navarra.es
Castellano | Euskara | Français | English
Ezagutzera eman
150/2014 Foru Agindua, maiatzaren 16koa, Ekonomia, Ogasun, Industria eta Enpleguko kontseilariak emana, Nafarroako Foru Komunitateko Administrazioaren eta haren erakunde autonomoen esparruan Fakturen Kontabilitate Erregistroaren funtzionamendua ...
150/2014 FORU AGINDUA, MAIATZAREN 16KOA, EKONOMIA, OGASUN, INDUSTRIA ETA ENPLEGUKO KONTSEILARIAK EMANA, NAFARROAKO FORU KOMUNITATEKO ADMINISTRAZIOAREN ETA HAREN ERAKUNDE AUTONOMOEN ESPARRUAN FAKTUREN KONTABILITATE ERREGISTROAREN FUNTZIONAMENDUA EZARTZEN DUENA
(2014ko 106. NAOn argitaratutako testua, ekainaren 2an)
Atarikoa
Nafarroako Gobernuak 2012ko irailaren 12an hartutako Erabakian eta Ekonomia, Ogasun, Industria eta Enpleguko kontseilariaren azaroaren 9ko 944/2012 Foru Aginduan ezarritakoaz baliatuz, Fakturen Erregistroa arautu zen; bertan biltzen dira Nafarroako Foru Komunitateko Administrazioari eta haren erakunde autonomoei ondasunak eman eta zerbitzuak egiteagatik hornitzaileek emandako fakturak.
Sektore publikoan faktura elektronikoa bultzatu eta fakturen kontabilitateko erregistroa sortzeko abenduaren 27ko 25/2013 Legeak oinarrizko izaera du, eta, arestian aipatutako araudian bildutako zenbait alderdi arautzeaz gain, gai berri batzuk jorratzen ditu, Foru Administrazioan dauden antolaketa eta kudeaketa tresnen esparruan zehaztu beharrekoak. Gai horiek, gehienbat, fakturen erregistroa kontabilitate sistemarekin bateratzearen ingurukoak dira, eta bi helburu dituzte: zehatz-mehatz jakitea ordainketarako epeak betetzen diren, eta informazio zehatza eta fidagarria edukitzea jasotako fakturek kontabilitatean duten eraginaz.
Fakturen Erregistroa eta kontabilitate sistema erabat bateratu beharrak faktura jasotzean atzitutako informazioa osatzera behartzen du, kontabilitate-egozpenari buruzko alderdiak ere erantsi behar direlako. Hasierako unean tramitazio horrek denbora aldetik ekar dezakeen kaltea saihesteko, bide bat diseinatu da agirien trafikoa ahalik eta txikiena izan dadin, nahitaezkoa soilik; izan ere, aukera ematen du fakturen erregistroan oharra egiten duenak edo hornitzaileak berak, faktura Agirien Erregistro Elektronikoa erabiliz igortzen badu, hasiera batetik adierazteko, okerrik egiteko modurik gabe, zein den fakturan islatutako gastuaren kontabilitate eta aurrekontu egozpena.
Sektore publikoan faktura elektronikoa bultzatu eta fakturen kontabilitateko erregistroa sortzeko abenduaren 27ko 25/2013 Legeak ez du aldaketarik eskatzen Gobernuak 2012ko irailaren 12an hartutako Erabakian, baina eragiketetarako esparru berri bat zehazten du, arauen aldetik euskarri berezia behar duena. Aipatutako Erabakiaren 12. atala aplikatuz, Ekonomia, Ogasun, Industria eta Enpleguko kontseilariak eskumena du Erabakian bertan bildutako jarraibideak aplikatzeko, alderdi teknikoak eta operatiboak garatzeko.
Horrenbestez, agindu dut:
1. artikulua. Fakturen Kontabilitate Erregistroa.
Foru Komunitateko Administrazioaren eta haren erakunde autonomoen esparruan, Sektore publikoan faktura elektronikoa bultzatu eta fakturen kontabilitateko erregistroa sortzeko abenduaren 27ko 25/2013 Legearen IV. kapituluan aipatzen den fakturen kontabilitateko erregistroa Nafarroako Gobernuak 2012ko irailaren 12an hartutako Erabakiaren eta Ekonomia, Ogasun, Industria eta Enpleguko kontseilariaren azaroaren 9ko 944/2012 Foru Aginduaren babesean sortutako fakturen erregistroa izanen da.
2. artikulua. Fakturen Kontabilitate Erregistroan biltzen den informazioa.
Fakturen kontabilitate erregistroaren betekizun funtzionalak eta teknikoak arautzen dituen martxoaren 27ko HAP/492/2014 Aginduaren 5. artikuluan aipatutakoa galarazi gabe, Foru Komunitateko Administrazioaren eta haren erakunde autonomoen fakturen kontabilitateko erregistroko oharretan honako informazio hau jasoko da:
–Faktura-emailearen Identifikazio Fiskaleko Zenbakia edo identifikatzailearen zenbaki baliokidea.
–Faktura ematera beharturik dagoenaren izen-deiturak, sozietatearen izena, osorik.
–Fakturaren identifikazio zenbakia.
–Fakturaren zenbakia eta noiz aurkeztu den administrazio erregistroan.
–Fakturen erregistroan noiz egin den oharra eta emandako zenbakia.
–Faktura noiz emana den.
–Eragiketaren zenbatekoa.
–Zenbatekoa adierazia dagoen txanpon unitatea, ISO 4217 Alpha-3 kodifikazioarekin bat.
–Faktura esleitzeko kodea edo kodeak, kasuan kasuko kontabilitate eta aurrekontu kokapenari dagokiona. Fakturak kontabilitatean nahiz aurrekontuan duen eragina modu egokian islatzeko behar diren esleipen kodeak izanen ditu, eta haietako bakoitzari dagokion zenbatekoa adieraziko da.
–Fakturaren tramitaziorako eskumena duen unitate organikoaren identifikazioa, Nafarroako Gobernuaren kodetze sistemarekin bat.
3. artikulua. Esleipen kodeak.
Esleipen kodeek adierazten dute, kodifikatuta, fakturaren erreferentzia den gastua kokatzeko epigrafea zein den, kontabilitatean nahiz aurrekontuan; kode horiek bide ematen dute, halaber, kontabilitate sisteman egin beharreko oharrak automatizatzeko. Kode horiek kontabilitate zentroak sortuko ditu, hain zuzen ere kodeei lotzen zaizkien fakturetan erreferentzia den gastua kontabilizatzeko erantzukizuna esleitua duenak; gastuaren organo kudeatzaileei eman beharko zaizkie, uneoro jakin dezaten zein diren beren eskumeneko fakturei dagozkien esleipen kodeak.
4. artikulua. Oharrak egitea Fakturen Erregistroan.
1.–Fakturak jasotzen dituzten organo kudeatzaileek berehala eginen dituzte Fakturen Erregistroko oharrak, eta hilabete bakoitzaren 10a baino lehen adierazi beharko dute zein diren aurreko hilabetean erregistratutako bere eskumeneko fakturei dagozkien esleipen kodeak.
2.–Aurrekoa gorabehera, ekainaren 23ko 70/2008 Foru Dekretuaren bidez sortutako Agirien Erregistro Elektronikoan ezarria den prozeduraren bidez hornitzaileek entregatutako fakturen oharra automatikoki eginen da Fakturen Erregistroan. Horretarako, hornitzaileek esleipen kodea edo unitate organikoaren kodea erantsi beharko dute, edo biak, gastuaren kudeaketaz arduratzen den organo administratiboak hala egiteko jakinarazi baldin badio hornitzaileari.
3.–Fakturen erreferentzia diren gastu konpromisoak hartzen dituzten organoek esleipen kodeak eta unitate organikoen identifikazioa jakinarazi beharko dizkiete hornitzaileei, ezarritako faktura Agirien Erregistro Elektronikoaren bidez entregatzeko aukeraz balia daitezen.
5. artikulua. Fakturen kontabilitateko tramitazioa.
Aurkeztutako fakturen ondorioz onartzen diren aurrekontu betebeharrak kontabilitate sisteman idatzi beharko dira, soilik, Fakturen Erregistroaren euskarri den sistema informatikoan horretarako aukera ematen denetik aurrera. Aukera hori unitate organiko eskudunak aktibatuko du faktura bakoitzean, haren kontabilitateko tramitazioa has daitekeen unean.
6. artikulua. Fakturen Erregistroarekin lotutako eginkizunak.
1.–Idazkaritza tekniko nagusiek eta prozedura administratiboa antolatzeko eskumenak dituzten erakunde autonomoetako organoek honako eginkizun hauek beteko dituzte, zeinek bere jarduketa esparruan:
a) Aurrekontuko kode organiko bakoitzeko fakturak tramitatzeko eskumena duten unitate organikoak zein diren zehaztu eta Kontabilitate Zerbitzuari jakinaraztea.
b) Tramitazio lanak bete behar dituen unitate organiko bakoitzari erabiltzaileak esleitzea. Unitate organiko bati esleitutako erabiltzaileek baimena izanen dute tramitazio lanak egiteko fakturetan, bertan ageri baldin bada unitate organiko hori eskuduna dela Fakturen Erregistroan horiek tramitatzeko, eta, horrexegatik, ziurtatu beharko da fakturak tramitatzeko eskumena duten unitate organikoek esleitutako erabiltzaileak dituztela.
c) Jasotako fakturak tramitatzeko prozedura Fakturen Erregistroaren euskarri sistemaren ezaugarrietara egokitzea, aurreikusitako informazioa modu egokian eman dezan, legez ezarritako ordainketa epeak betetzeari kalterik eragin gabe.
2.–Kontabilitate zentroek eginkizun hauek beteko dituzte:
a) Esleipen kodeak sortzea eta agiriekin eta aurrekontuko kontu-sailekin duten lotura egunean izatea.
b) Unitateei jakinaraztea erabili beharreko esleipen kodeak, haietako bakoitzari dagozkion kasuak edo egoerak adieraziz.
3.–Fakturen erreferentzia diren gastu konpromisoak hartzen dituzten organoek jasotako fakturak sortu dituzten ondasun eta zerbitzuen hornitzaileei jakinaraziko diete zein diren hartutako konpromisoari dagozkion esleipen kodeak eta/edo unitate organikoaren identifikazioa, eta haiek faktura bakoitzean sartu beharko dituztenak.
4.–Fakturak kudeatzen dituzten unitateek honako eginkizun hauek beteko dituzte:
a) Berehala egiaztatzea jasotako faktura bere eskumenen esparrukoa den, eta hartzaile zuzenari bideratu edo, ezinezkoa baldin bada, faktura igorleari itzultzea.
b) Oharra egitea Fakturen Erregistroan, ordurako egina ez badago.
c) Fakturen Erregistroaren euskarri sisteman adieraztea faktura baliozkotu dela, eta horrek hasiera emanen dio betebeharra onartzeko tramite administratiboari.
5.–Kontabilitate Zerbitzuak eginkizun hauek beteko ditu:
a) Fakturen Erregistroaren euskarria den sistema informatikoaren zehaztapenak eta kontabilitate sistemarekin dituen loturak definitzea.
b) Fakturetatik datozen gastuak aurrekontuko zein kontu-sailetan kargatuko diren, kontu-sail horiek guztiek kudeaketako unitate organiko bat esleitua dutela egiaztatzea.
c) Sektore publikoan faktura elektronikoa bultzatu eta fakturen kontabilitateko erregistroa sortzeko abenduaren 27ko 25/2013 Legearen 10. artikuluan aipatzen diren lanak betetzea.
d) Hornitzaileei ordaintzeko epeak noraino betetzen diren jakiteko txostenak egitea. Datuak zuzendaritza nagusien edo erakunde autonomoen arabera zehaztuko dira.
e) Aurreikusitako epeetan esleipen kodea adierazi gabe duten fakturen gainean errekerimenduak egitea.
Xedapen Indargabetzailea
Ekonomia, Ogasun, Industria eta Enpleguko kontseilariak ekainaren 9an emaniko 944/2012 Foru Agindua, Fakturen Erregistroaren funtzionamendua arautzen duena, indarrik gabe gelditu da.
Azken Xedapena. Argitaratzea eta indarra hartzea.
Foru agindu hau Nafarroako Aldizkari Ofizialean argitaratuko da, eta 2014ko ekainaren 15ean hartuko du indarra.
