navarra.es
Castellano | Euskara | Français | English
Ezagutzera eman
3422/2005 Ebazpena, abuztuaren 9koa, Nafarroako Gizarte Ongizatearen Institutuko zuzendari kudeatzaileak emana, Gizarteratzearen Atalak ematen dituen laguntza berezien balorazioan eta kontzesioan aplikatu beharreko kontzeptuak, baldintzak, ...
3422/2005 EBAZPENA, ABUZTUAREN 9KOA, NAFARROAKO GIZARTE ONGIZATEAREN INSTITUTUKO ZUZENDARI KUDEATZAILEAK EMANA, GIZARTERATZEAREN ATALAK EMATEN DITUEN LAGUNTZA BEREZIEN BALORAZIOAN ETA KONTZESIOAN APLIKATU BEHARREKO KONTZEPTUAK, BALDINTZAK, GEHIENEKO ZENBATEKOAK ETA PROZEDURA EZARTZEN DITUENA.
(2005eko 116. NAOn argitaratua, irailaren 28an)
Atarikoa
Gizarte Zerbitzuei buruzko martxoaren 30eko 14/1983 Foru Legearen 3.D) artikuluak xedatzen duenaren arabera, Nafarroako Foru Komunitatean jarduketa bereziak sustatuko dira, bazterketa egoeran dauden pertsona edo taldeei gizartean integratu edo gizarteratzen laguntzeko.
Nafarroako Gizarte Ongizatearen Institutuko Gizarteratzearen Atalak egindako txostenarekin bat.
Gizarte zerbitzuetan banakoei eta familiei ematen zaizkien prestazioak eta laguntzak arautzen dituen ekainaren 28ko 168/1990 Foru Dekretua ikusirik eta, zehazki, 7. artikulua, laguntza bereziei buruzkoa. Prestazio horiek aldi bakar batez jasotzekoak dira eta ez aldian-aldian jasotzekoak, izaera subsidiarioa, ekonomikoa eta dirulaguntza gisakoa dute, eta horien helburua da bazterketa egoerak saihestu edo arintzeko beharrezkoak diren berariazko gastuei aurre egiteko behar beste baliabide ez duten pertsonei laguntzea. Laguntza bereziak xede baterako ematen dira, eta horretarako bakarrik erabili behar dira.
Horrenbestez, Nafarroako Gizarte Ongizatearen Institutuaren estatutuak onetsi zituen urtarrilaren 26ko 20/2004 Foru Dekretuak ematen dizkidan ahalmenak erabiliz, ebatzi dut:
Lehena
Nafarroako Gizarte Ongizatearen Institutuko Gizarteratzearen Atalak ematen dituen laguntza berezien tramitaziorako irizpideak onestea. Ebazpen honen eranskinean daude.
Bigarrena
Laguntza bereziak eskatzeko, Gizarte Ongizarte, Kirol eta Gazteria kontseilariak abuztuaren 17ko 58/1999 Foru Aginduaren V. eranskinean ezarritako txosten sozialaren eredua erabili beharko da (foru agindu horren bidez Oinarrizko Errenta arautzen duen apirilaren 19ko 120/1999 Foru Dekretua garatzen da).
Hirugarrena
Ebazpen hau Oinarrizko Laguntzaren eta Gizarteratzearen Zuzendariordetzara igortzea eta Nafarroako Aldizkari Ofizialean argitara dadila agintzea, behar diren ondorioak izan ditzan.
ERANSKINA. Nafarroako gizarte ongizatearen institutuko gizarteratzearen atalak ematen dituen laguntza berezien tramitaziorako irizpideak
1.-Funtsa.
Gizarte zerbitzuetan banakoei eta familiei ematen zaizkien prestazioak eta laguntzak arautzen dituen ekainaren 28ko 168/1990 Foru Dekretuaren 7. artikuluan arautzen dira laguntza bereziak. Arau hau bat bera da Nafarroako Gizarte Ongizatearen Institutuko atal guztietan tramitatzen diren laguntza berezietarako. Horregatik, baloraziorako irizpide tekniko batzuk ezartzea komeni da, aipatu erakunde autonomoko Gizarteratzearen Atalean tramitatzen diren laguntza berezien ezaugarriak aztertzeko. Zehazki, eta ebazpen honen bitartez, laguntza berezien balorazioan eta kontzesioan aplikatu beharreko kontzeptuak, baldintzak, gehieneko zenbatekoak eta prozedura ezartzen dira.
2.-Definizioa eta ezaugarriak.
Prestazio horiek aldi bakar batez jasotzekoak dira eta ez aldian-aldian jasotzekoak, izaera subsidiarioa, ekonomikoa eta dirulaguntza gisakoa dute, eta horien helburua da bazterketa egoerak saihestu edo arintzeko beharrezkoak diren berariazko gastuei aurre egiteko behar beste baliabide ez duten pertsonei laguntzea.
Laguntza bereziak xede baterako ematen dira, eta horretarako bakarrik erabili behar dira.
3.-Kontzeptuak.
Laguntza bereziak zer kontzeptutarako ematen ahal diren erakusten dute multzo hauek:
3.1. Ohiko etxebizitza eskuratu eta mantentzea:
3.1.1. Ohiko etxebizitzaren eskriturak, erregistroko idatzoharra eta zerbitzu horniduren kontratazioa egitearen ondoriozko gastuak, Gizarteratzeko Etxebizitza eskuratzen dutenentzat ezarritako laguntzak jaso daitezkeenean izan ezik.
3.1.2. Ohiko etxebizitza eskuratzeko maileguen amortizazio eta interesengatiko zorrak.
3.1.3. Errentamendu kontratuak formalizatzearen ondoriozko gastuak.
3.1.4. Errentamenduko zorrak.
3.1.5. Komunitate, ur, argi, gas, saneamendu eta kontribuzioko zor orokorrak.
Halako zorrei erantzuteko laguntzak urte bateko 6 hilabeteko zenbatekoaren adinakoak izanen dira gehienez.
3.2. Ohiko etxebizitzaren bizigaitasuna eta oinarrizko ekipamendua:
3.2.1. Premiazko altzariak.
3.2.2. Etxetresna elektrikoak (hozkailua, sukaldea, garbigailua, ur-berogailua, berogailua), lau elementu gehienez.
3.2.3. Etxebizitza egokitzea (bero galerarik, hezetasunik eta itoginik ez izateko konponketak; irisgarritasuna hobetzea eta bizitzeko gutxieneko baldintzatan jartzea). Ez dira onartuko 3.005,06 eurotik gorako aurrekontuak (BEZik gabe).
3.3. Beste batzuk:
3.3.1. Ohiko laneko lanabesak edo baliabideak konpontzea.
3.3.2. Gizarte Segurantzako zorrak, epe ertain edo laburreko prestazioa jasotzea galarazten dutenak.
3.3.3. Sakelako gastuak (norberaren garbitasuneko produktuak, arropa, garraioa eta abar) Terapia Komunitate batean tratamenduan dauden pertsonentzat (komunitate horrek Nafarroako Gobernuko Osasun Departamentuaren onarpena izan behar du zeregin horretarako).
3.4. Aurreko ataletan ageri ez diren beste egoera batzuk, horien ohiz kanpoko izaeraren eta famili unitate eskatzaileari ekar diezazkioketen kalte konponezinen arabera.
Ez da kontuan hartuko osasunaren edo hezkuntzaren inguruko kontzepturik.
4.-Onuradunak. Betebeharrak:
Laguntza horien onuradun izan daitezke bazterketa egoeran dauden edo egoteko arriskuan dauden famili unitateak eta banakoak, baldintza hauek betetzen badituzte:
4.1. 18 urtetik gorakoak eta 65etik beherakoak izatea.
4.2. Nafarroako Foru Komunitatean benetan eta jarraian gutxienez bi urtez bizi izan direla egiaztatzea.
4.3. Eskatzen den laguntza bereziaren xedea beste prestazio batzuen barnean ez agertzea eta Nafarroako Foru Komunitatean dauden baliabide normalizatuen bitartez bideratzerik ez izatea.
4.4. Interesatuak edozein administraziotan eta Gizarte Segurantzan laguntzak, pentsioak, prestazioak edo sorospenak eskatu izana aldez aurretik.
4.5. Laguntza bereziak sakelako gastuetarako eskatzen dituztenek egiaztatu beharko dute Terapia Komunitate batean hiru hilabete edo gehiagoko egonaldia dutela etenik gabe, eta beren baliabide ekonomikorik edo familiaren laguntzarik ez dutela gastu horietarako.
Salbuespenez, laguntza horien onuradun izan daitezke, nahiz eta ezarritako baldintzak ez bete, kalte konponezinak sortzen ahal dituzten arrazoi larriak edo premiazkoak dituztela frogatzen dutenek.
5.-Gehieneko laguntzak kontzeptu bakoitzeko.
3. atalean aipatu diren multzoetako kontzeptu bakoitzeko gehieneko zenbatekoak hauek dira:
5.1. Ohiko etxebizitza eskuratu eta mantentzea:
5.1.1. Ohiko etxebizitzaren eskriturak, erregistroko idatzoharra eta zerbitzu horniduren kontratazioa egitearen ondoriozko gastuak, Gizarteratzeko Etxebizitza eskuratzen dutenentzat ezarritako laguntzak jaso daitezkeenean izan ezik. 1.826,99 euro.
5.1.2. Ohiko etxebizitza eskuratzeko maileguen amortizazio eta interesengatiko zorrak: 1.826,99 euro.
5.1.3. Errentamendu kontratuak formalizatzearen ondoriozko gastuak: 1.826,99 euro.
5.1.4. Errentamenduko zorrak: 1.826,99 euro.
5.1.5. Komunitate, ur, argi, gas, saneamendu eta kontribuzioko zor orokorrak: 1.826,99 euro.
Halako zorrei erantzuteko laguntzak urte bateko 6 hilabeteko zenbatekoaren adinakoak izanen dira gehienez.
5.2. Ohiko etxebizitzaren bizigaitasuna eta oinarrizko ekipamendua.
5.2.1. Premiazko altzariak: 1.461,59 euro.
5.2.2. Etxetresna elektrikoak: 328,86 euro elementuko bakoitzeko, gehienez ere lau.
5.2.3. Etxebizitza egokitzea: 2.557,79 euro.
5.3. Beste batzuk:
5.3.1. Ohiko laneko lanabesak edo baliabideak konpontzea: 2.557,79 euro.
5.3.2. Gizarte Segurantzako zorrak, epe ertain edo laburreko prestazioa jasotzea galarazten dutenak: 2.557,79 euro.
5.3.3. Sakelako gastuak Terapia Komunitate batean tratamenduan dauden pertsonentzat: 109,62 euro hilean; pertsona batendako zenbatekoa ez da izanen 24 hilabeteri dagokiona baina handiagoa, hilabeteak jarraian egin ala ez.
5.4. Aurreko ataletan aipatu ez diren egoerak:
5.4.1. Beste egoera batzuk: 2.557,79 euro.
Ez da kontzeptu bererako laguntza berezirik emanen aurrekotik hasita bi urte pasatu arte. Ematen den zenbatekoa kontzeptu baterako ezarritako mugara iristen ez denean, beste laguntza berezi bat eman daiteke, diferentzia adinakoa, nahiz eta lehenengo laguntza eman zenetik bi urte pasatu ez.
Kontzeptu guztiak hartuta, famili unitate bakoitzak gehienez ere 2.557,79 euro jaso ditzake urtean.
Zenbateko horiek urtero gehituko dira KPIak Nafarroako Foru Komunitatean izaten duen igoeraren arabera.
6.-Balorazio irizpideak
Laguntza bereziak jasotzeko eskariak irizpide hauei jarraikiz baloratuko dira:
6.1. Famili unitatearen baliabide ekonomikoak eta horien egonkortasuna edo jarraikitasuna.
6.2. Atalean kontzeptu bakoitzerako ezarri diren gehiengoak.
6.3. Eskatutako zenbatekoa.
6.4. Aurreko kontzesiotik zenbat denbora pasatu den.
6.5. Etxebizitza eskuratu eta mantentzeko laguntzetan, zenbatekoak ez du gainditu behar urte bakoitzean 6 hilabeteri dagokiena.
6.6. Sakelako gastuetarako laguntzetan, 6 hilabeteko egonaldiari dagozkion gastuak, eskaria sartu eta ondoko hilabetetik kontatzen hasita.
6.7. Oinarrizko Gizarte Zerbitzuek sortu den beharraren gainean egiten duten balorazioa, bazterketa egoeran dauden pertsonak gizarteratzen laguntzeko duten garrantzia, edo zer lehentasun duten.
6.8. Aurrekontuan dagoen dirua.
7.-Laguntzaren zenbatekoa
7.1. Eskatutako kontzepturako gehienez ematen ahal den zenbatekoaren gainean portzentaje jakin bat aplikatuta aterako da gehienez emanen den laguntza.
Portzentaje hori lortzeko ondokoen arteko zatidura hartuko da kontuan: eskatzaileak eta famili unitateko kideek dituzten baliabide ekonomikoen eta famili unitate horren osaeraren arabera dagokion oinarrizko errentaren arteko zatidura. Horretarako eta oro har, tarte hauek ezarri dira:
a) Ateratzen den zatidura 1 edo hori baino txikiagoa bada, 100eko 100eko portzentajea aplikatuko da.
b) Zatidura 1 baino handiagoa edo 2 edo txikiagoa baldin bada, honela aterako da portzentajea: famili unitate eskatzailearen kideen kopuruari dagokion oinarrizko errentaren zenbatekoa 100ez biderkatu eta emaitza famili unitate horretako dirusarreren artean zatituta ateratzen den emaitza.
c) Zatidura 2 baino handiagoa bada, ukatu eginen da laguntza.
Oro har, famili unitateko baliabide ekonomikoen konputua oinarrizko errentan bezala eginen da, Oinarrizko Errenta arautzen duen apirilaren 19ko 120/1999 Foru Dekretuaren 4. artikuluan xedatutakoari jarraikiz.
7.2. Eskari bakoitzerako emanen den laguntzaren benetako zenbatekoak ezin ditu honako hauek gainditu:
7.2.1. Kontzeptu bakoitzerako ezarri diren gehieneko zenbatekoak.
7.2.2. Kasu partikular bakoitzean aplika daitekeen gehieneko zenbatekoa.
8.-Prozedura.
8.1. Eskaerak. Agiriak.
Ekainaren 28ko 168/1990 Foru Dekretuak ezartzen duen moduan, Nafarroako Gizarte Ongizatearen Institutuari dagokio laguntza berezietarako eskaerak tramitatu eta horien gainean ebaztea. Eskaerak bakoitzari dagokion Oinarrizko Gizarte Zerbitzuan aurkeztuko dira, eta bertan txosten soziala erantsiko diote eskaerari (ebazpen honetan ezarritako ereduaren araberakoa), zeinetan ondoko alderdi hauek aztertu eta baloratuko baitira: zer motatako beharra den, zenbaterainoko premia duen, eskatzailearen egoera sozioekonomikoa, egoera ohiz kanpokoa izatea, eta ebazpen honen 6.7 atalean aipatu diren gainerako alderdiak.
Laguntzaren xede den gastua ebazpen honetan ezarritako gehieneko zenbatekoak baino handiagoa denean, adieraziko da nola eginen zaien aurre eskatu diren eta laguntza jasotzerik ez duten zenbatekoei.
Eskabidearekin batera ondoko agiriak emanen dira:
8.1.1. Eskatzailearen eta famili unitateko gainerako kideen nortasuna egiaztatzen duen agiriaren fotokopia.
8.1.2. Familia Liburuaren fotokopia.
8.1.3. Erroldaren ziurtagiria eta bizikidetzakoa, Nafarroan duen antzinatasuna azalduko duena.
8.1.4. Famili unitatearen dirusarreren frogagiria edo, hala ez denean, zinpeko aitorpena.
8.1.5. Eskatzen den laguntzaren xede den oinarrizko eta premiazko beharrari egokitutako zor edo aurrekontuaren frogagiria.
8.1.6. Berariazko txosten teknikoak, beharrezkoa den kontzeptuetan.
8.1.7. Laguntza transferentzia bidez jasotzeko eskaria. Hartzailea eskaera egin duena ez bada, baimen idatzia ere aurkeztu beharko da.
8.1.8. Etxebizitza egokitzeko laguntzetan: bizigaitasun zedula.
8.1.9. Sakelako gastuetarako laguntzen kasuan, Terapia Komunitateak honako hauek azalduko dituen txostena aurkeztu beharko du:
8.1.10. Eskatzailea Terapia Komunitatean zein egunetan sartu zen.
8.1.11. Gastuen hileko aurrekontua.
8.1.12. Laguntza administratzeko, diruaren jarraipena egiteko eta emandako zenbateko guztia erabiltzen ez denean itzultzeko konpromisoa.
8.1.13. Laguntza eskaerarako beharrezkoak izan daitezkeen beste agiri batzuk, aurreko ataletan ageri ez badira.
8.2. Ebazpena, gastua frogatzea eta laguntza ordaintzea.
Ebazpen honen arabera laguntza bereziak jasotzeko egiten diren eskaeren balorazioa Nafarroako Gizarte Ongizatearen Institutuko Gizarteratzearen Atalari dagokio eta ebazpenak ematea, berriz, erakunde autonomo horretako zuzendari kudeatzaileari.
Ebazpenak arrazoituak izanen dira eta interesatuei igorriko zaizkie.
Kontzesioaren ebazpenean emandako zenbatekoa azalduko da, bai eta eskatutako zenbatekoarekiko zer portzentaje duen ere, non eskatutakoak ez duen gainditzen diruz laguntzen ahal den gehienekoa, halakoetan portzentajea dagokion mugaren arabera ezarriko baita. Laguntza nola ordainduko den ere azalduko da, bai eta kontzesioan aldaketarik egin behar den ere aurkezten diren frogagirien arabera.
Era berean, ebazpenean adieraziko da ordainketaren frogagiriak aurkezteko epea zein den, kontzesioaren jakinarazpen egunetik hasita betiere.
Gastuen faktura edo frogagirietan agertu beharrekoak: pertsona fisiko edo juridiko jaulkitzailearen oinarrizko datuak, identifikazio fiskaleko zenbakia (IFZ) edo nortasun agiri nazionala (NAN) barne, gastu kontzeptuak zehatz emanda eta horien zenbatekoa, Balio Erantsiaren gaineko Zergaren (BEZ) zatia barne dela, hala behar denean. Faktura edo frogagirietan jarri beharrekoak dira, orobat, pertsona fisiko edo juridiko jaulkitzailearen hartu-agiriaren zigilua eta sinadura.
Laguntza berezien ordainketa, gastuen frogagiriak aurkeztearen baldintzapean, dena batera edo zatituta egiten ahal da. Oro har, eskatzaileak jasoko du laguntza. Salbuespenez, zilegi izanen da eskatzaileak baimendutako beste pertsona edo entitate bati ordaintzea. Sakelako gastuak ordaintzeko laguntzak direnean, Terapia Komunitateari ordainduko zaio, aldi bakar batean.
8.3. Aurrekontuko kontusaila.
Laguntza berezien zenbatekoa 2005eko gastuen aurrekontuko "Bizibiderik gabeko familia nafarrendako laguntzak" izeneko 924002 93300 4809 231500 lerroaren kargura emanen da.
