Istripuen ikerketa prebentzioko teknika erreaktiboa da, prebentzioko teknikariari eta enpresari informazioa ematen diena prebentzioko sistemaren gabezien eta hobetzeko alderdien gainean. Horregatik, Laneko Arriskuen Prebentzioari buruzko Legeak behartzen du lantokian gertatzen diren istripu guztiak ikertzera, larritasuna edozein dela ere.

Nafarroako Osasun Publikoaren eta Lan Osasunaren Institutuak badu istripuak ikertzeko eginkizuna ere. Institutuko laneko arriskuen prebentzioko teknikariek, lan osasunaren arloan goi mailako eginkizunak dituzte, baita gai horietan esperientzia egiaztatua ere, eta 1500 ikerketatik gora egin dute 1997az geroztik. Istripu hilgarrien, larrien eta oso larrien gaineko ikerketak dira, baita prebentzioko interes berezia duten istripu arinen gainekoak ere.

Ikerketa horietan saiatu da gertaerak ahalik eta modurik egiazkoenean deskribatzen, ikertuz zer eta nola gertatu zen. Horretarako, enpresako langileek eta langileen osasun arloko ordezkariek parte hartu dute, eta ahal izan den neurrian, istripua izan duen langilearen bertsioa kontuan hartu da.

Lan horren ondorioz, Laneko istripuen fitxa teknikoen bilduma (1etik 103ra arteko fitxak) prestatu zen, 2016ko ekainean handitu dena 104tik 154ra arteko fitxekin.

Dibulgazioko dokumentu teknikoa da, fitxa teknikoen bilduma, sartu den istripu bakoitzean lau atal hauek jasotzen dituena:

1. Lanen izaera
2. Istripuaren deskripzioa
3. Istripuaren kausak
4. Ekintza zuzentzaileak

Kasu bakoitzean, fitxak irakurtzen dituenak asko ikasiko du prebentzioari buruz, hori baliagarria izanen baita antzeko beste lanpostu edo egiteko batzuetan neurri zuzentzaileak inplantatzeko.

Bilduma honen xedea da transmititzea prebentzioko teknikariei eta enpresetan lan istripuak ikertzeaz arduratzen direnei Institutuak txosten hauek eginez eskuratu dituen ezagutzak. Izan ere, istripuen kausak identifikatu nahi ditugu, eta prebentzioko neurri teknikoak edo antolaketakoak proposatu, laneko ezbehar-tasa murrizteko zereginean geure harri-koskorra ezarriz.

Datu esanguratsu batzuk:

- Lan istripu larriak eta hilgarriak Nafarroan: 1997-2007 aldia 

- Nafarroan ikertutako lan istripu larriak, oso larriak eta hilgarriak: 2008-2013 aldia