navarra.es
Castellano | Euskara | Français | English
Ezagutzera eman
157/2004 Foru Agindua, maiatzaren 20koa, Ekonomia eta Ogasun kontseilariak emana, Nafarroako Foru Komunitateko lizitatzaileen borondatezko erregistroko Interneten bidezko prozesuen azalpen teknikoa eta Nafarroako Foru Komunitateko ...
157/2004 FORU AGINDUA, MAIATZAREN 20KOA, EKONOMIA ETA OGASUN KONTSEILARIAK EMANA, NAFARROAKO FORU KOMUNITATEKO LIZITATZAILEEN BORONDATEZKO ERREGISTROKO INTERNETEN BIDEZKO PROZESUEN AZALPEN TEKNIKOA ETA NAFARROAKO FORU KOMUNITATEKO LIZITATZAILEEN BORONDATEZKO ERREGISTROA ETA HAREN WEB-GUNEA ERABILTZEKO LEGEZKO BALDINTZAK ONESTEN DITUENA
(2004ko 69. NAOn argitaratutako testua, ekainaren 9an)
Atarikoa
Nafarroako Foru Komunitateko Lizitatzaileen Borondatezko Erregistroa arautu zuen apirilaren 19ko 174/2004 Foru Dekretuko azken xedapenetariko bigarrenak xedatzen duenez, Ekonomia eta Ogasun kontseilariak, foru agindu baten bidez, Lizitatzaileen Erregistroan inskribatu eta hura aldatu eta ustiatzeko prozesu telematikoa eta administratiboa eta haren web-gunea erabiltzeko legezko baldintzak ezarriko ditu. Interesatuek espresuki onartu beharko dituzte erregistroan sartu ahal izateko.
Horrenbestez, Nafarroako Foru Komunitateko Gobernuaren eta Administrazioaren Araubide Juridikoari buruzko apirilaren 11ko 23/1983 Foru Legeko 36. artikuluak eman dizkidan ahalmenak erabiliz eta Nafarroako Foru Komunitateko Lizitatzaileen Borondatezko Erregistroa arautzen duen apirilaren 19ko 174/2004 Foru Dekretuko azken xedapenetariko bigarrenean ezaririkoarekin bat, agindu dut:
Lehena
Nafarroako Foru Komunitateko Lizitatzaileen Borondatezko Erregistroan inskribatu eta hura aldatu eta ustiatzeko prozesu telematikoa eta administratiboa onestea. Foru agindu honetako I. eranskinean azaltzen da.
Bigarrena
Nafarroako Foru Komunitateko Lizitatzaileen Borondatezko Erregistroa eta haren web-gunea erabiltzeko legezko baldintzak onestea. Interesatuek espresuki onartu beharko dituzte baldintza horiek erregistroan sartu ahal izateko. Foru agindu honetako II. eranskinean ageri dira.
Hirugarrena
Foru agindu honek Nafarroako Aldizkari Ofizialean argitaratu eta biharamunean hartuko du indarra.
Laugarrena
Foru agindu hau Nafarroako Aldizkari Ofizialean argitaratzea.
I. ERANSKINA. Nafarroako Foru Komunitateko Lizitatzaileen Borondatezko Erregistroko interneten bidezko prozesuen azalpen teknikoa
1.-Sarrera.
Nafarroako Foru Komunitateko Lizitatzaileen Borondatezko Erregistroa datu base baten eta web-gune baten bidez osaturik dago teknikoki. Web-guneak bitartekariarena egiten du haren eta erabiltzaileen artean. Erregistroa web-gune batean sartuz erabili eta administratzen da, interneteko nabigatzaile baten bidez. Biltzen diren datuak isilpekoak direnez, Nafarroako Foru Komunitateko Lizitatzaileen Borondatezko Erregistroko web-gunearekiko harreman guztiak SSL (Secure Sockets Layer) delakoaren bidez enkriptatuko dira, HTTPS (HTTP Seguro) protokoloa erabiliz.
2.-Sistemaren rolak.
Lizitatzaileen Borondatezko Erregistroko web-gunean sartu ahal izateko, beharrezkoa da sesio bat sistemako kontu batekin irekitzea, erabiltzaile izen baten eta pasa hitz baten bidez. Kontuak roletan daude antolatuak. Rolak zehazten du zer eremutan sartzen ahal den kontu bat eta zer eginkizun egiten ahal dituen. Kontu bat rol bat baino gehiagoko izan daiteke. Hauexek dira sistemaren rolak:
2.1. Erabiltzaile anonimoa.
Sarbide kautotugabeak datxezkio rol honi. Rol honek bide ematen du:
a) Web-guneko eremu publikoan sartzeko.
b) Lizitatzaileen Borondatezko Erregistroko kide izateko eskaera aurkezteko. Geroko lizitatzaileendako.
c) Ziurtagiri bat egiaztatzeko. Kontratazio organo eta mahaietarako.
2.2. Erabiltzaile erregistratua.
Lizitatzaileen Borondatezko Erregistroan kidetu diren enpresen kuotak dagozkio rol honi. Mota horretako kontuak dauzkaten erabiltzaile kautotuek aukera dute
a) Erabiltzaile anonimoaren eginkizun guztiak egiteko.
b) Web-guneko erabiltzaile erregistratuen eremuan sartzeko.
c) Erabiltzailearen beraren inskripzioko datuak egiaztatzeko.
d) Erregistroari eskatzeko enpresari berari dagozkion ziurtagirien kopia elektronikoak.
2.3. Irakurlea.
Rol honetako kontuak Ekonomia eta Ogasun Departamentuko Ondare Zerbitzuko funtzionarioei dagozkie eta bide ematen dute eginkizun hauek egiteko:
a) Erabiltzaile anonimoaren eginkizun guztiak egiteko.
b) Web-guneko Administrazioaren eremuan sartzeko.
c) Erregistroko kideak diren enpresen datuak irakurtzeko.
2.4. Administratzailea.
Rol honetako kontuak Ekonomia eta Ogasun Departamentuko Ondare Zerbitzuko funtzionarioei dagozkie eta bide ematen dute eginkizun hauek egiteko:
a) Irakurle rolaren eginkizun guztiak egiteko.
b) Inskribaturiko enpresen datuak aldatzeko.
c) Enpresak erregistroan kidetu edo hortik kentzeko eta inskripzioak luzatzeko.
d) Enpresen agiriak grabatzera igortzea, digitalizatuak izan daitezen.
3.-Datuen antolaketa.
Erregistroko datuak datu base batean bilduko dira. Bertan lizitatzaile erregistratu bakoitzarekin batera honakoak agertuko dira:
a) Zenbaki identifikatzaile bat.
b) Kontu bat, erabiltzailearen izena eta pasa hitza barne.
c) Espediente multzo bat.
Lizitatzailea erregistroko bazkide izan deneko aldia adierazten du espediente batek, haren datuak eta agiriak aldatu ez badira. Inskripzio bat iraungi, enpresaren datuak aldatu edo agiri berriak biltzen diren bakoitzean, espedientea itxi eta beste bat irekitzen da. Espedientearekin batera ziurtagiria eta haren kopia elektronikoak daude, espedienteak balio zuelarik egin zirenak, hain zuzen ere.
Espediente guztiak eta ziurtagirien kopia elektronikoen eskaerak, baita lehenetariko bakoitzari loturiko datu eta agiri guztiak ere, bildu eginen dira, erregistroko historia egin ahal izateko.
4.-Inskribatzeko prozesua.
Erregistroan sartu asmo den enpresa batek web-guneko eremu publikoan sartu beharko du. Hor inprimaki batekiko lotura agertuko da. Inprimaki hori enpresaren oinarrizko datuekin osatu beharko da. Lotura hartaz gain, erabiltzaile zenbaki bat eta pasa hitz bat agertuko dira, erabiltzaileen eremuan sartu ahal izateko, kide egin ondoren. Inprimaki horrek balio du Ondare Zerbitzuarekin hitzordu bat eskatzeko. Orduan behar diren agiriak aurkeztu eta egiazki erregistroko kide egin beharra dago.
Sistemak, datuak hartzean, datu basean beste erregistro bat sortzen du eta horrekin batera zenbaki bat ematen, Lizitatzaileen Borondatezko Erregistroan enpresa ezagutaraziko duena. Berehala sistemaren administratzaileari jakinaraziko dio zein den eskatzailearen asmoa, berez sortuko den posta elektronikoko mezu baten bidez. Mezu horrek web-guneko administrazioaren eremuarekiko lotura bat du. Horretan bakarrik administratzailearen eta irakurlearen rolak sartzen ahal dira. Eremu honetan fitxa bat agertzen da, enpresa eskatzaileak emaniko datuekin. Funtzionarioak, baliabide elektronikoen bidez, ordu bat hitzartuko du haren ordezkariarekin, Ondare Zerbitzuko bulegoan, eta jakinaraziko dio zer agiri aurkeztu beharko dituen.
Hitzorduak diraueino, Ondare Zerbitzuko funtzionario batek enpresaren fitxa eskuratu eta inskribatzeko inprimakian ageri diren datuak egiaztatu eta, beharrezkoa bada, zuzenduko ditu. Prozesu hau bakarrik egiten ahalko da funtzionarioa administratzaile roleko kontu baten bidez sartzen baldin bada sisteman. Enpresa eskatzaileak, bere aldetik, erregistratzeko behar diren agiriak aurkeztuko ditu.
Hitzorduaren ondoren, funtzionarioak grabatzera igorriko du agirien kopia kautotu bat, digitalizatu eta datu basean sartzeko.
Agiriak digitalizatu ondoren, Ondare Zerbitzuko funtzionario batek, administratzaile roleko kontu baten bidez, enpresa eskatzailearen fitxa eskuratuko du. Horretan agiri digitalizatuak agertuko dira. Funtzionarioak egiaztatu eta baliozkotuko ditu. Orduantxe kidetuko da egiazki enpresa Lizitatzaileen Borondatezko Erregistroan. Sistemak berez mezu bat igorriko du enpresak eskabidean eman zuen helbide elektronikora, kidetu dela jakinaraziko duena.
5.-Ziurtagiriaren kopia eskatzeko prozesua.
Erabiltzaile batek, Lizitatzaileen Borondatezko Erregistroko bazkidea bada eta bere inskripzioa iraungi ez bada, kasuan kasuko ziurtagiriaren kopiak eskatzen ahal ditu. Horretarako, erabiltzaile erregistratuen eremuan sartu eta erabiltzaile erregistratuen roleko kontu baten bidez bere burua kautotu beharko du. Erabiltzen den kontuak enpresaren identitatea adierazten du. Erabiltzaileak ziurtagiriaren kopia eskatzeko inprimaki bat eskuratu eta igorri egin behar du.
Hartzearekin batera, sistemak karaktere alfazenbakizkoak dituen pasa hitz bat sortuko du, ziurtagiriaren kopia identifikatu eta pasa hitzarekin batera eskaera artxibatuko duena, datu basean beste erregistro bat sortuz. Prozesu honen ondoren, erabiltzaileari web-gune bat igorriko dio, ziurtagiria izanen duena, inprimatzen ahal dena eta sorturiko pasa hitza daukana.
Ziurtagiriaren kopiak gehienez ere eskatzean Lizitatzaileen Borondatezko Erregistroan bazkide izateko aldia iraungi arte balioko du.
6.-Ziurtagiriaren kopiak egiaztatzeko prozesua.
Erabiltzaileak ziurtagiriak egiaztatzeko web-gunean sartu behar du, eremu publikoan. Bertan inprimaki bat dago, bete beharreko bi eremu dauzkana. Batean Lizitatzaileen Borondatezko Erregistroan enpresa identifikatzeko zenbakia sartu behar da, inskribatzean lortu zuena, hain zuzen ere. Bestean sistemak ziurtagiriaren kopia elektronikoa ematean sortu zuen pasa hitza tekleatu behar da, karaktere alfazenbakizkoekin. Sistemak bi baloreak egiaztatuko ditu, datu basekoekin alderatuz. Elkarrekin bat badatoz, ziurtagiria duen web-gune bat igorriko dio erabiltzaileari, inprimatzen ahal dena. Elkarrekin bat ez badatoz, sistemak mezu bat igorriko du, akatsak daudela adieraziko duena.
7.-Lizitatzailearen datuak aldatzeko prozesua.
Enpresa batek noiznahi ere eskatzen ahal du erregistroko datuak aldatu daitezela. Aldaketak agiri bat ere aurkeztu gabe frogatu beharrik ez badago, erabiltzaileak berak egiten ahal du web-guneko erabiltzaile erregistratuen eremuan, datu berriekin inprimaki bat betez. Aldaketa hauengatik ez da erregistroan beste espedienterik ireki behar. Agiri bat aurkeztu behar baldin bada, erabiltzaileak bulegoetara jo eta aldaketa egin beharko du. Kasu horretan Ondare Zerbitzuko funtzionario batek eginen ditu aldaketak, balio dutela egiaztatu ondoren, administratzaile roleko kontu baten bidez sartuz. Agiriak grabatu behar badira, lizitatzailea Erregistrotik kenduko da agiriak euskarri digitalean eskuragarri izan eta administratzaile batek baliozkotu arte.
8.-Bazkide izateko aldi balioduna.
Enpresa bat urtebetez izanen da egiazki Lizitatzaileen Borondatezko Erregistroko kide. Aldi hori bukatu ondoren, enpresak ezin eskatuko du ziurtagiriaren beste kopia elektronikorik. Epe hori honelaxe aldatzen ahal da:
a) Enpresak, aldia bukatu baino lehen, luzapen bat eskatzen badu eta aurkezturiko datu eta agiriak aldatu ez badira, epea beste urte batez luzatzen ahalko da. Prozesu hori administratzaile rolean kontu bat daukan erabiltzaile batek egiten ahal du bakarrik.
b) Enpresak beste agiri batzuk aurkezten baditu eta horiek Erregistroan digitalizatu behar badira, berehala utziko dio kide izateari, administratzaile rolean kontu bat daukan erabiltzaile batek grabatu behar diren agiriak igorri eta gero baliozkotu arte. Horrela enpresa berriro gai izanen da jarduteko.
II. ERANSKINA. Web-gunea eta Lizitatzaileen Erregistroa erabiltzeko legezko baldintzak
1.-Eremu orokorra.
Nafarroako Kontratazio Administratiboko Batzordea arduratzen da web-gune honetaz. Batzordeak Iruñeko Yanguas y Miranda kaleko 27an du egoitza.
Erabiltzeko baldintza orokor hauek web-gune honetarako dira eta ez zaizkie beste web-gune batzuei aplikatuko, Nafarroako Kontratazio Administratiboko Batzordeak haien ardura, kudeaketa edo titulartasuna badu ere.
Web-gunea eskuragarria izanen da beti, erabiltzeko baldintza hauetako betebehar, ohar eta gaztiguak osorik onartzen badira.
Erabiltzaileek web-gune hau erabiltzeko baldintza orokorrak irakurri beharko dituzte.
Betiere, edozein erabiltzailek baldintza orokorretan web-gune hau erabiltzen badu, ulertuko da betebehar, ohar eta gaztigu guztiak ezagutu eta onartzen dituela.
Erabiltzeko baldintza orokor hauek ez dute baztertzen bestelako xedapenik erabiltzeko aukera, arautegiak eta erregelamenduak, hala nola.
Baldintza hauetako betebehar, ohar edo gaztiguetariko baten bat web-gune hau arautzen duten arautegi eta erregelamenduetako testuekin bat ez badatoz, arautegi eta erregelamendu horiek izanen dute lehentasuna baldintza hauen gainean.
Espresuki kontrakoa adierazten ez bada, web-gune honi gaineratzen zaion edozein eginkizun edo zerbitzu osagarri baldintza hauen menpe egonen da.
Erabiltzaileek ez bestek izanen dute erantzukizuna web-guneko sarreraz eta bertan dauden argibideen erabileraz.
Nafarroako Kontratazio Administratiboko Batzordeak ez du ardurarik hartuko sarreraren edo argibideen erabileraren ondoriozko kalteen gainean, salbu eta bere eskumenak hertsiki betetzeko legezko xedapenen ondoriozko jarduketa guztien gainean.
Web-gune honen iraupena zehaztugabea da, baina Nafarroako Kontratazio Administratiboko Batzordeak eskubidea izanen du haren zerbitzu batzuk edo guztiak bertan behera utzi edo bukatutzat emateko eta erabaki hori ez zaie erabiltzaileei aldez aurretik jakinarazi beharko.
2.-Lizitatzaileen Erregistroa zer den.
Tresna hau sortu da apirilaren 19ko 174/2004 Foru Dekretuaren babesean. Nafarroako Foru Komunitateko Lizitatzaileen Borondatezko Erregistroa arautu zen. Foru dekretu hori 2004ko 57. Nafarroako Aldizkari Ofizialean argitaratu zen, maiatzaren 12an.
Beraz, web-gune hau ustiatze tresna bat da, "Nafarroako Foru Komunitateko Lizitatzaileen Borondatezko Erregistroa" deritzona eta Kontratazio Administratiboko Batzordeko Idazkaritzaren menpe dagoena.
Organo aholku-emaile horrek, kontratazio administratiboaren praktika arrazionalizatu beharraz oharturik, Nafarroako Administrazio Publikoek eta 10/1998 Foru Legearen menpeko gainerako entitateek egiten dituzten lizitazio prozedura ugarietan lizitatzaileek aurkezten dituzten agirien artxibo zentralizatua izatearen garrantzia nabarmendu du, kontratazio organo eta mahaiei laguntzen die lizitatu nahi duten enpresek bildu behar dituzten nortasun, gaitasun eta ordezkaritzaren gaineko baldintzak betetzen ote dituzten egiaztatzen eta, bidenabar, baliabideak aurrezten.
Lizitatzaileen Borondatezko Erregistroa ez da erregistro publiko bat, kontratazioaren lagungarri bat baizik, parte hartzea erraztu eta kontratazio administratiboaren prozedura arintzeko asmoz.
Tresna horren erabilerak bide ematen du:
a) Lizitatzaileei konkurrentzia emateko.
b) Kontratazio administratiboko prozedurak arintzeko.
c) Kontratazio administratiboak arrazionalizatzeko.
Erregistro honetan inskribatzen ahalko dira Nafarroako Administrazio Publikoek eta Nafarroako Administrazio Publikoen Kontratuei buruzko ekainaren 16ko 10/1998 Foru Legearen menpeko gainerako entitateek egiten dituzten lizitazioetan parte hartu nahi duten merkataritzako sozietate, kooperatiba eta lan sozietateak.
Web-gune horren erabilera borondatezko eta doakoa.
Hala ere, web-gune honek eskaintzen dituen zerbitzuak kontratatu ahal izateko, geroan, beharbada prezio bat pagatu beharko da. Kasu horretan, behar bezala adieraziko da.
3.-Lizitatzaileen Erregistroak zer eskaintzen duen.
Lehen aipatu den motako enpresa batek Lizitatzaileen Borondatezko Erregistroan izena ematean ziurtagiri bat eginen da, Kontratazio Administratiboko Batzordearen lagun bakarreko organoetako edozeinen baimenarekin, enpresaren nortasuna eta ordezkaritza adieraziko dituena.
Kontratazio Administratiboko Batzordearen lagun bakarreko organoetako edozeinek baimena eman ondotik enpresaren nortasuna eta ordezkaritza adierazten dituen ziurtagiriak, hasiera batean, urtebeteko balioa izanen du eta urtez urte luzatzen ahalko da, interesatuak, sistema seguru bat erabiliz, hasieran emandako informazioa, ziurtagirian agertzen den bera, baliagarria dela eta ez dela aldatu deklaratu eta ondoan. Nolanahi dela ere, interesatuak berak emandako informazioa dela medio, edo enpresaren edo haren ordezkarien gaitasuna mugatzen duen administrazioaren edo epailearen ebazpena bete behar delakoz, ziurtagiriaren indarraldia murrizten ahal da.
Ziurtagiriaren kopia, modu elektronikoan interneten bidez eskuratua, eta indarraldiaren gaineko norberaren ardurapeko deklarazioa aurkeztuz gero, Nafarroako Administrazio Publikoek eta Nafarroako Administrazio Publikoen Kontratuei buruzko ekainaren 16ko 10/1998 Foru Legearen menpeko gainerako entitateek egiten dituzten lizitazio guztietan lizitatzaileak ez du bere nortasunaren eta ordezkaritzaren gaineko beste agiririk aurkeztu beharko.
Lizitatzaileen Borondatezko Erregistroan gordeko dira bai ziurtagirian agertzen diren datuak egiaztatzen dituzten agirien kopia konpultsatuak, bai egindako ziurtagiriak ere. Ziurtagiri horiek lizitatzaileek erdiesten ahal dituzte bide elektronikoaren bitartez kontratazio prozedurarako dei egiten den aldiro.
4.-Web-gunearen eginkizunak.
Web-gune honek prozesu batzuk uzten ditu erabiltzaile edo lizitatzaileen eskura:
a) Kidetzeko eskabidea (a).
b) Erabiltzaile erregistratuaren datuen egiaztatzea (b).
c) Harremanetarako datuen aldaketa (c).
d) Ziurtagiriaren kopiaren eskaera (d).
e) Ziurtagiriaren edukiaren aldaketa (e).
f) Ziurtagiriaren balioaldia luzatzeko eskabidea (f).
Horrez gain, web-guneak bide ematen du erabiltzaileek eskaturik luzaturiko ziurtagirien kopiek balio duten begiratzeko, kontratazio organo eta mahaietarako (g).
(a) Kidetzeko eskabidea.
Erregistroan inskribatu asmo duen lizitatzaile batek web-guneko eremu publikoan sartu beharko du. Hor inprimaki batekiko lotura agertuko da. Inprimaki hori enpresaren oinarrizko datuekin osatu beharko da. Lotura hartaz gain, erabiltzaile zenbaki bat eta pasa hitz bat agertuko dira, erabiltzaileen eremuan sartu ahal izateko, kide egin ondoren. Inprimaki horrek balio du Ondare Zerbitzuarekin hitzordu bat eskatzeko. Orduan lizitatzaileak behar diren agiriak aurkeztu eta egiazki erregistroko kide egin beharra edukiko du.
Enpresak erregistroan inskribatzeko behar diren agiri guztiak Kontratazio Administratiboko Batzordean aurkezturik, Batzordeak hiru hilabeteko epea izanen du kidetzeko edo inskribatzeko eskabidea ukatu zaiola jakinarazteko.
Erabiltzailegaiak argibideak eskatzen ahalko ditu rln@navarra.es helbidera mezu elektroniko bat igorriz.
Izena erregistroan eman nahi duten lizitatzaileek, betiere, ondoko agiriak aurkeztuko dituzte: gaitasun juridikoa eta aritzekoa kreditatzen dituzten jatorrizko agiriak, entitatearen izenean eta haren ordezkari lanetan diharduten pertsona fisikoen ordezkaritza kreditatzen duten notario-ahalordeak, pertsona fisiko horien Nortasun Agiri Nazionala (N.A.N.) edo legez ordezkoa izan daitekeen agiria, eta enpresaren Identifikazio Fiskalerako Zenbakia (I.F.Z.) kreditatzen duen agiria. Horrekin batera, eskatzen zaizkien agiriak ere aurkeztuko dituzte, aginduzkoak direnak.
Merkataritzako sozietateek eta lan sozietateek eraketa eta aldaketa eskriturak, xedea adierazten duen eskritura eta administratzailearen izendapenaren eskritura aurkeztuko dituzte, horiek guztiak jatorrizkoak eta, behar den bezala, Merkataritzako Erregistroan inskribatuak.
Merkataritzako sozietateak bere ordezkariak administratzaileak ez beste pertsona batzuk izatea nahi baldin badu, emandako ordezkaritzako ahalordeak agertzen dituen jatorrizko eskritura edo notarioak baimendutako kopia, behar den bezala Merkataritzako Erregistroan inskribatuak, aurkeztu beharko du.
Kooperatibek dagokien erregistroan inskribatu direla kreditatzen duen jatorrizko agiria aurkeztu beharko dute.
(b) Erabiltzaile erregistratuaren datuen egiaztatzea.
Erabiltzaileak noiznahi ere izanen du aukera bere datuak pantailan ikusteko, kidetzeko prozesua bukatzean jakinaraziriko LOGIN (erabiltzaile izena eta pasa hitza) erabiliz.
Erabiltzaileak arduratu beharko du sartzeko LOGIN hori babestu eta zaintzen, aurrerago esaten den bezala.
(c) Harremanetarako datuen aldaketa.
Betiere, erabiltzaileari eskatzen ahalko du erregistroan aldatu daitezela harremanetarako datuak. Kontratazio Administratiboko Batzordeak aukera izanen du erabiltzaileak eskatzeko web-gunearen bidez eginiko datuak erakutsi edo egiaztatu ditzala, horren beharrik bada.
(d) Ziurtagiriaren kopiaren eskaera.
Erabiltzaileak, kideturik badago eta bere inskripzioa iraungiririk ez badago, ziurtagiriaren nahi adina kopia eskuratzen ahalko ditu. Horretarako, erabiltzaile erregistratuen eremuan sartu eta erabiltzaile kontuarekin bere burua kautotu beharko du. Erabiltzen den kontuak enpresaren identitatea adierazten du. Erabiltzaileak ziurtagiriaren kopia eskatzeko inprimaki bat eskuratu eta igorri egin behar du.
Prozesu horren ondoren, erabiltzaileak webgune bat hartuko du, inprimatzen ahalko dena eta ziurtagiria edukiko duena. Ziurtagiria identifikatzeko karaktere alfazenbakizkoen bidezko pasa hitza edukiko du. Horrez gain, erabiltzaileak inprimatzen ahal den web-gune bat hartuko du, ziurtagiria indarrean dagoela erantzukizunpean dioen adierazpenaren eredu bat edukiko duena. Bete ondoren, kontratazio prozedura bakoitzean aurkeztuko du, ziurtagiriarekin batera.
Ziurtagiriaren kopiak gehienez ere eskatzean Lizitatzaileen Borondatezko Erregistroan bazkide izateko aldia iraungi arte balioko du.
Lizitatzaileek bakarrik web-gune honen bidez eskuratu eta elektronikoki ustiatuko dute ziurtagiria. Nafarroako Kontratazio Administratiboko Batzordeak ezin eginen du paperezko ziurtagiririk.
Web-gune hau da beraz ziurtagiriak egiteko bide bakarra eta ustiatu nahi duenak inskribatu eta kidetu behar du.
(e) Ziurtagiriaren edukiaren aldaketa.
Beste agiri bat aurkeztu behar bada, erabiltzaile erregistratuak Ondare Zerbitzuko bulegoetara jo eta aldaketa egin beharko du. Kasu horretan, Ondare Zerbitzuko funtzionario batek egiaztatuko ditu datuen gaurkotze eta aldatzeak, baliogarriak direla frogatu ondoren.
Agiriak digitalizatu edo grabatu behar badira, erabiltzailea aldi baterako Erregistrotik kenduko da, agiriak formatu digitalizatuan eskuragarri egon eta baliozkotu arte.
Ziurtagiriaren edukia aldatzeko behar diren agiri guztiak Kontratazio Administratiboko Batzordean aurkezturik, Batzordeak hiru hilabeteko epea izanen du beste ziurtagiri bat egiteko edo aldatzeko eskabidea ukatu zaiola jakinarazteko.
(f) Ziurtagiriaren balioaldia luzatzeko eskabidea.
(a) letran aipatzen den hasierako prozesua bukatu ondoren, erabiltzailea egiazki kidetzean sortzen den ziurtagiriak hasiera batez urtebeterako balioko du. Urtez urte luzatzen ahalko da, interesatuak sistema seguru baten bidez aldez aurretik adierazi ondoren, hasiera batean aurkeztu eta ziurtagirian ageri diren agiriak baliogarriak direla eta ez direla aldatu azalduz.
Erabiltzaileak bere gain hartuko du behar den momentuan erabiltzaile izaten segitzeko luzapena eskatzeko erantzukizuna.
Prozedura horren arabera bideraturiko eskabiderik ez bada, besterik gabe erabiltzailea erregistrotik kenduko da.
(g) Ziurtagiriaren kopiak balio duen begiratzea.
Ziurtagiriaren kopia eskuratuak, ausazko bi gako izanen ditu, kontratazio organo eta mahaiek, modu elektronikoen bidez, haren egiazkotasuna begiratzeko.
Erregistroan sartzeko baimena izanen dute ziurtagirien kopiak egiazkoak ote diren begiratu nahi duten kontratazio organoek eta horiei lagunduz prozeduran parte hartzen duten kontratazio mahaiek. Kopia horiek, betiere, erregistroak emanak izanen dira eta organo horiexek dei egindako kontratazio prozeduretan aurkeztuak.
Kontsultak ziurtagirian egiaztatzeko web-gunearen bidez eginen dira, eremu publikoan. Bertan inprimaki bat dago, bete beharreko bi eremu dauzkana. Batean Lizitatzaileen Borondatezko Erregistroan enpresa identifikatzeko zenbakia sartu behar da, inskribatzean lortu zuena, hain zuzen ere. Bestean sistemak ziurtagiriaren kopia ematean sortu zuen pasa hitza tekleatu behar da, karaktere alfazenbakizkoekin. Sistemak bi baloreak datu basekoekin alderatuko ditu. Elkarrekin bat badatoz zehatz-mehatz, inprimatzen ahal den web-gune bat igorriko du, luzaturiko ziurtagiriaren kopia bat edukiko duena. Horrexek egiaztatuko du ziurtagiri horrek balio duela. Elkarrekin bat ez badatoz, sistemak mezu bat igorriko du, akatsak daudela adieraziko duena.
5.-Ingurune teknologikoa.
5.1. Datu basea.
Tresna honek datu base bat eta web-gune bat dauzka. Honek zubi-lana egiten du haren eta erabiltzaileen artean.
5.2. Sistemaren eskuragarritasuna-Disfuntzio teknikoak
Kontratazio Administratiboko Batzordeak ez du bermatzen web-gunearen zerbitzua etengabea izan dadila. Bai, ordea, segurua eta akatsik gabea izan dadila.
Hala ere, Kontratazio Administratiboko Batzordeak ez du bere gain hartzen inolako erantzukizunik edozein erabiltzaileren edozein komunikazio gordetzean atzeratu, ezabatu, gaizki eman edo hutsegiteagatik.
Kontratazio Administratiboko Batzordeak ez du erantzukizunik hartzen weg-guneak edo haren zerbitzuek gaizki funtzionatzeagatik, hori gertatzen bada istripu, ezinbesteko kasu eta mantentzeko lanengatik edo Kontratazio Administratiboko Batzordeari edo zerbitzu teknikoa emateko ordezten duenari ez dagokion beste edozein arrazoirengatik.
5.3. Birusak.
Kontratazio Administratiboko Batzordeak ez du inolako erantzukizunik hartzen birus informatikoek eginiko kalteengatik.
5.4. Nabigazioa.
Eskuarki, web-gunean zeharko nabigazioa web-gunearen eta erabiltzailearen artean bidaiatzen ari diren datu guztien enkriptazio etengabearen bidez egiten da.
128 biten enkriptazio hau SSL (Secure Socket Layer) sistemaren bidez egiten da eta berme aski (kriptografia indartsua) ematen du gaurko hacking tekniken aurka.
Web-gunea 128 biteko zifratu bat eraman dezakeen nabigatzaile bat dutenek ez bestek erabiltzen ahalko dute. Besteak beste, mugarik eman gabe: Internet Explorer: 6.0 bertsioa edo 5.5 Service Pack2 bertsioa, Netscape: 4.7 bertsioa edo gerokoak.
5.5. Sarreraren bukaera eta sartzeko eragozpenak.
Kontratazio Administratiboko Batzordeak eskubidea izanen du, inolako oztoporik gabe, noiznahi ere sarrera bukatutzat emateko, aldez aurretik jakinarazi gabe, zerbitzuaren beharrengatik.
Kontratazio Administratiboko Batzordeak ez jarduteagatik ere ematen ahal du sarrera bukatutzat, edo bertan behera utzi, alegia, zerbitzu bat denbora luze xamarrez erabili gabe dagoenean edo erabiltzaile bat kautotu ondoren horretan ez diharduenean, Batzordeak xedatzen duenaren arabera. Kontratazio Administrazioko Batzordeak gaur egun 30 minuturi deritzo "denbora luze xamar". Sarreraren bukaera gertatzean, berehala gelditzen da web-gunea erabiltzeko eskubidea, login berriro sartu arte.
6.-Pribazitateko politika.
Datu pertsonalak babesteko indarra duen arautegia betetzeko, Kontratazio Administratiboko Batzordeak jakinarazten dizu web-gune honetan ageri den inprimaki elektronikoa ("Erregistroan kidetzeko eskaeraren inprimakia") betetzean ematen dizkiguzun datu pertsonalak eta zure nabigazioaren, beste zerbitzu batzuk kontsultatu, eskatu edo kontratatzearen, edo web-gunea erabiltzean eginiko beste edozein eragiketaren ondorioz eskuratzen dituzun beste datu guztiak fitxategi batean tratatu eta bilduko direla. Kontratazio Administratiboko Batzordea da fitxategi horren arduraduna. Haren egoitzan (Iruñeko Yanguas y Miranda kaleko 27an), zure datu pertsonalen tratamendua eskuratu, zuzendu, ezabatu eta haren aurka jotzeko eskubidea erabiltzen ahalko duzu, datuak babesteko indarra duen arautegian, Datu Pertsonalak Babesteko abenduaren 13ko 15/99 Lege Organikoan, alegia, aurreikusiriko baldintzetan.
Horrez gain, eskatzen dizugu berehala jakinarazi diezaiozula Kontratazio Administratiboko Batzordeari datuen edozein aldaketa, zure fitxategietako argibideak beti gaurkoturik eta akatsik gabe egon daitezen.
Datuak nagusiki Nafarroako Foru Komunitateko Lizitatzaileen Borondatezko Erregistroan kidetzeko izapideei ekiteko biltzen dira. Erregistro hori ez da publikoa, kontratazioaren tresna lagungarri bat baizik. Horretarako ez ezik, datu bilketa hori inskripzioko ziurtagiriak egiteko, informazio zerbitzua emateko, estatistikak egiteko, oharrak eta, oro har, argibideak igortzeko ere egiten da. Argibide horiek norberarendako edo beste batzuendako interesgarriak izan daitezke, betiere web-gune honen bidez eskaintzen diren zerbitzuei loturik.
Kidetzeko eskabidea borondatezkoa da. Ez da nahitaezko betebeharra kontratazio prozeduretan parte hartu ahal izateko.
Kontratazio Administratiboko Batzarrak bakar-bakarrik helburu horietarako erabiliko ditu.
Datuak igortzean, baimena ematen dio Kontratazio Administratiboko Batzordeari datu horiek beste entitate publiko batzuei jakinarazi eta lagatzeko, lehen aipaturiko helburuetarako.
Erregistroan izena emateak berarekin ekarriko du erregistratutako enpresaren baimena erregistroak egindako ziurtagiria aurkezten den kontratazio organo eta mahaietan agiriaren egiazkotasuna modu elektronikoan begiratu ahal izateko.
Kontratazio Administratiboko Batzordeak jakinarazten dizu segurtasun neurri tekniko eta antolamenduzko guztiak ezarriak dauzkala zure datu pertsonalen segurtasuna bermatzeko eta haiek aldatu, galdu edo baimenik gabe tratatu eta eskuratzea eragozteko, teknologiaren egoera, bilduriko datuen nolakoa eta izan ditzaketen arriskuak kontuan hartuz, bai gizakien ekintzen aldetik, bai ingurunearen aldetik ere.
Hori dena, datuak babesteko arloan indarra duen arautegian xedaturikoarekin bat, zehazki, datu pertsonalak dauzkaten fitxategi automatizatuen segurtasun neurriei dagokienez.
7.-Erabiltzailearen erantzukizuna.
Kidetzeko prozesuarekin batera, lizitatzaileak pasa hitz bat eta erabiltzaile izen bat aukeratuko ditu.
Erabiltzailearen egitekoa da bere pasa hitza eta bere erabiltzaile izena isilpean gordetzea.
Gainera, erabiltzailea bere loginen bidez gertatzen diren jarduera guzti-guztien arduraduna da.
Web-gune hau erabiltzeagatik, onartzen duzu berehala jakinaraziko diozula Kontratazio Administratiboko Batzordeari zure datuen edozein erabilera baimendugabe edo segurtasunaren beste edozein urratze.
Kontratazio Administratiboko Batzordeak ez du bere gain erantzukizunik hartuko erabiltzaileak galdu lezakeenaren gainean beste pertsona batek haren pasa hitza edo erabiltzaile izena egiteagatik, dela baimenarekin, dela baimenik gabe.
Hala ere, erabiltzaileari egozten ahalko zaio bere erabiltzaile izena edo pasa hitza behar ez den moduan erabiltzeagatik sorturiko kalteen ardura.
Erabiltzaileak behin ere ezin erabiliko ditu beste pertsona baten datuak honen titularraren baimena eduki gabe.
Web-gune honek bide ematen du pasa hitza aldatzeko, ez ordea erabiltzaile izena.
Orotariko arau gisa, aukeraturiko erabiltzaile izenak eta pasa hitzak ezin urratuko dute beste batzuen ohore eta irudirako eskubidea, ez eta beste batzuen jabetza industrial edo intelektualerako eskubidea ere.
Bestaldetik, Kontratazio Administratiboko Batzordeak erabiltzaileak darabiltzan datu guztiak babestuko ditu eta ez ditu zabalduko, salbu eta web-guneko zerbitzuen zuzeneko helburuetarako edo errekerimendu judizialak edo legez baimenduriko agintari batek eskatzen dizkionak hertsiki betetzeko.
Kidetzearekin batera, erabiltzaileak onartzen du Kontratazio Administratiboko Batzordeak bere zerbitzuak gehienbat posta elektronikoa erabiliz eman ditzala.
Hori horrela, erabiltzaileak osorik hartzen ditu bere gain kidetzeko prozesuan edo harremanetarako datuak aldatzeko prozesuan jakinarazi zitzaion postako kontuaren kudeaketa eta mantentze lanak.
Kontratazio Administratiboko Batzordeak ez du inolako erantzukizunik hartzen harremanetarako datuak zehatzak ez badira, zaharkituak badira, lapurtzen badira edo aldatzen badira.
8.-Web-gunearen erabilera.
Erabiltzaileak konpromisoa hartzen du
a) Kidetzeko eskaeraren inprimakiaren bidez informazio egiazko, zuzen, gaurkotu eta osoa emateko.
b) Adieraziriko datuak kontrolatu eta gaurkotzeko, egiazko, zuzen, gaurkotu eta osoak izaten segitu dezaten.
Informazioa irizpide hauekin bat ez badator edo informazio hori egiazko, zuzen, gaurkotu edo osoa pentsatzeko adinako arrazoiak badaude, Kontratazio Administratiboko Batzordeak eskubidea izanen du zerbitzua bertan behera utzi eta zerbitzu horren erabilera orain eta beti debekatzeko.
8.1. Erabilera pertsonalaren eta ez komertzialaren murrizpenak.
Web-gune honen helburua ez da komertziala.
Web-gune honetatik lorturiko informazio, produktu edo zerbitzuak ezin dira aldatu, kopiatu, banatu, eskualdatu, erakutsi, burutu, ekoitzi, argitaratu, baimendu, ondoriozko lanak sortu, laga edo saldu.
Weg-gune honetan ezin da "meta bilaketarik" egin, edonolako kontsulta automatizaturik igorri edo igortzeko agindu, ez eta web-gunea modu komertzialean erabili ere.
8.2. Erabilera debekatua edo legez kanpokoa.
Web-gune hau ez da erabiliko legez kanpoko helburuetarako edo erabiltzeko baldintzetan debekaturiko dauden helburuetarako.
Debeku da zerbitzuak web-gunea edo horri loturiko sareak kaltetu, ezgaitu, gainkargatu edo hondatzeko moduan erabiltzea eta beste batzuei eskainiriko zerbitzuak erabili eta gozatzea eragoztea.
Debeku da web-gunean, sistema informatikoetan eta hari loturiko sareetan bide gabe ("hacking") sartzea , pasa hitzak lortuz edo beste edozein baliabideren bidez.
Ezin da argibiderik lortu, ez eta saiatu ere, ez baldin bada web-gune honen bidez nahita eskura utzi den baliabide baten bidez.
9.-Erabiltzeko baldintza orokorren aldaketa.
Kontratazio Administratiboko Batzordeak Lizitatzaileen Borondatezko Erregistroko zerbitzuak eskaintzeko betebehar, baldintza eta oharrak aldatzen ahalko ditu.
Erabiltzaileen egitekoa da baldintza eta betebehar horiek eta erabiltzeko baldintzak noizean behin ikuskatzea.
10.-Jabetza intelektuala.
Web-gune honen jabetza intelektualeko eskubideak, haren diseinua eta dauzkan kode osagarriak Kontratazio Administratiboko Batzordearen titulartasunekoak dira.
Beraz, debeku da obra hau eta osagai guztiak baimenik gabe kopiatu, banatu, merkaturatu edo aldatzea.
11.-Lege eta jurisdikzio aplikagarria.
Erabiltzeko baldintza orokorrak Espainiako eta Nafarroako Foru Komunitateko legeen menpe daude.
Web-gune honi loturiko auzi oro Espainiako jurisdikzioaren eskumena izanen da. Aldeak Iruñeko Epaitegi eta Auzitegien menpe egonen dira. Espresuki uko egin beharko diete beren foruei, horrelakorik badute eta aipatu direnetatik bereiziak badira.
