(Edukira Joan)

navarra.es

Castellano | Euskara | Français | English

Edukirako tresnak

Ezagutzera eman

  • Meneame
  • Delicious
  • Twitter
  • Google
  • Facebook

282/1997 Foru Dekretua, urriaren 13koa, Sozietateen gaineko Zergaren Erregelamendua onesten duena

 

(Testu bateratua. Jatorrizkoa 1997ko 133. NAOn argitaratua, azaroaren 5ean; akats zuzenketa, 1997-12-15eko NAO. Aldaketak: 69/2009 Foru Dekretua, irailaren 28koa; 635/1999 Foru Dekretua, abenduaren 30ekoa; 145/2005 Foru Dekretua, abenduaren 26koa; 24/2002 Foru Dekretua, urtarrilaren 28koa; 80/2011 Foru Dekretua, uztailaren 18koa; 2/2003 Foru Dekretua, urtarrilaren 13koa; 673/2003 Foru Dekretua, azaroaren 10ekoa; 371/1998 Foru Dekretua, abenduaren 30ekoa; 10/2000 Foru Dekretua, urtarrilaren 10ekoa; 49/2006 Foru Dekretua, uztailaren 17koa; 347/1999 Foru Dekretua, irailaren 13koa)

Atarikoa

Abenduaren 30eko 24/1996 Foru Legea aplikatzeko beharrezkoa da erregelamenduz zehaztasunak finkatzea, alde batetik, Legean aurreikusitako prozedurak garatu eta zenbait betebehar formal arautzeko, eta bestetik, zenbait gaitan erregelamendurako utzitako zehaztapen franko egiteko.

Sozietateen gaineko Zergaren Erregelamenduaren onespenak oinarri hauek ditu: alde batetik, aipatu Foru Legeko Azken Xedapenetako Lehenak jasotzen duen gaikuntza orokorra, eta bestetik legearen testuak zenbait artikulutan gai zehatzei buruzko arauak emateko gaikuntza.

Pertsona Fisikoen Errentaren gaineko Zergan eta Balio Erantsiaren Zergan bezala, Erregelamendu honek ezaugarri nagusia da arautzeko gaikuntza espreski emana dagoen gaiak garatu besterik ez dituela egin.

Erregelamendua honela dago osatua: 40 artikulu, sei xedapen iragankor, derogatzaile bat eta bi azken, eta kapitulu eta sekzioetan banatutako hiru Titulutan egituratzen da.

I. Tituluak zerga-oinarriari dagozkion aspektuak arautzen ditu, eta lau kapituluz osatua da.

I. Kapituluan hiru ataletan banaturik arautzen dira ibilgetu materialaren, nahiz ibilgetu ez-materialaren amortizaziorako eta beste zenbait kasu berezietako arau orokorrak.

II. Kapituluak Zergaren Foru Legeko 27. artikuluan aurreikusitako depreziazio monetarioaren zuzenketa-koefizienteak jasotzen ditu, hala nola zenbait arau berezi irizpide orokorraren arabera kontabilizatu ez diren gastuen denbora-egozpenari buruzkoak, baloreen eskualdaketetako etekin bereziak zerga-oinarrian integratzeari eta finantza-entitateen kaudimengabezietarako zuzkidurari buruzkoak.

III. Kapituluak jasotzen ditu konponketa berezietako planak erabakitzeko prozedura, hala nola aldi bateko ustiapen ekonomikoak bertan behera uzteagatiko gastuak, sarrera eta gastuen denbora-egozpena eta berrinbertsio bereziak erabakitzekoa.

IV. Kapituluak bi atal ditu. Lehenbizikoan ezartzen da Ekonomi eta Ogasun Departamentuak Zergaren Foru Legeak emandako ahalmenak erabiltzen dituenean pertsona edo entitate lotuen artean egindako eragiketak merkatu-balio normalaren arabera baloratzeko prozedura. Bigarrenean arautzen dira pertsona edo entitate lotuen artean egindako eragiketen balioespenerako sujetu pasiboek egindako proposamenak, ikerketa eta garapeneko jardueretako gastuak, kudeaketarako laguntzakoak eta azpikapitalizazio koefizienteak erabakitzeko prozedurak.

II. Tituluan araubide bereziak arautzen dira bi kapitulutan. I. Kapituluan atzerriko baloreen edukitzako entitateen araubidea emateko prozedura arautzen da, horrez gain aplikazio eremua zehazten delarik.

II. Kapituluan gardentasun fiskaleko araubidean zerga ordaintzen duten sozietateen betebehar formalak arautzen dira.

III. Tituluak atxikipenak eta konturako sarrerak jarraikortasunez egiteko betebeharra arautzen du, salbuespenen bat izan ezik, eta arlo honetan indarra duten arauak bategitea lortzen du.

Azkenik, Erregelamendua osatzen da Zergaren Foru Legeak sortutako aldaketen ondoriozko egoera bereziak begiz jotzen dituzten sei xedapen iragankorrekin.

Hori dela-eta, Ekonomi eta Ogasun kontseilariaren proposamenez eta Nafarroako Gobernuak mila bederatziehun eta laurogeita hamazazpiko urriaren hamahiruan egindako bilkuran hartutako erabakiarekin bat:

Dekretatu dut:

Artikulu Bakarra

Sozietateen gaineko Zergaren Erregelamendua onesten da, eta haren testua jarraian ematen.

SOZIETATEEN GAINEKO ZERGAREN ERREGELAMENDUA

I. TITULUA. ZERGA-OINARRIA

I. KAPITULUA. Amortizazioak

Lehen sekzioa. Ibilgetu materialaren amortizazioa

1. artikulua. Ibilgetu materialaren eta higiezinetako inbertsioen amortizazioa. Arau orokorrak.

1. Ibilgetu materialaren eta higiezinetako inbertsioen ondare-elementuen balio-galera efektiboa dela ulertuko da honako metodo hauetakoren bat aplikatzearen emaitza denean:

a) Ofizialki onartutako amortizazio taulak

b) Portzentaia konstantea.

c) Zenbaki digituak.

d) Sujetu pasiboak egindako plana.

e) Sujetu pasiboaren justifikazioa.

2. Erosketa-prezioa edo produkzio kostua da amortizagarria, hondar-balioa kenduta, halakorik bada.

Eraikinen kasuan ez da amortizagarria lurzoruaren balioari dagokion erosketa-prezioaren zatia, zaharberritzeko kostuak kenduta, halakorik bada. Lurzoruaren balioa ezagutzen ez bada, honela kalkulatuko da: erosketa-prezioa proportzionalki banatuko da, erosketa egunean lurrak zuen katastro balioaren eta eraikuntzak zuenaren artean. Hala ere, subjektu pasiboak erosketa-prezioa banatzeko irizpide desberdina erabil dezake, baldin eta frogatzen badu erosketa egunean lurzoruak eta eraikuntzak zuten merkatu-balio normalean oinarritzen dela.

3. Amortizazioa elementuz elementu egingo da.

Ondare-elementu antzekoak edo erabilpen maila antzekoa jasandakoak direnean, amortizazioa haiek guztiak multzoan hartuz egingo da, baldin eta ondare-elementu bakoitzari dagokion amortizazio pilatuari dagokion zatia une bakoitzean argi badago.

Instalazio teknikoak elementu amortizagarri bakartzat har daitezke.

4. Ondare-elementuak beren bizitza baliagarriaren epean amortizatu behar dira. Bizitza baliagarritzat hartzen da, aukeratutako amortizazio metodoaren arabera, ondare-elementuen balioa osorik estalia geratu behar den epea, hondar-balioa kendurik, salbu eta epe hori kontzesioaldia baino luzeagoa denean, itzuli beharreko aktiboen kasuan bezala, halakoetan urteko gehieneko muga azken aldi horri erreparatuz kalkulatuko baita. Konponketa handiekin zerikusia duten kostuak konponketa handira arteko aldian amortizatuko dira.

5. Ondare-elementu bat berritu, handitu edo hobetzen denean eta haren zenbatekoa ibilgetu materialean edo higiezinetako inbertsioan sartzen denean, zenbateko hori aipatu ondare-elementuen bizitza baliagarria osatzeko geratzen diren zergaldietan amortizatuko da. Horretarako, zergaldi bakoitzari egotziko zaion emaitza lortzeko honako eragiketa hau egin behar da: zergaldi bakoitzean egindako ondare-elementuaren amortizazio kontabilizatua, balio-galera efektiboari dagokion heinean, zatitu behar da ondare-elementu horrek berritze, handitze edo hobetzeko eragiketak burutu ziren zergaldian zeukan kontabilitate balioaz, eta koefiziente hori berritze, handitze edo hobetzearen zenbatekoari aplikatu.

Berritze, handitze edo hobetzeko eragiketen xede izan diren ondare-elementuak eragiketa horiek burutu baino lehenago aplikatzen ari zen metodoaren arabera amortizatuko dira.

2. artikulua. Taulen araberako amortizazioa.

1. Sujetu pasiboak beste metodoren bat aukeratu ez badu, taulen araberako amortizazioa aplikatuko da honako koefiziente eta gehienezko epealdiek ezartzen duten moduan:

Urteko koefizientea epealdia

Gehienezko gehienezko urte

Bulego, merkataritzako erabilpen eta/edo zerbitzuetarako eraikinak eta etxebizitzak

            4         

38

 

Industrian erabiltzeko eraikinak

            5         

30

 

Instalazioak

            15       

10

 

Makineria

            15       

10

 

Altzariak

            15       

10

 

Informazio prozesuetarako ekipoak

            25       

6

 

Garraiorako baliabideak (autobusak, kamioiak, furgonetak, etab.)

            20

8

 

Barne-garraiorako baliabideak

            15       

10

 

Molde, eredu, trokel eta matrizeak

            33       

5

 

Tresna eta erremintak

Benetako depreziazioa

 

Bestelako ibilgetu materiala

                        10

15

 

2. Ondare-elementu baten depreziazioa efektibotzat hartuko da ez baldin badu gainditzen aipatu elementuaren erosketa-prezioari edo produkzio kostuari urteko gehienezko koefiziente lineala aplikatzetik sortzen den emaitza eta baldin eta zuzkidura gehienezko urte epealdiaren barruan egina bada.

3. Ondare-elementu bat kontabilitatearen arabera amortizatu baldin bada 1. zenbakian ezarritako gehienezko koefizienteak aplikatzeak ematen duena baino zenbateko handiagoan, kontsideratuko da gastuaren kontabilitate-egozpena egin dela ez haren denbora-egozpena bidezko den epealdian, baizik beste batean.

Balizko kasu horretan zenbatekoa fiskalki ondorengo epealdiei egotzi behar zaie, 1. zenbakian ezarritako gehienezko epealdiaren barruan, baldin eta kontabilitate-amortizazioa gehienezko koefizientea aplikatzean sortzen den emaitza baino txikiagoa bada eta aipatu kopuruaren mugaraino.

Aurreko epealdietan fiskalki egozterik izan ez den amortizazio soberakin kontabilizatua, aurreko paragrafoan aurreikusitakoaren arabera, haren denbora-egozpena bidezkoa den geroagoko zerga-epealdi batean kontabilitatearen aldetik egotzitako gastutzat hartuko da, eta Foru Legeko 34. artikuluko 3. zenbakiko bigarren paragrafoan aurreikusitakoaren aplikaziorako ulertuko da gehienezko epealditik ondorioztatzen den koefiziente lineala aplikatzetik sortzen den zenbatekoa baino txikiagoa fiskalki amortizatu den lehen epealdiei dagokiela, lehenagoko epealdi horietan edo 34. artikuluan xedatutakoaren arabera inbentarioan eskualdatzea egin edo baja eman zitzaion epealdian egozgarri izanik.

Berdin jokatuko da kontabilitatez gehienezko epetik kanpo egindako amortizaziorako zuzkiduren zenbatekoarekin.

4. Ibilgetu materialaren eta higiezinetako inbertsioen ondare-elementuen eskualdaketan lortutako errentak zerga-oinarrian sartzeko, eta inbentarioan baja gisa idatzohartutako kasuetan, elementu horiek zergaren ondorioetarako amortizatutzat joko dira, zergaren ondorioetarako kengarriak diren kontabilitateko zuzkiduren zenbatekoan, hala nola koefiziente eta gehienezko epe aplikagarrien arabera aipatu epean zehar zergaren ondorioetarako kengarri izan ez den zenbatekoan.

Azken zenbateko hori hartuko da dagokion egozpen denbora baino geroagoko epealdi batean egotzitako gastutzat, eta ulertuko da dagokiela, Zergaren Foru Legeko 24. artikuluko 3. zenbakiko bigarren paragrafoan aurreikusitakoa aplikatzearen ondorioetarako, gehienezko epetik deduzitzen den koefiziente lineala aplikatzetik ateratzen den zenbateko txikiagoa fiskalki amortizatzeko erabili ziren lehen epealdiei, aipatu zenbatekoa izango duelarik muga, inbentarioaren arabera eskualdatzea egin edo baja eman zitzaion epealdian egozgarri izanik 34. artikuluan xedatutakoaren arabera.

3. artikulua. Taulen araberako amortizazioa. Txandak.

Ondare-elementu bat egunero erabiltzen bada lan txanda arrunt bat baino gehiagotan ondoko elementuen batuketak ematen duen koefizientearen arabera amortizatzen ahal da:

a) Gehienezko amortizazio epealditik sortzen den amortizazio linealaren koefizientea, eta

b) Gehienezko amortizazio linealeko koefizientearen eta gehienezko amortizazio epealditik sortzen den amortizazio linealeko koefizientearen arteko diferentzia normalean lan egiten diren eguneroko orduen eta zortzi orduen arteko zatiduraz biderkatzetik sortzen den emaitza.

Artikulu honetan ezarritakoa ez zaie aplikatuko eraikinei.

4. artikulua. Taulen araberako amortizazioa: ondasun erabiliak.

1. Ibilgetu materialeko ondare-elementuen kasuan, eraikinak salbuetsirik, erosten direnean erabiliak baldin badira, fiskalki kengarria den amortizazioa kalkulatzeko ulertuko da gehienezko koefizientea dela 2. artikuluko 1. zenbakian ezarritakoa bider 2 eginez sortzen den emaitza.

2. Zergari buruzko Foru Legearen 28. artikuluko 3. idatz-zatiaren ildotik loturiko pertsona edo entitateei erositako ondare-elementuak baldin badira, amortizazioa egiteko erosketa-prezio edo produkzio kostu jatorrizkoa hartuko da oinarritzat, eta horri 2. artikuluko 1. idatz-zatian ezarritako gehienezko amortizazio koefizienteak aplikatuko zaizkio. Gehienezko urte-epealdia finkatuko da, taulek ematen dutena eta aipatu prezio edo kostuaren eta erosketa-balioaren arteko diferentzia aipatu prezio edo kostuari gehienezko amortizazio kostua aplikatzetik sortzen den emaitzaz zatitzearen ondoriozko hamarrenik gabeko zatiduraren bitartez.

Erosketa-prezioa jatorrizkoa baino handiagoa izan bada, amortizazioa egiterakoan aipatu erosketa-prezioa hartuko da oinarritzat, eta 2. artikuluko 1. zenbakian ezarritako koefizienteak eta gehienezko epealdiak aplikatuko zaizkio.

3. Artikulu honen ondorioetarako erabilitako ondare-elementu erositzat hartuko dira lehenbiziko aldiz funtzionamenduan jartzen ez direnak.

5. artikulua. Portzentaia konstantearen araberako amortizazioa

1. Sujetu pasiboak portzentaia konstantearen araberako amortizazio metodoa aukeratzen duenean, depreziazioa efektibotzat hartuko da amortizatu zain dagoen ondare-elementuaren balioari portzentaia konstante bat aplikatzetik sortutako emaita denean. Hori zehazteko, sujetu pasiboak aukeratutako amortizazio linealeko koefizientea, gehienezko koefizientearen eta 2. artikuluko tauletan aurreikusitako gehienezko amortizazio epealditik ondorioztatzen den edozein alegia, ponderatuko da honako koefiziente hauen bitartez:

a) 1,5 ondare-elementuak bost urtetik beherako amortizazio epealdia baldin badu.

b) 2 ondare-elementuak bost urte edo hortik gora eta zortzi urtetik beherako amortizazio epealdia baldin badu.

c) 2,5 ondare-elementuak zortzi urte edo hortik gorako amortizazio epealdia baldin badu.

Aurreko letretan aurreikusitakoaren ondorioetarako amortizazio epealditzat hartuko da aukeratutako amortizazio linealeko koefizienteari dagokiona.

Aurreko paragrafoak aipatzen duen amortizazio epealdiko azken urtean amortizatzeko gelditzen den zenbatekoa osorik amortizatuko da.

Portzentaia konstantea ezin daiteke izan 100eko 11 baino gutxiago.

2.Erabilitako ondare-elementu erosia eta eraikinak ezin dira amortizatu portzentaia konstantearen amortizazio metodoaren arabera.

6. artikulua. Zenbaki digituen araberako amortizazioa.

1. Sujetu pasiboak zenbaki digituen araberako amortizazio metodoa hautatzen duenean depreziazioa efektiboa dela ulertuko da lortzen den amortizazio kuota honako metodo hau aplikatzetik lortzen denean:

a) Digituen batura lortzeko ondare-elementua amortizatu behar den urteei esleitutako zenbaki balioen batuketa egin behar da.

Horretarako ondare-elementua amortizatu behar den urte saileko zenbaki balio handiena esleituko zaio amortizazioa hasi behar den urteari, eta ondorengo urteei urtero unitate bat kenduz lortzen diren zenbaki balioak, amortizaziorako azkenekotzat hartzen denera iritsi arte, unitatearen zenbaki balioa izango baitu.

Amortizazio izan daiteke gehienezko epealdiaren eta, 2. artikuluko amortizazio taulen arabera, amortizazio linealeko gehienezko koefizientetik ateratzen denaren arteko edozein.

b) Erosketa-prezioa edo produkzio kostua aurreko letraren arabera lortutako digituen baturaz zatituko da.

c) Digituaren araberako kuota biderkatuko da zerga-epealdiari dagokion zenbaki balioaz.

2.Eraikinak eta erositakoan erabiliak ziren ondare-elementuak ezingo dira amortizatu zenbaki digituen amortizazio metodoaren arabera.

7. artikulua. Administrazioari proposatutako planaren araberako amortizazioa.

1. Subjektu pasiboek Zerga Administrazioari ibilgetu materialeko eta higiezinetako inbertsioetako ondare-elementuen amortizaziorako plan bat proposatzen ahal diote

2. Eskaerak honako datu hauek izan behar ditu:

a) Amortizazio plan bereziaren xede diren ondare-elementuen deskribapena, zein jardueratan aritzen diren eta non dauden kokaturik adieraziz.

b) Proposatzen den amortizazio metodoa, hortik sortzen diren amortizazioen denbora-banaketa adieraziz.

c) Proposatutako amortizazio-metodoaren justifikazioa.

d) Ondare-elementuen erosketa-prezioa edo produkzio-kostua.

e) Ondare-elementuen amortizazioak hasi behar duen data.

Eraikitzen ari diren ondare-elementuen kasuan amortizazioak hasi behar duen data adierazi behar da.

3. Plan hauen eskaera sujetu pasiboak Ekonomi eta Ogasun Departamentuan egin behar du elementu horiek martxan jarri eta ondorengo hiru hilabeteko epea igaro baino lehen.

4. Prozedura ebazteko eskumena Nafarroako Zerga Ogasuneko zuzendari kudeatzaileak izanen du.

Prozeduraren instrukzioa Zuzeneko Zerga, Zehapen eta Errekerimenduen Zerbitzuak edo Zeharkako Tributu eta Enpresa Handien Zerbitzuak eginen du, kasu bakoitzean dagozkien eginkizunen arabera, eta horretarako subjektu pasiboari behar diren datu eta frogagiri guztiak eskatzen ahalko dizkiote. Halaber, Ekonomia eta Ogasun Departamentuko zerbitzuei eta Nafarroako Foru Komunitateko Administrazioko beste departamentuei komenigarritzat jotzen dituzten txostenak eskatzen ahalko dizkiete.

Ebazpen proposamena, datu eta txostenekin, sujetu pasiboari erakutsiko zaio, eta hark alegazioak egin eta iruditzen zaizkion agiri eta justifikagarriak aurkezteko aukera izango du hamar eguneko epean.

Tramite hau egin gabe utz daiteke prozeduran ez baldin badago eta ebazpenean administratuak aurkeztutako beste egintza, alegazio edo frogarik kontuan hartzen ez bada.

Sujetu pasiboak eskaera bertan behera utzi edo beste planen bat aurkez dezake prozeduraren edozein momentutan.

5. Prozedura bukatu behar da eskaera aurkezten den edo Tributu Zerbitzuak eskaturik hura zuzentzen den datatik hiru hilabete baino lehen.

Aurreko paragrafoak aipatzen duen epea ebazpen espresurik eman gabe igarotzen bada, sujetu pasiboak egindako plana onartu dela ulertuko da.

6. Ogasun zuzendari nagusiaren ebazpenaren aurka sujetu pasiboak zilegi du sartzea gora jotzeko helegitea, jakinarazpenetik hilabeteko epean, Tributu Arloko Txosten eta Ebazpen Organoaren aurrean.

7. Onartutako amortizazio planak sujetu pasiboaren eskaeraz aldatu ahal izango dira, horretarako aurreko zenbakietan aurreikusitako arauei jarraituz. Eskaera hau aurkeztu behar da aldaketa horrek ondorioak izan behar dituen zerga-epealdiaren lehen hiru hilabeteen barruan.

8. Halaber, araubide orokorreko araudiaren mendekoak izanik Nafarroako foru araudiaren mende egotera pasatzen diren entitateek plan berezi bat eska dezakete, ibilgetu materialen eta higiezinetako inbertsioen ondare-elementuak amortizatzeko, Hitzarmen Ekonomikoaren 16. artikuluan xedatutakoarekin bat.

 Plana Nafarroako foru arauteria aplikagarri gertatzen den lehen zerga-epealdiari dagokion Sozietateen gaineko Zergaren aitorpena aurkezteko ezarritako epea bukatu baino lehen eskatu behar da.

Bigarren sekzioa. Ibilgetu ukiezinaren amortizazioa

8. artikulua. Ibilgetu ukiezinaren amortizazioa.

1. Ibilgetu ukiezineko ondare-elementuak, bizitza baliagarri mugatua badute, bizitza baliagarriaren barnean amortizatu behar dira, hau da, haietatik diru-sarrerak lortzea zentzuz espero daitekeen aldiaren barnean.

Bizitza baliagarria 10 urtetik beherakoa denean, urteko gehieneko muga iraunaldi hori kontuan hartuz kalkulatuko da.

2. Bizitza baliagarri mugatua duten ibilgetu ukiezineko ondare-elementuen amortizazioa kengarria izanen da, Zergari buruzko Foru Legearen 15. artikuluan ezarritako baldintzak betetzen badira.

3. Aurreko artikuluan ezarritako tramite eta beharkizunei loturik, subjektu pasiboek Zerga Administrazioari plan bat proposatzen ahalko diote, ibilgetu ukiezineko ondare-elementuak amortizatzeko.

Hirugarren sekzioa. Kasu berezietako amortizazioa

9. artikulua. Elementu errebalorizatuen amortizazioa.

Legezko edo arauzko xedapenen arabera errebalorizatutako elementuen kasuan xedapen horietan ondorio hauetarako emandako amortizazio arauak aplikatuko dira. Horrelakorik ez bada 1. artikuluko 5. zenbakian xedatutakoa aplikatuko da.

10. artikulua. Bategite, erabateko eta partezko zatitze eta ekarpen kasuetako amortizazioa.

Bategiteetan, erabateko eta partezko zatitzeetan eta Zergaren Foru Legeko IX. Kapituluan ezarritako araubide berezira bildutako ekarpenen kasuetan, erositako ondare-elementu bakoitzari dagokion amortizazio metodoarekin jarraitu behar da, baldin eta sujetu pasiboak bere metodoa aplikatzea erabakitzen ez badu, horretarako Erregelamendu honetako 7. artikuluan aurreikusitako terminoetan amortizazio plan bat egin behar baitu.

II. KAPITULUA. Balio-galeraren koefizienteak, denbora-egozpen eta finantza-entitateetako kreditu-arriskuaren estaldura

11. artikulua. Depreziazio koefizienteak.

1. 2000. urtean hasten diren zerga aldiei dagokionez, Sozietateen gaineko Zergaren Erregelamenduko 11. artikuluan aipatzen diren koefizienteak honakoak izanen dira:

ONDARE-ELEMENTUAREN EROSKETA EDO PRODUKZIO URTEA

KOEFIZIENTEAK

1983 eta lehenago

2,030

1984

1,829

1985

1,703

1986

1,618

1987

1,568

1988

1,502

1989

1,427

1990

1,367

1991

1,317

1992

1,271

1993

1,216

1994

1,166

1995

1,105

1996

 1,050

1997

1,025

1998

1,012

1999

1,005

2000

1,000

 2. Koefizienteak amortizazio fiskalki kengarriei aplikatzeko ondorioetarako kontuan hartuko da, behar izanez gero, 2. artikuluko 3. eta 4. zenbakietan xedatutakoa.

12. artikulua. Denbora-egozpena.

1. Denbora-egozpena egin zen zergaldia baino geroagokoan kontabilitatean egotzitako gastuen kasuan edo aurreko zergaldi batean kontabilitatean egotzitako sarrerenean, Zergari buruzko Foru Legearen 34. artikuluaren 3. idatz-zatiko bigarren paragrafoan ezarritakoaren ondorioetarako, subjektu pasiboari dagokio frogatzea denbora-egozpeneko arau orokorrak aplikatuz egokituko zitzaiona baino zerga-ordainketa txikiagoa ez dela gertatu.

2. Aurreko zenbakiak aipatzen duen egozpena egin ondoren, eta zerga-ordainketa txikiagoa ateratzen bada, bidezko diren epealdietako likidazioak zuzenduko dira, preskribatutako epealdiak eta egiaztatu ondoren irmo egin direnetakoak salbuetsirik.

13. artikulua. Aparteko mozkinak zerga-oinarrian ez sartzea, berrinbertsio kasu batzuetan.

Berrinbertsio kasu batzuetan aparteko mozkinak zerga-oinarrian ez sartzeari dagokionez, ondare-elementuen narriaduragatiko balio-galeren zenbatekoa ez da sartuko Zergari buruzko Foru Legearen 36. artikuluko 1. idatz-zatian aipatutako errentetan, haietarako zuzkidurak zergaren ondorioetarako kengarri izan diren heinean.'

14. artikulua. Finantza entitateetako kreditu-arriskuaren estaldura.

Espainiako Bankuak ezarritako arauei jarraituz beren urteko kontu banakakoak egitera behartutako entitateek, bai eta egoitza atzerrian izanik Espainian diharduten kreditu entitateen sukurtsalek ere, kreditu-arriskuaren estaldurarako zuzkidurak kentzen ahalko dituzte, aipatu arauetan ezarritako gutxieneko kopuruen zenbatekoraino.

III. KAPITULUA. Plan Bereziak

15. artikulua. Ingurumen jarduketen gastuetarako planak.

1. Subjektu pasiboek Zerga Administrazioari ingurumen jarduketen gastuetarako plana aurkezten ahalko diote.

2. Eskaerak honako datuak eduki behar ditu:

a) Subjektu pasiboak dituen betebeharrak, edo ingurumenaren kalteei aurrea hartu edo haiek konpontzeko hartu dituen konpromisoak.

b) Egin beharreko jarduketaren deskripzio teknikoa eta haren beharraren justifikazioa.

c) Ingurumen jarduketari dagozkion gastuen zenbatekoa, gutxi gorabehera, eta zenbateko horren justifikazioa.

d) Ingurumen jarduketari dagozkion gastuen zenbatekoaren denbora-egozpenerako irizpidea eta horren justifikazioa.

e) Ingurumen jarduketaren hasiera eguna.

3. Plan horiek subjektu pasiboak Ekonomia eta Ogasun Departamentuari eskatuko dizkio, ingurumen jarduketa egiteko betebeharra edo konpromisoa sortu ondorengo hiru hilabeteko epea bete baino lehen.

16. artikulua.

17. artikulua. Sarrera eta gastuen denbora-egozpeneko planak.

1. Kontabilitate ondorioetarako sarrera eta gastuen denbora-egozpenerako sortzapenekoaz bestelako irizpidea erabiltzen duten entitateek eskaera bat aurkez dezakete Administrazio tributu-hartzailearen aurrean aipatu irizpideak eraginkortasun fiskala izan dezan.

2. Eskaerak honako datu hauek jaso behar ditu:

a) Denbora-egozpenaren irizpideak ukitzen dituen sarrera eta gastuen deskribapena, haien izaeraz gain sujetu pasiboaren eragiketen multzoan duen garrantzia jasoaz.

b) Eraginkortasun fiskala izan dezan nahi den denbora-egozpenaren irizpidearen deskribapena. Denbora-egozpenaren irizpidea nahitaez betetzekoa baldin bada, betebehar hori ezartzen duen kontabilitate-araua zehaztu behar da.

c) Proposatutako denbora-egozpenaren irizpidea urteko kontuek eman behar duten irudi fidelari ongi egokitzearen justifikazioa eta ondarean, finantza-egoeran eta sujetu pasiboaren emaitzetan duen eraginaren azalpena.

d) Ondorio fiskaletarako denbora-egozpenaren irizpideak duen eraginaren deskribapena eta haren aplikaziotik sortzapenaren irizpidea aplikatuz gero egokituko litzaiokeen zerga-ordainketa baino txikiagoa gertatzen ez delako azalpena.

3. Plan hauen eskaera sujetu pasiboak Ekonomi eta Ogasun Departamentuan aurkeztuko du ondorioak izatea nahi den lehen zerga-epealdia bukatu baino sei hilabete lehenago gutxienez.

18. artikulua. Berrinbertsioko plan bereziak.

1. Bere ezaugarri bereziengatik, inbertsioa zergari buruzko foru legeko 36. artikuluan ezartzen dena baino epe luzeagoan egin behar dela frogatzen denean, subjektu pasiboek berrinbertsiorako plan bereziak proposatzen ahalko dituzte.

2. Aurreko zenbakian aipatzen den eskabideak kontu hauek bildu beharko ditu:

a) Eskualdatu diren edo eskualdatzekoak diren ondareko osagaien azalpena.

b) Eskualdatzearen produktuaren zenbatekoa, egiazkoa edo aurreikusia.

c) Berrinbertsioa gauzatuko duten ondareko osagaien azalpena.

d) Berrinbertsioa egiteko egutegiaren azalpena.

e) Berrinbertsiorako plan berezia justifikatzen duten gorabehera berezien adierazpena.

3. Berrinbertsiorako plan berezia, kasuan-kasuan, epe hauetan aurkeztuko da:

a) Aurretik egiteko inbertsioa izanez gero, inbertsio hori egin edo hasi asmo den eguna baino lehenagoko sei hilabeteetan. Kasu horretan, berrinbertsioa berrinbertsiorako plan berezia onesten denetik urtebete pasa baino lehen egin edo hasi beharko da.

b) Beste kasuetarako, aparteko onura sortu duen eskualdatzearen egunetik sei hilabete bitarte. Kasu horretan, eskualdatzearen produktuaren zenbateko osoaren 100eko 25 gutxienez zergari buruzko foru legeko 36. artikuluko 1 zenbakian ezarririko epean berrinbertitu beharko da.

19. artikulua. Planak ebazteko prozedura.

1. Kapitulu honek aipatzen dituen planen prozedurak ebazteko ahalmena Ogasun zuzendari nagusiak du.

Prozeduren instrukzioa Zuzeneko Zerga, Zehapen eta Errekerimenduen Zerbitzuak edo Zeharkako Tributu eta Enpresa Handien Zerbitzuak eginen du, kasu bakoitzean dagozkien eginkizunen arabera; horretarako, subjektu pasiboari behar diren datu eta frogagiri guztiak eskatzen ahalko dizkiote. Halaber, Ekonomia eta Ogasun Departamentuko zerbitzuei eta Nafarroako Foru Komunitateko Administrazioko beste departamentuei komenigarritzat jotzen dituzten txostenak eskatzen ahalko dizkiete.

Ebazpen proposamena, argibide eta txostenekin batera, subjektu pasiboari adieraziko zaio. Horrek hamar eguneko epea izanen du alegazioak eta egokitzat jotzen dituen agiriak aurkezteko. Izapide hau saihesten ahal da prozeduran ageri ez eta ebazpenean kontuan hartzen ere ez direnean interesatuak aipatutako egitateak, alegazioak eta frogak baizik.

Subjektu pasiboak eskabidea bertan behera utzi edo bestelako plan bat aurkezten ahalko du prozedurak diraueino.

2. Prozedura sei hilabeteko epean bukatu beharko da, eskabidea aurkezten denetik hasita, salbu eta erregelamendu honetako hirugarren xedapen gehigarrian aipatzen den kasuren bat gertatzeagatik bertan behera uzten bada.

Aurreko lerroaldea aipatzen den epean espresuki ebazpenik eman gabe bukatzen bada, subjektu pasiboak aurkezturiko plana onetsitzat joko da.

3. Prozedurari amaiera ematen dion ebazpenaren aurka berraztertzeko errekurtsoa edo erreklamazio ekonomiko-administratiboa jarri ahalko da, hilabeteko epean, Tributuei buruzko abenduaren 14ko 13/2000 Foru Lege Orokorreko IV. Tituluko VII. Kapituluko 3. eta 4. Sailetan ezarritakoari jarraikiz.

4. Ingurumen jarduketen gastuetarako planak subjektu pasiboak eskaturik aldatzen ahalko dira, kapitulu honetako arauei jarraikiz. Aldaketak ondorioak dituen zergaldiko lehen hiru hilabeteen barruan aurkeztuko da eskaera.

IV. KAPITULUA. Eragiketa lotuen merkatuko balio normalaren zehaztapena eta dokumentazio betebeharrak.

1. atala. Eragiketa lotuen merkatuko balio normalaren zehaztapena

20. artikulua. Eragiketa lotuen merkatuko balio normalaren zehaztapena. Konparagarritasun azterketa.

1. Zergari buruzko Foru Legearen 28.1.1 artikuluan aipatzen den lehia askean pertsona edo entitate lokabeek hitzartutako merkatuko balio normala zehazte aldera, eragiketa lotuen inguruabarrak eta parekagarriak izan daitezkeen pertsona edo entitate lokabeen arteko eragiketen inguruabarrak erkatuko dira.

2. Bi eragiketa edo gehiago parekagarriak ote diren zehazteko, inguruabar hauek hartuko dira kontuan, garrantzizkoak diren heinean:

a) Eragiketa lotuen xede diren ondasun edo zerbitzuen berariazko ezaugarriak.

b) Konparatzen ari diren eragiketei dagokienez aldeek beren gain hartu dituzten eginkizunak; hartutako arriskuak identifikatuko dira, eta erabilitako aktiboak haztatuko, halakorik bada.

c) Eragiketak kontraturen baten ondorio badira, kontratuaren nondik norakoak. Kontuan hartuko dira kontratuko alde bakoitzak hartutako erantzukizunak, arriskuak eta mozkinak.

d) Ondasunak edo zerbitzuak ematen direneko merkatuen ezaugarriak edo eragiketa lotuetan eragina izan dezaketen bestelako faktore ekonomikoak.

e) Kasu bakoitzean garrantzia duten beste inguruabar guztiak; adibidez, merkataritzako estrategiak. Enpresa lokabeen konparagarriei buruzko daturik ez dagoenean edo eskura daudenen fidagarritasuna mugatua denean, tributudunak inguruabar horiek dokumentatu beharko ditu.

Aurrean aipatutako inguruabarren bat kontuan hartzen ez bada, tributudunak garrantzirik gabekotzat jotzen duelako, hura azterketatik baztertzeko arrazoiak azaldu beharko ditu.

Betiere, aintzat hartu beharreko barneko edo kanpoko konparazio-elementuak zein diren adierazi beharko da.

3. Tributudunak egiten dituen eragiketa lotuak elkarri hertsiki loturik badaude edo elkarren segidan egin badira, ez da egokia izanen haiek bereiz baloratzea, eta eragiketa horien multzoa kontuan harturik eginen da idatz-zati honetan aipatzen den konparagarritasun azterketa.

4. Bi eragiketa edo gehiago parekagarriak dira haien artean, baldin eta diferentzia nabarmenik ez badago -2. idatz-zatian aipatutako inguruabarretan- ondasun edo zerbitzuaren prezioari edo eragiketaren marjinari eragiten dionik, edo, diferentziak izanda ere, horiek saihes badaitezke behar diren zuzenketak eginez.

Goian deskribatutako konparagarritasun azterketa erregelamendu honen 20 quinquies artikuluan aipatzen den dokumentazioaren osagaietakoa da, eta artikulu horretako 1. idatz-zatiaren b) letran ezarritako betebeharra betetzeko balio du.

5. Konparagarritasun azterketak eta eragiketa parekagarrien gaineko informazioak zehaztuko dute, kasu bakoitzean, Zergari buruzko Foru Legearen 32. artikuluko 1. eta 2. idatz-zatietan xedaturikoarekin bat, zein ote den balorazio metodorik egokiena.

2. atala. Eragiketa lotuetan kostuak banatzeko akordioak kengarriak izateko baldintzak

20 bis artikulua. Pertsona edo entitate lotuek kostuak banatzeko sinatzen dituzten akordioen baldintzak.

Zergari buruzko Foru Legearen 29. artikuluko 2. idatz-zatian ezarritakoa betetzeko, tributudunak ondasun eta zerbitzuen kostuak banatzeko sinatzen dituen akordioetan datu hauek agertu beharko dute, gainerako pertsona edo entitate parte-hartzaileen identifikazioaz gain -erregelamendu honen 20 quinquies artikuluko 1. idatz-zatiko a) letran ezarritako moduan eginen da-: akordioek estaltzen dituzten jarduera eta proiektu berariazkoen esparrua; horien iraupena; espero diren mozkinak partaideen artean banatzeko irizpideak; bakoitzaren ekarpena kalkulatzeko era; partaideen egitekoen eta erantzukizunen azalpen zehatza; partaideak akordioarekin bat egite edo ez egitearen ondorioak; eta akordioaren nondik norakoak aldaketara moldatzea ezartzen duen beste edozein xedapen, baldin eta inguruabar ekonomikoak aldatzen badira.

3. atala. Dokumentazio betebeharrak eragiketa lotuetan

20 ter artikulua. Dokumentazio betebeharra pertsona edo entitate lotuen arteko eragiketetan.

1. Zergari buruzko Foru Legearen 28.2 artikuluan xedatutakoa betetzeko, eta pertsona edo entitate lotuen arteko eragiketen merkatuko balioa zehazteko, subjektu pasiboak atal honetan ezarritako agiriak aurkeztu beharko ditu, Zerga Administrazioak eskatuz gero. Agiriok Zerga Administrazioaren eskura egon beharko dute, aitorpenerako edo likidaziorako borondatezko epea amaitzen denetik hasita.

Betebehar horrez gain, Zerga Administrazioak bere eginkizunetarako beharrezkotzat jotzen dituen agiri edo informazio osagarriak eskatzen ahalko ditu, Zergei buruzko abenduaren 14ko 13/2000 Foru Legean eta hura garatzeko araudian xedatutakoarekin bat.

2. Atal honetan aipatzen den dokumentazioa prestatzen denean kontuan hartu beharko dira eragiketen konplexutasuna eta kopurua, Administrazioak egiazta ahal dezan haien balorazioa Zergari buruzko Foru Legearen 28. eta 32. artikuluetan ezarritakoari loturik egin dela. Subjektu pasiboak beste helburu batzuetarako dituen agiriak erabiltzen ahalko ditu dokumentazioa prestatzeko, adierazgarriak badira. Honela osatuko da dokumentazioa:

a) Tributuduna talde batekoa bada, taldeari dagokion dokumentazioa. Taldetzat hartuko da, ondorio hauetarako, Zergari buruzko Foru Legearen 28. artikuluko 3. idatz-zatian ezarritakoa eta, halaber, entitate egoiliar edo ez-egoiliar batek eta hark atzerrian edo Espainiako lurraldean dituen establezimendu iraunkorrek osatutakoa.

Zergari buruzko Foru Legearen 28. artikuluko 3. idatz-zatian aipatutakoaren moduko taldea izanez gero, entitate nagusiak talde osoari dagokion dokumentazioa prestatu eta gordetzea aukeratzen ahalko du. Entitate nagusia Espainiako lurraldeko egoiliarra ez bada, taldeko beste entitate bat -Espainiako lurraldeko egoiliarra- izendatu beharko du, dokumentazioa gordetzeko.

Aurreko lerroaldean xedaturikoak ez du ezertan ukatzen tributudunaren betebeharra bere taldeari dagokion dokumentazio osoa eta egiazkoa Zerga Administrazioari aurkezteko, hark eskatuz gero.

b) Tributudunaren dokumentazioa.

3. Atal honetan aipatutako dokumentazioa ez zaie zergaldian negozio-zifraren zenbateko garbia hamar milioitik beherakoa izan duten pertsona edo entitateei eskatuko, betiere zergaldi horretan pertsona edo entitate lotuekin egindako eragiketa guztien diru-zenbatekoa ez bada 250.000 eurotik gorakoa merkatuko balioan. Dena dela, dokumentatu beharko dira, betiere, egoitza erregelamendu bidez paradisu fiskaltzat jotako herrialde edo lurralde batean duten pertsona edo entitate lotuekin egindako eragiketak, salbu eta beren egoitza Europar Batasuneko estatu kideren batean izan eta subjektu pasiboak egiaztatzen badu zio ekonomiko baliodunei erantzuten dietela eragiketek eta pertsona edo entitate horiek enpresa edo lanbide jarduerak egiten badituzte. Negozio-zifra garbia kalkulatzeko, Zergari buruzko Foru Legearen 50.1.b) artikuluan ezarritako irizpideei jarraituko zaie.

4. Atal honetan aipatutako dokumentazioa ez da eskatuko, ezta honako eragiketa lotu hauek egiten direnean ere:

a) Zerga-bateratzearen araubideko talde batean, hots, Zergari buruzko Foru Legearen X. tituluko VIII. kapituluko araubidea aukeratu duen talde batean, taldekide diren entitateen arteko eragiketak.

b) Zergari buruzko Foru Legearen X. tituluko VIII. kapituluan dagoen araubidea aukeratu duen zerga-bateratze talde bateko kideen artean edo taldekide diren beste entitate batzuen artean egindakoak; Interes Ekonomikoko Elkarteei buruzko apirilaren 29ko 18/1982 Legean ezarritakoari jarraikiz interes ekonomikoko elkarteek beren kideekin egindakoak; eta berariazko erregistroan inskribatuta dauden aldi baterako enpresa elkarteek egindakoak -horiek Enpresa talde eta aldi baterako elkarteen eta eskualdeetako industria garatzeko sozietateen zerga araubideari buruzko maiatzaren 26ko 18/1992 Legean arautzen dira-.

c) Baloreak erosteko eskaintza publikoen edo saltzeko eskaintza publikoen esparruan egiten diren eragiketak.

d) Espainiako Bankuak onetsitako babeseko erakunde-sistema bateko kreditu entitateen artean egindakoak, eta aipatutako babeseko erakunde-sistemak maiatzaren 25eko 13/1985 Legearen 8.3.d) artikuluan ezarritako baldintzen betetzearekin erlazioa dutenak; lege hori inbertsio-koefizienteei, baliabide propioei eta finantza-bitartekarien informazio-betekizunei buruzkoa da.

e) Zergaldian pertsona edo entitate lotu berarekin egindakoak, betiere eragiketa horien kontraprestazioa 600.000 eurotik gorakoa ez bada, osotara. Zenbaketa horretatik kanpo geratuko dira letra honen, 1., 2., 3. eta 4. zenbakietan aipatzen diren eragiketak.

Aurreko e) letran xedatzen dena ez da aplikatuko kasu hauetan:

1. Eragiketak paradisu fiskaltzat jotzen diren herrialde edo lurraldeetako pertsona edo entitate egoiliarrekin eginak direnean, salbu eta beren egoitza Europar Batasuneko estatu kideren batean izan eta subjektu pasiboak egiaztatzen badu zio ekonomiko baliodunei erantzuten dietela eragiketek eta pertsona edo entitate horiek jarduera ekonomikoak egiten badituzte.

2. Pertsona fisikoen errentaren gaineko zergako subjektu pasiboek jarduera ekonomiko bat gauzatzean egindako eragiketak direnean, eta jarduera horri zenbatespen objektiboaren araubidea aplikatzen ahal zaionean, bera, bere ezkontidea, aurrekoak edo ondorengoak partaide dituen sozietate batekin, eta haiek guztiek batera nahiz bakarka sozietatearen kapitalean edo funtsetan duten portzentajea %25 edo handiagoa bada.

3. Eragiketa 2004/39/EE Zuzentarauan definitutako balore-merkatu arautuetan negoziatzeko onartzen ez diren negozioen edo edozein motatako entitateen funts berekietako partaidetza irudikatzen duten baloreen edo partaidetzen eskualdaketa bada.

4. Eragiketa kontabilitate irizpideen arabera ukiezinak diren aktibo finantzarioen gaineko higiezinen edo eragiketen eskualdaketa bada.

5. Tributudunak bere eragiketa lotuei buruzko informazioa jarri beharko du aitorpenean, hala aurreikusten denean, Ekonomia eta Ogasuneko kontseilariak foru agindu bidez ezartzen duen moduan.

20 quater artikulua. Subjektu pasiboaren taldeari dagokion dokumentazio betebeharra.

1. Taldeari dagokion dokumentazioak honako hauek biltzen ditu:

a) Taldearen antolamenduaren, egitura juridikoaren eta operazio-egituraren deskribapen orokorra, eta horren aldaketa nabarmen oro.

b) Tributudunaren eragiketei zuzenean edo zeharka eragiten dieten eragiketa lotuak egiten dituzten taldeko entitateen identifikazioa.

c) Tributudunaren eragiketei zuzenean edo zeharka eragiten dieten taldeko entitateen arteko eragiketa lotuen izaeraren, zenbatekoen eta fluxuen deskribapen orokorra.

d) Tributudunak egindako eragiketei zuzenean edo zeharka eragiten dieten taldeko entitateen eginkizunen eta arriskuen deskribapen orokorra. Aurreko zergalditik edo likidazioalditik izandako aldaketak ere azaldu beharko dira.

e) Tributudunak egindako eragiketei eta entitatearen beraren eragiketa lotuei zuzenean edo zeharka eragiten dieten patente, marka, merkataritzako izen eta gainerako aktibo ukiezinen titularren zerrenda, bai eta horiek erabiltzeagatiko ordainen zenbatekoa ere.

f) Transferentzia-prezioen arloan taldeak darabilen politikaren deskribapena, taldeak prezioak finkatzeko aukeratutako metodoa edo metodoak barne, eta lehia askearen printzipioa betetzen delako justifikazioa.

g) Tributudunaren eragiketei zuzenean edo zeharka eragiten dieten taldeko entitateen artean kostuak banatzeko egindako akordioen eta elkarri zerbitzuak emateko egindako kontratuen zerrenda.

h) Tributudunak egindako eragiketei zuzenean edo zeharka eragiten dieten taldeko entitateen gaineko aurretiazko balorazio-akordioen eta prozedura adiskidetsuen -egindakoak edo egiten ari direnak- zerrenda.

i) Taldearen memoria edo, halakorik ezean, urteko txosten baliokidea.

2. Tributudunak taldeko beste entitate batzuekin eragiketa lotuak zein zergaldi edo likidazioalditan egin dituen, hari buruzkoak izanen dira aurreko idatz-zatian ezarritako dokumentazio betebeharrak; Zergari buruzko Legearen 50.1.b) artikuluan ezarritako baldintzak betetzen ez dituzten taldeei eskatzen ahalko zaizkie.

Zergaldi edo likidazioaldi baterako prestaturiko dokumentazioak ondorengoetarako ere balio badu, ez da dokumentazio berririk eginen; bai, ordea, behar diren egokitzapenak.

20 quinquies artikulua. Subjektu pasiboaren dokumentazio betebeharra.

1. Tributudunaren dokumentazio berariazkoak honako hauek bildu beharko ditu:

a) Tributudunaren eta harekin eragiketa egin duten pertsona edo entitateen izen-deiturak edo izen soziala edo osoa, helbide fiskala eta identifikazio fiskaleko zenbakia, eta eragiketaren izaera zehatza, ezaugarriak eta zenbatekoa.

Horrez gain, eragiketa egin bada paradisu fiskaltzat jotzen diren herrialde edo lurraldeetako egoiliarrak diren pertsona edo entitateekin, horien izenean eragiketan esku hartu duten pertsonen identifikazioa eman beharko da, eta, entitateekiko eragiketen kasuan, entitateen administratzaileen identifikazioa.

b) Konparagarritasun azterketa, erregelamendu honen 20.2 artikuluan azaltzen dena, hain zuzen.

c) Hautatu den balorazio metodoaren azalpena, zergatik hautatu den, nola aplikatzen den eta haren bidez lortutako balioa edo balio-tartea.

d) Zenbait pertsona edo entitate loturi batera emandako zerbitzuen gastuak banatzeko irizpideak, eta dagozkien akordioak, halakorik bada, eta erregelamendu honen 20 bis artikuluan aipatzen diren akordioak, kostuak banatzekoak.

e) Tributudunak bere eragiketa lotuen balorazioa zehazteko erabilitako beste informazio adierazgarri guztiak eta beste bazkide batzuekin sinaturiko itun parasozialak.

2. Subjektu pasiboak zein zergaldi edo likidazioalditan egin duen eragiketa lotua, hari buruzkoak izanen dira aurreko idatz-zatian aipatutako dokumentazio betebeharrak.

Zergaldi edo likidazioaldi baterako prestatutako dokumentazioak ondorengoetarako ere balio badu, ez da dokumentazio berririk eginen; bai, ordea, behar diren egokitzapenak.

3. Aurreko 1. zenbakian ezarritako dokumentazio betebeharrak oso-osorik eskatuko dira, salbu eta eragiketan esku hartzen duten aldeetako bat Zergari buruzko Foru Legearen 50.1.b) artikuluko baldintzak betetzen dituen entitatea denean, edo pertsona fisikoa denean, eta, gainera, eragiketak paradisu fiskaltzat jotzen diren herrialde edo lurraldeetako pertsona edo entitate egoiliarrekin eginak ez direnean; kasu horretan, subjektu pasiboen dokumentazio betebehar berariazkoak hauek izanen dira:

a) Aurreko 1. zenbakiko a), b), c) eta e) letretan aipatutakoak, 20 ter.4 artikuluko 2. ordinalean aipatutako eragiketak direnean.

b) Aurreko 1. zenbakiko a) eta e) letretan aipatutakoak, bai eta magnitudeak, ehunekoak, ratioak, fluxuen deskontuei aplikatzen zaizkien tasak, aurreikuspenak eta balioa zehazteko erabiltzen diren gainerako baloreak ere, 20 ter.4 artikuluaren 3. ordinalean aipatutako eragiketa denean.

c) Aurreko 1. zenbakiko a), c) eta e) letretan aipatutakoak, 20 ter.4 artikuluko 4. ordinalean aipatutako kasuetan.

d) Aurreko 1. zenbakiko a) letran aipatutakoa, profesionalen zerbitzuak ematen direnean.

e) Gainerako kasuetan, aurreko 1. zenbakiko a) eta e) letretan aipatutakoak, bai eta erabilitako balorazio metodoaren eta horren ondoriozko balore-tartearen azalpena ere, gainerako kasuetan.

4. atala. Eragiketa lotuen merkatuko balio normalaren egiaztapena

20 sexies artikulua. Eragiketa lotuen merkatuko balio normalaren egiaztapena.

1. Ikuskapen prozeduran egin beharreko erregularizazioak balorazioa zuzentzeaz gain beste helburu batzuk baditu, likidazio proposamenaren akta bereizia eginen da, zerga betebeharraren gainerako elementuengatik egin beharreko aktetatik aparte. Akta horretan merkatuko balio normalaren zehaztapena justifikatuko da, Zergari buruzko Foru Legearen 32. artikuluan ezarritako metodoetako bati jarraikiz, eta egoki azalduko da zergatik zuzendu behar den tributudunak egindako balorazioa. Akta horren ondoriozko likidazioa behin-behinekoa izanen da.

2. Balorazioa zuzendu ondoren egindako behin-behineko likidazioaren aurka tributudunak errekurtsoa edo erreklamazioa jartzen badu, likidazio horren eta berrikuspen prozeduraren berri jakinaraziko zaie ukitutako gainerako pertsona edo entitate lotuei, prozeduran ager ahal daitezen.

Bidezko epeak iraganik, tributudunak errekurtso edo erreklamaziorik jarri ez badu, behin-behineko likidazioa ukitutako gainerako pertsona edo entitate lotuei jakinaraziko zaie, eta nahi dutenek berraztertzeko errekurtsoa edo erreklamazio ekonomiko-administratiboa jartzen ahalko dute, batera. Baldin eta berraztertzeko bi bide horiek aldi berean erabiltzen badira, alde edo entitate lotuen artean akordiorik ez izateagatik, lehenik aurkeztutako errekurtso edo erreklamazioa bakarrik tramitatuko da, eta bigarrena onartezin deklaratuko.

3. Baldin eta Zergari buruzko Foru Legearen 32. artikuluan aipatutako metodoak aplikatzeko beharrezkoa izan bada ondasun edo eskubideen balioa egiaztatzea Zergei buruzko Foru Lege Orokorraren 44. artikuluan ezarritako bideetatik, tributudunak peritu-tasazio kontraesanezkoa eskatzen ahalko du, ondasun edo eskubide horren balio egiaztatua zuzentzeko. Tributudunak peritu-tasazio kontraesanezkoa eskatzen badu, organo eskudunak tributudunari eta ukitutako gainerako pertsona edo entitate lotuei Administrazioko peritu batek emandako txostena igorriko die, eta 15 eguneko epea jarriko, baloratu beharreko ondasun edo eskubideen izaerarako titulu egokia duen peritu bat izenda dezaten, elkarrekin ados jarrita. Peritu-tasazio kontraesanezkoaren prozedura Zergei buruzko Foru Lege Orokorraren 44. artikuluko 2. idatz-zatian xedatutakoari jarraituz tramitatuko da.

Peritu-tasazio kontraesanezkoaren prozedura bukaturik, 2. idatz-zatian adierazitakoaren arabera jokatuko da, tasazioko balioan oinarritutako behin-behineko likidazioaren aurka jar daitezkeen errekurtso edo erreklamazioei dagokienez.

Idatz-zati honetan xedatutakoaren arabera peritu-tasazio kontraesanezkoaren prozedura eskatzea zilegi den kasuetan, bidezko epeak iragaten badira tributudunak tasazio hori eskatu edo errekurtso nahiz erreklamaziorik jarri gabe, egindako behin-behineko likidazioa ukitutako gainerako pertsona edo entitate lotuei jakinaraziko zaie, eta nahi dutenek, batera, peritu-tasazio kontraesanezkoa eskatu edo errekurtso nahiz erreklamazioa jartzen ahalko dute. Baldin eta, alde edo entitate lotuen arteko akordiorik ez izateagatik, aldi berean peritu-tasazio kontraesanezkoa eskatu eta errekurtso edo erreklamazioa jartzen bada, peritu-tasazio kontraesanezkoa eginen da lehendabizi, Zergari buruzko Foru Legearen 28.1.2 artikuluan aipatutako balioa zehazte aldera. Eteteko ondorioak izanen ditu peritu-tasazio kontraesanezkoa eskatzeak, eta, horrekin batera errekurtso edo erreklamazioren bat aurkeztu bada, ez da onartuko.

Aurreko lerroaldean aipatutako peritu-tasazio kontraesanezkoaren prozedura amaitutakoan, alde edo entitate lotuek, batera, 2. idatz-zatian aipatu bezala, tasazioko balioan oinarrituta egindako behin-behineko likidazioaren aurka berraztertzeko errekurtsoa edo erreklamazio ekonomiko-administratiboa jartzen ahalko dute.

4. Tributudunari egindako likidazioa irmo bihurtu eta gero, Zerga Administrazioak gainerako pertsona edo entitate lotuen zerga egoera erregularizatuko du, egiaztatutako balio irmoaren arabera, eta, bidezkoa denean, berandutza interesak aitortuko dizkie. Likidazioa irmo bihurtu aurreko zergaldiari -likidazioa irmo bihurtzen den momentuan aitorpena aurkezteko eta dirua sartzeko epea amaitua duen azken zergaldiari- dagokion likidazioa eginen da, erregularizazio hori egiteko. Zergaldirik gabeko zergen kasuan erregularizazio hori egiteko, tributudunari egin zaion likidazioa irmo bihurtzen den momentuko likidazioa eginen da.

Likidazio horretan kontuan hartuko dira balio egiaztatu eta irmoari dagozkion efektuak, Zerga Administrazioak egindako balorazio-zuzenketak ukitzen dituen zergaldi guztiei dagokienez, eta barnean hartuko dira berandutza interesak, halakorik egonez gero, autolikidazioa aurkezteko epearen azken egunetik hasita kalkulatuak -edo autolikidazioa epez kanpo aurkeztu den egunetik, baldin eta erregularizazioak itzulketa badakar eragiketa lotuak ondorioak sortu dituen ekitaldietako bakoitzean- eta eragiketa horren balio egiaztatua gainerako pertsona edo entitate lotuen aurrean eraginkorra den ekitaldiari dagokion likidazioa egin den egunera arte, Zergari buruzko Foru Legearen 32.4.3 artikuluan eta aurreko idatz-zatian ezarritakoarekin bat.

Tributudunek, halaber, balio egiaztatua aplikatu beharko dute Administrazioaren erregularizazioaren xede izan den zergaldiaren ondoko zergaldietako aitorpenetan, eragiketa lotuak ondoriorik sortzen badu zergaldi horietan.

Likidazio hori egiteko, ikuskapen organoek Zergei buruzko Foru Lege Orokorraren 130. artikuluan eta hurrengoetan ezarritako ahalmenak erabili ahal izanen dituzte, eta beharrezkotzat jotzen dituzten jarduketak egin, informazioa lortzeko.

5. Artikulu honetan araututako prozedura ez zaie aplikatuko balorazioaren zuzenketak ukitutako pertsona edo entitateei, horiek ez badira Espainiako lurraldeko egoiliarrak edo bertan kokatutako establezimendu iraunkorrak, Zergari buruzko Foru Legearen 32.4.4 artikuluan xedatutakoarekin bat. Espainiako lurraldeko egoiliarrak ez diren pertsona edo entitate ukituek -bertan kokatutako establezimendu iraunkorrek izan ezik, barne antolamenduari erantsitako itun edo hitzarmenen bati heldu ahal badiote-, prozedura adiskidetsura edo arbitraje prozedurara jotzen ahalko dute, balorazioaren zuzenketak zergapetze bikoitza ekarri badie hori saihesteko, Zergari buruzko Foru Legearen 32.4.5 artikuluan xedatutakoarekin bat.

5. atala. Bigarren mailako doikuntza

20 septies artikulua. Eragiketa lotuen balio hitzartuaren eta merkatuko balioaren arteko diferentzia.

1. Eragiketan hitzartutako balioa merkatuko balio normala bera ez den kasuetan, bi balioen arteko diferentziak, pertsona edo entitate lotuentzat, diferentzia horren ondorioz agerian jarri diren errenten izaerari dagokion tratamendu fiskala izanen du.

2. Bazkide edo partaideen eta entitatearen arteko harremanaren arabera definitutako lotura dagoen kasuetan bereziki, diferentziak tratamendu hau izanen du, oro har:

a) Bazkide edo partaidearen aldeko diferentzia denean, hark entitatean duen partaidetza portzentajeari dagokion errenta zatia funts berekien ordainketa izanen da entitatearentzat, eta entitateen mozkinetako partaidetza bazkidearentzat.

Entitatearen partaidetzaren portzentajeari ez dagokion diferentzia zatia, berriz, entitatearentzat funts berekien ordainketa izanen da, eta bazkide edo partaidearentzat, bazkide, akziodun, elkartekide edo partaide izateagatik entitatetik jasotako onura, Pertsona Fisikoen Errentaren gaineko Zergari buruzko Foru Legearen Testu Bateginaren 28.c) artikuluan ezarritakoarekin bat.

b) Entitatearen aldeko diferentzia denean, partaidetza-portzentajeari dagokion diferentzia zatia bazkide edo partaideak entitatearen funts berekietara egindako ekarpena izanen da, eta handitu eginen du bazkide edo partaidearen partaidetzaren erosketa-balioa.

Partaidetza-portzentajeari ez dagokion errenta zatia, berriz, errenta izanen da entitatearentzat, eta liberalitatea bazkide edo partaidearentzat. Establezimendu iraunkorrik izan gabe ez-egoiliarren errentaren gaineko zergaren mende dauden zergadunen kasuan, errenta ondare-irabazitzat joko da.

3. Merkatuko balio normalaren eta balio hitzartuaren arteko diferentziak agerian jarritako errentaren kalifikazioa 2. idatz-zatian aipatutakoaz bestelakoa izan daiteke, idatz-zati horretan azaltzen ez den kausaren bat egiaztatzen bada.

6. atala. Dokumentazio betebeharrak, paradisu fiskaletako egoiliarrak diren pertsona edo entitate lokabeekiko eragiketetan

21. artikulua. Dokumentazio betebeharrak, paradisu fiskaletako egoiliarrak diren pertsona edo entitate lokabeekiko eragiketetan.

1. Zergari buruzko Foru Legearen 31.1 artikuluan ezarritakoa betetzeko, paradisu fiskalak diren herrialde edo lurraldeetako egoiliarrak izan eta Zergari buruzko Foru Legearen 28. artikuluaren arabera pertsona edo entitate lotutzat hartu behar ez diren pertsona edo entitateekin eragiketak egiten dituztenek honako dokumentazio betebehar hauek izanen dituzte:

a) Tributudunaren eta harekin eragiketa egin duten pertsona edo entitateen izen-deiturak edo izen soziala edo osoa, helbide fiskala eta identifikazio fiskaleko zenbakia, eta eragiketaren izaera zehatza, ezaugarriak eta zenbatekoa.

Horrez gain, pertsona edo entitate horien izenean eragiketan esku hartu duten pertsonen identifikazioa eman beharko da, eta, entitateekiko eragiketen kasuan, entitateen administratzaileen identifikazioa ere bai.

b) Konparagarritasun azterketa, erregelamendu honen 20.2 artikuluan azaltzen dena, hain zuzen.

c) Hautatu den balorazio metodoaren azalpena, zergatik hautatu den, nola aplikatzen den, eta haren bidez lortutako balioa edo balio-tartea.

d) Paradisu fiskaletako egoiliarrak diren zenbait pertsona edo entitateri batera emandako zerbitzuen gastuak banatzeko irizpideak, eta dagozkien akordioak, halakorik bada, eta erregelamendu honen 20 bis artikuluan aipatzen diren akordioak, kostuak banatzekoak.

e) Tributudunak bere eragiketen balorazioa zehazteko erabilitako beste informazio guztiak.

2. Aurreko idatz-zatian azaldutako zerbitzuei eta salgaien nazioarteko salerosketei buruzko dokumentazio betebeharrak ez dira eskatuko, salerosketako bitartekotza-komisioak barne, ez eta gastu gehigarriak eta lotuak ere, baldin eta honako baldintza hauek betetzen badira:

a) Tributudunak frogatu behar du arrazoi ekonomiko baliodunak izan direla eragiketa paradisu fiskaltzat jotzen den herrialde edo lurralde baten bitartez egiteko.

b) Tributudunak eragiketa parekagarriak egin behar ditu paradisu fiskaltzat jotzen diren herrialde edo lurraldeetako egoiliarrak ez diren pertsona edo entitate lokabeekin, eta frogatu behar du eragiketaren balio hitzartua bat datorrela beste eragiketa parekagarri horien balio hitzartuarekin, behin zuzenketak eginda, beharrezkoak badira.

V. KAPITULUA. Pertsona edo entitate lotuen arteko eragiketak aurretiaz baloratzeko akordioak.

22. artikulua. Prozeduraren hasiera.

1. Pertsona edo entitate lotuek beren artean eragiketak egin aurretik, eragiketa horien merkatuko balioa zehazteko eskaera aurkezten ahalko dute. Horren barnean, balorazio-proposamena eginen dute, merkatuko balioan oinarritua; proposatutako metodoa deskribatuko dute, eta metodo horren aplikazioan lehia askearen printzipioa betetzen dela erakusten duen analisia azalduko. Halaber, Zergari buruzko Foru Legearen 38. artikuluko 1. idatz-zatian ezarritako koefizientearen ordez beste bat aplikatzeko proposamena aurkezten ahalko diote Zerga Administrazioari.

Pertsona edo entitate eskatzaileek eskabidea sinatu, eta Administrazioari frogatu behar diote eragiketetan parte hartuko duten gainerako pertsona edo entitate lotuek balorazio-eskaera ezagutzen eta onartzen dutela.

2. Eskaerarekin batera, erregelamendu honen 20 quater eta 20 quinquies artikuluetan aipatzen den dokumentazioa aurkeztu beharko da, balorazio-proposamenari aplikagarria zaion heinean, eta kasu bakoitzaren inguruabarretara egokituko da.

3. Azpikapitalizazio koefizienteari dagozkion proposamenetan dokumentazio hau aurkeztu beharko da:

a) Entitatearen urteko kontuak.

b) Subjektu pasiboak, kapital fiskalari dagokionez, merkatuko baldintza normaletan pertsona edo entitate lokabeengatik lortuko zukeen zorpetzearen kalkulua, eta horren justifikazioa.

c) Entitatea kide duen sozietate taldearen deskribapena.

d) Entitateak zein entitate ez-egoiliar loturekin egin dituen edo eginen dituen zorrak.

e) Proposatzen den zorpetze koefizientea eta horren justifikazioa. Haren aplikazioari begira oinarrizkotzat hartu behar diren inguruabar ekonomikoak nabarmenduko dira.

f) Elkarrekikotasunezko tratamenduaren justifikazioa.

4. Honako inguruabar hauetakoren bat gertatzen bada, eskaera tramitatzeko ez onartzea erabakitzen ahalko da. Betiere arrazoiak azalduko dira.

a) Egin nahi den balorazio-proposamenak merkatuko balio normala zehazteko oinarri nabarmenik ez badu.

b) Egin nahi den balorazio-proposamenarekin antz handia duten beste batzuk baztertu izan badira.

c) Balorazio-proposamenaren bitartez saihestuko litzatekeen zergapetze bikoitzaren arriskurik ez dagoela irizten bazaio.

d) Egin nahi den proposamena ezestea erabakitzeko behar adinako beste edozein arrazoi badago.

23. artikulua. Tramitazioa eta organo eskudunak.

1. Zerga Administrazioak proposamena eta aurkeztutako agiriak aztertuko ditu, eta proposamenarekin zerikusia duten datu, txosten, aurrekari eta egiaztagiri guztiak eskatzen ahalko dizkie tributudunei, baita proposamenaren gaineko azalpen edo argibide osagarriak ere.

Prozeduraren instrukzioa Zuzeneko Zerga, Zehapen eta Errekerimenduen Zerbitzuak edo Zeharkako Tributu eta Enpresa Handien Zerbitzuak eginen du, kasu bakoitzean dagozkien eginkizunen arabera.

Prozedura ebazteko eskumena Nafarroako Zerga Ogasuneko zuzendari kudeatzaileak izanen du.

2. Aurkeztutako dokumentazioak kapitulu honetan arautzen den prozeduran bakarrik izanen ditu ondorioak, prozedura horretan baizik ez da erabiliko eta ez ditu subjektu pasiboak salbuetsiko zerga araudian ezarritakoaren arabera dagozkien gainerako betebeharretatik.

Atzera egiten bada, prozedura iraungitzen bada edo proposamena ezesten bada, aurkeztutako dokumentazioa itzuli eginen da.

24. artikulua. Amaiera, akordioaren ondorioak eta errekurtsoak.

1. Prozedurari bukaera emanen dion ebazpenak aukera hauek izanen ditu:

a) Tributudunak aurkeztutako balorazio-proposamena onestea.

b) Hasieran aurkeztutakoa ez beste balorazio-proposamen bat onestea, tributuduna ados dagoela.

c) Tributudunak egindako proposamena ezestea.

2. Baloraziorako aurretiazko akordioa agiri batean formalizatuko da. Bertan, hauek bilduko dira, gutxienez:

a) Formalizazioaren lekua eta data.

b) Proposamenak ukitzen dituen tributudunen izen-deiturak edo izen soziala edo izen osoa eta identifikazio fiskaleko zenbakia.

c) Tributudunak akordioaren edukiarekin ados daudela dioen adierazpena.

d) Proposamenaren xede diren eragiketen deskribapena.

e) Balorazio metodoaren elementu funtsezkoak eta hartatik sortzen den balio-tartea, halakorik bada, bai eta haren aplikaziorako oinarrizkotzat hartzen diren inguruabar ekonomikoak ere, funtsezko hipotesiak nabarmenduz.

f) Akordioa zein zergaldi edo likidazioaldiri aplikatuko zaion, eta noiz hartuko duen indarra.

3. Balorazio-proposamenaren ezespenean tributudunen identifikazioa jarriko da eta Zerga Administrazioak proposamena zergatik ezetsi duen azalduko da.

4. Prozedura ebazteko epea sei hilabetekoa izanen da, proposamena jasotzen denetik hasita. Epe horretan interesdunari ebazpenik jakinarazten ez bazaio, proposamena ezetsitzat jotzen ahalko da.

5. Zerga Administrazioa eta subjektu pasiboak behartuak egonen dira onetsitako proposamenetik ondorioztatzen dena aplikatzera.

6. Zerga Administrazioak egiaztatzen ahalko du onetsitako proposamenean azaltzen diren gertaerak eta eragiketak benetakoak direla eta onetsitako proposamena zuzen aplikatu dela.

Egiaztapenak agerian jartzen badu onetsitako proposamenean azaltzen diren gertaerak eta eragiketak ez direla benetakoak edo onetsitako proposamena ez dela zuzen aplikatu, Zerga Administrazioak tributudunen zerga egoera erregularizatuko du.

7. Subjektu pasiboren batek atzera egiten badu, prozedura amaitu eginen da.

8. Prozedurari amaiera ematen dion ebazpenaren edo ustezko ezespen egintzaren aurka ezin izanen da errekurtsorik jarri, baina geroago bidezkoak diren errekurtsoak jartzen ahalko dira likidazio egintzen aurka.

25. artikulua. Pertsona edo entitate lotuekin egindako eragiketak baloratzeko akordioaren aplikazioari buruzko informazioa.

Sozietateen gaineko zergaren, pertsona fisikoen errentaren gaineko zergaren edo ez-egoiliarren errentaren gaineko zergaren aitorpenarekin batera, subjektu pasiboek idazki bat aurkeztuko dute onetsitako aurretiazko balorazio-akordioaren aplikazioari buruz, honako informazio hauek bilduko dituena, besteak beste:

a) Aitorpenari dagokion zergaldi edo likidazioaldian egin diren eta aurretiazko akordioa aplikagarri izan duten eragiketak.

b) Eragiketa horiek aurretiazko akordioa aplikatzearen ondorioz zer balio edo preziotan egin diren.

c) Aurretiazko akordioak aipatzen duen balorazio metodoaren aplikaziorako oinarrizkotzat jo behar diren inguruabar ekonomikoen aldaketa adierazgarrien deskribapena, horrelakorik gertatu bada.

d) Zergaldi edo likidazioaldian egindako eragiketak, aldez aurreko akordioan aipatzen direnen antzekoak; horiek zein preziotan egin diren; eta aldez aurreko akordioaren esparruan sartutako eragiketekin dituzten desberdintasunen deskribapena.

Beste administrazio batzuekin sinatzen diren akordioetan, ordea, subjektu pasiboak urtero aurkeztu beharreko dokumentazioa akordiotik ondorioztatzen dena izanen da.

26. artikulua. Baloraziorako aurretiazko akordioa aldatzea.

1. Aurretiazko balorazio-akordioa onetsi zenean aintzat hartutako inguruabar ekonomikoak nabarmen aldatuz gero, akordioa inguruabar ekonomiko berrietara egokitzeko aldatzen ahalko da. Aldatzeko prozedura ofizioz edo tributudunek eskaturik hasten ahalko da.

2. Pertsona edo entitate eskatzaileek aldaketarako eskabidea sinatu beharko dute, eta Administrazioari frogatuko eragiketetan parte hartuko duten gainerako pertsona edo entitate lotuek aldaketarako eskaera ezagutzen eta onartzen dutela. Eskabidean informazio hau eman beharko da:

a) Inguruabar ekonomikoen aldaketa nabarmenaren justifikazioa.

b) Aldaketa horren arabera bidezkoa den aldaketa.

Ukitutako pertsona edo entitateren batek atzera egiten badu, aldaketarako prozedura amaitu eginen da.

Zerga Administrazioak, aurkeztutako dokumentazioa aztertu ondoren, eta tributudunei entzuteko hamabost eguneko epea igarotakoan, ebazpen arrazoitua emanen du. Ebazpenean, aukera hauek izanen ditu:

a) Tributudunek egindako aldaketa onestea.

b) Hasieran aurkeztutakoa ez beste balorazio-proposamen bat onestea, tributuduna ados dagoela.

c) Tributudunek egindako aldaketa ezestea, hasieran onetsitako aurretiazko balorazio-akordioa berretsiz edo indargabetuz.

3. Aldaketarako prozedura Zerga Administrazioak abiarazten badu, proposamenaren edukia tributudunei jakinaraziko zaie, eta jakinarazpen egunaren biharamunetik, hilabeteko epean aukera hauek izanen dituzte:

a) Aldaketa onartzea.

b) Ordezko aldaketa aurkeztea, behar bezala justifikatua.

c) Aldaketa errefusatzea, arrazoiak azalduz.

Zerga Administrazioak, aurkeztutako agiriak aztertu ondoren, ebazpen arrazoitua emanen du. Bertan, aukera hauek izanen ditu:

a) Aldaketa onestea, tributudunek onartu badute.

b) Tributudunek egindako ordezko aldaketa onestea.

c) Hasierako balorazio-proposamena onetsi zuen erabakia indargabetzea.

d) Hasierako balorazio-proposamena aplikatzen jarraitu behar dela adieraztea.

4. Beste zerga administrazioren batekin akordiorik bada, aurretiazko balorazio-akordioa aldatu ahal izateko, administrazio horrekin lortutako akordioa aldatu beharko da lehendabizi. Horretarako, erregelamendu honen 28. artikuluan ezarritako prozedurari jarraituko zaio.

5. Prozedura 6 hilabeteko epean bukatu beharko da. Epe horretan berariazko ebazpenik jakinarazten ez bada, aldaketarako proposamena ezetsitzat jotzen ahalko da.

6. Aldaketarako prozedurari amaiera ematen dion ebazpenaren edo ustezko ezespen egintzaren aurka ezin izanen da errekurtsorik jarri, baina geroago bidezkoak diren errekurtsoak jartzen ahalko dira likidazio egintzen aurka.

7. Aldaketa onesteak erregelamendu honen 24. artikuluan aipatutako ondorioak izanen ditu, aldaketarako eskaera aurkeztu ondoren edo aldaketa-proposamena jakinarazi ondoren egiten diren eragiketei dagokienez.

8. Hasierako baloraziorako aurretiazko akordioa baliogabetzeko ebazpenak erregelamendu honen 24. artikuluan aipatzen diren ondorioen iraungitzea ekarriko du, aldaketarako eskaera aurkeztu ondoren edo aldaketa-proposamena jakinarazi ondoren egiten diren eragiketei dagokienez.

9. Subjektu pasiboek egindako aldaketa ezesteak ondorio hauek izanen ditu:

a) Erregelamendu honen 24. artikuluan aipatutako ondorioen berrespena, inguruabar ekonomikoen aldaketa nabarmena frogatzen ez denean.

b) Erregelamendu honen 24. artikuluan aipatutako ondorioen iraungitzea, ezespenaren ondoren egiten diren eragiketei dagokienez, gainerako kasuetan.

27. artikulua. Baloraziorako aurretiazko akordioa luzatzea.

1. Onetsitako balorazio-akordioaren indarraldia luzatzeko eskatzen ahalko diote tributudunek Zerga Administrazioari. Indarraldia amaitu baino 6 hilabete lehenago aurkeztu behar dute eskaera, eta egokiak iruditzen zaizkien agiriak erantsiko dituzte, hasierako eskaeran azaldutako inguruabarrak aldatu ez direla frogatzeko.

2. Aurretiazko balorazio-akordioa sinatu zuten pertsona edo entitate berek sinatu behar dute luzapenerako eskabidea, eta Administrazioari frogatu behar diote eragiketetan parte hartuko duten gainerako pertsona edo entitate lotuek luzapen-eskaera ezagutzen eta onartzen dutela.

3. Zerga Administrazioak sei hilabeteko epea izanen du 1. idatz-zatian aipatutako agiriak aztertzeko eta tributudunei jakinarazteko luzatuko ote den ala ez aurretiazko baloraziorako akordioaren indarraldia. Horretarako, Administrazioak informazio eta agiri gehiago eskatzen ahalko ditu, bai eta tributudunaren laguntza ere.

4. Aurreko idatz-zatian aipatutako epea iragaten bada aurretiazko baloraziorako akordioaren indarraldiaren luzapenik jakinarazi gabe, eskaera ezetsitzat jotzen ahalko da.

5. Ezin izan da jarri errekurtsorik akordioa luzatzeari buruzko ebazpenaren edo ustezko ezespen egintzaren aurka, bai, ordea, ondotik gerta daitezkeen likidazio egintzen aurkako errekurtso eta erreklamazioak.

28. artikulua. Beste zerga administrazio batzuekin eragiketa lotuei buruzko akordioa egiteko prozedura.

Zergari buruzko Foru Legearen 30. artikuluan ezarritakoarekin bat, eta Hitzarmen Ekonomikoan ezarritako bideetatik, Foru Komunitateko Administrazioak beste zerga administrazio batzuekin akordioak egiten ahalko ditu eragiketen merkatu-balio normala batera zehazte aldera. Horrelako akordioak egiteko prozeduran kapitulu honetako arauak beteko dira, berezitasun hauekin:

A) Prozeduraren hasiera.

1. Tributudunek eskatzen badute egindako proposamena beste zerga administrazio batzuek azter dezatela pertsona edo entitate lotuek egoitza duteneko herrialde edo lurraldean, Zerga Administrazioak prozedura hori hastea bidezkoa ote den aztertuko du. Prozeduraren hasieraren ezespenak arrazoitua izan behar du, eta ezin izanen zaio aurka egin.

2. Zerga Administrazioak, aurretiazko balorazio-prozedura baten barnean, egokitzat jotzen badu ukituak izan daitezkeen beste zerga administrazio batzuek auzia aztertzea, hala jakinaraziko die pertsona edo entitate lotuei. Tributudunaren adostasuna beharrezkoa izanen da auzia beste administrazioari jakinarazi ahal izateko.

3. Prozedura hasteko eskabidearekin batera, tributudunak erregelamendu honen 21. artikuluan aipatutako agiriak aurkeztu beharko ditu.

B) Tramitazioa.

1. Beste zerga administrazio batzuekiko harremanetan, pertsona edo entitate lotuek balorazio-proposamenarekin zerikusia duten datu, txosten, aurrekari eta frogagiri guztiak aurkeztu beharko dituzte.

Tributudunek akordioa zehaztea helburu duten jarduketetan parte hartzen ahalko dute, bi zerga administrazioen ordezkariek hala hitzartzen dutenean.

2. Zerga administrazioen akordio-proposamena subjektu interesdunei jakinaraziko zaie eta horien adostasuna beharrezkoa izanen da esku hartzen duten administrazioen arteko akordioa sinatu ahal izateko.

Akordio-proposamenari aurka egiteak balorazio-proposamenaren ezespena ekarriko du.

C) Ebazpena.

Akordio-proposamena onartuz gero, Nafarroako Zerga Ogasuneko zuzendari kudeatzaileak akordioa sinatuko du beste zerga administrazioarekin, eta interesdunei ale bana igorriko zaie.

Prozedura hasi eta instruitu eta beste zerga administrazioekin behar diren harremanak ezartzea Zuzeneko Zerga, Zehapen eta Errekerimenduen Zerbitzuari edo Zeharkako Tributu eta Enpresa Handien Zerbitzuari egokituko zaio, kasu bakoitzean esleituak dituzten eginkizunen arabera.

D) Beste zerga administrazio baten eskaera.

Beste zerga administrazio batek, pertsona edo entitate lotuen artean egindako eragiketak baloratzeko akordioa sinatu nahian, Foru Komunitateko Zerga Administrazioari horretarako prozedura hasteko eskatzen badio, artikulu honetan ezarritako arauak beteko dira, aplikagarriak diren heinean.

I. TITULUA BIS. KENKARIA, INGURUNEA ZAINDU ETA HOBETZEAGATIK

28. bis artikulua. Errepide bidezko garraiorako ibilgailu industrial edo komertzialak.

1. Zergari buruzko Foru Legeko 69.2 artikuluari jarraikiz, subjektu pasiboek zilegi izanen dute errepide bidezko ibilgailu industrial edo komertzial berriak erosteko egindako gastuaren 100eko 15 kentzea kuota likidoari, baldin eta, diesel motorra edo txinparta bidez pizten dena izanik, gas natural edo petrolio-gas likidotu bidez elikatua, gasak, partikula kutsagarriak eta keak botatzeari buruz 88/77/EE Zuzentarauan ezarritako baldintzak betetzen badituzte.

Kenkari hori finantza errentamendu bidez eskuraturiko ondasunetan ere aplikatuko da. Kasu horretan, inbertsioa kontratua sinatzen den egun berean egin dela ulertuko da eta ondare-elementuaren eskurako balio bera izanen du. Kenkaria aplikatzea erosteko aukera baliatzearen baldintzapean egonen da, ezinbestean. Hortaz, aukera hori baliatzen ez bada, subjektu pasiboak, aukera hori eskueran izan duen zergaldiari dagokion kuotaz gainera, aplikatu zaion kenkariaren zenbatekoa ere itzuli beharko du, berandutza korrituak barne, bidezko zehapenak deusetan galarazi gabe.

2. Ondorio horietarako, ondoko hauek hartzen dira ibilgailu industrial edo komertzialtzat:

a) Ibilgailuen Erregelamendu Orokorra onesten duen abenduaren 23ko 2822/1998 Errege Dekretuaren II. eranskinean ondoko definizio hauek dituztenak: kamioiak, furgoi eta furgonetak; autobusak edo autokarrak, artikulatuak edo ez, bi pisukoak barne; ibilgailu egokituak, eta ibilgailu misto moldagarriak eta kamioi traktoreak.

Kamioi traktoreetarako inbertsioak dagokien atoi-erdiarekin batera egiten baldin badira, aldi berean edo zergaldi berean, ibilgailu industrialtzat hartuko dira, artikulu honetan ezarritako kenkaria aplikatzeko.

b) Bidaiarien zerbitzu publikorako autoak, taximetroa badute.

c) Pertsona eri edo istripua izandakoak garraiatzeko egokitutako ibilgailuak.

3. Kenkaria kalkulatzeko 100eko 50 aplikatuko zaio ibilgailuaren prezioari.

Ondoren azaltzen diren emisio balore gehienekoak betetzen dituzten ibilgailuak badira, portzentajea 100eko 100ekoa izanen da:

a) 2001eko urriaren 1a baino lehen erositako ibilgailuentzat, 88/77/EE Zuzentarauaren I. eranskineko 6.2.1 ataleko tauletako A lerroan ezarritako baloreak. Aipatu Zuzentaraua 1999ko abenduaren 13ko 1999/96/EE Zuzentarauaren bidez aldatu zen.

b) Taula horietako B1 lerroan ezarritakoak, 2001eko urriaren 1etik aurrera eta 2006ko urriaren 1a baino lehen erositako ibilgailuak baldin badira.

c) Taula horietako B2 lerroan ezarritakoak, 2006eko urriaren 1etik aurrera eta 2009ko urriaren 1a baino lehen erositako ibilgailuak baldin badira.

28. artikulua ter. Ikerketa zientifikoaren eta berrikuntza teknologikoarenen arloetako jarduerak egiteagatiko kenkariak.

Zergari buruzko Legearen 66. artikuluaren 5. eta 6. zenbakietan ezarri denaren arabera, ikerketa zientifikoaren eta berrikuntza teknologikoaren arloetako jarduerak egiteagatiko kenkariak lortu nahi dituzten subjektu pasiboek proiektu banakatuak aurkeztu behar dituzte, eta horiekin batera, horiek azaltzeko memoriak.

Aipatu dokumentazioa Berrikuntza, Enpresa eta Enplegu Departamentuak aztertuko du, txostena egin dadin, jarduera horiek kenkaria izateko beharkizunak eta baldintzak betetzen ote dituzten.

Subjektu pasiboak aukeran du aipatu dokumentazio hori zergaren aitorpen-likidazioarekin batera aurkeztea, eta horrela egiten badu, Ekonomia eta Ogasun Departamentuak dokumentazio hori Berrikuntza, Enpresa eta Enplegu Departamentuari igorriko dio, aurreko lerroaldean aipatutako txostena egin dezan; edo, bestela, subjektu pasiboak zuzenean eska diezaioke txostena azken departamentu horri eta, gero, une egokian, txostena zergaren aitorpen-likidazioari gehitu beharko zaio.

Eskabide-ereduari eta aurkeztu behar den dokumentazioaren edukiari dagokionez, ikerketa eta garapenerako eta berrikuntzarako laguntzen erregimena onetsi duen azaroaren 20ko 360/2000 Foru Dekretuko 8. artikulukoa erabiliko da, hain zuzen ere 1. atalean azaltzen dena.

28. artikulua quater. Ikerketa zientifikorako eta berrikuntza teknologikorako proiektuen gastuak aldez aurretik baloratzea.

1. Ikerketa zientifikoko edo berrikuntza teknologikorako lanak egin behar dituzten subjektu pasiboek Ekonomia eta Ogasun Departamentuari eskatzen ahalko diote gastuak aldez aurretik eta modu lotzailean balora ditzala, Sozietateen gaineko Zergako arauei jarraituz, proiektu horiek zergari buruzko foru legeko 66. artikuluan aipatzen den kenkarirako bide ematen badute.

2. Eskabidea idatziz aurkeztu beharko da. Izkribu hori kasuan kasuko gastuak egin atzin aurkeztu beharko da. Kontu hauek bilduko ditu:

a) Subjektu pasiboaren nortasuna.

b) Eskabidean aipatzen den ikerketa zientifikorako edo berrikuntza teknologikorako proiektuaren ezaugarriak eta azalpena, honakoak adieraziz: egitekoak diren jarduerak, horiek egiteko gastu kontzeptuak eta jarduerak egiteko egutegia.

c) Eginen diren gastuen balorazioaren proposamena, erabiliriko balorazio erregela eta kontuan harturiko inguruabar ekonomikoak adieraziz.

3. Zerga Administrazioak aurreko idatz-zatian aipatzen diren agiriak aztertuko ditu eta eskatzaileari eskatzen ahalko dizkio eskabideari lotutako datu, txosten, aurrekari eta agiri guztiak. Agiri horiek Berrikuntza, Enpresa eta Enplegu Departamentura igorriko dira, Zergari buruzko Foru Legearen 66. artikuluan ezarritako eta horrekin bat 28 ter artikuluan garatutako kenkarirako bide ematen duten gastuen balorazioa egin dadin. Zerga Administrazioak eta subjektu pasiboek perituen txostenak eramaten ahalko dituzte prozedurara, balorazioaren proposamenaren edukiari lotuak badira.

 4. Prozedura bukatutzat ematen duen ebazpenak aukera hauek izanen ditu:

a) Eskatzaileak hasiera batez aurkezturiko proposamena aurkeztea.

b) Eskatzaileak prozedurak diraueino aurkezturiko bestelako proposamen bat aurkeztea.

c) Eskatzaileak aurkezturiko proposamena ezestea.

Ebazpena arrazoitua izanen da eta, onestekoa bada, zerga administrazioak sozietateen gaineko zergari buruzko arauei jarraituz eginiko balorazioa bilduko du. Halaber, indarraldia ere adieraziko du, hiru urtetik gorakoa izanen ez dena.

5. Prozedura sei hilabeteko epean bukatu beharko da, eskabidea aurkezten denetik hasita, salbu eta erregelamendu honetako hirugarren xedapen gehigarrian aipatzen den kasuren bat gertatzeagatik bertan behera uzten bada.

Adierazi diren epeetan espresuki ebazpenik eman ezik, ulertuko da subjektu pasiboak eginiko balorazioaren proposamena ezetsi dela.

6. Ebazpenaren aurka ezin izanen da errekurtsorik jarri, baina geroago, ebazpenean ezarritako balioak aplikatuz egiten diren likidazioen aurka bidezkoak diren errekurtso eta erreklamazioak jartzen ahalko dira.

7. Zerga Administrazioak ebazpenetik ondorioztatzen den gastuen balorazioa aplikatu beharko du ebazpenaren indarraldian, legeria aldatu edo balorazioaren oinarri izandako inguruabar ekonomikoak nabarmen aldatzen ez diren artean.

8. Eskatzaileak aurkeztutako agiriek prozedura honetan soilik izanen dituzte ondorioak eta prozedura honetarako baizik ez dira erabiliko.

9. Espresuki onesteko eskumena Nafarroako Zerga Ogasuneko zuzendari kudeatzaileari dagokio.

Prozeduraren instrukzioa Zuzeneko Zerga, Zehapen eta Errekerimenduen Zerbitzuak edo Zeharkako Tributu eta Enpresa Handien Zerbitzuak eginen du, esleituak dituzten eginkizunen arabera.

28. artikulua quinquies. Kenkaria, ingurumena zaindu eta hobetzeagatik

1. Ekonomia eta Ogasun Departamentuak ingurumena zaindu eta hobetzeko jardueren ondoriozko kenkaria espresuki onets dezan, zergari buruzko foru legeko 69. artikuluak xedatu bezala, subjektu pasiboak memoria bat aurkeztu beharko du, non eginiko inbertsioak zehaztu eta haiek erosteko prezioa edo ekoizteko kostua frogatuko baita. Enpresak berak erosi edo eraiki zitueneko data ere adieraziko da.

2. Espresuki onesteko eskumena Nafarroako Zerga Ogasuneko zuzendari kudeatzaileari dagokio.

Prozeduraren instrukzioa Zuzeneko Zerga, Zehapen eta Errekerimenduen Zerbitzuak edo Zeharkako Tributu eta Enpresa Handien Zerbitzuak eginen du, kasu bakoitzean dagozkien eginkizunen arabera, eta horretarako txostena eskatuko diote gaiaren arabera eskumena duen erakunde ofizialari.

Ebazpen proposamena, argibide eta txostenekin batera, subjektu pasiboari adieraziko zaio. Horrek hamar eguneko epea izanen du alegazioak eta egokitzat jotzen dituen agiriak aurkezteko. Izapide hau saihesten ahal da prozeduran ageri ez eta ebazpenean kontuan hartzen ere ez direnean interesatuak aipatutako egitateak, alegazioak eta frogak baizik.

Subjektu pasiboak noiznahi ere uzten ahalko du bere horretan eskabidea.

3. Prozedura sei hilabeteko epean bukatu beharko da, eskabidea aurkezten denetik hasita, salbu eta erregelamendu honetako hirugarren xedapen gehigarrian aipatzen den kasuren bat gertatzeagatik bertan behera uzten bada.

Aurreko lerroaldean aipatzen den epea berariazko ebazpenik jakinarazi gabe bukatzen bada, subjektu pasiboak aurkeztutako eskaera baietsitzat joko da.

 4. Prozedura bukatutzat ematen duen ebazpenaren aurka berraztertzeko errekurtsoa edo erreklamazio ekonomiko-administratiboa jarri ahalko da, hilabeteko epean, Tributuei buruzko abenduaren 14ko 13/2000 Foru Lege Orokorreko IV. Tituluko VII. Kapituluko 3. eta 4. ataletan ezarritakoari jarraikiz.

5. Onesteko eskabidea zer zergalditan nahi den kenkariak eragina izan dezan, huraxe bukatu baino lehen aurkeztu beharko da.

II. TITULUA. ARAUBIDE BEREZIAK

I. KAPITULUA. Atzerriko baloreen ukantzako erakundeen erregimena

29. artikulua. Aukeraren eta uko egitearen jakinarazpena.

1. Atzerriko baloreen ukantzako erakundeen erregimenaren aukera Ekonomi eta Ogasun Departamentuari jakinarazi behar zaio.

2. Erregimena jakinarazpena egin eta hurrengo zergaldiari aplikatuko zaio, eta baita horri uko egitea Ekonomi eta Ogasun Departamentuari jakinarazi aurretik bukatuko diren jarraiko zergaldiei ere.

II. KAPITULUA. Araubide berezia bat-egite, zatiketa, aktibo-ekarpen eta balore-trukeetarako eta sozietate europar edo sozietate kooperatibo europarrek egoitza soziala Europar Batasuneko estatu kide batetik bestera aldatzeko.

30. artikulua. Erregimen bereziko aukera. Jakinarazpena egin behar duten subjektuak. Jakinarazpenaren edukia.

1. Zergari buruzko Foru Legearen X. tituluko IX. kapituluan ezarri den aukeraren aplikazioak aurrez hautatzea eskatzen du, hau da, Foru Legearen 146. artikuluaren 1. zenbakian ezarri dena betez.

Aukera hori, kapitulu horretan ezarri diren terminoetan, Ekonomi eta Ogasun Departamentuari jakinarazi behar zaio.

Aukera horren jakinarazpena eragiketa dokumentatuko den eskritura publikoa egin eta hurrengo hiru hilen barruan eginen da. Baldin eta inskripzioa ez bada beharrezkoa, epea eragiketa dokumentatuko duen eskritura publikoa emanen den datatik zenbatuko da eta, horretan, Zergari buruzko Legearen 146. artikuluaren 1. zenbakian ezarri denaren arabera, derrigorrez azalduko da aukeraren ekitaldia.

Egoitza soziala aldatzeko eragiketetan, jakinarazpena hiru hilabeteko epean egin beharko da, eragiketaren eskritura publikoa edo agiri baliokidea egoitza sozial berriko estatu kidearen erregistroan inskribatzen den egunetik hasita.

2. Jakinarazpena egin behar duten subjektu pasiboak ondoko hauek dira:

a) Fusio edo bananketa eragiketen kasuan, jakinarazpena eskuraketa egin duen erakundeak (edo erakundeek) egingo du.

Fusio edo bananketa eragiketen kasuan, eta ez erakunde eskualdatzaileak eta ez eskuratzaileak egoitza Espainian ez dutenean, eta baldin eta ez bada aplikagarria Foru Legearen 134. artikuluan adierazi den erregimena eskualdatzaileak ez duelako herri honetan kokatuta dagoen establezimendu iraunkorrik, erregimen bereziko aukera ukitzen den bazkide egoiliarrari dagokio.

b) Diruzkoak ez diren ekarpenak baldin badira, jakinarazpena erakunde eskuratzaileak (edo eskuratzaileek) egingo du.

Baldin eta ez badute zerga-egoitza Espainian eta ez badute establezimendu iraunkor baten bidez herri honetan jarduten, komunikazioaren zama eskuraketa egiten duen pertsona edo erakundearena izanen da.

c) Baloreen trukaketak diren eragiketen kasuan jakinarazpena erakunde eskuratzaileak egin behar du.

Ez baloreen eskuratzailea den erakundea eta ez titulu horiek eskuordetzen dituen kapitalaren jabea den erakundea Espainiako egoiliarrak ez direnean, erregimen bereziko aukera ukitzen den bazkide egoiliarrari dagokio.

d) Egoitza soziala aldatzeko eragiketetan sozietateak berak aurkeztuko du jakinarazpena.

3. Jakinarazpenean esku hartzen duten erakunde horien daturik adierazgarrienak emanen dira eta eragiketa hori deskribatuko da. Jakinarazpenarekin batera, hala denean, ondoko dokumentazioa aurkeztuko da:

a) Fusio edo bananketa kasuetan, fusio edo bananketa horren eskritura publikoa, hau da, dagoeneko Merkataritzako Erregistroan inskribatuta dagoena, eta baita merkataritzako arautegiaren arabera Erregistroan inskribatzeko derrigorrez aurkeztu behar diren gainerako dokumentuen kopia ere.

Baldin eta inskripzioa ez bada beharrezkoa, eragiketa dokumentatuko duen eskritura publikoaren kopia, hau da, Zergari buruzko Foru Legearen 146.1. artikuluan ezarri dena betez aukeraren betearazpena azalduko duena.

b) Diruzkoak ez diren ekarpenen kasuan, edota baloreak trukatu direnean, sozietatearen eraketaren edo kapital gehikuntzaren eskritura publikoaren kopia, eta baita merkataritzako arautegiaren arabera horrekin batera aurkeztu behar diren gainerako dokumentuen kopia ere.

Baldin eta ez bada beharrezkoa sozietatearen eraketaren edo kapital gehikuntzaren eskritura publikoa, eragiketa dokumentatzen duen eskrituraren kopia.

c) Baldin eta aurreko eragiketa horiek akzioak eskuratzeko eskaintza publikoaren bidez egin badira, horrelakoetan ere informazioa emateko bidezko liburuxkaren kopia aurkeztu behar da.

d) Egoitza soziala aldatzeko eragiketetan, eragiketa jasotzen duen eskritura publikoaren edo agiri baliokidearen kopia, eta helburuko estatu kidearen erregistroan inskripzioa egiteko aurkeztu behar diren gainerako agirienak.

4. Zergari buruzko Foru Legeko 139. artikuluko 3. zenbakiko bigarren paragrafoan aipatutako balizkoetan, erakunde eskuratzaileak bertan aipatutako kenkaria aplikatu den zergaldietako Sozietateen gaineko Zergaren aitorpena ez ezik jarraiko informazio hau ere aurkeztu behar du:

a) Erakunde eskualdatzailearen identifikazioa eta partaidetzaren portzentajea.

b) Erakunde eskualdatzailearen partaidetzen balioa eta erosketa eguna, bai eta partaidetza horiei dagozkien funts berekien balioa ere, urteko kontu homogeneizatuak oinarritzat hartuta kalkulatua.

c) Balorazio- eta denbora-homogeneizazioaren irizpideen justifikazioa, entitate eskualdatzaileak partaidetzak erostean ordaindu zuen prezioaren eta desegiten den egunean partaidetza horiei dagozkien funts berekiek duten balioaren arteko diferentzia entitate eskualdatzailearen ondasun eta eskubideei egotzi izanaren justifikazioa, eta, halaber, Zergari buruzko Foru Legearen 139. artikuluko 3. idatz-zatiko a) eta b) letretako baldintzak bete izanarena.

III. KAPITULUA. Zerga-bateratzeko erregimena

31. artikulua. Zerga-bateratzeko erregimeneko aukera.

Zerga-baterakuntzaren araubidea aukeratuz gero, horren berri eman behar zaio Ekonomi eta Ogasun Departamentuari.

Jakinarazpenak ondoko datu hauek izanen ditu:

a) Zerga-talde hori eratzen duten sozietateen identifikazioa.

Espainiako lurraldeko egoiliar ez den erakundea talde bateko nagusia bada eta establezimendu iraunkorrak baditu, zerga-taldeko sozietateak ez ezik Espainiako lurraldeko egoiliar ez den erakundea ere identifikatu behar da.

b) Zerga-talde horretako sozietateek zerga-bateratzearen erregimena hautatzeko erabakiaren kopia.

c) Sozietate nagusiak taldea eratzen duten gainerako sozietateekiko oro har eta banan-banan duen zuzeneko eta zeharkako esku hartzearen portzentajearen zerrenda, eta bidezko esku-hartzeen eskuraketen daten zerrenda.

Sozietate nagusiak Zergari buruzko Foru Legeko 117. artikuluan ezarri dena betetzen duela adierazi behar du.

IV. KAPITULUA. Interes ekonomikodun Europako eta Espainiako elkartzeen, enpresen aldi baterako batasunen eta ondare sozietateen araubide bereziak.

32. artikulua. Interes ekonomikodun Europako eta Espainiako elkartzeen eta enpresen aldi baterako batasunen betebeharrak.

1. Sozietateen gaineko Zergari buruzko Foru Legeko X. tituluko IV. kapituluan ezarritako araubide berezia aplikatu ahal zaien interes ekonomikodun Europako eta Espainiako elkartzeek, zerga horren aitorpenarekin batera, zergaldiko azken egunean egoitza Espainiako lurraldean duten bazkideen edo bazkidetasunari dagozkion eskubide ekonomikoak dituzten pertsonen edo erakundeen zerrenda aurkeztu behar dute, datu hauekin:

a) Bazkideen edo bazkidetasunari dagozkion eskubide ekonomikoak dituzten pertsonen edo erakundeen identifikazioa, zerga-egoitza eta partaidetza-portzentajea.

b) Kontzeptu hauei eratxiki beharreko kopuruen guztirako zenbatekoa:

1go. Kontabilitatearen emaitza.

2gn. Zerga-oinarria eta likidazio-oinarria.

3gn. Barruko eta nazioarteko zergapetze bikoitza saihesteko kenkariaren oinarria, errentak eman dituen erakundearen mota eta hango partaidetzaren portzentajea.

4gn. Hobarien oinarria.

5gn. Jarduera batzuetarako pizgarri diren kenkarien oinarria, eta, hala denean, aktibo finko material berrietan inbertitzearen ziozko kenkariaren oinarria.

6gn. Interes ekonomikodun elkartzeen atxikipenak eta konturako sarrerak.

c) Erreserben kargura banatutako mozkinen dibidendua eta partaidetzak; sozietateari araubide berezia ezin aplikatu izan zaion zergaldietakoak bereizi behar dira.

2. Interes ekonomikodun elkartzeek euren bazkideei, edo bazkidetasunari dagozkion eskubide ekonomikoak dituzten pertsona edo erakundeei, berariaz emandako ziurtagiriaren bidez jakinarazi behar diete guztira zenbat eratxikiko den aurreko zenbakiko b) letrako kontzeptuen zioz eta zenbat eratxikiko zaion bakoitzari.

3. Mozkinen dibidenduak eta partaidetzengatik zergarik ez ordaintzeko, Zergari buruzko Foru Legeko 107. artikuluko 3. zenbakiko lehen paragrafoan ezarrita dagoenari helduta, elkartzeek jarraian zehaztu den informazioa eman behar dute urteko kontuen memorian:

a) Erreserbetarako mozkinak, elkartzea araubide orokorrean egon den zergaldietan sortuak.

b) Erreserbetarako mozkinak, elkartzea araubide berezian egon den zergaldietan sortuak; bereiz ezarriko dira batetik Espainiako lurraldean egoitza duten bazkideei dagozkienak eta bestetik egoitza ez dutenei dagozkienak.

c) Erreserbetarako mozkinen dibidenduak eta partaidetzak banatuz gero, aurreko a) eta b) letretan aipatutako hiruetatik zein erreserba aplikatu den adierazi behar da, mozkin motaren arabera.

4. Urteko memoriako informazioa, aurreko zenbakian aipatutakoa, bertako b) letran aipatutako erreserbak dauden bitartean eman behar da, nahiz eta erakundea araubide berezian egon ez.

5. Artikulu honetako 3. eta 4. zenbakietan ezarritako informatu beharra aurreko 3. zenbakiko b) letran aipatutako erreserben titular diren erakundeek ere bete beharko dute.

6. Artikulu honetako aurreko zenbakietan xedatutakoa, aplikatu behar den heinean, Zergari buruzko Foru Legeko X. tituluko IV. kapituluan ezarritako araubide bereziari lotutako enpresen aldi baterako batasunak bete beharko dute, zergaldiko azken egunean Espainiako lurraldean egoitza duten batasuneko enpresei dagokienez.

32 bis artikulua. Ondare-sozietateen betebeharrak.

1. Zergari buruzko Foru Legearen 26. xedapen iragankorrean xedatutakoa betetzeko, ondare-sozietateek informazio hau eman behar dute urteko kontuen memorian:

a) Erreserbei aplikatutako mozkinak, zergak Zergari buruzko Foru Legearen X. tituluko II. kapituluan ezarritako araubideari, 2006ko abenduaren 31ko idazketaren araberakoari, ez beste bati jarraikiz ordaindu zituzteneko zergaldiei dagozkienak.

b) Erreserbei aplikatutako mozkinak, zergak araubide berezi horretan ordaindu zireneko zergaldiei dagozkienak.

c) Erreserbetarako mozkinen dibidenduak eta partaidetzak banatuz gero, aurreko a) eta b) letretan aipatutako bietatik zein erreserba aplikatu den adierazi behar da, mozkin motaren arabera.

2. Urteko memoriako informazioa aurreko zenbakiko b) letran aipatutako erreserbak dauden bitartean eman behar da, nahiz eta erakundea araubide berezi honetan egon ez.

3. Memorian, halaber, gastuak errenta-iturrien artean banatzeko egin diren kalkuluei buruzko informazio xehekatua ere adierazi behar da.

4. Artikulu honetako ezarritako informatu beharra aurreko 1. zenbakiko b) letran aipatutako erreserben titular diren erakundeek ere bete beharko dute.

V. KAPITULUA. Enpresak Sustatzeko Sozietateen Araubidea

32. ter artikulua. Enpresak Sustatzeko Sozietateen Araubidearen aplikazioa.

1. Zergari buruzko foru legeko 167. artikuluan arauturiko Enpresak Sustatzeko Sozietateen Araubidean sartu nahi duten subjektu pasiboek eskabide bat aurkeztu beharko dute Ekonomia eta Ogasun Departamentuan.

2. Aurreko idatz-zatian aipatzen den eskabidea idatziz eginen da eta gutxienez ere kontu hauek bilduko ditu:

a) Subjektu pasiboaren nortasuna.

b) Sozietatearen xedearen azalpena.

c) Egin nahi diren eragiketen adierazpen zehatza.

d) Harpidetu eta pagaturiko kapitalaren zenbatekoak.

3. Prozeduraren gainean ebazteko ahalmena Ekonomia eta Ogasun kontseilariari dagokio.

Nafarroako Zerga Ogasuneko zuzendari kudeatzaileak emanen die hasiera prozedurei. Zerbitzuak behar dituen argibide eta agiriak eskatzen ahalko dizkio subjektu pasiboari. Halaber, Nafarroako Zerga Ogasuna erakunde autonomoko zerbitzuei, Ekonomia eta Ogasun Departamentuari eta Nafarroako Foru Komunitateko Administrazioko departamentuei komenigarritzat jotzen dituen txostenak eskatzen ahalko dizkie.

Ebazpen proposamena, argibide eta txostenekin batera, subjektu pasiboari adieraziko zaio. Horrek hamar eguneko epea izanen du alegazioak eta egokitzat jotzen dituen agiriak aurkezteko. Izapide hau saihesten ahal da prozeduran ageri ez eta ebazpenean kontuan hartzen ere ez direnean interesatuak aipatutako egitateak, alegazioak eta frogak baizik.

Subjektu pasiboak noiznahi ere uzten ahalko du bere horretan eskabidea.

4. Prozedura sei hilabeteko epean bukatu beharko da, eskabidea aurkezten denetik hasita, salbu eta erregelamendu honetako hirugarren xedapen gehigarrian aipatzen den kasuren bat gertatzeagatik bertan behera uzten bada.

Aurreko lerroaldean aipatzen den epea espresuki ebazpenik eman gabe bukatzen bada, eskabidea ezetsitzat joko da.

III. TITULUA. ATXIKIPENA ETA KONTU-SARRERA EGITEKO BEHARRA

33. artikulua. Atxiki edo kontu-sarreraren menpean dauden errentak.

1.-Atxikipena egin beharko da, hartzaileari dagokion Sozietateen gaineko Zergaren kontu-sarrera modura, kopuru hauek daudenean:

a) Edozein motako erakundeen berariazko fondoetako partaidetzetatik, norberaren kapitalak beste batzuei lagatzetik eratorritako errentak, eta Pertsona Fisikoen Errentaren gaineko Zergari buruzko Foru Legearen 23. artikuluan jasotako gainerakoetatik eratorritakoak.

b) Joko, lehiaketa, zozketa edo zorizko konbinazioetan parte hartzetik eratorritako sariak, ondare, produktu edo zerbitzu zehatzen eskaintza, sustapen edo salmentarekin lotuta egon ala ez.

c) Beste sozietate batzuetan administratzaile- edo aholkulari-karguak hartzetik lortutako kontraprestazioak.

d) Irudiaren ustiapen-eskubidea lagatzetik edo hori erabiltzeko onarpen edo baimenetik eratorritako errentak, ustiapen ekonomikoetatik eratorritako diru-sarrerak izan arren.

e) Hiri-ondare higiezinak alokatu edo berrakuratzetik eratorritako errentak, ustiapen ekonomikoetatik eratorritako diru-sarrerak izan arren.

f) Inbertsio kolektiboko erakundeen kapitala edo ondarea adierazten duten akzio edo partaidetzak trasnmititzetik edo itzultzetik lortutako errentak.

g) Inbertsio Kolektiboko Erakundeei buruzko Legean araututako karga tasa orokorra jasaten ez duten kapital aldakorreko inbertsio sozietateek, edo horien entitate parekatuek, beste estatu batean erregistratuta daudenek, eta higigarrien baloreetako inbertsio kolektiboko erakunde batzuei buruzko lege, arau eta administrazio xedapenak koordinatu dituen Europako Parlamentuaren eta Kontseiluaren 2009ko uztailaren 13ko 2009/65/EE Zuzentarauaren itzalpean dauden sozietateek kapitala murriztearen bitartez ekarpenak itzulita edo jaulkipen primak banatuta lortzen diren errentak, inbertitzaileen multzo murriztuak direla eta akzioak eskuratzeko, lagatzeko edo erreskatatzeko dituzten mugak gorabehera.

2. Kontratu batek zerbitzu emateak edo ondasun higiezinen lagapena biltzen dituenean Pertsona Fisikoen Errentaren gaineko Zergari buruzko Foru Legearen 30. artikuluko 3. idatz-zatian sartutako ondasun eta eskubideen lagapenarekin, atxikipena zenbateko osoaren gainean egin beharko da.

Kontratu batek landa finken errentamendu, azpierrentamendu edo lagapena biltzen dituenean beste ondasun higigarri batzuenekin, ez da eginen atxikipenik negozio edo meatzeen errentamendu edo lagapena ez bada."

3.-Aurreko zenbakietan aiptatutako errentak jenerotan ordaintzen direnean, hartzaileari dagokion Sozietateen gaineko Zergaren kontu-sarrera egin beharko da.

4.-Araudi honetan aurreikusitakoaren ondorioetarako, atxiki-egileari buruz egindako oharrak kontu-sarrerak egin behar dituenari buruz ere egin direla ulertuko da.

34. artikulua. Atxikipena eta kontu-sarrera egiteko beharrizanaren salbuespenak.

Kopuru hauek daudenean ez da atxiki edo kontu-sarrera egiteko beharrik izango:

1.-Espainiako Bankuak jaulkitako balioen etekinak, diru-merkatuan parte hartzea arautzen duten tresna badira, eta Altxor-letren etekinak.

Hala ere, euren bezeroekin Altxor-letren gaineko eragiketetan oinarritutako kontu finantzarioen kontratuak egiten dituzten kreditu-erakundeek eta gainerako erakunde finantzarioek atxiki egin beharko dute kontu horien titularrek lortutako etekinetan.

2.-Altxorraren aldeko eskubidea diren korrituak, Estatuak kreditu ofizialari egindako maileguen kontraprestazio modura.

3.-Maileguen korrituak eta komisioak, Espainiako Bankuaren erregistro berezietan inskribatuta dauden kreditu-erakunde eta kreditu-establezimendu finantzarioen diru-sarrera direnean. Erakunde eta establezimendu horiek Espainiako lurraldean egon beharko dute. Maileguen korrituak eta komisioak, kapitalaren zatirik handiena Foru Erkidegoko administrazioan daukaten sozietate finantzarioen diru-sarrera direnean.

Aurreko salbuespena ez zaie aplikatuko erakunde publiko edo pribatuek, naziokoak edo atzerrikoak, jaulkitako obligazio, bonu edo tituluen korritu eta etekinei, aipatutako erakundeen balio-karteran daudenean.

4.-Partaidetza Industrialen Estatuko Sozietateak eta beste sozietate batzuek, horietako kapitalean partaidetza nagusia edukiz gero, gauzatzen dituzten mailegu-, kreditu- edo aurrerakin-eragiketen korrituak, nahiz eta eragiketa horiek aktiboak edo pasiboak izan. Salbuespen hori ezin da zedula, obligazio, bonu edo antzeko beste titulu batzuetara zabaldu.

5. Balore Merkatuari buruzko uztailaren 28ko 24/1988 Legearen 63. artikuluko 2. idatz-zatiko b) letrak aipatzen dituen baloreak erosi edo saltzeko eragiketetarako emandako kredituen ondorioz balore sozietateek eskuratutako korrituak, hala nola Inbertsio zerbitzuetako enpresen eta inbertsio zerbitzuak ematen dituzten gainerako entitateen araubide juridikoari buruzko otsailaren 15eko 217/2008 Errege Dekretuaren 29. artikuluko 2. idatz-zatian aipatzen diren mailegu edo gordailu eragiketa aktiboen ondorioz balore sozietate eta agentziek eskuratutako korrituak.

Era berean, ez da atxikipenik egin beharko Balio Sozietate edo Agentziek jasotako korrituengatik, gerokoen eta aukera finantzarioen merkatuetako kide modura eragiketak egiteko bermeen kontraprestazioengatik direnean. Hori guztia, gerokoen eta aukeren merkatuak arautzen duen abenduaren 20 1814/1991 Errege Dekretuaren III. eta IV. kapituluetan jasotako baldintzetan.

6.-Obligazioak akzio bihurtzearren emandako sariak.

7. 33.1.g) artikuluan aipatzen direnak ez beste entitate batzuek akzioen edo partaidetzen jaulkipen primak banatuta sortzen diren errentak.

8.-Espainian dagoen jatorriko sozietate batek Europako Batasuneko beste estatu batzuetan dauden sozietate filialengandik jasotako mozkinak, 35. artikuluaren 2. zenbakian aurreikusitako atxikipenari dagokionez, araubide komuneko legeetan horretarako ezarritako baldintzak betetzen direnean.

9.-Interes ekonomikoa daukan elkarte espainol edo europar bat eta bere bazkideen artean eska daitezkeen etekinak, bai eta behin-behineko elkarketa bat eta bere kide diren enpresen artean eska daitezkeenak ere.

10.-Partaidetza hipotekario, mailegu edo kredituko beste eskubide batzuen etekinak, titulizazio-fondoen diru-sarrera direnean.

11.-Atzerrian dauden kontuen etekinak, Espainian dauden kreditu-erakunde eta establezimendu finantzarioek atzerrian dauzkaten establezimendu iraunkorrek ordaindutakoak direnean.

12.-Mozkin, korritu eta gainerako etekinetako dibidenduak edo partaidetzak, sozietate-taldeen araudian tributatzen duen talde bateko kide diren sozietateen artean ordaindu direnean.

13. Interes ekonomikodun Espainiako eta Europako elkartzeek eta enpresen aldi baterako batasunek banatutako mozkinen dibidenduak edo partaidetzak, Zergari buruzko arau orokorren arabera ordaindu behar dutenenak izan ezik, zerga-oinarriaren eratxikipena jasan behar duten bazkideei dagozkienak eta erakundea Zerga Foru Legeko X. tituluko IV. kapituluko araubide berezian xedatutakoaren arabera ordaindu duen zergaldietan sortuak.

14.-Salbuetsita dauden erakundeek, hau da, Zergari buruzko Foru Legearen 12. artikuluan jasotakoek, lortutako errentak.

Erakunde batek salbuetsita dagoela agertzeko, legez onartutako edozein frogaren bitartez egiazta daiteke.

15.-Mozkinen dibidenduak edo partaidetzak, Zergari buruzko Foru Legearen 59.2. artikuluan aipatutakoak.

Zenbaki honetan ezarritakoaren ondorioetarako, hartzaile den erakundeak atxikipena egin behar duen erakundeari jakinarazi beharko dio artikulu horretan ezarritako baldintzak bete direla. Hartzailearen identifikazio-datuez gain, aipatutako baldintzak bete izana egiaztatzen duten agiriak edukiko ditu jakinarazpenak.

16.-Hiri-higiezinen alokairu eta berrakuratzetik eratorritako etekinak, honako kasuetan:

a) Enpresek euren langileentzako etxebizitzak alokatzen dituenean.

b) Etekinak alokairu finantzarioko kontratuetatik datozenean, hain zuzen ere Kreditu Erakundeen Disziplina eta Parte Hartzeari buruzko uztailaren 29ko 26/1988 Legearen zazpigarren xedapen gehigarriko lehen atalean aipatutakoetatik, hiri-higiezinak alokatzen badira.

17.-Sozietateen gaineko Zergaren subjektu pasiboek eskuratutako errentak, aktibo finantzarioetatik sortzen direnean, eta baldintza hauek betetzen badituzte:

1. Kontu-oharpenen bidez adierazita egotea.

2. Espainiako bigarren mailako balio-merkatu ofizial batean negoziatzea.

Hala ere, euren bezeroekin aktibo finantzarioen gaineko eragiketetan oinarritutako kontu-kontratuak egiten dituzten kreditu-erakundeek eta gainerako erakunde finantzarioek kontu horien titularrek lortutako etekinengatik atxiki beharko dute.

Zenbaki honetan aipatutako balioen korrituak ordaintzeko erabiltzen diren erakunde finantzarioek, bai eta balio horien transmisio, amortizazio edo itzulketan parte hartzen badute ere, balioaren titularrari egotzi dakiokeen etekina kalkulatu beharko dute. Era berean, titularrari eta Ekonomia eta Ogasun Kontseilaritzari eman beharko diete kalkulu horren berri. Kontseilaritza horri, halaber, lehen aipatutako eragiketetan parte hartzen duten pertsonen datuak emanen dizkiote.

Ekonomia eta Ogasun Kontseilariak ezarriko ditu Zor Publikoaren balioen banaketa, transmisio, berreratze, itzulketa edo amortizazioei dagozkien bitartekotza- eta informazio-betebeharrak, horietarako nagusitik eta kupoietatik banandutako negoziazioa baimendu bada. Kasu horietan, Oharpenetako Zor Publikoaren Merkatuko erakunde kudeatzaileek titular bakoitzari egotzi dakiokeen etekina kalkulatu beharko dute. Horren berri emanen diete titularrari eta Ekonomia eta Ogasun Kontseilaritzari. Kontseilaritza horri, halaber, balio horien gaineko eragiketetan parte hartzen duten pertsonen datuei buruzko informazioa emanen diote.

18. Aurreko artikuluko 1. idatz-zatiko b) letran aipatutako sariak, haien atxikipen oinarria gehienez 300,51 euro denean.

19. Sozietateen gaineko Zergaren subjektu pasiboek lortutako etekinak, OCDEko kide diren herrietako administrazio publikoek jalkitako Zor Publikotik edo aipatu herrietan antolatutako merkatuetan negoziaturiko finantza aktiboetatik heldu direnak.

Hala ere, euren bezeroekin aurreko idatz-zatian aipatu finantza aktiboen gaineko eragiketetan oinarritutako kontu-kontratuak egiten dituzten kreditu-erakundeak eta gainerako erakunde finantzarioak kontu horien titularrek eskuratutako etekinak atxikitzera behartuta daude.

Finantza aktibo horien transmisioan, amortizazioan edo itzulketan parte hartzen duten erakunde finantzarioek balioaren titularrari aplika dakiokeen etekina kalkulatzeko beharra daukate, eta horren berri emanen diote titularrari eta Zerga Administrazioari. Azken horri, era berean, aipatutako eragiketetan parte hartzen duten pertsonen datuak emanen dizkiote.

Ahalmena ematen zaio Ekonomi eta Ogasun kontseilariari, artikulu honetan arautatako atxikipenetatik salbuesteko prozedura jartzeko.

20. Talde inbertsioko erakundeen kapitala edo ondarea ordezkatzen duten akzio nahiz partaidetzak eskualdatuz edo itzuliz lortzen diren errentak, horien hartzaileak honakoak direnean:

1. Finantza izaerako inbertsio funtsak eta kapital aldakorreko inbertsio sozietateak, talde inbertsioko erakundeei buruzko azaroaren 4ko 35/2003 Legean arautuak, baldin eta beren kudeaketa erregelamenduetan edo estatutuetan ezarrita badute beren ondarearen ehuneko 50etik gorako inbertsioa egitea talde inbertsioko erakundeei buruzko azaroaren 4ko 35/2003 Legearen Erregelamenduaren (azaroaren 4ko 1309/2005 Errege Dekretuak onetsia) 36.1 artikuluko c) eta d) paragrafoetan aurreikusten diren talde inbertsioko erakundeetako batzuetan.

2. Finantza izaerako inbertsio funtsak eta kapital aldakorreko inbertsio sozietateak, talde inbertsioko erakundeei buruzko azaroaren 4ko 35/2003 Legean arautuak, baldin eta beren kudeaketa erregelamenduetan edo estatutuetan ezarrita badute beren ondarearen ehuneko 80ko inbertsioa egitea, gutxienez ere, talde inbertsioko erakundeei buruzko azaroaren 4ko 35/2003 Legearen Erregelamenduaren (azaroaren 4ko 1309/2005 Errege Dekretuak onetsia) 3.3 artikuluko lehen tartekian arautzen diren finantza izaerako inbertsio funtsetako bakar batean.

Baldintza hau bete behar da 20. zenbaki honetan ezarrita dagoen moduan atxikipena egin beharrik ez izateko: erakunde inbertsiogilea sailkaturik egotea Balore Merkatuko Batzorde Nazionalak aurreko 1. eta 2. zenbakietan aipatzen diren inbertsio motetarako ezarria duen kategorian, eta hala agertzea haren informazio liburuxkan.

21. Pentsio Planen aseguruak direla eta, aseguru entitateek pentsio fondoetarako ordaindutako zenbatekoak.

22. Bizi-aseguruen hornidurak inbertitu diren aktiboak trukatuz lortutako errentak, inbertsioaren arriskua hartzaileak bereganatzen duenean.

Aurreko lerroaldean xedatutakoa aplikatzeko, aseguru entitateek, aktiboen eskualdaketa edo itzulketa dela eta, atxikipena aplikatu behar duten entitateei jakinarazi behar diete aseguruaren hartzaileak bereganatu duela inbertsioaren arriskua eta Pertsona Fisikoen Errentaren gaineko Zergari buruzko Foru Legearen 78.9 artikuluan ezarritako betekizunak betetzen direla. Atxikipena aplikatu behar duen erakundeak jakinarazpena gorde beharko du, behar bezala sinaturik.

23. Inbertsio Kolektiboko Erakundeei buruzko 35/2003 Legearen Erregelamenduaren 49. artikuluan araututako funts eta sozietateetako partaidetza edo akzioen errenboltsotik edo eskualdaketatik datozen errentak; erregelamendu hori azaroaren 4ko 1309/2005 Errege Dekretuaren bidez onetsi zen.

24. Hirugarrenei lagatako ondare-elementuetatik alderdi politikoek lortutako errentak, besteak beste sozietateen mozkinetako partaidetzak eta dibidenduak, interesak, kanonak eta alokairuak, bai eta talde inbertsioko erakundeen akzio eta partaidetzak eskualdatuz edo itzuliz lortutako ondare-gehikuntzak ere.

Akreditazioa, atxikipena eta konturako sarrera egin beharrik ez izateko, Ekonomia eta Ogasun Departamentuak luzatutako ziurtagiriaren bidez eginen da. Ziurtagiri hori eskatzen denean, Barne Arazoetako Ministerioko Alderdi Politikoen Erregistroan inskribatu izanaren ziurtagiriaren kopia aurkeztu beharko da.

Ziurtagiri horrek esan beharko du bere indarraldia ematen den egunean hasten dela eta eskatzailearen zergaldiarekin batera amaituko dela.

35. artikulua. Atxikipena egin edo kontu-sarrera egin behar duten subjektuak.

1. Atxikipena egin eta Nafarroako Foru Ogasunean diru-sarrera egitera behartuta daude honakoak, Hitzarmen Ekonomikoan ezarritako irizipideekin bat etorriz, 33. artikuluan aurreikusitako errentei dagokienez:

a) Pertsona juridikoak eta gainerako erakundeak, bai eta ondasun-elkarteak, jabeen elkarteak eta errenten egozte-araudia daukaten erakundeak.

b) Enpresari banakoak eta profesionalak, euren enpresa-jarduera edo jarduera profesionalengatik errentak ordaintzen dituztenean.

c) Espainian ez dauden pertsona fisikoak, juridikoak eta gainerako erakundeak, bertan dagoen establezimendu iraunkor baten bidez jarduten dutenean.

2. Ez da joko pertsona edo erakunde batek errenta bat ordaintzen duela ordainketaren bitartekotza soila egiten duenean. Horrela ulertuko da hirugarren baten kontura eta haren aginduz kopuru bat ordaintzen badu, Espainian bizi direnek jabetzan dauzkaten atzerriko balioen erakunde gordailuzainak direnean edo balio horien errenten kobrantza egiteko kudeaketaz arduratzen direnean izan ezik. Erakunde gordailuzain horiek atxikipen egokia egin beharko dute, errenta horiek ez badute aldez aurretik atxikipenik izan Espainian.

3. Sarien kasuan, ordaintzen dituen pertsona edo erakundeak egin beharko du atxikipena edo kontu-sarrera.

4. Aktibo finantzarioen gaineko eragiketetan, honakoak daude atxikipena egitera behartuta:

a) Aktibo finantzarioen amortizazioan edo itzulketan lortutako etekinen kasuan, horiek jaulki dituen pertsona edo erakundea. Hala ere, eragiketa horiek gauzatzea erakunde finantzario bati eskatzen bazaio, eragiketaren ardura daukan erakunde finantzarioak egin beharko du atxikipena.

Jaulkipenaren ondoren aktibo finantzario bihurtu diren igorpen-tresnak direnean, epemugan atxikipena egin beharko duena ordainketa-aurkezpenean parte hartzen duen fede-emailea edo erakunde finantzarioa izanen da.

b) Aktibo finantzarioen transmisioan lortutako etekinetan, aurreko letran aipatu diren igorpen-tresnak barne direlarik, erakunde finantzario bat edo bat baino gehiagoren bidez bideratzen denean, transmisio-egilearen kontura ari den bankua, kutxa edo erakunde finantzarioa.

Letra honetan ezarritakoaren ondorioetarako, transmisio-egilearen kontura ari dela ulertuko da bankuak, kutxak edo erakunde finantzarioak harengandik hartzen badu etekin inplizitudun aktibo finantzarioak saltzeko agindua.

c) Aurreko letretan jaso ez diren kasuetan, eragiketan derrigorrez parte hartu behar duen fede-emaile publikoa.

5. Zor Publikoaren balioen transmisioetan, transmisioan parte hartzen duen Oharpenetako Zor Publikoaren Merkatuaren erakunde kudeatzaileak egin beharko du atxikipena.

6. Talde inbertsioko erakundeen kapitala edo ondarea ordezkatzen duten akzio nahiz partaidetzak eskualdatu edo itzultzen direnean, ondoko pertsona eta entitate hauek atxikipena edo konturako sarrera egin beharko dute:

1. Inbertsio funtsetako partaidetzak itzultzen direnean, sozietate kudeatzaileek.

2. Kapital aldakorreko inbertsio sozietate batek, ez burtsan ez baloreen negoziaziorako beste inongo merkatu edo sistema antolatutan kotizatzen ez duten akzioak dituenak, atzera erosten baditu subjektu pasiboak zuzenean edo merkaturatzailearen bidez berari erosi zizkion akzioak, sozietateak berak, salbu eta sozietate kudeatzaileren batek esku hartzen duenean; azken kasu horretan, sozietate kudeatzaileak.

3. Talde inbertsioko erakundeak egoitza atzerrian baldin badu, entitate merkaturatzaileek edo haien akzio nahiz partaidetzak merkaturatzeko ahalmena duten bitartekariek, eta, subsidiarioki, baloreak harpidedunen artean banatzeko ardura duten entitateek, itzulketa egiten dutenean.

4. Zerbitzuak aske emateko araubideari loturik diharduten kudeatzaileen kasuan, Zergari buruzko Foru Legearen hemeretzigarren xedapen gehigarriko 2. idatz-zatian eta talde inbertsioko erakundeei buruzko azaroaren 4ko 35/2003 Legearen 55.7 artikuluan aipatzen den ordezkariak.

5. Aurreko zenbakietan ezarritakoaren arabera atxikipenik egin behar ez den kasuetan, eskualdaketa egin edo itzulketa lortzen duen bazkide edo partaideak konturako ordainketa egin beharko du. Konturako ordainketa hori erregelamendu honen 37.4, 38.3 y 39.1 artikuluetako arauei jarraituz eginen da.

7. Inbertsio Kolektiboko Erakundeei buruzko Legean araututako kapital aldakorreko inbertsio sozietateek, karga tasa orokorra jasaten ez dutenek, kapitala murrizten badute ekarpenak itzultzeko edo jaulkipen primak banatzen badituzte, atxikipena edo konturako sarrera aplikatu behar dute.

Eragiketa Europako Parlamentuaren eta Kontseiluaren 2009ko uztailaren 13ko 2009/65/EE Zuzentarauak (higigarrien baloreetako inbertsio kolektiboko erakunde batzuei buruzko lege, arau eta administrazio xedapenak koordinatu dituenak) araututako inbertsio kolektiboko erakunde batek egin badu, hain zuzen ere Europar Batasuneko estatu batean eratu eta egoiliartuta egonik egoitza Espainian duten entitateek merkaturatzeko asmoarekin Baloreen Merkatuaren Nazio Batzordearen erregistro berezian inskribatuta dagoen batek, errentak ordaintzen dituzten entitate merkaturatzaileek edo akzioak zein partaidetzak merkaturatzerako ahalmena duten bitartekariek egin behar dute atxikipena edo konturako ordainketa, eta, subsidiarioki, baloreak kokatzen edo banatzen dituzten entitateek.

Eragiketa beste estatu batean erregistratuta dagoen kapital aldakorreko inbertsioko sozietateen pareko inbertsio kolektiboko erakunde batek egin badu, inbertitzaileen multzo murriztuak direla eta akzioak eskuratzeko, lagatzeko edo erreskatatzeko dituzten mugak gorabehera, baloreen gordailuzain den erakundeak edo haien ondoriozko errentak kobratzen dituenak aplikatu behar du atxikipena edo konturako sarrera.

Aurreko lerroaldeen arabera konturako diru-sarrera edo atxikipena egitea bidezkoa ez den kasuetan, konturako ordainketa egitera behartuta egonen da jaulkipen primaren banaketa edo ekarpenen itzulketa jasotzen duen bazkidea edo partaidea. Konturako ordainketa hori 37.8, 38.1 eta 39. artikuluetako arauei jarraituz eginen da.

8. Atxikipena egin beharra duten subjektuek beren gain hartuko dute sarrera Nafarroako Ogasunean egiteko betebeharra; betebehar haren ez-betetzeak ez ditu betebehar honetatik salbuesten.

36. artikulua. Aktibo finantzario eta baldintza fiskalen kalifikazioa, aktibo finantzarioen transmisio, itzulketa eta amortizazioa egiteko.

1. Etekin inplizitudun aktibo finantzarioak izanen dira etekina honela sortzen bada: jaulkipenean, lehen ezarpenean edo endosuan ordaindutako zenbatekoa, eta beren etekina modu inplizituan, osorik edo zati batean, beste batzuen baliabideak bereganatzeko erabilitako edozein balio higigarriren bidez ezartzen den eragiketen epemugan ordaintzeko hitza eman den kopuruaren arteko kenketa eginda.

Jaulkipen, amortizazio edo ordaintzearen sariak etekin inplizitutzat joko dira.

Etekin inplizituaren kontzeptutik kanpo geratuko dira ezarpenaren hobariak edo sariak, jaulkipenaren prezioaren gainean igorita, baldintza hauek betetzen badituzte: merkatuaren jardueren barruan egotea, bitartekari edo ezartzaile finantzarioarentzako diru-sarrera osoa izantea, eta Araudi honek arautzen dituen aktibo finantzarioen jaulkipenean eta hedapenean jardutea.

Etekin inplizitudun aktibo finantzariotzat hartuko da edozein igorpen-tresna, bai eta merkataritza-eragiketetazn sortutakoak ere, endosatzen edo transmitizen den momentutik aurrera. Horren salbuespena izanen da endosua edo lagapena hornitzaileen kreditua ordaintzeko bada.

2. Etekin esplizitudun aktibo finantzarioak izanen dira korrituak eta ordaintzeko beste edozein modu sortzen dituztenak, ordainketa hori norbere kapitala hirugarrenei egindako lagapenaren ordain modura hitzartu bada eta ez badago aurreko zenbakian ezarri den etekin inplizituen kontzeptuaren barruan.

3. Etekin mistodun aktibo finantzarioek etekin esplizitudun aktibo finantzarioen araudia erabiliko dute, urtean modu horretan sortzen den eskudirua jaulkipenaren unean indarrean dagoen erreferentzia-tasaren berdina edo handiagoa denean, nahiz eta jaulkipen, amortizazio edo itzulketaren baldintzetan beste etekin gehigarri bat ezarri, modu inplizituan. Hiruhileko natural bakoitzean, erreferentzia-tasa hori aurreko hiruhilean egindako hiru urteko estatu-bonuen azken enkantean izan den batezbesteko prezio haztatu eta biribilduari dagokion tasa eraginkorraren ehuneko 80 izanen da, lau urteko edo gutxiagoko epea daukaten aktibo finantzarioak izanez gero; bost urteko estatu-bonuen berdina izanen da, lau urte baino gehiago baina zazpi edo gutxiagoko epea daukaten aktibo finantzarioak izanez gero; 10, 15 edo 30 urteko estatu-obligazioen berdina izanen da, aipatutakoa baino gehiagoko epea daukaten aktiboak izanez gero. Eperen baterako ezin bada erreferentzia-tasa zehaztu, jaulkipen horretatik gertuen dagoen epearena aplikatuko da.

Zenbaki honetan ezarritakoaren ondorioetarako, etekin aldakorra edo mugikorra daukaten aktibo finantzarioen jaulkipenari dagokienez, eragiketaren korritu eraginkor modura bere barne etekinaren tasa hartuko da. Izaera esplizitua eta kalkulatua daukaten etekinak baino ez dira hartuko, egoki bada, parametroaren hasierako balorazioari dagokionez, horren arabera zehazten badira sortutako etekinen behin betiko zenbatekoa.

4. Etekin inplizitua daukaten titulu edo aktibo eta transmisio, amortizazio edo itzulketaren unean atxikipena egin behar zaizkien etekin esplizitudun aktibo finantzarioak besterentzeko edo horien itzulketa lortzeko, titulu edo aktibo horiek aldez aurretik erosi direla eta atxikipena egin behar duten fede-emaileek edo erakunde finantzarioek parte hartu dutela egiaztatu beharko da. Eragiketako prezioa adierazi egin beharko da.

Igorpen-tresna bat atera ondoren aktibo finantzario bihurtzen denean, lehen endosua edo lagapena fede-emaile publiko edo erakunde finantzario baten bitartez egin beharko da, endosatzailea edo eroslea bera ez bada erakunde finantzarioa. Fede-emaileak edo erakunde finantzarioak dokumentuan idatziko dute aktibo finantzarioa dela, lehen eroslea edo edukitzailea identifikatuz.

5. Aurreko zenbakian ezarritakoaren ondorioetarako, jaulkipena egiten duen pertsonak edo erakundeak, haren ordez ari den erakunde finantzarioak, erosle edo gordailugilearen ordez ari den fede-emaile publikoak edo erakunde finantzarioak, kasuan kasuko, honakoen egiaztagiriak egin beharko dituzte:

a) Eragiketaren data eta aktiboaren identifikazioa.

b) Eroslearen izendapena.

c) Aipatutako erosle edo gordailugilearen identifikazio fiskaleko zenbakia.

d) Erosketaren prezioa.

Egiaztagiri hori hiru aletan egingo da. Horietatik, ale bi erosleari emanen zaizkio, eta hirugarrena egiaztagiria egin duen pertsona edo erakundeak gordeko du.

6. Erakunde finantzarioek eta fede-emaile publikoak ez dira bitarteko izanen eta ez dute parterik hartuko aktibo horien transmisioan transmisio-egileak ez duenean artikulu honetan ezarritakoaren arabera bere erosketa egiaztatzen.

7. Aktibo finantzarioak jaulkitzen dituzten pertsonek edo erakundeek, 4. zenbakian aipatzen direnek, ezin izanen dituzte aktibo horiek itzuli edukitzaileak ez badu erosketa agiri egokiaren bidez egiaztatzen, 5. zenbakian ezarritakoa betez.

Jaulkitzaileak edo eragiketaz arduratzen diren erakunde finantzarioek, aurreko paragrafoaren arabera itzulketa egin behar titulu edo aktiboaren edukitzaileari, zenbateko horren pareko gordailua egin beharko dute, aginte judizialaren eskura.

Aldez aurretik berrerosteak, erreskatatzeak edo amortizatzeak erakunde finantzario edo fede-emaile publiko batek parte hartzea edo bitartekari modura aritzea eskatuko du. Aktiboa jaulkitzen duen erakundea edo pertsona erosle soila izanen da titulua berriro ateratzen bada.

8. Tituluaren edukitzaileak, erosketaren egiaztagiria galdu egiten bada, agiri hori egin zuen pertsona edo erakundeari kopia bat egitea eskatu ahal izanen dio.

Pertsona edo erakunde horrek argi adieraziko du agiri hori kopia bat dela, bai eta egin deneko data ere.

9. Artikulu honetan aurreikusitako ondorioetarako, irabazizko transmisioa denean, eroslea transmisio-egilearen erosketaren balioan subrogatzen dela ulertuko da, aipatutako kostuaren justifikazio nahikoa egonez gero.

37. artikulua. Atxikipena egiteko eta kontu-sarrera egiteko betebeharraren kalkuluaren oinarria.

1. Oro har, atxikipena egiteko betebeharra kalkulatzeko oinarria eska daitekeen kontraprestazioaren edo ordaindutako kontraprestazioaren zenbateko osoa izanen da. Kontraprestazio osoa ez bada frogatu, zerga-administrazioak halakotzat zenbatu ahal izanen du zenbateko bat, egin beharreko atxikipena kenduta benetan jaso dena bada.

2. Aktibo finantzarioen amortizazio, itzulketa edo transmisioaren kasuan, aktibo horien amortizazio, itzulketa edo transmisioaren balioaren eta erosketa edo harpidetzaren balioaren kendura positiboa izanen da atxikipena egiteko betebeharra kalkulatzeko oinarria. Erosketaren baliotzat erosketaren egiaztagirian dagoena hartuko da. Ondorio horietarako, eragiketaren gastu gehigarriak ez dira murriztuko.

Transmisio-egileari dagokion atxikipena kaltetu gabe, jaulkipena egiten duen erakundeak berak jaulkitako aktibo bat erosten badu, tituluaren geroko edozein transmisio-motan, amortizazioan izan ezik, lortzen duen etekinaren gainean egingo dira atxikipena eta sarrera.

3. Atxikipen egiteko beharrizana 33. artikuluaren 1. zenbakiko b) letran aurreikusitakoan sortzen bada, sariaren zenbatekoa izanen da kalkuluaren oinarria.

4. Atxikipena egiteko beharrizana Erregelamendu honetako 33. artikuluaren 1. zenbakiko f) letran aurreikusitakoan sortzen bada, akzio edo partaidetzen transmisio edo itzulketa eta horien erosketaren balioaren arteko aldea izanen da atxikipenaren oinarria. Ondorio horietarako, zergadunaren transmisio edo itzulketa balioak lehenbizi eskuratutakoak direla ulertuko da.

5. Kontu-sarrera egiteko betebeharra 33. artikuluaren 3. zenbakian aurreikusitakoan sortzen denean, ondasunaren merkatuaren balioa izanen da horren kalkulua egiteko oinarria.

Ondorio horietarako, erosketaren balioa edo ordaintzailearentzako kostua ehuneko 20 handitzearen emaitza hartuko da merkatuaren baliotzat.

6. Atxikipena aplikatu beharra erregelamendu honetako 33. artikuluko 1. zenbakiko e) letran ezarritakotik datorrenean, atxikipenaren oinarria errentatzaileari kontzeptu guztiengatik ordaindutako zenbatekoa izanen da, Balio Erantsiaren gaineko Zerga bazter utzita.

7. Zergari buruzko Legearen 32.3 artikuluan aipatutako doikuntza sekundarioak atxikipena edo konturako sarrera egin beharra sortzen duenean, horren oinarria balio hitzartuaren eta merkatuko balioaren arteko diferentzia izanen da.

8. 33.1.g) artikuluan aipatzen diren errenten kasuan, atxikipenaren oinarria Zergari buruzko Foru Legearen 26.3 artikukuluan ezarritakoaren arabera kalkulatutako zerga oinarrian sartu beharreko zenbatekoa izanen da.

38. artikulua. Atxikipena egin eta kontu-sarrera egiteko betebeharraren sorrera.

1. Oro har, atxikipena eta kontu-sarrera egiteko beharrizana errentak, eskudirutan edo jenerotan, eskatu ahal diren momentuan sortuko da, atxikipena edo kontu-sarrera egin behar bada, edo ordaindu edo eman egiten diren momentuan, aldez aurretikoa bada.

Bereziki, korrituak eskritura edo kitapen-kontratu edo kobratze-kontratuan adierazitako epemugan eskatu ahal izanen dira, edo kontuan beste modu batera onartzen direnean, nahiz eta jasotzaileak ez eskatu horiek kobratzerik edo etekinak eragiketaren nagusiari bildu. Dibidenduak banaketa-hitzarmenean ezarritako egunean edo hartzen diren egunaren biharamunean eskatu ahal izanen dira, ez bada egunik zehazten.

2. Aktibo finantzarioen transmisio, amortizazio edo itzulketatik eratorritako etekinen kasuan, atxikitzeko beharrizana eragiketa gauzatzen den momentuan sortuko da.

3. Inbertsio kolektiboko erakundeen kapitala edo ondarea adierazten duten akzio edo partaidetzen transmisio edo itzulketetatik lortutako errenten kasuan, atxikipena egiteko beharra eragiketa gauzatzen den momentuan sortuko da, hitzartutako kobrantza-baldintzak edozein direlarik.

39. artikulua. Atxikipenaren edo kontura egindako sarreraren zenbatekoa.

Atxikipenaren edo kontura egindako sarreraren zenbatekoa oinarriari jarraiko portzentajeak aplikatuz kalkulatuko da:

1go. Oro har, %18.

2gn. Irudia ustiatzeko eskubidearen edo hura erabiltzeko baimenaren lagapenak sortutako errentak badira, %20.

40. artikulua. Atxikipenaren egilearen eta kontu-sarrera egin behar duenaren betebeharrak.

1. Atxikipenaren egileak eta kontu-sarrera egin behar duenak Ekonomia eta Ogasun Kontseilaritzan aurkeztu beharko dute urteko hiruhileko natural bakoitzean atxikitako zenbatekoen eta kontu-sarreren aitorpena. Era berean, Nafarroako Ogasun Publikoan sartu beharko dituzte kopuru horiek.

Aitorpena eta diru-sarrera egiteko epea hiruhileko natural bakoitzaren hurrengo hilearen lehen hogei egun naturalena izanen da. Bigarren eta laugarren hiruhilekoetan, ostera, aitorpena eta diru-sarrera abuztuaren 5 eta urtarrilaren 31ra arte egin ahal izanen dira, hurrenez hurren.

Hala ere, zenbaki honetako lehen paragrafoan aipatutako aitorpena eta diru-sarrera hilabete bakoitzaren lehen hogei egun naturaletan egingo dira, aurreko zenbakian jaso diren atxikitako kopuru eta kontu-sarrerei dagozkienez, 86/1993 Foru Dekretuaren bidez onartu zen martxoaren 8ko Balio Erantsiaren Zergari buruzko Araudiaren 62. artikuluaren 3. zenbakiko 1. atalean jasotako baldintzak betetzen dituzten atxikipenaren egile edo behartuak direnean.

Ekaina, uztaila eta abenduko aitorpenak abuztuaren 5, irailaren 20 eta abenduaren 31ra arte egin ahal izanen dira, hurrenez hurren.

Ezin izanen da aitorpen negatiborik aurkeztu ez badira atxikipena edo kontu-sarreren menpeko errentak ordaindu.

2.

3. Atxikipenaren egileak edo kontu-sarrera egin behar duenak subjektu pasiboaren aldeko agiria egin beharko du egindako atxikipen edo kontu-sarrerak egiaztatuz, bai eta aurreko zenbakian aipatutako urteko laburpenean subjektu pasiboari buruz jaso beharreko gainerako datuak ere.

Egiaztagiri hori subjektu pasiboaren eskura jarri beharko da Zerga honen aitorpena egiteko epea hasi baino lehen.

4. Bigarren eta hirugarren zenbakietan ezarritako betebehar berberen menpean egongo dira Espainian helbidea eduki, bertan egon edo ordezkariak dauzkaten erakundeak, atxikipenaren menpe daude errentak beste batzuen kontura ordaintzen dituztenean edo balio-errenten gordailu izan edo haien kobrantza kudeatzen dutenean.

5. Ordaintzaileek errentak ordaintzen dituzten momentuan jakinarazi beharko diete subjektu pasiboei egindako atxikipena edo kontu-sarrera, aplikatutako ehunekoa adieraziz.

6. Artikulu honetan aipatutako aitorpenak egiteko, Ekonomia eta Ogasun Kontseilaritzak errenta-mota bakoitzerako ezarritako ereduak erabiliko dira. Atxikipenaren egileak edo kontu-sarrera egitera behartuta dagoenak euren aitorpenetako datu guztiak adierazi beharko dituzte.

Aitorpena eta sarrera Ekonomia eta Ogasun Kontseilaritzak zehazten duen modu eta lekuan egingo dira.

Lehen xedapen gehigarria. Aitorpenak aurkeztu eta kudeatzeko kanpoko lankidetza.

1. Ekonomi eta Ogasun Departamentuak hitzarmenak sinatu ahalko ditu Administrazio Publikoekin, entitateekin eta sektore edo interes sozialak, laboralak, enpresakoak edo profesionalak ordezkatzen dituzten erakundeekin, Zerga honen aitorpenak aurkezteko gizartearen lankidetza gauzatzeko.

2. Aurreko zenbakian aipatutako hitzarmenak, besteak beste, ondoko alderdiei buruzkoak izanen dira:

a) Informazio eta zabalkunde kanpainak.

b) Aitorpenak egiteko eta modu egokian eta egiazkoan betetzeko laguntza.

c) Aitorpenak Zerga Administraziora igortzea.

d) Akatsak zuzentzea, subjektu pasiboek baimena eman ondoren.

e) Ofiziozko itzulketen tramitazioa nola dagoen jakinaraztea, subjektu pasiboek baimena eman ondoren.

3. Ekonomi eta Ogasun Departamentuak jarduera horiek burutzeko behar den laguntza teknikoa emanen du, baina horrek ez du kenduko zerbitzu horiek subjektu pasibo guztiei emateko ahalbidea.

4. Ekonomi eta Ogasun kontseilariak, Foru Agindu baten bidez, baldintza batzuk ezarriko ditu hitzarmenak sinatu dituzten entitateek aitorpenak, aitorpen-likidazioak edo zerga arloko arauek eskatutako beste edozein agiri telematika bidez aurkezteko, hirugarren pertsonen izenean.

Halaber, Foru Agindu horretan aurreikusi ahalko da bestelako pertsona edo entitateek telematika bidezko aurkezpen sistema hori erabiltzeko aukera, hirugarren pertsonen izenean.

Bigarren xedapen gehigarria. Jarduera Ekonomikoen gaineko Zergaren kuotak.

Zerga batzuk eta zerga-neurri batzuk partzialki aldatu dituen martxoaren 17ko 16/2003 Foru Legeko bederatzigarren xedapen gehigarrian ezarritakoaren arabera, Sozietateen gaineko Zergaren subjektu pasiboek ordaintzen dituzten Jarduera Ekonomikoen gaineko Zergaren kuotak Sozietateen gaineko Zergaren konturako ordainketatzat hartuko dira, Zergari buruzko Foru Legeko 86. artikuluko 1. eta 2. idatz-zatietan ezarritakoaren ondorioetarako, baldin eta zergaldian jarduera guztietan egindako negozioen zenbateko garbia 2.000.000 euro baino gutxiago izan bada.

Negozioen zenbateko garbia kopuru hori edo gehiago izan bada, ezin aplikatu izanen da kenkaririk jardueretan ordaindutako kuoten zioz.

Negozio zifra kalkulatzeko, Zergari buruzko Foru Legearen 50. artikuluko 1. idatz-zatiko b) letrako a’) azpiletran eta Merkataritzako Kodearen 35.2 artikuluan xedatutakoa aplikatuko da.

Baldin eta subjektu pasiboak udal kuota batzuk ordaindu baditu, udalerri desberdinetan zein udalerri berean jarduera bera lokal batean baino gehiagotan egiten duelako edo jarduera bat baino gehiago lokal batean, ordaindutako kuota guztiak dira kengarriak, eta bederatzigarren xedapen gehigarrian ezarritako kenkari-muga aplikatuko zaio kuota bakoitzari.

Errenta-egozpenaren araubideko entitateetan, sozietateen gaineko zergaren subjektu pasibo diren bazkide, erkide edo partaideek entitatearen errentatik egozten zaien proportzioaren arabera aplikatu beharko dituzte entitateak jarduera ekonomikoen gaineko zergan ordaindutako kuotengatiko kenkariak, Pertsona Fisikoen Errentaren gaineko Zergari buruzko Foru Legearen Testu Bateginaren 49. artikuluko 2. idatz-zatian xedatutakoarekin bat etorriz. Kenkari hori errenta-egozpenaren araubideko entitateak zergaldian izandako negozioen zifra garbia 2.000.000 euro baino gutxiagokoa izanez gero aplikatzen ahalko da, eta halaber aplikagarria izanen da Zergari buruzko Foru Legearen 50. artikuluko 1. idatz-zatiko b) letrako a?) azpiletran xedatutakoa.

Kenkari hau aplikatu ahal izateko, ezinbestekoa da ordaindutako kuotak agiri bidez frogatzea eta kasu bakoitzerako ezarritako gutxieneko kuota ez gainditzea.

Hirugarren xedapen gehigarria. Prozeduren gainean ebazteko epea bertan behera uztea.

Erregelamendu honen bidez arautzen diren prozeduretan, ebatzi eta ebazpena jakinarazteko gehieneko epea inguruabar hauetariko baten bat gertatzean bertan behera geldituko da:

a) Epe hori eten daiteke interesatuari akatsak zuzentzeko edo agiriak edo behar diren bestelako arrazoibideak aurkezteko eskatzen zaionean. Etenaldia errekerimenduaren jakinarazpena egiten denetik jasotzaileak eskatutakoa bete bitartekoa edo, kasua bada, emandako epea bukatu bitartekoa izanen da.

b) Ebazpenaren edukia baldintzatzen duten datu edo txostenak Foru Komunitateko Administrazioari edo beste herri administrazio batzuei eskatzen zaizkienean, eskatzen direnetik hartzen direnera.

Datu edo txosten horiek eskatu eta hartu direla interesatuari jakinarazi beharko zaio.

Eskatzen diren txosten eta datu guztietarako, gehienez ere hiru edo sei hilabetez uzten ahalko da bertan behera epea, segun eta eskatu zaizkion administrazioa Foru Komunitatekoa ala beste bat den.

Laugarren xedapen gehigarria. Higiezinetako talde inbertsiorako erakundeen araubidea.

1. Higiezinetako inbertsiorako sozietate eta funtsek, Zergari buruzko Foru Legearen 50.5 artikuluan ezarritako karga tasa aplikatu ahal izateko, etxebizitzetan eta ikasle edo zaharrentzako egoitzetan egin behar duten gutxieneko inbertsioa (ehuneko 50eko koefizientea) kontatzeko, kontuan hartuko dira talde inbertsioko erakundeei buruzko azaroaren 4ko 35/2003 Legearen Erregelamenduaren 56.1 artikuluko a) eta b) paragrafoetan aipatzen diren inbertsioak, eta gainera, 56.1 artikulu horretako b) paragrafoan azaltzen diren kasuetan, honako arauak bete beharko dira:

a) Eraikitzen ari diren higiezinak Jabetza Erregistroan inskribaturik egotea.

b) Etxebizitzak, ikasleen egoitzak eta zaharren egoitzak izatea.

2. Ikasleen egoitzak dira ikasleen bizileku izateko berariaz diseinatu edo egokituta dauden eta horretarako onarpen ofiziala duten higiezinak. Zaharren egoitzak dira zaharren bizileku izateko berariaz diseinatu edo egokituta dauden eta horretarako onarpen ofiziala duten higiezinak.

3. Artikulu honetan aipatzen den inbertsio koefizientea konputatzeko, talde inbertsioko erakundeei buruzko azaroaren 4ko 35/2003 Legearen Erregelamenduak, azaroaren 4ko 1309/2005 Errege Dekretuaren bidez onetsiak, 60. artikuluan ezarritakoari jarraituko zaio; artikulu horrek ondasun higiezinetako inbertsioaren portzentajea nola zehaztu azaltzen du.

4. Zergari buruzko Foru Legearen 50.5 artikuluan ezarritako karga tasa behin-behinean aplikatuko zaie higiezinetako inbertsiorako funts eta sozietate berriei. Horiek bi urteko epea izanen dute, Balore Merkatuko Batzorde Nazionalaren erregistroan inskribatzen direnetik hasita, artikulu horretan eskatzen den inbertsio portzentajea lortzeko. Baldintza hori betetzen ez bada, iragan ekitaldietako Sozietateen gaineko Zerga ordaintzeko orduan, ekitaldi horietan indarra izan duen tasa orokorra aplikatuta da, eta berandutzagatiko korrituak sortuko dira.

5. Higiezinetako konpartimentukako inbertsiorako sozietate eta funtsen kasuan, xedapen gehigarri honetan ezarritakoa konpartimentu bakoitzerako bete beharko da.

Bosgarren xedapen gehigarria. Enpresa gazte eta berritzaileen araubide fiskala. Erroldan inskribatzeko prozedura. Araubidea aplikatzearen jatorria erabakitzea.

1. Enpresa gazte eta berritzaileen araubide fiskala aplikatu ahal izateko, subjektu pasiboek xedapen honetan arautzen den erroldan egon beharko dute inskribatuta; errolda Nafarroako Zerga Ogasunak kudeatuko du.

2. Erroldan inskribatuko dira, eskaera egin eta gero, Zergari buruzko Foru Legearen hemezortzigarren xedapen gehigarrian ezarritako baldintzak betetzen dituztela egiaztatzen duten subjektu pasiboak. Bereziki, subjektu horiek frogatu beharko dute, memoria eta finantza plana aurkeztuz, aipatutako hemezortzigarren xedapen gehigarriaren 1. zenbakiko e) letran ezarritakoa betetzen dutela.

3. Baldintza horiek betetzen dituztela egiaztatuta, Nafarroako Zerga Ogasuneko organo eskudunak erroldan inskribatuko ditu.

Inskribatu baino lehen, Berrikuntza, Enpresa eta Enplegu Departamentuak hemezortzigarren xedapen gehigarri horren 1. zenbakiko e) letran aipatzen diren baldintzen betetzeari buruzko txostena eginen du. Egokitzapena berritasun teknologikotzat jotzen diren produktu, zerbitzu edo prozesu berriei buruzkoa bada, Moderna Fundazioaren txostena ere beharko da.

4. Subjektu pasiboari erroldan inskribatua izan dela jakinaraziko zaio, bai eta, hala badagokio, hartan inskribatzeko ukapena edo baja-ematea ere.

Subjektu pasiboek erroldan inskribatzeko eskaera aurkeztu eta hiru hilabetean ez badute espedientearen ebazpenari buruzko berariazko jakinarazpenik jasotzen, eskaera ezetsi dela ulertu beharko dute.

5. Aldeko ebazpena ematen bada, enpresa gazte eta berritzaileen araubidearen onura fiskalak erroldan inskribatzeko eskaera aurkeztu den egunetik aurrera aplikatuko dira, 7. zenbakian xedatutakoa ezertan galarazi gabe.

Entitatea duela bost urte baino gutxiago eratua izateko betekizuna hasiera batez betetzeko, sozietatea noiz sortu zen eta erroldan inskribatzeko eskaera noiz egin zen hartuko da kontuan.

Behin aldeko ebazpena emanda eta, betiere, gainerako baldintzak betetzen badira, entitateak araubide honen onura fiskalez izaten jarraitzen ahalko du, eratu eta bost urte igaro bitarte.

Jarduera ekonomikoen gaineko zergari dagokionez, salbuespenak barnean hartuko ditu eskaera aurkezten den egunetik eratu eta bost urtera arte sorrarazten diren seihileko edo urteko kuotak.

6. Zergari buruzko Foru Legearen hemezortzigarren xedapen gehigarrian ezarritako baldintzetakoren bat ez betetzeak erroldan baja ematea ekarriko du eta xedapen gehigarri horren 4. zenbakian ezarritako ondorioak izanen ditu.

Subjektu pasiboek erroldan baja emateko eskaera aurkeztu beharko dute, Zergari buruzko Foru Legearen hemezortzigarren xedapen gehigarriaren 1. zenbakian ezarritako baldintzetakoren bat betetzeari uzten diotenean. Baldintza horietakoren bat betetzeari utzi eta hilabeteko epean aurkeztu beharko dute eskaera.

7. Erroldan inskribatzeko eskaera sozietatea eratu edo jarduera hasi baino lehen egiten bada, edo finantza historiarik gabeko enpresa berria bada, subjektu pasiboak egiaztatu beharko du, memoria eta negozio plana aurkeztuz, urtero, ikerketarako eta garapenerako egindako gastuek guztizko gastuen %15a joko dutela, edota berritasun teknologikotzat jotzen diren produktu, zerbitzu edo prozesuak gauzatuko dituztela. Baldintza hoiek gerora betetzen ez badira, aurreko 6. zenbakian xedatutakoari jarraituko zaio.

Erroldan inskribatzeko eskaera sozietatea eratu baino lehen egiten bada eta ebazpena aldekoa bada, enpresa gazte eta berritzaileen araubide fiskala sozietatearen eraketa datatik aurrera aplikatuko da.

Lehen Xedapen Iragankorra. Amortizazio eta konponketa berezietarako planak.

1. 1997ko urtarrilaren 1etik hasitako lehen zerga-epealdia ukitzen duten eta Nafarroako Aldizkari Ofizialean Erregelamendu hau argitaratu baino lehen martxan jarritako amortizazio eta konponketa berezietako planak aurkezteko epea hiru hilabetekoa da aipatu datatik kontatzen hasita.

2. Aurreko zenbakiak aipatzen duen data baino lehenago aurkeztu eta aipatu zenbakian sartzen diren elementuak ukitzen dituen planak, ebazpena eman zain badaude, Erregelamendu honetako 7. artikuluan aurreikusitako prozeduraren arabera burutuko dira.

Bigarren xedapen iragankorra. Elementu erabilien amortizazioa, eta bizitza baliagarri mugatuko ibilgetu ukiezineko elementuena.

Erabilita erositako ondare-elementuak eta bizitza baliagarri mugatua duen ibilgetu ukiezineko elementuak, Zergari buruzko Foru Legeak indarra hartu baino lehenago fiskalki amortizatzen ari badira, aipatu foru legeak indarra hartu baino lehenago indarrean ziren arauen arabera amortizatzen jarraituko dute.

Hirugarren xedapen iragankorra. Aldi bateko ustiapen ekonomikoak bertan behera uzteko g astu planak.

Ustiapen ekonomikoak bertan behera uzteko gastu planak aurkezteko epea, 1997ko urtarrilaren 1ean hasi zen lehen zerga-epealdiari dagozkionak badira eta Erregelamendu hau Nafarroako Aldizkari Ofizialean argitaratu aurretik hasiak, hiru hilabetekoa izango da aipatu datatik kontatzen hasita.

Laugarren xedapen iragankorra. Sarrera eta gastuen denbora-egozpeneko eskaerak.

1. Kontabilitate ondorioetarako sortzapena ez eta denbora-egozpeneko beste metodo bat aplikatu duten sujetu pasiboek, eta ondorio fiskaletarako baliagarria izan bada, Sozietateen Zergari buruzko xedapenen Testu Bategineko 18. artikuluko 2. zenbakian xedatutakoaren aplikazioa dela medio, metodo horrexekin jarraituko dute aurrerantzean Zergaren Foru Legea indarrean sartu baino lehen indarrean ziren arauen arabera.

2. Erregelamendu honetako 17. artikuluak aipatzen duen sarrera eta gastuen denbora-egozpeneko planek ondorioak izan ditzaten nahi den lehen zerga-epealdia 1997ko urtarrilaren 1etik aurrera hasitako lehen epealdia denean, eskaera aurkezteko epea bi hilabetekoa izango da Erregelamendu hau Nafarroako Aldizkari Ofizialean argitaratzen denetik kontatzen hasita.

Bosgarren xedapen iragankorra. Berrinbertsio planak.

1997ko urtarrilaren 1etik aurrera hasitako lehen epealdian eragina duten eskualdaketei buruzko berrinbertsio planak aurkezteko epea data horretatik hasiko da kontatzen, eskualdaketa horiek Erregelamendu hau Nafarroako Aldizkari Ofizialean argitaratu baino lehen eginak badira.

Seigarren xedapen iragankorra. Finantza-eragiketa zenbaiten gaineko etekin fiskalen araubide iragankorrak.

1. Autopisten kontzesiodun diren sozietateek eskuratutako eskubideak eman zitzaizkien baldintzetan mantenduko dituzte, baldin eta Zergaren Foru Legeak indarra hartu zuen unean aipatu Foru Legeko hamabigarren xedapen iragankorrak aipatzen dituen zerga-onuraren baterako eskubidea bazuten.

2. Aurreko zenbakian aurreikusitakoaren ondorioetarako Kapitalaren Errenten gaineko Zergatik sortutako etekinen aplikazioa honako arau hauei lotuko zaie:

a) Autopisten kontzesiodun diren sozietateei ontzat emandako etekinak Kapitalaren Errenten gaineko Zergaren arauei jarraikiz aplikatuko dira aurreantzean ere, eta Zerga horren arabera aplikagarri den tasaren gainean.

b) Etekinen hartzaileak, betebeharrari pertsonalki loturik ageri denean, zilegi du kentzea bere kuotatik etekinik izan ez balitz aplikatuko zatekeen Kapitalaren Errenten gaineko Zerga.

c) Aurreko zenbakian xedatutakoa gorabehera, aseguru, aurrezki eta era guztietako kreditu entitateek beren kuotatik benetan atxikitako kopurua besterik ez dute kenduko.

Zazpigarren xedapen iragankorra. Konponketa berezien edo aldi baterako ustiapen ekonomikoak bertan behera uzteagatiko gastuen estaldurarako plan bereziak. Ingurumen jarduketen gastuetarako plan bereziak.

1. Foru dekretu honek ezarritako testuaren aurretik erregelamenduaren 15. eta 16. artikuluek ziotena aplikagarria izanen da 2008ko urtarrilaren 1a baino lehen onetsitako planetarako, bai eta artikulu horietan ezarritako epearen barnean eskatutako planetarako ere, nahiz eta geroago onetsi. Plan horien gastuak dagozkien zergaldietako zerga-oinarrietan sartuko dira, planetan ezarritakoaren arabera, eta ez du ondorio fiskalik izanen Kontabilitate Plan Orokorraren lehenbiziko aplikazioaren ondorioz erreserbetarako egindako ordainketak, halakorik egin bada, 2008ko urtarrilaren 1aren aurretik hasitako zergaldietan kontabilizatu eta orduko zerga-oinarrietan sartu ziren gastu horiei dagokienez.

Egun hori baino lehen hasitako zergaldietan kontabilizatutako gastuak, konponketa berezien edo aldi baterako ustiapen ekonomikoak bertan behera uzteagatiko gastuen estaldurarako gastuak izan eta, Zerga Administrazioak onetsitako plan bati loturik ez egoteagatik, kengarriak izan ez baziren, egun horretatik aurrera hasitako zergaldietako zerga-oinarrietan sartuko dira, zergaldi horietan ustiapena utzi edo konponketak egiten badira.

2. Ingurumen jarduketen gastuetarako planak aurkezteko epea, ingurumen jarduketak egiteko betebeharra edo konpromisoa 2008ko urtarrilaren 1etik aurrera baina foru dekretu honek indarra hartu baino lehen hasitako zergaldietan sortu bada, hiru hilabetekoa izanen da azken egun horretatik hasita. Ingurumen jarduketa egiteko betebeharra edo konpromisoa 2008ko urtarrilaren 1a baino lehen hasitako zergaldietan sortu bada eta aldi baterako ustiapen ekonomikoak bertan behera uzteagatiko gastuetarako planik eskatu ez bada horiei aurre egiteko, ingurumen jarduketen gastuetarako plana eskatu ahal izanen da idatz-zati honetan ezarritako epean. Horrenbestez, aipatu egunaren aurretik hasitako zergaldietako gastuak beren xederako aplikatzen diren zergaldiko zerga-oinarrian sartuko dira.

Xedapen Derogatzaile Bakarra

Erregelamendu honek indarra hartzean indargabeturik utziko ditu bere edukiaren aurkako maila bereko edo beheragoko gainerako xedapenak.

Azken Xedapen Bakarra

1. Erregelamendu honek Nafarroako Aldizkari Ofizialean argitaratu eta hurrengo egunean hartuko du indarra, eta 1997ko urtarrilaren 1etik hasiera duten zerga-epealdiei aplikatuko zaie.

2. Aurreko zenbakian xedatutakoa gorabehera, atxikipenak eta konturako sarrerak egiteko betebeharra Erregelamendu hau indarrean sartzen denetik izango da aplikagarria.

Nafarroako Gobernua

Jar zaitez gurekin harremanetan | Erabilerraztasuna | Lege abisua | Webaren mapa