navarra.es
Castellano | Euskara | Français | English
Ezagutzera eman
380/2013 Foru Agindua, azaroaren 19koa, Ekonomia, Ogasun, Industria eta Enpleguko kontseilariak emana, 2013ko ekitaldiko Nafarroako aurrekontu orokorrak eta balantze kontuak itxi, likidatu eta 2014ko ekitaldia irekitzeko arauak onesten dituena
(2013ko 231. NAOn argitaratutako testua, azaroaren 29an)
Atarikoa
Nafarroako Ogasun Publikoari buruzko apirilaren 4ko 13/2007 Foru Legearen 123. artikuluak ezartzen duenez, Ekonomia eta Ogasun Departamentuari dagokio erregelamendu ahalmena erabiltzea, kontuen nahiz kontabilitate publikoari buruzko gainerako agirien egitura, justifikazioa, tramitazioa eta errendatzea zehazteko. Horren ondorioz, beharrezkoa da, aurreko urteetan bezala, 2013ko ekitaldiko Nafarroako Aurrekontu Orokorrak eta Balantze Kontuak itxi eta 2014ko ekitaldian irekitzeko arauak onestea.
Horrenbestez, agindu dut:
1. artikulua
2013ko ekitaldiko Nafarroako Aurrekontu Orokorrak eta Balantze Kontuak itxi eta likidatzeko kontabilitate aplikazioak erregulatzeko eta 2014ko ekitaldia irekitzeko arauak onestea. Foru agindu honen 1. eranskinean ageri dira.
2. artikulua
Nafarroako Ogasun Publikoari buruzko 13/2007 Foru Legearen 28. artikuluari jarraikiz, aurrekontu ekitaldia ixteko eguna 2013ko abenduaren 31 da. 2013ko ekitaldiari egotziko zaizkio ekitaldian likidatutako eskubideak, beren sortzealdia edozein izanik ere, eta ekitaldi bukaera arte aitortutako obligazioak, ekitaldi honen barnean egindako gastuenak badira betiere. Ondorio horietarako, honako hauek bakarrik onar daitezke: ondasun- edo zerbitzu-emateen ondoriozko obligazioak izanik, Ekonomia, Ogasun, Industria eta Enpleguko kontseilariaren azaroaren 9ko 944/2012 Foru Aginduan arautzen den Fakturen Erregistroan jasotako fakturetan daudenak, eta, diru-laguntzak baldin badira, Administrazioari emandako justifikazio-kontuetatik ondorioztatzen direnak. Bi kasuetan, aitortzen diren obligazioak dituzten dokumentuak 2013an hartu behar dira.
3. artikulua
Foru Komunitateko Administrazioaren departamentuek eta erakunde autonomoek behar diren jarraibideak emanen dituzte, foru agindu honetan xedatutakoa burutu eta betetzeko, eta hornitzaile, esleipen-hartzaile edo onuradunei faktura eta ziurtagiriak edo antzeko dokumentuak azkar aurkez ditzatela eskatuko diete, ordainketa horiek 2013ko aurrekontuaren kargura aipatutako datetan tramitatu ahal izateko edo, bestela, gerakinetan kontabilizatu ahal izateko.
4. artikulua
Foru agindu hau eta eranskina igortzea Nafarroako Parlamentuari, Comptos Ganberari, Arartekoari, Nafarroako Kontseiluari, departamentuetako idazkaritza tekniko nagusiei, erakunde autonomoei, sozietate eta fundazio publikoetako zuzendari kudeatzaileei, Kontu-hartze Orokorraren Zerbitzuko zuzendariari, Kontabilitate Zerbitzuko zuzendariari, Aurrekontuen eta Finantza Politikaren Zerbitzuko zuzendariari eta kontu-hartzaile delegatuei, eta Nafarroako Aldizkari Ofizialean argitara daitezela agintzea, orok jakiteko eta aplikatzeko.
ERANSKINA. Xedea
Arau hauen xedea da 2013. urteko Nafarroako Aurrekontu Orokorrak eta Balantze Kontuak itxi, likidatu eta 2014ko ekitaldia irekitzeko jarraitu beharreko arauak zehaztea.
1.–Gastuen aurrekontua.
1.1. 2013ko ekitaldiaren itxiera.
1.1.1. Aurrekontuko aldaketak tramitatzeko epea.
Ekonomia, Ogasun, Industria eta Enpleguko kontseilariak onetsi behar dituen edo Gobernuari proposatu behar dizkion aurrekontu aldaketen espedienteak 2013ko abenduaren 11 baino lehen igorri beharko dira Aurrekontuen eta Finantza Politikaren Zerbitzura.
1.1.2. Kapitaleko inbertsioei eta diru-laguntzei buruzko espedienteak tramitatzeko epea (D, AD).
Abenduaren 5etik aurrera ez da gastu-konpromisorik tramitatuko 2013ko ekitaldian gauzatu beharreko kapitaleko inbertsioetarako edo diru-laguntzetarako. Hortaz, ezin izanen dira sortu D1, D2 eta D3 motatako kontabilitate dokumentuak.
Mugatze honetatik kanpo egonen dira Nafarroako Gobernuak baimendutako gastu-konpromisoak.
1.1.3. Hurrengo ekitaldietako espedienteak tramitatzeko epea (D, AD).
2013aren ondoko ekitaldien kargura egiten diren gastu-konpromiso guztiek 2013ko abenduaren 13rako egon beharko dute kontabilizatuta aurretiaz, honako hauek izan ezik: toki entitateek Nafarroako Zergetan duten Partaidetza Funtsean sartutako kapital transferentziak eta aurretiazko tramitazioaren gastuak.
Egun horretarako kontabilizatuta ez dauden gastu espediente guztiak kasuan kasuko kontu-hartzailetzak, delegatuak nahiz orokorrak, baztertuko ditu eta konpromiso horiek baliogabetu ere egin ditzake.
1.1.4. 2013ko ekitaldiaren kargura aitortutako obligazioak. (ADOP, OP eta T).
2013ko abenduaren 31 baino lehenagoko aurrekontu gastuen ondoriozko obligazio aitortuak 2013ko ekitaldiko aurrekontuaren karguari egozten ahalko zaizkio bakar-bakarrik, kasuan kasuko aurrekontu kredituen bizkar, baldin eta aurrekontua ixten denean ordaindu gabe badaude.
Ondorio horietarako, obligazio horiek frogatuko dira hornitzailearen faktura bidez, egindako obren ziurtagiri bidez edo diru-laguntza kobratzeko eskubidearen frogagirien bidez, oinarri arautzaileetan ezarritakoaren arabera. 2013an egindakotzat joko dira aipatutako dokumentuei dagozkien gastuak, betiere idatzirik jasota baldin badago Administrazioak urte horretan hartu dituela. Hori frogatzeko, Ekonomia, Ogasun, Industria eta Enpleguko kontseilariaren azaroaren 9ko 944/2013 Foru Aginduan arautzen den Fakturen Erregistroko idatzoharra erabiliko da, edo, kasua bada, dokumentuen Sarreren Erregistrokoa.
Aitortu diren obligazioak ordaintzeke egon daitezke baldin eta egiaztapenak egin behar badira ikusteko ea hartzekodunek kobratzeko eskubidea izateko baldintzak betetzen ote diren. Kasu horietan, gerakinen kontabilitateko dokumentuetan kontabilizatuko dira obligazioak, T1, T2 edo T3 motatakoetan, kasuaren arabera.
1.1.4.1. Obligazioak kontabilizatzeko epeak.
Aurrekontu gauzatzeari dagozkion agiri guztiek, edozein aurrekontu fasetakoek, gerakinen kontabilizazioa barne, sistema informatikoan erregistratuta egon beharko dute abenduaren 31rako aurretiaz, salbu eta nomina bidezko ordainketei, gastuaren sailkapen ekonomikoaren 16. artikuluari eta atal honetako hurrengo lerroaldeetan aipatutakoei dagozkienak.
Nolanahi ere, egun horren ondoren 2013ko ekitaldiaren kargura kontabilizatzen ahal dira kanpotik jasotako dokumentuetako obligazio aitortuak, betiere aldi baterako egozpenerako foru agindu honetan jasotako baldintzak betetzen badira. Horretarako, kontabilitate zentroek urtarrilaren 8a arteko epea izanen dute egoera horiei dagozkien ordainketa obligazioak aurretiaz erregistratzeko eta kontu-hartzaile delegatuei kasuan kasuko dokumentazioa aurkezteko. Egun horretarako, indarra duen araudiaren arabera aldez aurreko kontu-hartze beharrik ez duten gastu guztiek behin betiko kontabilizatuta egon beharko dute.
Bestalde, 2014ko urtarrilaren 17rako kontabilizatuta egon beharko dute, kontu-hartzailetzak aurrez adostasuna emanda, 2013ko ekitaldiari buruzko eragiketa guztiek.
Aurreko atalean finkatutako mugaepean aldeko kontu-hartzea egiteko moduan ez dauden obligazioen aitorpenak baztertuko dira, gerakinenak barne. Puntu honetan ezarritakoa aplikatzearen ondorioz baztertzen diren gastuak 2014ko ekitaldiaren kargura egotziko dira, hala badagokio.
Arau hauen kariaz kontabilizatu diren obligazioen kargura, bidezkoak diren ordainketak egin daitezela agintzen ahalko da.
1.1.4.2. Langileria gastuak.
Abenduko nominan ordaindutako gastuen kontabilizazioa 2013ko abenduaren 24a baino lehen egin beharko da.
Kasuko kontu-sailean kreditu aski ez badago eta, horrenbestez, aurreko lerroaldean aipatutako gastua egiterik ez badago, arazoa 2014ko urtarrilaren 9rako ebatzi beharko da. Egun horretarako, aurrekontuaren 16. artikulu ekonomikoan biltzen diren gastu guztiek kontabilizatuta egon beharko dute.
2013. urtean emandako zerbitzuetakoak izan arren, 2014an (urtarrileko nominan nahiz beste batean) ordaintzen diren denborazko kontzeptuen ordainsariak (dietak, aparteko orduak, jaiegunak eta antzekoak) 2014ko Aurrekontuari egotziko zaizkio.
1.1.5. Justifikatu beharreko funts libratuak.
Abenduaren 20ko 385/1993 Foru Dekretuak justifikatu beharreko funts libratuak arautzen ditu, eta Ekonomia eta Ogasuneko kontseilariaren 172/1994 Foru Aginduak aipatu foru dekretua garatu zuen. Halaber, 13/2007 Foru Legearen 56. artikuluak hura arautu zuen berriro, eta indargabetu, hirugarren azken xedapenaren bidez, foru lege horretan ezarritakoari aurka egiten dioten maila bereko edo txikiagoko xedapenak oro.
Bi xedapen horietan ezarritakoa betetzeko, aurrekontuko itxiera eragiketei dagokienez, honako arau hauek hartu beharko dira kontuan:
1.1.5.1. Kutxa finkoko aurrerakinak.
Kutxa finkoko aurrerakintzat jotzeak aukera ematen du aurrerakin hori ez itzultzeko eta emakida berri bat eskatzeko, ekitaldiaren itxieran eta irekieran. Dena dela, kutxa finkoko aurrerakinak kudeatu eta horien jarraipena egiteaz arduratzen diren organoek txosten bat eginen dute, funts horiek 2013ko abenduaren 31n duten egoera biltzen duena. Txostena dagokion organo erantzuleak sinatuko du, eta Kontabilitate Zerbitzura igorriko da, 2014ko urtarrilaren 31 baino lehen.
Aipatutako txostenak informazio eta euskarri hauek edukiko ditu:
a) Aurrerakinaren kontu korrontearen saldoa finantza entitatean 2013ko abenduaren 31n. Abenduaren 31n dagoen saldoa agertzen duen laburpenaren kopia gehituko da.
b) 2013ko abenduaren 31n justifikatutako eta kontabilizatutako gastuaren zenbatekoa, data horretan aurrerakinaren kontu korrontera itzuli gabekoa. Dagozkion fakturen eta zenbatekoen zerrenda emanen da.
c) Igorri eta onuradunak kobratutako taloien zenbatekoa, 2013ko abenduaren 31n justifikatu gabe eta kontu korrontearen saldora itzuli gabekoa. Zenbateko horien eta hartzaileen zerrenda emanen da.
d) Kasuko justifikazioa aurkeztuta ere, onuradunek kobratu ez dituzten taloien zenbatekoa. Hirugarrenen, kontzeptuen eta zenbatekoen zerrenda emanen da.
1.1.5.2. Justifikatu beharreko ordainketa aginduak.
a) Ordainketa agindu hauek jasotzen dituztenek justifikatu egin beharko dute hartutako diru-kopuruen aplikazioa eta, hala egin behar bada, Diruzaintzara itzuli erabili gabeko funtsak, 2013ko abenduaren 20a baino lehen (abenduaren 2. hamabostaldia). Ekitaldiko diruzaintza ixteko behar diren koadratzeak egin ahal izateko, abenduaren 20ko epea bete ezin izan duten erabili gabeko funtsen itzulketa ohiko hamabostalditik kanpo ingresatuko da, betiere abenduaren 31 baino lehen. Hori horrela izan dadin, justifikatu beharreko funts horien kudeaketa eta segimenduaz arduratzen diren organoek behar diren neurriak hartu beharko dituzte hori betetzeko.
b) Justifikatu beharreko ordainketa aginduen kudeaketaz eta jarraipenaz arduratzen diren organoek 2013ko abenduaren 31n funts horiek duten egoerari buruzko txostena egin beharko dute. Txostena dagokion organo erantzuleak sinatuko du, eta Kontabilitate Zerbitzura igorriko da, 2014ko urtarrilaren 31 baino lehen.
Aipatutako txostenak informazio eta euskarri hauek edukiko ditu:
–Finantza entitatean justifikatu beharreko ordainketaren kontu korrontearen saldoa 2013ko abenduaren 31n. Abenduaren 31n dagoen saldoa agertzen duen laburpenaren kopia gehituko da.
–2013ko abenduaren 31n ordaindu eta justifikatutako gastuaren zenbatekoa, kontabilizatu gabekoa. Dagozkion fakturen eta zenbatekoen zerrenda emanen da.
–Igorri eta onuradunak kobratutako edo kobratu gabeko taloien zenbatekoa, 2013ko abenduaren 31n justifikatu gabekoak, atal honen a) letran ezarritakoa ezarrita ere. Zenbateko horien eta hartzaileen zerrenda emanen da.
1.2. 2014ko ekitaldiaren irekiera.
1.2.1. Lehendik dauden egoeren kontabilizazioa.
Ekitaldi berriko aurrekontu programa bakoitzean, eta gastuari hasiera eman aurretik, aurrekontu berriaren kargura finantzatu beharreko gastuei dagozkien aurrekontuaren exekuzioaren faseak kontabilizatuko dira. Faseak honako hauek dira:
–Bakarrik kreditua erreserbatzea nahitaezkoa duten kontratuei, zeinetatik ekitaldia bukatutakoan prestazioa oraindik jaso gabe dagoen, dagozkien kreditu erreserbak.
–Diru-laguntzetarako nahiz kontratuetarako gastu baimenak, aldez aurreko tramitazio egoerei dagozkienak.
–Ixten den ekitaldiaren bukaeran indarra duten eta ekitaldi berriko aurrekontuaren kargura finantzatu behar diren gastu konpromisoak; konpromiso horiek hasten den ekitaldian ordaindu beharreko urte anitzeko gastu konpromisoetako urteko sariei lotuak izan daitezke, edo ixten den aurrekontuan kontabilizatuta egon arren, ekitaldiaren bukaeran ordaindu beharra aitortu gabe dutenak, betiere, azken kasu horretan, konpromisoaren titularra den hirugarrenak ekitaldi berrian eskatzerik baldin badu aurreko ekitaldian kontabilizatutako konpromisoari dagozkion ordaindu beharrak.
Aurretik aipatutako urte anitzeko dokumentuetan urte bati dagokion atalean doikuntzak egiteko (ekitaldi berriko aurrekontu-zuzkiduretara egokitzeko), beharrezkoa izanen da 2013ko ekitaldia irekitzea. Kasu horietan, eta horretarako bakarrik, itxitako ekitaldia irekitzeko eskatuko zaio Kontabilitate Orokorraren eta Aurrekontuetakoaren Atalari.
Egoera horiek PEP elementuen birprogramazioa, eranskin honen 3. atalean aipatutakoa, egin ondoren kontabilizatuko dira, eta, betiere, 2014ko otsailaren 7a baino lehen.
1.2.2. Aurrekontuaren gaitasun finantzarioaren bermea.
Aurrekontu berria aurreikusi diren konpromiso guztiak finantzatzeko gai dela bermatzeko, kontu-hartzailetzak ez du inolako gastu baimenik edo aurrekontuaren aldaketarik fiskalizatuko, fiskalizazio horiek aurrekontuaren gaitasuna kaltetzen ahal dutenean, hala egun duen egituran, nola aurreko atalean aipatutakoari jarraikiz kontabilizatu behar diren eragiketa guztiei erantzuna emateko departamentuaren titularrak aurrekontuen kudeaketari buruz egin behar dituen ohiko operazioak egin ondoren. Eragiketa horiek erabaki berrien aurretik kontabilizatu behar dira. Hortaz, lehendik dauden egoerak behar den bezala kontabilizatu gabe gastu berriak baimentzeko organo kudeatzaileek egiten duten edozein proposamen, aurrekontuan dirurik badela behar bezala ziurtatzen ez duela kontsideratuko da, oztopo oharren ondorioetarako.
2.–Diru-sarreren aurrekontua.
2.1. 2013ko ekitaldiaren itxiera.
2.1.1. Diru-sarreren esleipena.
13/2007 Foru Legearen 28. artikuluak xedatzen du aurrekontu ekitaldiari urte horretan likidatutako eskubideak egotziko zaizkiola, edozein dela ere haien sortzealdia.
Horrekin bat, 2013ko diru-sarreren aurrekontuari urte horretan aitortu diren eskubideak aplikatuko zaizkio, nahiz eta kontabilizazioa 2014ko urtarrilaren 10 arte luza daitekeen.
2.1.2. Formalizaziotik datozen diru-sarrerak.
2014ko urtarrilaren 10erako, lan pertsonalaren etekinen eta ondasun higigarrien kapitalaren etekinen atxikipenengatik sortzen diren diru-sarrera guztiak aplikatu beharko zaizkie dagozkien kontu-sailei, bai eta, halakorik bada, formalizaziotik datozen gainerako diru-sarrerak ere.
2.2. 2014ko ekitaldiaren irekiera.
Kontabilitate zentroek egiaztatu beharko dute, 2013ko abenduaren 31 baino lehen, dagozkien eta 2014an indarra izanen duten tributuz besteko diru-sarrera normalizatuen kontzeptu guztiek 2014ko ekitaldirako aurreikusitako diru-sarreren aurrekontuko kontu-sailak jasotzen dituztela.
Aurreko atalean aipatutako bat-etortzea gertatzen ez bada, eta aurrekontu berriak indarra hartu ondotik, kasuko kontzeptuen bertsio berriak sortu beharko dira, diru-sarreren aurrekontuko kontu-sailak eguneratuz.
2013ko abenduaren 21etik aurrera egindako kobrantzak 2014ko urtarrileko 1. hamabostaldiari dagozkionez, abenduaren 18ko 1030/2012 Foru Aginduari jarraikiz, Kontabilitate Zerbitzuari bat ez etortzeen berri emanen zaio, 2014ko urtarrilaren 9a baino lehen.
3.–Gastuetarako proiektuak.
2014ko otsailaren 7rako gastuetarako proiektuen kudeatzaileek proiektu horietako PEP elementuak berrantolatu beharko dituzte, izandako gauzatzearen eta 2013ko ekitaldiaren itxieran eskura dagoen informazioaren arabera. Halaber, proiektuaren 2013ko ekitaldia (proiektu eta PEP elementuena) baliozkotuko da, informazio sisteman.
4.–Balantze kontuak.
Kontabilitate itxierako eragiketa obligatuetan ezinbestekoa da ondare egoera azaltzeko aurkeztuko diren finantzen egoera orrien zehaztasuna bermatzea. Horregatik, egiaztapen batzuk egin eta dokumentatu behar dira, balantzeko kontuak eta departamentuetan dauden erregistro lagungarriak bat datozela ziurtatzeko. Koadratze hori egiaztatzeko, kontabilitate zentroek hurrengo ataletan aipatzen den informazioa eman beharko dute.
4.1. Ibilgetu materiala eta ez-materiala.
Ondare Zerbitzuak, Foru Komunitateko Ondareko Ondasun eta Eskubideen Inbentarioa prestatu eta eguneratzeko ardura duen aldetik, lurrei, eraikinei eta ondasun higigarriei dagozkien eta aplikatzeko dauden bajei buruzko informazioa eman beharko dio Kontabilitate Zerbitzuari, 2014ko urtarrilaren 7a baino lehen.
4.2. Finantza inbertsio iraunkorrak (250, 251, 252, 259, 260 eta 542 kontuak).
4.2.1. Ondare Zerbitzuak, 2014ko otsailaren 7a baino lehen, Kontabilitate Zerbitzura igorri beharko du 250 (Akzioak), 251 (Errenta finkoko baloreak) eta 259 (Akzioengatik ordaindu beharrekoak) kontuei dagozkien saldoen informazio txostena, 2013ko ekitaldian izandako aldaketen berri emanez eta adieraziz aldaketa horiek aurrekontuak gauzatzean eraginik izan duten ala ez.
Txostenak, halaber, hauxe jasoko du:
a) Nafarroako Gobernuak eta haren erakunde autonomoek 2013ko abenduaren 31n dituzten akzioei buruzko informazio hau:
–Akzioen kopurua.
–Balio izendatua.
–Partaidetza portzentajea sozietatearen kapitalean.
–Urtean egindako kapital handitze edo murrizteak, edo ekitaldiko aurrekontuan behar den aplikazioa eginez hasitakoak, eta horien tratamendua aurreko puntuetan emandako datuetan.
–Nafarroako Gobernuak erosi edo saldutako harpidetza eskubideak.
b) Aurreko informazioa kontuan hartuta, akzioengatik ordaindu beharrekoen eta emandako partaidetza maileguen egoeraren edo aplikazioaren zerrenda.
c) 2013ko abenduaren 31n Fondo de Carbono para FC2E delakoak duen merkatuko balioa, eta Nafarroako Gobernuaren partaidetzaren portzentajea hartan.
d) Aurreko ataletan aipatu gabeko edozein finantza aktibo eskuratu bada, horren gaineko informazioa.
e) Aipatutako tituluetako batzuek baloreen merkaturen batean kotizatzen badute, ekitaldiko azken hiruhilekoko batez besteko kotizazio ofiziala eta itxierako ekitaldiko abenduaren 31ko kotizazioa ere emanen dira.
Azkenik, 2014ko otsailaren 8a baino lehen igorri beharko du, akzioei dagokienez, 2013ko abenduaren 31n Nafarroako Gobernua edo haren erakunde autonomoak jabe dituzten sektore pribatuko eta publikoko sozietateen arabera, sozietatearen funts propioetan dagoen partaidetzaren kuantifikazioa, 2013ko abenduaren 31n, edo sozietatearen funts propioei buruzko informazioa, 2013. urteko ekitaldiaren urteko itxiera balantzean, eta sozietate bakoitzean dauden partaidetzaren ehunekoak.
4.2.2. Maileguak, epe luzerako aurrerakinak edo Nafarroako Ogasun Publikoaren beste kreditu batzuk (252 eta 260 kontuak ukitzen dituztenak) eman dituzten departamentu edo erakunde autonomoetako kontabilitate zentroek sistema informatikoan mailegu horietako bakoitzari buruzko informazioa sartu beharko dute, 2013ko abenduaren 31n eguneratutakoa. Departamentuek, 2014ko urtarrilaren 24a baino lehen, Idazkaritza Teknikoaren ziurtagiri bat igorri beharko dute Kontabilitate Zerbitzura, egiaztatzen duena kontabilitate datuak bat datozela Departamentuan dauden administrazio espedienteetako hirugarrenen zerrendarekin (zerrenda ere aurkeztu behar da).
4.2.3. Kontabilitate zentroek, 2014ko urtarrilaren 31 baino lehen, 542 kontuetan dagoen saldoa berresten duen txostena igorri beharko dio Kontabilitate Zerbitzuari. Zehazki, Lehendakaritza Departamentuak 542 kontuaren (Udal funtzionarioen Montepioko mailegua) euskarria igorri beharko du.
4.3. Izakinak (3. multzoko kontuak).
Izakinen inbentarioa duten departamentu edo erakunde autonomoek 2014ko urtarrilaren 31 baino lehen igorri beharko dute Kontabilitate Zerbitzura kontu horiek ekitaldia ixtean dituzten saldoei buruzko informazioa.
4.4. Obligazio aitortuen ondoriozko hartzekodunak.
4.4.1. 2013. urtearen aurreko gerakinen (T) ondoriozko hartzekodunak.
2013ko abenduaren 16a baino lehen, 2012ko eta aurreko urteetako obligazio aitortuen ondoriozko hartzekodunak dituzten departamentuek edo erakunde autonomoek, baldin eta obligazio horien ordainketa agindua tramitatu gabe badago oraindik (T), baliogabetu beharrekoak baliogabetuko dituzte (Gastuak gauzatzea/Espedienteak sortzea/Aurrekontuetako obligazioak deuseztatu eta baliogabetzea ataletan bildutako eragiketen bitartez), eta 2013ko ekitaldiari egotzi, eta mantentzen diren gerakinen zerrenda Kontabilitate Zerbitzura igorri beharko dute. Horrekin batera, denbora luzea pasatu arren ekitaldia ixtean obligazio horiek oraindik ere indarrean daudela frogatzen duten agiriak igorri beharko dituzte.
Halaber, kontabilitate zentroek abenduaren 31n zero saldoa izanen duten T agiri guztiak dagozkien P agiriekin konpentsatzen diren egiaztatuko da.
4.4.2. 2013a baino lehen aitortutako obligazioen ondoriozko hartzekodunak.
2013ko abenduaren 16a baino lehen, 2012ko eta aurreko urteetako obligazio aitortuen ondoriozko hartzekodunak dituzten departamentuek edo erakunde autonomoek, baldin eta obligazio horien ordainketa agindua tramitatu gabe badago oraindik, baliogabetu beharrekoak baliogabetuko dituzte (Gastuak gauzatzea/Espedienteak sortzea/Aurrekontuetako obligazioak deuseztatu eta baliogabetzea ataletan bildutako eragiketen bitartez), eta 2013ko ekitaldiari egotzi, eta Kontabilitate Zerbitzura hartzekodunen zerrenda igorri beharko dute. Denbora luzea pasatu arren ekitaldia ixtean obligazio horiek oraindik ere indarrean daudela frogatzen duten agirietan azalduko dira hartzekodun horiek.
Halaber, abenduaren 31n zero saldoa izanen duten Sédate hartzekodunak behar bezala konpentsatuta dauden egiaztatuko da.
4.4.3. Hartzekodun orokorrak eta/edo departamentukoak.
Kontabilitate zentroek 2014ko urtarrilaren 31 baino lehen igorri beharko dute Kontabilitate Zerbitzura hartzekodun orokorrei eta/edo departamentukoei dagozkien abenduaren 31ko saldoen txostena, kanpoko hirugarrenek emandako zerrenda batean. Txosten horretan ez dira kontuan hartuko kutxa finkoko aurrerakinei eta justifikatu beharreko ordainketei dagozkien hartzekodun orokorrak eta/edo departamentukoak, foru agindu honetako atal egokian bildutakoari jarraikiz beste txosten batean jorratzen baitira.
4.5. Aurrekontutik kanpoko hartzekodunak, aurrekontura aplikatzeke daudenak eta kobrantzen kudeaketaren ondoriozkoak direnak (409 eta 419).
2014ko urtarrilaren 24a baino lehen, Nafarroako Osasun Zerbitzuko eta Nafarroako Osasun Publikoaren eta Lan Osasunaren Institutuko Erosketak eta Biltegiak Kudeatzeko Sistemaren kudeatzaileek 409 kontuen saldo hartzekodunetako akatsak zuzenduko dituzte, eta horretarako, jasotako fakturei nahiz jasotzekoak diren fakturei lotzen ez zaizkien WS (zerbitzu sarrera) eta WE (salgaien sarrera) dokumentuak deuseztatu eta 2013ko ekitaldiari egotziko dizkiete. Zuzenketa hori egin ondoren, Kontabilitate Zerbitzura igorriko dute, data hartarako, oraindik sisteman dauden eta faktura Kudeaketa Sisteman erregistratu gabe duten WS eta WE dokumentuen zerrenda (2013ko urriaren 31 baino lehenagokoak); halaber, salgaiak edo zerbitzuak jasotzen denetik ordaintzeko batez besteko aldia eta aurrekontu egonkortasunaren araudiak aldi horri jartzen dion tartea igarota, dagokion faktura erregistratu gabe egoteko arrazoiak justifikatu beharko dituzte.
Halaber, eta 2014ko urtarrilaren 24a baino lehen, itxi gabeko material eskaera guztiak ekitaldi berrira ekarriko dituzte, eta, behar denean, batetik bestera aldatu behar ez direnak erregularizatu eginen dira. 2013ko ekitaldia ixtearekin, eskaerak 2014ra aldatzeko aukera blokeatuko da.
2014ko urtarrilaren 24a baino lehen, beste erakunde batzuen (Nekazaritza Bermatzeko Europako Funtsa-Landa Garapenerako Europako Nekazaritza Funtsa, NILSA eta Konpentsazio Batzordea) kobrantza kudeaketa dela-eta derrigorrezko diru-bilketa agentziara aurrekontutik kanpoko zordunak eskualdatu dituzten kontabilitate zentroek, abenduaren 31n dagokien saldoaren zatia jasan beharko dute, derrigorrezko diru-bilketa agentziara eskualdatu eta kobratzeke edo baliogabetzeke dauden zordunei dagokiena; informazio hori Kontabilitate Zerbitzura igorriko dute.
4.6. HKLren kudeaketa esparruko hartzekodunak (420 kontuak eta 431 kontuetako saldo hartzekodunak).
HKLren (Hirugarrenentzako Kontabilitate Lagungarria) esparruan kudeatutako diru-sarreren itzulketaren ondoriozko hartzekodunen kontuei (420 kontuak eta 431 kontuetako saldo hartzekodunak) eta aplikatzeke dauden zerga kobrantzei (431 kontuetako saldo hartzekodunak) dagokienez, Diru-bilketa Zerbitzuak horiek ekitaldia ixten denean duten saldoei buruzko informazioa emanen du 2014ko urtarrilaren 24a baino lehen.
Halaber, Nafarroako Zerga Ogasuna erakunde autonomoak zerga unitateetan diru-sarrerak itzultzeko aurkeztu diren eskaeren zenbatekoa igorriko du aipatu egunean, zergen arabera banatuta, betiere abenduaren 31n diru-sarreren itzulketaren ondoriozko hartzekodun gisa erregistratzeke badaude kasuan kasuko zerga zordunen hartzekoan. 2014ko apirilaren 1a baino lehen eskaera horiei dagokien behin betiko informazioa eman beharko du, eskatzaileen benetako eskubideak aitortu ondoren, hala badagokie.
4.7. Zordunak (43 eta 44 kontuak).
Kontabilitate zentroek 2014ko urtarrilaren 24a baino lehen sartu beharko dute sistema informatikoan kobratzeke dauden zor guztien gaineko informazio eguneratua (4311) eta aurrekontutik kanpoko zordunei buruzkoena (4490).
4.7.1. 2013ko ekitaldiaren aurretik likidatutako eskubideen ondoriozko zordunak.
Data hori baino lehen, 2013ko ekitaldia ixtean aurreko urteetan likidatutako eskubideen ondoriozko zordunak dituzten departamentu edo erakunde autonomoek justifikatzen ez direnak deuseztatuko dituzte (Gastuak gauzatzea/Espedienteak sortzea/Aurrekontuetako obligazioak deuseztatu eta baliogabetzea ataletan bildutako eragiketen bitartez). Horrekin batera, Kontabilitate Zerbitzura igorriko dituzte mantentzen direnak, zorra hasi zeneko urtearen arabera ordenatuta eta ekitaldia ixtean indarra izanen duten eta derrigorrezko diru-bilketa agentziara eskualdatu behar ez diren eskubideak direla justifikatzen duten agirietan azalduta.
4.7.2. HKLren kudeaketa esparruko zordunak.
HKLren (Hirugarrenentzako Kontabilitate Lagungarria) kudeaketa esparruan kudeatzen diren zordunen kontuei dagokienez (431, 432, 435 eta 436), 2014ko urtarrilaren 31 baino lehen Diru-bilketa Zerbitzuak informazioa emanen du aurreko ekitaldietako (aurrekontu itxietako) zordunen eta haiek abenduaren 31n duten saldo zordunaren gainean ekitaldian egin den kudeaketari buruz.
Kontu horien gainean, eta egun berean, Diru-bilketa Zerbitzuak informazioa emanen du ekitaldian likidatu diren eskubideei dagozkien 2013ko abenduaren 31ko saldo zordunei buruz, aurreko lerroaldean bildutako informaziotik bereizia.
Aipatu kontuen saldoek bat eginen dute aurreko bi lerroaldeetan agertzen diren saldoen batuketarekin.
4.7.3. Zordun orokorrak eta/edo departamentukoak.
Kontabilitate zentroek 2014ko urtarrilaren 31 baino lehen igorri beharko dute Kontabilitate Zerbitzura zordun orokorrei eta/edo departamentukoei dagozkien abenduaren 31ko saldoen txostena, kanpoko hirugarrenek emandako zerrenda batean.
4.8. Aplikatzeko dauden formalizatze kontuak (554, 556, 585, 586 eta 589 kontuak).
Zor/kreditu konpentsazio edo barruko formalizazioen eragiketetan kontu multzo hau erabiltzen duten kontabilitate zentroek aseguratu beharko dute, ekitaldi itxieran, zero saldoa dutela. Halaber, eta 5540001700 eta 5540200000 kontuei dagokienez, itxiera ekitaldiko mugimenduak konpentsatu beharko dira, 2013ko abenduaren 31n.
Epigrafe honetan aipatutako konturen batek zero saldoa ez badu, Kontabilitate Zerbitzura igorriko da, 2014ko urtarrilaren 31 baino lehen, 2013ko abenduaren 31n duen saldoaren berri xehakatua.
Era berean, 5540001700, 5540200000, 5561000000, 5561000001, 5561000004, 5852000002 eta 5852000003 kontuei dagozkien zordunen eta hartzekodunen saldoei buruzko informazioa, HKLren (Hirugarrenentzako Kontabilitate Lagungarria) esparruan kudeatutakoa, emanen da.
4.9. Epe laburreko fidantzak eta CPUko errentamenduen fidantzak (180 eta 560 kontuak).
2013ko abenduaren 31 baino lehen, epe laburrera jasotako fidantzen ondoriozko hartzekodunak dituzten departamentuek edo erakunde autonomoek, haiek justifikatzen dituen bermea ez-beharrezkoa bihurtu direnekoak eta bost urtean bederen itzultzeko eskaerarik gabe egon direnak baliogabetuko dituzte, eta 2013ko ekitaldiari egotzi (Kontabilitate orokorra/Hirugarrenen kontabilitatea/Aurrekontuz kanpoko obligazioak deuseztatu eta baliogabetzea/Aurrekontuz kanpoko obligazioak baliogabetzea atalean bildutako eragiketen bitartez).
2014ko urtarrilaren 31 baino lehen, kontabilitate zentroek Idazkaritza Tekniko Nagusiaren txostena igorriko dute Kontabilitate Zerbitzura, 2013ko abenduaren 31n itzultzeke egonen diren epe laburrera jasotako fidantzen zerrenda agertuta, fidantzak eratu zireneko urtearen arabera ordenatuta.
5.–Jasotako eta emandako abalen gaineko informazioa.
5.1. 2014ko urtarrilaren 31 baino lehen, Ondare Zerbitzuak eta Diruzaintza Atalak Kontabilitate Zerbitzura igorri beharko dute abenduaren 31 arte eratutako abalen inguruko saldoen eta 2013an horietan izandako aldaketen txostena, bai eta jasotako abalen gaineko txostena ere.
5.2. Halaber, data hartarako Kontabilitate Zerbitzura igorriko dute emandako abalen saldo bizia, abenduaren 31n exekutatu ez baina kasuan kasuko finantza entitateari egin beharreko ordainketetan hutsen bat izan duten abalena, behar diren hornidurak gauzatzeko.
6.–Kontabilitatean korrelaziorik ez duten kontuak, finantza entitateetan.
6.1. Finantza entitateetan Diruzaintza Atalean zentralizaturik ez dauden kontuak, hau da, kontabilitatean korrelaziorik ez dutenak, kudeatzeko baimena duten arduradunek Nafarroako Gobernuko diruzaintza nagusian sartu beharko dituzte haien saldoak, dagokion ordainketa gutunaren bidez abenduaren 20a baino lehen (abenduaren 2. hamabostaldia) edo transferentziaren bidez abenduaren 31 baino lehen (hamabostalditik kanpo). Kutxa finkoko aurrerakinak eta justifikatu beharreko ordainketa aginduak salbuetsita daude, haien tratamendua 1.1.5 atalean biltzen baita.
6.2. Aurreko atalean aipatu diru-sarrera bidezkoa ez denean eta, betiere, kontu horiek abenduaren 31n saldo positiboa edo negatiboa badute, 2014ko urtarrilaren 31 baino lehen arduradun baimenduek, kasuan kasuko idazkaritza nagusiaren bidez, Diruzaintza Atalera igorri beharko dituzte kontu horiek abenduaren 31n duten saldoaren laburpena eta saldoaren osagaiei buruzko txostena.
7.–Sozietate eta fundazio publikoak.
7.1. Edukia.
Nafarroako Ogasun Publikoari buruzko apirilaren 4ko 13/2007 Foru Legearen 2. artikuluko f) eta g) idatz-zatietan aipatzen diren entitateen kontuetan, balantzea, emaitzen kontua, ondare garbiaren aldaketen egoera orria, eskudiru fluxuen egoera orria eta memoria bilduko dira, azaroaren 16ko 1514/2007 Errege Dekretuaren bidez onetsi zen Kontabilitate Plan Orokorrean adierazitako moduan eginak.
Nafarroako Ogasun Publikoari buruzko apirilaren 4ko 13/2007 Foru Legearen 128. eta 129. artikuluetan aipatzen diren diru-laguntzak eta beste transferentzia batzuk erakusten dituen egoera orrian, emandako kontabilitateko tratamendua aipatuko da, eta bereiz jasoko Estatuarenak, Foru Komunitatearenak, toki entitateenak eta Europar Batasunarenak; gainera, azken horiek zein funts edo finantza bitartekoren kargura jaso diren adieraziko da.
7.2. Igorri beharreko informazioa.
Sozietate eta fundazio publikoek Kontabilitate Zerbitzura igorri beharko dituzte, gobernu organo eskudunak haien kontuak onetsi baino astebete lehenago gutxienez, honako agiri hauek:
–Balantzea.
–Irabazi eta galeren kontua.
–Gastu eta diru-sarrera aitortuen egoera orria.
–Memoria.
–Galera eta irabazien kontuari buruzko informazio gehigarria: Foru Komunitateari saldutako ondasun eta zerbitzuak, aparteko gastu eta diru-sarrera xehakatuak, eta sozietateen gaineko zergatik zenbat dagokien atxikipen eta konturako ordainketei eta zenbat aurreko ekitaldiko likidazio erlatiboari.
–Jasotako transferentzia eta diru-laguntzen egoera orria.
–Europar Batasunetik jasotako funtsak.
–Balantzean ageri diren aktibo ez-finantzarioen bilakaerari buruzko txostena.
–Nafarroako Ogasun Publikoari buruzko apirilaren 4ko 13/2007 Foru Legearen 128. artikuluan aipatzen diren titulu baloreen zerrenda.
–Plantillaren egoera eta bilakaera erakusten dituen egoera orria.
Agiri horiek euskarri informatikoan igorriko dira, eta, memoria izan ezik, beste guztiak eginen dira informazioa hilabetero emateko erabiltzen den euskarri normalizatuetan. Hori, behin-behinekoz, 2014ko urtarrilaren 24a baino lehen igorri beharko da.
Halaber, onetsitako kontuak Kontabilitate Zerbitzura bidali beharko dituzte, kontabilitatearen erregulartasunari buruzko auditoria barne, 2014ko maiatzaren 10a baino lehen. Paperean nahiz pdf formatuan igorriko da.
8.–Beste erakunde batzuk.
Nafarroako Ogasun Publikoari buruzko apirilaren 4ko 13/2007 Foru Legearen xedapen gehigarri bakarrean aipatzen diren erakundeek xedapen horren 3. zenbakian adierazten den itzulketa egin beharko dute, dagozkien urteko kontuak onetsi eta hamabost eguneko epean.
