navarra.es
Castellano | Euskara | Français | English
Ezagutzera eman
34/2013 Foru Agindua, urtarrilaren 31koa, Ekonomia, Ogasun, Industria eta Enpleguko kontseilariak emana, Espainiako lurraldean egoiliarrak ez diren entitateen funts berekiak ordezkatzen dituzten baloreak eskualdatzetik datozen atzerriko ...
34/2013 FORU AGINDUA, URTARRILAREN 31KOA, EKONOMIA, OGASUN, INDUSTRIA ETA ENPLEGUKO KONTSEILARIAK EMANA, ESPAINIAKO LURRALDEAN EGOILIARRAK EZ DIREN ENTITATEEN FUNTS BEREKIAK ORDEZKATZEN DITUZTEN BALOREAK ESKUALDATZETIK DATOZEN ATZERRIKO DIBIDENDU ETA ERRENTEN GAINEKO KARGA BEREZIAREN AITORPENERAKO MODUA ETA EPEA ONESTEN DITUENA. DIBIDENDU ETA ERRENTA HORIEK EZ DAUDE SARTUTA SOZIETATEEN GAINEKO ZERGARI BURUZKO ABENDUAREN 30EKO 24/1996 FORU LEGEAREN HOGEITA BEDERATZIGARREN XEDAPEN GEHIGARRIAN
(2013ko 27. NAOn argitaratutako testua, otsailaren 8an)
Atarikoa
Zenbait zerga aldatu eta beste tributu neurri batzuk hartzeari buruzko abenduaren 26ko 21/2012 Foru Legearen 1.18 artikuluak hogeita hamargarren xedapen gehigarria gehitu zion Sozietateen gaineko Zergari buruzko abenduaren 30eko 24/1996 Foru Legeari, Espainiako lurraldean egoiliarrak ez diren entitateen funts berekiak ordezkatzen dituzten baloreak eskualdatzetik datozen atzerriko dibidendu eta errenten gaineko karga berezia ezarriz. Dibidendu eta errenta horiek ez daude sartuta Sozietateen gaineko zergari buruzko abenduaren 30eko 24/1996 Foru Legearen hogeita bederatzigarren xedapen gehigarrian. Karga berezi horrek ondorioak izanen ditu 2012. urtean sorrarazitako dibidenduentzako eta 2012. urtean baloreak eskualdatzetik datozen errententzako.
Hogeita hamargarren xedapen gehigarriko 7. atalak ezartzen duenez, karga berezi honen aitorpen eredua Ekonomia eta Ogasuneko kontseilariaren foru agindu bidez onetsiko da, non ezarriko baita aitorpena aurkezteko modua eta tokia.
Horrenbertzez, agindu dut:
1. artikulua. Sozietateen gaineko Zergari buruzko abenduaren 30eko 24/1996 Foru Legearen hogeita hamargarren xedapen gehigarrian ezarritako karga berezia aurkezteko eredua, modua eta tokia.
1. Karga berezi honen aitorpen eredua izanen da Ekonomia, Ogasun, Industria eta Enpleguko kontseilariak uztailaren 4an eman zuen 15/2012 Foru Aginduan onetsitakoa, hogeita hamargarren xedapen gehigarrian ezarritako ondorioetara egokitua. Foru agindu horren bidez, 250 eredua onetsi zen, Espainiako lurraldean egoiliarrak ez diren entitateen funts berekiak ordezkatzen dituzten baloreak eskualdatzetik datozen atzerriko dibidendu eta errenten gaineko karga bereziari buruzkoa.
2. Karga berezi horren aitorpenerako baldintza orokorrak, modua eta en bidezko aurkezpen telematikoa egiteko prozedura aipatu foru aginduan ezarritakoak dira.
2. artikulua. Aurkezteko eta sarrera egiteko epea.
Karga berezi honen autolikidazioa eta horren gaineko sarrera foru agindu honek indarra hartu ondoko 25 egun naturaleko epean eginen dira, kontuan harturik karga berezia sorraraziko dela, Espainiako lurraldean egoiliarrak ez diren entitateen mozkinetako dibidenduak edo partaidetzak banatzen diren kasuan, akziodunen batzar orokorrak edo organo baliokideak mozkinak banatzeko erabakia hartzen duen egunean, eta, Espainiako lurraldean egoiliarrak ez diren entitateen funts berekiak ordezkatzen dituzten baloreak eskualdatzen diren kasuan, eskualdatze hori gertatzen den egunean.
Azken Xedapen Bakarra. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
