navarra.es
Castellano | Euskara | Français | English
Ezagutzera eman
3/2010 Foru Agindua, urtarrilaren 14koa, Familia, Gazteria, Kirol eta Gizarte Gaietako kontseilariak emana, familia egoera baloratzeko prozedura eta baremoa arautzen dituena, adinekoak, ezgaitasuna duten pertsk, adimen-eritasuna dutenak ...
3/2010 FORU AGINDUA, URTARRILAREN 14KOA, FAMILIA, GAZTERIA, KIROL ETA GIZARTE GAIETAKO KONTSEILARIAK EMANA, FAMILIA EGOERA BALORATZEKO PROZEDURA ETA BAREMOA ARAUTZEN DITUENA, ADINEKOAK, EZGAITASUNA DUTEN PERTSONAK, ADIMEN-ERITASUNA DUTENAK ETA GIZARTEAN BAZTERTURIK EDO HORRELA GERTATZEKO ARRISKUAN DAUDEN PERTSONAK ARTATZERA ZUZENDUTAKO EGOITZETAKO PLAZAK ESKURATZE ALDERA.
(2010eko 22. NAOn argitaratua, otsailaren 17an)
Atarikoa
Abenduaren 14ko 39/2006 Legeak, autonomia pertsonala sustatzeari eta mendetasun-egoeran dauden pertsonak zaintzeari buruzkoak, oinarrizko baldintzak ezartzen ditu berdintasuna bermatua egon dadin herritarrek autonomia pertsonala sustatzeko eta mendekotasuna duten pertsonei laguntzeko duten eskubide subjektiboa erabiltzen dutenean. Horretarako, Autonomiarako eta Mendekotasunaren Arretarako Sistema sortu da, Estatuko herritar guztientzako gutxieneko eskubide komun batzuk biltzen dituena.
Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 44. artikuluak erabateko eskumena ematen dio Nafarroako Foru Komunitateari gizarte zerbitzuen arloan. Hori horrela izanik, Gizarte Zerbitzuei buruzko abenduaren 14ko 15/2006 Foru Legea eman zen, funtsezko helburutzat Nafarroako Foru Komunitatearen esparruan herritarren gizarte ongizatea lortzea zuena, gizarte zerbitzuak eskuratzeko eskubide unibertsala bermatuz. Horretarako, gizarte zerbitzuen sistema bat osatu zen, eskainitako zerbitzuek pertsonen autonomia, duintasuna eta bizi-kalitatea ziurtatzeko baldintzarik hoberenak dituztela bermatzeko.
Foru lege hori garatzeko, eta ekainaren 17ko 69/2008 Foru Dekretuaren bidez, Gizarte zerbitzu orokorren zorroa onetsi zen. Haren bidez, mendekotasun egoeragatik, familiako gatazka larriagatik edo familia-sostengu egokirik ez izateagatik etxean gelditzerik ez dutenei egoitzako plaza bat eskuratzea bermatzen zaie, aldi baterako nahiz modu iraunkorrean.
Gizarte zerbitzu orokorren zorroaren prestazioak kudeatu eta koordinatzea dagokio Nafarroako Gobernuan, gizarte zerbitzuen arloan, eskumena duen departamentuari.
Nafarroako Gobernuak eta Nafarroako Parlamentuak Nafarroako Gizarte Zerbitzuen Plan Estrategikoa onetsi zuten 2008an. Bertan xedatzen denez, pertsona ahulenak lehentasunez artatzeko printzipioak gidatuko ditu planean aurreikusitako neurriak eta ekintzak. Hori horrela, planean aurreikusitako neurriak eta ekintzak betetzean, lehentasuna emanen zaie, haien artetik, pertsona ahulenei arreta emateko xedea dutenei.
Plan horretan aurreikusitako jarduketetako bat da familiako gatazka larria bizi dutenen edo familia-sostengu egokirik ez dutenen egoera baloratzeko baremoa arautzen duen foru agindua onestea, pertsona horiek egoitzetan sartzeko.
Hori horrela, foru agindu honen xedea da familia egoeraren balorazioa arautzea, adinekoak, ezgaitasuna duten pertsonak, adimen-eritasuna dutenak eta gizartean bazterturik edo horrela gertatzeko arriskuan dauden pertsonak artatzera zuzendutako egoitzetako plazak eskuratze aldera.
Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legearen ) artikuluak eta Familia, Gazteria, Kirol eta Gizarte Gaietako Departamentuaren egitura organikoa ezartzen duen irailaren 3ko 125/2007 Foru Dekretuak eman dizkidaten ahalmenak erabiliz, agindu dut:
1. artikulua. Onuradunak.
-65 urtetik gorako pertsonak.
-65 urtetik beherako pertsonak, ezgaitasuna dutenak.
-18 eta 65 urte bitarte eta adimen-eritasuna duten pertsonak.
-18 eta 65 urte bitarte eta gizartean bazterturik edo horrela gertatzeko arriskuan dauden pertsonak, premia larria eta babes gabezia soziala pairatzen dutenak.
2. artikulua. Sartzeko baldintzak.
-Eskaera egin aurreko bi urteetan Nafarroan egiazki eta jarraian bizi izan dela frogatzea.
-Familiako gatazka larria edukitzea edo familia-sostengu egokirik ez izatea, eta etxean gelditzeko ezintasuna.
3. artikulua. Kontzeptuak.
Foru agindu honen ondorioetarako, familiako gatazka larria edo familia-sostengu egokirik ez duten pertsonak izanen dira euren familia esparruagatik, edo halakorik ez izateagatik, oinarrizko beharrak ez asetzeko arrisku handia dutenak eta beraz, ahultasun egoera horretan egonik, premiazko erantzuna eskatzen dutenak. Kasuan kasuko gizarte zerbitzuek egiaztatu beharko dituzte egoera horiek.
4. artikulua. Eskabidea.
1. Eskabidea inprimaki normalizatua erabiliz egin beharko da.
2. Eskabidearekin batera kasuan kasuko Oinarrizko Gizarte Zerbitzuak emandako txosten soziala, non eskatzailearen egoeraren berri emanen den, eta mendekotasunaren balorazio sozialaren eskala, Oinarrizko Gizarte Zerbitzu horretako gizarte langile batek betea, aurkeztuko dira. Eskala horretan 45 puntutik gora atera dutenen kasuan, eskalarekin batera Zarit eskala ere aurkeztu beharko dute. Eskala hori foru agindu honen II. eranskinean dago.
Adimen-eritasuna dutenen kasuan, osasun sareko adimen osasuneko zentroetako gizarte langile batek bete ahal izanen ditu hala txosten soziala nola mendekotasunaren balorazio sozialaren eskala.
Eskabideak, behar bezala beteak eta eskaturiko agiriekin batera, Familia, Gazteria, Kirol eta Gizarte Gaietako Departamentuan (González Tablas, 7, Iruña) edo Herri Administrazioen Araubide Juridikoari eta Administrazio Prozedura Erkideari buruzko Legearen 38.4 artikuluan ezarritako tokietan aurkeztu ahal izanen dira.
Eskabideak foru agindu honetan ezarritako baldintzak betetzen ez baditu, eskatzaileari errekerimendua eginen zaio 10 eta 15 egun baliodun bitarteko epean akatsa zuzen dezan edo behar diren agiriak ekar ditzan. Halaber, ohartaraziko zaio ezen, horrela egin ezik, eskaera bertan behera utzi duela ondorioztatuko dela, Administrazio Publikoen Araubide Juridikoari eta Administrazio Prozedura Erkideari buruzko Legearen 42. artikuluan ezarritakoari jarraikiz emanen den ebazpenaren bidez.
3. Eskabidea aurkeztearekin batera, Administrazioari baimena ematen zaio bidezko diren egiaztapen lanak egin ditzan, interesdunek emandako informazioa benetakoa ote den eta eskatutako baldintzak betetzen ote dituzten egiaztatzeko.
5. artikulua. Dokumentazioa.
1. Eskabidean adierazitakoa. Horrez gain, egoitza baliabide jakin batzuetan sartzeko berariazko dokumentazioa eta aurreko artikuluan aurreikusitakoa.
2. Aurreko atalean adierazitako dokumentazioa ez da aurkeztu beharrik izanen, Nafarroako Foru Komunitateko Administrazioaren esku baldin badago. Horrelako kasuetan, eskatzaileek zein espedientetan dagoen adierazi beharko dute eta, gainera, aitorpen bat aurkeztu beharko dute, agiri horietan aldaketarik izan ez dela adierazteko. Era berean, prozeduraren instrukzio organoak behar diren datuak eskatzen ahalko dizkie interesdunei.
6. artikulua. Baloratu, onartu eta egiaztatzeko prozedura.
1. Eskatzaileak 2. artikuluan ezarritako baldintzak betetzen dituela egiaztatu ondoren, haren egoera baloratuko da. Horretarako, mendekotasunaren balorazio sozialaren eskala (foru agindu honen I. eranskinean dago) eta eskatzailearen gaitasun ekonomikoa erabiliko dira. Eskabideak banaka baloratuko dira.
Balorazioa eginen dute gizarte zerbitzuen arloan eskumena duen departamentuan jarduketa eremuetako bakoitzean eskumena duten talde teknikoek.
Eskumena duten talde teknikoek irizpen teknikoa emanen dute, eta eskatzailearen espedientean sartuko da.
2. Onartu eta egiaztatuko dira balorazio sozialaren eskalan 65 puntu edo gehiago lortu dituzten pertsonak, baldin eta beren gaitasun ekonomikoak ez badu IPREMa gainditzen, 3,5 aldiz mendekotasuna dutenen kasuan, eta 2,3 aldiz mendekotasunik ez dutenen kasuan. Onarpena eta egiaztapena hiru hileko epean egin beharko dira gehienez ere, eskabidea eta eskatutako dokumentazio guztia ebazpena emateko eskumena duen organoaren erregistroan sartzen denetik hasita.
Ondorio horietarako, eskatzailearen gaitasun ekonomikoa kalkulatzeko aplikatuko da unean-unean erabiltzaileek zerbitzuen finantziazioan duten parte-hartzea oro har arautzen duen araudia.
3. Foru agindu honen babesean egindako balorazioak, onarpenak eta egiaztapenak Nafarroako Foru Komunitatean baizik ez dute ondoriorik izanen. Onarpena eta egiaztapena ofizioz ikuskatu ahal izanen dira horiek ahalbidetu zituzten egoeretan aldaketarik izan bada.
Xedapen Indargabetzaile Bakarra. Indargabetutako arau eta manuak.
Indarrik gabe gelditzen dira foru dekretu honetan ezarritakoari aurka egiten dioten maila bereko edo beheragoko arau guztiak. Zehazki, indarrik gabe geratzen da Nafarroako Gizarte Ongizatearen Institutuko zuzendari kudeatzaileak otsailaren 5ean emandako 459/2003 Ebazpena, zahar etxeetako plazak lortzeko lehentasun baremoak onetsi zituena.
Lehen Xedapen Gehigarria. Balorazio eskala.
Balorazio sozialaren eskala familia egoera baloratzeko tresna gisa onartzen da egoitzako plazak eskuratze aldera. Eskala foru agindu honen I. eranskinean dago.
Xedapen Iragankor Bakarra. Itxaronzerrendan dauden eskabideen berrikuspena.
Gaur egun itxaronzerrendan dauden pertsonen eskabideak berrikusiko dira, haien egoera arautze aldera.
Azken Xedapenetan Lehena. Garatzeko gaikuntza.
Ahalmena ematen zaio gizarte zerbitzuen arloan eskumena duen departamentuko titularrari foru dekretu honetan ezarritakoa garatzeko beharrezkoak diren xedapenak eman ditzan.
Azken Xedapenetan Bigarrena. Indarra hartzea.
Foru agindu honek argitaratu eta biharamunean hartuko du indarra eta 2010eko urtarrilaren 1etik aurrera sortuko ditu ondorioak.
