Kontratu publikoei buruzko ekainaren 9ko 6/2006 Foru Legeak ezartzen du Kontratazio Publikorako Batzordea eratzea, administrazioaren eragimena eta arauaren garapen egokia hobetzean zeregin nagusia hartuko duen organo aholku-emaile gisa.

Kontratu publikoei buruzko Foru Legearen 208.2 artikuluak adierazten duenez, haren osaera, antolaketa eta eginkizunak erregelamenduz erabakiko ditu Nafarroako Gobernuak, foru lege horren lehenengo xedapen gehigarriari jarraikiz.

Kontratazioan gehien gastatzen duten Nafarroako Foru Komunitateko Administrazioaren departamentuez gain, Nafarroako Parlamentuko, Toki Administrazioko eta Nafarroako Unibertsitate Publikoko ordezkariek ere osatuko dute batzordea, foru lege horrek kontratazio publikoaren esparru subjektiboaren gainean dituen jarraibideekin bat. Beste alde batetik, enpresaren ordezkaritza zabaldu da, hura osatzen duten interesek kontuan har daitezen.

Kontratazio Publikorako Batzordearen antolaketan, osoko bilkura da batzordearen jarduketa lerroak ezarri eta erabaki garrantzitsuenak hartzen dituen organoa; lanak egitea batzorde espezifikoei dagokie. Batzorde horien artetik Batzorde Iraunkorra azpimarratu beharra dago, haren garrantzia dela eta. Organo horren eginkizunak dira kontratazio publikoaren arloko txosten eta agiri teknikoak egitea, erreklamazioak ebaztea eta kautelazko babes neurriak hartzea.

Ekonomiako eta segurtasun juridikoko arrazoi nabarmenak direla eta, egoki iritzi zaio foru dekretu honetan arautzeari batzordeak tramitatzen dituen prozedura guztiak, bai eta haren kargupeko erregistroak ere, testu bakar batean kodifikatze aldera organo horri buruzko arautze osoa.

Horrela, Nafarroako Kontratazio Ataria, Interneten ageri den web ataria, arautzen da, Kontratu publikoei buruzko ekainaren 9ko 6/2006 Foru Legean ezarritakoa betez. Atari hori kontratu publikoen lizitazioen publizitatea egiteko baliabide ofiziala eta entitate lizitatzaileen eta izan daitezkeen kontratisten arteko harremanetarako bidea da. Horregatik, ataria ez da lizitazio iragarkietarako erabiltzen bakarrik; entitate lizitatzaileen informazioa biltzen du, kontratazio arloko erreklamazioak telematika bidez paratzeko aukera ematen du eta kontratazio publikoari buruzko edozein informazioren jarraipena egitea errazten du.

Foru dekretu honek arautzen ditu, halaber, iragarkien publizitatea eta haien edukia egiaztatzeko baldintza teknikoak, agirien trukaketa, bai eta Kontratazio Publikorako Batzordean lizitazioak eta erreklamazioak egiteko beharrezko jakinarazpen elektronikoen tramitazioa ere. Horretarako, kontuan hartu dira lizitatzaileen ezaugarri subjektiboak eta administrazio prozedurari buruzko arau orokorren printzipioak.

Azpimarratu behar da, duen garrantziagatik, kontratazio atariaren bidez esleipena egiten duten entitateen zein lizitatzaileen informazio trukea gidatzen duen printzipioa hauxe dela: informazioa igortzen duenaren erantzukizun osoa da. Hortik ondorioztatzen da informatika birusek kutsatutako fitxategiei buruz ezarritako arautzea.

Foru dekretu honetan sartu da Kontratuen Erregistroaren arautzea. Horren helburua da guztiek ezagutzea esleipena egiten duten entitateek egindako kontratuak. Kontratuen Erregistroa elektronikoa da, eta Kontratazio Publikorako Batzordearen ardura da hura kudeatzea. Erregistro horren ezaugarriak kontratuei buruzko legedian aipatzen direnak dira, nahiz eta berrikuntzak ere badituen, hala nola elektronikoki baizik ez dela tramitatzen. Ondorioz, esleipena egiten duten entitateek informazioa elektronikoki emanen dute, kontratazio atariaren bidez.

Lizitatzaileen Borondatezko Erregistroa, Kontratazio Publikoko Batzordeari atxikia, baliabideen arrazionalizazio administratiboko eta ekonomikoko arrazoiengatik sortu da. Erregistro hori Kontratu publikoei buruzko ekainaren 9ko 6/2006 Foru Legeak berariaz arautzen ez duen arren, gaur egun arte lortutako emaitza onak eta eskaintzen dituen erabilerak direla eta, bere garaian xedatutakoaren edukia apirilaren 19ko 174/2004 Foru Dekretuan sartu beharko litzateke. Hala ere, kontratazio atarian sartzea erabaki da, esleipena egiten duten entitateen eta behin-behineko lizitatzaileen arteko komunikazio bide gisa indartzeko asmoz.

Foru dekretu honek zehatz-mehatz arautzen ditu, halaber, kontratazio publikoaren arloko erreklamazioak. Horiek Kontratazio Publikorako Batzordearen Batzorde Iraunkorrak ebatziko ditu. Hautazko eta ordezko erreklamazio horiek foru legean bertan arautzen dira oro har; hortaz, foru dekretuak xehetasunezko alderdi teknikoak eta prozedurazkoak zehazten ditu. Lizitatzaileak eta esleipena egiten duten entitateak komunikatzeko bide bakarra indartzeko asmoz, egoki iritzi zaio erreklamazioak kontratazio atariaren bidez tramitatzeari, espediente osoa elektronikoki egiteko bide horren bidez.

Azkenik, batzordearen arbitrajea arautzen da, obra unitate berriak eta haien prezioari buruzko desadostasunak dituzten obra kontratuak aldatzen direnerako. Prozedurazko arautze hori abuztuaren 19ko 187/2002 Foru Dekretuan jasotzen denaren parekoa da funtsean.

Onartzen den arauaren aldeko txostena eman dute Kontratazio Administratiboko Batzordeak, 2006ko ekainaren 29an egindako bilkuran, eta Toki Araubideko Foru Batzordeak, 2006ko abenduaren 19an egindako bilkuran.

Horiek horrela, Ekonomia eta Ogasun kontseilariak proposaturik, Nafarroako Kontseiluarekin bat, eta Nafarroako Gobernuak 2007ko azaroaren 5eko bilkuran hartutako erabakiari jarraikiz, dekretatu dut:

I. KAPITULUA. Kontratazio Publikorako Batzordea

1. atala. Kontratazio Publikorako Batzordearen izaera eta eginkizunak

1. artikulua. Kontratazio Publikorako Batzordea.

1. Kontratazio Publikorako Batzordea organo kolegiatua da, independentzia funtzionala du, ekonomia arloan eskumena duen departamentuari dago organikoki atxikita eta Nafarroako Kontratu Publikoei buruzko ekainaren 9ko 6/2006 Foru Legearen 2. artikuluan aipatzen diren entitateen kontratazio publikorako sistemaren funtzionamendu egokia zaintzea du eginkizun.

2. Bere eginkizunak gauzatzean, helburuak behar bezala betetzeko autonomia funtzional osoa du. Ez da, inola ere, jarraibide hierarkikoen mende egonen.

2. artikulua. Kontratazio Publikorako Batzordearen eginkizunak.

1. Kontratazio Publikorako Batzordeak eginkizun hauek ditu, besteak beste:

a) Txostenak egin eta, behar denean, kontratazio sistemaren alderdi administratiboak, teknikoak eta ekonomikoak ukitzen dituzten arauak, neurriak edo jarraibideak proposatzea.

b) Esleipenerako irizpide eta baremoak prestatzea, Kontratu publikoei buruzko Foru Legearen mendeko pertsona eta entitateek erreferentzia gisa erabil ditzaten.

c) Kontratu Publikoei buruzko Foru Legearen mendeko pertsona eta entitateentzat eta kontratazio publikoak ukitzen dituen enpresa- eta lanbide-erakundeentzat arlo horretako gaiei buruzko txostenak egitea, bere esku-hartzea eskatzen zaionean.

d) Nafarroako Gobernuari proposatzea eredu normalizatuak, kontratuen prestaketari, esleipenari eta aldaketari buruzko agirienak, onar ditzan.

e) Ekonomia eta Ogasun Ministerioko Kontratazio Administratiboaren Aholku Batzordeari erregelamenduz ezarritako kontratuen gainean eman behar zaion informazio estatistikoa zentralizatzea, nazioarteko arauak betetzeko.

f) Prezioen ezarpenaren inguruko arbitrajeak ebaztea Administrazioaren obra kontratuetan.

g) Kontratu Publikoei buruzko Foru Legearen 45., 92., 97. eta 200. artikuluetan eta hirugarren xedapen gehigarrian arautzen diren aginduzko txosten eta irizpenak bideratzea.

h) Salbuespen egoeretan, kontratazio organoak eskaintza sobera apaltzat jotzen duelako eskatuta, bete ezin dela uste duen proposamenari buruzko txostena egitea.

i) Azterlanak, txostenak eta proposamenak egitea, Nafarroako administrazio publikoen eta haren erakunde publikoen, enpresen eta fundazioen kontratazioan baliabide elektronikoak, informatikoak eta telematikoak erabiltzeari buruz.

j) Kontratatzeko debekua deklaratzen duten espedienteetan ebazpen proposamena prestatzea, legez aurreikusitako kasuetan.

k) Urteko memoria prestatu eta onestea, Kontratu Publikoei buruzko Foru Legearen mendeko erakundeek egindako kontratazio publikoaren kudeaketari buruz.

l) Kontratazio publikoaren sistema hobetzeko beharrezkotzat jotzen diren azterlanak egitea eta Nafarroako Foru Komunitateko administrazio publikoetako eta haren erakunde publikoetako, enpresetako eta fundazioetako langileak prestatzeko jardueretan parte hartzea.

m) Harremanak, Ekonomia eta Ogasun Ministerioko Kontratazio Administratiboaren Aholku Batzordearekin eta gainerako autonomia erkidegoetako organo baliokideekin.

n) Nafarroako Parlamentuari, horretarako erabakitzen den batzordeari, txosten bat aurkeztea urtean behin, bertan zehaztuta zer esku-hartze izan dituen organoak eta zer proposamen egin dituen kontratazio sistema efiziente bat lortzeko eta zama administratiboak errazteko.

ñ) Kontratazio publikoaren arloko arauen aplikazioari buruzko irizpideak hartzea, bere eskumenen esparruan.

o) Nafarroako Kontratazio Ataria, Kontratuen Erregistroa eta Nafarroako Foru Komunitateko Borondatezko Lizitatzaileen Erregistroa kudeatzea.

p) Nafarroako Kontratu Publikoen Administrazio Auzitegiko kideen izendapena proposatzea Nafarroako Gobernuari.

2. Edonola ere, Kontratazio Publikorako Batzordeak zainduko du kontratu publikoei buruzko araudia zorrozki betetzea eta, bereziki, objektibotasun, publizitate eta lehia printzipioak errespetatzea eta Administrazioak egiten dituen kontratuetan prerrogatibak behar bezala erabiltzea. Horretarako, kontratazio publikoari buruzko egiaztapenak eta azterlanak egin eta gomendio orokorrak zein partikularrak ematen ahalko dizkie entitate kontratatzaileei, dagokion eskumenaren arabera, eta, bereziki, kontratazio arloko dokumentazio administratiboa homogeneizatu eta sinplifikatzeari buruz.

2. atala. Kontratazio Publikorako Batzordearen antolaketa

3. artikulua. Kontratazio Publikorako Batzordearen osoko bilkura eta batzordeak.

1. Batzordeak osoko bilkuraren eta batzordeen bidez lan eginen du.

2. Batzordean txosten eta agiri teknikoak onetsiko dituen batzorde iraunkor bat egonen da, honela osatua: batzordeko buruordea, batzordeburu lanetan ariko dena, osoko bilkurak bere kideen artean izendatuko duen batzordekide bat eta batzordeko idazkaria. Ekonomia eta Ogasun arloko departamentu eskuduneko Ondare Zerbitzuari atxikitako pertsona bat ariko da Batzordeko idazkari lanetan, hizpide eta botorik gabe.

Batzordeko osoko bilkurak Batzorde Iraunkorreko buruaren eta kideen ordezkoak izendatuko ditu, haren kideen artetik.

3. Batzordeek beren ebazpenen berri emanen diote osoko bilkurari, hurrengo bilkuran.

4. artikulua. Kontratazio Publikorako Batzordeko osoko bilkuraren osaera.

1. Honako hauek osatuko dute Kontratazio Publikorako Batzordeko osoko bilkura: batzordeburuak, buruordeak, idazkariak eta artikulu honen 4. atalaren arabera izendatzen diren kideek. Osaera Nafarroako Kontratazio Atarian argitaratuko da.

2. Kontratazio Publikorako Batzordeko kideek ez dute aldizkako ordainsaririk jasoko haien lanagatik. Hala ere, dietak jasotzen ahalko dituzte, deitutako bileretara joateagatik, baita kalte-ordainak ere, kide gisa jarduteagatik; betiere, Ekonomia eta Ogasuneko kontseilariak erabakitzen duen zenbatekoaren arabera.

3. Batzordeko idazkariak eta kideek prestakuntza berezia izan beharko dute kontratazio publikoaren arloan.

4. Honela osatuko da Kontratazio Publikorako Batzordea:

a) Batzordeburua, Ekonomia eta Ogasun arloko kontseilari eskuduna edo, bestela, hark aldi baterako edo betiko gaitutako pertsona bat; gutxienez ere, zuzendari nagusiaren maila izanen du.

b) Buruordea, Ekonomia eta Ogasun arloko departamentu eskuduneko Ondare Zerbitzuko zuzendaria.

c) Batzordekide bat, Nafarroako Parlamentuak bere legelarien artetik izendatua.

d) Batzordekide bat, Lehendakaritza, Justizia eta Barne arloko departamentu eskuduneko Aholkularitza Juridikoaren Zerbitzuko aholkulari juridiko bat izanen dena.

e) Batzordekide bat, Ekonomia eta Ogasun arloko departamentu eskuduneko Kontu-hartze Ataleko burua izanen dena.

f) Batzordekide bat, Toki Administrazioaren arloko departamentu eskudunak izendatua.

g) Batzordekide bat, Hezkuntza arloko departamentu eskudunak izendatua.

h) Batzordekide bat, Osasun arloko departamentu eskudunak izendatua.

i) Batzordekide bat, Gizarte Gaien arloko departamentu eskudunak izendatua.

j) Batzordekide bat, Herri Lanen arloko departamentu eskudunak izendatua.

k) Batzordekide bat, Nafarroako Unibertsitate Publikoak kontratazio publikoan espezializatuta dituen funtzionarioen artean izendatua.

l) Batzordekide bat, Toki Administrazioko funtzionarioa eta Zuzenbidean, Enpresa Zientzietan edo Ekonomian lizentziatua, Nafarroako Udal eta Kontzejuen Federazioak izendatua.

m) Batzordekide bat, Nafarroako Udal eta Kontzejuen Federazioak izendatua.

n) Batzordekide bat, Nafarroako Enpresaburuen Elkartearen ordezkaria.

ñ) Batzordekide bat, Nafarroako Herri Lanak egiten dituzten Nafarroako Enpresen Elkartearen ordezkaria.

o) Batzordekide bat, Nafarroako Herri Lanen Kontratisten Ganberaren ordezkaria.

p) Batzordekide bat, Nafarroako Kontratu Publikoen Administrazio Auzitegiko burua.

q) Idazkaria, Ekonomia eta Ogasun arloko departamentu eskuduneko Kontratazio Ataleko burua.

5. Batzordekideek arrazoi hauengatik galduko dute kargua:

a) Hartutako eginkizunak independentziaz betetzeko ezintasunak bultzatuta uko egitea.

b) Izendatu zituen organoaren ezeztatzea.

c) Izendatu zituztenean zuten izaera galtzea.

6. Aurreko idatz-zatian aipatutakoa gorabehera, gizarte interesak ordezkatzen dituzten entitateek proposatuta izendatutako batzordekideak edozein unetan ordezten ahalko dira, batzordeko Idazkaritzan ordezkoaren izena egiaztatuta, Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritakoari jarraikiz.

5. artikulua. Kontratazio Publikorako Batzordeko burua.

1. Batzordeburuak eginkizun hauek izanen ditu: batzordea ordezkatzea, osoko bilkurak deitu eta zuzentzea, eztabaidak gidatzea, erabakiak betearaztea eta kide anitzeko organoei buruzko arau orokorrek haien lehendakariei esleitzen dizkieten gainerako eginkizunak betetzea.

2. Batzordeburua kanpoan edo eri dagoenean edo bestelako arrazoi justifikaturen bat duenean, lehendakariordea arituko haren ordez. Lehendakariorde kargua hutsik badago, lehendakariordea ez badago edo gaixo bada, lehendakariak izendatzen duen kideak ordeztuko du, aldi baterako.

6. artikulua. Kontratazio Publikorako Batzordeko Idazkaritza.

1. Idazkaritza da Kontratazio Publikorako Batzordearen laguntzarako, ikerketarako eta aholkularitzarako organo iraunkorra. Bertan funtzionalki sartuko dira esleituta dituen eginkizunak betetzeko behar diren langileak, Ekonomia eta Ogasun arloko departamentu eskuduneko Ondare Zerbitzuari atxikitakoak.

2. Idazkaritzako zuzendaria Kontratazio Publikoaren Batzordeko idazkaria izanen da.

3. Kontratazio Publikorako Batzordeko idazkariak eginkizun hauek izanen ditu:

a) Batzordearen osoko bilkuraren deialdiak egin eta igortzea, batzordeburuak eskatuta.

b) Txosten eta dokumentu teknikoen proiektuak prestatzea, kontratazio publikoaren arloan.

c) Batzordearen urteroko memoria egitea.

d) Gastuen aurrekontuko aurreproiektua egitea, batzordeburuaren zuzendaritzapean.

e) Batzordekideei laguntzea haien eginkizunetan.

f) Batzordearen dokumentazioa zaintzea eta agirien sarrera-irteerak erregistratzea.

g) Batzordeari laguntza administratiboa ematea, oro har.

h) Batzordeak kontratazioari buruz beharrezkotzat jotzen dituen azterlan eta ikerketak egitea.

i) Nafarroako Kontratazio Ataria, Kontratuen Erregistroa eta Borondatezko Lizitatzaileen Erregistroa kudeatzea.

j) Batzordearen osoko bilkuretako aktak idatzi eta baimentzea.

k) Laguntza unitate gisa dituen gainerako eginkizunak eta batzordeburuak agintzen ahal dizkion bestelakoak.

4. Idazkari kargua hutsik dagoenean, edo hura kanpoan edo eri dagoenean, batzordeko buruordeak erabakiko du nor izanen den haren aldi baterako ordezkoa.

3. atala. Kontratazio Publikorako Batzordearen funtzionamendua

7. artikulua. Bilkurak.

1. Batzordeko osoko bilkuraren eta haren batzordeen bilkurak eratzeko, deitzeko eta egiteko araubideak, erabakiak hartzeak eta, oro har, kide anitzeko organo gisa duten funtzionamenduak Nafarroako Foru Komunitateko Administrazioari buruzko Foru Legean ezarritakoari jarraitu diote, foru dekretu honetan xedatzen ez den guztian.

2. Batzordearen osoko bilkura gutxienez ere seihilekoan behin bilduko da ohiko bilkuran eta, lehendakariak bere ekimenez dei egiten duenean edo kide gehienek hala eskatzen dutenean, ohiz kanpoko bilkuran.

3. Batzordearen osoko bilkuretara Ekonomia eta Ogasun arloko departamentu eskuduneko Ondare Zerbitzuari atxikitako pertsona bat joanen da, hitzik eta botorik gabe. Haren zeregina bilkuran azaldu eta erabakitakoa aktan jasotzea izanen da.

8. artikulua. Txostenak eskatzea.

Batzordeari txostena eskatzen ahalko diote organo hauek:

a) Kontseilariak, osatzen duten Foru Komunitateko Administrazioko departamentuaren eta atxikita edo haien zaintzapean dituzten erakunde, elkarte edo fundazio publikoen ordezkari gisa.

b) Toki entitateen gobernu organoak, beren eskumenen esparruaren barruan.

c) Nafarroako Unibertsitate Publikoko errektorea.

d) Batzordean ordezkariak dituzten enpresaburuen lehendakaria edo organo baliokidea.

e) Nafarroako Parlamentuko lehendakaria.

f) Comptos Ganberako lehendakaria.

g) Kontratazio organoa, Kontratu publikoei buruzko Foru Legean espresuki ezarritako kasuetan.

9. artikulua. Erregelamenduzko xedapenak egitea.

1. Kontratu publikoei buruzko Foru Legearen garapenak eskatzen dituen erregelamenduzko xedapenen proposamenak batzordeko Idazkaritzak egiten ahalko ditu edo, hala badagokio, horretarako eratzen den batzorde txostengileak edo lan taldeak. Batzordeburuaren zeregina izanen da batzorde txostengilea edo lan taldea osatzeko agindua eman eta hura eratzea.

2. Batzordeko osoko bilkurak xedapen proposamena onetsirik, idazkariak Ekonomia eta Ogasun arloko departamentu eskuduneari igorriko dio, dagokion onespen prozedura hasteko.

10. artikulua. Kontratazio Publikorako Batzordearen urteko memoria.

Kontratazio Publikorako Batzordeak Nafarroako Gobernuari eta horretarako erabakitzen den Nafarroako Parlamentuko batzordeari urtero igorri behar dion memoria Idazkaritzak prestatu beharko du; Kontratu Publikoei buruzko Foru Legearen mendeko erakunderen kontratuzko jardueratik lortutako informazioan oinarrituko da, betiere osoko bilkurak onetsita.

II. KAPITULUA. Nafarroako Kontratazio Ataria eta iragarkiak

1. atala. Nafarroako Kontratazio Ataria

11. artikulua. Atariaren eratzea eta funtzionalitateak.

1. Interneten web atari bat ezarriko da: Nafarroako Kontratazio Ataria. Kontratazio Publikorako Batzordearen mende egonen da eta Kontratu publikoei buruzko Foru Legearen mendeko entitateen lizitazioen publizitaterako baliabide ofiziala izanen da.

2. Nafarroako Kontratazio Atariak, gainera, funtzionalitate hauek izanen ditu:

a) Kontratu publikoei buruzko Foru Legearen mendeko lizitazioen berri ematea, foru lege horretan ezartzen den moduan, eta ziurtatzea eskura egonen direla kontratua gauzatzeko baldintza guztiak eta, hala badagokio, gainerako agiri osagarriak, programatutako kontratuak, esleitutako kontratuak, deuseztatutako lizitazioak eta kontratazioa behar bezala kudeatzeko beharrezko edo komenigarriak diren beste informazio guztiak.

b) Nahitaezko iragarkiak argitaratu izana eta argitaratze data egiaztatzea.

c) Nafarroako Kontratazio Atarian kide anitzeko organoen osaeraren berri ematea etengabeki, Kontratu publikoei buruzko Foru Legeak agindu bezala. Informazio hori guztien eskura egonen da, inolako mugarik gabe.

d) Kontratu publikoei buruzko Foru Legearen mendeko entitate eta kontratazio organoei buruzko informazio orokorraren euskarri izatea (harremanetarako helbidea, telefono eta fax zenbakiak, posta helbidea eta posta elektronikoaren kontua).

e) Kontratu publikoei buruzko Foru Legearen mendeko entitateen eta izan daitezkeen kontratisten topagunea izatea, eta kontratazio publikoarekin lotutako tramiteak egiteko informazio eta aplikazio edo zerbitzu espezifiko guztiak batzea.

12. artikulua. Atarian sartzea eta informazioa eta dokumentazioa igortzea.

1. Interesdunak Nafarroako Atariaren bidez (www.navarra.es) edo zuzenean (www.contrataciones.navarra.es) sartzen ahalko dira kontratazio atarian. Kontratazio Publikorako Batzordeak hartan sartzeko bide berriak erabiltzea erabakitzen ahalko du.

2. Ataria erabiltzeak berarekin dakar hura erabiltzeko betekizunak baldintzarik gabe onartzea.

3. Atarian sartzean, erabiltzaileak egiaztatzeko kontrola bermatuko da. Horretarako, sartzeko modu estandarizatuak, segurtasun maila altukoak eta Nafarroako Gobernuaren azpiegitura egiaztatzeko sistemetan sartzen ahal direnak, aplikatuko dira. Egiaztatzea egin eta gero, erabiltzaileei baimena emanen zaie, ahal dela, Nafarroako Gobernuan ezarritako metodologiak erabiliz.

4. Nahitaezko agirien bidalketa, atariko erregistroan inskribatu beharreko datuak igortzeko modua eta epeak, bai eta horretarako erabiliko diren fitxa ereduak ere, Kontratazio Publikorako Batzordearen erabakiz ezarriko dira.

5. Kontratazio Publikorako Batzordeak ezarriko ditu entitate kontratatzaileek foru dekretu honetan adierazitakoa betetzeko erabili beharko dituzten baliabide informatikoen formatua eta zehaztapenak.

13. artikulua. Baliabide elektronikoak, informatikoak eta telematikoak erabiltzea.

1. Baliabide elektronikoak, informatikoak eta telematikoak erabiltzeak Kontratazio Publikorako Batzordearen, entitate kontratatzaileen eta izan daitezkeen lizitatzaileen arteko dokumentazio truke segurua ekarriko du.

Informazioa edo dokumentazioa trukatzeko prozesuek baldintza hauek bete beharko dituzte, besteak beste: sinadura elektroniko aurreratua, denbora zigilua eta irekitzeko kudeaketa eta kontrola, daten arabera.

Halaber, behar diren neurri teknikoak eta antolaketakoak hartuko dira, informazioaren eta agiri elektronikoen egiazkotasuna, isilpekotasuna, osotasuna, eskuragarritasuna eta kontserbazioa ziurtatzeko.

2. Aurreko idatz-zatian ezarritako neurriak hartzeko, kontuan hartu beharko da teknikaren egoera, bai eta datuen, tratamenduen eta arriskuen proportzionaltasun irizpidea ere.

3. Kontratazio Publikorako Batzordeak erabiltzen dituen euskarrietarako, baliabideetarako eta aplikazioetarako segurtasun neurriek ondoko hau bermatu beharko dute:

a) Baimena duten pertsonek baino ezin izanen dituzte eskuratu eta erabili haietan dauden datu eta informazioak.

b) Datu eta informazioak ez dira ez aldatuko ez galduko.

c) Prozesu informatikoak baimenik gabeko manipulazioetatik babestuta egonen dira.

4. Kontratazio Publikorako Batzordeak baliabide elektronikoen, informatikoen eta telematikoen zerrendaren berri emanen du, haien bidez egin ahal izateko haren eta pertsona fisiko eta juridiko interesdunen arteko komunikazioak eta jakinarazpenak. Baliabide horiek erabiltzeko formatu eta kode normalizatuak zehaztuko ditu, hala behar denean. Zerrenda hori interesdunen eskura egonen da http://www.navarra.es helbidean.

Kontratazio Publikorako Batzordeak beti eguneraturik eta interesdunen eskura edukiko du aurreko idatz-zatian aipatutako aplikazioen, baliabideen eta euskarrien zerrenda.

14. artikulua. Agirien ezaugarriak eta formatua.

Dokumentazio trukea dakarten aplikazio informatikoek formatu hauek onartuko dituzte: doc,. xls,. pdf,. jpg,. rtf,. ppt,. txt,. csv,. wps,. zip, edo atarian aipatutako beste formatu batzuk.

15. artikulua. Erantzukizuna, datuen segurtasuna eta birus informatikoen kudeaketa.

1. Erabiltzaileena da, oso-osorik, atarira igorri eta haren bidez argitaratu edo tramitatzen diren datuen, fitxategien, iragarkien, agirien edo artxiboen segurtasunarekin lotutako guztiaren erantzukizuna, bai eta horiek kentzearena eta sortzen ahal dituzten ondorio juridikoena ere, eta ezin zaie inolako erantzukizunik egotzi ez Kontratazio Publikorako Batzordeari ez Nafarroako Foru Komunitateari. Erantzukizun horrek berarekin dakar prozesuaren edozein unetan igorritako fitxategiei buruzko birusak kontrolatzea.

2. Erabiltzaileek aurkeztutako datuak, agiriak edo artxiboak horiek erabili edo irakurtzea oztopatzen duten birusik gabe igorri beharko dira. Hori igorlearen erantzukizuna izanen da.

3. Kutsatutako datuak, agiriak edo artxiboak ez dira igorriko, eta igorleari abisu bat bidali eta arazoa konpontzeko eta birusik gabe berriro bidaltzeko eskatuko zaio. Hori guztia dagokion tramitea hasita dagoen ala ez kontuan hartu gabe. Arazoa konpontzen ez bada, interesdunak uko egin duela ulertuko da.

16. artikulua. Interesdunei jakinaraztea.

1. Atariaren bidez egiten diren tramitazioek edo prozedurek, jakinarazi beharrekoek, nahitaez beharko dute harremanetarako baliabide elektroniko bat, hau da, jakinarazpen horien helmuga gisa erabil daitekeen posta elektronikoko helbide bat.

2. Jakinarazpen sistema bat prestatuko da. Horren bidez, prozesuetan jakinarazpenak egiteko baimena duten langileek nahi duten jakinarazpena egin eta mezu elektroniko eta jakinarazpen abisu bana igorriko dizkiote interesdunari, eta bertan adieraziko eskura dezakeen jakinarazpen bat duela, bai eta hura eskuratzeko webgunearen helbidea ere. Hortaz, erabiltzaileak hura ikusi ahal izateko, helbide horretara jo beharko du. Helbidearen izena Jakinarazpen Pertsonalen Gordailua izanen da.

3. Foru dekretu honetan azpimarratutako eskuragarritasuna eta pribatutasuna kontrolatzeko alderdiak kontuan hartuko dira, jakinarazpen hori zein erabiltzailerentzat den, hark bakarrik eskuratu ahal dezan, betiere sisteman identifikatu eta gero.

4. Jakinarazpen guztiak Jakinarazpen Pertsonalen Gordailuan eginen dira. Jakinarazpena egin dela ulertuko da leku horretan sartzean, eta ekintza hori elektronikoki erregistratuko da. Jakinarazpen Pertsonalen Gordailura igorritako jakinarazpenak sinadura digital bidezko ziurtagiri bat erabiliz baizik ezin izanen dira irakurri.

5. Jakinarazpena Jakinarazpen Pertsonalen Gordailura igorri eta biharamunetik kontatzen hasita bost egun balioduneko epean hura irekitzeko saiakerarik egiten ez bada, jakinarazpena egin dela ulertu eta erregistroko idazpen elektroniko bat sortuko da, interesdunari jakinaraziko zaiona.

6. Jakinarazpen espres edo ustezkoaren jakinarazpen edo ukatze idazpen bat eginen da. Bertan jasoko dira igorlearen eta hartzailearen identifikazioaren sarrera erregistroaren zenbakia eta jakinarazpenaren eguna eta ordua.

7. Jakinarazpen baten egoera informazio honen kopia telematiko bidez jakinaraziko da:

a) Eskura jarri izanaren agiriak (jakinarazpena postontzian eskura egon zen data elektronikoa eta jakinarazpenaren igorlearen sinadura).

b) Hartu izanaren agiriak (hartzaileak jakinarazpena irakurri edo errefusatu zuen data elektronikoa eta sinadura).

8. Jakinarazpen elektronikoen balioa eta ondorio juridikoak Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 59. artikuluak arautuko ditu.

9. Jakinarazpen Pertsonalen Gordailuaren indarraldia mugagabea izanen da, salbu eta titularrak ezeztatzen badu, pertsona fisikoa hiltzen bada edo enpresen nortasun juridikoa iraungitzen bada edota hala ezartzen badu ebazpen administratibo edo judizial batek. Helbide hori baliogabetuko da, hiru urtean ez bada behin ere erabiltzen jakinarazpenak egiteko.

2. atala. Iragarkiak Nafarroako Kontratazio Atarian

17. artikulua. Nahitaezko iragarkiak.

1. Nafarroako Kontratazio Atariak, Kontratu publikoei buruzko Foru Legearen mendeko entitateen lizitazioen iragarkietarako baliabide ofizialak, ororen eskura jarriko ditu iragarkiak, foru legeak argitaratzeko agintzen duen gainerako dokumentazioa eta lizitatzaileek argitaratu behar dela uste duten bestelako informazioa.

2. Iragarkiak lizitazio epean argitaratuko dira atarian.

18. artikulua. Iragarlearen erantzukizuna.

Iragarlea arduratuko da iragarkiak atarira bidaltzeaz, haien edukiez, haiek atarian legez ezarritako epeetan edukitzeaz eta haiek kentzeaz, epeak amaitzen direnean.

III. KAPITULUA. Kontratuen Erregistroa

19. artikulua. Kontratuen Erregistroaren xedea.

1. Kontratuen Erregistroaren xedea da Kontratu publikoei buruzko Foru Legearen mendeko entitateek egindako kontratuak orok jakitea, foru lege horren 209. artikuluan ezarritakoari jarraikiz.

2. Kontratuen Erregistroa elektronikoa izanen da, Nafarroako Kontratazio Atariaren barruan egonen da eta funtzionatzeko behar dituen komunikazio guztiak baliabide telematiko bidez eginen dira.

3. Kontratuen Erregistroan Kontratu publikoei buruzko Foru Legearen mendeko entitateek esleitutako kontratu guztiak inskribatuko dira, bai eta haien aldaketak, luzapenak, ebazpenak eta horiek betetzearen ondoriozko gainerako gorabeherak ere.

4. Esparru-akordio baten edo erosketa sistema dinamiko baten barrenean esleitutako kontratuak izanez gero, nahikoa izanen da erregistrora hiru hilean behin bidaltzea, Kontratazio Publikorako Batzordeak zehazten duen prozedura elektronikoaren bidez, esleitutako kontratuen, kontratisten izenen eta prezioen zerrenda bidaltzea. Betiere, aurretik Kontratuen Erregistroari jakinarazi behar zaizkio akordioaren edo sistemaren ezarpena eta hartan parte hartzen duten kontratisten izenak.

20. artikulua. Kontratuen Erregistroaren eginkizunak.

Kontratuen Erregistroak Kontratu publikoei buruzko Foru Legearen mendeko entitateek esleitutako kontratu guztien informazioa zentralizatuko du eta, gainera, eginkizun hauek izanen ditu:

a) Kontratuen kontrol estatistikoa eramatea.

b) Erregistratutako kontratuen datuak ematea, Kontratazio Publikorako Batzordeko Idazkaritzak urteko memoria egin ahal izateko.

c) Bildu eta argitaratzea kontratuak gauzatzean sortzen diren eta zigor ekonomikoak edo kontratuaren suntsiarazpena eragiten duten gorabeherak, kontratistei leporatzen ahal zaizkienak, eta Kontratuen Erregistroan jakinaraztea organo horientzat interesa duen beste edozein informazio.

d) Erregistratutako kontratuei buruzko datuak ematea, batzordeko Idazkaritzaren bidez, Estatuko Administrazio Orokorreko Kontratazio Administratiboko Batzorde Aholku-emailearen Kontratuen Erregistroari.

e) Comptos Ganberari jakinaraztea izena eman behar duten kontratuak, haien izaera edo zenbatekoa dela-eta ezagutarazteko eta kontrolatzeko organo horren mende jarri behar dutenak, bai eta organo horrek eskatzen dituen agiriak eta informazioa ere.

IV. KAPITULUA. Nafarroako Foru Komunitateko Lizitatzaileen Borondatezko Erregistroa

21. artikulua. Nafarroako Foru Komunitateko Lizitatzaileen Borondatezko Erregistroaren xedea.

Nafarroako Foru Komunitateko Lizitatzaileen Borondatezko Erregistroa Kontratazio Publikorako Batzordeko Idazkaritzaren mendean dagoen kontratazio publikoaren elementu osagarria da eta, ondorioz, Kontratu publikoei buruzko Foru Legearen mendeko entitateek deitutako lizitazioetan parte hartu nahi duten merkataritza sozietateen, kooperatiben eta lan elkarteen borondatezko izen-ematea jasoko du, haien nortasuna eta ordezkaritza egiaztatzeko Kontratu publikoei buruzko Foru Legearen mendeko entitate lizitatzaileen aurrean.

22. artikulua. Izen-ematea eta ziurtagiria lortzea.

1. Enpresa batek Lizitatzaileen Borondatezko Erregistroan izena ematean ziurtagiri bat eginen da, Kontratazio Publikorako Batzordearen kide bakarreko organoetako edozeinen baimenarekin, enpresaren nortasuna eta ordezkaritza adieraziko dituena.

2. Ziurtagiriaren kopia, modu elektronikoan Internet bidez eskuratua, eta indarraldiaren gaineko erantzukizunpeko aitorpena aurkezten badira, lizitatzaileak ez du bere nortasunaren eta ordezkaritzaren gaineko beste agiririk aurkezteko beharrik izanen Kontratu publikoei buruzko Foru Legearen mendeko entitateek deitutako lizitazioetan.

3. Lizitatzaileen Borondatezko Erregistroan gordeko dira bai ziurtagirian agertzen diren datuak egiaztatzen dituzten agirien kopia konpultsatuak bai egindako ziurtagiriak. Ziurtagiri horiek lizitatzaileek lortzen ahalko dituzte, elektronikoki, kontratazio prozedurarako dei egiten den aldiro.

4. Ziurtagiriaren kopiak ausazko bi gako izanen ditu, Kontratu publikoei buruzko Foru Legearen mendeko entitateek haren egiazkotasuna frogatzeko, prozedura elektronikoen bidez.

5. Erregistroan izena ematearen ondorioz, erregistratutako enpresak baimena emanen die Kontratu publikoei buruzko Foru Legearen mendeko entitateei, erregistroak egindako ziurtagiriaren kopia jaso dutenei, agiriaren egiazkotasuna modu elektronikoan frogatzeko.

23. artikulua. Ziurtagirien ustiapena.

1. Lizitatzaileen Borondatezko Erregistroaren jardueraren euskarria Nafarroako Kontratazio Ataria izanen da, eta behar diren neurriak hartuko dira, bertan dauden ziurtagirietan bakar-bakarrik sartu ahal izateko interesdunek eta kasu bakoitzean baimendutako Kontratu publikoei buruzko Foru Legearen mendeko entitateek.

Erregistroan prozedura elektronikoen bidez sartzeko baimena izanen dute bertan emandako ziurtagirien kopiak egiazkoak ote diren frogatu nahi duten Kontratu publikoei buruzko Foru Legearen mendeko entitateek eta horiei lagunduz prozeduran parte hartzen duten kontratazio mahaiek. Kopia horiek, betiere, entitate horiek deitutako kontratazio prozeduretan aurkeztuak izan behar dute.

2. Kontratazio Publikorako Batzordearen lagun bakarreko organoetako edozeinek baimena eman ondotik, enpresaren nortasuna eta ordezkaritza adierazten dituen ziurtagiriak urtebeteko balioa izanen du hasiera batean eta urtetik urtera luzatzen ahalko da, interesdunak, sistema seguru bat erabiliz, hasieran emandako informazioa, ziurtagirian agertzen den bera, baliagarria dela eta ez dela aldatu aitortu eta ondoan. Nolanahi dela ere, interesdunak berak emandako informazioa dela medio, edo enpresaren edo haren ordezkarien gaitasuna mugatzen duen administrazioaren edo epailearen ebazpena bete behar delako, ziurtagiriaren indarraldia murrizten ahal da.

3. Lizitatzaileek ziurtagiriaren kopia elektronikoki lortu eta ustiatuko dute, eta Kontratazio Publikorako Batzordeak ezin izanen du paperezko ziurtagiririk igorri.

24. artikulua. Agiriak aurkeztea.

1. Izena erregistroan eman nahi dutenek, betiere, ondoko agiriak aurkeztuko dituzte: gaitasun juridikoa eta aritzekoa egiaztatzen dituzten jatorrizko agiriak, entitatearen izenean eta haren ordezkari lanetan diharduten pertsona fisikoen ordezkaritza egiaztatzen duten notario-ahalordeak, pertsona fisiko horien Nortasun Agiri Nazionala (NAN) edo legez ordezkoa izan daitekeen agiria, eta enpresaren Identifikazio Fiskaleko Zenbakia (IFZ) egiaztatzen duen agiria.

2. Merkataritza sozietateek eta lan sozietateek eraketa eta aldaketa eskriturak, xedea adierazten duen eskritura eta administratzailearen izendapenaren eskritura aurkeztuko dituzte, horiek guztiak jatorrizkoak eta Merkataritza Erregistroan behar bezala inskribatuak. Merkataritza sozietateak nahi baldin badu bere ordezkariak administratzaileak ez beste pertsona batzuk izatea, emandako ordezkaritza ahalordeak agertzen dituen jatorrizko eskritura edo notarioak baimendutako kopia, Merkataritza Erregistroan behar den bezala inskribatuak, aurkeztu beharko du.

3. Kooperatibek dagokien erregistroan izena eman dutela egiaztatzen duen jatorrizko agiria aurkeztu beharko dute.

V. KAPITULUA. Kontratazio publikoaren arloko erreklamazioak

25. artikulua. (indargabetua)

26. artikulua. (indargabetua)

27. artikulua. (indargabetua)

28. artikulua. (indargabetua)

29. artikulua. (indargabetua)

30. artikulua. (indargabetua)

31. artikulua. (indargabetua)

32. artikulua. (indargabetua)

VI. KAPITULUA. Prezioak finkatzeko Arbitraje Batzordea

33. artikulua. Prezioak ezartzeko arbitraje prozedura.

Obren kontratu administratibo bat aldatzearen ondorioz, proiektuan aurreikusi ez ziren obra-unitateak edo aurreikusitakoekin zerikusirik ez dutenak sartzen badira, kontratistak, behar den negoziazioa burutu ostean, administrazioak hasiera batean proposatutako prezioak onartzen ez baditu, eskubidea izanen du unitate berriak ez egiteko edo prezioak ezartzeko arbitraje prozedura bat has dadin eskatzeko. Azkeneko kasuan obra egiten jarraituko du.

34. artikulua. Arbitraje prozeduraren tramitatzea.

1. Administrazioak prezioen hasierako proposamena egin eta gero, kontratistak prezioak adosteko hamar egun balioduneko epea izanen du, proposamena jakinarazi eta biharamunetik kontatzen hasita.

2. Arbitraje eskaera kontratazio organoari aurkeztuko zaio, kontratistak egindako prezioen eta mahaikide teknikoaren proposamenekin batera.

3. Kontratazio organoak, hamar egun balioduneko epean, eskaera jaso eta biharamunetik kontatzen hasita, hura Kontratazio Publikorako Batzordeari igorriko dio, agiri hauekin bat: prezioen hasierako proposamena, kontratistak eginiko prezioen proposamena, kontratazio organoak eta kontratistak mahaikide teknikoa izendatzeko eginiko proposamena eta kontratuaren espedientearen kopia osoa.

4. Hasteko eskaera jaso ondoren, Kontratazio Publikorako Batzordeko lehendakariordeak prozeduraren hasiera ebatziko du, eskaera batzordearen eskumenen esparruaren barruan dagoela egiaztatu eta gero. Hasteko ebazpena interesdunei jakinaraziko zaie.

5. Arbitraje Batzordea izendatu ondoren, batzordeburuak batzordea eratzeko bilerara deituko du, gutxienez ere bost egun lehenago.

6. Prozedura tramitatzeko egin beharreko jakinarazpen guztiak Nafarroako Kontratazio Atariaren bidez eginen dira.

35. artikulua. Arbitraje Batzordearen osaera.

1. Prezioak kontraesaneko prozedura bidez ezarriko ditu arbitraje batzorde batek. Batzorde hori Kontratazio Publikorako Batzordeak aldiro izendatuko du eta honela osatuko da:

a) Kontratazio Publikorako Batzordeko idazkaria edo Ekonomia eta Ogasun arloko departamentu eskuduneko Ondare Zerbitzuko Kontratazio Atalari atxikitako administrazio publikoko (arlo juridikoa) letratu edo teknikari bat, batzordeburu arituko dena.

b) Kontratazio organoak proposatutako mahaikide teknikari bat, arbitraje prozeduran parte hartuko duena.

c) Kontratistak proposatutako mahaikide teknikari bat, arbitraje prozeduran parte hartuko duena.

d) Kontratazio Publikorako Batzordeak izendatutako mahaikide teknikari bat.

e) Idazkaria, hitzik eta botorik gabe, Ekonomia eta Ogasun arloko departamentu eskuduneko Ondare Zerbitzuari atxikitako pertsona bat.

2. Batzordekideek abenduaren 3ko 15/2004 Foru Legean ezarritako abstentzio eta errefusatze arrazoiei lotuko zaizkie.

3. Arbitraje Batzordeko kideek ez dute aldizkako ordainsaririk jasoko haien lanagatik. Hala ere, dietak jasotzen ahal dituzte, deitutako bileretara joateagatik, bai eta kalte-ordainak ere, kide gisa jarduteagatik, betiere Ekonomia eta Ogasun kontseilariak erabakitzen duen zenbatekoaren arabera.

36. artikulua. Ebazteko epea eta erabakia.

1. Arbitraje Batzordeak hilabete izanen du, eratzen den egunetik aitzina, erabakia hartzeko. Arrazoien gainean beharko du erabakia hartu, prezioak ezartzeko sortutako gorabehera guztiak ebatziko ditu eta interesdunei jakinaraziko zaie. Arbitraje ebazpenak entitate kontratatzailea eta kontratista lotetsiko ditu eta administrazio bidea amaituko du.

2. Arbitraje Batzordeak erabakia hartu gabe hilabeteko epea iraganik, berretsitzat emanen dira kontratistak hasiera batean proposatutako prezioak.

Lehen Xedapen Gehigarria.  Ziurtagiri digitalak eta Jakinarazpen Pertsonalen Gordailuko bajak.

1. Kontratazio Publikorako Batzordeak ziurtagiri digitalak dohainik emateko aukera aztertuko eta horiek banatuko ditu, hala badagokio, oraindik ez dituzten pertsonei, erreklamazioetan dohainik sartzea bermatzeko. Edonola ere, interesdunaren nortasuna eta haren informazioaren isilpekotasuna, osotasuna, eskuragarritasuna, ez-ukatzea eta zaintzea bermatu behar dira.

2. Betiere, Jakinarazpen Pertsonalen Gordailua ezeztatzen ahalko da, menuan "Zerbitzuaren baja" aukeratuta. Horretarako, ezeztatze eskaera sinatu behar da, ziurtagiri digitalarekin. Edozein dela kausa helbide elektroniko horren ezeztatzean sartzerik ez bada, arrazoi teknikoak direla medio, Kontratazio Publikorako Batzordeari gutun ziurtatu bat bidaltzen ahal zaio eta bertan azaldu zein den telematikoki egitea eragozten dion arrazoi teknikoa. Eskatzaileak gutuna sinatu eta IFZaren fotokopiarekin batera bidali beharko du.

Bigarren Xedapen Gehigarria. Kontratazio Publikorako Batzordearen osaera.

Foru dekretu honek indarra hartu eta hilabeteko epean, Kontratazio Publikorako Batzordea eratzeko bilkurara deituko da.

Hirugarren Xedapen Gehigarria. Baimena.

Ekonomia eta Ogasun arloko departamentu eskuduneko Ondare Zerbitzuari atxikitako funtzionarioei baimena ematen zaie interesdunek aurkeztuko dizkieten agiri publiko eta pribatuak konpultsatzeko, Lizitatzaileen Borondatezko Erregistroan izena emateko beharrezkoak baitira.

Laugarren Xedapen Gehigarria. Ereduak.

1. Foru dekretu honen I. eranskineko 22. artikuluko 2. idatz-zatian aipatzen den ziurtagiriaren formatua.

2. Aurreko idatz-zatian adierazitako ziurtagiriak indarrean segitzeko erantzukizunpeko aitorpena foru dekretu honen II. eranskinean agertzen den ereduari jarraikiz eginen da.

Bosgarren Xedapen Gehigarria. Eskumenen banaketa.

Kontratazio Publikorako Batzordeak bere eginkizunak gauzatuko ditu, deusetan galarazi gabe Modernizazioaren eta Administrazio Elektronikoaren Zuzendaritza Nagusiak teknologian eta informatikan dituen eskumenak.

Xedapen Indargabetzaile Bakarra. Indargabetzen diren xedapenak.

Indarrik gabe gelditu dira foru dekretu honetan xedatutakoaren kontrako maila bereko edo txikiagoko xedapen guztiak eta, bereziki, Kontratuen Erregistroari buruzko apirilaren 25eko 162/1991 Foru Dekretua eta Nafarroako Foru Komunitateko Lizitatzaileen Borondatezko Erregistroa arautu zuen apirilaren 19ko 174/2004 Foru Dekretua