navarra.es

Castellano | Euskara | Français | English

Bilatzaile erabili!

20/1992 Foru Legea, abenduaren 30ekoa, Zerga Bereziei buruzkoa

(Testu bateratua. Jatorrizkoa 1992ko 158. NAOn argitaratua, abenduaren 31n. Aldaketak: 3/2010 Legegintzako Foru Dekretua, apirilaren 12koa; 606/1995 Foru Dekretua, abenduaren 29koa; 5/2004 Foru Dekretua, urtarrilaren 12koa; 20/2011 Foru Legea, abenduaren 28koa; 5/2005 Foru Dekretua, urtarrilaren 17koa; 4/2003 Foru Dekretua, urtarrilaren 13koa; 1/2005 Legegintzako Foru Dekretua, urriaren 3koa; 2/2011 Legegintzako Foru Dekretua, urtarrilaren 24koa; 1/2009 Legegintzako Foru Dekretua, urtarrilaren 12koa; 1/2008 Legegintzako Foru Dekretua, urtarrilaren 14koa; 2/2009 Legegintzako Foru Dekretua, azaroaren 23koa; 2/2001 Foru legea, otsailaren 13koa; 22/2008 Foru Legea, abenduaren 24koa; 95/1997 Foru Dekretua, apirilaren 7koa; 2/2007 Legegintzako Foru Dekretua, urtarrilaren 22koa; 304/1997 Foru Dekretua, urriaren 23koa; 13/2000 Foru Legea, abenduaren 14koa; 3/2002 Foru Legea, martxoaren 14koa; 2/2013 Legegintzako Foru Dekretua, otsailaren 13koa; 3/2013 Legegintzako Foru Dekretua, uztailaren 17koa; 2/2014 Legegintzako Foru Dekretua, otsailaren 12koa; 1/2015 Legegintzako Foru Dekretua, urtarrilaren 14koa)

Atarikoa

Foru Komunitatearen eremuan Zerga Berezien arauketa abenduaren 23ko 25/1985 Foru Legearen bidez burutu zen, zeharkako ezarpenaren berriztapenaren muga barrenean. Horren indarraldiak 1986.eko urtarrilaren 1ean izan zuen hasiera.

Zeharkako zergak Europako Ekonomia Elkartearen egoera berriari nahitaez egokitu beharra era bateratuan burutu beste biderik ez dago iharduera ekonomikoan okerrik sor ez dadin. Hori zutela xede, hain zuzen ere, onetsi ziren 92/12/EEE, 92/83/EEE eta 92/84/EEE Artezpideak, zerga berezipeko produktuen erregimen orokor, edukitze, ekar-eramate eta kontrolari eta zerga moten armonizazioari buruzkoak.

Foru Legeak, I. Tituluan, alkohol eta edari alkoholdunak egiteagatiko zerga bereziak arautzen ditu. Tributu horiek, beraien eremu objektiboan zehaztutako ondasunen kontsumoaren gaineko zeharkako zerga gisa eratu dira eta haien fabrikazioa kargatzen dute, aldi bakarrean.

Ondasunak etendura erregimenean egon daitezke egin diren lantegitik edo bilduak dauden zerga gordailutik ateratzen ez diren bitartean, bai eta lantegi edo zerga biltegi arteko garraioak dirauen aldartean. Etendura erregimen honek, zergagaia burutu eta hura kontsumorako jartzearen arteko denbora desfasea dela eta finantza kostuak sortzeko ahalbidea galerazten du. Zergaren sortzapena etendura erregimena amaitzean gertatuko da, barne aplikazio lurraldearen eremu barrenean, edo beste estaturen batean zerga ordaindu duten produktuak jasotzean. Behar diren zergak ordaindu direla egiaztatu gabe aipatu produktuak, norberak bere kontsumorako dituenak salbu, zirkuito horietatik at ekar-eramatea edo edukitzea, zerga arau-haustetzat hartuko da.

Subjektu pasiboek zerga nahitaez oihartzundu beharrak, lortu nahi den emaitza sortzen du, hots, karga, finean, kontsumitzaileak eramatea.

Agian, gai honen inguruan berritasunik handiena, emandako Artezpide armonizatzaileak direla medio bi zerga berezi hauek sartzea izan da: Ardoa eta Edari Legamiatuen gaineko Zerga eta Tarteko Produktuen gaineko Zerga.

Lehenbizikoari dagokionez, zeroko zerga tasa ezarri dela adierazi behar da eta, hortaz, zerga, baliabide bat jartzea da, ez besterik, ardo eta beste edari legamiatuen ekoizleei Elkarte barneko zirkulazio sistemaren erabilera ahalbideratzeko jomugarekin.

Garagardoaren gaineko zergan beste epigrafe bat sartu da, tasa tipitua duena oso, alkohol gutxi duen garagardoari dagokiona.

Foru Legearen II. Tituluak Garraio baliabide jakinen gaineko Zerga Berezia arautzen du.

Zerga honen iturburua, hatsean, Balio Erantsiaren Gaineko Zergaren armonizazioan bilatu behar da, egunarteko tasa gehitua ezabatzen duena. Ibilgailu eta garraio baliabide delako tasa gehituaren menean egotea ez zen solik haiek erostean adierazitako zergak ordaintzeko ahalmenaren kargaren fruitu, baizik eta haien erabilerak osasun, azpiegitura eta ingurugiroaren eremuetan sortzen zituen gizarte kostu berariazkoak ere kontutan hartzearen emaitza. Horra, bada, zerga eredu multzo bat egituratzeko beharraren abiapuntua, Elkartearen zehaztapenen barrenean, garraio baliabide hauen gainen zerga presioa mantendu ahal izateko, egungoen baliakide izan daitezkeen mailetan.

Honela sortua da Garraio baliabide jakinen batzuen gaineko Zerga Berezia, ezaugarri nagusitzat kudeatzeko erraztasuna duena, haren autolikidazioa garraio baliabideen lehenbiziko matrikulatzearekin lotua baitago eta zergaoinarriaren ezarpena, berriz, Balio Erantsiaren gaineko Zergarekin eta "inter vivos" eta "mortis causa" ondare eskualdaketen gaineko zergekin.

Zergaren egitura eratzerakoan egungo egoerarekin gonbaratuz gero ezberdintasun nagusia honetan datza: Orain arte Balio Erantsiaren gaineko Zerga kendu zitekeen enpresa egoeren kontsiderazioan, eta, beste zentzu batean, "jeep" motako ibilgailuek zuten mozkinen ezabaketan, bere erabileran gertatu den aldaketa sakona dela medio, izan ere, ingurugiroan eragin gogorra duen kotxe arrunt gisa erabiltzeko joera baitago. Dena den, behin-behineko denbora tartea aurrikusi da, Foru Legeak ezartzen duen egoerara egokitu ahal izateko.

HASIERAKO TITULUA. Erregimen juridikoa, izaera eta aplikazio eremua

1. artikulua. Erregimen juridikoa.

Zerga bereziak Foru Komunitateak eskatuko ditu Nafarroako Foru Eraentza Birrezarri eta Hobetzeari buruzko abuztuaren 10eko 13/1982 Lege Organikoaren 45. artikuluak aipatutako Hitzarmen Ekonomikoaren, Foru Lege horretan xedatutakoaren, hori garatzeko eman erregelamenduzko arauen eta aplikagarri diren beste xedapenen arabera.

2. artikulua. Zerga berezien izaera.

1. Zerga bereziak zeharkako izaera duten zergak dira, berariazko kontsumoen gainean ezartzen direnak. Barne lurraldearen eremuan ondasun zehatz batzuk ekoiztea, inportatzea eta, kasu bada, sartzea, kargatzen dute, bai eta garrai baliabide batzu matrikulatzea ere, Foru Lege honen arauei jarraikiz.

2. Zerga berezitzat hartuko dira, fabrikazioaren gaineko zerga bereziak eta zenbait garraiobideren gaineko Zerga Berezia.

3. artikulua. Aplikazio eremua.

Foru Komunitateari dagokio, Hitzarmen Ekonomikoan ezarritako irizpideen arabera, zerga berezien ordainerazpena.

I. TITULUA. FABRIKAZIOAREN GAINEKO ZERGA BEREZIAK

I. KAPITULUA. Xedapen orokorrak

4. artikulua. Fabrikazioaren gaineko zerga bereziak.

Holakotzat hartuko dira alkohol eta edari alkoholdunen gaineko zerga berezi hauek:

a) Garagardoaren gaineko Zerga.

b) Ardo eta Edari Legamiatuen gaineko Zerga.

c) Tarteko Produktuen gaineko Zerga.

d) Alkohol eta Edari Alkoholdunen gaineko Zerga.

5. artikulua. Zergagaia.

1. Aurreko artikuluan aipatutako zerga berezien xedeko produktuak Batasunaren lurraldearen barrenean fabrikatzea eta inportatzea zerga berezi horiei lotuta dago.

2. Aurreko zenbakian xedatutakoa aplikagarri izanen da Hitzarmen Ekonomikoaren barreneko armonizazio irizpideen arabera.

3. Aurreko zenbakietan ezarritakoa, Foru Lege honen 36. artikuluan xedatutakoaren kaltetan izan gabe ulertuko da.

6. artikulua. Zergari atxikitzen ez zaizkion kasuak.

Fabrikazio kontzeptua dela eta, ez zaizkio zergari atxikiko:

1. Fabrikazioaren gaineko zerga berezien xede diren produktuei berezko izaera dela eta sortutako galerak, etendura erregimenean gertatuak, fabrikazio, eraldaketa, biltegiratze eta garraio lanak dirauten bitartean, beti ere, zehaztutako portzentaiak gainditu ez eta horretarako ezarri baldintzak betetzen badira, erregelamenduzko arauek xedatzen dutenaren arabera.

2. Fabrikazioaren gaineko zerga berezien xede diren produktuei sortutako galerak, etendura erregimenean gertatuak, ustegabeko edo ezinbesteko kasuetan, arau bidez ezarritako portzentaiak gainditzen ez badituzte, edo, gaindituz gero, horiek badirela frogatu baldin bada zergen ardura duen Administrazioaren aurrean, Zuzenbidean onartzen den edozein baliabide erabiliz.

3. Fabrikazioaren gaineko zerga berezien xedeko produktuak erabat suntsitzea edo erremediorik gabe galtzea suntsiketa edo galera hori gertatu den estatukideko agintari eskudunen baimenaren ondorioz, betiere produktuak etendura araubidean baldin badaude.

Produktuak erabat suntsitu direla edo erremediorik gabe galdu direla ondorioztatuko da zerga bereziei lotutako produktu gisa erabili ezin badira eta hori frogatzen bada gertatu edo antzeman den estatukideko agintari eskudunak gogobetetzeko moduan.

7. artikulua. Sorrarazpena.

36. artikuluan ezarritakoa galarazi gabe, zerga sorraraziko da:

1. Fabrikazio kasuetan, fabrikazioaren gaineko zerga berezien xedeko produktuak fabrikatik edo biltegi fiskaletik ateratzen diren unean edo haien autokontsumoa egiten den unean. Dena dela, produktu horiek fabrikatik edo biltegi fiskaletik ateratzeko kasuetan, etendura araubidea aplikatuko da helburua hauetako bat baldin bada:

a) Beste fabrika edo biltegi fiskal batera zuzenean bidaltzen badira, zuzeneko entrega baterako badira, erregistraturik dagoen hartzaile batentzat badira edo esportaziorako badira.

b) Fabrikazioaren gaineko zerga berezien xede ez diren produktuak fabrikatzeko badira, gero esportatzeko, betiere erregelamenduz ezartzen diren baldintzak betetzen badira.

c) Kontseiluaren 2008ko abenduaren 16ko 2008/118/EK Zuzentarauaren 17.1 artikuluko a) letraren iv) idatz-zatian aipatzen diren hartzaileeetako batentzat badira. Zuzentarau hori zerga berezien araubide orokorrari buruzkoa da, eta haren bidez 92/12/EEE Zuzentaraua indargabetu zen.

2. Erregistraturik dagoen hartzaile batentzako bidalketetan, horrek produktuak destinoko tokian jasotzen dituen unean.

3. Zuzeneko entregetan, zerga sorraraziko da zergari lotutako produktuak zuzenean entregatzeko tokian jasotzen direnean.

4. Fabrikazioaren gaineko zerga berezien xedeko produktuak etendura araubidean zirkulatzen edo edukitzen diren kasuetan, zerga ez ordaintzea dakarten galerak ez, beste batzuk gertatzen diren unean, edo noiz gertatu diren jakiterik ez badago, galera horiek egiaztatzen diren unean.

5. Urrutiko salmenten kasuetan, produktuak hartzaileari entregatzen zaizkion unean.

6. Baimendurik dagoen jasotzaile batentzako bidalketetan, jasotzaileak produktuak destinoko tokian jasotzen dituen unean.

7. Etendura araubideko zirkulazioan irregulartasunik baldin badago, zirkulazioa hasi zen egunean, salbu eta irregulartasuna noiz gertatu zen frogatzen bada. Kasu horretan, orduantxe sorraraziko da zerga.

8. Fabrikazioaren zerga bereziei lotutako produktuen Batasunaren barreneko zirkulazioan irregulartasunik gertatzen bada, eta zerga beste estatukide batean sorrarazten bada, irregulartasuna gertatzen den unean, eta, noiz gertatu den jakiterik ez badago, haren berri jakiten den unean.

9. Fabrikazioaren gaineko zerga berezien xedeko produktuen zirkulazioan destinoa justifikatzen ez bada edo bidegabeko erabilera egin bada, eta produktu horien destinoa dela-eta salbuespen bat edo tasa murriztu bat aplikatu bada, produktuak jasotzeko ahalmena duen hartzaileari entregatzen zaizkion unean, salbu eta bidegabeko erabilera egin den eguna modu frogagarrian frogatzen bada. Horrela eginez gero, orduantxe sorraraziko da zerga.

Produktu horiek jasotzeko ahalmenik ez duen hartzaile bati ematen bazaizkio, zirkulazioa hasi zen unean.

10. Foru lege honen 8. artikuluko 8. zenbakian aipatutako kasuetan, aurreko zenbakietan ezarritakoaren arabera dagokion unean sorraraziko da zerga; une hori ezagutzen ez bada, tributudunak produktuak erosten dituen egunean edo horiek edukitzen hasten den egunean, eta hori ere ezagutzen ez bada, horren berri jakiten denean.

11. Artikulu honetako 1. zenbakian ezarritakoa gorabehera, etendura araubidea aplikatu gabe fabrikatik edo biltegi fiskaletik ateratzen diren produktu guztiak edo zati bat hartzaileari entregatzea ezinezkoa izan bada, eta hori baimena duen igorleari leporatu ezin zaizkion arrazoiengatik izan bada, produktuak atera zireneko establezimenduetan sartzen ahalko dira berriz, betiere erregelamenduz ezartzen diren baldintzak betez gero. Horrelakoetan, irteera dela-eta zerga ez zela sorrarazi ondorioztatuko da.

12. Zerga Bereziei buruzko abenduaren 28ko 38/1992 Legearen 50.ter artikuluak aipatzen duen hidrokarburoen gaineko zergaren tasa autonomikoaren aplikazioari dagokionez, zergaren sorrarazpena honako arauei jarraikiz gertatuko da:

a) Oro har, zerga-tasa autonomikoa aplikatzeko, zergaren sorrarazpena artikulu honen aurreko idatz-zatietan eta 38/1992 Legearen 50.ter artikuluaren 2. idatz-zatian adierazitako arauei jarraikiz eginen da.

b) Produktuak etendura-araubidetik kanpo baldin badaude autonomia erkidego baten lurraldean, eta beste autonomia erkidego baten lurraldera berbidaltzen direnean, orduan sorraraziko da zerga, zerga-tasa autonomiko horri dagokionez soilik, produktuak dauden establezimendutik ateratzen direnean beste erkidego baten lurralderantz. Lerroalde honetan aurreikusitakoa aplikatzeko, arau hauek kontuan hartuko dira:

Lehena. Aplikatu beharreko zerga-tasa autonomikoa destinoko autonomia erkidegoak ezarritakoa izanen da.

Bigarrena. Destinoko autonomia erkidegoak zerga-tasa autonomikorik ezarririk ez badu, ulertuko da sorrarazpenari aplikatu beharreko zerga-tasa autonomikoa zero dela.

Hirugarrena. b) letra honetan ezarritakoarekin bat sorrarazten diren kuoten erregularizazioa, aurretik sortutakoen aldean, 38/1992 Legearen 50.ter artikuluaren 3. idatz-zatian aurreikusitakoarekin bat eginen da.

Ez da zerga-tasa autonomikoaren sorrarazpenik gertatuko jatorriko autonomia erkidegoak eta destinokoak halakorik ezarri ez badute.

13.

Artikulu honen aurreko zenbakietan ezarritakoa gorabehera, fabrika edo biltegi fiskaltzat hartzen diren instalazioetatik ateratzen den gas naturala hartaz hornitzeko kostubidezko kontratu baten barrenean gertatzen denean, fakturazio aldi bakoitzeko gas naturalaren hornidurari dagokion prezioaren zatia eskatu daitekeenean sorraraziko da hidrokarburoen gaineko zerga. Aurrekoa ez da aplikatuko gas naturala beste fabrika, gordailu fiskal edo hartzaile erregistratu batera igortzen denean, ezta hornidura hodi finkoez ez beste baliabide batzuen bitartez egiten denean ere.

Artikulu honen 1. zenbakian aurreikusitakoa aplikatzeko, aurreko lerroaldean aipatzen diren gas naturalaren horniduraz beste batzuetarako, gehienez ere hirurogei egunez jarraian gas naturalez egindako hornidura guztia epe hori amaitu eta hurrengo hilabete naturaleko lehen egunean fabrika edo biltegi fiskaletik atera dela ondorioztatu dezakete subjektu pasiboek

.

8. artikulua. Tributudunak.

1. Foru lege honen ondorioetarako, tributudunak dira foru lege honen bidez tributu arloko betebeharrak ezartzen zaizkien pertsona fisiko edo juridikoak eta entitateak.

2. Tributudun gisa, hauek dira subjektu pasiboak:

a) Baimena duten gordailuzainak, zergaren sorrarazpena fabrika batetik edo biltegi fiskal batetik ateratzearekin batera gertatzen denean edo autokontsumorako produktuak direnean.

b) Hartzaile erregistratuak, produktuak jasotakoan sorrarazten den zergari dagokionez.

c) Baimena duten jasotzaileak, haientzat diren produktuak jasotzea dela-eta sorrarazten den zergari dagokionez.

d) Baimena duten gordailuzainak eta hartzaile erregistratuak, zuzeneko entregetan.

e) 7. artikuluaren 12.b) zenbakian aurreikusitako kasuetan, produktuak dauden autonomia erkidegotik beste baten lurraldera berbidaltzen direnean, produktu horiek zein establezimendutatik bidaltzen diren, horren titularrak.

3. Subjektu pasibo dira, tributudunen ordezko gisa, Zerga Bereziei buruzko 38/1992 Legearen 4. artikuluko 28. idatz-zatian aipatzen diren ordezkari fiskalak.

Halaber, subjektu pasibo dira, tributudunen ordezko gisa, foru lege honen 7. artikuluko 13. zenbakian, lehen lerroaldean, aurreikusitako kasuan gas naturalaren hornidurak kostu bidez egiten dituztenak.

4. Gordailuzain baimenduak behartuta daude tributu zorra ordaintzera, edozein estatukidetara etendura araubidean bidalitako produktuei dagokienez, hartzaileak produktuak jasotzen ez baditu. Horretarako, berme bat jarri beharko dute (erregelamenduz ezarriko da horren zenbatekoa eta egiteko modua), Europako Erkidego osoan balioa izanen duena. Era berean, beste estatukide batzuetako tributudunek, behar den bermea beren estatuan jarri badute, Batasunaren barreneko zirkulazioak egiten direnean beren barne lurralde eremuan gertatzen diren irregulartasunei dagokien tributu zorra Espainian ordaindu beharko dute, haiek bidalitako ondasunei dagokienez.

Gordailuzain baimenduak eta garraiolariak adostu baldin badute idatz-zati honetan arautzen den erantzukizuna konpartitzea, tributu administrazioak garraiolariarengana jotzen ahalko du, erantzule solidario gisa.

Hartzaileak produktuak jaso dituela edo esportazioa egin dela frogatu ondoren, erantzukizuna bukatuko da.

5. Foru lege honen 17. artikuluan aipatzen diren irregulartasun kasuetan, zergaren ordainketaren erantzule solidarioak izanen dira ordainketa bermatu beharra duten pertsona fisiko edo juridikoak eta entitateak, irregulartasunak izan dituen Batasunaren barreneko zirkulazio motaren arabera.

6. Irregulartasuna gertatu bada fabrikazioaren gaineko zerga berezien xedeko produktuen zirkulazioan edo haiei emandako erabileraren edo destinoaren justifikazioan, eta produktu horien destinoa dela-eta zerga salbuespenen batez edo tasa murriztu batez baliatu baldin badira, zerga eta jar daitezkeen zehapenak ordaintzera behartuak egonen dira bidaltzaileak, harik eta produktuak jasotzeko ahalmena duen hartzaileak produktuak jaso dituela justifikatu arte; jaso ondoren, ordaindu beharra hartzaileek izanen dute.

7. Tributu zorra ordaindu beharra izanen dute fabrikazioaren gaineko zerga berezien xedeko produktuak eduki, erabili, merkaturatu edo garraiatzen dituztenek, foru lege honen 16. artikuluan aurreikusitako kasuetatik kanpora, zerga horiek Espainian ordaindu direla frogatzen ez badute.

8. Bidaltzaile erregistratuak behartuta daude tributu zorra ordaintzera, etendura araubidean bidalitako produktuei dagokienez, hartzaileak produktuak jasotzen ez baditu. Hartzaileak produktuak hartu dituela edo esportazioa egin dela frogatu ondoren, erantzukizuna bukatuko da.

 9. artikulua. Salbuespenak.

1. Foru Lege honen 21 eta 38. artiluetan ezarritakoa galerazi gabe, salbuetsirik egonen da, araubidez ezarritako baldintzetan, fabrikazioaren gaineko zerga berezien xede diren produktuen fabrikazioa, haiek honako hauetarako badira:

a) Harreman diplomatiko edo kontsularren barrenean entregatzeko.

b) Nazioarteko erakundeetarako, Espainian izaera hori aitortzen bazaie, eta haien kideei, egoitz akordioetan edo aipatu erakundeak eratzeko nazioarteko hitzarmenetan zehaztutako muga eta baldintzen barrenean.

c) Espainia ez den Ipar Atlantikoko Tratatuaren Erakundeko edozein Estaturen armadarako, edo indar horiek erabiltzeko 90/6407/EEE Erabakiaren 1. artikuluak aipaturiko armadetarako, bai eta horien zerbitzuko langileentzako edota esandakoen jantoki eta ostatuak hornitzeko.

d) Kontsumorako, beste Estatuekin edo nazioarteko erakundeekin sinatutako akordioen muga barrenean, beti ere aipatu akordioak Balio Erantsiaren gaineko Zergaren gaian salbuespenik onartu edo baimentzen badu.

e) Beti ere aisialdirako nabegazio pribatua alde batera utzirik, honako itsasontzi hauetarako:

1go. Nazioarteko itsasketa egiten dutenak.

2garren. Itsas salbamendu edo laguntzarekin loturik daudenak, untzi barneko hornigaiak eskuratzea ezik, itsasketa, pausalekurik gabe, berrogeita zortzi ordu baino luzeagoa ez denean.

f) Airetiko Aisialdirako nabegazio pribatua ez den airetiko nabegazioa egiten duten hegazkinen hornidurarako.

2. Araubidez ezarri ahalko da aurreko zenbakiak aipatzen dituen salbuespenak, aldezaurretik ordaindutako zergen itzulketaren bidez eman daitezela, bai eta itzultzeko kuota eskuratze prezioaren portzentaia gisa ezarri dadila, lehenagoko aldietan aipatu prezio eta kuotek lorturiko balioen arabera.

10. artikulua. Itzulketak.

1. Foru Lege honen 9, 17, 22, 36 eta 39. artikuluetan ezarritakoa galerazi gabe, Nafarroako Ogasun Publikoan fabrikazioaren gaineko zerga berezien kuoten gainean eginiko dirusarrerak hark itzul diezazkien eskubidea izanen dute, araubidez ezarritako baldintzetan:

a) Zerga horien xede diren produktuen esportatzaileek edo, taiu horretakoak ez badira ere, bere barnean aipatu haien gisakoak biltzen dituztenek, esportaturiko produktuei dagozkien kuotak aldezaurretik ordaindu dituztelako.

b) Zerga horien xede izan ez eta horrelakorik biltzen ere ez duten produktuen esportatzaileek, baldin haiek ekoizteko, zuzenean edo zeharka, aipatu zergen xede diren produktuak erabili badituzte, esportatutako produktuei dagozkien kuotak aldezaurretik ordaindu direla frogatuz gero, zein oihartzundurik, zein erabilitako produktoei atxikiak daudenak. Ez dute inola ere itzultzeko eskubiderik sortuko erregai edo errekin gisa erabilitako produktuek.

c) Fabrikazioaren gaineko zerga berezien xede diren produktuak sartu dituzten enpresariek, baldin horien gaineko zerga barne lurralde eremuan, zerga biltegi batean, sortu eta guzti horren helburua, berriz, direlako produktuak Europako Elkarte Ekonomikoko beste Estatu Elkartekide batera igortzea bada. Itzulketak, sartutako produktuei dagozkien kuotak bilduko ditu eta haiek jaso behar diren Estatuan egiazki hartu direnaren baldintzapean egonen dira, etendura erregimenean Elkarte barneko zirkulazioa arautzen duten arauei jarraikiz.

d) Fabrikazioaren gaineko zerga berezien xede diren produktuak igortzen dituzten enpresariek, baldin horien gaineko zerga barne lurralde eremuan sortu eta Europako Elkarte Ekonomikoko beste Estatu batean helbidea finkatua duten baimendutako hartzaileei aipatu produktuak eskutaratzen badizkiete. Itzulketak, igorritako produktuei dagozkien kuotak bilduko ditu eta haiek jaso behar diren Estatuan zerga ordaindu izanaren baldintzapean egonen dira.

e) Fabrikazioaren gaineko zerga berezien xede diren produktuak, beraiek edo bere gain hartuta, igorri edo garraiatzen dituzten enpresariek, baldin horien gaineko zerga barne lurralde eremuan sortu eta Europako Elkarte Ekonomikoko beste Estatu batean helbidea finkatua duten hartzaileei aipatu produktuak bidaltzen badizkiete, urruneko salmentako Elkarte barneko zirkulazio sistemaren esparruan. Itzulketak, igorri eta garraiaturiko produktuei dagozkien kuotak bilduko ditu eta haiek jaso behar diren Estatuan zerga ordaindu izanaren baldintzapean egonen dira. Produktuak lantegi edo zerga biltegiren batetik igorriz gero, itzulketa araubidez ezarritako konpentsazio automatikoko prozedura erraztuaren bidez burutu ahalko da.

2. Lege honek aitortzen dituen itzulketa kasu guztietan, itzultzen diren kuota guzien zenbatekoa, jasandako kuotenen adinakoa izanen da. Halere, zenbatekoa ezin bada zehatz-mehatz atera, kuotak zehaztuko dira itzultzeko eskubidea sortzen duen eragiketa egin baino hiru hilabete lehenago indarra zuen tasa aplikatuz.

3. Foru Lege honek aurrikusten dituen kasu orotan Zergaren itzulketa behin-behinekoz baimendu ahalko da. Behin-behineko likidazioak behin betiko bihurtuko dira Ikuskaritzak eginiko probaketa dela medio, edota, itzultzeko eskubidea sortzen duen eragiketa egin eta bost urteko epean haiek ikuskatu ez badira.

11. artikulua. Etendura araubidea azkentzea.

Etendura araubidea honako kasuotan azkenduko da, betiere erregelamenduz ezartzen diren baldintzak betetzen badira:

a) Zerga sorrarazten duen edozein kasutan.

b) Produktuak esportatzen direnean.

12. artikulua. Oinarriak zehaztea.

1. Foru Lege honen 36. artikuluan ezarritakoa galerazi gabe, zergaoinarriak zenbatezpen zuzeneko erregimena erabiliz zehaztuko dira.

2. Zergaoinarrien zeharkako zenbatespena legeek aurrikusitako kasuetan izanen da aplikagarri.

13. artikulua. Zerga tasak.

1. Zerga tasa aplikagarriak sortzapenaren unean indarra dutenak izanen dira.

2. Aurreko zenbakian xedatutakoa gorabehera, foru lege honen 17.A).2 artikuluan aipatzen diren kasuetan, tasa aplikagarria produktuak bidaltzen direnean indarra duena izanen da.

14. artikulua. Oihartzuna.

1. Subjektu pasiboek jasanarazi beharko diete sorrarazitako kuoten zenbatekoa fabrikazioaren gaineko zerga berezien xedeko produktuak eskuratzen dituztenei, eta horiek behartuta daude haiek jasatera.

Zerga Berezien Araubide Erkidea ezartzen duen Legearen 50.4 artikuluan ezarritako moduan egiten diren gas naturaleko horniduretan, sorrarazitako kuoten zenbatekoa elektrizitatea eta energia termiko erabilgarria batera sortzen dituzten zentralen titularrek jakinarazitako behin behineko portzentajearen arabera jasanarazi duten subjektu pasiboek, jasanarazitako kuoten zenbatekoa gas naturalaren xedeko behin betiko portzentajearen arabera erregularizatu behako dute, hori jakin ondoren, erregelamendu bidez finkatzen den prozedurari jarraikiz.

2. Etendura erregimeneko ekoizpen, eraldaketa eta biltegiratzea beste baten kontuaren gain eginez gero, eragiketa noren alde egiten duen, hari oihartzundu beharko dio sortutako kuoten zenbatekoa.

3. Zerga-oinarrien zeharkako zenbatespenen eta ikuskatzailetzaren akten emaitza diren likidazio kasuetan ez da bidezkoa izanen kuoten oihartzuna.

4. Fabrikazioaren gaineko zerga berezien subjektu pasiboek, dagozkien tributu kuotak sartu badituzte, tributu kredituak kobratzeko lehentasunean eta ondasunak eta eskubideak eskualdatzeko afektazioan Ogasun Publikoari aitortzen zaizkion eskubide eta berme berberak izanen dituzte, tributu kuota horien eragina jasatera behartuta dauden tributudunen aurrean eta mugaeguna pasa duten eta tributudun horiek pagatu ez dituzten kredituetan sartutako kuoten zenbatekoaz.

15. artikulua. Fabrikazioa, eraldaketa eta edukitzea.

1. Fabrikazioaren gaineko zerga berezien xede diren produktuak fabriketan ekoiztuko dira, etendura erregimenean.

2. Aurreko zenbakian ezarritakoa galerazi gabe, zerga biltegietan desnaturalizazio edo trazatzaile edo markatzaileen gehikuntza eragiketak burutu ahalko dira, bai eta araubidez ezartzen diren beste eraldaketarako eragiketak.

3. Aurreko zenbakietan ezarritakoa galerazi gabe, Foru Lege honen ondorioetarako fabrikaziotzat hartu gabe fabrika eta zerga biltegietatik kanpo egin ahalko dira Zerga sortu duten fabrikazioaren gaineko zerga berezien xede diren produktuen eraldaketa eragiketak. Kasu honetan, erabilitako produktuei dagozkien kuotek ez dute ateratako produktuari legokiokeena baino ttikiagoak izan behar.

4. Fabrikazioaren gaineko zerga berezien xede diren produktuen fabrikazio, eraldaketa, eskuzketa, biltegiratze edo salmenta bai eta horiek burutzen diren lekuak, erabatean ikuskatu ahal dira.

5. 10.1.c), 22.c) eta 36.3 artikuluetan ezarritakoa deusetan ukatu gabe, eta deusetan ukatu gabe gordailuzain baimendu bidaltzailerenak ez diren arrazoiengatik hartzaileari eman ezin izan zaizkion gaiak establezimenduan berriz sartzen diren kasuak eta salbuespena aplikatzen zaien gaiak dauden establezimenduaren jarduerari bukaera ematen zaien kasuak, ez zaie lantegietan eta gordailu fiskaletan sartzen utziko Fabrikazio Zerga Berezien peko gaiei, lehendik zorra sorrarazi baldin badute.

6. Foru Lege honen ondorioetarako, fabrika eta biltegietan araubidez ezarritako portzentaiekiko beheitiko diferentziak, nahiz lehengaietan, nahiz bukaturiko produktuetan, fabrika edo zerga biltegian gauzatu eta handik ateratako produktutzat edo bertan autokontsumitutakotzat hartuko dira, besterik frogatzen ez den bitartean.

7. Fabrikazio Zerga Berezien peko gaiak merkataritzaren xedeetarako garraiatzea eta edukitzea arauz ezarritako frogabide berriek babestuta egonen da. Frogabide horiek zera egiaztatuko dute: zerga Espainian ordaindu dela eta supentsio garaian dagoela salbuespenen batengatik edo zerga sortzen duen Europa barreneko edo Espainiako zirkulazio sistemaren batengatik, betiere foru lege honetako 40. artikuluko 3. zenbakian ezarritakoa deusetan ukatu gabe.

8. Artikulu honen 7. zenbakiak eta 16. artikuluaren 1. zenbakiak aipatzen dituzten produktuek merkataritzarako helburua dutela zehazteko, kontutan hartuko dira, besteen artean, xehetasun hauek:

a) Merkataritza estatutua eta produktuen edukitzailearen zergatiak.

b) Aipatu produktuak dauden lekua eta erabilitako garraio modua.

c) Produktu horiei buruzko edozein agiri.

d) Produktuen izaera.

e) Produktu kopurua.

9. Aurreko zenbakiaren e) letra aplikatzeko, produktuak merkataritzarako direla joko da, besterik ez bada, ondoko kopuruak gainditzen badituzte:

1go. Edari alkoholdunak, .

2garren. Tarteko produktuak, .

3garren. Ardoak eta edari legamiatuak, .

4garren. Garagardoak, .

10. Hartzeko lekua dela eta zerga tasa murriztua edo salbuespenen bat aplikatu zaien fabrikazioaren gaineko zerga berezien xede diren produktuen destinoa edo erabilera justifikatzen ez bada, aipatu produktuak Foru Lege honek zerga hobariak ezartzen dituen ez beste helburu batzuetarako erabili direla joko da.

16. artikulua. Batasunaren barreneko zirkulazioa.

1. Fabrikazioaren gaineko zerga berezien xedeko produktuak, partikularrek Batasunaren lurraldeko beste estatukide batean eskuratuak, indarreko zerga estatu hartan ordaindu baldin bada, produktuak norberaren beharrak asetzeko erosi badira eta norberak garraiatu baditu, ez dira barreneko lurralde eremuan indarra duen zergari lotuta egonen, eta haien zirkulazioak eta edukitzak ez du inolako baldintzarik izanen, betiere merkataritzako helburuetarako erabiltzen ez badira.

2. Zerga berezien xedeko produktuak barneko lurralde eremuan garraiatu bitartean erabat suntsitzen badira edo erremediorik gabe galtzen badira etendura araubidetik kanpoko Batasunaren barreneko zirkulazio prozedura batean, eta zirkulazio prozedura hori barnekoa ez den Batasunaren lurralde eremuan hasi bada, barneko lurralde eremuan ez da zerga berezirik sorraraziko.

3. Aurreko 1. zenbakian adierazitako kasuetan gorabehera, fabrikazioaren gaineko zerga berezien xedeko produktuek, jatorria edo destinoa beste estatukide batean baldin badute, barneko lurralde eremuaren barrenean zirkulatuko dute erregelamenduz ezartzen diren baldintzak betez, hauetako prozeduretako baten babesean:

a) Etendura araubidean, fabriken edo biltegi fiskalen artean.

b) Etendura araubidean, erregistraturik dagoen hartzaile batek jasotzeko.

c) Etendura araubidean gordailuzain baimendu baten izenean dagoen establezimendu batetik Batasunaren lurraldetik ateratzeko edozein tokitara, Zerga berezien araubide erkidea ezartzen duen Legearen 4. artikuluko 7. idatz-zatian adierazita dagoen bezala.

d) Etendura araubidean onuradunaren egoitza ez den estatukide batean ezarritako gordailuzain baimendu baten establezimendutik Kontseiluaren 2008ko abenduaren 16ko 2008/118/EE Zuzentarauaren 12.1 artikuluak aipatzen dituen destinoetara. Zuzentarau hori zerga berezien araubide orokorrari buruzkoa da, eta haren bidez 92/12/EEE Zuzentaraua indargabetu zen.

e) Etendura araubidean, inportazioaren tokitik, erregistraturik dagoen bidaltzaile batek bidaliak, produktuak araubide horretan jasotzea baimenduta dagoen toki batera.

f) Etendura araubidean, baimena duen gordailuzain baten establezimendutik zuzeneko entrega egiten den toki batera.

g) Etendura araubidetik kanpora, baimena duen jasotzaile batek jasotzeko.

h) Etendura araubidetik kanpora, urrutiko salmenten sistemaren barrenean.

4. Batasunaren barreneko zirkulazioa etendura araubidean eginen da, bakar-bakarrik, erregelamenduz ezarriko diren baldintzen arabera tramitatzen den administrazio agiri elektroniko baten babesean egiten bada, deusetan galarazi gabe zirkulazioa paperezko agiri batekin hastea, sistema informatizaturik erabiltzerik ez badago eta erregelamenduz ezartzen diren baldintzak betetzen badira.

 17. artikulua. Irregulartasunak Batasunaren barreneko zirkulazioan.

Bi estatukideren arteko zirkulazio batean edo estatukide batetik hirugarren herrialde edo lurralde batera, estatukide baten lurraldean barna, egiten diren zirkulazioetan, fabrikazioaren gaineko zerga berezien xedeko produktuen bidalketa bat edo horren zati bat produktuen jasotzaileak hartzen ez badu Erkidegoaren lurraldean edo, esportazio kasuetan, bidalketa Elkargoaren lurraldetik benetan ateratzen ez bada, eta hori zerga horiek ordaindu beharrik ez izateko foru lege honen 6. artikuluan edo 16. artikuluko 1. eta 2. zenbakietan ezarritako kausengatik ez beste batengatik izan baldin bada, irregulartasun bat egon dela ondorioztatuko da.

A) Etendura araubideko zirkulazioa.

1. Fabrikazioaren gaineko zerga berezien xedeko produktuen Batasunaren barreneko etendura araubideko zirkulazio batean:

a) Barneko lurralde eremuan irregulartasun bat gertatzen bada, eta horren ondorioz, fabrikazioaren gaineko zerga berezia sorrarazten bada, zerga horiek Espainiako zerga administrazio eskudunak eskatuko ditu.

b) Fabrikazioaren gaineko zerga berezien sorrarazpena dakarren irregulartasun bat gertatzen bada, barneko lurralde eremuan egiaztatzen dena, baina ezinezkoa bada zehaztea zein estatukidetan gertatu zen, irregulartasuna lurralde eremu horretan, eta egiaztatu den unean berean, gertatu dela ondorioztatuko da, eta zerga bereziak Espainiako zerga administrazio eskudunak eskatuko ditu.

2. Barneko lurralde eremutik bidalitako produktuak beste estatukide batean dagoen hartzailearengana iristen ez badira edo, esportazien kasuan, Erkidegoko lurraldetik benetan ateratzen ez badira, eta zirkulazioa egin bitartean ez bada zerga bereziak sorraraztea dakarren inolako irregulartasunik egiaztatu, ondorioztatuko da irregulartasun bat gertatu dela barneko lurralde eremuan eta zirkulazioa hasi den unean, eta zerga bereziak Espainiako zerga administrazio eskudunak eskatuko ditu, salbu eta, zirkulazioa hasi eta lau hilabeteko epean, Administrazioa gogobetzeko moduko froga aurkezten bada, erakusteko ezen produktuak hartzaileari entregatu zaizkiola, produktuak Erkidegoko lurraldetik benetan atera direla edo irregulartasuna barneko lurralde eremutik kanpora gertatu dela.

3. Aurreko 1. zenbakiko a) eta b) letretan aurreikusitako kasuetan, Espainiako zerga administrazioak, hala badagokio, bidalketaren xedeko estatukideko agintari eskudunei horren berri emanen die.

4. Dena dela, 1. zenbakiko b) letran edo 2. zenbakian aurreikusitako kasuetan, zirkulazioa hasten denetik hiru urteko epea bukatu baino lehen, zehazten baldin bada Espainiatik kanpoko zein estatukidetan egin den benetan irregulartasuna, zerga bereziak estatukide horrek eskatuko ditu. Kasu horretan, Espainiako zerga administrazio eskudunak jasotako zerga bereziak itzuliko ditu, irregulartasuna benetan gertatu zen estatukideak zerga horiek jaso dituela egiaztatzeko frogak bidali ondoren.

5. Aurreko 2. zenbakian edo 1. zenbakiko b) letran aipatutako kasuen antzeko egoeretan, barnekoa ez den Batasuneko lurralde eremuan egindako irregulartasun bat antzematen bada eta, zirkulazioa hasi eta hiru urteko epea bukatu baino lehen, zehazten bada irregulartasun hori barneko lurralde eremuan gertatu zela benetan, zerga bereziak Espainiako zerga administrazio eskudunak eskatuko ditu, eta zerga horiek hasiera batean jaso zituen estatukideko agintari eskudunei horren berri emanen die.

B) Etendura araubidetik kanpoko zirkulazioa.

1. Baldin eta, fabrikazioaren gaineko zerga berezien xedeko produktuen Batasunaren barreneko zirkulazio batean, zerga sorrarazi bada barnekoa ez den Batasuneko lurralde eremuan dagoen estatukide igorlean:

a) Barneko lurralde eremuan irregulartasun bat gertatzen bada, eta horren ondorioz, fabrikazioaren gaineko zerga berezia sorrarazten bada, zerga horiek Espainiako zerga administrazio eskudunak eskatuko ditu.

b) Fabrikazioaren gaineko zerga berezien sorrarazpena dakarren irregulartasun bat gertatzen bada, barneko lurralde eremuan egiaztatzen dena, baina ezinezkoa bada zehaztea zein estatukidetan gertatu zen, irregulartasuna lurralde eremu horretan gertatu dela ondorioztatuko da, eta zerga bereziak Espainiako zerga administrazio eskudunak eskatuko ditu.

2. Dena dela, 1. zenbakiko b) letran aurreikusitako kasuan, produktuak erosten direnetik hiru urteko epea bukatu baino lehen, zehazten baldin bada Espainiatik kanpoko zein estatukidetan egin den benetan irregulartasuna, zerga bereziak estatukide horrek eskatuko ditu. Kasu horretan, Espainiako zerga administrazio eskudunak jasotako zerga bereziak itzuliko ditu, irregulartasuna benetan gertatu zen estatukideak zerga horiek jaso dituela egiaztatzeko frogak bidali ondoren.

3. Fabrikazioaren gaineko zerga berezien xedeko produktuen kasuan, haiei dagokien zerga barneko lurralde eremuan sorrarazi bada eta, eremu horretatik barnekoa ez den Batasuneko beste lurralde eremu batera bidaltzean, barneko lurralde eremutik kanpora irregulartasunen bat egiten bada eta, horren ondorioz, zerga bereziak irregulartasuna gertatu edo egiaztatu zeneko estatukideak jasotzen baditu, Espainiako zerga administrazio eskudunak jasotako zerga bereziak itzuliko ditu, zerga horiek dagokion estatukidean ordaindu direla erakusteko frogak jaso ondoren.

 18. artikulua. Kudeaketarako arau orokorrak.

1. Fabrikazioaren gaineko zerga berezien subjektu pasiboek eta haiek ordaintzera behartuta dauden gainerakoek dagozkien tributu aitorpenak aurkeztu beharko dituzte, eta bidezko diren autolikidazioak egin, baita bermeak aurkeztu ere, zerga arloko betebeharren erantzule direnez.

2. Fabrikazioaren gaineko zerga berezien xede diren produktu suntsigarriei zerga tasa diferenteak aplikatzearen ondorioz, bakoitzari egokitu zerga ordaindu eta produktu horiek batera biltzen direnean, ulertuko da, kontrakoa frogatu ezik, saltokian sartzen diren lehenbiziko produktuak direla lehen ateratzen direnak.

3. Fabrikazioaren gaineko zerga berezien subjektu pasiboek eta haiek ordaintzera behartuta dauden gainerakoek zerga-zorra zehaztu eta ordaindu beharko dute Ekonomia, Ogasun, Industria eta Enplegu Departamentuak ezartzen dituen prozedura, modua eta epeak betez.

4. Fabrikazioaren gaineko zerga berezien xede diren produktuak enkante irekian saltzen badira, esleipena haiekin sal-erosketan aritzeko legezko gaitasuna duten pertsonen alde baizik ez da eginen, erregelamendu bidez ezartzen diren baldintzekin bat etorriz.

5. Erregelamendu bidez ezarriko dira:

a) Subjektu pasiboek nola eta zenbatetan ezarri beharko dituzten bermeak.

b) Fabrikazioaren gaineko zerga berezien xede diren produktuak egiten, eraldatzen, jasotzen, biltzen, saltzen edo bidaltzen dituzten saltokien kontrola, baita eskusartze etengabea ere, nola burutuko den.

c) Produktu horien zirkulazioan eskatzen ahal diren baldintzak eta, bereziki, erkidegoko zirkulazioa eta lurralde barrenekoa babestu behar duten edozein dokumentutako erabilera baldintzak.

d) Galera portzentaia onargarriak, etendura erregimenean ekoizte eta eraldatze prozesuetan, baita biltzean eta garraiatzean ere.

e) Fabrikazioaren gaineko zerga bereziak itzultzeko eskaerak aurkeztu behar diren epeak.

19. artikulua. Arau-hausteak eta zehapenak.

1. Fabrikazioaren gaineko zerga berezien arloko arau-hauste eta zehapenen araubidea Tributuei buruzko Foru Lege Orokorrean, foru lege honetan zerga haietariko bakoitzerako berariazko arauetan eta hurrengo idatz-zatietan xedaturikoaren arabera arautuko da.

Partikularzki, foru lege honen arabera ezartzen diren diru bidezko zehapenei Tributuei buruzko Lege Orokorreko 71. artikuluko 3. idatz-zatian aipatzen dena murriztuko zaie.

2. Betiere, honako hauek zerga arloko arau-hauste larriak dira:

a) Fabrikazioaren gaineko zerga berezien xedeko produktuak fabrikatzea, lege honetan eskatzen diren baldintza eta beharkizunak bete gabe, ezta hura garatzeko erregelamenduan ematen diren xedapenak ere.

b) Fabrikazioaren gaineko zerga berezien xedeko produktuen zirkulazioa helburu komertzialekin lurralde barrenean, dokumentu administratibo elektroniko batean babestuta egon behar denean baina erreferentziako kode administratiboa, horretarako agintari eskudunek esleitua, ez duenean.

c) Fabrikazioaren gaineko zerga berezien xedeko produktuak edukitzea helburu komertzialekin, sorrarazitako zerga ordainduta duela, etendura araubidea aplikatu dela edo salbuespen kasua dela frogatu gabe.

3. Aurreko zenbakiko a), b) eta c) letretan aipatu arau-hausteek dirutan izanen dute zehapena; hain zuzen ere, produktuen kopuruei legozkiekeen kuoten %100, arau-haustea atzeman zen egunean indarra zuen tasa aplikatuta kalkulaturik; gutxienez ere, 1.200 euro.

Aurreko lerroaldean adierazitakoaren arabera dagokion zehapena %25 igoko da, zerga arloko arau-hausteak errepikatzen direnean. Inguruabar hori gertatutzat emanen da arau-hausleak azken arau-haustea egin aurreko bi urtean ebazpen irmo baten bidez zehatua izan denean bide administratiboan, aurreko 2. zenbakian ezarritako debekuetako edozein urratzeagatik

.

4. Tributu arloko arau-hauste larriengatik, gainera, zehapen hauek ezartzen ahalko dira:

a) Arau-hausleek bere dituzten establezimenduak sei hilabetez ixtea, Ekonomia eta Ogasun kontseilariak erabakirik, edo behin betikoz ixtea, Nafarroako Gobernuak erabakirik. Arau-hausleak establezimendua aldi baterako zehapena ezarri baino lehenagoko bi urteetan arau-hauste larri bat egiteagatik bide administratiboan ebazpen irmo baten bidez zehatzen denean ixten ahalko dira behin betikoz.

b) Sei hilabetez prezintatzea edo salmenta automatikorako tresnak behin betikoz bahitzea, arau-haustean haien bidez egiten direnean. Arau-hausleak establezimendua aldi baterako zehapena ezarri baino lehenagoko bi urteetan arau-hauste larri bat salmenta automatikorako tresna baten bidez egiteagatik bide administratiboan ebazpen irmo baten bidez zehatzen denean bahitzen ahalko dira behin betikoz.

Letra honetan aipatzen diren zehapenak ezartzeko, salmenta automatikorako tresnaren titularra eta tresna dagoen establezimenduaren titularra hartuko dira subjektu arau-hausletzat.

Hurrengo datorren c) letran aipatzen diren kasuetan izan ezik, zehapen nagusia ezartzeko eskumena duen organoak erabakiko du zehapen horiek ezartzea.

c) Hala ere, b) letran aipatzen diren zehapenak aurreko a) letran aipatzen direnekin bat datozenean, salmenta automatikorako tresna behin betikoz bahitzea bidezko izanen da, establezimendua behin betikoz ixtea erabakitzen bada. Gorabehera hori gertatzen den kasuetan, aurreko a) letran aipatzen diren organoek erabakiko dute zehapenak ezartzea.

5. Lurralde barrenean fabrikazioaren gaineko zerga berezien xedeko produktuak helburu komertzialekin zirkulatzea tributu arloko arau-hauste arina da, baldin eta zirkulazio hori babesteko erregelamenduz ezarritako dokumentuen arabera dokumentuaren funtsezko datu errealak isildu badira edo oker eman, eta tributu arloko arau-hauste larria ez bada. Arau-hauste hori dirutan zehatuko da; hain zuzen ere, zirkulazioan diren produktuei legokiekeen kuotaren %10; gutxienez ere, 600 euro.

Honako hauek zirkulazioko dokumentuen funtsezko datuak dira:

1.a–Zer salgai garraiatzen den eta zenbat zuzen identifikatzeko behar diren datuak.

2.a–Bidaltzailea, hartzailea edo produktuak zuzen identifikatzeko behar diren datuak, zirkulazio dokumentuaren zenbakia barne.

3.a–Zirkulaziokoko zigiluen kasuan, haien zenbakiak edo edukiera eta haien korrespondentzia ontziekin.

4.a–Bidalketa zein egunetan hasi zen.

6. Zerga arloko arau-hauste arintzat joko da marka fiskalik edo ezagutzakorik ez dituzten edari alkoholdunak edo tabako gaiak helburu komertzialekin edukitzea, baldintza hori erregelamenduz eskatzen ahal denean, non ez zaion 2. zenbakian adierazitakoa aplikatzen jokabide horri. Arau-hauste hori honela zehatuko da:

a) 150 euroko isuna, helburu komertzialekin eta markak erakutsi gabe 1.000 zigarroko multzo bakoitza izateagatik; 600 euro, gutxienez ere, arau-hauste bakoitzeko.

b) 10 euroko isuna litro bakoitzeko, helburu komertzialekin eta markak erakutsi gabe, edari eratorriak izateagatik; 600 euro, gutxienez ere, arau-hauste bakoitzeko.

Aurreko a) eta b) letretan ezarritako zehapenak gorantz graduatuko dira, isunaren zenbatekoari %25 gehituta, arau-hausteak errepikatuz gero. Arau-haustea errepikatutzat emanen da arau-hausleak azkena egin aurreko bi urtean ebazpen irmo baten bidez zehatua izan denean bide administratiboan zenbaki honetan ezarritako debekuak urratzeagatik.

7. Zerga arloko arau-hauste arintzat joko da marka fiskal faltsuak, birsortuak edo errekuperatuak edukitzea. Arau-hauste horri 10 euroko isun finkoa jarriko zaio marka fiskal faltsu, birsortu edo errekuperatu bakoitzeko

.

 II. KAPITULUA. Alkoholaren eta edari alkoholdunen gaineko zerga berezi guztien xedapen orokorrak

20. artikulua. Kontzeptuak eta definizioak.

Alkoholaren eta edari alkoholdunen gaineko zerga bereziei dagokienean, ulertuko da:

1. "Alkohola". Alkohol etilikoa edo etanola, NC 2207 edo 2208 kodeetan sailkatua.

2. "Alkohol erabat desnaturalizatua". Gutienez ere ezartzen den proportzioan ofizialki onartutako gai desnaturalizagarriak dauzkan alkohola, baldin eta gai desnaturalizagarri horiek nabarmenki usain, kolore eta zapore ezaugarri organoleptikoak aldatzen badituzte, eta hortaz giza kontsumorako ez egokia egiten badute.

3. "Alkohol hein batean desnaturalizatua". Gutienez ere ezartzen den proportzioan ofizialki onetsi diren gai desnaturalizagarriak dauzkan alkohola, baldin eta horiek giza kontsumorako ez egokia egiten badute eta prozesu industrial batean erabiltzea aldez aurretik baimendua izan bada, erregelamendu bidez ezartzen diren era eta baldintzetan.

4. "Edari analkoholikoa". Bere gradu alkoholiko bolumetrikoa %1,2 vol.etik goitikoa ez bada.

5. "Uztalaria". Bere izenean ardoa lantzen duen eta alkohola edo hortik sortutako edaria sortzen den zapakinetako mahats aleen jabea den pertsona fisikoa.

6. "Artisau-distilatzailea". Alanbikeen edo antzeko distilagailuen bidez zuzeneko distilazio etenaren bidez ekoiztutako edarien egilea, haren urteroko ekoizpena alkohol hutseko 10 hektolitrotik goitikoa ez bada.

7. "Garagardoaren jatorrizko muztioaren hasierako estraktu lehorra". Malta eta baimendutako beste produktu batzuk, joak edo jogabeak, ehotzetik sortzen den materia lehor naturala, liseriketa enzematikoaren bidez muztio batean dagoen kontzentratu azukreduna, hortik hartzidura alkoholikoaren bidez garagardoa sortuko balitz.

8. "Gradu alkoholiko bolumetriko bereganatua". Alkohol hutsen bolumen kopurua, 20 ºCko tenperaturan, tenperatura horretan produktuaren 100 bolumenetan dagoena.

9. "Gradu Laua". 20 ºCko tenperaturan garagardoaren jatorrizko muztioko 100 gramutan zenbat hasierako estraktu dagoen, gramutan.

21. artikulua. Salbuespenak.

1. 9. artikuluan aipatzen diren eragiketak ezezik ozpina egiteko erabiltzen diren alkohol eta edari alkoholdunen ekoizpena ere izanen da salbuetsia, baldin eta erregelamendu bidez ezartzen diren baldintzak betetzen badira. Ozpintzat hartzen da NC 2209 kodean sailkatutako produktua.

Salbuespenaren aplikazioa, nekazaritzatik ateratatako alkohol destilatua erabiltzen den kasuetan, baldintza honen pean geldituko da: alkoholak, markatzaile gisa, alkoholaren ozpina eramanen du, betiere arauzko portzentaje eta baldintzetan.

2. Salbuetsita egonen dira, orobat, airez edo itsasontziz hirugarren herrialde edo lurralde batera (Kanariar irletatik aparte) joaten diren bidaiarien bagajean garraiatzen diren edari alkoholdunak, zergarik gabeko dendek entregatzen dituztenak.

22. artikulua. Itzulketak.

Erregelamendu bidez ezartzen diren baldintzetan, zergaren kuotak itzultzeko eskubidea, 10. artikuluan ezarritako kasuetan ezezik hauetan ere aitortuko da:

a) Alkohola edo edari alkoholdunak jakietako eta edari

 analkoholikoetako lurrineztagarriak prestatzeko.

b) Alkohola edo edari alkoholikoak zuzenean erabiltzen badira edo produktu erdiprestatuen osagarri gisa erabiltzen badira, jaki betegarriak edo besterik egiteko, baldin eta alkohola kasu bakoitzean 100kg.ko alkohol hutsetik goitikoa ez bada, bonboien kasuan, eta alkohol hutsetik goitikoa ez bada beste produktuetan.

c) Gizakiek hartzeko gai izateari utzi dioten alkoholdun edariak lantegira edo zerga biltegira itzuli eta baita Zerga Administrazioaren kontrolpekoa deuseztea.

III. KAPITULUA. Garagardoaren gaineko zerga

23. artikulua. Esparru objektiboa.

1. Garagardoaren gaineko Zergaren esparru objektiboa garagardoa eta garagardoaren eta edari analkoholikoen nahasketak eratutako produktuak, NC 2206 kodean sailkatuak, izanen da, bi kasuetan gradu alkoholiko bolumetriko bereganatua %0,5 vol.etik goitikoa bada.

2. Foru Lege honetan ezarritako ondorioetarako, garagardotzat hartuko da NC 2203 kodean sailkatutako produktu oro.

24. artikulua. Zerga oinarria.

Zerga oinarria zergaren esparru objektiboaren barruko produktuen bolumenaz osatua egonen da, 20ºCko tenperaturan burututako produktua hektolitrotan adieraziz.

25. artikulua. Zerga-tasak.

1. Zerga, beren esparruko produktuei dagokienez, epigrafe hauekin bat ordainaraziko da:

1.a) epigrafea. 100 bol.eko 1,2tik goitikoa ez den gradu alkoholiko bolumetrikoa duten produktuak: 0 euro hektolitroa.

1.b) epigrafea. 100 bol.eko 1,2tik 2,8ra bitartekoa den gradu alkoholiko bolumetrikoa duten produktuak: 2,75 euro hektolitroa.

2. epigrafea. 100 bol.eko 2,8tik goitikoa den gradu alkoholiko bolumetrikoa eta 11tik beheitiko gradu laua duten produktuak: 7,48 euro hektolitroa.

3. epigrafea. 11tik 15era bitarteko gradu laua duten produktuak: 9,96 euro hektolitroa.

4. epigrafea. 15etik 19ra bitarteko gradu laua duten produktuak: 13,56 euro hektolitroa.

5. epigrafea. 19tik goitiko gradu laua duten produktuak: 0,91 euro hektolitroa eta gradu laua.

2. Aurreko idatz-zatiari dagokionez, gradu laua zehazterakoan 0,2 gradu bitarteko tolerantzia onartuko da.

 

IV. KAPITULUA. Ardoaren eta Edari Legamiatuen gaineko Zerga

26. artikulua. Esparru objektiboa.

1. Zergaren esparru objektiboa ardo bitsik gabekoaz, ardo bisdunaz, edari legamiatu gabekoez eta edari legamiatu bisdunez dago osatua.

2. Foru Lege honetan ardo bitsik gabekotzat hartuko dira NC 2204 eta 2205 kodeetan sailkatutako produktuak, ardo bisdunak ezik, honako hau baldin badute:

a) Gradu alkoholiko bolumetriko bereganatua %1,2 vol.etik %15 vol.era bitartean, beti ere produktu burutuaren alkohol guztia hortziduratik badator, edo

b) Gradu alkoholiko bolumetriko bereganatua %15 vol.etik %18 vol.era bitartean, beti ere graduak artifizialki gehituz lortu ez badira eta produktu burutuaren alkohol guztia hortziduratik badator.

3. Foru Lege honetan ardo bisduntzat hartuko dira NC 2204.10, 2204.21.10, 2204.29.10 eta 2205 kodeetan sailkatutako produktu guztiak, baldin eta:

a) Txanpinoi formako eta lokarriez lotutako tapoia duten botiletan ontziratuak badira, edo anhidrido karboniko disolbatuagatik 3 bareko edo hortik goitiko gainpresioa badute.

b) Gradu alkoholiko bolumetriko bereganatua %1,2 vol.etik %15 vol.era bitartean badute eta produktu burutuko alkohol guztia hortziduratik badator.

4. Foru Lege honetan edari legamiatu bitsik gabekotzat hartuko dira NC 2204 eta 2205 kodeetan sailkatuta dauden eta aurreko 2. eta 3. ataletan jasotzen ez diren produktu guztiak, baita NC 2206 kodean sailkatutako produktuak ere, edari legamiatu bisdunak eta garagardoaren gaineko zergaren esparru objektiboko produktuak salbu, baldin badute:

a) Gradu alkoholiko bolumetriko bereganatua %1,2 vol.etik %5,5 vol.era bitartean, edo

b) Gradu alkoholiko bolumetriko bereganatua %5,5 vol.etik %15 vol.era bitartean, baldin eta produktu burutuko alkohol guztia legamitik badator.

5. Foru Lege honetan edari legamiatu bisduntzat hartuko dira NC 2206.00.91 kodean sailkatutako produktu guztiak, baita NC 2204.10, 2204.21.10, 2204.29.10 eta 2205 kodeetan sailkatutako produktu guztiak ere, aurreko 2. eta 3. ataletan aipatzen ez badira, baldin eta

a) Txanpinoi formako eta lokarriez lotutako tapoia duten botiletan ontziratuak badira, edo anhidrido karboniko disolbatuagatik 3 bareko edo hortik goitiko gainpresioa badute.

b) Gradu alkoholiko bolumetriko bereganatua %1,2 vol.etik %8,5 vol.era bitartean badute edo

c) Gradu alkoholiko bolumetriko bereganatua %8,5 vol.etik %15 vol.era bitartean badute eta produktu burutuko alkohol guztia legamitik badator.

27. artikulua. Zerga oinarria.

Zerga oinarria zergaren esparru objektiboaren barruko produktuen bolumenaz osatua egonen da, burutu produktua 20ºCko tenperaturan hektolitrotan adierazita.

28. artikulua. Zerga tasak.

Zerga epigrafe hauen arabera antolatuko da:

1. epigrafea. Bitsik gabeko ardoak. 0 pezeta hektolitroko.

2. epigrafea. Ardo bisdunak. 0 pezeta hektolitroko.

3. epigrafea. Edari legamiatu bitsik gabeak. 0 pezeta hektrolitroko.

4. epigrafea. Edari legamiatu bisdunak. 0 pezeta hektrolitroko.

V. KAPITULUA. Tarteko produktuen gaineko zerga

29. artikulua. Esparru objektiboa.

Foru Lege honetan, tarteko produktutzat hartuko dira, %1,2 vol.etik %22 vol.era bitarteko gradu alkoholiko bolumetriko bereganatua duten produktu guztiak, NC 2204, 2205 eta 2206 kodeetan sailkatuak badaude eta ez Garagardoaren eta gaineko zergaren esparru objektiboaren barruan, ezta Ardoaren eta Edari Hortzien gaineko Zergaren barruan ere ez badaude.

30. artikulua. Zerga oinarria.

Zerga oinarria zergaren esparru objektiboaren barruko produktuen bolumenaz egonen da osatua, 20º Cko tenperaturan burutu produktua hektolitrotan adierazita.

31. artikulua. Karga-tasa.

Zerga honen tasak hauexek izanen dira:

a) Ehuneko 15etik beheitiko gradu alkoholiko bolumetrikoa duten bitarteko produktuetan: 36,65 euro hektolitroa.

b) Gainerako bitarteko produktuetan: 61,08 euro hektolitroa

.

32. artikulua. Arau-hausteak eta zehapenak.

Ondoren aipatzen diren kasuetan, bakoitzerako zehazten diren zehapen bereziak ezarriko dira.

a) Tarteko produktuen fabrikan dagoen edo bertan erabiltzen den ardoaren edo edari fermentatuen gradu alkoholiko bolumetriko bereganatuari dagokionez, goitiko diferentziarik badago. Arau-haustea alkohol hutseko hektolitrotan adierazitako diferentziari legokiokeen kuotaren ehuneko ehuneko isunaz zehatuko da, Ardoaren eta Ekoiztutako edarien gaineko Zergarako ezarritako zerga tasa aplikatuz.

b) Ekoizpen prozesuko tarteko produktuen gradu alkoholiko bolumetriko bereganatuei dagokienean, fabrikan egonda edo bertatik aterata, beheitiko diferentizarik badago. Arau-haustea alkohol hutseko hektolitrotan adierazitako diferentziari legokiokeen kuotaren ehuneko ehuneko isunaz zehatuko da, Ardoaren eta Ekoiztutako edarien gaineko Zergarako ezarritako zerga tasa aplikatuz.

c) Alkohola eta ekoiztutako edariak ez beste lehengaietan goitiko diferentziarik badago, tarteko produktuen fabriketan, erregelamendu bidez baimendutako portzentajeak baino handiagoak badira. Lehengaien xede diren tarteko produktuei legokiekeen kuotaren ehuneko ehuneko isunaz zehatuko da arau-haustea. Pentsatzekoa da, kontrakorik frogatzen ez bada behinik behin, xede ziren tarteko produktuek %15etik goitiko gradu alkoholiko bolumetrikoa izanen dutela

VI. KAPITULUA. Alkoholaren eta Edari Deribatuen gaineko zerga

33. artikulua. Esparru objektiboa.

Alkoholaren eta Edari Deribatuen gaineko Zergaren esparru objektiboa hauxe da:

a) %1,2 vol.etik goitiko gradu alkoholiko bolumetriko bereganatua duten produktu guztiak, NC 2207 eta 2208 kodeetan sailkatuak badira, produktu horiek 22a ez beste izen konbinatuaren kapitulu batean sailkatutako produktu baten parte badaitez ere.

b) %22 vol.etik goitiko gradu alkoholiko bolumetriko bereganatua duten eta NC 2204, 2205 eta 2206 kodeetan sailkatuak dauden produktuak.

c) Disoluzioan produktu solidorik edo beste landare produkturik daukan alkohola.

34. artikulua. Zerga oinarria.

Zerga oinarria zergaren xedea diren produktuek daukaten alkohol hutsaren bolumena izanen da, 20ºCko tenperaturan, hektolitrotan adierazita.

35. artikulua. Karga-tasa.

Zerga tasa 913,28 eurokoa izanen da alkohol puruaren hektolitroko, 36. eta 37. artikuluetan xedaturikoa galarazi gabe.

36. artikulua. Artisau-distilazioaren erregimena.

1. Artisau-distilazioaren erregimena Alkoholaren eta Edari Deribatuen gaineko Zergaren bidezko zerga sistema erraztua da, non Artisau-distilatzaileak sar baitaitezke, erregelamendu bidez ezartzen den moduan. Erregimen honi aplikatuko zaizkio, artikulu honetan ezarritakoari aurka egiten ez dioten guztian, Foru Lege honen I. Tituluaren I., II. eta VI. Kapituluetako xedapenak.

2. Ekoiztutako edarien tributua ematea.

Artisau-distilazioaren erregimenean egiten diren edariei tarifa hauek aplikatuko zaizkie:

a) Artisau-distilazioaren erregimenaren lehenengo tarifa.

1go. Zerga gaia. Distilatzeko tresnen edukiera dago atxikia tarifa honi.

2garren. Sortzapena. Zerga Administrazio Tributarioari distilatzeko baimena eskatzen zaionean sortuko da.

3garren. Subjektu pasiboa. Artisau-distilatzailea izanen da subjektu pasiboa, zordun gisa.

4garren. Zerga oinarria. Zerga oinarria, alkohol hutseko hektolitrotan adierazia, honela aterako da; distilatzeko tresna duen galdararen edukierak adierazten duen litro kopurua 0,016 koefizientearekin, distilatzekoa den lehen gaitik lortutako gradu alkoholiko bolumetrikoarekin, bateko hainbestetan adierazita, eta destilatzeko baimena zenbat egunetarako eskatu, kopuru horrexekin biderkatuko da.

Bosgarrena. Karga-tasa. Zerga tasa 799,19 eurokoa izanen da alkohol puruaren hektolitroko. Idatz-zati honetan xedaturikoa ez doa 37. artikuluan xedaturikoaren kontra.

b) Artisau-distilazioaren erregimenari dagokion bigarren tarifa.

1go. Zerga gaia. Distilazio zuzen etenaren bidez deribatutako edarien ekoizpena egonen da tarifa horri atxikia, artisau-distilatzaile batek erregimen honen babesean eginda, lehenengo tarifako zerga oinarria baino handiagoa diren zenbatekoetan.

2garren. Sortzapena. Tarifa honen xede diren ekoiztutako edariak ekoiztean sortuko da zerga.

3garren. Subjektu pasiboa. Subjektu pasiboa artisau-distilatzailea izanen da, zordun gisa.

4garren. Zerga oinarria. Erregimen honetako lehenengo tarifako zerga oinarria baino handiagoa duen alkohol hutseko hektolitroen kopurua izanen da.

Bosgarrena. Karga-tasa. Zergaren karga-tasa 799,19 eurokoa izanen da alkohol puruaren hektolitroko. Idatz-zati honetan xedaturikoa ez doa 37. artikuluan xedaturikoaren kontra.

3. Zergaren itzulketa.

Foru Lege honen 15. artikuluaren 5. atalean ezarritakoa galarazi gabe, artisau-distilatzaileek ekoiztutako edariak egiten dituzten beste fabrika batzuetarako ekoizten ahalko dituzte edariak eta kasu horietan eskubidea izanen dute ordaindutako kuotak itzul dakizkien, erregelamendu bidez ezarritako baldintzak betetzen badituzte.

4. Destilatzaile txikiek Europar Batasuneko beste estatu batzuetan ekoitziriko edari deribatuak sartzea.

Europar Batasuneko beste estatu batzuetako ekoizle beregainek ekoitziriko edari deribatuei dagokien tasa, urtean alkohol puruaren 10 hektolitro baino gutxiago ekoizten badute, 799,19 eurokoa izanen da alkohol puruaren hektolitroko.

5. Arau-hausteak eta zehapenak.

a) Distilatzeko baimena lortzeko eskabidean aitortu baino gradu alkoholiko gehiago dituzten lehen gaiak erabiltzea arau-haustea izanen da distilazio prozesuan. Arau-hauste horregatik ezarriko den zehapenaren isuna 32. artikuluaren a) letran ezarritako prozeduraren bidez ezarriko da eta gutienez ere 200.000 pezetakoa izanen da.

b) 19. artikuluaren 2. atalean eta aurreko a) letran aipatzen diren arau-hauste tributarioak, baita Foru Lege honen 41. artikuluan aipatzen diren zehapen bereziekin zehatzen diren arau-hausteak ere, behin eta berriro eginez gero, artisau-distilazioei buruzko erregimenaz behin-behinean edo behin betikoz probetxatzeko debekua ezarriz ere zehatzen ahalko da.

37. artikulua. Uzta biltzaileen araubidea.

Artisautzazko destilazioaren bidez lorturiko edari deribatuak zuzenean fabrikatik uzta biltzaileen kontsumora bideratzen direnean, erregelamendu bidez ezartzen diren modu eta baldintzetan, zerga tasa 215,58 eurokoa izanen da alkohol puruaren hektolitroko. Tasa honen aplikazioak alkohol puruaren 16 litroren baliokidea den kopurua izanen du muga, uzta biltzaile bakoitzeko, urte bakoitzean.

38. artikulua. Salbuespenak.

Salbuetsiak izanen dira, erregelamendu bidez ezartzen diren baldintzetan, 9. eta 21. artikuluetan aipatzen diren eragiketak ezezik, honako hauek:

1. Erabat desnaturalizatua izateko erabiltzen den alkohola ekoiztea, erregelamendu bidez ezartzen den prozeduraren bidez, Elkarte barneko zirkulazioaren kasuetan, beste Estatu Elkartekide bateko xedapenekin bat eginez.

2. Hein batean desnaturalizatua izateko erabiltzen den alkohola ekoiztea, erregelamendu bidez ezartzen den prozeduraren bidez, ondoren gizakiak hartzeko ez beste xedetarako erabilia izateko.

3. Aurreko ataletan aurrikusitako kasuetan, salbuespenaren onura izateko zirkulazioari buruzko eginbeharrak bete eta alkohol desnaturalizatuen erabilpen edo xedea frogatu egin beharko da.

4. Botikak egiteko erabiltzen den alkohola ekoiztea. Horretarako botikatzat hartuko dira gizakiaren edo animalien gaixotasunak sendatu edo prebenitu ditzaketen gai edo gai konbinazioak. Gizakiei edo animailiei emanda, diagnostiko medikoa ezartzeko edo gizakiaren edo animalien funtzio organikoak birrezarri, zuzendu edo aldatzeko balio duten gai edo nahasketa guztiak ere hartuko dira botikatzat. Salbuespena botika espezializate farmazeutiko gisa banatzearen menpe egonen da, aurretik kasuan kasuko erregistroan inskribatuz gero.

5. Osasun zentruetan erabilia izateko alhokola ekoiztea.

6. Alkohola ofialki onartutako zentruetan ekoiztea, irakaskuntza eta zientzia ez beste xedetarako, horietatik kanpo ateratzen ez bada.

7. Behar den baimena jasota, zientzia ikerketarako erabiltzen den alkohola ekoiztea.

39. artikulua. Itzulketak.

10. eta 22. artikuluetan aurreikusitakoez gain, zerga itzultzeko eskubidea aitortuko da, Erregelamendu bidez ezartzen diren baldintzetan, alkohol desnaturalizatua ezin erabil daitekeen ekoizpen prozesuetan alkohola erabiltzen denean, baldin eta alkohola prozesutik ateratzen den produktuari gaineratzen ez bazaio.

a) Alkohol desnaturalizatua ezin erabil daitekeen ekoizpen prozesuetan alkohola erabiltzen denean, baldin eta alkohola prozesutik ateratzen den produktuari gaineratzen ez bazaio.

b) Gizakiak edateko gai izatetik gelditu diren edariak fabrikara edo legezko gordailura itzultzen direnean, Administrazio Tributarioak zainduta, horiek deuseztatzen direnean.

40. artikulua. Kudeatzeko arau bereziak.

1. Debekatu egiten da alkohola ekoizteko tresna mugikorrak erabiltzea.

2. Uztailaren 13ko 7/1982 Lege Organikoaren 3. artikuluan ezarritako ondorioetarako, tresna debekatuak izanen dira alkohola distilatzeko edo zuzentzeko tresnak, erregelamendu bidez horiek ekoiztu, salerosi, mugitu eta edukitzeko ezarritako baldintzak betetzen ez dituztenean.

3. 15. artikuluaren 7. atalean ezarritakoa galarazi gabe, espezializate farmazeutikoak eta izen konbinatuen 22 ez beste kapituluan sailkatuak dauden eta alkohol erabat edo hein batean desnaturalizatua, edo 22. eta 38. artikuluetan salbuespenerako edo itzulketarako aurreikusirik dagoen kasuren bat aplikatuz alkohola sartuta daukaten produkutuak zirkulatzea eta edukitzea, zergari dagokionean, ez daude atxikirik betebehar formal bakarrari ere.

41. artikulua. Arau-hausteak eta zehapenak.

1. Ondoan aipatzen diren kasuetan, arau-hauste tributarioak izanen diren horietan, ondotik zehazten dira bakoitzari ezarriko zaizkion zehapen bereziak:

a) Erregelamendu bidez ezarritako izapidaketak hautsiz edo lan aitortuaren epea bukatuta, alkohola ekoizteko tresnak martxan jartzea zehatuko da ekoizpen bolumenari arau-haustea sumatzen denean indarra duen zerga tasa aplikatzetik aterako litzatekeen kuoten ehuneko 150eko isunaz. Ekoizpen bolumena alkohol hutseko hektolitrotan adieraziko da 20ºCko tenperaturan eta ulertuko da, halakorik balitz, lana azkenekoz aitortu zenetik arau-haustea sumatu zenera bitartean, gehienez ere hiru hilabetean, etengabeko lanean egin litekeena dela.

b) Prezintuak haustea, alkohola ekoizten duten tresnak funtzionatzea posible egiteko edo prezintatutako gordailuetatik erauztea zehatuko da aurreko letraren arabera kalkulatutako kuoten ehuneko 100eko isunaz edo biltegiaren edukiera osoaren arabera, hurrenez hurren, Administrazioak sumatu baino lehen horri hausturaren berri baldin badu salbu.

c) Alkohol fabriketako lehen gaietako goitiko diferentziak, erregelamendu bidez baimendutako portzentaiak baino handiagoak badira, lehen gai horiek erabiliz ekoiztu litekeen alkohol hutsari legokiokeen kuoten ehuneko 100eko isunaz zehatuko dira.

d) Ekoiztutako edariak ontziratzeko baimena duten saltokietan egindako zenbaketetan marka fiskalik edo ezagutzeko markarik eza, erabilietakoen milako 0,5 baino handiagoa bada, zirkulazioa marka horiek babestuta eduki zezaketen ekoiztutako edarien kopuruari dagokion alkohol bolumenari arau-haustea sumatzen denean indarra duen zerga tasa aplikatzetik aterako liratekeen kuoten ehuneko 150eko isunaz zehaztuko da. Ulertuko da edariek %40 vol.eko gradu alkoholiko bolumetriko bereganatua dutela eta marka bakoitzean edukiera handieneko ontzietan ontziratuak direla.

2. Alkohol erabat edo hein batean desnaturalizatuak birgaitzea arau-hauste tributarioa izanen da. Zerga kuota eskatzen ahalko da eta alkohol birgaituaren bolumenari arau-haustea sumatzen denean indarra duen zerga tasa aplikatzetik ateratzen denaren hiru halako isunaz zehatuko da. Alkohola, alkohol hutseko hektolitrotan adieraziko da, 20ºCko tenperaturan. Gainera, alkohola birgatua den saltokia behin-behinean, gehienez ere urtebetez, edo behin betikoz itxiarazten ahalko da, Ekonomia eta Ogasun Departamentuak horrela erabakitzen badu. Ulertuko da alkohol erabat edo hein batean desnaturalizatua birgaitua izan dela zer xede edo erabilpen izanen duen frogatzen ez denean.

II. TITULUA. GARRAIO BALIABIDE JAKINEN GAINEKO ZERGA BEREZIA

42. artikulua. Zerga gaia.

1. Hitzarmen Ekonomikoan ezarritakoarekin bat, zergari atxikirik egonen dira:

a) Motorrez ibiltzen diren ibilgailu berri edo erabiliak lehenbizikoz eta behin betikoz matrikulatzea, kasu hauetan izan ezik:

Lehena.-Kontseiluaren 1970eko otsailaren 6ko 70/156/EEE Zuzentarauaren (Estatu kideek ibilgailu motordunei eta horien atoiei buruz dituzten legeak elkarrengana hurbiltzeari buruzkoa) II. eranskineko testuan, 2007ko ekainaren 30ean indarrean zegoen horretan, N1, N2 eta N3 kategorietan jaso diren ibilgailuak, loturarik gabeko beste kasu batzuetan sarturik ez badaude eta betiere, N1 kategoriei dagokienez, jarduera ekonomiko bati nabarmenki atxikitzen bazaizkio. Jarduera ekonomiko bati nabarmenki atxikitzat joko da baldin eta, abenduaren 30eko 19/1992 Foru Legearen (Balio Erantsiaren gaineko Zerga) 41. artikuluan aurreikusitakoarekin bat, subjektu pasiboak, ibilgailuaren eskurapen edo inportazioa dela-eta, eskubidea badu jasandako edo ordaindutako Balio Erantsiaren gaineko Zergaren kuoten gutxienez %50eko kenkaria egiteko. Ondorio horietarako ez du garrantzirik izanen aipatutako foru legearen arauen ondorioz kenkaria izateko eskubidearen beste edozein murrizketaren aplikazioak.

Dena den, Zerga atxikiko zaio ibilgailu horien lehenbiziko behin betiko matrikulazioari baldin eta etxebizitza gisa erabiltzeko moldatzen badira.

2. Aurreko 1. atalak aipatzen duen testuan M2 eta M3 kategorietan jaso diren ibilgailuak eta tranbiak.

3. Objektiboki soil-soilik industriarako, merkataritzarako, nekazaritzarako, medikuntzarako nahiz erabilera zientifikoetarako baliatzen diren ibilgailuak, betiere Zerga Administrazioak behar bezala homologatu baditu ibilgailuen modeloak edo ibilgailuak banaka. Ondorio horietarako, ibilgailuek erabilera hori dutela joko da soilik bi eserleku badituzte (bata gidariarentzat eta bestea laguntzailearentzat), inolako eserleku gehigarririk nahiz horiek jartzeko ainguraketarik ez badute, zamarako guneak barneko bolumenaren %50 baino gehiago hartzen badu eta gune horretan alboetatik kanpora ikusi ezin bada.

4. Bi edo hiru gurpileko ziklomotorrak eta lau gurpileko ibilgailu arinak.

5. Motozikletak eta hiru gurpileko ibilgailuak -lau gurpileko zikloak ez-, betiere, bi kasuetarako, zilindraia ez bada 250 zentimetro kubikotik gorakoa, barne errekuntzako motorren kasuan, edo gehieneko potentzia garbia ez bada 16 kW-tik gorakoa, gainerako motorretan.

6. Mugikortasun murriztuko pertsonentzako ibilgailuak.

7. Ibilgailu bereziak, ez badira 47.1 artikuluko 4. epigrafean zehaztutako "quad" motako ibilgailuak.

8. Ibilgailu misto moldatzen ahal direnak, baldin eta karrozeriako sabaiko egituratik lurrerainoko altuera osoa 1.800 milimetrotik gorakoa bada, mendiko ibilgailuak ez badira, eta nabarmenki jarduera ekonomiko bati lotzen bazaizkie. Jarduera ekonomiko bati nabarmenki lotua dagoela joko da baldin eta, abenduaren 30eko 19/1992 Foru Legearen (Balio Erantsiaren gaineko Zerga) 41. artikuluan aurreikusitakoarekin bat, subjektu pasiboak, ibilgailuaren eskurapen edo inportazioa dela-eta, eskubidea badu jasandako edo ordaindutako Balio Erantsiaren gaineko Zergaren kuoten gutxienez %50eko kenkaria egiteko. Ondorio horietarako ez du garrantzirik izanen aipatutako Foru Legearen arauen ondorioz kenkaria izateko eskubidearen beste edozein mugaren aplikazioak.

Dena den, ibilgailu horien Espainiako lehenbiziko behin betiko matrikulazioa zerga honen pean egonen da baldin eta etxebizitza gisa erabiltzeko moldatzen badira.

9. Indar Armatuek, Estatuko Segurtasun Indar eta Kidegoek, Autonomia Erkidegoetako Segurtasun Indar eta Kidegoek, Toki Korporazioko Segurtasun Indar eta Kidegoek eta Aduanen Zaintzak erabiltzen dituztenak, defentsa, zaintza eta segurtasun lanetan.

10. Autopistak eta errepideak zaintzeko eta horietan laguntza emateko diren eta, beren ezaugarriengatik, beste deustarako erabili ezin diren ibilgailuak eta anbulantziak.

b) Jostetako eta ur kiroletako itsasontzien lehenbiziko matrikulazioa, berriak edo erabiliak izanik ere, baldin eta zortzi metrotik gorako luzera badute, ontzien matrikularen erregistroan, arruntean edo berezian, edo, erregistro horretan ezin inskribatu badira, lehenbiziko matrikulazioa dagokion kirol federazioan. Edonola ere, 47.1 artikuluko 4. epigrafean zehaztutako uretako motoen lehenbiziko matrikulazioa zergapean egonen da, luzera edozein izanik ere.

Luzera kalkulatzeko, kontuan hartuko da apirilaren 27ko 544/2007 Errege Dekretuan, jostetako ontziak banderapean jartzea eta matrikulatzea arautzen duen horretan (2007ko ekainaren 30ean indarrean den bertsioan) hala definitzen dena, ontziak matrikulatzeko Erregistroko zazpigarren Zerrendan.

Jostetako eta kiroletako ontzitzat hartuko dira honako hauek:

1. Ontzien matrikulen erregistroan, arruntean edo berezian, inskribaturik dauden ontziak, seigarren edo zazpigarren zerrendetan, edo dagokion kirol federazioaren erregistroan inskribaturik daudenak.

2. Aurreko 1. paragrafoan aipatutakoez kanpoko ontziak, baldin eta jostetako nabigazio pribaturako erabiltzen badira, abenduaren 28ko 38/1992 Legeko (Zerga Bereziei buruzkoa) 4. artikuluko 13. ataleko definizioarekin bat.

c) Motor mekanikoa duten hegazkin, hegazkin arin eta gainerako aireontzien, berrien edo erabilien lehenbiziko matrikulazioa Aireontzien Erregistroan, honako hauena izan ezik:

1. Beren ezaugarriak direla-eta soilik nekazaritzako edo oihaneko lanetarako edo eri eta zaurituen garraiorako erabiltzen ahal diren aireontziak.

2. Aireratzean gehienez ere 1.550 kilogramoko zama duten aireontziak, Abiazio Zibileko Zuzendaritza Nagusiak emandako ziurtagiriaren arabera.

d) Aurreko letretan zehaztutako garraiobideak Espainian erabiltzea edo zirkulatzea, haien behin betiko matrikulazioa Espainian egitea ez bada eskatu foru lege honen hirugarren xedapen gehigarrian aurreikusitako moduan, Espainian erabiltzen hasi ondoko hogeita hamar eguneko epean. Epe hori hirurogei egunekoa izanen da baldin eta ibilgailuak Espainian erabiltzen badira titularraren ohiko helbidea Espainiako lurraldera aldatu izanaren ondorioz, betiere foru lege horretako 43.1.n) artikuluan jasotako salbuespena aplikatzerik badago.

Ondorio horietarako, Espainian zirkulatzen edo erabiltzen hasitako datatzat honako hauek hartuko dira:

1. Aldi baterako inportazioko edo matrikula turistikoko araubidepean egon diren garraiobideak baldin badira, araubide horiek bazter utzi edo iraungi diren data.

2. Gainerako kasuetan, garraiobidea Espainian sartu zen data. Data modu frogagarrian ageri ez bada, erabileraren hasierako datatzat joko da honako bi hauen ondorengoa:

Lehena.–Garraiobideaz jabetu zen data.

Bigarrena.–Interesduna Espainian bizitzen hasi dela jotzen den data, edo Espainian kokaturiko establezimendu baten titular izaten hasten den data.

2.

a) Arestiko 1.a) idatz-zatian eta foru lege honen 47. artikuluko 1. idatz-zatian aipatutako ibilgailuak mugatzeko eta zehazteko, horietan berariaz aurreikusi ez diren kasuetarako, abenduaren 23ko 2822/1998 Errege Dekretuak onetsitako Ibilgailuen Erregelamendu Orokorraren II. eranskineko definizioak eta kategoriak erabiliko dira, 2007ko ekainaren 30ean indarrean den bertsioan.

b) Foru Lege honen ondorioetarako, ibilgailu berritzat joko dira halakotzat hartzen direnak abenduaren 30eko Balio Erantsiaren gaineko Zergari buruzko 19/1992 Foru Legean ezarritakoarekin bat.

c) Aurreko 1.a) zenbakiko Bederatzigarren eta Hamargarren ordinaletan loturarik gabe egoteko adierazten diren kasuak aplikatzeko, beharrezkoa izanen da aldez aurretik Zerga Administrazioak hori aitortzea, erregelamenduz ezarritako moduan. Espainian garraiobideak erabiltzea edo zirkulatzea denean zergapeko egintza, loturarik gabeko kasu horiek aplikatzeko, beharrezkoa izanen da, gainera, aldez aurreko aitorpen horretarako eskaera artikulu honen 1.d) zenbakian ezarritako epeetan aurkeztea.

Zergapean ez dauden kasu guztietan beharrezkoa izanen da Zerga Administrazioan adierazpen bat aurkeztea Ekonomia eta Ogasun Departamentuak ezarritako leku, modu, epe eta inprimakiak baliatuz. Paragrafo honetan aurreikusitakotik kanpo geldituko dira Zerga Administrazioak homologatutako ibilgailuak.

3. Zergapeko egintza egin eta lau urte pasatu baino lehen aldaketarik baldin badago foru lege honetan aurreikusitako loturarik gabeko edo salbuespeneko kasuak eragiten dituzten inguruabarretan edo baldintzetan, aldaketa hori egin den uneari erreferentzia eginez gauzatuko dira zerga bereziaren autolikidazioa eta diru-sarrera, salbu aldaketa horren ondoren foru lege honetan aurreikusitako loturarik ezaren edo salbuespenaren kasuren bat aplikatzekoa baldin bada. Garraiobidearen eskualdatzeak ondorioak izan ditzan matrikulazio arloan eskumena duen organo batean, beharrezkoa izanen da, kasuaren arabera, organo horri zergaren ordainketa frogatzea, edo organo hartan aurkeztea loturarik ezaren edo salbuespenaren aitorpena, organo kudeatzaileak behar bezala eginbidetua, edo loturarik ezaren edo salbuespenaren kasua aplikatzeko Zerga Administrazioak egin duen aldez aurreko aitorpena.

4. Garraiobideen behin betiko lehenbiziko matrikulazioa ez da zergari lotua egonen, haien zirkulazioa edo erabilera artikulu honetako 1. zenbakiko d) letran ezarritakoaren arabera egon denean zergari lotua, baldin eta ezarritako epeetan:

a) lotura horri dagokion zerga hori autolikidatu bada eta diru-sarrera egin bada, edo, bestela,

b) lotura horri dagokion zergaren likidazioa egin badu Zerga Administrazioak eta dagokion zenbatekoa sartu bada, edo, bestela,

c) Zerga Administrazioak aurretik onartu badu loturarik gabeko edo salbuespeneko kasu bat aplikatzea bidezkoa dela, horretarako aurreikusia dagoen kasuetan, edo, bestela,

d) zerga salbuesteari buruzko aitorpen bat aurkeztu bada Zerga Administrazioan, horretarako aurreikusia dagoen kasuetan.

43. artikulua. Salbuespenak , itzuli beharrak eta murrizpenak.

1. Zergatik salbuetsia egonen da ondoko garraiobideen behin betiko lehenbiziko matrikulazioa, edo, kasua bada, Espainian zirkulatzea edo erabiltzea:

a) Indarra duen legeriak taxitzat, autotaxitzat edo autoturismotzat hartzen dituen ibilgailuak.

b) Kontraprestazioaren aldera, gidatzen erakusteko jarduerari benetan eta bakar-bakarrik atxikitako ibilgailu automobilak.

c) Alokatze jarduerei benetan eta bakar-bakarrik atxikitako ibilgailu automobilak.

Ondorio horietarako, ez da ulertuko automobilen alokera jarduerarik dagoenik Balio Erantsiaren gaineko Zergari buruzko abenduaren 30eko 19/1992 Foru Legearen 27. artikuluan aurreikusitako moduan lotura duten pertsonei uzten zaizkienean, edo pertsona edo entitate berari hiru hilabetetik gora uzten zaizkionean, hamabi hilabetez segidan.

Ondorio horietarako, ez dira automobil alokeratzat hartuko errentamendu-salmenta kontratuak eta horiekin parekatuak, ezta erosteko aukera ematen duten errentamenduak ere.

d) Minusbaliatuen izenean eta berek bakarrik erabiltzeko matrikulatutako ibilgailu automobilak, betiere baldintza hauek gertatzen badira:

Lehena. Gutxienez lau urte igaro izana beste ibilgailu bat antzeko baldintzetan matrikulatu zenetik. Nolanahi ere, baldintza hori ez da eskatuko erabateko hondamenaren kasuetan, behar bezala frogatzen denean.

Bigarrena. Gero "Inter vivos" egintzen bidez ez eskualdatzea, matrikulatu eta ondoko lau urteko epean.

e) Matrikula diplomatikoaren araubidean matrikulazio berezia duten ibilgailuak, erregelamenduz finkatzen diren muga eta baldintzekin, honako hauen izenean:

Lehena. Espainian egoitza iraunkorra duten misio diplomatiko baimenduak eta agente diplomatikoak.

Bigarrena. Espainiako Estatuarekin egoitza hitzarmena sinatua duten nazioarteko erakundeak eta estatutu diplomatikoa duten bertako funtzionarioak.

Hirugarrena. Karrerako kontsulen bulegoak eta atzerriko nazionalitatea duten kontsuletxe bateko karrerako funtzionarioak.

Laugarrena. Misio diplomatikoetako eta nazioarteko erakundeetako langile tekniko eta administratiboak eta karrerako kontsulen bulegoetako langileak, baldin Espainiako nazionalitaterik eta Espainian egoitza iraunkorrik gabeko pertsonak badira.

Aurreko Bigarren eta Laugarren ordinaletan agintzen denagatik ere, erakunde horiek sortzeko nazioarteko hitzarmenek edo haien egoitza hitzarmenek beste muga edo baldintzarik ezartzen badute, haiek aplikatuko zaizkie erakunde horiei, estatutu diplomatikoa duten haien funtzionarioei eta haien langile tekniko-administratiboei.

f) Batasuneko beste estatu kide batean matrikulatutako ibilgailu automobilak, beste estatu kide batean establezimendua duten pertsonek edo entitateek Espainian egoitza duen pertsona fisiko baten eskura utzitakoak, betiere baldintza hauek betetzen badituzte:

Lehena. Eskura jartze hori egoitza duen pertsona fisikoarekin dagoen lan harremanaren ondorioz gertatzen bada, harreman hori soldatapekoa izan ala ez.

Bigarrena. Ibilgailua bereziki ez erabiltzea zerga modu iraunkorrean aplikatzen den lurraldean.

Ondorio horietarako, ibilgailua, bereziki, zerga modu iraunkorrean aplikatuko den lurraldean ez dela erabiltzen ulertuko da jasotzen duenak Espainian egoitza edukita ere lantokia mugakide den beste estatu kide batean duenean, eta ibilgailua erabiltzen badu lantokira joan-etorriak egiteko, oporrak kontuan hartu gabe.

g) Aisiako edo ur kiroletako ontziak, benetan alokatze jarduerei bakarrik atxikiak.

Salbuespen hau ibilgailuak alokatzeko ezarrita dauden baldintzak eta mugapenak betetzearen baldintzapean egonen da. Nolanahi ere, ez da alokatzeko jardueratzat hartuko titularrak ontzia errentan emateko lagatzen duenean, betiere titularrak edo hari lotutako pertsona batek ontzi hori edo lagapen hartzaileak edo hari lotutako beste pertsona batek duen beste ontzi bat erabiltzeko eskubide osoa edo partziala jasotzen badu titulu baten bidez. Lerroalde hau aplikatzeari begira, Balio Erantsiaren gaineko Zergari buruzko Foru Legearen 27. artikuluan ezarritako baldintzak betetzen dituztenak izanen dira titularrari lotutako pertsonak.

h) Aisiako edo ur kiroletako ontziak, titularrak Merkataritzako Nabigazioaren Zuzendaritza Nagusiak ofizialki aitortutako ur kirol eskolak badira eta ontziak gobernatzeko irakaskuntzan benetan eta bakar-bakarrik erabiltzen badira.

Dena den, aisiako edo ur kiroletako ontziek ez dute galduko salbuespena izateko eskubidea baldin eta, salbuetsita egonik, irakaskuntzan eta alokairuan erabiltzen badira eta artikulu honetako 1. idatz-zatiko g) letraren bigarren lerroaldean ezarritako betebeharrak betetzen badira.

i) Duten konfigurazioarengatik arrauna edo pala beste bultzabiderik ezin eduki duten ontziak, eta maila olinpikoko belaontziak.

j) Estatuak, autonomia erkidegoek, toki korporazioek edo enpresa nahiz erakunde publikoek matrikulatzen dituzten aireontziak.

k) Abiazio Zibileko Zuzendaritza Nagusiak ofizialki baimendutako eskolen izenean matrikulatutako aireontziak, benetan pilotuak hezteko eta prestatzeko edo haien lanbide birziklapena egiteko bakarrik direnak.

l) Aire nabigazioko enpresen titulartasuna duten aireontziak, betiere haien erabilera ezin bada sailkatu aisiako abiazio pribatu gisa, Zerga Berezien Araubide Erkidea ezartzen duen Legearen 4. artikuluko 4. idatz-zatian ezarritakoaren arabera.

Aire nabigazioko enpresei alokatutako aireontzien kasuan, salbuespena ez da aplikatuko baldin eta errentatzaileak edo hari lotutako pertsonak, denak batera hartuta, aireontziaren azkeneko erabiltzaileak badira aireontziaren hegaldi-orduen %5 baino denbora gehiagoz, hamabi hilabete jarraiko epean. Letra hau aplikatzeari begira, Balio Erantsiaren gaineko Zergari buruzko Foru Legearen 27. artikuluan ezarritako baldintzak betetzen dituztenak izanen dira titularrari lotutako pertsonak.

m) Aire nabigazioko enpresei bakarrik alokairuan lagatzeko matrikulatu diren aireontziak, betiere haien erabilera ezin bada sailkatu aisiako abiazio pribatu gisa, Zerga Berezien Araubide Erkidea ezartzen duen Legearen 4. artikuluko 4. idatz-zatian ezarritakoaren arabera.

Salbuespena ez da aplikatuko baldin eta matrikulazio datuetan agertzen den pertsona edo hari lotutako pertsonak aireontziaren azkeneko erabiltzaileak badira aireontziak hamabi hilabete jarraian egiten dituen hegal-orduen %5ean baino gehiago. Letra hau aplikatzeari begira, Balio Erantsiaren gaineko Zergari buruzko Foru Legearen 27. artikuluan ezarritako baldintzak betetzen dituztenak izanen dira titularrari lotutako pertsonak.

n) Titularrak bere ohiko egoitza atzerritik Espainiara aldatzearen ondorioz matrikulatzen edo erabiltzen diren garraiobideak. Honako eskakizunak betetzea izanen da salbuespena aplikatzeko baldintza:

1. Interesdunek Espainiako lurraldeaz kanpo izan behar duten ohiko egoitza, egoitzaz aldatu aurreko hamabi hilabeteetan gutxienez.

2. Garraiobide horiek jatorrizko herrialdean zerga baldintza normaletan erosiak edo inportatuak beharko dute izan, herrialde hartatik ateratzeagatik sorrarazitako kuoten inolako salbuespenik edo itzulketarik izan gabe.

Baldintza hori betetzat joko da garraiobideak erosi edo inportatzeko araubide diplomatiko edo kontsularretan ezarritako salbuespenak erabili direnean, edo jatorrizko estatuan egoitza duten eta baimendu diren nazioarteko erakundeen kideen aldeko salbuespenak erabili direnean, erakunde horiek sortzeko nazioarteko hitzarmenek egoitza akordioen bidez ezartzen dituzten muga eta baldintzekin.

3. Garraiobide horiek interesdunak bere lehengo egoitzan erabiliak beharko dute, gutxienez egoitza hura utzi aurreko sei hilabeteetan.

4. Matrikulazioa foru lege honen 42.1.d) artikuluan aurreikusitako epean eskatu beharko da.

5. Salbuespen hau izan duten garraiobideak ezin dira eskualdatu matrikulatu ondoko hamabi hilabeteetan. Baldintza hau ez betetzeak zerga ordainaraztea ekarriko du, betetzen ez den datatik aurrera.

ñ) Europar Batasuneko beste estatu batean matrikulatutako garraiobideak, Espainian bizi diren pertsonek edo entitateek Europar Batasuneko beste estatu bateko hornitzaile bati alokatuak hiru hilabetetik beherako aldi baterako, idatz-zati honetako c) letran ezarritako salbuespena aplikatzen ezin bazaie.

2. Aurreko idatz-zatiko a), b), c), d), f), g), h), k), m) eta ñ) letretan aipatzen diren salbuespenak aplikatzeko baldintza izanen da Zerga Administrazioak aurrez aitortua izatea, erregelamenduz finkatzen den moduan. Bereziki, d) letrak aipatzen duen salbuespenaren kasuan, beharrezkoa izanen da aurrez Foru Komunitateko Gizarte Politiketako Departamentuko zerbitzuek, Gizarte Zerbitzuen Institutu Nazionalak edo kudeaketa entitate eskudunek minusbaliotasunaren edo baliaezintasunaren ziurtagiria ematea.

Aurreko zenbakiko e) letrak aipatzen duen salbuespena aplikatzeko, aurrez Kanpo Arazoetarako eta Lankidetzarako Ministerioak haren egokitasuna egiaztatu beharko du.

Salbuespeneko gainerako kasuetan beharrezkoa izanen da Zerga Administrazioan adierazpen bat aurkeztea Ekonomia eta Ogasun Departamentuak ezarritako leku, modu, epe eta inprimakiak baliatuz.

Espainian garraiobideak erabiltzea edo zirkulatzea denean zergapeko egintza, aurreko zenbakian ezarritako salbuespenak aplikatzeko beharrezkoa izanen da aldez aurreko baimenaren eskaera edo dagokion aitorpenaren aurkezpena 42.1.d) artikuluan ezarritako epeetan egitea.

3. Garraiobide erabiliak saltzea lanbide duten enpresaburuek eskubidea izanen dute garraiobidea kanpora bidalitako mementuan zuen balioari dagokion kuota ordainduaren zatia itzultzeko, zergapeko egintza egitetik lau urte iragan baino lehen zergaren aplikazio eremuaz kanpora behin betiko bidali dutela frogatzen duten garraiobidearen kasurako. Garraiobidearen zergaren aplikazio eremuaz kanpora behin betiko bidali dutela frogatzeko, kasuko erregistroko bajaren ziurtagiria aurkeztuko da, matrikulazio gaietan eskudun den organoak emana.

Aurreko lerroaldeak aipatzen duen itzultze kasuan, honako arauok aplikatuko dira:

a) Salmenta irmo baten ondorioz gertatua behar da garraiobidea zergaren aplikazio eremuaz kanpora bidaltzea.

b) Itzulitakoaren oinarria garraiobideak bidali zen mementuan zuen merkatu-balioa izanen da, betiere goreneko muga dela foru lege honen 46. artikuluko b) letrak aipatzen dituen balorazio taulak aplikatzean sortzen den balioa.

c) Itzulitakoaren tasa zerga kitatzeko orduan aplikatu zena izanen da.

d) Itzulitakoaren zenbatekoa ez da inoiz izanen ordaindu den kuota baino handiagoa.

e) Garraiobide erabilia saltzen duen enpresaburuak eskatuko du dirua itzultzeko, Ekonomia eta Ogasun Departamentuak agintzen duen tokian, moduan, epean eta inprimakian.

 4. Zergaren oinarria, foru lege honetako 46. artikuluak agintzen duen moduan kalkulatua, 100eko 50ean gutxituko da gidariaren tokia kontatuta gutxienez bost tokiko eta gehienez bederatzi tokiko kapazitate homologatua duten ibilgailu automobilen kasuan baldin araudi indardunaren arabera familia larritzat hartzen direnek soilik erabiltzekoak badira, baldintza hauekin:

a) Ibilgailuaren lehenbiziko matrikulazio behin betikoa familia larri horietako aita edo amaren izenean egina izanen da, edo, bestela, bien izenean.

b) Aurreko a) letran aipatu pertsonen izenean eta gutxitze horrekin beste ibilgailu bat matrikulatu zenetik gutxienez lau urte iragatea. Baldintza hori, hala ere, ez da eskatuko delako ibilgailuak erabateko hondamena izan bazuen, behar bezala frogatua.

c) Gutxitze hori erabiliz matrikulatu den ibilgailua ondoren "inter vivos" egintza baten bidez eskualdatzea ez da zilegi izanen matrikulatu ondoko lau urteko epean.

d) Gutxitze hori aplikatzeko nahitaezkoa da aurrez Tributu Administrazioak aitorpena ematea erregelamenduz ezartzen den moduan. Betiere Tributu Administrazioan aurkeztu beharko da familia larria izatearen zertifikazioa, Nafarroako Foru Komunitatearen Administrazioko, Administrazio Zentraleko edo kasuko Autonomi Administrazioko organoak emana.

5. Ondoko ibilgailu hauek ordaindu beharreko zergaren zerga-oinarria, 46. artikuluan ezarritakoaren arabera kalkulatuko dena, %30 murriztuko da:

a) Abenduaren 23ko 2822/1998 Errege Dekretuaren bidez onetsitako Ibilgailuen Erregelamendu Orokorraren II. eranskinean, 2007ko ekainaren 30ean indarra duen bertsioan, "autokarabana" gisa definitzen direnak.

b) Etxebizitza gisa erabiltzeko moldatutako ibilgailuak, 42. artikuluko 1.a) idatz-zatian, zehazki, 1. zenbakiaren azkeneko paragrafoan eta 8. zenbakiaren azken paragrafoan, aipatzen direnak.

44. artikulua. Subjektu pasiboak.

Zergaren subjektu pasiboak izanen dira:

a) Lehenbiziko aldiz garraio baliabidearen behin betiko matrikulaketa euren izenean eginik duten pertsona edo entitateak.

b) Foru lege honen 42. artikuluko 1. idatz-zatiko d) letran aurreikusitako kasuetan, garraiobidearen behin betiko matrikulazioa egin behar duten pertsonak nahiz entitateak.

c) Foru Lege honen 42. artikuluko 3. zenbakian aurrikusitako kasuetan, garraio baliabidea euren izenean matrikulatuta duten pertsona edo entitateak.

45. artikulua. Sortzapena.

1. Zerga subjektu pasiboak garraio baliabidearen lehenbiziko behin betiko matrikulaketaren eskabidea aurkezten duen momentuan sortuko da.

2. Foru lege honen 42. artikuluko 1. idatz-zatiko d) letran aurreikusitako kasuetan, letra horrek aipatutako epea bukatu eta biharamunean sorraraziko da Zerga.

3. Foru Lege honen 42. artikuluko 3. zenbakian aurrikusitako kasuetan, Zerga ordaindu beharrik ez izatea eragin duten inguruabar edo betebeharrak aldatzen diren momentuan sortuko da Zerga.

46. artikulua. Zerga oinarria.

Zerga oinarria honelaxe osatuko da:

a) Garriabide berrien kasuan, garraio baliabidea eskuratzerakoan, Balio Erantsiaren gaineko Zergarako edo honen baliokide den beste Zerga baterako zerga-oinarri bezala ezarritako kopurua. Aipatu zergak egon ezik, garraio baliabidea eskuratzen duenak emandako kontraprestazioaren zenbateko osoa, Balio Erantsiaren gaineko Zerga erregulatzen duen arautegiaren arabera ezarria. Nolanahi ere, azken kasu horretan ez dira zerga-oinarriaren parte izanen Kanarietako Zeharkako zerga orokorraren kuotak, garraiobidearen saltzaileak ordainduak edo zuzenean jasandakoak badira.

b) Garraiobide erabilien kasuan, zergaren sorrarazpen egunean duten merkatuko balioaren arabera.

Aurretik atzerrian matrikulatuta egonda, lehenengo behin betiko matrikulazioa Espainian egiten duten garraiobide erabilien kasuan, merkatuko balioari hau kenduko zaio: garraiobidea berria izatera, Espainian lehenengo behin betiko matrikula egiteagatik ordaindu beharko zituen zeharkako zergen kuoten hondarreko zenbatekoa, betiere kopuru hori merkatuko balioan sartu bada eta kengarria ez bada. Hori horrela, hondarreko zenbateko hori kalkulatzeko, zerga sorrarazten den unean garraiobide erabiliak duen merkatuko balioari ehuneko hau aplikatuko zaio: zerga horien kuotek garraiobide hori berria izanez gero izanen zuen salmenta prezioan, zergak barne, eginen zuten ehuneko bera.

Merkatuko balioa kalkulatzeko, subjektu pasiboek Ekonomia eta Ogasuneko kontseilariak onesten dituen batez besteko salmenta prezioak erabiltzen ahalko dituzte, zerga sorrarazten den egunean indarra dutenak. Aurreko paragrafoan azaldutako deskontua aplikagarria bada, Ekonomia eta Ogasuneko kontseilariak finkatuko du jasandako zeharkako zergen kuoten hondarreko zenbatekoak batez besteko prezio horietan hartzen duen zatia kalkulatzeko prozedura.

Subjektu pasiboek aurreko paragrafoan ezarritakoaren arabera kalkulatutako merkatuko balio jakin bat aitortzen badute, zerga administrazioak ezin izanen du balio hori egiaztatu Tributuei buruzko abenduaren 14ko 13/2000 Foru Lege Orokorraren 44. artikuluan adierazitako gainerako baliabideak erabiliz.

 47. artikulua. Zerga-tasak.

1. Aplikatzekoak diren zerga tasak zehazteko epigrafe hauek ezarri dira:

1. epigrafea.

a) CO2-ren jaulkipen ofizialak 120 g/km-tik gorakoak ez dituzten ibilgailuak, "quad" motako ibilgailuak eta 6., 7., 8. eta 9. epigrafeetan adierazten diren ibilgailuak izan ezik.

b) Motor bakarreko ibilgailuak, barne errekuntzakoak ez badira, "quad" motako ibilgailuak izan ezik.

2. epigrafea.

CO2-ren jaulkipen ofizialak 120 g/km-tik gorakoak baina 160 g/km-tik beherakoak dituzten ibilgailuak, "quad" motako ibilgailuak eta 9. epigrafean adierazten diren ibilgailuak izan ezik.

3. epigrafea.

CO2-ren jaulkipen ofizialak 160 g/km-tik gorakoak baina 200 g/km-tik beherakoak dituzten ibilgailuak, "quad" motako ibilgailuak eta 9. epigrafean adierazten diren ibilgailuak izan ezik.

4. epigrafea.

a) CO2-ren jaulkipen ofizialak 200 g/km-koak edo hortik gorakoak dituzten ibilgailuak, "quad" motako ibilgailuak eta 9. epigrafean adierazten diren ibilgailuak izan ezik.

b) CO2-ren jaulkipenen neurketa behar duten ibilgailuak, horien frogagiririk ez dagoenean.

c) Etxebizitza gisa moldatu eta N2 eta N3 kategorietan jaso diren ibilgailuak.

d) "Quad" motako ibilgailuak. Hona zer hartzen den "quad" motako ibilgailutzat: lau gurpil edo gehiagoko ibilgailua, eskulekua duena gidagailu, gidaria zangalatrau doana eta errepidetik kanpo ibiltzeko trakzio sistema egokia duena.

e) Uretako motoak. Hona zer hartzen den "uretako mototzat": motor batek higiarazitako ontzia, pertsona batek edo gehiagok krosko baten mugen gaineko aldean -ez barrenean- eserita, belauniko edo zutik, gidatzeko proiektatua.

5. epigrafea.

a) 1., 2., 3., 4., 6., 7., 8. edo 9. epigrafeetan jaso ez diren ibilgailuak.

b) Jostetako eta kiroletako itsasontziak, uretako motoak izan ezik.

c) Hegazkinak, hegazkin arinak eta bestelako aireontziak.

6. epigrafea. 9. epigrafearen c) letran sartzen ez diren motozikletak, horien CO2-ren isuri ofizialak 100 g/km-tik gorakoak ez badira.

7. epigrafea. 9. epigrafearen c) letran sartzen ez diren motozikletak, horien CO2-ren isuri ofizialak100 g/km-tik gorakoak eta 120 g/km-koak edo beherakoak badira.

8. epigrafea. 9. epigrafearen c) letran sartzen ez diren motozikletak, horien CO2-ren isuri ofizialak 120 g/km-tik gorakoak eta 140 g/km-tik beherakoak badira.

9. epigrafea.

a) Epigrafe honen c) letran sartzen ez diren motozikletak, horien CO2-ren isuri ofizialak 140 g/km-koak edo gorakoak badira.

b) Epigrafe honen c) letran sartzen ez diren motozikletak, horien CO2-ren isuri ofizialak frogatzen ez badira.

c) 74 kW-eko edo hortik gorako EEE potentzia (100 zp) duten motozikletak eta gehieneko potentzia garbia, ibilgailuaren masa martxan dagoelarik, 0,66 kW/kg-koa edo hortik gorakoa dutenak, CO2-ren isuri ofiziala edozein izanda ere.

2. Hona hemen aplikatzekoak diren zerga tasak:

1. eta 6. epigrafeak: %0.

2. eta 7. epigrafeak: %4,75.

3. eta 8. epigrafeak: %9,75.

4. eta 9. epigrafeak: %14,75.

5. epigrafea: %12.

3. Sortzapen unean indarrean den zerga-tasa aplikatuko da.

4. Ibilgailuaren fabrikatzaileak edo inportatzaileak horretarako emandako ziurtagiri baten bidez frogatuko dira CO2ko emisio ofizialak, salbu ibilgailuaren azterketa teknikoaren txartelean jasotzen bada edo ibilgailu bakoitzerako agiri ofizial batean.

47 bis. artikulua. Zergaren kuota.

1. Tributu kuota kalkulatzeko, zerga-oinarriari 47. artikuluan araututako zerga-tasak aplikatuko zaizkio.

2. Hala ere, zerga aplikatzen den lurraldean garraiobideak erabiliak diren hilabete bakoitzeko edo hilabete zati bakoitzeko finkatuko da tributu kuota, kasu hauetan:

a) Batasuneko beste estatu kide batean matrikulatutako ibilgailu automobilak badira, beste estatu kide batean establezimendua duten pertsonek edo entitateek Espainian egoitza duen pertsona fisiko baten eskura utzitakoak, betiere baldintza hauek betetzen badituzte:

1. Eskura jartze hori egoitza duen pertsona fisikoarekin dagoen lan harremanaren ondorioz gertatzen bada, harreman hori soldatapekoa izan ala ez.

2. Ibilgailua bereziki eta modu iraunkorrean erabiltzea zerga aplikatzen den lurraldean.

b) Europar Batasuneko beste estatu batean matrikulatutako garraiobideak badira, Espainian bizi diren pertsonek edo entitateek Europar Batasuneko beste estatu bateko hornitzaile bati alokatuak hiru hilabetetik gorako aldi baterako.

Zehazki, tributu kuota kalkulatzeko, 1. idatz-zatiaren arabera zehaztutako zenbatekoa portzentaje hauekin biderkatuko da:

Lehen 12 hilabeteak: %3.

13. hilabetetik 24. hilabete bitarte: %2.

25. hilabetetik aurrera: %1.

Idatz-zati honetan ezarritakoaren arabera zehaztutako tributu kuotaren zenbatekoa ezin da izan 1. idatz-zatiaren arabera zehaztutakoarena baino handiagoa

48. artikulua. Zergaren likidazioa eta ordainketa.

1. Subjektu pasiboak zergaren autolikidazioa egin beharko du, eta ordaindu, Ekonomia, Ogasun, Industria eta Enplegu Departamentuak ezartzen dituen toki, modu, epe eta inprimakietan.

Tributu kuota 47.bis.2 artikuluan arabera zehaztu denean, eta Zerga Administrazioaren organoek beharrekotzat jotzen badute, autolikidazioarekin batera bermatuko da tributu kuota 47.bis.1 artikuluan ezarritakoaren arabera zehaztu izan balitz zegokiokeen gainerakoa, kreditu entitate baten edo elkarrenganako bermedun sozietate baten abal solidarioa edo kauzio-aseguruaren ziurtagiria erabilita.

Garraiobidea zerga aplikatzen den lurraldetik kanpo bidali dela frogatzen den unean itzuliko da bermearen zenbatekoa.

Zerga aplikatzen den lurraldean garraiobidea aitortutakoa baino denboraldi luzeagoan erabiltzen bada subjektu pasiboak egoera erregularizatu gabe, 47.bis.1 artikuluan ezarritakoaren arabera kalkulatutako tributu kuota likidatuko da, aldez aurretik sartutako zenbatekoa kenduta.

2. Organo eskudunaren aurrean behin betikoz matrikulatu aurretik, zerga administrazioak autolikidazioa ikus-onetsi beharko du, Ekonomia eta Ogasun Departamentuak finkatzen duen moduan. Autolikidazioaren ondoriozko kuota txikiagoa baldin bada Ekonomia eta Ogasun Departamentuak onetsi dituen salmentarako batez besteko prezioak aplikatuz gero aterako litzatekeena baino, ikus-onespena eman aurretik Zerga Administrazioak zerga-oinarrian agertzen den zenbatekoa edo balioa egiaztatu ahal izanen du. Egiaztapena Tributuei buruzko abenduaren 14ko 13/2000 Foru Lege Orokorraren 44. artikuluan ezarritakoari jarraikiz eginen da. Aintzat hartuko diren batez besteko prezioak interesdunak Zerga Administrazioan ikus-onespena eskatzen duenean indarra dutenak izanen dira. Aitortutako zenbatekoa edo balioa aldez aurretik egiaztatzen ahalko da, orobat, Ekonomia eta Ogasun Departamentuak onesten dituen tauletan ez badago batez besteko salmenta preziorik aurkeztutako autolikidazioaren xede den garraiobiderako.

Egiaztapena egiteko gehieneko epea hirurogei egunekoa izanen da, garraiobidearen agiriak Zerga Administrazioaren eskura jartzen den egunetik hasita. Epe horretan egiaztapena egiten ez bada, zergadunak aitortutako zenbateko- edo balio-oinarria behin-behinekoz ikus-onetsiko da. Epea kalkulatzeari dagokionez, jakinarazi beharra bete dela ulertzeko aski izanen da egiaztatzea ebazpenaren testu bakarra biltzen duen jakinarazpena egiten saiatu direla, behin bederen. Ebazpena emateko epearen barrenean ez dira kontatuko ez erregelamenduz ezartzen diren etenaldi arrazoituak, ez eta Zerga Administrazioari egozteko modukoak ez diren arrazoiengatik prozeduran gertatzen diren atzerapenak ere. Ikus-onespena behin-behinekoz ematen ahalko da, zenbatekoa edo balioa aldez aurretik egiaztatu gabe, autolikidazioa aurkezten den unean berean. Kode elektroniko bat emanez egiten ahalko da.

Ikus-onespena behin-behinekoz emateak ez du eragotziko ondoren Administrazioak autolikidazioa bere elementu guztietan egiaztatzea.

3. Garraiobidearen behin betiko matrikulazioa egiteko, zerga ordaindu dela frogatu beharko da edo, hala badagokio, ordaindu beharrik ez duela edo salbuetsita dagoela.

49. artikulua. Arau-hausteak eta zehapenak.

1. Zerga honen tributu arau-hausteak arautegi orokorrak arlo honetan ezarritakoaren arabera kalifikatu eta zehatuko dira.

2.

III. TITULUA. HELEGITEAK

50. artikulua.

Lehenbiziko Xedapen Gehigarria

Foru lege honetan agertzen diren ondorengo kontzeptu hauen erreferentziak zerga berezien araubide erkidea ezartzen duen araudian unean-unean definitzen diren ber kontzeptuenak izanen dira: "barneko lurralde eremua", "barnekoa ez den Batasuneko lurralde eremua", "autokontsumoa", "aisiarako abiazio pribatua", "erreferentziako administrazio kodea", "NC kodeak", "Erkidegoa" eta "Erkidegoaren lurraldea", "gordailuzain baimendua", "?jasotzeko gordailua", "gordailu fiskala", "erregistraturik dagoen hartzailea", "zuzeneko entrega", "bidalketa bermatuak", "Estatukidea" eta "Estatukide baten lurraldea", "bidaltzaile erregistratua", "esportazioa", "fabrika", "fabrikazioa", "inportazioa", "nazioarteko itsasoko edo aireko nabigazioa", "aisiako nabigazio pribatua", "anoa-hornidurako produktuak", "fabrikazioaren gaineko zerga berezien xedeko produktuak", "ontziaren barreneko hornidurak", "jasotzaile baimendua", "aduanako etendura araubidea", "etendura araubidea", "ordezkari fiskala", "hirugarren herrialdea", "hirugarren lurraldea", "zergarik gabeko dendak", "eraldaketak" eta "urrutiko salmentak".

Bigarren Xedapen Gehigarria

Kanariak, Ceuta eta Melillarekin zerikusia izanik, Foru Lege honetan aipatu eta zerga berezien xede diren eragiketak erregimen amankomuneko arautegian berauetarako xedatutakoari lotuko zaizkio.

Hirugarren Xedapen Gehigarria. Behin betiko matrikulazioa Espainian.

1.Foru lege honek aipatzen dituen garraiobide berrien nahiz erabilien behin betiko matrikulazioa Espainian egin beharko da, baldin eta Espainiako egoiliarrak diren pertsonek edo entitateek eta, orobat, Espainian dauden establezimenduetako titularrak diren pertsonek edo entitateek erabili behar badituzte lurralde horretan.

2. Garraiobideen matrikulazioa arautzen duen berariazko araudian ezarritakoa galarazi gabe, ez da eskatuko aurreko zenbakian aurreikusitako betebeharra baldin eta, garraiobide batzuen gaineko zerga bereziari buruz 42.1.d) artikuluan ezarritako betebeharrari dagokionez, eta manu horretan ezarritako epeen barnean:

a) zerga autolikidatu eta dirua sartu bada, edo, bestela,

b) Zerga Administrazioari eskatu bazaio aurretik loturarik gabeko edo salbuespeneko kasu baten aplikazioa onartzeko, horretarako aurreikusia dagoen kasuetarako, edo, bestela,

c) Zerga Administrazioan zerga salbuespen bati buruzko aitorpen bat aurkeztu bada.

3. Garraiobideen matrikulazioa arautzen duen berariazko araudian ezarritakoan galarazi gabe, aurreko 1. zenbakian aurreikusitako betebeharra ere ez da eskatuko baldin eta Zerga Administrazioak atxikipen horri dagokion zerga likidatu badu eta dagokion zenbatekoa sartu badu.

4. Aurreko zenbakiek azaldutako betebeharra ez dela bete egiaztatzen denean, Zerga Administrazioaren organoek edo zirkulazio, bide segurtasun, nabigazio edo aireko nabigazio arloan eskumena duten organoek, tributudunari bost eguneko epea emanen diote hura betetzeko edo zenbait garraiobideren gaineko zerga berezia ordainduko dela bermatzeko, hauetakoren bat aurkeztuta: kreditu entitate baten edo elkarren bermerako sozietate baten abal solidarioa edo kauzio aseguruaren ziurtagiri bat. Epe hori iraganik, ez bada behin betiko matrikulaziorik egin edo aipatutako abala edo ziurtagiria ez bada aurkeztu, organo horiek garraiobidea ibilgetu eginen dute harik eta administrazio eta zerga egoera erregularizatu dela frogatzen den arte. Nolanahi ere, ibilgetzea kendu eginen da tributudunak abal solidarioa edo aseguruaren ziurtagiria lehen adierazitako moduan aurkezten badu.

Lehenbiziko Xedapen Iragankorra. Elkarte barruko zirkulazioa.

Zerga berezien xede izanik, 1993.eko urtarrilaren 1a baino lehenago Elkarte barruko zirkulazioaren etendura erregimenaren menpean dauden produktuek beronen menpean jarraituko dute, erregimen horiek erregulatzen dituzten arauen arabera burutu arte.

Bigarren Xedapen Iragankorra. Zergagaia.

Foru Lege honetan jasotakoaren arabera, fabrikazioaren gaineko zerga berezien xede diren eta fabrikatu, inportatu edo sartuak izan diren produktuen kasuan, indarrean sartu baino lehenago fabrika edo biltegi fiskalen barruan egonez gero, sortzapena gertatzerakoan bete beharko dira zerga hauek, sortzen diren unean indarra duten tasekin, Foru Lege honen 7. artikuluan xedatutakoarekin bat etorriz.

Hirugarren Xedapen Iragankorra. Salbuespenak.

1. Fabrikazioaren gaineko zerga berezien xede izanik, Foru Lege honek indarra hartu baino lehenago zerga horiek ordaintzeke eskuratu edo inportatu diren produktuak, beren xedea dela eta, abenduaren 23ko 25/1985 Foru Legean ezarritako salbuespen kasuetariko batez baliatu izanagatik, xede horretarako erabili edo kontsumitu ahalko dira, Foru Lege honetan ezarritakoarekin bat etorriz, etendura erregimenean eduki ahal badira edo salbuespen edo itzulketarako eskubidea sortzen badute.

2. Abenduaren 23ko 25/1985 Foru Legearekin bat etorriz, fabrikazioaren gaineko zerga berezien xede diren produktuen fabrikazioa edo inportazioa dela eta, salbuespenaz baliatu diren industrariek, baldin eta aurreko zenbakian ezarritakoa aplikagarri ez badute, 1993.eko martxoaren 31a baino lehen, produktu horien izakinei buruzko aitorpen-likidazio bat aurkeztu beharko dute Ekonomia eta Ogasun Departamentuan, bertan adieraziz, halaber, Foru Lege honek indarra hartzerakoan euren esku egon eta beste batzuei bidaltakoak, eta Foru Legean ezarritako tasei dagozkien tasak ordainduko dituzte.

3. Foru Lege honek indarra hartzen duenetik 1993.eko ekainaren 30a arte, Foru Lege honek zergaz salbuetsitzat jotzen duen helbururen bat izan eta fabrikazioaren gaineko zerga berezien xede diren produktuak eskuratu edo inportatzea, abenduaren 23ko 25/1985 Foru Legearen arabera emandako baimenen babesean eginen da, baldin eta 1992.eko abenduaren 31n indarra baldin badute, indarraldia 1993.eko ekainaren 30a arte luzatuko zaielarik. Salbuespen kasu berrietan edo eskuratzaileak edo inportatzaileak aurretik baimenik ez bazuen, salbuespena lortzeko aski izanen da saltzailearen aurrean edo, bestela, aduanan inportatzaileak sinatu eta Tributu Administrazioak aurretik bisatutako idazki bat aurkeztea, bertan, aplikagarritzat jotzen den salbuespen kasua zehaztuta, Zerga ordaindu gabe eskuratu nahi diren produktuei emanen zaien erabilera onura izateko eskubidea sortzen duena izanen dela adieraziko delarik. Eskuratzailea jasotako produktuen erabilera okerren erantzule izanen da.

4. Etendura erregimenean eskuratzeko aski izanen da hornitzaileari gordailuzain baimenduaren izaera frogatzea; horretarako, erregistroan sartzeko txartelek, Foru Lege honek indarra hartu baino lehen egin badira eta 1993.eko ekainaren 30a baino lehen balioa galdu behar badute, azken egun hau arte izanen dute indarra.

5. Jasotako produktuak Foru Lege honen arabera salbuespen eskubidea sortzen duten erabileretan autokontsumitzen dituzten erregistratutako eragiketagile, erregistratugabe eta hartzaile baimenduek onura horrekin eta inongo betebehar formalik gabe kontsumitu ahalko dituzte 1993.eko ekainaren 30a arte, produktuei ematen dieten erabileraren erantzule izanen direlarik.

Laugarren Xedapen Iragankorra. Itzulketak.

1. Abenduaren 23ko 25/1985 Foru Legearekin bat etorriz, eta Foru Lege honek indarra hartu baino lehenago, produktuengatik ordaindutako kuoten itzulketa osoak edo partzialak eskatu baldin badira eta produktu horiek Fabrikazioaren gaineko zerga berezien xede izanik, itzulketaren eskubidea sortu zuten xedeetan kontsumitu edo erabili ahalko dira, itzulketa orduan indarra duen prozeduraren arabera eginen delarik.

2. Foru Lege honek indarra hartu baino lehen Zerga bereziak sortutako kuotak itzultzeko eskubidea sortzen duten produktuen esportazioetan itzuli beharreko zenbatekoa 1992.eko abenduaren 31ean indarra duten tasen arabera zehaztuko da.

Bostgarren Xedapen Iragankorra. Alkohol eta Edari Deribatuen gaineko Zerga.

1. Foru Lege honetan derogatutako arautegiaren arabera desnaturaldutako alkohol izakinak, Foru Lege horrek indarra hartzen duenean alkohol biltegizainen edo txikikako saltzaileen eskuetan daudenak, guztiz desnaturaldutako alkoholtzat hartuko dira 1993.eko ekainaren 30a arte eta ordura arte halaxe merkataratu ahalko dira.

2. Desnaturaldutako alkohol harrera egiteko baimenak, 1992.eko abenduaren 31a arte indarra dutenak, 1993.eko ekainaren 30a arte baliozkotzat joko dira, guztiz desnaturaldutako alkohol harrerei dagokienean.

3. 1993.eko ekainaren 30a arte alkoholaren txikizkako saltzaileek Zerga ordaindu gabe guztiz desnaturaldutako alkohol harrerak egin ahalko dituzte. Horretarako, aski izanen da hornitzaileari eskabide bat, hartzaileak izenpetua, idatziz zuzentzea, bertan Zenbait Ihardueraren gaineko Kontribuzioari edo, hala badagokio, Iharduera Ekonomikoen gaineko Zergari buruzko arauei jarraikiz, desnaturaldutako alkohola txikizka saltzeko ahalmena eman zaion saltegi baten titularra dela frogatuko delarik. Txikizkako saltzaile hauek ezin salduko dute guztiz desnaturaldutako alkoholetik lau litro baino gehiagorik eta hartzaileen eta emandako kantitateen datu identifikatzaileen erregistro bat egin beharko da, alkohol horren erabilera zein izanen den frogatu ahal izateko.

4. Ekonomia eta Ogasun Departamentuan alkohol biltegi bezala inskribatutako saltegiak biltegi fiskaltzat hartuko dira 1993.eko ekainaren 30a arte, guztiz desnaturaldutako alkoholari dagokionean.

Seigarren Xedapen Iragankorra. Garraiabide batzuen gaineko Zerga.

1. Garraiabideen lehenbiziko matrikulaziorako ez da Zerga Berezirik ordaindu beharko, eman edo inportatzeari dagokion Balio Erantsiaren gaineko Zerga 1993.eko urtarrilaren 1a baino lehen sortzen bada.

Aurreko lerroaldean ezarritakoa gorabehera, matrikulatutako garraio baliabideen lehenbiziko eskualdaketa, 1993. eta 1994. urteetan egiten denean, Garraiabide batzuen gaineko Zerga Berezia ordaindu beharra egonen da 1992.eko urriaren 23tik 1992.eko abenduaren 31ra, biok barne, eskualdatzaileak garraio baliabide horiek eskuratzerakoan gehitutako tasaren Balio Erantsiaren gaineko Zerga ordainduta, horren kuoten deskontuaren eskubidea badu.

Foru Lege honen 42. eta 43. artikuluetan xedatutakoari jarraikiz, lerroalde honetan ezarritakoa ez da aplikatuko garraio baliabideak menpekotasun eza edo salbuespen kasuren batean badaude, ez eta Estatuko lurraldetik kanpora bidali edo esportatzen diren garraio baliabideen kasuan ere, 1994.eko abenduaren 31a baino lehen Estatuko lurraldean berriz sartu edo berriz inportatzen ez badira.

2. Aplikazio industriala, merkataritzakoa, nekazaritzakoa, klinikoa edo zientifikoa baizik izanen ez duten ibilgailuek, Zerga Administrazioak 1993.eko urtarrilaren 1a baino lehen horien serieko modeluak homologatu baditu, beren homologazioa mantenduko dute Foru Lege honen 42. artikuluko 1. zenbakiko a) letrako 3. atalean jasotako ondorioak izan ditzan.

Lehen Xedapen Indargabetzailea

Foru Lege honek indarra hartzerakoan, indarrik gabe geldituko dira bertan ezarritakoaren kontra jotzen duten maila bereko edo apalagoko xedapen guztiak, Administrazioari indargabetzen den legeriatik eratorriak diren obligazioak eskatzeko eskubidea galarazi gabe.

Bigarren Xedapen Indargabetzailea

Foru Lege hau garatuko duten erregelamenduzko xedapenak onesten ez diren bitartean, indarrean jarraituko dute 1992.eko abenduaren 31n indarra duten zerga bereziei buruzko erregelamenduzko arauek, Foru Legearen kontra edo zerga berezien arloan indarra duten elkarteko erregelamendu eta aginduen kontra jotzen ez badute.

Azken Xedapenetako Lehenbizikoa. Indarra hartzea.

Foru Lege honek 1993.eko urtarrilaren 1ean hartuko du indarra.

Azken Xedapenetako Bigarrena. Aurrekontuei buruzko Foru Legeen aldaketak.

Urteroko Aurrekontuen Foru Legeek Foru Lege honetan ezarritako tarifen egitura, ezarpen tasak, salbuespen kasuak, salbuespenak eta zehapenen zenbatekoak alda litzakete, baita bertan bildu diren moneta baloreak egoki, ECUren truke-tasaren aldaketen arabera, eta, oro har, Foru Lege honen testua elkarteko arautegira egokituta mantendu ere.

Jar zaitez gurekin harremanetan | Erabilerraztasuna | Lege abisua | Webaren mapa