navarra.es
Castellano | Euskara | Français | English
Ezagutzera eman
475/2014 Foru Agindua, abenduaren 10ekoa, Ekonomia, Ogasun, Industria eta Enpleguko kontseilariak emana, Foru Komunitateko Administrazioaren eta haren erakunde autonomoen organo eta unitateei igorritako faktura elektronikoak aurkezteko arauak ezartze
(2014ko 250. NAOn argitaratutako testua, abenduaren 24an)
Atarikoa
Ekonomia, Ogasun, Industria eta Enpleguko kontseilariaren maiatzaren 16ko 150/2014 Foru Aginduaren bidez, Fakturen Kontabilitate Erregistroaren funtzionamendua ezarri zen Nafarroako Foru Komunitateko Administrazioaren eta haren erakunde autonomoen esparruan. Foru agindu horren 4. artikuluan, beren fakturak igortzeko dokumentuen Erregistro Elektronikoa erabiltzen duten hornitzaileei behartu egiten zaie kudeatzaileek emandako kontabilitate esleipenaren kodea sartzera; era horretan, fakturak automatikoki erregistratzen dira, behar diren kontabilitateko idatzoharrak egiten dira, eta zuzenean igortzen haien tramitazioaz arduratzen den unitatera.
Sektore publikoan faktura elektronikoa bultzatu eta fakturen kontabilitate erregistroa sortzeko abenduaren 27ko 25/2013 Legeak faktura elektronikoa egiteko eta igortzeko baimentzen ditu Administrazio Publikoari ondasunak eman edo zerbitzuak egin dizkioten hornitzaileak. Betiere, Legeak zenbait hornitzaile behartzen ditu faktura elektronikoa erabiltzera eta dagokion gune orokorraren bidez aurkeztera. Horretarako, Estatua, autonomia erkidegoak eta toki entitateak gune orokor bat izatera behartzen dira faktura elektronikoak sartzeko, eta haren bidez jasotzera lotutako edo menpeko entitate, ente eta erakundeei dagozkien faktura elektroniko guztiak. Dena dela, autonomia erkidegoek Estatuak eskura jartzen duen gune orokorra erabiltzen ahalko dute.
Estatuko Administrazioak ezarritako gune orokorra erabiltzeko erabakia hartu du Nafarroako Gobernuak eta, beraz, gune orokor horren bidez aurkeztu beharko dira Foru Komunitateko Administrazioari eta haren erakunde autonomoei zuzendutako faktura elektronikoak. Horrek faktura elektronikoari kontabilitate esleipenaren kodea nola erantsiko zaion adieraztera behartzen du.
Bestetik, unibertsitatez kanpoko ikastetxe publikoetako kudeaketaren azpiegituragatik, hobe da ikastetxeak ondasunez eta zerbitzuz hornitzen dituztenei faktura elektronikoak aurkezteko betebeharra kentzea, eta, horretarako, Sektore publikoan faktura elektronikoa bultzatu eta fakturen kontabilitate erregistroa sortzeko abenduaren 27ko 25/2013 Legeak baimentzen duen aukera erabiltzea.
Nafarroako Gobernuaren abenduaren 10eko Erabakiak, zeinaren bidez Foru Komunitateko Administrazioa Estatuko Administrazio Orokorraren faktura elektronikoen sarrerako gune orokorrera atxikitzen baitzaio, baimena ematen dio Ekonomia, Ogasun, Industria eta Enpleguko kontseilariari beharrezko neurri guztiak hartzeko, hartzaileek plataforma honen bitartez igorritako faktura elektronikoak behar bezala jaso ditzaten.
Horrenbestez, agindu dut:
1. artikulua. Fakturan sartu beharreko informazioa.
Foru Komunitateko Administrazioko edo haren erakunde autonomoetako hartzaileei igortzen zaizkien faktura elektronikoek, Sektore publikoan faktura elektronikoa bultzatu eta fakturen kontabilitate erregistroa sortzeko abenduaren 27ko 25/2013 Legeak jasotzen duenaren arabera, Ekonomia, Ogasun, Industria eta Enpleguko kontseilariaren maiatzaren 16ko 150/2014 Foru Aginduaren 3. artikuluan aipatzen den esleipen kodea jaso beharko dute; foru agindu horrek Fakturen Kontabilitate Erregistroaren funtzionamendua ezartzen du Nafarroako Foru Komunitateko Administrazioaren eta haren erakunde autonomoen esparruan.
Foru agindu horren 4. artikuluan adierazitakoarekin bat, fakturetan aipatzen diren gastu konpromisoak hartzen dituzten organoek emanen dizkiete hornitzaileei esleipen kode hori eta beharrezko unitate organikoen identifikazioa.
Aurreko atalean adierazitakoa galarazi gabe, gastua kudeatzen duten organoek eta unitateek albaranen erreferentziak, eskaerak edo fakturari dagokion ondasuna edo zerbitzua zein den jakiteko balio duen beste edozein elementu fakturetan sartzeko eskatzen ahalko diete hornitzaileei.
Aukera gisa, hornitzaileek kontzeptu orokor bat adierazten ahalko dute dagokion etiketan, hau da, faktura horri buruz egiten diren oharretan agertuko den testua. Etiketa horretan baliorik adierazten ez bada, Nafarroako Gobernuak fakturaren lehen lerroko deskripzioa hartuko du kontzeptu edo titulu orokor gisa.
Artikulu honetan aipatzen diren elementuak fakturan kokatzeko, eranskinean adierazitako posizio eta tarteak erabiliko dira.
2. artikulua. Fakturak atzera botatzea.
Faktura elektronikoen sarrerako gune orokorra erregulatzen duen araudian ezarritako formatu estandarrean beharrezkotzat jotzen den informazio guztia jasotzen ez duten faktura elektronikoak atzera bota eta igorleari itzuliko zaizkio, baita edukian akatsak izateagatik gastuaren kontzeptua behar bezala zehaztea galarazten dutenak ere, eta, bereziki, foru agindu honen 1. artikuluan aipatzen den nahitaezko informazioa behar bezala jasotzen ez dutenak.
3. artikulua. Ikastetxeetara igorritako fakturen salbuespena.
Sektore publikoan faktura elektronikoa bultzatu eta fakturen kontabilitate erregistroa sortzeko abenduaren 27ko 25/2013 Legearen 4. artikuluarekin bat, Hezkuntza Departamentuaren menpeko unibertsitatez kanpoko ikastetxeak ondasunez edo zerbitzuz hornitzen dituztenak faktura elektronikoa egin beharretik salbuesten dira, fakturen zenbatekoa 5.000 euro artekoa den kasuetan.
Sektore publikoan faktura elektronikoa bultzatu eta fakturen kontabilitate erregistroa sortzeko abenduaren 27ko 25/2013 Legearen 9.1 artikuluarekin bat, Hezkuntza Departamentuaren menpeko unibertsitatez kanpoko ikastetxe publikoentzako fakturak Nafarroako Foru Komunitateko Administrazioaren eta haren erakunde autonomoen Fakturen Kontabilitate Erregistroan jasotzeko betebeharretik salbu dira, haien zenbatekoa 5.000 euro artekoa denean.
Azken Xedapen Bakarra. Argitaratzea eta indarra hartzea.
Foru agindu hau Nafarroako Aldizkari Ofizialean argitaratuko da, eta argitaratu eta biharamunean hartuko du indarra.
ERANSKINA
|
INFORMAZIOA |
ETIKETAK | |||
|
Fakturaren berariazko datuak |
Fakturaren kontzeptua |
3.1.9.3. |
InvoiceAdditionalInformation | |
|
Lerroko edo posizioko berariazko datuak |
Esleipen kodea |
3.1.6.1.5 |
ReceiverContractReference | |
|
Albarana |
Albaranaren erref. |
3.1.6.1.12.1.1 |
DeliveryNoteNumber | |
|
Eskaeraren erref. |
3.1.6.1.7 |
ReceiverTransactionReference | ||
|
Eskaerako posizioa |
3.1.6.1.11 |
SequenceNumber | ||
