navarra.es
Castellano | Euskara | Français | English
Ezagutzera eman
117/2014 Foru Agindua, apirilaren 4koa, Ekonomia, Ogasun, Industria eta Enpleguko kontseilariak emana. Honen bidez “Helbide aldaketaren edo norberaren edo familiakoen datuen aldaketaren berri ematea. Bikote egonkorren Erregistro fiskala” izeneko 030
117/2014 FORU AGINDUA, APIRILAREN 4KOA, EKONOMIA, OGASUN, INDUSTRIA ETA ENPLEGUKO KONTSEILARIAK EMANA. HONEN BIDEZ “HELBIDE ALDAKETAREN EDO NORBERAREN EDO FAMILIAKOEN DATUEN ALDAKETAREN BERRI EMATEA. BIKOTE EGONKORREN ERREGISTRO FISKALA” IZENEKO 030 EREDU BERRIA ONESTEN DA
(2014ko 72. NAOn argitaratutako testua, apirilaren 11n)
Atarikoa
Tributuei buruzko abenduaren 14ko 13/2000 Foru Lege Orokorraren 37.3 artikuluan ezartzen da tributudunaren nahitaezko ardura dela Zerga Administrazioari komunikatzea helbidea aldatu duela, horretarako berariazko aitorpenaren bidez.
Betebehar hori betetzeko eta, bestalde, orain arteko eragozpenak saihesteko, izan ere helbide aldaketaren berri emateko modu bakarra baitzen Pertsona Fisikoen Errentaren gaineko Zergaren urteko aitorpenak aurkeztea, Ekonomia eta Ogasuneko kontseilariaren otsailaren 10eko 36/2004 Foru Aginduak 030 eredua onetsi zuen, helbide aldaketaren edo norberaren edo familiakoen datuen aldaketaren berri emateko. Eredu hori erabil zezaketen pertsona fisikoek eta pertsona juridikoek beren helbidearen aldaketaren berri emateko.
Orain arte, 030 ereduak ahalbidetzen zuen pertsona juridikoek beren helbide fiskalaren aldaketaren berri ematea. Halaber, entitateen zentsuan alta edo baja hartzeko edo aldaketak egiteko eskaera-ereduaren bidez ere egin daiteke. Zerga Administrazioarekiko tramiteak errazteko eta sinplifikatzeko eta bikoiztasunak saihesteko, egokitzat jo da, pertsona juridikoei dagokienez, entitateen zentsuko alta, baja edo aldaketetarako erabiltzen den eredu horren bidez bakarrik egin dadila komunikazio hori; aipatutako aldaketen artean sartuko da helbide fiskalaren aldaketa. Beraz, pertsona fisikoen datuen berri emateko bakarrik erabiliko da 030 eredua.
Arrazoi berberengatik, egokitzat jo da familia unitatea osatzen duten seme-alabei buruzko informazioa (orain arte eredu horren bidez ematen ahal zen), Pertsona Fisikoen Errentaren gaineko Zergaren aitorpenaren bidez bakarrik komunika dadila.
Bestalde, Zenbait Zerga Aldatu eta Beste Tributu-neurri Batzuk hartzeko abenduaren 28ko 38/2013 Foru Legeak xedapen gehigarri berri bat, hogeita batgarrena, erantsi dio Tributuei buruzko abenduaren 14ko 13/2000 Foru Lege Orokorrari. Hortaz, bikote egonkorren kideak ezkontideekin parekatzen dira, ondoko zergen araudian ezarritakoaren ondorioetarako: Pertsona Fisikoen Errentaren gaineko Zerga, Ondarearen gaineko Zerga, Oinordetzen eta Dohaintzen gaineko Zerga, Ondare Eskualdaketen eta Egintza Juridiko Dokumentatuen gaineko Zerga eta Sozietateen gaineko Zerga. Betiere, horretarako, aplikatzekoa den araudi zibilarekin bat izanen da bikote egonkorra, eta bikote egonkorren Erregistro fiskalean izena eman behar da. Ondorio horietarako, bikote egonkorren Erregistro fiskal hori sortu da, eta ezarri da bikote egonkorreko bi kideek beteko dutela erregistro horretan izena emateko eskaera egiteko inprimakia.
Hogeita batgarren xedapen gehigarri horrek berak, 6. atalean, Ekonomia, Ogasun, Industria eta Enpleguko kontseilaria gaitzen du, foru agindu bidez bikote egonkorren Erregistro fiskalaren edukia eta funtzionamendua arau dezan eta izena emateko eta kentzeko eskaerak egiteko behar diren inprimakiak onets ditzan. Xedapen hori betez, otsailaren 19ko 73/2014 Foru Agindua onetsi zen, Nafarroako Foru Komunitateko bikote egonkorren Erregistro fiskalaren edukia eta funtzionamendua arautu zuena eta 030 eredua gaitu zuena Nafarroako Foru Komunitateko bikote egonkorren Erregistro fiskalean izena emateko eta kentzeko eta osoak ez diren edo guztiz zuzenak ez diren datuak zuzentzeko eta aldatzeko.
Bestalde, aurkeztu beharreko datuak hain antzekoak direnez eta horretarako eredu berariazko bat ez zegoenez, egokitzat jo da 030 eredua gaitzea Identifikazio Fiskaleko Zenbakia eskatzeko, Nortasun Agiri Nazionala izatera beharturik ez izanik edo Atzerritarren Identifikazio Zenbakia ez izanik tributu arloko eragiketak egin behar badira, edo tributu arloan eragina dutenak, edo horietan parte hartu behar bada.
Horregatik, bidezkotzat jo da 030 eredu berri bat onestea, aurretik aipatutako aldaketak bilduko dituena.
Horrenbestez, eta Tributuei buruzko abenduaren 14ko 13/2000 Foru Lege Orokorraren 6. artikuluak eta zazpigarren eta hogeita batgarren xedapen gehigarriek eta Identifikazio Fiskaleko Zenbakia eta horri lotutako hainbat zentsu arautzen dituen otsailaren 22ko 8/2010 Foru Dekretuaren azken xedapenetako lehenak emandako ahalmena erabiliz, agindu dut:
1. artikulua. 030 eredua onestea.
1. “Helbide aldaketaren edo norberaren edo familiakoen datuen aldaketaren berri ematea. Bikote egonkorren Erregistro fiskala” izeneko 030 eredu berria onesten da, foru agindu honen eranskinean ageri dena.
2. Ereduaren aurkezpena, foru agindu honen 4. artikuluan xedatutakoarekin bat, bide hauetako bat erabiliz eginen da:
a) Paper inprimatuan, foru agindu honen eranskinean ezarritako ereduaren arabera; bi ale ditu: Administrazioarentzako alea eta interesdunarentzako alea.
b) Telematika bidez, Internet erabiliz, 7. eta 8. artikuluetan ezarritako baldintza orokorrei eta prozedurari jarraikiz.
2. artikulua. 030 eredua erabiltzea.
030 eredu hau bakar-bakarrik pertsona fisikoek erabiliko dute, eta helburu hauetarako:
1. Zerga Administrazioari komunikatzea helbide fiskalaren aldaketa, edo, interesdunari jakinarazpenak egiteko helbidearena, edo, behar denean, bikote ezkonduaren edo bikote egonkorreko kideen helbidearen aldaketa.
2. Ondokoetan izaten diren aldaketen berri ematea: egoera zibila, posta elektronikoaren helbidea, harremanetarako telefonoa edo beste datu pertsonal batzuk.
3. Identifikazio Fiskaleko Zenbakia eskatzea pertsona horientzat zeinak, espainiarrak nahiz Espainiako nazionalitaterik ez duten pertsona fisikoak izanik, tributu arloko eragiketak edo tributu arloan eragina dutenak egin behar badituzte edo horietan parte hartu behar badute, beharturik ez egonik Nortasun Agiri Nazionala izatera edo Atzerritarren Identifikazio Zenbakia ez dutela, hurrenez hurren.
4. Eskatzea bai bikote egonkorren Erregistro fiskalean inskribatzeko bai inskripzioa ezabatzeko, baita erregistroko beste edozein datu aldatu edo zuzentzeko ere, osorik edo zuzenak ez direnean.
5. Ezkontideen edo bikote egonkorreko kideen arteko itunen berri ematea.
3. artikulua. 030 eredua betetzea.
1. Oro har, 030 ereduarekin bat datorren komunikazioa banaka beteko du zergadunak, helbidearen aldaketaren berri eman nahi duenean, edo bere datu pertsonalen edo familiakoen datuen aldaketen berri.
2. Nolanahi ere, ezkontzeagatik egoera zibilean izandako aldaketaren berri eman nahi denean, edo helbide fiskalaren edo jakinarazpenetarako helbidearen aldaketarena eta helbide horiek berberak baldin badira bi ezkontideentzat edo bikote egonkorreko kideentzat, edo bikote egonkorren Erregistro fiskaleko inskripzioa bertan behera uzteko eskatzen denean, biek bete eta sina dezakete eredua.
3. Nafarroako Foru Komunitateko bikote egonkorren Erregistroan inskribatzeko eskatzen denean, eredua bi kideek bete eta sinatu beharko dute baldin eta eredua paperean aurkezten bada, eta banaka, bikote egonkorreko biek ere, baldin eta telematikoki aurkezten bada.
4. artikulua. 030 eredua aurkezteko modua eta tokia.
030 eredua honela aurkezten ahalko da:
1. Paperean aurkezten denean, Nafarroako Zerga Ogasuna erakunde autonomoaren edozein bulegotan aurkeztuko da.
2. Telematika bidez, Internet erabiliz, 7. eta 8. artikuluetan ezarritako baldintza orokorrei eta prozedurari jarraikiz.
5. artikulua. Aurkezteko epea.
030 eredua noiznahi aurkez daiteke, aurkeztu beharra ekartzen duen zergatia gertatzen denetik hasita.
6. artikulua. Aurkeztu beharreko agiriak.
1. Ondoren azaltzen diren agiriak aurkeztu beharko dira:
a) Egoera zibila aldatu dela komunikatzen denean, interesdunak banantzearen, dibortzioaren edo ezkontza deuseztatuaren epaia ekarri beharko du, edo aitortzailearen gaur egungo egoera zibila frogatzen duen Erregistro Zibilaren egiaztagiria edo familia liburua.
b) Jakinarazpenetarako helbidea aldatu dela komunikatzen denean, interesdunaren NANa aurkeztuko da, jatorrizkoa edo fotokopia konpultsatua.
c) Identifikazio Fiskaleko Zenbakia adingabe batendako eskatzen denean, familia liburua aurkeztu beharko da edo beste nortasun agiriren bat. Egoitza atzerrian duen espainiar batendako eskatzen bada, eta pertsona horrek NANik ez badu, pasaportea aurkeztu beharko da, eta atzerrian bizi dela frogatzen duen agiria. Eskatzailea AIZrik (Atzerritarraren Identifikazio Zenbakia) ez daukan atzerritarra bada, pasaportea aurkeztu beharko du edo bere herriko beste agiriren bat, nortasuna, adina eta nazionalitatea frogatzen dituena, baita ziurtagiri bat ere, erakusteko ez dagoela derrigortua AIZ izatera, hala baldin bada.
d) Bikote egonkorraren araubide ekonomikoaren gaineko itunak daudenean, Erregistroan biltzen ahalko dira. Hala bada, behar diren frogagiriak aurkeztuko dira, baita erantzukizuneko aitorpena ere, Erregistroan biltzen den une horretan araubidea indarrean dagoela adieraziz.
Araubide ekonomikoari buruzko itunak inskribatutakoan, ondotik datozen aldaketak ere sartu beharko dira bikote egonkorren Erregistro fiskalean, behar adina agiri aurkeztuz eta erantzukizuneko aitorpena eginez, adierazteko Erregistroan aldaketa egiteko eskatu den unean araubide berria indarrean dagoela.
e) Ezkontideen araubide ekonomikoari buruzko itunak badirenean, eredu honen bidez komunikatzen ahalko dira. Hala bada, behar diren egiaztagiriak aurkeztuko dira, baita erantzukizuneko aitorpena ere, adierazteko Erregistroan aldaketa egiteko eskatu den unean araubide berria indarrean dagoela.
Araubide ekonomikoari buruzko itunak inskribatutakoan, ondoren egiten diren aldaketak ere komunikatu beharko dira, behar adina agiri aurkeztuz eta erantzukizuneko aitorpena eginez, adierazteko Erregistroan aldaketa egiteko eskatu den unean araubide berria indarrean dagoela.
2. Nafarroako Foru Komunitateko bikote egonkorren Erregistro fiskalean inskribatzeko eskaerarekin batera, honako aitorpen hauek aurkeztuko dira:
a) Erantzukizuneko aitorpena, adierazten duena kideek bikote egonkor bat osatzen dutela, aplikatzekoa zaien legeria zibilarekin bat.
b) Erantzukizuneko aitorpena, adierazten duena kideetako batek ere ez duela beste norbaitekin ezkontza loturarik nahiz beste bikote egonkorrik.
c) Erantzukizuneko aitorpena, adierazten duena bikoteko kideen artean ez dagoela lerro zuzenean odolkidetasunezko edo adopzio bidezko ahaidetasunik, ezta alboko lerrotik bigarren mailara bitarteko odolkidetasunezko ahaidetasunik ere.
d) Erantzukizuneko aitorpena, adierazten duena bikoteko kideetako batek ere ez duela desgaitasun edo anomalia psikikorik, eskaera hau egiteko adostasuna emateko desgaitzen duenik.
7. artikulua. 030 ereduaren aurkezpen telematikorako baldintza orokorrak.
1. 030 ereduaren aurkezpen telematikoa egiteko, baldintza hauek bete beharko dira:
a) Aitortzaileak identifikazio fiskaleko zenbakia eduki beharko du (IFZ).
b) Aitortzaileak ziurtagiri elektronikoa eduki beharko du, Nafarroako Zerga Ogasunak onartua, Nafarroako Zerga Ogasunaren esparruan baliabide elektroniko, informatiko eta telematikoen (EIT) erabilera arautzen duen uztailaren 17ko 50/2006 Foru Dekretuan ezarrita dagoenari jarraikiz, edo, bestela, bere identifikazio pertsonalerako kodea (PIN), Nafarroako Zerga Ogasunak emana, nortasuna frogatu ahal izateko.
Baimenduta dauden ziurtagiri elektronikoak eta ziurtapen zerbitzuak dagokien atalean aipatzen dira; hartara, Interneteko http://www.hacienda.navarra.es helbidetik iristen ahal da.
c) Aitorpenak, komunikazioak eta zerga arloko beste agiri batzuk hirugarren pertsonen izenean telematika bidez aurkezteko eta tributu zorren ordainketa telematika bidez tramitatzeko kanpo-lankidetzarako akordioa onesten duen Ekonomia eta Ogasuneko kontseilariaren ekainaren 29ko 130/2009 Foru Aginduan xedatutakoarekin bat, aurkezleak, aitorpenak hirugarrenen izenean egiteko baimendutako pertsona edo entitate bat baldin bada, Nafarroako Zerga Ogasunak onartutako ziurtagiri elektronikoa, aurreko b) letran aipatua, eduki beharko du.
d) 030 ereduaren aurkezpen telematikoa egiteko, aitortzaileak edo baimendutako aurkezleak, halakorik bada, Nafarroako atarian eskuragarri dagoen web inprimakia erabili beharko du. Hark ahalbidetuko du fitxategi bat inportatzea, kasu bakoitzean aurkeztu beharreko agiri guztiekin.
e) Aitortzaileek aurkezpen telematiko hori egiteko eskatzen diren arau teknikoak bete beharko dituzte. Arau horiek Nafarroako Zerga Ogasunaren web orrian daude ikusgai, Interneteko http://www.hacienda.navarra.es helbidean.
2. Telematika bidez igortzen diren aitorpenetan akats formalak atzematen direnean, sistemak berak emanen dio horren berri aitortzaileari errore-mezuen bitartez, behar diren zuzenketak egin ditzan.
8. artikulua. 030 ereduari dagozkion aitorpenen aurkezpen telematikoa, Internet bidez, egiteko prozedura.
Aitorpenen aurkezpen telematikoa Internet bidez egiteko, prozedura hau erabiliko da:
1. Nafarroako Ataritik, Ogasunarekin egiten diren izapideen zerbitzuan sartu.
2. Egin nahi den aitorpenaren eredua hautatu, eta aitorpena aurkeztu ahal izateko datu guztiak bete.
3. Aitorpena bete ondoren, igortzeko aukera erabili. Aitorpena egokia bada, sistemak balioztatuko du. Akatsik atzemanez gero, inprimakiaren bidez komunikatuko da, eta haiek zuzendu arte ezin izanen da aitorpena aurkeztu. Aitorpena zuzen bete ondoren, sistemak komunikatuko du aurkeztutako aitorpenari esleitutako zenbakia eta, orobat, inprimatzeko aukera eskainiko du, frogagiri gisa erabiltzeko.
Xedapen Indargabetzaile Bakarra. Arauak indargabetzea.
Foru agindu hau indarrean sartzean, indarrik gabe geldituko da Ekonomia eta Ogasuneko kontseilariaren otsailaren 10eko 36/2004 Foru Agindua. Horren bidez onetsi zen 030 eredua, helbide aldaketaren edo norberaren edo familiakoen datuen aldaketaren berri ematekoa, zeina pertsona fisikoek nahiz juridikoek erabil baitezakete helbide fiskalez aldatu direla adierazteko; horrez gain inprimakia non eta nola aurkeztu behar den zehaztu eta aurkezpen telematikorako prozedura ezarri zen.
Azken Xedapen Bakarra
Foru agindu honek Nafarroako Aldizkari Ofizialean argitaratu eta biharamunean hartuko du indarra.
ERANSKINA
