navarra.es
Castellano | Euskara | Français | English
Ezagutzera eman
257/2013 Foru Agindua, uztailaren 5ekoa, Ekonomia, Ogasun, Industria eta Enpleguko kontseilariak emana, 320 eredua onesten duena, hots, “Nafarroakoaz besteko araudiko sozietateen gaineko zerga” izenekoa
(2013ko 136. NAOn argitaratutako testua, uztailaren 17an)
Atarikoa
Ekonomia, Ogasun, Industria eta Enpleguko kontseilariak, 2013ko apirilaren 17an, bi foru agindu eman zituen: 134/2013 Foru Agindua, 2011ko urtarrilaren 1etik abenduaren 31 artean hasitako zergaldietako Sozietateen gaineko Zergaren eta Ez-egoiliarren Errentaren gaineko Zergaren -establezimendu iraunkorra- autolikidaziorako S-90 eredua onesten duena, eta 135/2013 Foru Agindua, Sozietateen gaineko zergaren autolikidaziorako 220 eredua onesten duena aipatu zergaldietarako bateratze-araubidea aukeratu duten talde fiskalentzat. Bi foru agindu horien arabera, sozietateen gaineko zergaren subjektu pasiboek edo finkagune iraunkorra duten ez-egoiliarren errentaren gaineko zergaren subjektu pasiboek eta Estatuaren eta Nafarroako Foru Komunitatearen arteko Hitzarmen Ekonomikoaren arabera bi administrazioei batera ordaindu behar dieten eta araubide komuneko araudia aplikatzen duten talde fiskalek fitxategi bat bide telematikotik igorriz aurkezten ahalko dituzte beren aitorpenak. Zein administrazioren araudia aplikatzen den, administrazio horrek eredu bakoitzarentzat zehazturiko erregistro-diseinuetara egokituko da fitxategi hori. Nafarroako Zerga Ogasunak webgunean eskaintzen duen inprimakia da aurkezteko beste bide bat.
Orain arte, fitxategia bide telematikotik igortzea zen aurkezteko modu bakarra, eta horrek problemak sortu ditu, problema teknikoak Zerga Administrazioari, eta problemak zergadunei, balidazio kontrolek gorabeherak izan baitituzte. Beraz, komenigarritzat jo da aurkezteko beste bide bat jartzea, aukerakoa, Nafarroako Gobernuaren web atarian den inprimakiaren bidez. Horri esker, informazioa tratatzeko lana errazten zaio Nafarroako Zerga Ogasunari, eta zergadunek bete beharreko tramitea errazagoa eta azkarragoa da.
Foru agindu honek, hortaz, webeko inprimaki eredu hori onestea du helburua. Haren baldintza orokorrak eta aurkezteko prozedura lehenago aipatutako bi foru aginduetan ere zehazten dira (apirilaren 17ko 134/2013 Foru Agindua eta apirilaren 17ko 135/2013 Foru Agindua) .
Tributuei buruzko abenduaren 14ko 13/2000 Foru Lege Orokorraren zazpigarren xedapen gehigarriak baimena ematen dio Ekonomia eta Ogasuneko kontseilariari foru agindu bidez arautu dezan foru lege horren 90. artikuluan aipatzen diren zergadun eta entitateek zein kasu eta baldintzatan aurkezten ahal dituzten aitorpenak, jakinarazpenak, aitorpen-likidazioak, autolikidazioak edo tributuen arloko araudiak eskatutako beste agiri guztiak baliabide elektroniko, informatiko eta telematikoak erabiliz.
Horrenbestez, eta Tributuei buruzko abenduaren 14ko 13/2000 Foru Lege Orokorraren 6. artikuluan jasotako eskudantziarekin bat, agindu dut:
1. artikulua. 320. ereduaren onespena, “Nafarroakoaz besteko araudiko sozietateen gaineko zerga” izenekoarena.
1. 320. eredua onetsi da, “Nafarroakoaz besteko araudiko sozietateen gaineko zerga” izenekoa.
2. 320. eredua aurkeztea aukerakoa da 2. artikuluan aipatzen diren subjektu pasiboentzat. Administrazio eskudunari dagozkion aitorpen ereduak aurkezten ahalko dituzte, edo, bestela, foru agindu honen bidez onetsitako eredua. Aurkezpena bide telematikotik eginen dute, baldintza orokorrei eta foru agindu honetan, hurrenez hurren, 4. eta 5. artikuluetan aurreikusitako prozedurari jarraikiz.
2. artikulua. 320. ereduaren aitorpenaren aplikazio-eremua (“Nafarroakoaz besteko araudiko sozietateen gaineko zerga” izenekoarena).
Aitorpena sozietateen gaineko zergaren subjektu pasiboek eta finkagune iraunkorra duten ez-egoiliarren errentaren gaineko zergaren subjektu pasiboek aurkezten ahal dute, baita talde fiskalek ere baldin eta Estatuaren eta Nafarroako Foru Komunitatearen arteko Hitzarmen Ekonomikoaren arabera bi administrazioei batera ordaindu behar badiete eta Nafarroakoaz besteko araudia aplikatzen badute.
3. artikulua. Aurkezteko epea, eta ordaindu edo itzultzeko modua.
1. Hauxe da zergaren aitorpenak aurkezteko epea: zergaldia bukatu eta bosgarren hilabeteko lehenbiziko egunetik zazpigarren hilabeteko hogeita bosgarren egunera arte.
Halarik ere, aurreko paragrafoan aipatzen denaren arabera aitorpena egiteko epea zergaldietarako S-90 eta 220 ereduak onesten dituzten foru aginduek indarra hartu eta hurrengo hogeita bosgarren egun naturala baino lehen amaitu bada, subjektu pasiboek foru aginduak indarra hartu eta hurrengo hogeita bost egun naturaletako batean aurkezten ahalko dute aitorpena.
2. Subjektu pasiboak, aitorpena aurkezten dutenean, behartuta egonen dira autolikidaziotik ateratako tributu-zorra Nafarroako Zerga Ogasunaren lankide den edozein finantza entitatetan sartzera. Diru-sarrera egiteko, “712. ordainketa gutuna” edo “741. ordainketa gutuna” eredua erabiltzen ahalko da (hautatu den ereduaren arabera, 200.a edo 220.a), edo, bestela, ordainketa telematikoaren zerbitzuaren bidez diru-sarrera egin.
Egindako autolikidaziotik dirua itzultzeko ateratzen bada, zein entitate eta kontutan ordaindu behar den adierazi beharko da, aitorpenak horretarako duen atalean.
4. artikulua. Internet bidez aitorpenen aurkezpen telematikoa egiteko baldintza orokorrak (web inprimakia baliatuz).
1. Internet bidezko aurkezpen telematikoa egiteko (web inprimakia baliatuz), baldintza hauek beteko dira:
a) Aitortzaileak identifikazio fiskaleko zenbakia eduki beharko du.
b) Aitortzaileak ziurtagiri elektronikoa eduki beharko du, Nafarroako Zerga Ogasunak onartua, Nafarroako Zerga Ogasunaren esparruan baliabide elektroniko, informatiko eta telematikoen (EIT) erabilera arautzen duen uztailaren 17ko 50/2006 Foru Dekretuan ezarrita dagoenari jarraikiz.
Baimenduta dauden ziurtagiri elektronikoak eta ziurtapen zerbitzuak dagokien atalean aipatzen dira; hartara, Interneteko http://www.hacienda.navarra.es helbidetik iristen ahal da.
c) Aurkezlea hirugarren pertsonen izenean aitorpenak aurkezteko pertsona edo entitate baimendu bat baldin bada, ekainaren 29ko 130/2009 Foru Aginduan xedatutakoarekin bat, Nafarroako Zerga Ogasunak onartutako ziurtagiri elektronikoa, aurreko b) letran aipatua, beharko du.
d) Aurkezpen telematikoa egiteko, aitortzaileak edo baimendutako aurkezleak, halakorik bada, Nafarroako atarian eskuragarri dagoen web inprimakia erabili beharko du.
e) Aitortzaileek aurkezpen telematiko hori egiteko eskatzen diren arau teknikoak bete beharko dituzte. Arau horiek Nafarroako Zerga Ogasunaren web orrian daude ikusgai, Interneteko http://www.hacienda.navarra.es helbidean.
2. Telematika bidez igortzen diren aitorpenetan akats formalak agertzen direnean, sistemak berak emanen dio horren berri aitortzaileari akatsak azaltzeko mezuen bitartez, behar den zuzenketa egin dezan.
5. artikulua. Interneten bidez aitorpenen aurkezpen telematikoa egiteko prozedura (web inprimakia baliatuz).
Internet biez aurkezpen telematikoa egiteko prozedura, hots, web inprimakia baliatuz, hauxe izanen da:
1. Nafarroako Ataritik, Ogasunarekin egiten diren izapideen zerbitzuan sartu.
2. Egin nahi den aitorpenaren eredua hautatu, eta aitorpena aurkeztu ahal izateko datu guztiak bete.
3. Aitorpena bete ondoren, igortzeko aukera erabili. Aitorpena egokia bada, sistemak balioztatuko du. Akatsik atzemanez gero, inprimakiaren bidez komunikatuko da, eta haiek zuzendu arte ezin izanen da aitorpena aurkeztu. Aitorpena zuzen bete ondoren, sistemak jakinaraziko du aurkeztutako aitorpen bakoitzari esleitutako zenbakia eta, orobat, inprimatzeko aukera eskainiko du, frogagiri gisa erabiltzeko.
Xedapen iragankor bakarra. 320 eredua aurkezteko epea, 2012ko urtarrilaren 1etik abenduaren 31ra bitartean hasitako zergaldietarako.
2012ko urtarrilaren 1etik abenduaren 31ra bitartean hasitako zergaldietako zergen aitorpenak tarte honetan aurkezten ahalko dira: zergaldia bukatu eta bosgarren hilabeteko lehenbiziko egunetik zazpigarren hilabeteko hogeita bosgarren egunera.
Azken xedapen bakarra.–Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
