoa, eta eragiketak kutxa-irizpidearen araubide bereziaren mende dauden ala ez (eta, kasu horretan, erregelamendu honen 50 decies.2 artikuluko aipamenak sartuko dira), baldin eta eragiketa guztien zenbateko osoa, balio erantsiaren gaineko zerga sartu gabe, 6.000 eurotik gorakoa ez bada, eta faktura bakoitzean ageri diren eragiketen zenbatekoa 500 eurotik gorakoa ez bada, balio erantsiaren gaineko zerga sartu gabe.

 56. artikulua. Inbertsio ondasunen Erregistro Liburua.

1. Zergari buruzko Foru Legearen 53.etik 56.era bitarteko artikuluetan, biak barne, xedatutakoari jarraikiz, inbertsio ondasunak direla eta kenkarien erregularizazioa egin behar duten Balio Erantsiaren gaineko Zergaren subjektu pasiboak inbertsio ondasunen Erregistro Liburu batez arduratu beharko dira, liburu horrek Erregelamendu honen 59. artikuluaren eskakizun formalak beteko dituelarik.

2. Aipatu liburuan, behar bezala banakatuz, idatziko dira subjektu pasiboak eskuratu eta Zergari buruzko Foru Legearen 54. artikuluan inbertsio ondasun gisa sailkatuta daudenak.

3. Halaber, subjektu pasiboek Erregistro Liburu honetan adieraziko dituzte idatzitako inbertsio ondasun bakoitzari dagozkion Aduana faktura eta dokumentuak argi eta garbi ezagutzeko behar diren datu guztiak.

4. Era berean idatziko dira, banako ondasun bakoitzeko, erabilpenaren hasiera eguna, urteko behin betiko hainbanakoa eta, behar denean, kenkarien urteko erregularizazioa.

5. Erregularizazio epean zehar inbertsio ondasunen emanaldiak gertatzen direnean, baja hartuko dute dagokien inbertsio ondasunen Erregistro Liburuan eta aipatu emanaldia jasotzen duen luzatutako fakturen Erregistro Liburuan horren aipamen zehatza idatziko da, baita, emanaldia dela eta, egin den kenkariaren erregularizazioa, Zergari buruzko Foru Legearen 56. artikuluak ezarritako prozedurari jarraikiz.

6. Idazpen edo ohartarazpenak edozein prozedura egokiren bidez egiteak balioko du, orrialde bereizietan idatzi, gero zenbakia ezarri eta bata bestearen ondoan jarrita koadernoak osatuz, artikulu honetan erregulatutako liburua gauzatzeko.

57. artikulua. Elkarte barneko zenbait eragiketen Erregistro Liburua.

1. Balio Erantsiaren gaineko Zergaren subjektu pasiboek elkarte barneko zenbait eragiketen Erregistro Liburua eduki beharko dute eta bertan ondoren zehaztutakoak idatziko dituzte:

1. Ondasunak bidali edo hartzea, Zergaren araubide komuna arautu duen Legearen 70. artikuluko lehenengo idatz-zatiaren 7. zenbakiko b) letran aipatzen diren peritu txostenak edo lanak egiteko.

2. Zergaren araubide komunari buruzko Foru Legearen 9. artikuluaren 3garren atalak eta 16. artikuluaren 2garren atalak aipatzen dituzten ondasun eskualdaketak eta erkidego arteko eskuraketak, barne direlarik, bi kasu horietan, aipatu 9. artikuluaren, 3garren ataleko e), f) eta g) letrei dagozkien salbuespenak.

2. Erregistro Liburu horretan honako datu hauek egon beharko dute:

1go. Eragiketa eta noiz izan zen burutua.

2garren. Eragiketaren xede diren ondasunen deskripzioa, kasuan kasura, eskuraketa fakturari edo jabetza tituluari erreferentzia eginez.

3garren. Zeintzu diren eragiketak, horiei dagozkien beste faktura batzuk edo dokumentazioa.

4garren. Hartzaile edo igorlearen identifikazioa, Balio Erantsiaren gaineko Zergak bere ondorioak izan ditzan, identifikazio zenbakia, helbide soziala eta helbidea jakinaraziz.

5garren. Ondasunen jatorrizko estatu elkartekidea edo ondasunen helmuga.

6garren. Eragiketa horiek egiteko, jarriz gero, ezarritako epea.

58. artikulua. Erregistroko dokumentuen edukia.

Erregistro Liburuek likidazioaldi bakoitzean ondorengoak zehaztasunez bereizteko gaitasuna izanen dute.

1. Subjetu pasiboak bere bezeroei erasan dien Balio Erantsiaren gaineko Zergaren kuoten diru-kopuru osoa.

2. Subjektu pasiboak ondasun eskurapenak edo inportazioak egiteagatik zein hartutako zerbitzuengatik edo, hala izanez gero, bere autokontsumoengatik jasan duen Balio Erantsiaren gaineko Zergaren kuoten diru-kopuru osoa.

3. Elkarte barneko zenbait eragiketen Erregistro Liburuan isladatutako eragiketei dagokienean, horiek aipatzen dituzten ondasunen egoera, non eta ez den elkarte barneko emanaldi edo eskuraketen sortzapena gertatzen.

59. artikulua. Formazko betekizunak.

1. Erregelamendu honetan aipatzen diren erregistro liburu guztiak, edozein prozedura erabilita ere, argitasun eta zehaztasunez, daten arabera ordenaturik, zuriune, tarte, urradura eta tatxadurarik gabe bete beharko dira. Erregistro idazpenetan ikusten diren akats edo faltak berehala zuzendu beharko dira.

Erregistro idazpenetan balioak eurotan adieraziko dira. Fakturan erabilitako kontu-unitatea edo dibisa euroa ez denean, bihurtu egin beharko da erregistro liburuetan jartzeko.

2. Aurreko zenbakian aipatzen diren betekizunek ez dute ezertan galaraziko inbertsio ondasunen erregistro liburuan zuriuneak uztea, zuriune horiek behin betiko hainbanaketaren kalkuluak eta doikuntzak egiteko gordetzen baldin badira.

3. Erregistro liburuen orrialdeak koerlatiboki zenbakituak egonen dira.

60. artikulua. Erregistro idazpenak egiteko epeak.

1. Erregistro liburuetan jaso behar diren eragiketen idazpenak erregistro liburu egokietan eginen dira, eragiketa horiei dagokien zergaren likidazio eta ordainketak egiten diren unean edo, bestela, borondatezko aldian likidazio eta ordainketa horiek egiteko legezko epea amaitu aurretik.

2. Alabaina, subjektu pasiboak eragiketaren bat burutu eta fakturarik egiten ez bada, zazpi eguneko epean egin beharko da idazpena, eragiketa egiten denetik edo agiriak ematen direnetik hasita, baldin eta epe hori aurreko zenbakian esan dena baino txikiagoa bada.

3. Jasotzen diren fakturak jasotzen diren ordenean jarri behar dira erregistro liburuan eta haien kenketa egin behar den likidazioaldiaren barnean.

4. Erregelamendu honen 57.1 artikuluan aipatzen diren eragiketen idazpenak zazpi eguneko epean eginen dira, ondasunen bidalketa edo garraioa abiatzen den unetik hasita.

5. Kutxa-irizpidearen araubide berezia aplikatzekoa zaien eta erregistroan idatzi beharrekoak diren eragiketak erregistro-liburu orokorretan idatzi beharko dira aurreko zenbakietan ezarritako epeetan, eragiketa horiei aipatu araubide berezia aplikatu ez balitzaie bezala, kobrantza edo ordainketa osoak edo partzialak egiteko unean osatu beharreko datuak galarazi gabe.

61. artikulua. Erregistro idazpenen zuzenketa.

1. Aurreko artikuluetan aipatzen diren erregistro idazpenak egiterakoan enpresaburu edo profesionalek akats materialen bat egiten badute, zuzendu egin beharko dute. Zuzenketa hori likidazio aldiaren amaieran egin beharko da. Idazpen bat edo idazpen multzo bat eginen da, likidazio-aldi bakoitzean sortutako eta jasandako Zerga zehazteko bide emanen duena, behin zuzenketa eginda.

2. Inbertsio-ondasunen kasuan, zuzenketak, ondasunak eskuratzeagatiko kenkarien erregularizazioari dagozkion heinean, inbertsio-ondasunen erregistro liburuan idatziko dira, kasuan kasuko ondasunari buruzko idazpenaren ondoan.

 

XI. TITULUA. ZERGAREN KUDEAKETA

I. KAPITULUA. Likidazioa eta dirubilketa

62. artikulua. Zergaren kitapena. Arau orokorrak.

1. Inportazioei buruz ezarritakoa salbu, subjektu pasiboek beren kabuz zehaztu beharko dute zerga-zorra, hurrengo zenbakietako arauei doitutako aitorpen-likidazioen bidez.

Enpresaburuek eta profesionalek artikulu honen 3., 4. eta 5. zenbakietan aipatzen diren aldian-aldiko aitorpen-likidazioak aurkeztu beharko dituzte, baita 7. zenbakian aurreikusten den urteko aitorpen laburtua ere, nahiz sorrarazitako kuotarik ez izan edo jasandako edo ordaindutako kuota kenkaririk ez egin.

Aurreko lerroaldeetan ezarritako betebeharra ez da zergari buruzko foru legearen 17. eta 23. artikuluetan aipatzen diren eragiketa salbuetsiak bakarrik egiten dituzten subjektu pasiboentzat.

7. zenbakian aurreikusitako urteko aitorpen laburtua aurkezteko betebeharra ez da subjektu pasiboentzat izanen zerga arloko administrazioak haien gaineko informazio nahikoa badu jarduketei eta egiaztatze edo ikerketa prozedurei dagokienez, subjektu pasiboek edo hirugarrenek dituzten zerga betebeharren ondorioz.

Ekonomia, Ogasun, Industria eta Enpleguko kontseilariaren foru aginduaren bidez zehaztuko da nor diren aurreko lerroaldean aipatu betebeharretik salbu dauden subjektu pasiboak.

2. Aitorpen-kitapenak zuzenean aurkeztu beharko dira edo entitatea laguntzaileen bitartez, Ekonomi eta Ogasun Departamentuan.

3. Likidazio aldia hiruhileko naturala izanen da.

Ondoren aipatzen diren enpresaburu edo profesionalentzat, ordea, likidazio aldia hilabete naturala izanen da:

1. Aurreko urte naturalean 6.010.121,04 eurotik gorako eragiketak izan dituztenak. Eragiketen zenbatekoa Zergari buruzko Foru Legearen 66. artikuluan xedatutakoari jarraituz kalkulatu behar da.

1 bis. Zergari buruzko Foru Legearen 66. artikuluko 1. zenbakiko bigarren paragrafoan aipatzen diren enpresa edo lanbide ondare horietako bat osorik edo zati batean eskuratu dutenak, baldin eta aurreko urte naturalean egin dituzten eragiketak eta ondarearen eskualdatzaileak eskualdatutako ondarearekin epe berean eginen zituzkeenak batuz 6.010.121,04 eurotik gorako zenbatekoa ateratzen bada.

Atal honetan ezarritakoa eskualdaketa egiten den momentutik izanen da aplikagarria, eta eskualdaketa egiten den likidazio aldia amaitu eta biharamunetik sortuko ditu ondorioak.

Zergari buruzko Foru Legearen 66. artikuluko 1. zenbakiko bigarren paragrafoan xedatutakoaren ondorioetarako, enpresa edo lanbide ondare bat osorik edo zati batean eskualdatu dela ulertuko da eskualdatzailearen jardueraren adar bat edo gehiago osatzen duten ondare elementuak eskualdatzen badira, Sozietateen gaineko Zergari buruzko abenduaren 30eko 24/1996 Foru Legearen 133. artikuluan ezarritako moduan. Ez da kontuan hartuko Zergari buruzko Foru Legearen 7. artikuluko 1. atalean aurreikusitako zerga loturarik gabeko kasuren bat eskualdaketari aplikatzen ahal zaion ala ez.

2. Erregelamendu honen 20. artikuluan aipatuak, likidazio aldi bakoitzaren amaieran beren aldeko saldoaren itzulketa eskatzen ahal dutenak.

Subjektu pasiboei itzuli beharreko kuotarik ez dagoenean ere, aurreko paragrafoan xedatutakoa aplikagarria izanen da.

3. Zergari buruzko Foru Legearen VIII. tituluko XI. kapituluan arautzen den entitate taldearen araubide berezia aplikatzen dutenak.

4. Aitorpen-kitapena Ekonomi eta Ogasun Departamentuak kasu bakoitzerako agintzen duen ereduaren araberakoa izanen da, eta kasuko kitapen aldiaren hurrengo hileko hogei egun naturaletan aurkeztuko da, aldi hori hilerokoa edo hiruhilekoa izan.

Zilegi izanen da, ordea, bigarren hiruhilekoari edo ekainari, uztailari eta laugarren hiruhilekoari edo abenduari dagozkion aitorpen-kitapenak abuztuaren 5era, irailaren 20ra eta urtarrilaren 31ra arte aurkeztea, kasuan-kasuan.

Zenbaki honetako aurreko lerroaldeetan agindu dena ezertan galarazi gabe, Ekonomi eta Ogasun kontseilariak, arrazoi tekniko ongi funtsatuak oinarri, zilegi izanen du bide telematikozko deklarazioak egiteko epea luzatzea.

5. Subjektu pasiboa konkurtsopean deklaratu bada, bi aitorpen-likidazio aurkeztu beharko ditu, aurreko idatz-zatian adierazitako epean, hain zuzen ere, konkurtsoa deklaratu den hiruhilekoari edo hilabeteari dagokion likidazio aldiari dagozkionak, bata aitorpen horren aurreko zergapeko egintzei buruzkoa, eta bestea, ondokoei buruzkoa.

Kasu horretan, konkurtsoa deklaratu aurreko zergapeko egintzei buruzko aitorpen-likidazioak subjektu pasiboaren aldeko saldoa ematen badu, saldo hori aipatu aitorpenaren ondoko zergapeko egintzei dagokien aitorpen-likidazioan berdintzen ahalko da.

Subjektu pasiboak ez badu hautatzen aurreko lerroaldean aipatutako berdinketa, konkurtsoa deklaratu aurreko zergapeko egintzei dagokien likidazio-aitorpenak haren alde ematen duen saldoa berdinketari eta dirua itzultzeko eskaera egiteko eskubideari buruzko arauen mende geratuko da. Subjektu pasiboak berdinketa hautatzen badu, konkurtsoa deklaratu ondoko zergapeko egintzei dagokien aitorpen-likidazioak haren alde ematen duen saldoa, aipatu berdinketa aplikatu ondoren, berdinketari eta dirua itzultzeko eskaera egiteko eskubideari buruzko arauen mende geratuko da.

6. Aitorpen-likidazioa, aurreko idatz-zatian aurreikusitako salbuespenarekin, bakarra izanen da enpresaburu edo profesional bakoitzarentzat, Ekonomia, Ogasun, Industria eta Enpleguko kontseilariak zergaren gaineko araubide bereziei buruz ezartzen duena galarazi gabe, eta erregelamendu honen laugarren xedapen gehigarrian ezarritakoa.

Nolanahi ere, subjektu pasibo ezberdinen aitorpen-likidazioak dokumentu berean batera aurkezteko baimena ematen ahalko da, baimen bakoitzean ezartzen diren kasuetan eta baldintzekin.

Baimenak edozein unetan errebokatzen ahalko dira.

7. Artikulu honetako 3., 4. eta 5. zenbakietan aipatzen diren aitorpen-likidazioez gain, subjektu pasiboek urteko aitorpen laburtua aurkeztu beharko dute, Ekonomia, Ogasun, Industria eta Enpleguko kontseilariak kasu bakoitzerako onetsitako tokian, moduan, epeetan eta inprimakietan.

Batera egindako aitorpen-likidazioetan sartutako subjektu pasiboek, halaber, urteko aitorpen laburtua egin beharko dute, aurreko lerroaldean ezarritako tokian, moduan, epeetan eta inprimakietan.

Zergari buruzko Foru Legearen 17. eta 23. artikuluetan jasotzen diren eragiketa salbuetsiak bakarrik egiten dituzten subjektu pasiboak ez dira behartuta egonen zenbaki honetan aurreikusitako urteko aitorpen laburtua aurkeztera, ezta Ekonomia, Ogasun, Industria eta Enpleguko kontseilariak foru agindu bidez haientzat hala erabakita duten subjektu pasiboek ere, artikulu honetako 1. zenbakiko laugarren lerroaldean aipatzen diren kasuetan beretan.

8. Ondoren zehazten direnek aitorpen-likidazio berezia aurkeztu beharko dute, ez aldirokoa, Ekonomia, Ogasun, Industria eta Enpleguko kontseilariak ezarritako tokian, moduan, epeetan eta hark emandako inprimakien bidez:

1. Balio Erantsiari buruzko Foru Legearen 5. artikuluaren 1. zenbakiaren e) letran adierazitako pertsonak, Batasuneko beste estatu baterako norakoa duten garraiobide berrien entregengatik.

2. Zergari lotuta dauden garraiobide berriak Batasunaren barruan eskuratzen dituztenak, Zergari buruzko Foru Legearen 13. artikuluko 2. idatz-zatian xedatutakoa betez.

3. Enpresaburu edo profesional gisa jarduten ez duten pertsona juridikoak, baldin eta Batasunaren barruan ondasunak (garraiobide berriak ez direnak) eskuratzen badituzte eta eskurapen horiek zergari lotuta badaude; eta Zergari buruzko Foru Legearen 5. artikuluko 4. zenbakian xedatutakoaren arabera enpresaburutzat edo profesionaltzat hartzen badira.

4. Kenkaria aplikatzeko eskubidea sortzen ez duten eragiketak edo nekazaritza, abeltzaintza eta arrantzaren araubide berezia nahiz baliokidetasun errekarguaren araubide berezia aplikatu ahal zaizkien jarduerak bakarrik egiten dituzten subjektu pasiboak, baldin eta zergari lotuta dauden ondasunen eskurapenak egiten badituzte Batasunaren barruan edo Zergari buruzko Foru Legearen 31.1. artikuluko 2. idatz-zatian jasotako eragiketen hartzaileak badira.

5. Nekazaritza, abeltzaintza eta arrantzaren araubide berezia aplikatu ahal zaien jarduerak bakarrik egiten dituzten subjektu pasiboak, baldin eta zergari lotuta eta hori ordaintzetik salbuetsita ez dauden higiezinetako inbertsioko ondasunak ematen badituzte, eta horien ondorioz zerga likidatu eta ordaindu behar badute, Zergari buruzko Foru Legearen 74.1. artikuluko bigarren paragrafoan xedatutakoaren arabera.

Seigarrena. Baliokidetasun errekarguaren araubide berezia aplikatzen ahal zaien jarduerak bakarrik egiten dituzten subjektu pasiboak, baldin eta Ogasun Publikoari eskatzen badiote bidaiariei ordaindu dizkioten kuotak itzultzeko, kuota horiek zerga ordaintzetik salbuetsita dauden ondasunen entregei badagozkie Zergari buruzko Foru Legearen 18. artikuluko 2. idatz-zatiaren A) letran xedatutakoaren arabera, bai eta zergaren menpe eta hartatik salbuetsi gabe dauden ondasun higiezinen entrega eragiketak egiten dituztenean ere, salbu eta foru lege horren 31.1.Bigarrena e).c’) artikuluan aipatzen direnean.

7. Ekonomia, Ogasun, Industria eta Enplegu Departamentuak zehazten dituen pertsonak edo entitateak.

9. Zerga Administrazioak hitzarmenak sinatu ahalko ditu beste administrazio publiko batzuekin, entitateekin eta sektore edo interes sozialak, laboralak, enpresakoak edo profesionalak ordezkatzen dituzten erakundeekin, zerga honen aitorpen-likidazioak aurkezteko gizartearen lankidetza gauzatzeko.

Aurreko paragrafoan aipatutako hitzarmenak, besteak beste, ondoko alderdiei buruzkoak izanen dira:

1. Informazio eta zabalkunde kanpainak.

2. Aitorpen-likidazioak egiteko eta modu egokian eta egiazkoan betetzeko laguntza.

3. Aitorpen-likidazioak Zerga Administrazioari igortzea.

4. Akatsak zuzentzea, subjektu pasiboek baimena eman ondoren.

5. Ofiziozko itzulketen tramitazioa nola dagoen jakinaraztea, subjektu pasiboek baimena eman ondoren.

Zerga administrazioak jarduera horiek burutzeko behar den laguntza emanen du, baina horrek ez du kenduko zerbitzu horiek subjektu pasibo guztiei emateko ahalbidea.

Ekonomia, Ogasun, Industria eta Enpleguko kontseilariak, foru agindu baten bidez, baldintza batzuk ezarriko ditu hitzarmenak sinatu dituzten entitateek aitorpen-likidazioak, urteko aitorpen-laburpenak edo zerga arloko arauek eskatutako beste edozein agiri baliabide telematikoen bidez aurkezteko, hirugarren pertsonen izenean.

Halaber, foru agindu horretan aurreikusi ahalko da bestelako pertsona edo entitateek baliabide telematikoen bidezko aurkezpen sistema hori erabiltzeko aukera, hirugarren pertsonen izenean.

63. artikulua. Zerga bilketa. Arau orokorrak.

Aitorpen-likidazioen ondoriozko kuoten sarrera eta subjektu pasiboaren aldeko itzulketak egiteko eskaera Ekonomia eta Ogasun Departamentuak emandako idazkietan eta berak ezarri toki, modu eta epeetan eginen dira.

II. KAPITULUA. Ofiziozko behin-behineko likidazioa

64. artikulua. Aplikazio kasuak.

1. Tributu Administrazioak ofiziozko behin-behineko likidazioak burutuko ditu baldin eta subjektu pasiboak Zerga autolikidatzeko betebeharra aurreko Kapituluan azaldu bezala hausten baldin badu edo aitorpen-likidazioa egiteko aurkeztu zaion eskeari uko egiten badio.

2. Ofiziozko behin-behineko likidazioek subjektu pasiboak likidatu behar izan zuen tributu zorra zehaztuko dute eta, behar denean, egoki diren zehapenak jarriko dira.

65. artikulua. Prozedura.

1. Tributu Administrazioak subjektu pasiboari behar zen aldian egin ez zuen aitorpen-likidazioa aurkezteko eskearen jakinerazpena ematen dionetik, ofiziozko behin-behineko likidazioaren prozedurari ekin ahal izanen zaio, ez bada, behintzat, epe horretan hutsegitea zuzendu edo betebehar horren menpean ez egotea justifikatzen.

2. Ofiziozko behin-behineko likidazioa Tributu Administrazioak bere esku dituen datu, aurrekin, elementu, zeinu, indize eta moduluen arabera gauzatuko da, horretarako garrantzia baldin badute; kontutan hartuko dira, batez ere, Zerga honen erregimen erraztuan sektore jakin batzuentzat ezarritakoak.

3. Espedienteak ukitzen duen subjektuari horren berri emanen zaio, hamar eguneko epe luzaezinaren barnean egokitzat dituen alegazioak egin ditzan.

4. Ekonomia eta Ogasun Departamentuak alegazioak jaso ondoren edo izapidaketa hori iraungitzerakoan ofiziozko behin-behineko likidazioa egingo du.

5. Ebazpena espedienteari erantsiko zaio eta interesatuei jakinaraziko zaie, jakinarazpen datatik hasi eta hamar eguneko epean.

66. artikulua. Ofiziozko behin-behineko likidazioaren eragina.

1. Ofiziozko behin-behineko likidazioak berehala exekutatuko dira, arlo horri buruzko arautegian ezarritakoari jarraikiz haien aurka jar daitezkeen helegiteak galarazi gabe.

2. Kapitulu honetan xedatutakoa galarazi gabe, Administrazioak, azkenean, subjektu pasiboen tributu egoera egiaztatu ahalko du, egoki diren behin betiko likidazioak eginik.

III. KAPITULUA. Elkarte barneko eragiketei buruzko aitorpen laburtua

67. artikulua. Aitorpen laburtua.

Enpresaburuek eta profesionalek aitorpen laburtu bat aurkeztu behar dute kapitulu honetan ezarri bezala Batasunaren barruan egiten dituzten ondasunen eta zerbitzuen entrega eta eskurapenei buruz.

68. artikulua. Aitorpen laburtua aurkeztu beharra.

Ondoren zehazten diren eragiketetako edozein egiten duten enpresaburuek eta profesionalek (izaera hori Zergari buruzko Foru Legearen 5. artikuluaren 4. zenbakian xedatutakoaren arabera eskuratu dutenean ere) nahitaez aurkeztu behar dute aitorpen laburtua:

1. Batasuneko beste estatu baterako diren ondasun entregak, baldin eta salbuetsita badaude Zergari buruzko Foru Legearen 22. artikuluaren 1., 2. eta 3. zenbakietan xedatutakoa betez.

Eragiketa horien artean sartuko dira Zergari buruzko Foru Legearen 9. artikuluaren 3. idatz-zatian jasotako ondasunen trasferentziak eta, zehazki, Zergaren araubide komuna arautu duen Legearen 27. artikuluko 12. idatz-zatian xedatutakoaren arabera inportazioa salbuetsita izan duten geroko ondasun entregak.

Ez dira zenbaki honetan aipatutako ondasun entregatzat hartuko honako hauek:

a) Zergari buruzko Foru Legearen 5. artikuluaren 1. zenbakiko e) letran jasotako pertsonek noizbehinka egiten dituzten garraiobide berrien entregak.

b) Zergaren subjektu pasiboek egiten dizkietenak Batasuneko beste edozein estatutan zerga horren ondorioetarako identifikazio zenbakirik ez duten hartzaileei.

2. Zergaren aplikazio lurraldean horren ondorioetarako identifikatu diren pertsonek edo entitateek egindako zergari lotutako ondasunen eskurapenak Batasunaren barruan.

Eragiketa horien artean sartuko dira Batasuneko beste estatu batetik egindako ondasunen transferentziak (Zergari buruzko Foru Legearen 16. artikuluaren 2. idatz-zatian aipatutakoak) eta, zehazki, Batasuneko beste estatu batean aurretik inportatu diren ondasunen Batasunaren barruko eskurapenak, baldin eta inportazio hori zerga ordaintzetik salbuetsita egon bada Zergaren araubide komuna arautu duen Legearen 27. artikuluaren 12. idatz-zatian ezarritakoen antzeko baldintzetan.

3. Zerbitzuak Batasunaren barruan ematea.

Erregelamendu honen ondorioetarako, Batasunaren barruko zerbitzuen emateak izanen dira hurrengo betekizunak betetzen dituztenak:

a) Emateei aplikatu ahal zaizkien lokalizazio arauekin bat etorriz, zergaren aplikazio lurraldean ematen ez direnak.

b) Batasuneko beste estatu batean zergari lotuta baina ordaintzetik salbuetsita ez daudenak.

c) Hartzailea enpresaburua edo profesionala izatea, eta horren arabera jardutea; halaber, Batasuneko estatu horretan egon behar da jarduera ekonomikoaren egoitza edo haren establezimendu iraunkorra, nahiz helbidea edo ohiko bizilekua. Bestela, hartzailea enpresaburu edo profesional bezala jarduten ez duen pertsona juridikoa izan behar da, zerga honen ondorioetarako identifikazio zenbaki bat eduki behar duena, Batatasuneko estatu horrek emana.

d) Subjektu pasiboa hartzailea izatea.

4. Europar Batasunaren barruko zerbitzu eskurapenak.

Erregelamendu honen ondorioetarako, zerbitzuen Batasunaren barruko zerbitzu eskurapenak izanen dira enpresaburu edo profesional batek ematen dituenak eta zergaren aplikazio lurraldean zergari lotuta daudenak, horretatik salbuetsita egon gabe. Betiere, jarduera ekonomikoaren egoitza edo horiek emateko establezimendu iraunkorra edo, bestela, haren helbidea edo ohiko bizilekua Batasunean egon behar da baina zergaren aplikazio lurraldetik kanpo.

5. Batasunaren barruko ondasunen eskurapenen hurrengo entregak (Zergari buruzko Foru Legearen 23. artikuluaren 3. zenbakian aipatzen direnak). Batasuneko beste estatu batean egin behar badira, Espainiako Zerga Administrazioak balio erantsiaren gaineko zergaren ondorioetarako ezarri duen identifikazio zenbaki baten bidez.

69. artikulua. Aitorpen laburtuaren edukia.

1. Aitorpen laburtuan honako informazio hau jaso behar da:

1. Ondasunen hornitzaileak eta eskuratzaileak eta zerbitzuen emaileak eta hartzaileak identifikatzeko datuak, baita horietako bakoitzarekin egin diren eragiketen zerga oinarri osoa ere.

Eragiketen kontraprestazioa euroa ez beste kontu-unitate batean ezarri bada, eragiketa horien zerga oinarria eurotan eman beharko da sorrarazpenaren data erreferentzia gisa hartuta.

2. Zergari buruzko Foru Legearen 9. artikuluaren 3. idatz-zatian eta 16. artikuluaren 2. idatz-zatian jasotzen diren ondasunen transferentzietan subjektu pasiboari Batasuneko beste estatuan eman zaion identifikazio zenbakia adierazi behar da.

3. Erregelamendu honen 68. artikuluaren 5. idatz-zatian jasotako eragiketetan bereiz adierazi behar dira hurrengo entregak; eta, horiei dagokienez, datu hauek eman behar dira:

a) Balio erantsiaren gaineko zergaren ondorioetarako identifikazio zenbakia, enpresaburuak edo profesionalak eragiketa horiek egiteko erabiltzen duena.

b) Bidalketa edo garraioa hartu duen Batasuneko estatuan balio erantsiaren gaineko zergaren ondorioetarako emandako identifikazio zenbakia; hurrengo ematearen eskuratzaileak eman behar izan du.

c) Ondasunen bidalketa edo garraioa heldu den Batasuneko estatuan subjektu pasiboak egin dituen entregen zenbateko osoa, hartzaile bakoitza kontuan hartuta betiere.

2. Aitorpen laburtuan jasotako datuak zuzendu eginen dira akatsen bat egiten denean edo Zergari buruzko Foru Legearen 28. artikuluan ezarritako kasuren baten ondorioz aldaketaren bat gertatzen bada.

3. Sorrarazi diren aitorpen aldiko aitorpen laburtuan adieraziko dira eragiketak.

Aurreko 2. idatz-zatian aipatutako kasuetan, zuzenketaren bat egiten bada ondasunen eta zerbitzuen hartzaileari jakinarazi zaion aitorpen aldiko aitorpen laburtuan jasoko da zuzenketa hori.

70. artikulua. Aitorpen laburtua aurkezteko tokia, modua eta epeak.

1. Hitzarmen Ekonomikoaren 34. artikuluaren 9. arauan xedatutakoa betez, zerga egiaztatu eta ikertzeko eskumena Nafarroako Ogasun Publikoaren esku duten subjektu pasiboek Ekonomia eta Ogasun Departamentuaren bulegoetan aurkeztu beharko dute aitorpen laburtua.

2. Ekonomia eta Ogasun Departamentuak ezarritako tokian eta moduan aurkeztu behar da aitorpen laburtua, hark onartutako eredua erabiliz.

3. Aitorpen aldia eta aitorpen laburtua aurkezteko epeak ondoren zehazten dira:

1. Oro har, aitorpen laburtua hilabete natural bakoitzean aurkeztu behar da, hurrengo hilabeteko lehenengo hogei egun naturaletan; salbuespen gisa, ekaineko, uztaileko eta iraileko aitorpenak abuztuaren 5ean, irailaren 20an eta urtarrilaren 31n aurkeztu ahalko dira, hurrenez hurren.

2. Erreferentziako hiruhilekoan zehar eta aurreko lau hiruhileko naturaletako bakoitzean zehar, aitorpen laburtuan adierazi beharreko ondasun entregen eta zerbitzu emateen zenbateko osoa 50.000 eurotik gorakoa ez bada (balio erantsiaren gaineko zerga zenbatu gabe), dagokion hiruhileko aldiaren hurrengo hilabete naturaleko lehenengo hogei egunetan zehar aurkeztu beharko da aitorpen laburtua. Alabaina, bigarren eta laugarren hiruhilekoko aitorpenak abuztuaren 5ean eta urtarrilaren 31n aurkeztu ahalko dira, hurrenez hurren.

Hiruhileko natural bakoitzeko hilabeteren baten amaieran aurreko paragrafoan aipatutako zenbatekoa gainditzen bada, aitorpen laburpen bat aurkeztu beharko da hiruhileko natural hori hasi denetik igarotako hilabeterako edo hilabeteetarako. Aitorpen hori lehenengo hogei egun naturaletan zehar aurkeztu beharko da, baina aurreko 1. idatz-zatian ekaineko, uztaileko eta irailerako aitorpenei buruz ezarri diren salbuespenak beteko dira.

4. Aurreko 3 zenbakian xedatutakoa gorabehera, Ekonomia eta Ogasun Departamentuak baimena eman dezake aitorpen laburtuaren erreferentzia urte naturala izan dadin. Horretarako, enpresaburu eta profesionalengan honako egoerak gertatu behar dira:

a) Aurreko urte naturalean, beren ondasun entregen eta zerbitzu emateen zenbateko osoa (balio erantsiaren gaineko zerga alde batera utzirik) 35.000 euro baino gehiago ez izatea.

b) Zergari buruzko Foru Legearen 22. artikuluko 1 eta 3. idatz-zatietan xedatutakoaren arabera zerga ordaindu beharretik salbuetsita dauden ondasun entregei (garraiobide berrien entregak kanpo) dagokien zenbateko osoa, aurreko urte naturalean, 15.000 euro baino gehiago ez izatea.

5. Aurreko zenbakiak aipatzen dituen zenbatekoen konputua, jardueraren hasierako ekitaldian, jardueran hasitako lehen hiruhileko naturalean egindako eragiketen zenbatekoa urtera proiektatuz eginen da.

IV. KAPITULUA. Arau-hauste arinak

71. artikulua. Baliokidetasun errekarguaren erregimenaren barnean dauden subjektu pasiboak.

Baliokidetasun errekarguari buruzko erregimen berezian dauden subjektu pasiboek ez dute Zergari buruzko Foru Legearen 115. artikuluan, 2. zenbakiko 1go atalean, zehazten den arau-hauste arina eginen, baldin eta agindu horrek aipatzen duen jakinarazpena, idazki bidez, Ekonomia eta Ogasun Departamentuari aurkezten badiote.

Lehenbiziko Xedapen Gehigarria. Ihardueraren hasiera deklaratzea.

1993.eko urtarrilaren 1etik hasita, Zenbait Ihardueraren gaineko Kontribuzioaren erregistroetan alta hartzen duten subjektu pasiboek ez dute bete beharko Zergari buruzko Foru Legearen 109. artikuluaren 1. zenbakiko 1go atalak ihardueraren hasieraren gainean ezartzen duen betebeharra, behar den kasuan, aipatu Foru Legearen 57. artikuluak bere 1. zenbakian xedatutakoa galarazi gabe.

Bigarren Xedapen Gehigarria. Baliokidetasun errekarguaren erregimen berezian dauden txikizkako merkatariendako itzulpenak, Balio Erantsiaren gaineko Zergaren tasa murriztuak erregulatzearen ondoriozkoak.

1. 1992.eko abenduaren 31n, Zergari buruzko Foru Legean xedatutakoaren indarrez, tasa murriztuaren arabera tributu eman behar duten ondasunen azken izakinak baldin badituzte, Baliokidetasun errekarguari buruzko erregimen berezian dauden subjektu pasiboek eskuraketan jasan dituzten Balio Erantsiaren gaineko Zergaren eta errekarguaren arteko diferentzia itzultzea eskatu ahal izanen dute, baita aipatu ondasunen emanaldiendako aplikagarri direnak ere, beti ere, 1993.eko urtarrilaren 1etik hasita eta ondorengo baldintzak betez gero:

1go. Subjektu pasiboek 1992.eko abenduaren 31n beren izakinen inbentario bat aurkeztu beharko dute.

2garrena. Itzulpena eskatu deneko ondasun inbentariatuei dagokienean, egiaztatu beharko da eskuraketan Balio Erantsiaren gaineko Zerga eta baliokidetasun errekargua ren erasapena jasan zirela.

2. Horrela zehaztutako itzulketaren diru-kopurutik kenkaria eginen da, hau da, subjektu pasiboak 1992.eko abenduaren 31n dituen azken izakinetan azaltzen diren ondasunengatik sartu beharko lukeen goitiko diferentzia kenduko zaio, beti ere, ondasun horien Balio Erantsiaren gaineko Zerga tasak edo baliokidetasun errekarguak, 1.993.eko urtean eta eskuraketan jasan zituztenaren aldean, gora egin baldin badute.

3. Aipatu Xedapenak aipatzen duen eskaera Foru Dekretu hau argitara eman eta hurrengo hilabetean eginen da.

4. Xedapen honek aurrikusten dituen itzulketak burutzeko, Tributu Administrazioaren organo eskudunek, eskabideen ezaugarriek horretara behartzen dutenean, espediente kolektiboak izapidatzeko baimena eman ahal izanen dute.

5. Itzulketa behin-behinekoa izanen da, Tributu Ikuskatzailetzak geroago egin dezakeen egiaztapena eta ikerketa kontutan hartzen baitira.

Hirugarren Xedapen Gehigarria

Pertsona Fisikoen Errentaren gaineko Zergaren Erregelamendua onesten duen ekainaren 8ko 209/1992 Foru Dekretuaren 1. artikuluaren Lau zenbakia ondotik adierazi bezala azalduko da idatzita, 1993.eko urtarrilaren 1etik hasita:

Lau. Zergari buruzko Foru Legearen 7. artikuluak, bere 1. zenbakiko azken lerroaldean aipatzen dituen salbuespenetan sartutzat emanen dira subjektu pasiboek norberaren mesedetan, osagarri gisa, nabarmenki garrantzirik gabeko zereginetan eta iharduera eteten den egun eta orduetan, bere enpresari edo profesionari iharduera garatzeko eskuratu eta erabili dituen ondasun higiezinak.

Aurreko lerroaldean xedatutakoa ez zaie aplikagarri izanen turismo eta beren atoei, motorrei, aireuntziei edo kirol zein aisiarako untziei, salbuetsiz Balio Erantsiaren gaineko Zergari buruzko Foru Legearen 42. artikuluaren 1. zenbakiaren 1go atalean, a)tik g)ra bitarteko letretan ezarritakoak eta kostubidezko erabileran lagatzeko soilik diren horiek.

Laugarren Xedapen Gehigarria. Nahitaezko betearazpeneko prozedura administratibo eta judizialak.

Nahitaezko betearazpeneko prozedura administratibo eta judizialetan, Zergari buruzko Foru Legearen bigarren xedapen gehigarrian aipatzen diren horietan, enpresaburuak edo profesionalak diren esleipen-hartzaileek honako hau egiteko ahalmena dute, subjektu pasiboaren izenean eta haren kontura, prozedura horietan izaten diren eta zerga haren menpe dauden ondasunen entregei eta zerbitzuen prestazioei dagokienez: eragiketa jasotzen duen faktura egiteko, eta foru lege horren 17. artikuluko 2. idatz-zatian aurreikusitako salbuespenei uko egiteko, hala nahi badute; horrekin batera, ahalmena dute emandako fakturan zergaren kuota jasanarazteko, dagokion likidazio aitorpena aurkezteko eta ateratzen den zergaren zenbatekoa ordaintzeko, baldin eta ondasunen entregen eta zerbitzu emateen hartzailea subjektu pasiboa bera ez bada, Zergari buruzko Foru Legearen 31.1.Bigarrena artikuluan xedatutakoarekin bat.

Prozedura horietan arau hauek aplikatuko dira:

Lehena. Esleipen-hartzailea ahalmen horiez baliatuz gero, hala adierazi beharko dio, idatziz, kasuan kasuko prozedura betetzen ari den organo judizial edo administratiboari, esleipenaren zenbatekoa ordaindu aurretik edo aldi berean.

Jakinarazpen horretan jaso beharko du, hala baldin bada, erregelamendu honen 8. artikuluan ondasun higiezinekin egiten diren eragiketak salbuesteari uko egiteko ezartzen diren baldintzak betetzen dituela eta uko egiten diola.

Esleipen-hartzaileak jakinarazi beharko dio eragiketa horren zergaren subjektu pasiboari edo haren ordezkariei ahalmen horiek erabili dituela, eta organo judizial edo administratiboan aurkeztutako jakinarazpenaren kopia igorriko dio, han aurkeztu eta hurrengo zazpi egunetako epean. Ez da nahitaezkoa izanen kopia igortzea kasuan kasuko ondasun entregan edo zerbitzu ematean esleipen-hartzailea haien subjektu pasiboa denean, Zergari buruzko Foru Legearen 31.1.Bigarrena artikuluan xedatutakoarekin bat.

Esleipen-hartzaileak ahalmena erabiltzen badu, subjektu pasiboak edo haren ordezkariek ezin izanen diete uko egin salbuespenei, Zergari buruzko Foru Legearen 17. artikuluko 2. idatz-zatian aurreikusi bezala, ez eta eragiketa jasotzen duen faktura egin, eragiketa hori beren aitorpen-likidazioetan sartu, eta hark sortutako zergaren diru-sarrera egin ere.

Bigarrena. Eragiketa jasotzen duen faktura Fakturazio betebeharrak arautzen dituen Erregelamenduaren 11. artikuluan (apirilaren 10eko 23/2013 Foru Dekretuaren bidez onetsia) aipatzen den epean eman beharko da, eta sortzapen data esleipenari buruzko dekretua ematen den eguna izanen da.

Faktura hori esleipen-hartzaileak eginen du, eta bertan jasoko du fakturaren emailea betearazpenaren xede diren ondasun edo zerbitzuen subjektu pasibo titularra dela, eta eragiketaren hartzailea esleipen-hartzailea dela.

Faktura horiek zenbakitze sail berezia izanen dute.

Esleipen-hartzaileak fakturaren kopia bat igorriko dio zergaren subjektu pasiboari edo haren ordezkariei, faktura eman eta hurrengo zazpi eguneko epean, baina jatorrizko faktura esleipen-hartzaileak gorde beharko du.

Hirugarrena. Esleipen-hartzaileak eragiketaren kuotaren aitorpena eta diru-sarrera eginen ditu, aldizkako izaera ez duen aitorpen-likidazio bat aurkeztuz, erregelamendu honen 62.8 artikuluan arautzen direnetako bat, hain zuzen.

Esleipen-hartzaileak aitorpen-likidazioaren kopia bat igorriko dio zergaren subjektu pasiboari edo haren ordezkariei, egindako diru-sarrera baliozkotu dela adierazita, diru-sarrera egin eta hurrengo zazpi eguneko epean, baina jatorrizkoa esleipen-hartzaileak gorde beharko du.

Aurrekoa ez da aplikatuko kasuan kasuko ondasun entregan edo zerbitzu ematean esleipen-hartzailea haien subjektu pasiboa denean, Zergari buruzko Foru Legearen 31.1.Bigarrena artikuluan xedatutakoarekin bat.

Laugarrena. Aurreko lehen, bigarren eta hirugarren arauetan aipatzen denari jarraikiz, subjektu pasiboari edo haren ordezkariei ahalmena baliatzeari buruzko jakinarazpena, fakturaren kopia edo aitorpen-likidazioarena igortzea ezinezkoa denean, esleipen-hartzaileari ezin egotz dakiokeen arrazoi batengatik, ezintasun horren berri izan eta ondoko zazpi eguneko epean, Nafarroako Zerga Ogasunari igorri beharko zaizkio agiri horiek, gorabehera hori adierazita.

Bosgarren Xedapen Gehigarria. Administrazioak eginiko eragiketen kontraprestazio diren tasa eta prezioak kudeatu beharra, eragiketa horiek Balio Erantsiaren gaineko Zergari lotuta daudenean.

1. Zerbitzu edo jarduera publikoen kontraprestazio gisa tasak edo prezioak ordaindu behar direnean, ordaindu behar dutenek, horien ordezkoek eta zerbitzu edo jarduera publikoaren titularraren nahiz kontzesiodunaren kontura borondatezko epean zerga biltzeko legezko obligazioa dutenek, eragiketa Balio Erantsiaren gaineko Zergari loturik egonez gero, ondoko eginbehar hauek izanen dituzte:

a) Eragiketa kargatzen duen Balio Erantsiaren gaineko Zergaren zenbatekoa eskatzea tasa ordaindu behar duenari edo zerbitzu zein jardueraren erabiltzaile edo hartzaileari.

b) Zergari buruzko Foru Legearen 34. artikuluan aipatzen den faktura ematea, eragiketa horri buruzkoa, subjektu pasiboaren izenean eta haren kontura. Betebehar hori fakturazio betebeharrak arautzen dituen Erregelamenduan (maiatzaren 17ko 205/2004 Foru Dekretuaren bidez onetsia) ezarritakoaren arabera beteko da. Nolanahi ere, Ekonomia eta Ogasun Departamentuak baimena ematen ahalko du formula erraztuak erabil daitezen betebehar hori betetzeko.

c) Balio Erantsiaren gaineko Zergaren subjektu pasiboari ordaintzea goiko a) letran ezarritakoa aplikatzearen ondorioz hartutako zenbatekoa, tasa edo prezioa ordaintzeko ezarritako eran eta epe berean.

2. Aurreko zenbakian aipatutako kasuetan, zerbitzu edo jardueraren erabiltzaile edo hartzaileak beharturik egonen dira Balio Erantsiaren gaineko Zergaren traslazioa jasatera zenbaki horretan ezarritako moduan.

Seigarren xedapen gehigarria. Aipamenak Esportatzaileen eta beste Eragile Ekonomikoen Erregistroari buruz.

Ulertu behar da Hilabeteko Itzulketen Erregistroari buruzko aipamenak direla zerga-araudian Esportatzaileen eta beste Eragile Ekonomikoen Erregistroari buruz egindako aipamenak (erregelamendu honen 20. artikuluan arautzen da erregistro hori).

Zazpigarren xedapen gehigarria. Itzultzeko epearen zenbaketa.

Balio Erantsiaren gaineko Zergari buruzko abenduaren 30eko 19/1992 Foru Legearen 61. eta 62. artikuluetan xedatutakoaren ondorioetarako, eskatutako zenbatekoa itzultzeko epea zenbatzeari dagokionez, eta interesdunaren aldeko berandutza interesak zenbatzeari dagokionez, ez badira epe barnean aurkezten informazio aitorpenaren erregistro liburuak (erregelamendu honen 20.10 artikulua), ulertuko da itzulketa-prozedura berandutu egin dela Zerga Administrazioari ezin egotzi zaizkion arrazoiengatik.

Zortzigarren xedapen gehigarria. Arau-erreferentzia.

Erregelamendu honetan jasotzen diren “Erkidegoa” eta “Europar Erkidegoa” terminoak “Batasunari” buruzkoak dira; aldiz, “Europako Erkidegoak” edo “EEEkoak”, “Europar Batasunari” buruzkoak eta “erkidegokoa” eta “erkidegokoak” “Batasunari” buruzkoak.

Lehenbiziko Xedapen Iragankorra. Nekazaritza, abeltzaintza eta arrantzari buruzko erregimen bereziari uko egitea.

Erregelamendu honen 22. artikuluaren 2. zenbakian xedatutakoa deuseztatu gabe, nekazaritza, abeltzaintza eta arrantzari buruzko erregimen berezia aplikagarri duten subjektu pasiboek erregimen horri uko egin ahal izanen diote, Foru Dekretu hau argitara eman eta hilabeteko epean, aipatu artikuluan aurrikusi ondorioak izanen dituztelarik.

Bigarren Xedapen Iragankorra. 1993. urtearen aurretik egindako emanaldiak.

Erregelamendu honen 70. artikuluaren 3. zenbakiko 2. atalean xedatutakoak bere ondorioak izan ditzan, 1993.eko ekitaldian salbuetsitako ondasun emanalditzat hartuko dira 1992. urtean beste Estatu elkartekidetara egindako ondasun exportazioak.

Hirugarren Xedapen Iragankorra. Hilabeteko Itzulketen Erregistroa. Ondorioak 2009ko urtarrilaren 1etik aurrera izan behar dituzten izen emateak.

Bakar-bakarrik 2009ko urtarrilaren 1etik aurrera ondorioak izan behar dituzten izen-emateetarako (Hilabeteko Itzulketen Erregistroko izen emateetarako), 2009ko otsailaren 20a arte luzatuko dira erregelamendu honetako 20.4 artikuluko lehenbiziko eta hirugarren paragrafoetan aurreikusitako izen-emateak eskatzeko epe orokorrak.

Laugarren xedapen iragankorra. Esportatzaileen eta beste Eragile Ekonomikoen Erregistroan inskribatutako subjektu pasiboak.

Foru dekretu honek indarra hartzen duen egunean Esportatzaileen eta beste Eragile Ekonomikoen Erregistroan inskribatutako subjektu pasiboak, baldin eta erregelamendu honen 20.3 artikuluan ezarritako beharkizunak betetzen badituzte, salbu manu horren 1. puntuan xedatutakoa, automatikoki Hilabeteko Itzulketen Erregistro berrian izena emanik geldituko dira ondorio guztietarako, non ez duten baja eskatzen hirugarren xedapen gehigarrian ezarritako epean.

Bosgarren xedapen iragankorra. Zenbait zerga-zorretarako konpentsazio sistema.

Galarazi gabe seigarren xedapen gehigarrian ezarritakoa, 2009. urteko likidazioaldietarako subjektu pasiboek erabiltzen ahalko dute abenduaren 30eko 276/2002 Foru Dekretuan ezarritako konpentsazio sistema (abenduaren 30eko 276/2002 Foru Dekretua, ordainen bidez zergen arloko zor batzuk kitatzeko sistema arautzen duena) baldin eta Esportatzaileen eta beste Eragile Ekonomikoen Erregistroan inskribatuta badaude iraungitzen den unean eta, gainera, Hilabeteko Itzulketen Erregistroan izena emanik gelditzen badira etenik gabe.

Seigarren xedapen iragankorra. 2010. eta 2011. urteetan Batasunaren barruko eragiketen aitorpen laburtua aurkezteko muga, balio erantsiaren gaineko zergaren ondorioetarako.

Erregelamendu honen 70. artikuluaren 3. zenbakiko 2. idatz-zatian aipatu den muga 100.000 eurokoa izanen da 2010. eta 2011. urteetako aitorpen laburtuei dagokienez.

Xedapen Derogatzaile Bakarra

Foru Dekretu honek indarra hartu orduko indarrik gabe geldituko dira bertan aurrikusitakoaren aurka jotzen duten lerrun bereko edo txikiagoko xedapen guztiak.

Azken Xedapen Bakarra

Foru Dekretu honek 1993.eko urtarrilaren 1etik hasita hartuko du indarra.

 

Jar zaitez gurekin harremanetan | Erabilerraztasuna | Lege abisua | Webaren mapa