navarra.es

Castellano | Euskara | Français | English

Bilatzaile erabili!

174/1999 Foru Dekretua, maiatzaren 24koa, Pertsona Fisikoen Errentaren gaineko zergaren erregelamendua onesten duena

 

(Jatorrizkoa 1999ko 98. NAOn argitaratutako testua, abuztuaren 6an. Aldaketak: 215/2007 Foru Dekretua, irailaren 24koa; 66/2009 Foru Dekretua, abuztuaren 24koa; 344/2001 Foru Dekretua, abenduaren 17koa; 673/2003 Foru Dekretua, azaroaren 10ekoa; 49/2006 Foru Dekretua, uztailaren 17koa; 635/1999 Foru Dekretua, abenduaren 30ekoa; 126/2005 Foru Dekretua, urriaren 10ekoa; 34/2010 Foru Dekretua, maiatzaren 31koa; 15/2006 Foru Dekretua, apirilaren 3koa; 1/2010 Foru Dekretua, urtarrilaren 11koa; 22/2001 Foru Dekretua, martxoaren 28koa; 34/2010 Foru Dekretua, maiatzaren 31koa; 42/2015 Foru Dekretua, uztailaren 1ekoa)

Atarikoa

Pertsona Fisikoen Errentaren gaineko Zergari buruzko abenduaren 30eko 22/1998 Foru Legearen aplikazioak erregelamenduzko zenbait zehaztapen eskatzen ditu, alde batetik Legean aurreikusiriko prozedurak garatu eta betebehar formal batzuk arautzeko eta, bestetik, hainbat arlotan erregelamenduaz egiten diren aipamenak bete eta gauzatzeko, berau izanik Erregelamendu honen ezaugarri nagusia.

Erregelamendu honen arauek Foru Legeak berak egiten dituen aipamen espezifikoetan dute abiaburua.

Erregelamenduak 94 artikuluak, 4 xedapen gehigarrik, 2 xedapen iragankorrek, xedapen derogatzaile batek eta 2 azken xedapenek osatzen dute, eta egiturak bost titulu ditu, kapitulu, atal eta azpiataletan banaturik.

I. tituluak errenta salbuetsiei eta dirusarrera eta gastuak zergaldiari egozteari dagozkien alderdiak arautzen ditu.

I. kapituluan salbuespen kasu batzuk zehazten dira, hala nola, kaleratzeagatiko kalteordaina, literatura, arte eta zientzi sari jakin batzuk, goi mailako kirolarientzako laguntzak, bake edo laguntza humanitarioko misioetan parte hartzeagatik hartutako ordainsari apartekoak; azkenik, atzerrian egindako lanen truke jasotako etekinak salbuesteko baldintzak ezartzen dira.

II. kapituluan egile eskubideen etekinak eta enpresa eta lanbide jardueren etekinak zergaldiari egozteko irizpideak arautzen dira.

II. tituluak errenta zergagarria finkatu eta zehazteko arauak erregulatzen ditu.

Lan etekinei dagokienez, lokomozio gastuetarako eta mantenu eta egonaldien gastu ohikoetarako dieta eta diru esleipenen araubidea erregulatzen da; denboran modu irregular nabarmenean jasotzen direnen kasuen zerrenda zehatz bat ezartzen da, eta, bestalde, sortze epea bi urtetik gorakoa duten etekinei aplikatu beharrezko arauak finkatzen dira; amaitzeko, etekin mota honetarako murrizketen aplikazioa garatzen da.

Higiezinen eta higigarrien kapitalaren etekinei dagokienez, gastu kengarriak zehazten dira, bai eta denboran modu irregular nabarmenean lortutakotzat hartzen direnak ere; horrez gain, aseguru kontratu batzuei eskatzen zaizkien baldintzak zehazten dira.

Enpresa eta lanbide jardueren etekinei dagokienez, jarduerari atxikiriko elementuak zehaztu, Zerga honetarako amortizazio araubide berariazkoa ezarri eta etekinak zehazteko araubideak garatzen dira.

Ondare gehikuntza eta murrizketei dagokienez, amortizazioak eskuratze balioan duen eragina arautzen da, bai eta etxebizitzan eta jarduera ekonomikoari atxikiriko elementuetan berrinbertitzeagatiko salbuespena aplikatu ahal izateko bete behar diren zenbait baldintza ere.

Gauzazko errentei buruzko kapituluan, gauzazko ordainsaritzat hartzen ez diren kasu batzuetan bete beharreko baldintzak eta balorazio arauak zehazten dira.

III. tituluak, kuotaren kenkariei buruzkoak, ezintasunagatiko eta ohiko etxebizitza erosteagatiko kenkaria garatu eta jarduera ekonomikoetako kenkariaren mugak nola aplikatu zehazten du.

IV. tituluan, zergaren kudeaketari buruzkoan, aitorpena egin beharrari eta aitorpenak aurkeztu eta kudeatzeko kanpoko lankidetzari dagozkien alderdi guztiak arautzen dira eta, azkenik, betebehar formalak eta kontabilitate, erregistro eta informazioaren arloetakoak ezarri.

V. tituluak zerga honetako konturako ordainketen erregulazioa, abenduaren 30eko 371/1998 Foru Dekretuaren bidez onetsia, eransten du, Zergari buruzko Foru Legearen erregelamendu garapena testu bakar batean osorik biltzeko.

Pertsona Fisikoen Errentaren gaineko Zergaren Erregelamenduaren xedapen gehigarriek honakoak erregulatzen dituzte: lanaren gauzazko ordainsariak baloratzeko aurretiko akordioak lortzeko prozedura bat, ibilgetu materialaren elementuak erregistratzeko zenbait arau eta kreditu entitateek zerga administrazioarekin lankidetzan aritzeko betebeharrak.

Xedapen Iragankorren gaiak, berriz, aitorpen eta idazkien aurkezpenaren indarraldia eta 1999ko urtarrilaren 1a baino lehen eratutako etxebizitza kontuak.

Hori horrela, Ekonomi eta Ogasun kontseilariak proposaturik eta Nafarroako Gobernuak mila bederatziehun eta lauretan hogeita hemeretziko maiatzaren hogeita lauan hartutako erabakiarekin bat, dekretatu dut:

Artikulu Bakarra

Pertsona Fisikoen Errentaren gaineko Zergaren Erregelamendua onestea. Haren testua ondotik ematen da.

PERTSONA FISIKOEN ERRENTAREN GAINEKO ZERGAREN ERREGELAMENDUA

I. TITULUA. ZERGAGAIAREN EREMU MATERIAL, PERTSONAL ETA DENBORAZKOA

I. KAPITULUA. Errenta salbuetsiak

1. artikulua.

2. artikulua. Literatura, arte eta zientzietako zenbait sariren salbuespena.

1. Zergari buruzko Foru Legearen 7. artikuluaren g) letran aurreikusiriko salbuespenaren ondorioetarako, literatura, arte eta zientzietako sari nabarmena izanen da pertsona bati edo batzuei ondasunak edo eskubideak ematea, inolako ordainik gabe, literatura, arte edo zientziako lanen balioaren ordain edo aitorpen gisa, bai eta arlo horietan eginiko lan edo jardueraren merezimenduarena ere.

2.1.1. Sari emaileak ez du saritutako lanetik edo lanetatik mozkinik ateratzerik izanen, ezta horretarako interesik eduki ere.

Zehazki, sariak ez du ekarriko ezta eskatuko ere lanen gaineko jabetza eskubideak, jabetza intelektual zein industrialetik heldu direnak barne, laga edo mugatzea.

Lana jendaurrean zabaltzeagatik, irabazi asmorik gabe eta sei hilabete baino gutxiagoko aldi baterako baldin bada, ez da hautsiko arestiko betebeharra.

2. Nolanahi ere, deialdia egin aurretik egindako lan edo jarduerek jasoko dute saria.

Aurreko 1. idatz-zatian aipatutako gaien inguruko lanak aurretik edo batera finantzatzeko bekak, laguntzak eta oro har, diru kopuruak ez dira sari salbuetsitzat hartuko.

3. Deialdiak baldintza hauek bete beharko ditu:

a) Nafarroakoa, nazionala edo nazioartekoa izatea.

b) Parte hartzeko mugarik ez jartzea sariaren funtsari ez dagozkion arrazoiengatik.

c) Haren iragarkia Nafarroako, estatuko edo dagokion autonomi elkarteko aldizkari ofizialean ematea argitara.

Atzerrian edo nazioarteko entitateek deitutako sarien kasuan, salbuespena izateko baldintza bakarra arestiko b) letran aurreikusitakoa izanen da.

4. Salbuespena zerga arloko administrazioko organo eskudunak deklaratu beharko du.

Deklarazio hori honako pertsona hauek eskatu beharko dute, dagokion dokumentazioa aurkeztearekin batera:

a) Saria deitzen duen pertsona edo entitatea, oro har.

b) Saritutakoa, atzerrian edo nazioarteko entitateek deitutako sariak direnean.

5. Eskaera saria eman aurretik egin beharko da edo, arestiko zenbakiko b) letraren kasuan, eskuratu den ekitaldian aitorpena egiteko erregelamenduzko epea hasi aurretik.

Aitorpenak hurrengo deialdietarako ere balioko du, betiere espedientea eragin zuenaren nondik norakoak aldatzen ez badira.

Ondoko deialdiren batean aitorpenaren nondik norakoak aldatzen badira, edo salbuespena aplikatzeko baldintzaren bat betetzen ez bada, 2. idatz-zati honetako 4. zenbakiko lehen paragrafoan aipatutako Tributu Administrazioko organo berak adieraziko du salbuespenaren aplikaziorako eskubidea galdu dela aldaketa edo ez-betetze hori gertatu denetik.

Prozedura ebazteko gehieneko epea sei hilabetekoa izanen da. Epe hori organo eskudunak espresuki ebazpenik eman gabe iraganik, ezetsi egin dela ulertuko da.

3. Zerga arloko administrazioak saria salbuestea deklaratuta, aurreko idatz-zatiko 4. zenbakiko a) letrak aipatzen dituen pertsonak behartuta egonen dira administrazioari jakinaraztera, saria eman eta hurrengo hilabetearen barrenean, zein den saria, eman zen data eta lortu duenaren identifikazio datuak.

2 bis artikulua. Ikasketetarako eta zientzialari eta teknologoen prestakuntzarako beken salbuespena.

1. Zergari buruzko Foru Legearen 7.h) artikuluan ezarritakoaren ondorioetarako, ikasketa arautuak egiteko bekak salbuetsiko dira, printzipio hauen arabera ematen badira: merezimendua eta gaitasuna, eskuratzeko baldintzen orokortasuna eta bereizkeriarik eza, eta deialdiaren publikotasuna. Erakunde publikoek ikasketetarako ematen dituzten laguntzak ez dira salbuetsiko hartzaile bakarrak edo gehien-gehienak haien langileak badira, edo langileen ezkontideak edo odoleko nahiz ezkontza bidezko ahaide zuzen edo albokoak, hirugarren mailara artekoak, horiek ere barne.

2. Ikasketa-bekaren emailea irabazi-asmorik gabeko entitatea bada eta Fundazioen eta babes jardueren tributu araubideari buruzko uztailaren 2ko 10/1996 Foru Legea aplikatzen ahal bazaio, aurreko printzipioak betetzat joko dira:

a) Hartzaileak pertsona talde generikoak badira eta ezin bazaie inolako mugarik jarri, egin beharreko ikasketekin eta taldearen estatutuetan ezarritako xede edo helburua betetzeko jarduerekin zerikusirik ez duten arrazoiengatik.

b) Deialdiaren iragarkia argitara ematen bada Nafarroako Aldizkari Ofizialean edo Estatukoan eta, horrez gain, nazio mailako egunkari batean edo irabazi-asmorik gabeko elkarte nahiz fundazioaren web orrian.

c) Esleipena norgehiagokaren bidez egiten bada.

3. Zergari buruzko Foru Legearen 7. artikuluko h) letrako bigarren paragrafoan ezarritakoari dagokionez, ikerketarako bekak salbuetsita daude Prestatzen ari diren ikertzaileen Estatutua onesten duen urtarrilaren 27ko 63/2006 Errege Dekretuak deskribatzen duen esparruan, betiere ikerketarako laguntzen programa onarturik badago eta errege dekretu horren 3. artikuluan aipatzen den Ikerketarako Laguntza Programen Erregistro Orokorrean inskribaturik. Lan kontratuen barnean ordaintzen diren diru kopuruak ez dira inoiz bekatzat hartuko.

4. Funtzionarioei, administrazio publikoen zerbitzuko gainerako langileei eta unibertsitateetako irakasle eta ikertzaileei ikerketarako ematen zaizkien beken kasuan, deialdietako oinarrietan berariaz aurreikusi beharko da, betekizun nahiz merezimendu gisa, hartzaileek baldintza hori betetzea. Gainera, bekak emateko deialdia egiten duen irabazi-asmorik gabeko entitateari Fundazioen eta babes jardueren tributu araubideari buruzko uztailaren 2ko 10/1996 Foru Legea aplikatzen ahal bazaio, artikulu honetako bigarren idatz-zatiko baldintzak ere beteko beharko dira.

3. artikulua. Goi mailako kirolariei ematen zaizkien dirulaguntzak salbuestea.

Zergari buruzko Foru Legearen 7. artikuluaren l) letran aurreikusitakoaren ondorioetarako, salbuetsirik egonen dira, urtean 60.100 euroko gehieneko mugarekin, kirol prestakuntza eta teknifikaziorako dirulaguntzak, baldintza hauek betetzen badituzte:

a) Onuradunek aitorturik izatea goi mailako kirolarien izaera, Goi mailako kirolariei buruzko irailaren 19ko 1467/1997 Errege Dekretuan aurreikusitakoari jarraikiz, edo Nafarroako Kirol eta Gazteriaren Institutuak halakotzat hartzea.

b) Honakoen finantzaketa, zuzena edo zeharkakoa, izatea: Foru Komunitateko Administrazioarena, Kirolaren Kontseilu Nagusiarena, Kirol Olinpikoen Elkartearena, Espainiako Batzorde Olinpikoarena, Espainiako Batzorde Paraolinpikoarena, kirol federazioena, edo Fundazioen eta babes jardueren zerga araubidea erregulatzen duen uztailaren 2ko 10/1996 Foru Legeak hartzen dituen fundazioena.

4. artikulua. Nazioarteko bakearen edo gizakiaren aldeko eginkizunetan parte hartzeagatik jasotako aparteko dirulaguntzak.

Zergari buruzko Foru Legearen 7. artikuluko m) letran aurreikusitakoaren ondorioetarako, bakearen edo gizakiaren aldeko eginkizunetan parte hartzen dutenei Espainiako Estatuak emandako zenbateko hauek salbuetsirik egonen dira:

a) Bakearen edo gizakiaren aldeko nazioarteko eginkizunak betetzeari dagozkion aparteko dirulaguntzak, edozein motatakoak direla ere.

b) Eginkizun horietan jasandako kalte fisiko edo psikikoengatik ordaindutako kalteordainak edo prestazioak.

5. artikulua. Atzerrian egindako lanengatik jasotzen diren etekinak salbuestea.

1. Zergatik salbuetsirik egonen dira, Zergari buruzko Foru Legearen 7. artikuluko n) letran aurreikusitakoarekin bat, atzerrian egiaz egindako lanen etekinak, baldintza hauek betetzen direnean:

Lehena. Lan horiek Espainian egoitzarik ez duen enpresa edo entitate batendako edo atzerrian finkatutako establezimendu iraunkor batendako egitea. Bereziki, lanen hartzaile den entitateak loturarik badu langilea enplegatzen duen entitatearekin edo haren zerbitzuak jasotzen dituenarekin, ulertuko da lanak entitate ez-egoiliarrentzat egin direla, baldin eta, Sozietateen gaineko Zergari buruzko abenduaren 30eko 24/1996 Foru Legearen 29. artikuluan ezarritakoaren arabera, entitate ez-egoiliarrari "talde barneko" zerbitzua egin zaiola onartzen ahal bada, zerbitzu horrek abantaila dakarkiolako edo ekartzen ahal diolako aipatu entitate hartzaileari.

Bigarrena. Lanak egiten direneko lurraldean zerga hau bezalako edo antzeko beste zerga bat aplikatzea eta zerga paradisutzat jotzen den herrialde edo lurralde bat ez izatea. Baldintza hau betetzat emanen da lanak egiten direneko herrialde edo lurraldeak Espainiarekin hitzarmena badu nazioarteko zergapetze bikoitza saihesteko eta hitzarmen horrek informazioa trukatzeko klausularik badu.

2. Zerga-salbuespena, gehienez ere, 61.000 eurokoa izanen da urtean. Atzerrian egindako lanei dagokien ordainsaria kalkulatzeko, kontuan hartuko dira langileak atzerrian egin dituen egunak eta atzerrian egindako lanari dagozkion ordainsari berariazkoak.

Atzerrian egindako lanek egunean zenbateko etekinak sortu dituzten kalkulatzeko, lan horiei dagozkien ordainsari berariazkoak gorabehera, proportzionaltasunezko banaketa irizpidea erabiliko da, urteko egunen kopurua kontuan hartuta.

3. Salbuespen hau bateraezina izanen da, atzerrian kokatu diren subjektu pasiboendako, Erregelamendu honen 8.A).3.b) artikuluan aurreikusiriko tributaziotik salbuetsiriko soberakinen araubidearekin, zenbatekoa edozein delarik ere. Subjektu pasiboak zilegi izanen du salbuespen honen ordez soberakinen araubidea aukeratzea.

II. KAPITULUA. Zergaldiari egoztea

6. artikulua. Dirusarrera eta gastuak zergaldiari egoztea.

1. Enpresa edo lanbide jarduerak betetzen dituzten subjektu pasiboek, jarduera horietatik heldu diren etekinak zein zergaldiri egotzi jakiteko, Sozietateen gaineko Zerga erregulatzen duten arauetan eta hura garatzekoetan horri buruz aurreikusitarako irizpideak aplikatuko dizkiete, hurrengo idatz-zatian aurreikusitakoa baztertu gabe. Era berean, aplikatzekoa izanen da Zergari buruzko Foru Legearen 77.3 eta 78.8 artikuluetan aurreikusitakoa, artikulu horietan aurreikusten diren kasuetan egozteko dauden errentei dagokienez.

2.

Lehena. Enpresa edo lanbide jarduerak betetzen dituzten subjektu pasiboek, kontabilitate eta erregistroko betebeharrak erregelamendu honen 61. artikuluko 3, 4, 5 eta 6. idatz-zatietan aurreikusitakoaren arabera bete behar dituztenek, kobrantza eta pagamenduen irizpidea erabiltzeko aukera izanen dute beren enpresa edo lanbide jarduera guztien dirusarrerak eta gastuak dagokion zergaldiari egozteko.

Sozietateen gaineko Zergari buruzko abenduaren 30eko 24/1996 Foru Legearen 34. artikuluko 2. idatz-zatian aurreikusitakoaren ondorioetarako, zerga arloko administrazioak irizpide hori onartzen duela ulertuko da, besterik gabe, aitorpenean adierazten bada. Hiru urtetarako izanen da, gutxienez, eta epe hori urte osorako luzatzen joanen dela ulertuko da, subjektu pasiboak aukerari uko egiten ez dion bitartean.

Bigarrena. Idatz-zati honetan adierazitako irizpidea aukeratzeak ez du ondoriorik izanen subjektu pasiboak, aurrerago, bere kontabilitate eta erregistroko eginbeharrak Erregelamendu honen 61. artikuluko 2. idatz-zatian aurreikusitakoari jarraikiz bete behar baldin baditu.

Hirugarrena. Idatz-zati honetan xedatutakoa ez da aplikatuko subjektu pasiboak betetzen duen enpresa edo lanbide jarduera dela-eta, dituen kontabilitate eta erregistroko eginbeharrak Erregelamendu honen 61. artikuluko 2. idatz-zatian aurreikusitakoari jarraikiz bete behar baldin baditu, edo kontabilitatea Merkataritzako Kodean aurreikusitakoaren arabera eramaten badu.

Laugarrena. Idatz-zati honetan ezarritakoa galarazi gabe, enpresa edo lanbide jarduerak egiten dituzten subjektu pasiboek eragiketak egiten badituzte lotutako pertsona edo erakundeekin, eragiketa horien aldi-egozketarako lotutako pertsonak edo erakundeak erabilitako irizpide bera erabili beharko dute.

3. Zenbait urtetan sortzen diren egile eskubideen ustiapena lagatzetik heldu diren etekinen kasuan, subjektu pasiboak aukera izanen du horien konturako aurrerakina eskubideak sortu ahala egozteko.

4. Zergaldiari egozteko edo etekin garbia zehazteko araubiderako irizpidea aldatzeak ez du inolaz ere ekarriko gastu edo dirusarreraren bat kontatu gabe gelditzea edo beste ekitaldi bati berriz egoztea.

II. TITULUA. ERRENTA ZEHAZTEA

I. KAPITULUA. Arau orokorrak

7. artikulua. Balore edo partaidetza homogeneoen kontzeptua.

Balore edo partaidetzek baldintza hauek bete behar dituzte jaulkitzaile berarengandik datozen balore edo partaidetza homogeneotzat hartu ahal daitezen: finantza eragiketa berekoak izatea, edo xede bera izatea, finantziazioaren bilketa sistematikoa barne, eta izaera eta transmisio-araubidea ere berberak izatea, eta gainera beren titularrei, funtsean, antzeko eskubide eta betebeharrak egoztea.

Balore multzo baten homogeneotasunean beste inguruabar hauek, aldiz, ez dute eraginik izanen: baloreen zenbateko unitarioen arteko aldeak; zirkulazioan jartzeko, emateko edo prezioak finkatzeko egunak; kokatzeko prozedurak, inbertsiogile kategoria jakinentzako tarte edo blokeak barne; edo bigarren mailako beste edozein inguruabar. Bereziki, jaulkipena segidako tarteetan zatitzeak eta gehikuntzak aurreikusteak ez dute eraginik izanen homogeneotasunean.

II. KAPITULUA. Errenta zergagarriaren definizioa

1. atala. Lan etekinak

8. artikulua. Dieta eta asignazioak, lokomozio gastuetarako eta mantenu eta egonaldien ohiko gastuetarako.

A) Arau orokorrak:

1. Zergari buruzko Foru Legearen 14.1.d) artikuluan aurreikusitakoaren ondorioetarako, ez dira zergapetuko lokomozio gastuetarako eta ostalaritzako establezimenduetan mantenua hartu eta egoteagatik ohiko diren gastuetarako ematen diren asignazioak, betiere, artikulu honetan adierazitako baldintza eta mugekin.

2. Lokomozio gastuetarako asignazioak.

Ez dira zergapetuko enpresa, lantegi, tailer, bulego edo lantokitik beste toki batera lanera ateratzen den enplegatu edo langilearen lokomozio gastuak ordaintzeko erabiltzen dituen zenbatekoak, baldintza eta kopuru hauekin:

a) Enplegatu edo langileak garraiobide publikoak erabiltzen baditu, faktura edo agiri baliokidearen bidez egiaztatzen den gastuaren zenbatekoa.

b) Bestelakoetan, ondoko kopurua izanen da: 0,32 euro zenbatuko da egindako kilometro bakoitzeko, baldin eta joan-etorria egin dela frogatzen bada, eta horrez gainera bidesari eta aparkalekuaren gastuak ere gehituko dira, frogatuz gero'.

3. Mantenu eta egonaldiko gastuetarako asignazioak.

Ez dira zergapetuko enpresak, jasotzen duenaren ohiko lantokia eta bizilekua ez den herri batean, jatetxe, hotel eta ostalaritzako gainerako establezimenduetan mantenu hartu eta egoteagatik izaten diren ohiko gastuetarako erabiltzen dituen zenbatekoak.

Hurrengo b) letran aurreikusitako kasuetan salbu, ohiko lantokiko herria ez den batera joan eta bertan, jarraian, bederatzi hilabete baino gehiago egoteko denean, asignazio horiek ez dira zergatik kanpo geldituko. Horretarako, ez da deskontatuko oporraldia, gaixorik egondako denbora edo enplegatuaren destinoa aldatzea ez dakarren beste egoera batean emandakoa.

a) Hotel, jatetxe eta ostalaritzako gainerako establezimenduetako mantenuko eta egonaldiko gastuetarako asignaziotzat ondoko hauek hartuko dira soilik:

Lehena. Gaua ematen denean hartzailearen ohiko lanlekua dagoen udalerria edo bizi dena ez beste batean.

Egonaldiko gastuengatik, fakturaren bidez frogatzen diren zenbatekoak. Salgaien errepideko garraioan lan egiten duten gidariek ez dute egonaldiko gastuen zenbatekoa frogatu beharko eguneko gastuak 15 eurotik gorakoak ez badira, Espainiako lurraldearen barnean, edo 25 eurotik gorakoak, atzerrian.

Mantenu gastuengatik, 53,34 euro egunean, baldin eta joan-etorria Espainiako lurraldearen barruan bada; atzerriko lurraldean egin bada, 91,35 euro egunean.

Bigarrena. Gaua ematen ez denean hartzailearen ohiko lanlekua edo bizitokia dagoen udalerria edo bizi dena ez beste batean, orduan mantenu gastuetarako asignazioak izanen dira, baldin eta 26,67 edo 48,08 eurotik gorakoak ez badira egunean, joan-etorria non gertatzen den, Espainiako lurraldean edo atzerrian, hurrenez hurren.

Hegazkin konpainien hegazkinetako langileen kasuan, mantenu gastu arruntetarako asignazio gisa hartuko dira eguneko 36,06 euro arteko zenbatekoak, baldin eta Espainiako lurraldearen barruko joan- etorrietarako badira, edo eguneko 66,11 euro artekoak, atzerriko joan-etorrietarako badira. Egun berean gauza biak gertatzen badira, egindako hegaldi kopuru handienaren arabera dagokion zenbatekoa aplikatuko da.

Aurreko paragrafoetan adierazitakoaren ondorioetarako, ordaintzaileak joan-etorriaren eguna, lekua eta arrazoia frogatu beharko ditu.

b) Zergapetzetik kanpo geldituko diren dietak hauexek izanen dira:

Lehena. Destinoa atzerrian duten funtzionario publikoek eta Administrazio Publikoen zerbitzuko langileek Espainian destinaturik egonez gero lansari, antzinatasun, osagarri edo pizgarriengatik osotara jasoko lituzketen ordainsariekiko hartzen duten soberakina. Ondorio horietarako, ordainsarien arloko organo eskudunak erabakiko du langile horiei, Espainian destinaturik egonez gero, ordainsarietan legozkiekeen parekatzeak zein diren.

Bigarrena. Destinoa atzerrian duten enpresetako enplegatuek Espainian destinaturik egonez gero, beraien kargu, lanpostu, kategoria edo lanbidea dela eta, lansari, eguneko soldata, antzinatasun, aparteko lansari, mozkinena barne, famili laguntza edo beste edozein kontzepturengatik osotara jasoko lituzketen ordainsariekiko hartzen duten soberakina.

Letra honetan aurreikusitakoa eta Erregelamendu honen 5. artikuluan aurreikusitako salbuespena bateraezinak izanen dira.

4. Aurreko idatz-zatietan aurreikusitako araubidea aplikatuko zaie halaber lokomozio, mantenu eta egonaldiko gastuetarako asignazioei, horiek jasotzen dituzten langileak berariaz kontrataturik baldin badaude zerbitzuak emateko lantoki mugikor edo ibiltariak dituzten enpresetan, eta beti ere, asignazio horiek langilearen ohiko bizilekua ez den udalerri batera egindako joan-etorriengatik badira.

5. Artikulu honen arabera zergapetu gabe gelditzen diren zenbatekoak aldatu ahal izanen ditu Ekonomi eta Ogasun kontseilariak, funtzionario publikoen dietak aldatzen diren proportzioan.

6. Artikulu honetan aurreikusitako mugak gainditzen dituzten lokomozio, mantenu eta egonaldiko gastuetarako asignazioak zergapetu eginen dira.

B) Arau bereziak:

1. Menpekotasunezko lan harreman berezietatik heldu diren lan etekinak eskuratzen dituzten subjektu pasiboek, zerbitzuak ematen dituzteneko enpresek lokomozio eta mantenu gastuak berariaz ordaintzen ez badizkiete, izan dituzten etekin garbiak zehazteko, ondoko zenbateko hauek kendu ahal izanen dituzte beraien dirusarreretatik, baldin eta joan-etorriak egin direla frogatzen badute:

a) Lokomozio gastuak:

Garraiobide publikoak erabiltzen direnean, faktura edo agiri baliokidearen bidez egiaztatzen den gastuaren zenbatekoa.

Bestelakoetan, ondoko kopurua izanen da: 0,32 euro zenbatuko da egindako kilometro bakoitzeko, baldin eta joan-etorria egin dela frogatzen bada, eta horrez gainera bidesari eta aparkalekuaren gastuak ere gehituko dira, frogatuz gero.

b) Mantenu gastuengatik, 26,67 edo 48,08 euro egunean, joan-etorria non den, Espainiako lurraldearen barruan edo atzerrira.

Aurrekoaren ondorioetarako, betiere enpresak berariaz ordaindutakoak izanen dira egonaldiko gastuak, eta artikulu honetako A) letrako 3.a) idatz-zatian ezarritakoari jarraituz arautuko dira.

2. Zergapetzetik kanpo geldituko dira subjektu pasiboari lanpostua beste udalerri batera aldatzeagatik ordaintzen zaizkion zenbatekoak, baldin eta lanpostuaren aldaketak bizilekua aldatzea ere ekartzen badu, eta zenbatekoak subjektu pasiboak eta haren sendikoek lekualdatzean zehar izandako lokomozio eta mantenuko gastuei eta altzari eta tresnak mugitzeko gastuei badagozkie.

3. Zergapetzetik kanpo geldituko dira zinpekogaiek eta zinpekoen epaimahaiko kide titular eta ordezkoek beraien eginkizunak betetzeagatik jasotako zenbatekoak, martxoaren 1eko 385/1996 Errege Dekretuan aurreikusitakoarekin bat, bai eta Hauteskundeetako Mahaietako kideek jasotakoak ere, 1991eko apirilaren 3ko Ministerioaren Aginduan ezarritakoari jarraikiz.

9. artikulua. Gastu kengarriak lanbide elkargoei ordaindutako kuotengatik.

Lan etekin garbia zehazteko, gastu kengarriak izanen dira lanbide elkargoei ordaindutako kuotak, lan egiteko elkargoko kide izatea ezinbestekoa denean, entitate horien funtsezko xedeei dagozkien heinean, gehienez ere 500 euro urtean.

10. artikulua. %30eko murrizketa lanaren etekin jakin batzuetan.

1. Zergari buruzko Foru Legearen 17.2.a) artikuluan aurreikusiriko murrizketa aplikatzearen ondorioetarako, denboran era irregular nabarmenean lortutako etekintzat hartuko dira ondotik zehazten diren lan etekinak, soilik, zergaldi bakar batean egozten badira:

a) Enpresak langileei beste lantoki batera joateagatik ordaindutako zenbatekoetatik Erregelamendu honen 8. artikuluan aurreikusitako zenbatekoak gainditzen dituztenak.

b) Ezintasuna eragiten ez duten lesioengatik emandako kalteordainak, Gizarte Segurantzaren edo Klase Pasiboen erregimen publikoetatik, bai eta erregimen pribatuetatik ere, heldu direnak, eta halaber, enpresek kontzeptu horretan ordaindutako prestazioak.

c) Ezintasun iraunkor partzial, oso eta erabatekoagatik ematen diren kalteordainak eta prestazioak, bai eta ezintasun nabarmenagatik ematen direnak ere, Zergari buruzko Foru Legearen 14.2.a) artikuluan aurreikusirik ez daudenak.

d) Heriotza eta ehorzketa edo hilobiratze gastuetarako prestazioak, Zergari buruzko Foru Legeko 7.q) artikuluan ezarririko muga gainditzen badute, Zergari buruzko Foru Legearen 14.2.a) artikuluan aurreikusitakoak salbu.

e) Mugarik gabeko iraupena duten lansari osagarriak, pentsioak edo urtekoak konpentsatu edo kitatzeko ordaindutako zenbatekoak, edo lan baldintzak aldatzeagatik ordaindutakoak.

f) Enpresak langileei ordaindutako zenbatekoak lan harremana alderdi bien adostasunarekin behin betikoz hausteagatik.

2. Zergari buruzko Foru Legearen 17.2.a) artikuluan jasotako murrizketa aplikatu ahal izateko, etekin osoak 300.000 eurokoak izanen dira gehienez. Zenbateko horretatik gorako soberakinari ez zaio inolako murrizketarik aplikatuko.

Etekin horiek zatika kobratzen badira, ez da murrizketa hori aplikatuko. Kobrantza zatika egina dela ulertuko da zergaldi batean baino gehiagotan egozten denean.

3. Zergari buruzko Foru Legearen 17.2.a) artikuluan aurreikusiriko murrizketaren ondorioetarako, bi urtetik gorako sortze epea duten lan etekintzat hartuko dira, besteak beste, hauexek:

a) Langileei akzioak edo partaidetzak erosteko emandako eskubidetik heldu direnak, ematen denetik bi urte iraganik erabiltzen denean.

b) Zergari buruzko Foru Legearen 78.5 artikuluan xedatutakoari jarraikiz, lan etekinak kobrantza egiten den zergaldiari baizik egozten ez zaizkionen, aurreko bi zergaldiri baino gehiagori egotzi ahal bazaizkio ere.

11. artikulua. %40ko, %50eko eta %70eko murrizketak lanaren etekin jakin batzuetan.

1. Zergari buruzko Foru Legeko 17.2. b) c) eta d) letretan agintzen diren kenkariak, pagu-aldi bakarreko jasoera diren kapital itxurako prestazioei aplikatuko zaizkie.

Askotariko prestazioen kasuan, edonolako errentak eta kapital itxurako kobrantza bakarra biltzen badituzte, aipatu kenkariak kapital itxurako kobrantzari soilik aplikatuko zaizkio. Bereziki, errenta itxurako prestazioak kobratzen hasita errenta aurretik berreskuratzen bada, hor izandako irabaziari kenkaria eginen zaio errenta eratzerakoan tokatuko zen portzentajea aplikatuz, prestazioa kapital itxuran jaso balitz.

2. Zergari buruzko Foru Legeko 14.2.a) artikuluak aipatzen dituen hiltzearen ziozko kalteordainei eta prestazioei, kapital itxuran jasotakoei, 100eko 40ko kenkaria dagokie beti ere. Hala ere, bizitza aseguruetako hiltzearen ziozko kalteordain eta prestazioen irabazien kasuan, aseguru horiek Zergari buruzko Foru Legeko 14.2.a). 5. artikuluak aipatzen dituenak bezalakoak badira, hau da, aseguratu den arrisku bakarra heriotza edo elbarritasuna bada, 100eko 70eko kenkaria dagokie.

3. 100eko 50eko kenkaria dagokie honako kasuetako kalteordain eta prestazioei: ezintasun iraunkor partzial, oso eta erabatekoa, eta bai ezintasun nabarmena ere, Zergari buruzko Foru Legeko 14.2.a) artikuluko kasuetan.

2. atala. Kapitalaren etekinak

1. azpiatala. Higiezinen kapitalaren etekinak

12. artikulua. Higiezinen kapitalaren etekinen gastu kengarriak.

1. Higiezinen kapitalaren etekin garbia zehazteko gastu kengarriak izanen dira hura lortzeko beharrezkoak diren guztiak eta erabilera edo denbora dela-eta etekinak eragin dituzten ondasun edo eskubideek izan duten hondatzearen zenbatekoa.

Aurreko lerroaldeak aipatzen dituen gastuen artean honako hauek daudela ulertuko da:

a) Besteren kapitalen interesak, baldin eta etekinak sortu dituzten ondasunak, eskubideak edo erabilera nahiz gozatzeko ahalmenak eskuratzeko edo hobetzeko inbertitu badira, bai eta finantzaketako gainerako gastuak ere.

b) Foru Komunitatearenak edo Estatuarenak ez diren zergak eta errekarguak, bai eta Foru Komunitatearen eta Estatuaren tasak, errekarguak eta kontribuzio bereziak, edozein dela beraien izendazioa, baldin eta zenbatutako etekinen gainekoak badira, edo beraiek ekoizten dituzten ondasun edota eskubideen gainekoak izanik zehapen izaerakoak ez badira.

c) Hirugarrenek kontraprestazio zuzen edo zeharkako gisa, edo zerbitzu pertsonalen ondorioz, hala nola, administrazio, zaintza, atezaintza edo antzekoak, ordaindutako zenbatekoak.

d) Alokairua, berralokairua, lagapena edo eskubideen eraketa formalizatzeak eragindakoak, eta ondasun, eskubide edo mozkinei dagozkien babes juridikokoak.

e) Kobrantza zalantzazkoa duten saldoak, gorabehera hori aski justifikaturik baldin badago. Baldintza hori kasu hauetan betetzen dela ulertuko da:

a') Zorduna konkurtsoan dagoenean.

b') Subjektu pasiboak kobrantzarako egindako lehenbiziko kudeaketatik zergaldiaren amaierara bitarte sei hilabetetik gora iragan direnean, eta kreditua berritu ez bada.

Zalantzazko saldo bat kenketa egin ondoren kobratuz gero kobratzen den ekitaldian dirusarrera bezala kontatuko da.

f) Kontserbazio eta konponketa gastuak. Ondorio hauetarako hauexek hartuko dira horrelakotzat:

Ondasun materialen ohiko erabilera mantentzeko erregulartasunez egiten direnak.

Zenbait elementu, hala nola, berokuntzako instalazioak, igogailua, segurtasuneko ateak eta abar berritzeko direnak.

Kontzeptu honengatik ez dira kengarriak izanen handitzen edo hobetzen erabilitako zenbatekoak.

g) Etekinak sortzen dituzten ondasun edo eskubideen gaineko aseguru kontratuen primen zenbatekoa, aseguru horiek erantzukizun zibilekoak, sute, lapurketa, kristalak haustea edo antzekoen kontrakoak direla.

h) Zerbitzu edo horniduretarako zenbatekoak.

i) Amortizaziorako zenbatekoak, Erregelamendu honen hurrengo artikuluan ezarritako baldintzetan.

2. Aurreko idatz-zatiko a) eta f) letretan aipatutako gastuen kenkari osoa ezin da izan, ondasun edo eskubide bakoitzeko, higiezinaren edo eskubidearen lagapena eginez lortutako etekin osoen zenbatekoa baino handiagoa. Soberakinaren kenkaria hurrengo lau urteetan jarraian egiten ahal da, kasuan kasuko zergaldikoekin batera eta idatz-zati honetan aipatzen diren mugekin.

13. artikulua. Amortizazio gastuak.

1. Higiezinen kapitalaren etekin garbia zehazteko, gastu kengarritzat hartuko dira higiezinaren eta harekin batera lagatako beste ondasunen amortizaziorako erabilitako zenbatekoak, balio-galera efektiboari baldin badagozkio, eta honelaxe ulertuta:

a) Higiezinak direnean: urtero, baldin eta ordaindutako eskuraketa edo hobekuntza kostuaren gainean %3 aplikatzearen emaitzako kopurua gainditzen ez badute, lurzoruaren kostua zenbatu gabe.

Lurzoruaren balioa ez denean jakiten, erosteko ordaindutako kostuaren ehuneko 25 dela ulertuko da.

b) Ondasunak higigarriak direnean, urtebete baino gehiago erabili daitezkeenak eta higiezinarekin batera lagatakoak: urte bakoitzean balio-galera erosketarako ordaindutako kostuei Erregelamendu honen 26. artikuluak aipatzen duen amortizazio taulari jarraikiz zehaztutako amortizazio koefizienteak aplikatzetik heldu dena baino handiagoa ez bada, kontuan hartu gabe lurzoruarena.

2. Etekinak erabiltzeko edo gozatzeko eskubide edo ahalmenen titulartasunetik badatoz, ordaindutako eskuraketa kostua amortizatu ahal izanen da, gehieneko kopurua legez haietariko bakoitzaren etekin osoena dela.

Amortizazioa, horrelako kasuan, erregela hauen emaitza izanen da:

a) Eskubidearen edo ahalmenaren iraunaldia mugatua denean, orduan eskuraketa kostua eta iraunaldiaren urteen kopurua zatitzearen emaitza izanen da.

b) Eskubidea edo ahalmena bizi artekoa bada, ordaindutako eskuraketa kostuari %3ko portzentajea aplikatzearen emaitza izanen da.

14. artikulua. Ondasun higiezinen kapitalaren etekinak, denboran batere erregulartasunik gabe eta zatika jasotakoak.

1. Zergari buruzko Foru Legearen 25.3 artikuluan aurreikusiriko murrizketa aplikatzeko, denboran era irregular nabarmenean jasotako etekinak izanen dira, zergaldi bakar batean egozten direnean, higiezinen kapitalaren etekin hauek soilik:

a) Negozio-lokalak alokatzeko kontratuak eskualdatu edo lagatzetik lortutako zenbatekoak.

b) Lagatako ondasunen kalte edo akatsak direla-eta errentari, azpierrentari edo lagapen-hartzailearengandik jasotako kalte-ordainak.

c) Erabili edo gozatzeko eskubideak, biziartekoak, eratu edo lagatzetik lortutako zenbatekoak.

2. Zergari buruzko Foru Legearen 25.3 artikuluan aurreikusitako murrizketa aplikatzen ahal da, soilik, gehienez ere 300.000 euroko etekin osoetan etekin garbi positiboei dagokien zati proportzionalean.

Etekin horiek zatika kobratzen badira, ez da murrizketa aplikatuko. Kobrantza zatika egina dela ulertuko da zergaldi batean baino gehiagotan egozten denean.

2. azpiatala. Higigarrien kapitalaren etekinak

15. artikulua. Disposizio partziala aseguru kontratuetan.

Aseguru kontratuetako disposizio partziala dagoenean, higigarrien kapitalaren etekina kalkulatzeko berreskuratutako zenbatekoa lehenbizi ordaindutako primei dagokiela ulertuko da, bakoitzaren errentagarritasuna barne.

16. artikulua. Errenta geroratuak eratu arte lortutako errentagarritasunaren zerga ordainketa.

Zergari buruzko Foru Legearen 30.1.d) artikuluaren lehen lerroaldean aurreikusitakoren ondorioetarako, errenta geroratuak eratu arte lortutako errentagarritasuna honako arau hauen arabera zergapetuko da:

1. Eratzen den errentak egun duen balio finantzario-aktuarialaren eta ordaindutako primen zenbatekoaren arteko aldeak zehaztuko du errentagarritasuna.

2. Errentagarritasun hori linealki banatuko da biziarteko errenta kobratzen den lehenbiziko 10 urtetan. Aldi baterako errenten kasuan, iraupen urteetan banatuko da linealki, gehienez ere 10 urtetan.

17. artikulua. Errenta gisa jasotzen diren jubilazio eta ezintasun prestazioak dituzten zenbait aseguru kontratutan eskatu beharreko baldintzak.

Zergari buruzko Foru Legearen 30.1.d) artikuluaren bigarren lerroaldean aurreikusirikoa aplikatzeko, baldintza hauek bete beharko dira:

Lehena. Prestazioak jasotzeko arrazoia eragin dezaketen inguruabarrak Pentsio Plan eta Funtsak arautzen dituen Legearen Testu Bateginak, azaroaren 29ko 1/2002 Legegintzako Errege Dekretuaren bidez onetsiak, 8.6 artikuluan aurreikusitakoak izanen dira, aipatutakoentzat ezarritako eran.

Bigarrena. Aseguru kontratuaren hornidurak nolabait mugitu direla ulertuko da Pentsio planak eta funtsak arautzeari buruzko Legearen Testu Bategineko lehenbiziko xedapen gehigarriak eta hura garatzeko arauek eskubide ekonomikoez baliatzeko ezartzen dituzten mugak betetzen ez badira, enpresen pentsio bidezko konpromisoak biltzen dituzten aseguru kolektiboei dagokienez.

18. artikulua. Gastu kengarriak higiezinen kapitalaren zenbait etekinetan.

Zergari buruzko Foru Legearen 32.1.b) artikuluak aipatzen duen bezala, etekina laguntza teknikoaren prestaziotik, ondasun higigarri, negozio edo meategiak errentan ematetik edo azpierrentamenduetatik heldu denean, higigarrien kapitalaren etekin garbia zehazterakoan gastu kengarriak izanen dira Erregelamendu honen 12. artikuluan aurreikusitakoak, berezitasun hauekin:

a) Interesetarako eta gainerako finantzazio gastuetarako aurreikusiriko muga ez da aplikatuko.

b) Amortizazio gastuak zenbatzeko, etekin garbia zuzeneko zenbatespenaren araubidearen modalitate erraztuaren bidez zehazten duten enpresa edo lanbide jarduerei atxikitako elementuetarako ezarritako arauak aplikatuko dira.

19. artikulua.

20. artikulua. Higigarrien kapitalaren etekinak, denboran era irregular nabarmenean lortutakoak eta zatika jasotakoak.

1. Zergari buruzko Foru Legearen 32.2 artikuluan aurreikusiriko murrizketa aplikatzeko, denboran era irregular nabarmenean jasotako etekinak izanen dira, zergaldi bakar batean egozten direnean, higigarrien kapitalaren etekin hauek soilik:

a) Alokairu-kontratuaren eskualdaketaren edo lagapenaren bidez lortutako zenbatekoak.

b) Alokairu kasuetan, kalte edo akatsak direla eta errentari edo azpierrentariarengandik jasotako kalte-ordainak.

c) Erabili edo gozatzeko eskubideak, Zergari buruzko Foru Legearen 30.3.f) artikuluan aipatzen direnak, eratu edo lagatzetik lortutako zenbatekoak, eskubideak biziartekoak direnean.

2. Zergari buruzko Foru Legearen 32.2 artikuluan aurreikusitako murrizketa aplikatzen ahal da, soilik, gehienez ere 300.000 euroko etekin osoetan kapital higigarriaren etekin garbiei dagokien zati proportzionalean.

Etekin horiek zatika kobratzen badira, ez da murrizketa aplikatuko. Kobrantza zatika egina dela ulertuko da zergaldi batean baino gehiagotan egozten denean.

3. atala. Enpresa eta lanbide jardueren etekinak

1. azpiatala. Arau orokorrak

21. artikulua. Jarduera bati atxikitako ondare elementuak.

1. Subjektu pasiboak egindako enpresa edo lanbide jarduera bati atxikitako ondare elementuak ondokoak izanen dira, zerikusirik izan gabe titulartasuna, senar-emazteen kasuan, biena izatearekin ala ez:

a) Jarduera egiteko erabiltzen diren ondasun higiezinak.

b) Jardueraren zerbitzuko langileen zerbitzu ekonomiko eta soziokulturaletarako erabiltzen diren ondasunak.

c) Etekinak lortzeko beharrezkoak diren gainerako ondare elementuak.

Inolaz ere ez dira enpresa edo lanbide jarduera bati atxikitako elementutzat hartuko honakoak:

1.-Entitate baten fondo berekien partaidetza edo norbere kapitalen lagapena erakusten duten aktiboak.

2.-Jardueraren titularraren erabilera partikularrerako, aisiarako, adibidez, erabiltzen direnak.

2. Enpresa edo lanbide jarduera bati atxikitako ondare elementutzat hartuko dira soilik sujetu pasiboak jardueraren helburuetarako erabiltzen dituena.

3. Jardueraren helbururako zati batean baizik erabiltzen ez diren ondare elementuen kasuan, atxikipena jardueran egiazki erabiltzen den zati horretara mugatzen dela ulertuko da. Ildo horretatik, ondare elementuen zati atxikiak izanen dira gainerakotik bereizita aprobetxatu daitezkeenak.

4. Enpresa edo lanbide jarduera bati osorik edo hein batean atxikitako ondare elementu bat haren helburuetarako soilik erabiltzen ez bada, atxikipena izanen da elementu horrek, irizpide sendoekin egindako aurreikusten zaion erabileraren proportziokoa jardueran.

5. Enpresa edo lanbide jarduerari atxikitako turismoko ibilgailuak eta atoiak, ziklomotoreak eta motozikletak direnean, atxikipena 100eko 50eko proportziokoa dela pentsatu beharko da, kontrakoa frogatzen ez bada.

Ondorio horietarako, turismoko ibilgailuak, atoiak, ziklomotoreak eta motozikletak izanen dira trafikoari, ibilgailu motordunen zirkulazioari eta bide segurtasunari buruzko Legearen testu artikuluduna onetsi zuen martxoaren 2ko 339/1990 Errege Dekretu Legegilearen eranskinean definizio hori dutenak, bai eta eranskin horretan ibilgailu misto gisa definitzen direnak ere, eta edozein kasutan, lur orotako ibilgailuak edo "jeep" motakoak.

Idatz-zati honen lehen lerroaldean xedatutakoarekin ere, ondoko zerrendan ageri diren ibilgailuak enpresa edo lanbide jarduerari erabat atxikirik daudela pentsatu beharko da, kontrakoa frogatu ezean:

a) Salgaien garraioan erabiltzen diren ibilgailu mistoak.

b) Bidaiarien kontraprestazio bidezko garraio zerbitzuan erabiltzen direnak.

c) Gidariei edo pilotoei irakasteko zerbitzuetan kontraprestazio bidez erabiltzen direnak.

d) Haien fabrikatzaileek proba, entsegu, erakustaldi edo salmenten sustapenerako erabiltzen dituztenak.

e) Merkataritzako ordezkari edo agenteek lanbidea dela-eta egiten dituzten joan-etorrietan erabilitakoak.

f) Zaintza zerbitzuetan erabilitakoak.

6. Aurreko idatz-zatietan xedatutakoaren ondorioetarako, subjektu pasiboak egiaztatu beharko du, zuzenbidean onartutako edozein frogabide erabiliz, enpresa edo lanbide jardueran zenbat erabiltzen den. Ez da frogabide nahikoa izanen subjektu pasiboak aurkeztutako aitorpena, ez eta ondare elementu horiek enpresa edo lanbide jardueraren erregistro ofizialetan agertzea.

7. Enpresa edo lanbide jarduerei ondare pertsonaleko ondasun edo eskubideak atxikiak daudenean, ondasun edo eskubide horien amortizazioak kalkulatzeko, erosketaren baliotzat hartuko da Zergari buruzko Foru Legearen 41.1 eta 42. artikuluetan eta Erregelamendu honen 39. artikuluan aurreikusiriko arauak aplikatuta ateratzen dena. Arau hori, halaber, enpresa edo lanbide jarduerei atxikitako ondare pertsonaleko ondasun edo eskubideen desafektazioari aplikatuko zaio.

Halere, eta amortizazioak kalkulatzeko soilik, ondasun edo eskubideak zerga aldetik amortizagarriak izan ez baldin badira, aurreko lerroaldean xedatutakoaren ondorioz ateratzen den eskuratze-balioari kenduko zaio Erregelamendu honen 27. artikuluaren c) letra aplikatuz gal zezakeen balioaren zenbatekoa.

22. artikulua. Enpresa edo lanbide jardueren etekinak, denboran era irregularrean lortutakoak eta zatika jasotakoak.

1. Zergari buruzko Foru Legearen 34.6 artikuluan aurreikusiriko murrizketa aplikatzeko, denboran era irregular nabarmenean jasotako etekinak izanen dira zergaldi bakar batean egozten direnean, enpresa edo lanbide jardueren etekin hauek soilik:

a) Enpresa edo lanbide jarduerak uzteagatiko kalteordainak eta laguntzak.

b) Literatura, arte edo zientziako sariak, zerga honetaz salbuetsirik ez daudenak. Ondorio horietarako ez dira zergatzat hartzen jabetza inteleketual edo industrialerako eskubideen lagapenetik heldu diren kontraprestazio ekonomikoak edo hauen ordezkoak.

c) Iraupen mugagabeko eskubideen ordez jasotako kalteordainak.

2. Zergari buruzko Foru Legearen 34.6 artikuluan aurreikusitako murrizketa aplikatzen ahal da, soilik, gehienez ere 300.000 euroko etekin osoetan enpresa edo lanbide jardueren etekin garbiei dagokien zati proportzionalean.

Etekin horiek zatika kobratzen badira, ez da murrizketa aplikatuko. Kobrantza zatika egina dela ulertuko da zergaldi batean baino gehiagotan egozten denean.

23. artikulua. Enpresa edo lanbide jardueren etekinak zehazteko araubideak.

1. Zergari buruzko Foru Legearen 34.1 artikuluan aurreikusirikoarekin bat, enpresa edo lanbide jardueren etekinak zehazteko araubideak hauexek izanen dira:

Lehena. Zuzeneko zenbatespena, bi modalitaterekin, arrunta eta erraztua.

Bigarrena. Zenbatespen objetiboa

2. Subjektu pasiboek aurreko araubideetako bat aplikatuko dute mugak eta bateraezintasunaren erregelak, uko egiteko erregelak eta bazterketaren erregelak (hurrengo artikuluetan ageri direnak) kontuan hartuz.

24. artikulua. Etekinak zehazteko araubideen bateraezintasunak.

1. Enpresa edo lanbide jarduera baten etekina zuzeneko zenbatespenaren araubidea, edozein modalitatetakoa, erabiliz zehazten duten subjektu pasiboek enpresa edo lanbide jarduera guztien etekin garbia zehaztuko dute araubide horretaz, dagokion modalitatez, baliatuz.

2. Haien enpresa edo lanbide jardueretakoren baten etekina zuzeneko zenbatespen arrunta erabiliz zehazten duten subjektu pasiboek hori bera erabiliko dute jarduera guztietarako.

3. Subjektu pasiboak zenbatespen objetiboa erabiltzen baldin badu egiten dituen jardueren etekina zehazteko, eta urtean zehar enpresa edo lanbide jardueraren batean, zuzeneko zenbatespen objektiboan sartuta ez dagoena edo araubide horri uko egiten diona, hasten bada, 1. idatz-zatiak aipatzen duen baterezintasunak ez du ondoriorik izanen urte horretarako lehendik egiten ari ziren jardueren kasuan.

4. Subjektu pasiboak zuzeneko zenbatespena erabiltzen baldin badu egiten dituen jardueren etekina zehazteko, eta jardueraren batean, hasten bada, arau hauek aplikatuko dira:

a) Lehendik egiten ari ziren jardueren etekina mota arrunta erabiliz zehazten bada, jarduera berriari hori aplikatuko zaio.

b) Lehendik egiten ari ziren jardueren etekina modalitate erraztua erabiliz zehazten bada, urte horretan ez da aplikatuko 2. idatz-zatiak aipatzen duen bateraezintasuna.

2. azpiatala. Amortizazioak

25. artikulua. Jarduera bati atxikitako ibilgetu materialaren elementuak, ukiezinarenak eta higiezinetako inbertsioenak amortizatzea.

Enpresa edo lanbide jarduera bati atxikitako ibilgetu materialaren, ukiezinaren eta higiezinetako inbertsioen elementuak amortizatzen direnean Sozietateen gaineko Zergari buruzko arauetan eta erregelamendu honen 26. eta 27. artikuluetan, Zergari buruzko Foru Legearen 34. artikuluko 3. idatz-zatia eta haren Erregelamenduaren 2. artikulua salbu, ezarritakoari jarraituko zaio.

26. artikulua. Ibilgetu materialaren amortizazioa taulen arabera.

1. Subjektu pasiboak beste metodorik aukeratu ez badu, ibilgetu materialaren eta higiezinetako inbertsioen elementuei taulen araberako amortizazioa aplikatuko zaio, koefiziente eta gehieneko epeak hauexek izanik:

	URTEKO GEHIENEKO KOEFIZIENTEA %	GEHIENEKO EPEA URTEAK
Bulegotarako, salerosketarako edota zerbitzutarako eraikinak eta etxebizitzak	4	38
Industriarako eraikinak	5	30
Instalazioak	15	10
Makineria	15	10
Altzariak	15	10
Informazio prozesuetarako ekipoak	25	6
Barneko garraiobideak (autobusak, kamioiak, furgonetak, etab.	20	8
Barneko garraiobideak	15	10
Moldeak, ereduak, trokelak eta matrizeak	33	5
Tresna eta erremintak	Benetako balio-galera
Bestelako ibilgetu materiala	10	15

 

2. Ondareko elementu baten balio-galera efektiboa dela ulertuko da elementu horren eskuratze-prezioari edo produkzio kostuari urteko gehieneko koefiziente lineala aplikatuta ateratzen dena baino handiagoa ez bada eta dotazioa urteen gehieneko epearen barruan egina bada.

3. Elementu bat kontabilitatez edo erregistro bidez amortizatu bada 1. idatz-zatian ezarritako gehieneko koefizienteak aplikatzetik ateratzen dena baino altuagoa den zenbatekoan, zenbateko horren zerga egozketa ondorengo zergaldietan eginen da, 1. idatz-zatian ezarritako gehieneko epearen barrenean, zergaldi horietan kontabilitate edo erregistroko amortizazioa gehieneko koefizientea aplikatuta ateratzen den zenbatekoa baino txikiagoa denean eta zenbateko horren mugen barrenean.

Kontabilizatutako edo erregistratutako amortizazio gehiegizkoaren zerga-egozketa, aurreko lerroaldean aurreikusitakoaren arabera, ondorengo zergaldietan egitea ezinezkoa denean, gehiegizko hori eta gehieneko epetik kanpo kontabilitate edo erregistro bidez egin diren dotazioen zenbatekoak ez dira inolaz ere kengarriak izanen zergen ondorioetarako.

27. artikulua. Gutxieneko amortizazioa.

Zerga amortizazioa izan dezakeen elementu orok balio-galera izanen du urtero zenbateko hauetan:

a) Enpresa edo lanbide jarduerei atxikirik ez dauden elementuak direnean kapitalaren etekin garbia zehazteko amortizazio gastuak kengarriak diren zergaldietarako, Erregelamendu honen 13 eta 18. artikuluetan xedatutakoarekin bat, portzentaje finkoa edo hurrengo letran xedatutakoaren arabera dagokiona aplikatzetik ateratzen den zenbatekoa.

b) Enpresa edo lanbide jarduerei atxikitako elementuak direnean jardueraren etekin garbia zuzeneko zenbatespenaren araubidea erabiliz zehaztu den zergaldietarako, elementuaren balio osoa, erabilgarria den bitartean, hartzeko legez hartutako irizpideari jarraikiz kontatu beharko zatekeen amortizazioaren zenbatekoa, egiaz gastu kengarritzat hartu ala ez.

Hartutako irizpidea Erregelamendu honen 26. artikuluan araututako taulen araberako amortizazioa denean, aplikatzekoak diren koefizientea eta gehieneko epeari jarraikiz, epe horretan zergen ondorioetarako kengarria izan ez zitekeen zenbatekoa.

c) Enpresa edo lanbide jarduerei atxikitako ibilgetu materialaren eta higiezinetako inbertsioen elementuak direnean, jardueraren etekin garbia zenbatespen objektiboaren araubidea erabiliz zehaztu den zergaldietarako, erregelamendu honen 26. artikuluan amortizaziorako aurreikusitako gehieneko epetik heldu den koefizientea aplikatuta ateratzen denari dagokion zenbatekoa.

Ibilgetu ukiezinaren elementuen kasuan, amortizatu beharreko elementuaren balioa, erabilgarria den bitartean, hartzeko beharrezkoa den kuota lineala.

3. azpiatala. Zuzeneko zenbatespen erraztua

28. artikulua. Aplikazio eremua.

1. Enpresa edo lanbide jarduerak betetzen dituzten subjektu pasiboek beren jarduera guztien etekin garbia zehazteko zuzeneko zenbatespenaren araubidearen modalitate erraztua erabiliko dute, baldintza hauekin:

a) Jarduera horien etekin garbia ez zehaztea zenbatespen objektiboaren araubidea erabiliz.

b) Negozio zifraren zenbateko garbiak aurreko urtean 600.000 euro gainditu ez izana.

Zifra hori zehazteko, Merkataritzako Kodearen 35.2 artikuluko bigarren paragrafoan xedatutakoari jarraikiz, subjektu pasiboaren jarduera arruntei dagozkien produktuen salmentatik eta zerbitzuak ematetik ateratako zenbatekoak edo bestelako diru sarrerak kontatuko dira, hobariak eta salmenten gaineko beste murrizketak kenduta, bai eta Balio Erantsiaren gaineko Zerga eta negozio zifrarekin zerikusi zuzena duten beste zerga batzuk ere. Komisionistak badira, kontuan hartuko da komisioen zenbateko osoa.

c) Modalitate honi uko ez egitea.

2. Zuzeneko zenbatespenaren araubidearen modalitate erraztua aplikatzeko muga gisa ezartzen den negozio zifraren zenbateko garbiaren erreferentzia izanen da modalitatea aplikatu beharreko urtearen aurrekoa. Jarduera aurreko urtean hasitakoa baldin bada negozio zifraren zenbateko garbia urte batera jasoko da.

Jardueraren lehenbiziko urtean, etekin garbia zenbatespen objektiboaren araubidea erabiliz zehazten ez denean, modalitate erraztua aplikatuko da, salbu eta uko egiten bazaio.

29. artikulua. Ukoa eta bazterketa.

1. Zuzeneko zenbatespenaren araubidearen modalitate erraztuari uko egin nahi bazaio, ukoak ondoreak izan behar dituen egutegiko urtearen aurreko abenduan egin behar zaio edo, jarduera bati ekin bazaio, ekin eta hogeita hamar egun igaro baino lehen.

Ukoa hiru urtean egonen da indarrean, gutxienez. Hiru urte igarotakoan, eta modalitatea aplikatu ahal den artean, aurreko paragrafoan adierazitako epean ezeztatu ezean ukoa beste urtebeterako luzatuko da isilbidez.

Baldin eta zuzeneko zenbatespenaren araubidearen modalitate erraztuari egindako ukoa indarrean jarri behar den urtearen aurreko urtean haren aplikazio-eremua zehazten duen negozio kopurua gainditu bada, ukoa ez aurkeztutzat joko da.

Modalitateari uko egiteko, Ekonomi eta Ogasun Departamentuak onesten duen eredua bete beharko da, bai eta ukoa ezeztatzeko ere.

2. Zuzeneko zenbatespenaren araubidearen modalitate erraztutik bazter uzteko arrazoi izanen da aurreko artikuluan ezarritako negozio kopurua gainditzea.

Bazterketak hurrengo urtean izanen ditu ondoreak.

3. Halaber, modalitate horretatik bazter geratuko dira erregelamendu honetako 24. artikuluan aipatutako bateraezintasuna dutenak, bertan ezarritako ondoreekin.

4. Zuzeneko zenbatespenaren araubidearen modalitate erraztuari uko egiten dioten subjektu pasiboek eta hartatik bazter geratzen direnek araubidearen modalitate arruntaren bidez zehaztu beharko dituzte euren enpresa edo lanbide jarduera guztien etekin osoak.

30. artikulua. Etekin garbia zehaztea.

1. Zuzeneko zenbatespenaren araubidearen modalitate erraztua aplikatzekoa zaien enpresa edo lanbide jardueren etekin garbia Pertsona Fisikoen Errentaren gaineko Zergari buruzko Foru Legearen 34. eta 35. artikuluetan bilduta dauden arauei jarraikiz zehaztuko da, berezitasun hauekin:

a) Ibilgetu materialaren eta higiezinetako inbertsioen amortizazioak erregelamendu honen 26. artikuluan ezarritako taulen metodoa soilik erabiliz eginen dira.

b) Ekarpenak ez dira kengarriak izanen, ez eta narriaduragatiko galerak ere.

2. Aurreko idatz-zatian xedatutakoari jarraikiz kalkulatutako etekin garbi positiboari ehuneko 5a kenduko zaio.

31. artikulua. Esleipen araubideko entitateak.

1. Zuzeneko zenbatespenaren araubidearen modalitate erraztua aplikatzekoa izanen da Zergari buruzko Foru Legearen 11. artikuluak aipatzen dituen entitateek egindako enpresa edo lanbide jardueren kasuan, beti ere, baldintza hauekin:

Lehenengoa. Bere bazkide, jaraunsle, erkide edo partaide guztiak zerga honen kargapeko pertsonak fisikoak badira.

 Bigarrena. Entitateak Erregelamendu honen 28. artikuluan zehaztutako baldintzak betetzea.

2. Modalitateari bazkide, oinordeko, erkide edo partaide guztiek eginen diote uko, eta Erregelamendu honen 29. artikuluan xedatutakoarekin bat.

3. Modalitate hau aplikatuko da bazkide, oinordeko, erkide edo partaideen banakako inguruabarrak zeinahi direla ere.

4. azpiatala. Zenbatespen objetiboa

32. artikulua. Aplikazio eremua.

1. Zenbatespen objektiboaren araubidea Ekonomi eta Ogasun kontseilariak adierazten dituen enpresa eta lanbide jarduerei aplikatuko zaie, zeini bere aldetik, subjektu pasiboek, erregelamendu honetako 33. eta 34. artikuluetan ezarritakoaren arabera, uko egin ezean edo hartatik baztertuta egon ezean, hurrenez hurren.

Hala ere, araubide hau ezin aplikatu izanen zaie osorik edo partzialki Espainiako lurraldetik kanpo egiten diren enpresa eta lanbide jarduerei.

2. Araubide hau ez dagokie Ekonomia eta Ogasun kontseilariak hartarako ematen duen Foru Aginduak ezartzen dituen mugak gainditzen dituzten subjektu pasiboei.

3. Diru-sarreren bolumenaren tamaina konputatzeko, kontuan hartuko dira subjektu pasiboak eginiko enpresa jarduerei dagozkien eragiketak ez ezik baita ezkontideak, ondorengo ahaideek eta aurreko ahaideek egindakoei, eta orobat, aurreko horietako edozein partaide den errenta-egozpenaren araubideko entitateek egindakoei dagozkienak ere, inguruabar hauek batera gertatzen badira:

-Enpresa jarduera berdinak edo berdintsuak egitea. Berdintzat edo berdintsutzat joko dira Jarduera Ekonomikoen gaineko Zergaren ondorioetarako multzo berean sailkaturik daudenak.

-Jarduera horien zuzendaritza bateratua izatea, langileak edo baliabideak partekatuz.

33. artikulua. Ukoa.

1. Zenbatespen objetiboaren araubidearen ukoa ondorioak izan behar dituen urtearen aurreko abenduan egin beharko da, edo jarduerari hasiera ematen bazaio, hasi ondoko hogeita hamar egunen epearen barrenean. Halere, araubide hau garatuko duen Foru Aginduan ukoa egiteko epe bereziak ezarri ahal izanen dira.

2. Zenbatespen objetiboari uko egiteak zuzeneko zenbatespenaren araubidearen modalitate erraztuaren aplikazio eremuan sartzea ekarriko du, 28. artikuluaren 1. idatz-zatian aurreikusiriko moduan.

3. Ukoak hiru urtetarako izanen ditu ondorioak, gutxienez. Epe hori iraganik, luzatzen dela ulertuko da besterik gabe, zenbatespen objetiboa aplikatzekoa izan daitekeen hurrengo urte bakoitzeko, salbu eta 1. idatz-zatian aurrekusiriko epean atzera botatzen bada.

Zenbatespen objetiboaren araubideari egindako ukoak ondorioak izan behar dituen urtearen aurrekoan aplikazio eremua zehazten duten mugak gainditzen badira, ukoa ez aurkeztutzat hartuko da.

4. Uko egitea eta hura atzera botatzea Ekonomi eta Ogasun Departamentuak onetsitako ereduaren araberako deklarazioaren bidez eginen da.

34. artikulua. Kanpo gelditzea.

1. Erregelamendu honen 32.2 artikuluak aipatzen dituen mugak gainditzeak zenbatespen obejtiboaren araubidetik kanpo gelditzea ekarriko du.

Aipatutako inguruabarra gertatu ondoko urtean izanen ditu ondorioak kanpoan gelditzeak.

2. Era berean, araubide honetatik kanpo gelditzeko arrazoia izanen da Erregelamendu honen 24. artikuluan aurreikusiriko bateraezintasuna egotea eta 35. artikululo 2. idatz-zatitik bazter gelditzea.

3. Zenbatespen objetiboaren araubidetik kanpo gelditzeak zuzeneko zenbatespenaren araubideko modalitate erraztuaren aplikazio eremuan sartzea ekarriko du, Erregelamendu honen 35. artikuluko 2. idatz-zatian aurreikusi bezala.

35. artikulua. Balio Erantsiaren gaineko zergarekin koordinatzea.

1. Araubide berezi erraztuari edo Balio Erantsiaren gaineko zergaren nekazaritza, abeltzaintza eta arrantzarako araubide bereziari uko egiteak zenbatespen objetiboaren araubideari uko egitea ekarriko du, subjektu pasiboak betetzen dituen enpresa eta lanbide jarduera guztietarako.

2. Balio Erantsiaren gaineko Zergan araubide berezi erraztutik bazter geratzeak berekin ekarriko du subjektu pasiboak egiten dituen enpresa eta lanbide jarduera guztietarako zenbatespen objektiboaren araubidetik ere bazter geratzea.

36. artikulua. Etekin garbia zehaztea.

1. Subjektu pasiboek dagokion etekin garbia zehaztuko dute araubidea aplikatzekoa den jarduera bakoitzaren kasuan.

2. Aurreko idatz-zatiak aipatzen duen etekin garbia subjektu pasiboak berak zehaztuko du, jarduera bakoitzari Ekonomi eta Ogasun kontseilariak finkatutako zeinu, indize edo moduluak ezarriz.

Kalkulaturiko etekin garbian ez dira sartuko enpresa edo lanbide jarduerei atxikitako ibilgetuaren elementuetan gertatutako ondare gehikuntzak eta murrizketak. Horiek Zergari buruzko Foru Legean eta Erregelamendu honetan ondare gehikuntza eta murrizketetarako aurreikusiriko arauetan oinarriturik kuantifikatuko dira eta horien arabera ordainduko dute zerga.

3. Araubide honen menpeko jarduera baten eragiketak urtarrilaren 1etik aurrera hasi edo abenduaren 31 baino lehen bukatzen badira, zeinu, indize edo moduluak subjektu pasiboa jardueran urte naturalean aritutako denboraren proportzioan aplikatuko dira.

Idatz zati honetan xedatutakoa ez da aplikatuko denboraldiko jardueren kasuan, horiek dagokion Foru Aginduan ezarritakoak arautuko baititu.

4. 1. Araubide hau aplikatzekoa zaien enpresa edo lanbide jarduerak sute, uholde edo aparteko inguruabarren batek kaltetzen baditu, sektore edo alde zehatz batean, Ekonomi eta Ogasun kontseilariak baimena eman dezake, salbuespen gisa, zeinu, indize edo moduluak jaisteko.

2. Araubide hau aplikatzekoa zaien enpresa edo lanbide jarduerak sute, uholde, hondorapen edo industri ekipoko matxura handiren batek kaltetzen baditu, jarduera betetzeko arazo handiak ekarriz berarekin, interesatuek zeinu, indize edo moduluak jaistea eskatu ahal izanen diote Ekonomi eta Ogasun Departamentuari hogeita hamar eguneko epean horiek gertatzen direnetik; horretarako, egokitzat jotzen dituzten frogak aurkeztu ahal izanen dituzte eta, dagokionean, arazoak direla-eta jaso beharreko kalteordainak aipatu beharko dute. Arazo horiek hala gertatu direla egiaztatuta, zeinu, indize edo moduluetan bidezkoa den jaitsiera egiteko baimena izanen da.

Era berean, zeinu, indize edo moduluak jaisteko baimena eman ahal izanen da jardueraren titularra aldi baterako ezgaitasun egoeran baldin badago eta beste langilerik ez badu. Zeinu, indize edo moduluak jaisteko prozedura aurreko idatz-zatian aurreikusitako berbera izanen da.

Zeinu, indize edo moduluen jaitsiera kontuan hartuko da baimenaren datatik aurrera egindako ordainketa zatikatuen ondorioetarako.

3. Araubide hau aplikatzekoa zaien enpresa edo lanbide jarduerak sute, uholde, hondorapen edo aparteko inguruabarren batek kaltetzen baditu, jarduera betetzeko ohiko prozesuari ez dagozkion gastu bereziak ekarriz berarekin, interesatuek gastu horien zenbatekoa kendu ahal izanen diote ateratzen den etekin garbiari. Horretarako, subjektu pasiboek Ekonomi eta Ogasun Departamentuari eman beharko diote horren berri, gertatu eta hogeita hamar eguneko epean; horretarako, egiaztagiriak aurkeztu beharko dituzte eta gertatutakoa dela-eta jaso beharreko kalteordainak aipatu. Departamentuak etekinaren murrizketarako arrazoia eta horren zenbatekoa egiaztatuko ditu.

5. Jarduera bakoitzari aplikatzekoak zaizkion zeinu, indize edo moduluak finkatzen dituen Foru Aginduak zenbaketa egokirako jarraipideak bilduko ditu eta Nafarroako Aldizkari Ofizialean argitaratuko da.

37. artikulua. Jarduera independienteak.

1. Zenbatespen objetiboaren araubidea aplikatzeko, jarduera independientetzat hartuko dira araubide hori erregulatzen duten Foru Aginduetan berariaz bilduko diren guztiak.

2. Jarduera honetan sartuta dauden eragiketa ekonomikoak zehazteko Jarduera Ekonomikoen gaineko Zergaren arauak erabiliko dira, aplikatu daitezkeen neurrian.

38. artikulua. Esleipen araubidean dauden entitateak.

1. Zenbatespen objektiboaren araubidea Zergari buruzko Foru Legeko 11. artikuluan aipatutako erakundeek egiten dituzten enpresa edo lanbide jardueren etekin garbia zehazteko aplikatu ahal izanen da, baldin eta beraien bazkide, jaraunsle, erkide edo partaide guztiak zerga honen kargapeko pertsona fisikoak badira eta foru agindu egokian ezarritako betekizunak betetzen badituzte.

2. Araubideari bazkide, oinordeko, erkide edo partaide guztiek eginen diote uko, eta Erregelamendu honen 33. artikuluan xedatutakoarekin bat.

3. Zenbatespen objektiboko araubidea aplikatuko da bazkide, oinordeko, erkide edo partaideen banakako inguruabarrak zeinahi direla ere.

Dirusarreren zenbatekoa kalkulatzerakoan, ordea, kontuan hartu behar dira, entitateak berak egozpenaren araubidean egindako enpresa jardueretako eragiketez gain, baita haren bazkide, oinordeko, erkide edo partaideek, horien ezkontide, ondorengo eta aurrekoek, eta horietako edozeinen partaidetzakoak diren errenta-egozpenaren araubideko beste entitate batzuek egindakoak ere, baldin eta horietan guztietan inguruabar hauek gertatzen badira:

_Enpresa jarduera berdinak edo berdintsuak egitea. Berdintzat edo berdintsutzat joko dira Jarduera Ekonomikoen gaineko Zergaren ondorioetarako multzo berean sailkaturik daudenak.

_Jarduera horiek guztiek helbide komuna izatea eta langileak edo materialak partekatzea.

4. atala. Ondare gehikuntzak eta murrizketak

39. artikulua. Eskuratze-balioa zehaztea.

1. Eskualdatutako ondare elementuen eskuratze-balioari zerga aldetik kengarriak diren amortizazioen zenbatekoa kenduko zaio, eta edozein kasutan Erregelamendu honen 27. artikuluak aipatzen duen gutxieneko amortizazioa kontatuko da, azken hori egiaz gastutzat hartu ala ez.

2. Eskuratze-balioa kalkulatzeko, kontuan hartuko dira legezko edo erregelamenduzko arauez baliatuz egindako enpresa edo lanbide jarduerei atxikitako ondare elementuen birbalorazioak, kontabilitatekoak nahiz erregistrokoak.

40. artikulua. Salbuespena, ohiko etxebizitza eskualdatzean.

1. Subjetu pasiboaren ohiko etxebizitzaren eskualdaketan agertzen diren ondare gehikuntzek salbuespena izan dezakete, lortutako zenbateko osoa berriz inbertitzen baldin bada ohiko etxebizitza berri bat erosten edo zaharberritzen, artikulu honetan ezartzen diren baldintzetan.

2. Eskualdatutako etxebizitza erosteko subjetu pasiboak besteren finantzazioa erabili duenean, lortutako zenbateko osotzat hartuko da, ondorio hauetarako soilik, eskualdatzean amortizatzeko dagoen maileguaren printzipala eskualdaketaren balioari kenduta ateratzen dena. Edozein kasutan, une horretan printzipala amortizatzeko erabiltzen den zenbatekoa eskualdaketaren balioari kenduko zaio, eta zenbateko hori ez da kontatuko ohiko etxebizitzan inbertitzeagatik izan dezakeen murrizketaren oinarria zehazteko.

3. Berrinbertsioaren zenbatekoa zehazteko etxebizitza erosi edo zaharberritzeko ordaindutako kopuruak kontatuko dira, sortu diren eta erosleak bere gain hartu dituen gastuak eta, besteren finantzazioa dagoenean, horren amortizazioa barne direla.

4. Besterentzean lortutako zenbatekoa behin bakarrik edo behin eta berriz berrinbertituko da bi urtetik beherako epe baten barrenean.

Salmenta epeka edo prezio geroratuan egiten den kasuetan, berrinbertsioa epearen barrenean egiten dela ulertuko da epeen zenbatekoa adierazitako helbururako erabiltzen denean epeak jasotzen diren zergaldiaren barnean.

Aurreko lerroaldeetan xedatutakoarekin bat, berrinbertsioa besterentzearen urte berean egiten ez bada, sujetu pasiboa beharturik egonen da ondare gehikuntza lortzen den ekitaldiko zerga aitorpenean agertaraztera berriz inbertitzeko asmoa duela, adierazitako baldintza eta epeetan.

Era berean, berrinbertsioagatiko salbuespena izateko eskubidea emanen dute besterentzean lortutako kopuruek, baldin eta besterendu baino bi urte lehenagoko epean erositako ohiko etxebizitza berri baten prezioa ordaintzeko erabiltzen badira.

5. Berrinbertsioaren zenbatekoa besterentzean lortutako osoa baino txikiagoa denean, zergapetzetik salbuetsita geldituko da, soilik, artikulu honen baldintzak betez egiaz inbertitutako zenbatekoari dagokion ondare gehikuntzaren zati proportzionala.

6. Etxebizitza bat ohiko etxebizitzatzat hartzeko, Erregelamendu honetako 51. artikuluan ezarritakoari jarraituko zaio: Halaber, salbuespen hau izan dezakete, baita Zergari buruzko Foru Legearen 39.5.b) artikuluan aurreikusitako salbuespena ere, ohikoa ez den etxebizitza eskualdatzen duten subjektu pasiboek, eskualdaketaren aurreko bi urteen barnean ohikoa izan bada.

7. Artikulu honetan ezarritako baldintzetako edozein ez betetzeak dagokion ondare gehikuntzaren zatia zergapetzea ekarriko du.

Hala izanez gero, subjektu pasiboak salbuetsirik ez dagoen ondare gehikuntzaren zatia hura lortu zuen urteari egotziko dio, eta aitorpen-likidazio osagarria, berandutza interesak barne, egin eta aurkeztuko du, ez betetzea gertatzen denetik data horren zergaldiari dagokion aitorpenerako erregelamenduzko epea amaitu arteko epean aurkeztuko du.

41. artikulua. Salbuespena, enpresa edo lanbide jarduerei atxikitako elementuen berrinbertsioagatik.

1. Zergari buruzko Foru Legearen 45. artikuluaren 2. idatz-zatiak aipatzen dituen enpresa edo lanbide jarduerei atxikitako elementuen berrinbertsioagatiko salbuespena elementua atxikia duen enpresa edo lanbide jardueraren etekina zehazteko araubidea zeinahi ere dela aplikatuko da.

2. Sozietateen gaineko Zergari buruzko Foru Legearen 36. artikuluaren 5. idatz-zatian ezarritako baldintza betetzeko, Erregelamendu honen 61. artikuluaren 3, 4 eta 5. idatz-zatiek aipatzen dituzten enpresa edo lanbide jardueretan aritzen diren subjektu pasiboek inbertsio ondasunen Erregistro Liburuan agertarazi beharko dute berrinbertsioa zein elementutan gauzatu den, gainerako elementuetatik bereiziz, argi identifikatu ahal izateko.

Halaber, berrinbertsioaren xedea diren lortutako errentei dagozkien datuak eta gauzatzen den elementuak sartu beharko dituzte Zergaren aitorpenetan.

Jardueren etekin garbia zenbatespen objektiboaren araubidea erabiliz zehazten duten subjektu pasiboek aurreko lerroaldeak aipatzen dituen datuak baizik ez dituzte sartu beharko zerga aitorpenean.

3. Sozietateen gaineko Zergari buruzko Foru Legearen 36. artikuluan ezarritako baldintzak ez betetzeak salbuespena osorik edo hein batean galtzea ekarriko du. Kasu horretan, subjektu pasiboak ez-betetzea gertatzen den zergaldiko Pertsona Fisikoen Errentaren gaineko Zergaren aitorpenean sartu beharko du salbuespena aplikatu zeneko ekitaldian zegokion kuota osoaren zenbatekoa, berandutze-interesak barne.

42. artikulua.

III. KAPITULUA. Gauzazko errentak

43. artikulua. Sozietate fundatzaileen eskubideak.

Sozietate baten fundatzaile edo sustatzaileek, zerbitzu pertsonalen ordainsari gisa, beraiendako gordetzen dituzten eskubide ekonomiko bereziak, entitatearen mozkinen portzentajea direnean, jasoko duten gutxieneko balorazioa izanen da eskubide horiei mozkinean onartzen zaien partaidetza bera izatea ahalbidetzen duen kapital sozialaren baliokidea den balioa.

44. artikulua. Gauzazko ordainsariak ez diren eritasun aseguruen gastuak.

Zergari buruzko Foru Legearen 15.1.e) artikuluan aurreikusitakoari jarraikiz, ez dira gauzazko lan etekintzat hartuko enpresek aseguru entitateei eritasunerako ordaindutako primak edo kuotak, baldintza hauek betetzen badira:

1. Eritasunerako aseguruak langilea bera hartzea, ezkontidea eta ondorengoak ere har ditzakeela.

2. Aurreko idatz-zatian aipatutako pertsona bakoitzeko urtean ordaindutako prima edo kuoten kopurua 500 euro baino gehiago ez izatea. Kopuruen horren gaindikinak gauzazko ordainsaritzat hartuko dira.

45. artikulua. Langileen trebatze edo birziklatze ikasketa gastuak, gauzazko ordainsariak ez direnak.

Zergari buruzko Foru Legearen 15.1.g) artikuluan aurreikusirikoaren ondorioetarako, ez dira gauzazko ordainsaritzat hartuko entitateek, enpresek edo enplegatzaileek prestatu eta zuzenean finantzatutako ikasketak, beraien langileak eguneratze, trebatze edo birziklatzeko, jarduerak betetzeko edo lanpostuen ezaugarriak direla eta beharrezkoak direnean, bai eta egiaz ikasketak ematen dituztenak beste pertsona edo entitate espezializatu batzuk direnean ere. Kasu horietan, lokomozio, mantenu eta egonaldiaren gastuetarako Erregelamendu honen 8. artikuluan aurreikusitakoa aplikatuko da.

46. artikulua. Enpresako jantokien gastuak, gauzazko ordainsariak ez direnak.

1. Zergari buruzko Foru Legearen 15.2.a) artikuluan aurreikusitakoaren ondorioetarako, enpresako jantokietan egiten diren produktu merkeagoen entregatzat hartuko dira zerbitzua emateko formula zuzen eta zeharkakoak, lan arloko legeek onartuak, baldintza hauek betetzen badituzte:

Lehena. Zerbitzua ematea enplegatu edo langilearentzat baliodunak diren egunetan.

Bigarrena. Enplegatu edo langileek, Erregelamendu honen 8. artikuluarekin bat, zergapetzetik kanpo dauden mantenu dietetarako eskubidea duten egunetan zerbitzua ez ematea.

2. Zerbitzua zeharkako formulen bidez ematen denean, aurreko idatz-zatian eskatzen diren baldintzez gain beste hauek ere bete beharko dira:

Lehena. Zeharkako formulen zenbatekoa ez da 9 eurotik gorakoa izanen egunean. Eguneko zenbatekoa handiagoa izanez gero, gauzazko ordainsaria eman beharko da soberakinaren ordainez. Zenbateko hori Ekonomia eta Ogasun kontseilariak aldatu ahal izanen du formula horien bilakaera ekonomikoa eta eduki soziala kontuan harturik.

Bigarrena. Zerbitzua emateko enplegatuari edo langileari jatordu-bonoak edo antzeko agiriak, ordaintzeko txartelak edo ordaintzeko bestelako bitarte elektronikoak ematen bazaizkio, honakoa bete beharko da:

a) Zenbakituta eta dagokionaren izenean luzatuta egonen dira, eta enpresa jaulkitzailea zein den agertuko da. Gainera, paperezko euskarrian ematen badira, zenbateko nominala ere agertuko da.

b) Ezin izanen dira eskualdatu eta egun batean kontsumitzen ez den zenbatekoa ezin izanen zaio beste egun batekoari gehitu.

c) Ezin izanen da haien zenbatekoa jaso ez enpresarengandik ez hirugarrenengandik.

d) Ostalaritzako establezimenduetan baizik ez dira erabiliko.

e) Ematen dituen enpresak enplegatu edo langile bakoitzari emandakoen zerrenda egin eta gorde beharko du, bertan honakoak adierazirik:

_Jatordu-bonoak edo antzeko agiriak badira, agiriaren zenbakia, eman den eguna eta zenbateko nominala.

_Txartelak edo ordaintzeko bestelako bitarteko elektronikoak badira, agiriaren zenbakia eta egun bakoitzean emandako zenbatekoa.

47. artikulua. Langileei akzio edo partaidetzak ematea.

1. Jardunean dauden langileei akzioak edo partaidetzak ematea ez da gauzazko lan etekintzat hartuko Zergari buruzko Legearen 15.2.c) artikuluan ezarritako baldintzak eta ondotik ematen direnak betetzen badira:

1.-Eskaintza enpresako langile guztientzat baldintza berberekin egiten dela ulertuko da enpresak edo, hala denean, sozietate taldeak ordainsarien arloan duen politika orokorraren barrenean egiten denean eta langileek enpresan parte hartzea bultzatzen duenean.

2.-Langile bakoitzak, ezkontide edo bigarren mailarainoko senideekin batera, zerbitzuak ematen dituzten sozietatean edo taldeko beste edozeinetan partaidetza, zuzena zein zeharkakoa, baldin badute, 100eko 5etik gorakoa ez izatea.

2. Akzioak edo partaidetzak langileak zerbitzuak ematen dituen sozietateak berak, taldeko beste sozietate batek edo akzioen titularra den ente publiko, sozietate edo administrazio publikoak eman ahal izanen ditu.

47.bis artikulua. Bidaiari-garraio kolektiboaren zerbitzu publikoa ordaintzeko zeharkako formulak.

1. Zergari buruzko Foru Legearen 15.2.d) artikuluan ezarritakoaren ondorioetarako, ondoko baldintza hauek betetzen dituzten txartelak edo ordainketarako beste baliabide elektronikoak langileei ematea bidaiari-garraio kolektiboaren zerbitzu publikoa ematen duten entitateei zeharka ordaintzeko formulatzat hartuko da:

1. Bidaiari-garraio kolektiboaren zerbitzu publikoa erabiltzeko aukera ematen duten garraio-tituluak erosteagatiko kontraprestazio gisa, eta ez beste ezertarako, erabili ahal izatea.

2. Txartelen edo ordaintzeko baliabide elektronikoen bidez ordaintzen den kopurua ez izatea 136,36 eurotik gorakoa langile eta hilabete bakoitzeko, ez eta 1.500 eurotik gorakoa urtean.

3. Zenbakiturik egotea, izendunak izatea eta enpresa jaulkitzailearen izena agertzea.

4. Utziezinak izatea.

5. Haien errenboltsorik jaso ezin izatea, ez enpresarengandik ez hirugarrenengandik.

6. Txartelak edo ordainketarako baliabide elektronikoa ematen dituen enpresak enplegatu edo langile bakoitzari emandakoaren zerrenda egin eta gordetzea, bertan honakoak adierazirik:

a) Agiri zenbakia.

b) Urtero langilearen eskura jartzen den kopurua.

2. Ematen diren txartelek edo ordainketarako beste baliabideek artikulu honen 1. idatz-zatian adierazitako baldintzak bete ezik, langilearen eskura jarritako diru-kopuru guztiak gauzatan ordainduko dira. Dena dela, 1. idatz-zati horren 2. zenbakian adierazitako mugak betetzen ez badira, gauzazko ordainsaria soberakinagatik izanen da bakar-bakarrik.

47.ter artikulua. Gauzazko ordainketa jakin batzuen mugak eta ezaugarriak.

1. Zergari buruzko Foru Legearen 15.2.e) artikuluan aurreikusitakoaren ondorioetarako, honakoek ez dute gauzazko lansarien izaera izanen:

a) Baimena duten ikastetxeek emandako hezkuntza zerbitzuak (eskolaurrekoa, haur eta lehen hezkuntza, derrigorrezko bigarren hezkuntza, batxilergoa, lanbide heziketa eta unibertsitatekoa), betiere baldintza hauek betetzen badira:

1. Zerbitzua ematea ikastetxearekin lan harremana duten langileen seme-alabei.

2. Subjektu pasiboaren eta ikastetxearen arteko lan harremanek urtean eragindako diruzko ordainsariak, guztira, 60.000 eurotik beherakoak izatea.

Lan etekinak banaka kontatzeko arauekin bat, bi gurasoek lan harremana dutenean ikastetxearekin, jaso beharreko gauzazko ordainsariaren zenbatekoa erdi bana emanen zaie. Kasu horretan, 60.000 euroko gehieneko muga hori zenbatzeko, guraso bakoitzaren urteko diruzko ordainsari osoak hartuko dira kontuan.

b) Negoziazio kolektiboaren prozesuetan adostutakoak, aurreko a) letran jasotakoez bestelakoak eta gehienez ere 2.500 euroko zenbatekoarekin, betiere baldintza hauek betetzen badira:

1. Kasuan kasuko hitzarmen edo akordio kolektiboetan jasota egotea.

2. Subjektu pasiboak, ezkontidearekin, izatezko bikotekidearekin edo bigarren gradurainoko ahaideekin batera, 100eko 15etik gorako partaidetza zuzen edo zeharkakorik ez izatea zerbitzuak ematen dituen enpresan edo entitatean edo taldeko beste edozeinetan.

3. Subjektu pasiboak zerbitzuak ematen dituen enpresaren edo entitatearen aldetik edo taldeko beste edozeinen aldetik urtean osotara jasotzen dituen diruzko ordainsariek 60.000 euro egitea gehienez ere, lan etekinak baldin badira, betiere.

2. Aurreko 1.b) letran ezarritakoa ez da inola ere aplikatuko gauzazko ordainsari hauen kasuan, eta Zergari buruzko Foru Legearen 15. eta 16. artikuluetan eta erregelamenduan ezarritako araubidea mantenduko dute:

a) Zergari buruzko Foru Legearen 15.1.a) artikuluan aipatzen den etxebizitzaren erabilera.

b) Enpresak aseguru entitateei eritasuna estaltzeko ordaindutako primak edo kuotak, bai eta lan istripuetarako edo erantzukizun zibileko aseguru kontratuengatik ordaindutakoak ere, Zergari buruzko Foru Legearen 15.1.e) artikuluan aurreikusitako moduan.

c) Zergari buruzko Foru Legearen 15.1.f) artikuluan aipatutako kontribuzio eta ekarpenak.

d) Ikasketa eta mantenu gastuak ordaintzeko zenbatekoak, Zergari buruzko Foru Legearen 15.1.g) artikuluaren bigarren lerrokadan jasotakoak.

e) Prezio merkatua duten produktuen entregak, enpresetako kantina eta jantokietan edo ekonomato sozialetan egindakoak, zerbitzua zeharka emateko formulak barne, Zergari buruzko Foru Legearen 15.2.a) artikuluan araututakoak, hain zuzen.

f) Langileen zerbitzu sozial eta kulturaletarako ondasunen erabilera, Zergari buruzko Foru Legearen 15.2.b) artikuluan ezarritako moduan.

g) Sozietateek beren akzio edo partaidetzak, edo Merkataritza Kodearen 42. artikuluaren ildotik taldea osatzen duen edozein sozietateren akzio edo partaidetzak, jarduneko langileei doan edo merkatu prezio normala baino merkeago ematea, Zergari buruzko Foru Legearen 15.2.c) artikuluan jasotakoa.

h) Enplegatuak bizilekutik lantokira eramateko bidaiari-garraio kolektiboaren zerbitzu publikoa ematen duten entitateei ordaindutako diru-kopuruak, zeharka ordaintzeko formulak barne, Zergari buruzko Foru Legearen 15.2.d) artikuluan jaso bezala.

IV. KAPITULUA. Likidazio oinarri orokorra

48. artikulua. Gizarte aurreikuspeneko mutualitateen eskubide kontsolidatuen erabilerak.

Zergari buruzko Foru Legearen 55.1.2.b) artikuluan aurreikusitakoaren ondorioetarako honakoa hartuko da kontuan:

1. Pentsio Plan eta Funtsak arautzen dituen Legearen Testu Bateginak, azaroaren 29ko 1/2002 Legegintzako Errege Dekretuaren bidez onetsiak, 8.8 artikuluan aurreikusitakoez beste kasuetan, eskubide kontsolidatuen erabilerak lan etekintzat hartuko dira. Prestazioak kapital gisa jasotzen badira eta lehenbiziko ekarpenetik bi urte iragan direnean, Zergari buruzko Foru Legearen 17.2 artikuluak aipatzen dituen murrizketak egiteko, %40ko portzentajea aplikatuko zaie.

2. Jasotako zenbatekoak erabilera aurreratua egiten den zergaldiari dagokion aitorpenean sartuko dira.

49. artikulua. Gizarte aurreikuspeneko sistemetarako ekarpen eta kontribuzioen soberakinak.

Zergari buruzko Foru Legearen 55.1.8 artikuluan eta hamabosgarren xedapen gehigarrian aipatzen diren soberakinengatik murrizketak egin ahal izanen dira zerga oinarrian hurrengo bost zergaldietan, erregela hauen arabera:

Lehena. Murrizketaren zenbatekoa, hurrengo zergaldietako bakoitzean, izan daitekeen handiena izanen da, Zergari buruzko Foru Legearen 55.1.7 artikuluan eta hamabosgarren xedapen gehigarrian ezarritako mugak gainditu gabe.

Bigarrena. Zergaldian egindako ekarpenekin pilatzen badira, lehenbizi aurreko urteetako soberakinei dagozkien murrizketak aplikatuko dira.

49 bis artikulua. Talde inbertsioko erakundeak: bazkideen kopurua, ondarea eta gehieneko partaidetza-portzentajea.

1. Zergari buruzko Foru Legeko 52. artikuluaren arabera sozietate diren talde inbertsioko erakundeek izan behar duten gutxieneko bazkide kopurua honela zehaztuko da:

a) 52. artikuluko 1. idatz-zatian ageri diren talde inbertsioko erakundeetan, eskualdatu edo itzuli aurretik erakundeak Talde inbertsioko erakundeei buruzko 35/2003 Legearen Erregelamenduan (azaroaren 4ko 1309/2005 Errege Dekretuak onetsian) xedatutakoarekin bat etorriz Balore Merkatuen Batzorde Nazionalari bidalitako azken hiruhilekoko txostenean ageri den akziodun kopurua.

b) 52. artikuluko 2. idatz-zatian ageri diren talde inbertsioko erakundeetan, talde inbertsioko erakundeak edo beraren gestorak berariaz izendatutako erakunde merkaturatzaile bakar batek, Espainian establezimendua duenak, eskualdatu edo itzuli aurretik Balore Merkatuko Komisio Nazionalari erregistratutako sail edo azpifuntsez bidalitako urteko azken berriematean ageri den akziodun kopurua. Ondore horietarako eta hurrengo idatz-zatian xedatutakoaren ondoreetarako, berriemate horretan sail edo azpifunts bakoitzeko akziodunen guztirako kopurua, erakundearen, sailaren edo azpifuntsaren guztirako ondarea eta aurreko datuei dagokien data azaldu behar dira; berriemateak urtebeteko indarraldia izanen du, gehienez, aipatu datatik aurrera. Balore Merkaturako Komisio Nazionalak jendaurrean azalduko du informazio hori eta letra honetan azaldutako informazioaren berri emateko betekizun teknikoak eta prozedurak zehaztuko ditu.

2. Zergari buruzko Foru Arauko 52. artikuluan talde inbertsioko sozietate-erakunde batek parte hartzen duen eragiketetarako ezarritako gerorapen araubideari heldu nahi dioten subjektu pasiboek agiri bidez jakinarazi behar diote eskualdaketa eta itzulketa edo erosketa eta harpidetza eragiketak bitarteko gisa egiten dituzten erakundeei aurreko hamabi hiletan ez dutela parte hartu talde inbertsioko erakundearen kapitalaren %5 baino gehiagoko eragiketetan. Erakunde horiek Zerga Administrazioaren esku eduki behar dituzte subjektu pasiboek emandako berriemate-agiriak zerga-betebeharrek preskribitu arte.

III. TITULUA. KUOTAREN KENKARIAK

50. artikulua. Elbarritasuna eta elbarritasun gradua frogatzea.

1. Zerga honen ondorioetarako, elbarri dira %33 edo gehiagoko elbarritasun gradua duten pertsonak.

2. Aurreko idatz-zatian ezarritakoaren ondorioetarako, elbarritasun gradua frogatutzat emanen da Foru Komunitateko gizarte ongizateko zerbitzuek, Migrazio eta Gizarte Zerbitzuen Institutuak edo kasuan kasuko erkidego autonomoko organo eskudunak ziurtatzen dutenean.

3. Hala ere, ulertuko da Administrazio Publikoek ezgaitasun iraunkor osoaren ondorioz aitorturiko prestazioak hartzen dituzten pertsonek %33ko edo hortik goitiko elbarritasuna dutela; eta %65eko edo hortik goitiko elbarritasuna dutela erabateko ezgaitasun iraunkorraren, ezgaitasun handiaren edo epaile batek aitorturiko ezgaitasunaren ondorioz denean.

51. artikulua. Ohiko etxebizitzaren kontzeptua.

1. Oro har, subjektu pasiboaren ohiko etxebizitzatzat hartuko da hark gutxienez hiru urtez etenik gabe bizileku izan duen eraikina.

Hala ere, ohikotzat hartuko da, epe hori iragan gabe ere, baldin eta subjektu pasiboa hil egiten bada edo nahitaezko helbide aldaketa dakarren beste inguruabarren bat gertatzen denean, hala nola ezkontzea, bereiztea, lan- lekualdaketa, lehen enplegua lortzea, enpleguz aldatzea edo etxebizitza desegokia izatea minusbalioagatik edo eite bereko beste arrazoi frogatu batengatik.

2. Etxebizitza subjektu pasiboaren ohiko etxebizitza izateko subjektu pasiboa egiaz bizi behar da bertan, etenik gabe, hamabi hilabeteko epean, erosten denetik edo lanak amaitzen direnetik aurrera kontatuta.

Halere, etxebizitzak ez du ohikoaren izaera galduko subjektu pasiboa hiltzen bada edo etxebizitza okupatzea ezinbestez galarazten duen beste zerbait gertatzen bada, artikulu honen 1. idatz-zatian aurreikusitako moduan.

Subjektu pasiboak bere kargu edo enpleguaren ondorioz ohiko etxebizitza baldin badu eta erositakoa erabiltzen ez bada, kasu horretan aurrerago aipatutako epea kontatuko baita kargua edo enplegua uzten den egunetik aurrera.

3. Aurreko idatz-zatietan aurreikusitako salbuespenak aplikatzekoak direnean, etxebizitza erosteagatiko kenkaria eginen da etxebizitza nahitaez aldatzera behartzen duten edo hura okupatzea galarazten duten inguruabarrak gertatu arte, salbu eta kargua edo enplegua dela-eta subjektu pasiboak ohiko etxebizitza badu, kasu horretan kenkaria mantenduko baita egoerak dirauen bitartean eta etxebizitza erabiltzen ez den artean.

52. artikulua. Ohiko etxebizitza erostea eta kenkariaren oinarria.

1. Etxebizitza erostearen baliokidetzat hartuko dira hura eraikitzea edo handitzea, baldintza hauetan:

Etxebizitza handitzea, bizitzeko azalera handitzen denean estaligabeko zatiren bat itxiz edo beste modu batez, iraunkorra eta urte osorako baldin bada.

Eraikitzea, subjektu pasiboak zuzenean ordaintzen dituenean lanen exekuzioa edo lanen sustatzaileari konturako zenbatekoak ematen dizkionean, beti ere inbertsioa hasi eta lau urteko epean amaitzen badira lanok.

2. Aitzitik, ez da etxebizitzaren erosketatzat hartuko:

a) Kontserbazio edo konponketako gastuak, Erregelamendu honen 12. artikuluan aurreikusitako baldintzetan.

b) Hobekuntzak.

c) Garajea erostea, lorategiak, parkeak, igerilekuak eta kiroldegiak eta, orohar, eranskinak edo etxebizitza bera ez dena.

Aurreko leroaldean xedatutakoa gorabehera, etxebizitzaren erosketatzat hartuko da horrekin batera erositako garajeak, bi gehienez, eta hirigintza arauei jarraikiz, etxebizitza eraikitzeko beharrezkoa den lurra.

3. Konkurtsoan egotearen ondorioz sustatzaileak eraikitze lanak amaitzen ez baditu artikulu honen 1. idatz-zatiak aipatzen duen lau urteko epea iragan baino lehen edo etxebizitzak epe horretan ezin baditu entregatu, epea beste lau urterako luzatuko da.

Kasu horietan, Erregelamendu honen 51.2 artikuluan aipatzen den hamabi hilabeteko epea entregatik aurrera hasiko da kontatzen.

Idatz-zati horretan aurreikusiriko epearen luzapenak ondorioak izateko, subjektu pasiboak hasierako epea bete ez den zergaldiari dagokion zergaren aitorpena aurkeztu beharko du, horri erantsirik etxebizitzan egindako inbertsioak egiaztatzen dituen agiriak eta aipatutako egoeretakoren bat izan dela frogatzen dutenak.

Idatz-zati honek aipatzen dituen kasuetan, subjektu pasiboa ez da beharturik egonen ezein dirusarrera egitera, eraikitze lanak amaitzeko lau urteko epe orokor hori bete ez delako.

4. Subjektu pasiboari leporatu ezin dakizkiokeen eta lanak geldiaraztea ekartzen duten inguruabar bereziak direla-eta, horiek amaitzerik ez badago artikulu honen 1. idatz-zatian aipatzen den lau urteko epea iragan aurretik, subjektu pasiboak Ekonomia eta Ogasun Departamentuan eskatu ahal izanen du epea luzatzea, epea akitu eta ondoko hogeita hamar egunetan.

Eskabidean agertu beharko dira epea ez betetzea eragin duten arrazoiak eta eraikitze lanak amaitzeko zenbat denbora beharko den, gehienez ere lau urte.

Aurreko lerroaldean adierazitakoaren ondorioetarako, subjektu pasiboak dagokion frogagiria aurkeztu beharko du.

Aurkeztutako dokumentazioa ikusirik, Zuzeneko Zerga, Zehapen eta Errekerimenduen Zerbitzuko zuzendariak erabakiko du bidezkoa den ala ez eskatutako luzapena ematea eta halaber luzapen horren iraupena, azken hau ez baita nahitaez izanen subjektu pasiboak eskatutakoa.

Hiru hilabeteko epean espresuki ebazten ez diren luzapen eskaerak ezetsi egin direla ulertuko da.

Emanen den luzapenaren epea ez-betetzea gertatzen den egunaren biharamunetik bertatik hasiko da kontatzen.

5. Ohiko etxebizitza erostean edo zaharberritzean kapital gisako dirulaguntzak jasotzen direnean, horien zenbatekoa ondare gehikuntzatzat hartuko da, eta aurrezkiaren zerga oinarri berezian sartuko da, inolaz ere ekarri gabe kenkariaren oinarria murriztea.

Etxebizitzaren erosketa edo zaharberritzea finantzatzen duen maileguaren interes tasak hobaritu edo subsidiatzen dituzten dirulaguntzen kasuan, horien zenbatekoak kenkariaren oinarria jaitsiko du, baina ez da errenta zergagarria izanen.

6. Zergari buruzko Foru Legeko 62.1 artikuluko f) letran aurreikusiriko kenkaria egiteko, subjektu pasiboaren ohiko etxebizitza egokitzeko obra eta instalaziotzat hartuko dira etxebizitzaren barneko aldea berritzea dakartenak, baita hiri finkaren eta kalearen artean beharrezko pasabidetako balio duten eraikinaren osagai komunak aldatzea ere, hala nola, eskailerak, igogailuak, korridoreak, atariak edo beste edozein osagai arkitektoniko, edo zentzumenezko komunikaziorako oztopoak gainditzeko edo haien segurtasuna bultzatzeko balio duten dispositibo elektronikoak aplikatzeko behar direnak.

7. Zergari buruzko Foru Legearen 62.1.a) artikuluan aipatutako kasuetan, hau da, ezkontza deuseztatu, ezkontideak dibortziatu edo epaileak banantzen dituenean, ezkontza desegin arte ezkontideen ohiko etxebizitza izan zena erosteko ordaindutako kopuruengatik ez ezik, subjektu pasiboak murrizketa egin ahalko du bere ohiko etxebizitza berria erosteko zergaldian ordaindu dituen kopuruengatik ere, 62.1.a) artikulu horretan ezartzen den baterako mugarekin.

8. Erosteko aukera duten etxebizitzen errentamenduen kasuan, balio erantsiaren gaineko zergaren kontura ordaindutako kuotak ohiko etxebizitza erosteko bideratu direla ondorioztatuko da, baldin eta kontratuan aukera hori erabiltzera behartzen duen konpromiso irmoa baldin badago, kontratua sinatu eta gehienez sei urteko epean erabili beharrekoa.

Erosteko aukera erabiltzeko konpromisoa duen errentamendu kontratua sinatzean balio erantsiaren gaineko zergaren kontura sorrarazitako diru-kopuru guztiak etxebizitza erosteko bideratu direla ondorioztatuko da eta ez dira erregularizatuko, erosteko aukera erabiltzen den unean doitzen badira ere.

53. artikulua. Etxebizitza kontuak.

1. Kreditu entitateetan, beste edozein dirusarrera motatatik bereizitako kontuetan gordetzen diren zenbatekoak etxebizitza erosi edo zaharberritzeko erabili direla ulertuko da, baldin eta horien saldoak subjektu pasiboaren ohiko etxebizitza lehen aldiz erosi edo zaharberritzeko baizik ez badira erabiltzen.

2. Kenkarirako eskubidea honakoetan galduko da:

a) Subjektu pasiboak ohiko etxebizitza lehen aldiz erosi edo zaharberritzea ez den helburu baterako erabiltzen baditu etxebizitza kontuetan gordetako zenbatekoak. Diru horren zati bat erabiltzen badu, erabilitakoa kontuan gordetako lehendabiziko kopurua dela ulertuko da.

Nolanahi ere, Hirigintza eta etxebizitzaren arloan urgentziazko neurriak hartzeko ekainaren 5eko 6/2009 Foru Legearen 20. artikuluan ezarritakoarekin bat, Zergari buruzko Foru Legearen 62.1.a) artikuluan ezarritako betebeharra, alegia etxebizitzarako kontuetan gordetako diru-kopuruak ohiko etxebizitza lehen aldiz erosi edo zaharberritzen erabiltzekoa, ez da betegabetzat joko baldin eta, etxebizitzaren salerosketako kontratua suntsitzen bada salbuespeneko arrazoiengatik, saltzaileak edo sustatzaileak subjektu pasiboari itzuli badizkio kontura emandako diru-kopuruak, eta subjektu pasiboak etxebizitzarako zeukan kontuan edo, hura itxi badu, berri batean berriz sartu baditu.

Salerosketa kontratua suntsitzea ekar lezaketen salbuespenezko arrazoiak eta etxebizitzaren saltzaileak edo sustatzaileak itzulitako kopuruak etxebizitzarako kontura itzultzeko bete beharko diren betebeharrak Ekonomia eta Ogasuneko kontseilariaren uztailaren 3ko 133/2009 Foru Aginduan ezarritakoari jarraikiz zehaztuko dira. Foru agindu horretan arautzen da, halaber, kasuan kasuko inguruabar eta baldintzak bete direla dioen aitorpena eskatzeko prozedura.

b) Etxebizitza lehenbizikoz eskuratu edo zaharberritzeko gordailatu baina hamar urtean erabiltzen ez diren diru-kopuruetatik, kontua ireki zen azken zergaldia bukatzen denetik kontatzen hasita.

c) Etxebizitzaren erosketak edo zaharberritzeak kontzeptu horrengatik kenkaria izateko eskubidea ezartzen duten baldintzak betetzen ez dituenean.

3. Subjektu pasibo bakoitzak etxebizitza kontu bakar bat izan dezake.

4. Etxebizitza kontuaren egiaztagirian honako datu hauek agertu beharko dira, gutxienez:

Kontuaren titularra.

Kontu zein entitatetan eta noiz ireki den.

Kontuaren zenbakia.

Urtean zehar egindako mugimenduen laburpena.

Urte amaierako saldoa.

54. artikulua. Enpresa eta lanbide jardueretako kenkarien mugak.

Enpresak sustatzeko sozietateen funts berekietan edo arrisku-kapitaleko entitateen kapitalean zein funts berekietan egindako ekarpenen kenkarien mugak, bai eta Zergari buruzko Foru Legearen 64. artikuluaren 2. idatz-zatiak aipatzen dituen lanbide eta enpresa jardueretako kenkarien mugak ere, foru lege horren 62. artikuluko kenkariak kuota osoari kenduta ateratzen den kuota likidoaren gainean aplikatuko dira, artikulu bereko 3. eta 7. idatz-zatietan ezarritakoa salbu.

55. artikulua. Kenkarietarako eskubidea galtzea.

Egindako kenkarietarako eskubidea, osorik edo zati batean, galtzen denean horiek aplikatu ondorengo zergaldietan, subjektu pasiboa beharturik egonen da zergaren kuota likidoari, baldintzak bete ez diren ekitaldian sortutako horri, gaizki kendutako zenbatekoak, berandutza interesak barne, gehitzera.

IV. TITULUA. ZERGAREN KUDEAKETA

I. KAPITULUA. Aitorpena egiteko betebeharra

56. artikulua. Aitortu beharra.

Subjektu pasiboak beharturik egonen dira zerga honen aitorpena aurkeztu eta sinatzera Zergari buruzko Foru Legearen 82. artikuluan aurreikusiriko baldintzetan.

Hala ere, familia-unitaterik osatzen ez duten subjektu pasiboak edo, osatu arren, zergarekiko banakako lotura aukeratu dutenak ez daude aitorpena egitera beharturik, errenta mota hauek bakar-bakarrik jaso badituzte:

a) Urtean 11.250 eurotik beherako lan etekin osoak.

b) Ondasun higigarrien kapitalaren etekinak eta ondare gehitzeak, atxikipenaren edo konturako diru-sarreraren menpe daudenak, baldin eta bien artean, urtean eta osorik, 1.600 eurotik beherakoak badira.

Letra honetan xedatutakoa ez da aplikatuko talde inbertsioko erakundeen akzioen eta partaidetzen eskualdaketek eta diru-itzulketek eragindako ondare gehikuntzetan, haien atxikipen-oinarria zerga-oinarrian sartu beharreko zenbatekoaren arabera zehazterik ez dagoenean, 80.2 artikuluan ezarritakoarekin bat.

Ekonomia, Ogasun, Industria eta Enplegu Departamentuko titularrari baimena ematen zaio lehen aipatutako zenbatekoak eguneratzeko.

57. artikulua. Autolikidazioa eta zorra sartzea.

1. Zerga honen aitorpena aurkeztu behar duten subjektu pasiboek aitorpena aurkezteaz gainera euren zerga-zorra zehaztu behar dute eta Ekonomi eta Ogasun kontseilariak zehazten dituen lekuan, moduan eta epeetan sartu behar dute.

2. Autolikidazioaren emaitzako zenbatekoa bi zati berdin eginda sartu ahal izanen da, korriturik eta errekargurik gabe, aurreko idatz-zatian esandakoaren arabera ezarriko diren epeetan.

Ordainketa prozedura horri heldu ahal izateko, aitorpena arauz ezarritako epearen barruan aurkeztu behar da eta lehen zatia Ekonomi eta Ogasun kontseilariak ezartzen duen epean sartu behar da. Aitorpen-likidazio osagarrien emaitzako kopurua ezin sartu izanen da zatika, aurreko paragrafoan ezarritako prozeduraren arabera.

3. Ekonomi eta Ogasun Departamentuak autolikidazio proposamena bidal diezaieke subjektu pasiboei; departamentu horretako kontseilariak ezarriko du nola.

Baldin eta subjektu pasiboak uste badu proposatutako autolikidazio bat datorrela bere zerga egoerarekin, berretsi ahal izanen du; Ekonomi eta Ogasun kontseilariak ezarriko du nola.

57 bis artikulua. Alarguntza pentsioen ondoriozko kenkaria.

1. Kasuan kasuko kuota diferentziala finkatu ondoren, alarguntza pentsioa jasotzen duten subjektu pasiboek, ekainaren 20ko 1/1994 Legegintzako Errege Dekretuak onetsi zuen Gizarte Segurantzari buruzko Lege Orokorraren Testu Bateginaren 50. artikuluan aipatutako osagarriak jasotzeko eskubidea badute, kenkari gehigarria aplikatzen ahalko dute, kasuan kasuko pentsio motarentzat finkatutako gutxieneko zenbatekoaren eta lanbide arteko gutxieneko soldataren arteko diferentzia adinakoa, kasu bietan urteko kopuruak kontuan harturik, Zergari buruzko Foru Legearen 68.1 artikuluan ezarritako moduan eta baldintzetan.

2. Gizarte Segurantzatik kasuan kasuko pentsio motarentzat finkatutako gutxienekoa baino handiagoak eta lanbide arteko gutxieneko soldata baino txikiagoak diren alarguntza pentsioak (kotizaziopekoak) jasotzen dituzten subjektu pasiboek zilegi izanen dute kenkari gehigarria egitea, jasotako pentsioaren zenbatekoaren eta lanbide arteko gutxieneko soldataren arteko diferentzia adinakoa, kasu bietan urteko kopuruak kontuan harturik, Zergari buruzko Foru Legearen 68.2 artikuluan ezarritako moduan eta baldintzetan.

Gizarte Segurantzatik kotizaziopeko alarguntza pentsioak jasotzen dituzten subjektu pasiboek, beste pentsio batzuk ere jasotzen badituzte, zilegi izanen dute kenkari gehigarria egitea, ekainaren 20ko 1/1994 Legegintzako Errege Dekretuak onetsi zuen Gizarte Segurantzari buruzko Lege Orokorraren Testu Bateginaren 50. artikuluan aipatutako osagarriak jasotzeko eskubidea zehazteko kontuan hartzen zaizkion pentsioen zenbatekoen batura Gizarte Segurantzak osagarri horiek zehazteko finkatutako gutxieneko zenbatekoa baino handiagoa bada eta lanbide arteko gutxieneko soldata baino txikiagoa.

Kenkariaren zenbatekoa, kasu horietan, lanbide arteko gutxieneko soldataren eta 50. artikuluan aipatzen diren osagarrietarako eskubidea zehazteko kontuan hartzen diren pentsioen baturaren arteko diferentzia izanen da, kasu bietan urteko kopuruak kontuan harturik, Zergari buruzko Foru Legearen 68.2 artikuluan ezarritako moduan eta baldintzetan.

3. Zahartzaro eta baliaezintasuneko nahitaezko asegurutik (SOVI) alarguntza pentsioak jasotzen dituzten subjektu pasiboek zilegi dute kenkari gehigarria egitea, jasotako pentsioaren zenbatekoaren eta lanbide arteko gutxieneko soldataren arteko diferentzia adinakoa, kasu bietan urteko kopuruak kontuan harturik, Zergari buruzko Foru Legearen 68.3 artikuluan ezarritako moduan eta baldintzetan.

Kenkariaren zenbatekoa, zahartzaro eta baliaezintasuneko nahitaezko aseguruko (SOVI) alarguntza pentsioa beste pentsio batzuekin pilatzen den kasuetan, lanbide arteko gutxieneko soldataren eta ekainaren 20ko 1/1994 Legegintzako Errege Dekretuak onetsi zuen Gizarte Segurantzari buruzko Lege Orokorraren Testu Bateginaren 50. artikuluan aipatzen diren osagarrietarako eskubidea zehazteko kontuan hartzen diren pentsioen baturaren arteko diferentzia izanen da, kasu bietan urteko kopuruak kontuan harturik, Zergari buruzko Foru Legearen 68.2 artikuluan ezarritako moduan eta baldintzetan.

4. Aurreko idatz-zatietan ezarritako kenkari hori ezin aplikatu izanen da Familia, Gazteria, Kirol eta Gizarte Gaietako Departamentuak hura aurrerakin gisa ordaintzeko baimena eman badu, Alarguntza pentsioengatiko kenkariak aldez aurretik ordaintzeko prozedura arautzen duen maiatzaren 20ko 127/2003 Foru Dekretuan ezarritako prozedurari lotuz.

5. Aplikatuko den kenkariaren zenbatekoa ez badator bat aurreratu den kopuruarekin, subjektu pasiboek beren egoera erregularizatu behar dute zerga honen autolikidazioko kuota diferentzialean; horretarako, aurreratutako kopurua jaso dutenetik sortu diren berandutza interesak sartu behar dituzte, kopurua behar ez zela jaso bada edo behar baino handiagoa izan bada. Zerga honen autolikidaziorik egiten ez duten subjektu pasiboek Alarguntza pentsioengatiko kenkariak aldez aurretik ordaintzeko prozedura arautzen duen maiatzaren 20ko 127/2003 Foru Dekretuaren 10. artikuluan ezarritakoari lotuz erregularizatu behar dute beren egoera eta itzuli behar dute dirua.

58. artikulua. Zatikatzea, heriotza edo bizilekua galtzea.

1. Subjektu pasiboa hilez gero, eta Zergari buruzko Foru Legearen 77. artikuluan aurreikusitakoarekin bat, egozteko gelditutako errenta guztiak azken zergaldiko zerga-oinarrian sartu beharko dira.

2. Subjektu pasiboak bere izaera galtzen badu bizilekua aldatzeagatik, Zergari buruzko Foru Legearen 78.8 artikuluan aurreikusitakoarekin bat, egozteko gelditutako errenta guztiak azken zergaldiko zerga-oinarrian sartu beharko dira, eta beharrezkoa baldin bada, aitorpen-likidazio osagarria eginen da, zehapenik, berandutza interesik eta inolako errekargurik gabe, subjektu pasiboak bizilekua aldatzeagatik bere izaera galtzen duen urtearen hurrengoan, lehenbiziko hiru hilabeteen epean.

3. Kasu horietan, kausatzailearen ondorengoak edo subjektu pasiboak errenta horiei dagokien zerga zorraren zati bat zatika ordaintzea eskatu ahal izanen du, berandutza interesik sortu gabe. Zati hori kalkulatzeko, Zergari buruzko Foru Legearen 59.2 artikuluan aurreikusiriko tasa aplikatuko zaio zerga oinarri orokorrean sartutako errentari, eta 60. artikuluan aurreikusitako tasa aplikatuko zaio aurrezkiaren zerga oinarri berezian sartutakoari.

4. Zatikatzea Nafarroako Ogasun Publikoaren zuzenbide publikoko dirusarreren ordainketaren gerorapenak eta zatikatzeak arautzen dituen Nafarroako Foru Komunitateko Dirubilketaren Erregelamenduan xedatutakoak zuzenduko du, berezitasun hauekin:

a) Eskabideak aitorpenerako erregelamenduzko epearen barrenean egin beharko dira.

b) Artikulu honen 1. idatz-zatiaren kasuan eskatzaileak ez du bermerik eskaini beharko.

c) Eskatutako zatikatzea emanez gero, zati bakoitzaren zenbatekoa eta epea emanen dira errenta horiek, subjektu pasiboaren heriotza edo izaera galtzea gertatu izan ez balitz, egotzi beharreko zergaldien arabera, lau urtetarako gehienez. Muga hori gainditzen duten denbora tarteei dagokiena zati berdinetan egotziko da zatikatze denboran.

59. artikulua. Ofiziozko itzulketak.

1. Zergari buruzko Foru Legearen 85. artikuluak aipatzen dituen itzulketak bankuko transferentzia bidez eginen dira.

2. Ekonomi eta Ogasun kontseilariak baimena eman ahal izanen du aurreko idatz-zatiak aipatzen dituen itzulketak txeke gurutzatu edo izendunaren bidez egiteko, horretarako arrazoiak daudenean.

60. artikulua. Aitorpenak eta idazkiak aurkeztu eta kudeatzeko kanpoko laguntza.

1, Ekonomi eta Ogasun Departamentuak zerga honen aitorpenak eta idazkiak aurkezteko lankidetza soziala gauzatuko du administrazio publikoekin, gizarte, lan, enpresa edo lanbide sektore edo interesak ordezkatzen dituzten entitate, erakunde eta organismoekin egindako akordioen bidez edo zuzenean enpresekin, beraien langileen eskura jar ditzaten zerbitzu horiek.

2. Aurreko idatz-zatiak aipatzen dituen akordioek, besteak beste, alderdi hauek hartu ahal dituzte:

a) Informazio eta hedapen kanpainak.

b) Aitorpenak eta idazkiak egiten eta behar bezala eta egiazko datuekin betetzen laguntzea.

c) Aitorpenak eta idazkiak tributuen arloko administraziora igortzea.

d) Akatsak zuzentzea, subjektu pasiboen baimenarekin.

e) Ofiziozko itzulketen nondik norakoaren berri ematea, subjektu pasiboek baimenduta.

3. Ekonomi eta Ogasun Departamentuak aipatutako jarduketak egiteko behar den laguntza teknikoa eskainiko du, horrek kendu gabe zerbitzu horiek subjektu pasiboei oro har eskaintzea.

4. Ekonomia eta Ogasuneko kontseilariaren foru agindu bidez ezarriko dira teknika eta baliabide elektroniko, informatiko eta telematikoen bidez gizarte elkarlana gauzatzeko beharkizunak eta baldintzak. Halaber, gizarte elkarlanerako akordioen esparruan, Ekonomia eta Ogasuneko kontseilariak ezarriko du Administrazioarekin akordioak dituzten entitateek zein beharkizun eta baldintza beteta aurkeztuko dituzten bide telematikoz aitorpenak, komunikazioak, aitorpen-likidazioak edo tributu araudiek ezarritako bestelako doikumentuak, hirugarrenen ordezkari gisa.

Halaber, Ekonomia eta Ogasuneko kontseilariak zilegi du aurreikustea bestelako pertsona edo entitate batzuek sarbidea izatea ordezkapen sistema horretara baliabide telematikoz hirugarrenen ordezkari gisa.

II. KAPITULUA. Betebehar formalak, kontabilitatekoak eta erregistrokoak

61. artikulua. Betebehar formalak, kontabilitatekoak eta erregistrokoak.

1. Pertsona Fisikoen Errentaren gaineko Zergaren subjektu pasiboak beharturik daude beraien aitorpenetan agertu beharreko mota orotako eragiketen, errenten, gastuen, dirusarreren, murrizketen eta kenkarien ziurtagiriak eta egiaztagiriak gordetzera preskripzioko gehieneko epean, Zergaren aitorpenekin batera aurkeztera, hala ezartzen denean, eta tributuen arloko administrazioko organo eskudunetan erakustera, hala eskatzen zaienean.

2. Subjektu pasiboek betetzen dituzten enpresa jardueren etekina zuzeneko zenbatespenaren araubideko modalitate arruntaren bidez zehazten badute, beharturik daude Merkataritzako Kodean xedatutakoari lotutako kontabilitatea ematera.

3. Aurreko lerroaldean xedatutakoarekin ere, enpresa jarduera hori merkataritza arlokoa ez denean, Merkataritzako Kodeari jarraikiz, kontabilitate mailako betebeharra honako erregistro liburu hauek eramatea baizik ez da izanen:

a) Salmenten eta dirusarreren erregistro liburua.

b) Erosketen eta gastuen erregistro liburua.

c) Inbertsioko ondasunen erregistro liburua.

4. Beren enpresa jardueretako etekinak zuzeneko zenbatespeneko araubidearen modalitate erraztua erabiliz zehazten dituzten subjektu pasiboek kontabilitate arloan izanen dituzten betebeharrak aurreko idatz-zatian aipatzen diren liburuak eramatekoak izanen dira soilik.

Modalitate hori atxikitako subjektu pasiboek, zenbait eragiketatan faktura erraztua eta honen kopia eman ditzaketenek (apirilaren 10eko 23/2013 Foru Dekretuaren bidez onetsitako Fakturazio betebeharrak arautzen dituen erregelamenduaren 4. artikuluan xedatutakoarekin bat), eguneroko eragiketa guztien idatzohar bateratua egiten ahal dute salmenten eta diru-sarreren erregistro liburuan.

5. Subjektu pasiboek betetzen dituzten lanbide jardueren etekina zuzeneko zenbatespenaren araubidea, edozein modalitatetakoa, erabiliz zehazten badute, honako erregistro liburu hauek eraman beharko dituzte:

a) Dirusarreren erregistro liburua.

b) Gastuen erregistro liburua.

c) Inbertsio ondasunen erregistro liburua.

d) Fondo eta ordezpen horniduren erregistro liburua.

6. Fakturazio betebeharrak arautzen dituen erregelamendu horretan aurreikusitakoarekin bat, beren lanbide edo enpresa jardueretako etekin garbia zenbatespen objektiboko araubidean zehazten duten subjektu pasiboek emandako fakturak gorde beharko dituzte, bai eta jasotako fakturak edo bestelako ziurtagiriak ere, dataren araberako ordenan zenbakituta eta hiruhilekoen araberako multzotan. Era berean, gorde beharko dituzte kasuko foru aginduan aurreikusitakoarekin bat aplikatu dituzten zeinu, adierazle edo moduluen ziurtagiriak ere.

Araubide honi atxikitako subjektu pasiboak beharturik egonen dira, soilik, salmenten eta diru-sarreren erregistro liburua eramatera, eta onartzekoa izanen da eguneroko eragiketa guztien idatzohar bateratua egitea bertan.

7. Enpresa edo lanbide jarduerak egiten dituzten entitateek, errenta esleipeneko araubidekoak badira, egindako jarduerari dagozkion liburuak soilik eraman beharko dituzte nahitaez, bazkide, ondorengo, erkide edo partaideei dagokienez egin beharreko etekinen esleipena kendu gabe.

8. Artikulu honek aipatzen dituen erregistro liburuak, 6. idatz-zatian aurreikusten den salmenta eta dirusarreren erregistro liburua kenduta, Ekonomi eta Ogasun Departamentuan aurkeztu beharko dira eginbidetzeko.

Ekonomi eta Ogasun kontseilariari baimena ematen zaio artikulu honek aipatzen dituen erregistro liburuak eraman eta eginbidetzeko modua zehaz dezan.

9. Kontabilitatea Merkataritzako Kodean aurreikusitakoari jarraikiz eramaten duten subjektu pasiboak ez dira beharturik egonen artikulu honen aurreko idatz-zatietan ezarritako erregistro liburuak eramatera.

10. Enpresa edo lanbide jarduerak egiten dituzten subjektu pasiboek eurotan adierazi ahal izanen dituzte artikulu honen aurreko idatz-zatietan ezarritako erregistro liburuetako oharpenak. Aukera hori atzeraezina izanen da.

62. artikulua. Informazioa emateko erazko beste betebehar batzuk.

1. Hipoteka maileguak nahiz bestelako maileguak eman edo bitarteko gisa bideratzen dituzten entitateek, eta ondasun higiezinak edo ondasun higiezinen gaineko eskubide errealak eskuratzeko finantzaketan nolabait esku hartzen dutenek, urteko informazio-aitorpena aurkeztu beharko dute hurrengo urteko urtarrilean eragiketa horien berri emateko, datu hauek izanen dituena:

a) Mailegu-hartzaileen izen-deiturak edo sozietatearen izena edo izen osoa eta identifikazio fiskaleko zenbakia.

b) Mailegu-emaileen sozietatearen izena edo izen osoa eta identifikazio fiskaleko zenbakia.

c) Bitartekaririk bada, haien izen-deiturak edo sozietatearen izena edo izen osoa eta identifikazio fiskaleko zenbakia.

d) Ondasun higiezinak edo ondasun higiezinen gaineko eskubide errealak eskuratzearekin zuzeneko lotura duten beste finantza eragiketa batzuetako alderdien izen-deiturak edo sozietatearen izena edo izen osoa eta identifikazio fiskaleko zenbakia.

e) Maileguaren edo eragiketaren zenbateko osoa, urtean kapitalaren amortizaziorako, interesetarako eta gainerako finantzaketa gastuetarako ordaindutako kopuruak.

f) Mailegua edo eragiketa eratu zen urtea eta iraupena.

g) Eragiketa horretako hartzaileak higiezin hori bere ohiko etxebizitza izateko asmoa adierazi duen ala ez.

h) Katastroko erreferentzia.

i) Higiezinaren tasazio balioa.

2. Zerga honetan kenkaria aplikatzeko eskubidea ematen duten dohaintzak hartzen dituzten erakundeek hurrengo urteko urtarrilean dohaintza horiei buruzko informazio aitorpena aurkeztu behar dute; bertan, identifikazio datuak eman eta fundazioen eta babes jardueren zerga araubidea arautu duen uztailaren 2ko 10/1996 Foru Legean ezarritako kenkarien araubideari atxikita daudenez zehaztu ez ezik, dohaintzak eman dituztenei buruzko datu hauek ere agerrarazi behar dituzte:

a) Izena eta deiturak.

b) Identifikazio fiskaleko zenbakia.

c) Dohaintzaren zenbatekoa.

3. Talde inbertsioko erakundeen sozietate kudeatzaileek, sozietate kudeatzailerik izendatu ez duten inbertsio sozietateek, helbidea Espainian nahiz atzerrian duten talde inbertsioko erakundeen akzioen eta partaidetzen entitate merkaturatzaileek eta zerbitzuak aske emateko araubidean Espainian diharduten sozietate kudeatzaileen ordezkariek, hurrengo urteko urtarrilean, bazkide edo partaideek egindako akzio- edo partaidetza-besterentzeen berri emateko aitorpena aurkeztu beharko dute, eta bertan honako datu hauek agertuko dira:

a) Bazkide edo partaidearen izen-deiturak eta identifikazio fiskaleko zenbakia.

b) Akzio edo partaidetzen eskuratze balioa eta besterentze balioa.

c) Akzioak edo partaidetzak bazkide edo partaidearen esku egondako denbora.

Betebehar hori betetzat joko da erregelamendu honetako 90. kapituluko 2. idatz-zatian adierazitako urteko laburpena aurkeztuz gero, baldin eta horretan aurreko letrek aipatutako informazioa ematen bada.

4. Estatuko Loteria eta Apustuen Nazio Erakundeak, autonomia erkidegoetako arlo bereko organo edo erakundeek, Espainiako Gurutze Gorriak eta Espainiako Itsuen Nazio Erakundeak zerga honetatik salbuetsita eman dituzten sariei buruzko aitorpena aurkeztu behar dute hurrengo urteko urtarrilean. Aitorpen horretan hartzaileen identifikazio datuak eman behar dira (izena eta deiturak eta identifikazio fiskaleko zenbakia) eta ondorio hauetarako Ekonomi eta Ogasuna kontseilariak ezartzen duen zenbatekoa gainditzen duten sarien zenbatekoa edo balioa agertu behar da.

5. Zergari buruzko Foru Legeko 55. artikuluko 1. idatz-zatiko 3. eta 4. puntuetan aipatutako aurreikuspen plan aseguratuak eta mendekotasun aseguruak merkaturatzen dituzten aseguru entitateek informazioa emateko aitorpena aurkeztu behar dute hurrengo urteko urtarrilean; bertan datu hauek eman behar dituzte:

a) Hartzaile bakoitzaren izen-deiturak eta identifikazio fiskaleko zenbakia.

b) Hartzaileek ordaindutako primen zenbatekoa.

6. Indarreko araudiaren arabera, banku-trafikoan edo kredituen arloan diharduten bankuek, aurrezki kutxek, kreditu kooperatibek eta pertsona fisikoek edo juridikoek informazio aitorpena aurkeztu behar dute hurrengo urteko urtarrilean, beren establezimenduetan zabalik dauden kontu korronte, aurrezki kontu, eperako ezarpen eta kreditu-kontuen titularrek haiek erabiltzeko eta baliatzeko baimendutako pertsonei buruzkoa, dena delakoa haien modalitatea edo izena, nahiz eta titularra edo berak baimendutako pertsona Espainiako lurraldeko egoiliarra ez izan. Informazioak aurreko urte naturalekoa izan behar du.

Aitorpen horretan, kontua zehatz-mehatz identifikatzeaz gainera, baimendutako pertsonen izen-deiturak eta identifikazio fiskaleko zenbakia adierazi behar dira. Hain zuzen ere, aitortzen den zergaldian aritu diren pertsona baimenduak identifikatu behar dira, baimenak zenbat iraun duen kontuan izan gabe.

7. Indarreko araudiaren arabera banku-trafikoan edo kredituen arloan diharduten bankuek, aurrezki kutxek, kreditu kooperatibek eta pertsona fisikoek edo juridikoek informazio aitorpena aurkeztu behar dute hurrengo urteko urtarrilean, non identifikatuko baitituzte zerga honen kargapekoek, Sozietateen gaineko Zergaren subjektu pasiboek edo Ez-egoiliarren Errentaren gaineko Zergaren kargapekoek (establezimendu iraunkorrarekin) zabalik dituzten kontu guztiak. Aitorpen hori aurreko urte naturalari buruzkoa izanen da.

Zerga Administrazioari eman beharreko informazioan kontuen identifikazio osoa agertuko da, eta kontu horien titular, baimendun edo onuradunak diren pertsona edo entitateen izen-deiturak edo sozietatearen izena edo izen osoa eta identifikazio fiskaleko zenbakia, kontuetan abenduaren 31n izandako saldoak eta urteko azken hiruhilekoko batez besteko saldoa, eta kasuan kasuko eredua onesteko foru aginduan eskatzen den informazioa osatzeko behar diren beste datu guztiak.

Eman beharreko informazioan kontu korronteak, aurrezki kontuak, eperako ezarpenak, kreditu kontuak eta bestelako kontu guztiak agertuko dira, haien modalitatea edo izena edozein dela ere, nahiz eta ordainketa, atxikipen edo konturako sarrerarik ez izan.

Pertsona edo entitate titular, baimendun edo onuradunen izen-deiturak, sozietatearen izena edo izen osoa eta identifikazio fiskaleko zenbakia aitorpenaren urteko momenturen batean izan direnei dagokie.

8. Etxebizitza kontuetako diru kopuruak gordailatuta dituzten erakundeek haiei buruzko informazio aitorpena aurkeztu behar dute hurrengo urteko urtarrilean; bertan datu hauek eman behar dituzte:

a) Etxebizitzarako kontuaren titularren izena, deiturak eta I.F.Z.

b) Etxebizitzarako kontuaren identifikazioa.

c) Etxebizitzarako kontua ireki zeneko data.

d) Etxebizitza kontuan ekitaldi bakoitzaren hasieran eta amaieran egon den saldoa.

e) Ekitaldi bakoitzean etxebizitzarako kontuan izandako sarrerak eta irteerak.

f) Zergadun bakoitzak etxebizitzarako kontuan duen parte hartzearen portzentajea.

9. Kreditu entitateek txekeen bidez egin dituzten eragiketen berri emateko aitorpena aurkeztu behar dute hurrengo urteko urtarrilean. Aitorpen horretan eragiketen identifikazioa jarri behar dute.

10. Pentsio funtsak kudeatzen dituzten erakundeek urteko informazio aitorpena aurkeztu behar dute hurrengo urteko urtarrilean; bertan funtsei atxikitako planetako partaideak eta haiek (zuzenean zein planen sustatzaileen bidez) egindako ekarpenak adierazi behar dira.

Pentsio planen sustatzaileek, planetarako kontribuzioak egiten badituzte, urteko informazio aitorpena aurkeztu behar dute hurrengo urteko urtarrilean; bertan banaka agertu behar dira ekarpenak egin dituzten partaideak eta bakoitzak jarritako zenbatekoa.

Maiatzaren 12ko 3/1988 Foru Legearen 77.1 artikuluan aurreikusitako moduan pentsioengatiko konpromisoei aurre egiteko kontribuzio edo ekarpenak egiten dituzten enpresek edo entitateek (enpresen gizarte aurreikuspeneko planetarako kontribuzioak egiten dituztenak kanpo) hurrengo urteko urtarrilean urteko informazio aitorpena aurkeztu behar dute. Bertan banaka agertuko dira egindako kontribuzio edo zuzkiduren xede izan diren pertsonak eta bakoitzari dagokion zenbatekoa.

Gizarte aurreikuspeneko mutualitateek informazio aitorpena aurkeztu behar dute hurrengo urteko urtarrilean; bertan mutualista guztien zerrenda jarri behar da, bai eta bakoitzak zerga honi buruzko arauetan ezarritakoaren arabera murrizketa egiteko edo zerga oinarria txikitzeko arrazoi izan daitezkeen kontingentziak estaltzeko ordaindu duen kopurua ere.

Helbidea Europar Batasuneko beste herrialde batean duen pentsio funts batek Espainian langileentzako pentsio planak garatzen baditu Espainiako legeriaren pean, haren ordezkariak urteko informazio aitorpena aurkeztu beharko du hurrengo urteko urtarrilean; bertan adierazi behar dira funtsei atxikitako planetako partaideen zerrenda eta haiek (zuzenean zein pertsona baimenduen edo planen sustatzaileen bidez) egindako ekarpenen zenbatekoak.

Idatz-zati honetan aipatutako aitorpenetan aurreko urte naturaleko datuak eman behar dira.

11. Efektu publikoak, baloreak edo bestelako titulu edo finantza-aktiboak jaulki, harpidetu, eskualdatu, trukatu, bihurtu, kitatu eta itzultzeko eragiketetan esku hartzen duten edo haietan bitartekari aritzen diren fede-emaile publikoek eragiketa horiei buruzko informazio aitorpen bat aurkeztu behar dute urtean, batez ere efektu, balore eta bestelako titulu eta finantza-aktiboen gaineko eskubide errealei dagozkien eragiketei buruz, berme-eskubideak eta bestelako kargak, baloreen mailegu-eragiketak eta erantzukizun mugatuko sozietateen kapitalean parte hartzeko eragiketak barne direla.

Krediturako finantza erakundeek eta establezimenduek, baloreen sozietateek eta agentziek, finantzetako gainerako bitartekariek eta, oro har, efektu publikoak, baloreak eta bestelako finantza tituluak eta aktiboak, indizeak eta haien gaineko aukerak, kontu-idazpenen bidezko dokumentatuak barne, kokatzen eta haiekin egiten diren eragiketetan bitartekari lanak egiten jarduten duten gainerako pertsona fisiko eta juridikoek urtean zehar balore edo efektuen bitartez baliabideak biltzeko edo kokatzeko zuzenean edo zeharka egindako eragiketei buruzko informazio aitorpena aurkeztu behar dute.

Informazio-betebehar hori izanen dute, halaber, kapital aldakorreko inbertsio sozietateek, Inbertsio kolektiboko erakundeei buruzko azaroaren 4ko 35/2003 Legearen 32.7 artikuluan azaltzen diren kasuetan.

Halaber, ondotik zehazten diren eragiketei buruzko urteko aitorpen informatiboa aurkeztu beharko dute talde inbertsioko erakundeen sozietate kudeatzaileek eta entitate merkaturatzaileek, beren akziodun edo partaideen erregistroetan sartuta dituzten erakunde horien akzioei edo partaidetzei dagokienez, merkatu antolatuetan kotizatu gabeko tituluak edo balore izendunak jaulkitzen dituzten entitateek, beren jaulkipen-eragiketei dagokienez; eta gerokoen eta aukeren merkatuak zuzentzen dituzten sozietateek, merkatu horietako eragiketei dagokienez.

Kontuetako idazpenen bidez ordezkatutako zor publikoa harpidetu, eskualdatu eta itzultzeko eragiketetan parte hartzen duten erakunde kudeatzaileek urtean egindako mota horretako eragiketei buruzko aitorpena aurkeztu behar dute, eta harekin batera interesak jaso dituztenen zerrenda ere bai.

Ekonomia eta Ogasun Departamentuari informazioa eman beharra betetzeko, aurreko paragrafoan ezarri bezala, baldin eta eragiketa batean hirugarren paragrafoan aipatutako pertsona edo erakundeek eta idatz-zati honetako lehen eta bigarren paragrafoetan aipatutako fede-emaile edo finantza bitartekariek esku hartzen badute, haren berri ematen duen aitorpena fede-emaileak edo finantza bitartekariak aurkeztu behar du.

Eragiketaren xede atzerrian jaulkitako baloreak edo atzerrian eraturiko tresna eratorriak badira, baloreok Espainian merkaturatzen dituzten entitateek eta zerbitzuak aske emateko araubidean diharduten entitate kudeatzaileen ordezkariek egin behar dute aitorpena, edo bestela Espainian balore horien gordailuzainak diren entitateek.

Aurreko paragrafoetan aipatutako aitorpenetan azaldu beharrekoak dira Estatutik kanpo egin arren Espainiako lurraldeko egoiliar diren edo bertan establezimendu iraunkorra duten bitartekariek euren kabuz edo besteren kontura esku hartuz egindako eragiketak eta kontratuak.

Urteko aitorpen informatiboa hurrengo urteko urtarrilean aurkeztuko da. Bertan datu hauek emanen dira: eragiketetan esku hartu duten subjektuen identifikazio osoa, zer gisa esku hartu duten eta parte-hartzearen portzentajea, haien izen-deiturak edo sozietatearen izena, helbidea eta identifikazio fiskaleko zenbakia, eragiketa bakoitzeko efektu publiko, balore, titulu eta aktiboen mota eta kopurua, eta eragiketa bakoitzaren zenbatekoa eta data, eta, halakorik bada, etekina edo emaitza. Aitorpena aurreko urte naturaleko eragiketei buruzkoa izan behar da.

Aurreko paragrafoan aipaturiko informazio-betebeharra ezertan ukatu gabe, mailegutarako baloreak negoziatzen diren merkatuko entitate partaideek edo konpentsazio eta likidazio sistemako kideek, baloreak mailegatzeko eragiketetan parte hartzen edo bitartekari aritzen diren finantza erakundeek eta Baloreak Erregistratu, Konpentsatu eta Likidatzeko Sistemen Kudeaketarako Sozietateak edo, hala behar denean, Baloreen merkatuari buruzko uztailaren 28ko 24/1988 Legearen 31.4 artikuluan araututako baloreen negoziaziorako merkatu edo sistema antolatuetan erregistro, konpentsazio eta likidazio lanak egiten dituen entitateak, Zerga Administrazioari eman beharko diote Zerga, administrazio eta gizarte arloetako neurriei buruzko abenduaren 30eko 62/2003 Legearen hemezortzigarren xedapen gehigarriaren 3. idatz-zatian aipatzen den informazioa.

Idatz-zati honetan aipatutako informatu beharra, atxikipena aplikatu beharreko eragiketei dagokiena, betetzat joko da hartzaileen zerrenda urteko atxikipenen eredu ofizial egokian aurkeztuz gero.

12. Zor Publikoaren Idazpenen Merkatua kudeatzen duten erakundeek, euren komisio-emaileen kontura egindako eragiketei dagokienez, eta Idazpenen Zentralak, bertako kontuen titularrek beren kabuz egindako eragiketei dagokienez, Altxorraren letren harpidetzei, eskualdaketei eta itzulketei buruzko informazio aitorpena aurkeztu behar dute hurrengo urteko urtarrilean. Aitorpen horretan eragiketetan esku hartu duten subjektu guztiak identifikatu behar dira (izen-deiturak edo sozietatearen izena, helbidea dagoen probintzia-herrialdeko kodea eta identifikazio fiskaleko zenbakia), bakoitzak zer gisa esku hartu duen zehaztu behar da, eta eragiketa bakoitzaren zenbatekoa eta data adierazi behar dira.

13. Etxebizitzen sustatzaile diren pertsona edo entitateek informazio aitorpena aurkeztu beharko dute hurrengo urteko urtarrilean, etxebizitzen erosketa-prezioaren kontura hartu dituzten diru-kopuruen berri emateko. Aitorpenean agerrarazi beharko dira konturako diru-kopuruak ordaindu dituzten subjektu pasiboen izen-deiturak eta identifikazio fiskaleko zenbakiak, eta diru-kopuruen zenbatekoa.

Kanbio-efektuak ematen diren kasuetan, informazio aitorpenean halako efektuen ordainketaren data aipatu beharko da.

14. Ezinduen ondarea babesteari eta Kode Zibila, Prozedura Zibilaren Legea eta zerga araudia aldatzeari buruzko azaroaren 18ko 41/2003 Legeak arautzen dituen ondare babestuen titular diren subjektu pasiboek, eta, hauek ezgai izanez gero, ondare horien administratzaileek, informazio aitorpena igorri behar dute urte natural bakoitzean jasotako ekarpenei eta egindako erabilerei buruz. Beren identifikazio datuez gain, aitorpen horretan honakoak jarriko dituzte:

_Ekarpen-egileen eta egindako erabileren onuradunen izen-deiturak eta identifikazio fiskala.

_Jasotako ekarpenen eta egindako erabileren mota, zenbatekoa eta identifikazioa.

Informazio aitorpen hori urte bakoitzeko urtarrilean aurkeztuko da, aurreko urtean egindako ekarpen eta erabileren berri emateko.

Lehenbizi aurkezten den informazio aitorpenari ondare babestuaren eraketaren eskritura publikoaren kopia soila erantsiko zaio. Bertan, ondarea hasieran osatu zuten ondasun eta eskubideen zerrenda jarriko da, eta zehatz azalduko dira ondare babestua eratu zenetik lehen aitorpen hori aurkezten den egunera arte jasotako ekarpenak eta egindako erabilerak.

15. Enpresek hartutako pentsio-konpromisoak bideratzeko aseguru kontratu kolektiboak (maiatzaren 12ko 3/1988 Foru Legearen 77. artikuluan aurreikusitakoak, Zergari buruzko Foru Legearen 55.1.5 artikuluak aipatzen dituen enpresa-aurreikuspen sozialeko planak barne) merkaturatzen dituzten aseguru entitateek informazio aitorpena aurkeztu behar dute hurrengo urteko urtarrilean. Bertan datu hauek agertuko dira:

a) Hartzaileen eta aseguratuen izen-deiturak eta identifikazio fiskaleko zenbakia.

b) Aseguratuek egindako ekarpenen zenbatekoa eta aseguru-hartzaileek haietako bakoitzarentzat ordaindutako kontribuzioen zenbatekoa.

16. Zergari buruzko Foru Legearen 30.1.g) artikuluan aipatutako planak, hots, aurrezpen sistematikorako banakako planak, merkaturatzen dituzten aseguru entitateek informazio aitorpena aurkeztu behar dute hurrengo urteko urtarrilean; bertan datu hauek eman behar dituzte:

a) Hartzaile bakoitzaren izen-deiturak eta identifikazio fiskaleko zenbakia.

b) Hartzaileek ordaindutako primen guztizko zenbatekoa, eta lehen prima ordaindu zen eguna.

c) Eskubide ekonomikoak osorik edo neurri batean aurreratzen badira, biziarteko errenta eratu zenean jakinarazi zen errenta salbuetsiaren zenbatekoa.

d) Baldin eta, Zergari buruzko Foru Legearen hogeita bigarren xedapen gehigarriarekin bat, bizi aseguruko kontraturen bat aurrezpen sistematikorako banakako plan bihurtzen bada, aurreko a) eta b) letretan aipatutako datuak, eta xedapen horretan ezarritako muga (urtean ordaindutako primen gehieneko zenbatekoa) gainditu ez izanaren adierazpena.

17. Kreditu entitateek eta, indarra duen araudiaren arabera, banku edo kreditu trafikoan jarduten duten gainerako entitateek urteko hurrengo informazio aitorpenak aurkeztu beharko dituzte:

a) Horiek emandako kredituetan eta maileguetan abenduaren 31n dauden 6.000 eurotik gorako saldoen gaineko aitorpena. Bertan adieraziko dira kreditu edo mailegu hartzailearen izen-deiturak edo sozietatearen izena edo izen osoa eta identifikazio fiskaleko zenbakia.

b) Txanponetan edo banku billetetan egiten diren ezarpenen, funtsen erabileren eta kobrantzen gaineko aitorpena, haien zenbatekoa 3.000 eurotik gorakoa denean (eurotan edo beste edozein monetatan emanda) eta edozein ingurune fisiko edo elektroniko erabiltzen dela.

Informazio aitorpen horretan ez dira adieraziko artikulu honen 9. idatz-zatian ezarritakoaren arabera zerga administrazioari jakinarazi behar zaizkion eragiketak.

Aitorpenak honako hauek bilduko ditu: eragiketa bakoitzaren zenbatekoa, eurotan; ezarpena, erabilera edo kobrantza den; eguna; egin duenaren identifikazioa; zordunketak edo ordainketak egiteko kontuaren zenbakia; eta dagokion eredua onesten duen foru aginduak ezarririko informazioa zehazteko garrantzitsua den beste edozein datu.

) Balore higigarriak gordailuan dituzten entitateek urtero informazio-aitorpena aurkeztu behar dute urtarrilean, gordailuan dituzten baloreei buruzko datu hauek emateko:

a) Abenduaren 31n ondokoen titularrak diren pertsonen edo entitateen izen-deiturak edo sozietatearen izena edo izen osoa eta identifikazio fiskaleko zenbakia: entitate juridikoen akzioak edo haien kapitaleko edo funts berekietako partaidetzak, merkatu antolatuetan negoziatuak. Halaber, titular horien akzio eta partaidetzen kopurua, mota eta balioa adieraziko dira, Ondarearen gaineko Zergari buruzko azaroaren 19ko 13/1992 Foru Legearen 15. artikuluan xedatutakoari jarraikiz.

b) Abenduaren 31n ondokoen titularrak diren pertsonen edo entitateen izen-deiturak edo sozietatearen izena edo izen osoa eta identifikazio fiskaleko zenbakia: norberaren kapitalak hirugarrenei laga izana adierazten duten baloreak, merkatu antolatuetan negoziatuak. Halaber, titular horien baloreen kopurua, mota eta balioa adieraziko dira, Ondarearen gaineko Zergari buruzko azaroaren 19ko 13/1992 Foru Legearen 13. artikuluan xedatutakoari jarraikiz.

B) Inbertsio kolektiboko erakundeak kudeatzen dituzten sozietateek, Espainiako entitate merkaturatzaileek eta zerbitzuak aske emateko araubidean diharduten entitate kudeatzaileen ordezkariek urtarrilean urteko informazio aitorpena aurkeztu beharko dute. Bertan agertuko dira abenduaren 31n inbertsio kolektiboko erakundeen akzioen eta kapital sozialeko edo ondare funtseko partaidetzen titularrak diren pertsonen edo entitateen izen-deiturak edo sozietatearen izena edo izen osoa eta identifikazio fiskaleko zenbakia. Halaber, titular horien akzio eta partaidetzen kopurua, mota eta, hala behar denean, konpartimentua adieraziko dira, bai eta abenduaren 31ko likidazio balioa ere. Bestalde, Espainiako inbertsio erakundeen akzio edo partaidetzak mugaz gaindi merkaturatzen direnean, akzio edo partaidetza horien titular gisa, hirugarren ez-egoiliarren kontura, ageri den atzerriko entitate merkaturatzaileari dagokio informazioa emateko betebeharra, Ez-egoiliarren Errentaren gaineko Zergaren Erregelamenduaren xedapen gehigarri bakarrak 3. idatz-zatiko c) letran dioenez, ezertan ukatu gabe kudeatzaileak edo inbertsio sozietateak Zerga Administrazioaren aurrean izan dezakeen erantzukizuna, xedapen gehigarri bakar horretan xedatutakoaren arabera.

Baloreak negoziatzeko bigarren mailako merkatu batean edo sistema antolatu batean negoziaziorako onartu diren inbertsio kolektiboko erakundeetako akzio edo partaidetzen kasuan, akzio edo partaidetza horien entitate gordailuzainak eman beharko du aurreko lerroaldean aipatutako informazioa.

C) Zerbitzuak aske emateko araubidean diharduten aseguru entitateen ordezkariek eta aseguru entitateek, bai eta finantza entitateek ere, urteko informazio aitorpena aurkeztu beharko dute urtarrilean, informazio hau emateko:

a) Abenduaren 31n bizitza asegurua duten aseguru-hartzaileen izen-deiturak eta identifikazio fiskaleko zenbakia, data horri dagokion erreskate balioa zehaztuta.

b) Kapital bat dirutan, ondasun higigarritan edo higiezinetan ematearen ondorioz abenduaren 31n aldi baterako edo biziarteko errenta baten onuradun direnen izen-deiturak eta identifikazio fiskaleko zenbakia, data horretako kapitalizazio balioa zehaztuta, Ondarearen gaineko Zergari buruzko azaroaren 19ko 13/1992 Foru Legearen 17. artikuluan xedatutakoari jarraikiz.

19. Nekazaritza, abeltzaintza edo oihangintzako jardueren ondorioz diru-laguntzak, kalte-ordainak eta laguntzak eman edo onartzen dituzten entitate publiko edo pribatuek, urtarrilean, aurreko urtean ordaindutakoen urteko aitorpena aurkeztu beharko diote Zerga Administrazioari.

Entitate emaileak egoitza Espainian ez duenean, diru-laguntzak, kalte-ordainak eta laguntzak haren kontura ordaintzeko ardura duen entitate egoiliarrak bete beharko du aurreko lerroaldean aipatutako betebeharra.

Aitorpenean, aitortzailea identifikatzeko datuak eman eta diru-laguntza, kalte-ordain edo laguntzetan zer gisa esku hartu duen adierazteaz gainera, hartzaileen datu hauen zerrenda jarriko da:

a) Izen-deiturak edo sozietatearen izena edo izen osoa eta identifikazio fiskaleko zenbakia.

b) Ordaindutako diru-laguntza, kalte-ordain edo laguntzaren zenbatekoa, mota eta kontzeptua.

Diru-laguntza, kalte-ordain eta laguntza horiek, aitorpenean sartzeari dagokionez, ordaintzeko agindua ematen den egunean bertan ordaindutzat joko dira. Ordaintzeko agindurik ezean, ordaindurik daudela ulertuko da ordainketa gauzatzen denean.

20. Argindar enpresa hornitzaileek Zerga Administrazioari urteko aitorpena aurkeztu behar diote, gutxienez datu hauek bilduko dituena:

a) Kontratatzailearen izen-deiturak edo sozietatearen izena eta identifikazio fiskaleko zenbakia, edo fakturak haren kontura kobratzen dituen pertsonarenak.

b) Higiezinaren katastroko erreferentzia eta kokalekua.

c) Kontrataturiko potentzia izendatua eta urteko kontsumoa kilowattetan.

d) Hornidura gunearen kokalekua.

e) Horniduraren alta eguna.

21. Bai banketxeek edo kreditu entitateek, bai, indarra duen araudiaren arabera, Espainian ezarrita dauden enpresaburuei eta profesionalei kobrantzak kudeatzeko zerbitzua kreditu edo zordunketa txartelen bidez eskaintzen dieten gainerako entitateek sistema horri atxikitako enpresaburuek edo profesionalek egiten dituzten eragiketei buruzko urteko informazio aitorpena aurkeztu beharko dute, kobrantza horien urteko zenbateko garbia 3.000 eurotik gorakoa denean.

Aitorpenean informazio hau jasoko da: enpresaburuen edo profesionalen identifikazio osoa, horiek sisteman lan egiteko erabiltzen duten merkataritza zenbakia, fakturaturiko urteko zenbatekoa, kobrantzak egiteko erabiltzen diren kontuen identifikazioa eta dagokion eredua onesten duen foru aginduak ezarririko informazioa zehazteko garrantzitsua den beste edozein datu.

22. Finantza erakundeak behartuta egonen dira haietan irekitako finantza kontuei buruzko aitorpen informatiboa aurkeztera, kasu bakoitzean elkarren laguntzari buruz aplikatzen den araudian zehaztutako inguruabarrak gertatzen direnean; araudi horretan ezarritako moduan, kontu horien titulartasuna edo kontrola bere gain duten pertsonen bizitokia edo nazionalitatea identifikatu beharko dute. Eman beharreko informazioan elkarren laguntzari buruzko arauditik datorrena sartuko da eta, betiere, aipatu pertsonen kontuen identifikazio osoa eta izen-deiturak edo sozietatearen izena edo izen osoa eta, zein den kasua, aipatutako pertsonen identifikazio fiskaleko zenbakia edo antzekoa, bai eta dagokion eredua onesten duen foru aginduan ezartzen den garrantzizko beste edozein datu ere.

23. Aurreko idatz-zatietan aipatutako informazio aitorpenak Ekonomia eta Ogasuneko kontseilariak ezartzen duen moduan eta berak dioen lekuan aurkeztu behar dira; gainera, aitorpena ordenagailuan zuzenean irakur daitekeen euskarrian edo bide telematikoen bidez aurkezteko prozedura eta baldintzak ezarri ahal izanen ditu. Informazio aitorpen horiek Hitzarmen Ekonomikoan ezarritako eskumen-irizpideen arabera aurkeztu behar dira.

62 bis artikulua. Errenta-eratxikipenaren araubideko erakundeen informatu beharra.

1. Errenta-eratxikipenaren araubidean dauden erakundeek informazio aitorpena aurkeztu behar dute urtero; bertan, euren identifikazio datuak (eta behar denean euren ordezkariarenak ere bai) eman ez ezik beste datu hauek ere agerrarazi behar dituzte:

a) Bazkide, jaraunsle, erkide edo partaideen (Espainiako egoiliar izan zein ez izan) identifikazioa, zerga helbidea eta identifikazio fiskaleko zenbakia; horiez gainera, zergaldian zehar entitatearen osaeran gertatu diren aldaketen berri eman behar da.

Entitateko kideren bat Espainiako egoiliarra ez bada, haren ordezkari fiskalaren identifikazioa, Ez-egoiliarren Errentaren gaineko Zergari buruzko Legearen Testu Bateginak, martxoaren 5eko 5/2004 Legegintzako Errege Dekretuaren bidez onetsiak, 10. artikuluan ezarritakoarekin bat.

Atzerrian eraturiko errenta-egozpenaren araubideko entitateak izanez gero, zerga honen edo Sozietateen gaineko Zergaren mendeko subjektu pasiboak diren kideak identifikatu behar dira, bai eta Ez-egoiliarren Errentaren gaineko Zergaren mende daudenak ere (zerga horri lotutako errentei dagokienez), eta identifikazioa artikulu honetan ezarritako moduan eginen da.

b) Erakundeak lortutako errenta guztien zenbatekoa eta kide bakoitzari egotzi beharreko errentena; behar izanez gero hauek zehaztu behar dira:

1go. Sarrera osoak eta gastu kengarriak, errenta-iturri bakoitzeko.

2gn. Atzerriko errenten zenbatekoa; herrialdea adierazi behar da, bai eta etekin osoak eta gastuak ere.

3gn. Zergari buruzko Legeko 49. artikuluko 4. idatz-zatian aipatutako balizkoan, eskualdatu edo harpidetu diren akzioen talde inbertsioko erakundearen identifikazioa, akzioak edo partaidetzak eskuratu edo harpidetu diren eguna eta haien eskuraketa-balioa, eta norberaren kapitalen lagapen-hartzaile den pertsona edo erakundearen identifikazioa.

c) Kenkarien oinarriak.

d) Erakundeak jasandako atxikipenen eta konturako sarreren zenbatekoa, eta kide bakoitzari eratxiki dakizkiokeenena.

e) Negozio zifraren zenbateko garbia, Merkataritzako Kodearen 35.2 artikuluko bigarren paragrafoaren arabera.

2. Aurreko idatz-zatian aipatutako informatu beharra errenta-eratxikipeneko araubideko erakundearen ordezkari denak bete behar du. Atzerrian eratutako erakundea izanez gero, zerga honen edo Sozietateen gaineko Zergaren kargapeko subjektu pasibo diren erakundeko kideek ere bete behar dute informatu beharra.

3. Errenta-eratxikipeneko araubideko erakundeek idatziz jakinarazi behar diete euren kideei aurreko 1. idatz-zatiko b), c) eta d) letretan aipatutako informazioa. Jakinarazpena aitorpena aurkezteko epea, 1. idatz-zatian aipatu dena, amaitu eta hilabete igaro aurretik egin behar da.

4. Ekonomi eta Ogasun kontseilariak adieraziko du zein eredutan, zein epetan, non eta nola aurkeztu behar den artikulu honetan aipatutako informazio aitorpena. Hitzarmen Ekonomikoan ezarritako eskumen-irizpideak aintzat hartuz aurkeztu behar da.

62 ter artikulua. Egoitza Europar Batasuneko beste estatu batzuetan duten pertsona fisikoek lortutako zenbait errentari buruz informazioa eman beharra.

1. Aplikazio eremua.

Pertsona juridikoek eta gainerako entitateek (errenta-eratxikipenaren araubidea duten entitateak barne) nahiz pertsona fisikoek, beren jarduera ekonomikoan ari direlarik artikulu honetako 2. idatz-zatian aipatzen diren errentak ordaintzen badizkiete egoitza Europar Batasuneko beste estatu batean duten pertsona fisikoei, edo ordainketan bitartekari aritzen badira, informazioa eman beharko dute artikulu honetan azaltzen den moduan.

2. Informazioa eman beharrari lotutako errentak.

A) Artikulu honetan arautzen den bezala informazioa eman beharrari lotuta egonen dira ondoko errentak:

a) Norberaren kapitalak hirugarrenei lagatzeagatik kobratzen diren interesak edo ituntzen diren ordainsariak, edozein motatakoak direla ere (besteren kapitalak hartu eta erabili izana adierazten duten mota guztietako aktiboen eskualdaketatik, itzulketatik, amortizaziotik, truketik edo bihurketatik datozen etekinak barne), eta Zergari buruzko Foru Legearen 29. artikuluan aipatzen diren gainerako errentak, berandutzagatiko errekarguak izan ezik.

b) Ondotik aipatzen diren entitateek banatzen dituzten emaitzen parte bat, aurreko a) azpiletran aipatutako errentetatik datorrena:

a') Kontseiluak 1985eko abenduaren 20an emandako 85/611/EEE Zuzentarauak arautzen dituen talde inbertsioko erakundeak.

b') Artikulu honetako 3. idatz-zatiko B) letrako bigarren paragrafoan aurreikusitako aukera egiten duten entitateak.

c') Europako Erkidegoaren Ituna aplikatzen den lurraldetik kanpora kokatuta dauden talde inbertsioko erakundeak.

c) Aurreko b) azpiletran aipatutako entitateen akzioak edo partaidetzak eskualdatu edo itzultzean lortzen diren errentak, haiek zuzenean edo mota bereko beste entitate batzuen bitartez beren aktiboen ehuneko 40 baino gehiago inbertitua badute aurreko a) azpiletran aurreikusitako errenten iturri diren balore edo kredituetan.

Horri dagokionez, eskualdaketan edo itzulketan lortutako errentaren zenbatekoa zehazterik ez dagoenean, akzio edo partaidetzen eskualdaketa edo itzulketa balioa hartuko da aintzat.

Inbertsio funtsaren erregelamenduan edo entitatea eratzeko eskrituran inbertsioei buruz ezarritako arau edo irizpideetatik ondorioztatzen den inbertsio politikaren arabera finkatuko da aipatu portzentajea, edo, horrelakorik ezean, haren aktiboen benetako osaeraren arabera; ondorio horietarako kontuan hartuko da emaitzak banatu edo akzio zein partaidetzak eskualdatu edo itzuli aurreko ekitaldian haren aktiboek izandako batez besteko osaera.

B) Honako 2. idatz-zati honetako A) letrako a) azpiletran xedatutakoa dela-eta, finantza entitateek ezin badute etekina zehaztu eskualdaketa, amortizazio edo itzulketa eragiketetan, tributu administrazioari eskualdaketa, amortizazio edo itzulketa balioa jakinarazi beharko zaio.

Halaber, 2. idatz-zati honetako A) letrako b) eta c) azpiletretan xedatutakoari dagokionez, errenta ordaintzen duenak ez baldin badaki banatutako emaitzetatik edo inbertitutako aktiboetatik zein parte edo portzentaje dagokien, zuzenean edo zeharka, A) letrako a) azpiletran aurreikusitako errenten iturri diren balore edo kredituei, etekin guztiak horrelako errenta edo aktiboetatik datozela pentsatuko da.

Hala ere, informazioa eman behar dutenek, 2. idatz-zati honetako A) letrako b) eta c) azpiletretan sartutako errentak direla-eta, aukeran izanen dute banatutako guztizko zenbatekoari eta talde inbertsioko erakundeen partaidetza edo akzioen eskualdaketan edo itzulketan lortutako guztizko zenbatekoari buruzko informazioa ematea, hurrenez hurren.

3. Informazioa eman behar dutenak.

A) Informazioa ematera beharturik daude artikulu honetako 1. idatz-zatian aipatutako pertsona edo entitateak, eta bereziki honako hauek:

a) Finantza erakundeetako kontuetako korrituak edo itundutako beste edozein sari ordaintzen denean, horiek ordaintzen dituen finantza entitatea.

b) Finantza-aktiboen kupoiak ordaindu edo haiek amortizatu, itzuli, trukatu edo bihurtzen direnean, baloreen jaulkitzailea.

Hala ere, finantza-entitate bati aurreko eragiketak gauzatzeko eskatzen bazaio, finantza-entitate horrek eman beharko du informazioa.

c) Finantza-aktiboen eskualdaketan etekinak lortzen direnean, eskualdatzailearen kontura diharduen finantza-erakundea.

d) Zor publikoko baloreak direnean, Idazpen bidezko Zor Publikoaren Merkatuko entitate kudeatzaile bat, eragiketan esku hartzen duena.

e) Talde inbertsioko erakundeen emaitzak banatzen direnean, sozietate kudeatzailea, inbertsio funtsetako akzioak edo partaidetzak merkaturatzen dituen entitatea edo inbertsio sozietatea. Talde inbertsioko erakundeak egoitza atzerrian baldin badu, entitate merkaturatzailea edo merkaturatzeko ahalmena duen bitartekaria.

f) Talde inbertsioko erakundeen akzio edo partaidetzak eskualdatzen edo itzultzen direnean, sozietate kudeatzailea, inbertsio funtsetako akzioak edo partaidetzak merkaturatzen dituen entitatea nahiz inbertsio sozietatea, edo eskualdaketan bitartekotza lanak egiten dituen finantza bitartekaria, hala denean. Helbidea atzerrian duten talde inbertsioko erakundeen kasuan, entitate merkaturatzailea edo merkaturatzeko ahalmena duen bitartekaria.

B) Artikulu honetako 2. idatz-zatian aipatutako errentak hartzen dituzten entitateek aplikagarria dutenean Zergari buruzko Foru Legearen III. tituluko II. kapituluko 5. ataleko 1. azpiataleko 11. artikuluko errenta-egozpenaren araubidea, entitate horiek eman beharko dute informazioa, betiere errentaren zenbatekoa egoitza Europar Batasuneko beste estatu batean duen pertsona fisiko bati egotzi ahal bazaio.

Hala ere, entitate horiek informazioa ematea aukeratu ahal izanen dute, egoitza Europar Batasuneko beste estatu batzuetan duten beren kideei errentak ordaintzen dizkietenean. Aukera hori eginez gero, Zerga Administrazioari jakinarazi beharko diote, eta hark, entitatearen eskariz, aukera horren ziurtagiria emanen du.

C) Idatz-zati honetako goiko letretan xedatutakoa gorabehera, haietan aipatutako pertsona edo entitateek ez dute informaziorik eman beharrik izanen baldin eta errenta hartzen duen pertsona fisikoak frogatzen ahal badu:

a) Errentak ordaintzen dituela edo errenten ordainketan bitartekari aritzen dela, artikulu honetako 1. idatz-zatian adierazitako moduan.

b) Pertsona juridiko baten, enpresen tributazioari buruzko arau orokorren arabera zergapean dagoen entitate baten edo 85/611/EEE Zuzentarauak araututako talde inbertsioko erakunde baten kontura diharduela.

c) Nortasun juridikorik ez duen eta enpresen tributazioari buruzko arau orokorren arabera zergapean ez dagoen entitate baten kontura diharduela, edo 85/611/EEE Zuzentarauak araututako talde inbertsioko erakundea ez den entitate baten kontura, Espainiako legeriaren arabera errenta-eratxikipeneko entitatea izan nahiz ez. Kasu honetan, pertsona fisikoak entitate horren izena eta helbidea jakinarazi beharko dizkio errenta ordaintzen dion pertsona edo entitateari, eta honek tributu administrazioari emanen dio informazio hori.

d) Beste pertsona fisiko baten kontura diharduela. Kasu honetan, zein pertsonak edo entitatek ordaintzen dion errenta, hari jakinarazi beharko dio zein pertsona fisikoren kontura diharduen, artikulu honetako 5. idatz-zatiko A) letran ezarritakoarekin bat.

4. Eman behar den informazioa.

A) Aurreko 3. idatz-zatian aipatutako subjektuek, informazioa ematera beharturik daudenek, tributu administrazioari ondoko datuak aurkeztu beharko dizkiote:

a) Errentak hartzen dituen pertsona fisikoaren identitatea eta helbidea, artikulu honetako 5. idatz-zatian ezarritako prozeduraren arabera.

b) Errenten hartzaileak emandako kontu zenbakia.

c) Errenta sortzen duen kredituaren identifikazioa.

d) Errentaren zenbatekoa.

B) Artikulu honetako 2. idatz-zatian aipatutako errenten hartzailea, nortasun juridikorik gabeko entitatea izanik, Europar Batasuneko beste estatu batean kokaturik badago, edo Europar Batasuneko beste estatu batzuetan enpresak zergapetzeko arau orokorren arabera zergapean ez badago, edo 85/611/EEE Zuzentarauak araututako talde inbertsioko erakundea ez bada (Espainiako legeriaren arabera errenta-eratxikipeneko entitatea izan nahiz ez), errenta horiek ordaintzen dituzten edo ordainketan bitartekari aritzen diren pertsona edo entitateek hartzailearen izena eta helbidea eta errenten zenbatekoa jakinarazi beharko dituzte.

5. Egoitza Europar Batasuneko beste estatu batzuetan duten pertsona fisiko errenta-hartzaileen identifikazioa eta egoitza.

Beren jarduera ekonomikoan ari direlarik artikulu honetako 2. idatz-zatiko errentak ordaindu edo ordainketan bitartekari aritzen diren pertsona edo entitateek pertsona fisiko hartzaileen identifikazioa eta egoitza jakinarazi beharko dituzte modu honetara:

A) Egoitza Europar Batasuneko beste estatu batean duen pertsona fisiko hartzailearen identitatea.

a) 2004ko urtarrilaren 1a baino lehen egindako kontratuak: pertsona fisiko hartzailearen izena eta helbidea emanen dira, norberak eskura duen informazioa erabiliz, kontuan izanik Espainiako lurraldean indarra duen araudia eta, bereziki, kapital zuriketari aurrea hartzeko zenbait neurriri buruzko abenduaren 28ko 19/1993 Legean xedatutakoa.

b) 2004ko urtarrilaren 1etik aurrera egindako kontratuak eta egun horretatik aurrera kontraturik gabe egindako transakzioak: pertsona fisiko hartzailearen izena, helbidea eta, halakorik badu, identifikazio fiskaleko zenbakia emanen dira. Datu horiek pasaportetik edo identitate agiri ofizialetik hartuko dira. Helbidea agiri horietan ez badago, hartzaileak aurkeztutako beste egiaztagiri batetik hartuko da.

Identifikazio fiskaleko zenbakirik ez badago ez pasaportean, ez identitate agiri ofizialean ez hartzaileak aurkeztutako gainerako egiaztagirietan, identitate datuak osatzeko, pasaportean edo identitate agiri ofizialean ageri diren jaioteguna eta jaiolekua jarriko dira.

B) Europar Batasuneko beste estatu bateko egoiliar den pertsona fisiko hartzailearen egoitza.

a) 2004ko urtarrilaren 1a baino lehen egindako kontratuak: pertsona fisiko hartzailearen egoitza eskura dauden datuekin egiaztatuko da, kontuan izanik Espainiako lurraldean indarra duen araudia eta, bereziki, abenduaren 28ko 19/1993 Legean xedatutakoa.

b) 2004ko urtarrilaren 1etik aurrera egindako kontratuak eta egun horretatik aurrera kontraturik gabe egindako transakzioak: pertsona fisiko hartzailearen egoitza zehazteko, helbidea hartuko da pasaportetik edo identitate agiri ofizialetik, edo bestela, behar izanez gero, aurkeztutako beste egiaztagiri batetik, ondoko prozedurari jarraituz:

Pertsona fisikoak Europar Batasuneko estatu batean emandako pasaportea edo identitate agiri ofiziala aurkeztu eta hirugarren herrialde bateko egoiliarra dela adierazten badu, zerga-egoitzaren ziurtagiriaren bidez zehaztuko da haren egoitza. Hirugarren herrialde horretako agintari eskudunak emandako ziurtagiria izanen da, eta urtebeteko indarraldia izanen du. Halako ziurtagiririk aurkeztu ezean, aurkeztutako pasaporte edo identitate agiri ofiziala Europar Batasuneko zein estatutan emana den, egoitza bertan dagoela ulertuko da.

6. Informazioa emateko epea, lekua eta modua.

Artikulu honetan aipatutako informazioa daukan aitorpena Ekonomi eta Ogasun kontseilariak adierazten duen moduan, tokian eta epean aurkeztu beharko da, Tributu Administrazioaren Estatu Agentziara bidaltzeko. Agentzia horrek, berriz, errenta-hartzaileak egoitza duen Europar Batasuneko estatuko agintari eskudunari bidaliko dio.

Ekonomi eta Ogasun kontseilariak adierazi ahal izanen du zein egoeratan izanen den nahitaezkoa aitorpen hori ordenagailuz zuzenean irakurtzeko euskarrian edo bide telematikoz aurkeztea.

62 quater artikulua. Lehentasuneko partaidetzekin eta beste zor-tresna batzuekin egiten diren eragiketa batzuei buruz informazioa eman beharra.

1. Informazioa eman beharra.

A) Tributu administrazioari erregelamendu honen 62.11 artikuluan aipatzen den informazioa eman behar diotenek informazioa aurkeztu beharko dute finantza-bitartekarien inbertsio-koefiziente, baliabide propio eta informazio-betebeharrei buruzko maiatzaren 25eko 13/1985 Legearen bigarren xedapen gehigarrian ezarritako araubidea duten lehentasuneko partaidetzekin eta beste zor-tresna batzuekin egindako eragiketen inguruan. Eragiketan esku hartutako subjektuen identifikazio osoa eman behar da: zer dela-eta esku hartu duten, haien izen-abizenak edo izen soziala, helbidea eta identifikazio fiskaleko zenbakia. Halaber, efektu publiko, balore, titulu eta aktiboen mota eta kopurua eta eragiketa bakoitzaren zenbatekoa adieraziko dira, betiere, lehentasuneko partaidetza eta bestelako zor-tresna horiekin eta goian aipatutako subjektuak tarteko direla egin diren eragiketei dagokienez.

B) Ekonomi eta Ogasun kontseilariak adierazten duen moduan, tokian eta epean aurkeztuko da informazio hori.

C) Artikulu honetan aipatutako informazio-betebeharra betetzeko, erregelamendu honen 62.11 artikuluko azken paragrafoan ezarritakoa aplikatuko da.

2. Estatuaren Zor Publikoarekin, lehentasuneko partaidetzekin eta beste zor-tresna batzuekin egiten diren eragiketa batzuei buruzko informazio araubidea.

a) Idatz-zati honetan xedatutakoa etekin hauetan aplikatuko da:

Lehena.–Estatuaren Zor Publikoaren baloreen interesak, Idatzohar bidezko Zor Publikoaren Merkatuan negoziatuak, bai eta deskontura edo bereizirik jaulkitako antzeko baloreek eragindako beste etekin batzuk ere.

Bigarrena.–Finantza bitartekarien inbertsio koefizienteei, baliabide berekiei eta informazio betebeharrei buruzko maiatzaren 25eko 13/1985 Legearen bigarren xedapen gehigarrian arautzen diren baloreen interesak, bai eta xedapen honetan aurreikusirik dauden eta hamabi hilabeteko edo gutxiagoko epearekin deskontura jaulkitakoak diren zor tresnek eragindako etekinak ere.

b) Estatuko Zor Publikoaren kasuan, jaulkitzaileak edo haren ordainketa-agente baimenduak Idatzohar bidezko Zor Publikoaren Merkatuaren entitate kudeatzaileei eta baloreen konpentsazio eta likidazio sistemak kudeatzen dituzten eta egoitza atzerrian duten entitateei –baldin eta hitzarmena izenpetua badute Espainiako lurraldean helbidea duen balore konpentsazio eta likidaziorako entitate batekin– ordainduko dizkie haien hirugarrenen kontuetan erregistratuta ageri diren baloreei dagozkien etekinak, mugaegun bakoitzean eta osorik, kontuetako baloreen onuradunak hauek direnean:

Lehena.–Espainiako lurraldean establezimendu iraunkorrik ez duten ez-egoiliarrak.

Bigarrena.–Sozietateen gaineko Zergaren subjektu pasiboak, bai eta Espainiako lurraldean establezimendu iraunkorra duten ez-egoiliarrak ere.

Hirugarrena.–Pertsona Fisikoen Errentaren gaineko Zergaren zergadunak, kupoi bereiziei eta printzipal bereiziei dagokien zatian, diru-itzulketan entitate kudeatzaile batek esku hartzen duenean.

Era berean ordainduko dira, osorik, Idatzohar bidezko Zor Publikoaren Merkatuko kontu titularren kontu berekian erregistratutako saldoei dagozkien etekinak.

c) Aurreko b) letran aurreikusitakoaren ondorioetarako, entitate kudeatzaileek eta baloreen konpentsazio eta likidazio sistemak kudeatzen dituzten eta egoitza atzerrian duten entitateek, letran aipatutakoek, aitorpen bat aurkeztu beharko diote jaulkitzaileari, kasu honetan Espainiako Bankuaren bidez eta erregelamendu honen eranskinean jasotako ereduaren araberakoa, informazio hau bilduko duena, haien erregistroetan dagoenarekin bat:

Lehena.–Baloreen identifikazioa.

Bigarrena.–Etekinen zenbatekoa, guztira.

Hirugarrena.–Pertsona Fisikoen Errentaren gaineko Zergaren zergadunei dagozkien etekinen zenbatekoa, salbu eta Estatuko Zor Publikoaren kupoi bereiziak eta printzipal bereiziak direnean eta horien diru-itzulketan entitate kudeatzaile batek esku hartzen duenean.

Laugarrena.–Aurreko b) letran aurreikusitakoari jarraikiz osorik ordaindu behar diren etekinen zenbatekoa.

Aitorpen hori ez da aurkeztu beharko Altxorraren Letren kasuan, eta entitate kudeatzaileek ez dute aurkeztu beharko Estatuko Zor Publikoaren kupoi bereiziei eta printzipal bereiziei dagokienez.

d) Idatz-zati honen a) letraren bigarren puntuak aipatzen dituen baloreak direnean, hasiera batean Espainiako lurraldean helbidea duen balore konpentsazio eta likidaziorako entitate batek erregistratuak, aitorpena aurreko c) letrak aipatzen dituen moduetan aurkeztuko dute beren hirugarrenen kontuetan baloreak erregistraturik dituzten entitateek, bai eta baloreen konpentsazio eta likidazio sistemak kudeatzen dituzten eta egoitza atzerrian duten entitateek ere, baldin eta hitzarmen bat izenpetua badute Espainiako lurraldean egoitza duen balore konpentsazio eta likidaziorako entitate horrekin.

Idatz-zati honen b) letrako lehen eta bigarren puntuetan aipatzen diren titularrei dagozkien etekinak ere osorik ordainduko dira.

Era berean ordainduko dira, osorik, gordailu-entitateen kontu berekian erregistraturik ageri diren saldoei dagozkien etekinak.

e) Idatz-zati honen a) letraren bigarren puntuak aipatzen dituen baloreak direnean, hasiera batean egoitza atzerrian duten eta, ondorio horietarako, Espainiako araudian edo ELGAko kide den beste herrialde batekoan onartuak diren balore konpentsazio eta likidaziorako entitateetan erregistratuak, jaulkitzaileak izendatutako ordainketa-agenteak aitorpena aurkeztu beharko dio jaulkitzaileari, erregelamendu honen eranskinean dagoen ereduaren araberakoa, informazioa emanez baloreen konpentsazio eta likidaziorako sistema kudeatzen duen eta egoitza atzerrian duen entitate bakoitzari dagozkion baloreen identifikazioaz eta etekinen zenbateko osoaz; etekin horiek osorik ordainduko dira.

f) Aurreko letretan aipatutako aitorpenak interesen mugaegun bakoitzaren aurreko egun baliodunean aurkeztuko dira edo, deskontura edo bereizirik jaulkitako baloreen kasuan, baloreen amortizazio-egun bakoitzaren aurreko egun baliodunean, egun horretan merkatua ixtean zegoen egoera islatuta. Aitorpen horiek bide telematikoak erabiliz igortzen ahal dira.

Deskontura edo bereizirik jaulkitako baloreak direnean, etekinei buruzko informazioaren ordez itzuli beharreko zenbatekoei buruzkoa emanen da. Nolanahi ere, atxikipenaren menpe dauden balore horien amortizazioak eragindako etekinei buruzko aitorpenean etekin horien zenbatekoa ere jasoko da.

Aurreko lerrokadan aurreikusitako kasuan, aitorpena jaulkitzaileari aurkeztuko zaio edo, kasua bada, jaulkitzaileak zein finantza entitateren esku utzi duen amortizazioa edo diru-itzulketa gauzatzea, entitate horretan.

g) Mugaegunera iritsitako interesen kasuan, artikulu honetan aipatzen den aitorpena aurkeztera beharturik dauden entitateetako batek hura aurkezten ez badu aurreko f) letrako lehen lerrokadan aurreikusitako datan, jaulkitzaileak edo haren ordainketa-agente baimenduak ordaindu beharko ditu entitate horri dagozkion interesak, atxikipen tasa orokorra interes guztiei aplikatuta ateratzen den zenbateko likidoan.

Geroago, Estatuko Zor Publikoaren baloreen kasuan, interesak mugaegunera iritsitako datatik aurrera hogeita hamar egun naturalean, edo idatz-zati honen a) letrako bigarren puntuan aipatzen diren baloreek eragindako interesak mugaegunera iristen diren hilabetetik hurrengo hilabeteko 10a baino lehen, aitorpena aurkeztera beharturik dagoen entitateak artikulu honetan araututako aitorpena aurkeztuko balu, jaulkitzaileak edo haren ordainketa-agente baimenduak gehiegi atxikitako zenbatekoak ordainduko ditu, aitorpena jaso bezain laster.

h) Aurreko letretan aurreikusitako guztia aplikatuko da, halere, tributuen arloko araudian izaera orokorrarekin ezarritako informazio betebeharrak galarazi gabe, bai jaulkitzaileentzat bai Espainian egoitza duten eta, finantza bitartekari diren aldetik, idatz-zati honen a) letran aipatzen diren baloreen gordailuzainak diren entitateentzat, honakoei dagokienez: pertsona fisikoen errentaren gaineko zergaren zergadunak, sozietateen gaineko zergaren subjektu pasiboak eta Espainian establezimendu iraunkorra duten ez-egoiliarren errentaren gaineko zergaren zergadunak, entitate horien erregistroetan jasotakoarekin bat baloreen titularrak direnak.

3. (kenduta).

III. KAPITULUA. Aitorpen osagarriak

63. artikulua. Aitorpen osagarriak aurkezteko epea.

Zergari buruzko Foru Legearen 39.6 artikuluan, e) eta g) letretan aurreikusitakoaren ondorioetarako, subjektu pasiboak ondareko elementuak edo balore edo partaidetza homogeneoak eskualdaketatik heldu den ondare galera aintzat hartzen duen zergaldiko aitorpena egiteko erregelamenduzko epea amaituta eskuratzen dituenean, aitorpen-likidazio osagarria aurkeztu beharko du, berandutza interesak barne, eskuraketa egiten denetik eskuraketa egiten den zergaldiko aitorpena egiteko erregelamenduzko epea amaitu bitarteko epearen barnean.

V. TITULUA. KONTURAKO ORDAINKETAK

I. KAPITULUA. Atxikipenak eta konturako sarrerak. Arau orokorrak

64. artikulua. Atxikipena edo konturako sarrera egin behar duten errentak.

1. Honako errenta hauek egin behar dute atxikipena edo konturako sarrera:

a) Lan etekinak.

b) Higigarrien kapitalaren etekinak.

c) Ondoko jarduera hauen etekinak:

a') Lanbide jarduerak.

b') Nekazaritza eta abeltzaintzakoak.

c') Oihan jarduerak.

d') Erregelamendu honen 78.6 artikuluan aurreikusitako enpresa jarduerak, zeinetan etekin garbia zehazteko zuzeneko zenbatespenaren araubidea izanen baita.

d) Talde inbertsioko entitateen kapital edo ondarearen adierazgarri diren akzio eta partaidetzen eskualdaketatik edo itzulketetatik lortutako ondare gehikuntzak.

2. Ondoko errenta hauek ere, haien kalifikazioa edozein izanik ere, atxikipena edo konturako sarrera egin beharko dute:

a) Hiri higiezinak alokatzetik edo berralokatzetik heldu diren etekinak.

Ondorio horietarako alokairuaz esaten dena berralokairuaz ere esaten dela ulertuko da.

b) Hauetatik heldu diren etekinak: jabetza intelektual eta industrialetik, laguntza teknikoa ematetik, ondasun higigarri, negozio edo meategien alokairutik, aurreko ondare elementuen berralokairutik eta irudi eskubidea ustiatzeko eskubidearen lagapenetik.

c) Joko, lehiaketa, zozketa edo ausazko konbinazio aleatorioetan parte hartzearen ondorioz jasotako sariak, ondasun, produktu edo zerbitzu zehatz batzuen eskaintza, promozio edo salmentarekin zerikusirik izan ala ez.

3. Ez da beharrezkoa izanen atxikipena edo konturako sarrera egitea honako errenta hauen kasuan:

a) Errenta salbuetsiak, eta kargarik ez daukaten bidaia sari eta gastuak.

b) Espainiako Bankuak jaulkitako baloreen etekinak, baloreok diru merkatuan eskuhartzea erregulatzen duen tresna baldin badira eta Altxor Letren etekinak.

Halere, bezeroekin Altxor Letren gaineko eragiketetan oinarrituriko kontu kontratuak formalizatzen dituzten kreditu entitateak eta gainerako finantza entitateak beharturik egonen dira atxikipenak egitera kontu horien titularrek lortutako etekinetan.

c) Obligazioak akzio bihurtzeko primak.

d) Atzerriko kontuen etekinak, egoitza Espainian duten finantza kreditu entitateek eta finantza establezimenduek atzerrian modu egonkorrean dauzkaten establezimenduek ordaindutakoak badira.

e) Etekin esplizitua duten finantza aktiboen eskualdaketa edo itzulketatik heldu diren etekinak, Espainiako bigarren mailako balore merkatu batean negoziatzen badira eta kontuko oharpenen bidez adierazirik badaude.

Finantza aktibo horien eskualdaketan, amortizazioan edo itzulketan esku hartzen duten finantza entitateak beharturik egonen dira balorearen titularrari egotzi beharreko etekina kalkulatzera eta horren berri ematera titularrari eta Ekonomi eta Ogasun Departamentuari. Azken horri, halaber, arestian adierazitako eragiketetan esku hartzen duten pertsonen datuak emanen dizkiote.

Halere, bezeroekin balore horien gaineko eragiketetan oinarrituriko kontu kontratuak formalizatzen dituzten kreditu entitateak eta gainerako finantza entitateak beharturik egonen dira atxikipenak egitera kontu horien titularrek lortutako etekinetan.

Era berean, atxikipena izanen du kupoi korrituaren balio bera duen prezioaren zatiak, kupoiaren mugaeguna baino 30 egun lehenagoko epearen barrenean eskualdatutako finantza aktiboetan, baldintza hauek betetzen direnean:

1. Eskuratzailea Espainiako lurraldean egoitza ez duen pertsona edo entitatea izatea edo Sozietateen gaineko Zergaren subjektu pasiboa.

2. Eskualdatutako baloreetatik heldu diren etekin esplizitoak atxikitzeko betebeharretik salbuetsirik egotea.

f) Zorizko, eskaintza edo adurrezko eta apustuzko jokoen zehapenak, administrazioa eta zergen arloa arautu dituen otsailaren 25eko 16/1977 Errege Lege-Dekretuan ezarritakoaren babesean antolatutako jokoen ondorioz ematen diren sariak, eta 300 eurotik beherako atxikipen-oinarria dutenak.

g) Hiri-higiezinen alokairu edo berralokairutik heldu diren etekinak, enpresek beraien langileentzat alokatzen dituzten etxebizitzak direnean.

h) Akzioak edo partaidetzak jaulkitzearen prima eta kapital-murrizketaren prima itzultzetik datozen etekinak, ekarpenak itzultzen direnean, salbu eta murrizketa hori banatu gabeko etekinetatik datorren kapitalari badagokio, Zergari buruzko Foru Legearen 39.4.a) artikuluaren bigarren paragrafoan aurreikusitakoaren arabera.

Dena dela, Zergari buruzko Foru Legearen 52.1.c) artikuluaren lehenengo paragrafoan adierazten diren etekinen kasuan, atxikipena edo konturako diru-sarrera egin beharko da, baita Zergari buruzko Foru Legearen 52.1.d) artikuluan aipatzen den jaulkipen primaren zenbatekoen kasuan ere, kapital-murrizketatik (ekarpenen itzulketarekin) edo jaulkipen primaren itzulketatik datorrenean eta Inbertsio Kolektiboko Erakundeei buruzko Legearen arabera eratutako kapital aldakorreko inbertsioko sozietateenak direnean, hurrenez hurren.

Aurreko paragrafoan xedatutakoa aplikatuko da, orobat, etekin horiek Zergari buruzko Foru Legearen 52.2 artikuluan aipatutako inbertsio kolektiboko erakundeetatik baldin badatoz.

i) Inbertsio kolektiboko erakundeetako partaidetzen edo akzioen eskualdaketatik edo errenboltsotik datozen ondare-gehitzeak, Zergari buruzko Foru Legearen 52. artikuluan ezarritakoari jarraikiz, horien kontaketa bidezkoa ez denean, eta orobat, Inbertsio Kolektiboko Erakundeei buruzko azaroaren 4ko 35/2003 Legearen Erregelamenduaren 49. artikuluan araututako funts eta sozietateetako partaidetza eta akzioen eskualdaketatik edo errenboltsotik datozenak. Aipatutako erregelamendu hori azaroaren 4ko 1309/2005 Errege Dekretuaren bidez onetsi zen.

65. artikulua. Atxikipena edo konturako sarrera egitera behartuta daudenak.

1. Oro har, ondoko hauek egin beharko dute atxikipena edo konturako sarrera, betebehar hori daukaten errentak ordaintzen dituztenean:

a) Pertsona juridikoak eta gainerako entitateak, jabeen elkarteak eta errenta esleipeneko araubidea daukaten entitateak barne direlarik.

b) Jarduera ekonomikoetan aritzen diren subjektu pasiboak, beraien jardueretan errentak ordaindu edo abonatzen badituzte.

c) Espainian egoitza ez duten pertsona fisiko, juridiko eta gainerako entitateak, establezimendu iraunkorren bidez bertan jarduten badute.

d) Espainiako lurraldean egoitza ez duten pertsona fisiko, juridiko eta gainerako entitateen kasuan, establezimendu iraunkor bat eduki gabe jarduten badute bertan, ordaintzen dituzten lan etekinak hartuko dira kontuan, bai eta atxikipenaren edo konturako diru-sarreraren menpe dauden beste etekin batzuk ere, gastu kengarriak badira Ez-egoiliarren Errentaren gaineko Zergari buruzko Legearen Testu Bateginaren 24.2 artikuluan aipatutako errentak lortzeko (testu bategina martxoaren 5eko 4/2004 Legegintzako Errege Dekretuaren bidez onetsi zen).

2. Bereziki:

a) Atxikipena egin beharko dute bertan egoitza duten entitateek edo establezimendu iraunkorrek, horietan ematen badituzte zerbitzuak subjektu pasiboek, beste entitate batek, bertan egoitza izan zein ez izan, eta lehen aipatutako erakundeekin Sozietateen gaineko Zergari buruzko abenduaren 30eko 24/1996 Foru Legeko 28. artikuluan aurreikusitako baldintzetan lotuta dagoenak, edo Espainiako establezimendu iraunkorrak atzerrian daukan titularrak lanaren etekinak ordaintzen dizkienean.

b) Finantza aktiboen gaineko eragiketetan, honakoak daude beharturik atxikipena egitera:

1. Finantza aktiboen amortizazioan edo itzulketan lortutako etekinetan, entitate jaulkitzailea. Halere, finantza entitate bati eskatzen bazaio eragiketa horiek gauzatzea, eragiketaren arduraduna den finantza entitateak egin beharko du atxikipena.

Jaulki ondoren finantza aktibo bihurtu diren igorpen-tresnen kasuan, kobratzeko aurkezten dituen fede-emaileak edo finantza entitateak egin beharko du atxikipena haien mugaegunean.

2. Finantza aktiboen eskualdaketan lortutako etekinetan, aurreko idatz-zatian aipatu diren igorpen-tresnak barne direlarik, finantza entitate baten edo bat baino gehiagoren bitartez bideratzen bada, eskualdatzailearen ordez ari den bankuak, kutxak edo entitateak egin beharko du atxikipena.

Idatz-zati honetan ezarritakoaren ondorioetarako, finantza aktiboak saltzeko agindua jasotzen duen bankua, kutxa edo finantza entitatea izanen da transmititzailearen ordez ari dena.

3. Aurreko idatz-zatietan jaso ez diren kasuetan, eragiketan nahitaez parte hartu behar duen fede-emaile publikoa.

c) Zor Publikoko baloreen eskualdaketetan, atxikipena egin beharko du eskualdaketan parte hartzen duen Oharpenetako Zor Publikoaren Merkatuko entitate kudeatzaileak.

d) Talde inbertsioko erakundeen kapitala edo ondarea ordezkatzen duten akzio nahiz partaidetzak eskualdatu edo itzultzen direnean, ondoko pertsona eta entitate hauek atxikipena edo konturako sarrera egin beharko dute:

Lehena.–Inbertsio funtsetako partaidetzak itzultzen direnean, sozietate kudeatzaileak, salbu eta partaideen kontura entitate merkaturatzaileen izenean erregistratutako partaidetzak, horien kasuan entitate merkaturatzaile horiek egin beharko baitute atxikipena edo konturako diru-sarrera.

2. Kapital aldakorreko inbertsio sozietate batek, ez burtsan ez baloreen negoziaziorako beste inongo merkatu edo sistema antolatutan kotizatzen ez duten akzioak dituenak, atzera erosten baditu subjektu pasiboak zuzenean edo merkaturatzailearen bidez berari erosi zizkion akzioak, sozietateak berak, salbu eta sozietate kudeatzaileren batek esku hartzen duenean; azken kasu horretan, sozietate kudeatzaileak.

3. Talde inbertsioko erakundeak egoitza atzerrian baldin badu, entitate merkaturatzaileek edo haien akzio nahiz partaidetzak merkaturatzeko ahalmena duten bitartekariek, eta, subsidiarioki, baloreak harpidedunen artean banatzeko ardura duten entitateek, itzulketa egiten dutenean.

4. Zerbitzuak aske emateko araubidean diharduten kudeatzaileen kasuan, Zergari buruzko Foru Legearen hamazazpigarren xedapen gehigarriko 2. idatz-zatian eta Inbertsio kolektiboko erakundeei buruzko azaroaren 4ko 35/2003 Legearen 55.7 artikuluan aipatzen den ordezkariak.

Bosgarrena.–Aurreko zenbakietan ezarritakoaren arabera atxikipenik egin behar ez den kasuetan, eskualdaketa egin edo itzulketa lortzen duen bazkide edo partaideak konturako ordainketa bat egin beharko du. Konturako ordainketa hori 79., 80.1 eta 81. artikuluetako arauei jarraituz eginen da.

e) Zerbitzuak aske emateko araubidean diharduten aseguru entitateek Espainian egiten dituzten eragiketetan, atxikipena edo konturako sarrera egin behar du Zergari buruzko Foru Legearen hamazazpigarren xedapen gehigarriak dioen moduan izendatutako ordezkariak.

f) Helbidea Europar Batasuneko beste herrialde batean duten pentsio funtsek Espainian egiten dituzten eragiketetan, Espainiako legeriaren pean langileentzako pentsio planak garatzen badituzte, Langileentzako pentsio funtsen jarduerei eta gainbegiratzeari buruzko 2003ko ekainaren 3ko 2003/41/EE Zuzentarauak, Europako Parlamentuak eta Kontseiluak emanak, aurreikusten duen bezala, Zergari buruzko Foru Legearen hemezortzigarren xedapen gehigarriaren arabera haiek izendatutako ordezkariak atxikipena edo konturako sarrera egin behar du.

g) Kapital soziala murrizten denean, eta horrekin batera akzioen jaulkipen primaren banaketa eta ekarpenen itzulketa egiten bada, 64.3.h) artikuluaren bigarren eta hirugarren paragrafoetan adierazitako kasuetan, honako hauek egin beharko dute konturako diru-sarrera edo atxikipena:

1. Inbertsio Kolektiboko Erakundeei buruzko Legean araututako kapital aldakorreko inbertsioko sozietateen kasuan, sozietateak berak.

2. Zergari buruzko Foru Legearen 52.2.a) artikuluan aipatzen diren inbertsio kolektiboko erakundeen kasuan, entitate merkaturatzaileek, edo haien akzioak edo partaidetzak merkaturatzeko ahalmena duten bitartekariek, eta subsidiarioki, baloreak kokatu edo banatzeaz arduratzen diren entitateek, errenten ordainketan parte hartzen dutenek.

3. Zergari buruzko Foru Legearen 52.2.b) artikuluan adierazitako inbertsio kolektiboko erakundeen kasuan, baloreen gordailua egiten duen entitateak edo haietatik datozen errenten kobraketa kudeatzeaz arduratzen den entitateak.

4. Aurreko zenbakien arabera konturako diru-sarrera edo atxikipena egitea bidezkoa ez den kasuetan, konturako ordainketa egitera behartuta egonen da jaulkipen primaren banaketa edo ekarpenen itzulketa jasotzen duen bazkidea edo partaidea. Konturako ordainketa hori 73., 76.5 eta 77.1 artikuluetako arauei jarraituz eginen da.

66. artikulua. Pertsona Fisikoen Errentaren gaineko Zergaren atxikipenak edo konturako sarrerak egiteko betebeharra.

1. Erregelamendu honen aurreko artikuluan aipatutako pertsonek edo entitateek, 64. artikuluan aurreikusitako errentak ordaintzen dituztenean, atxikipena egin eta Nafarroako Ogasun Publikoan sartu beharko dute zenbatekoa, Hitzarmen Ekonomikoan ezarritako irizpideen arabera, hartzaileari dagokion Pertsona Fisikoen Errentaren gaineko Zergaren kontura egindako ordainketa modura, Foru Dekretu honetako arauak betez.

Era berean, atxikipena egin beharko da finantza aktiboen eskualdaketa eragiketetan eta talde inbertsioko entitateen akzio edo partaidetzen eskualdaketa edo itzulketa eragiketetan, Foru Dekretu honetan ezarritako baldintzetan.

2. Aipatutako errentak gauzatan ordaindu edo abonatzen direnean, aurreko zenbakian aipatutako pertsonek edo entitateek dirusarrera bat egin beharko dute, hartzaileari dagokion Pertsona Fisikoen Errentaren gaineko Zergaren kontura egindako ordainketa modura, Erregelamendu honetako arauak betez.

3. Erregelamendu honetan aurreikusitakoaren ondorioetarako, atxikipena egin behar duenari buruzko oharrak konturako sarrerak egin behar dituenari buruz ere egin direla ulertuko da, konturako ordainketa biak batera arautu behar direnean.

67. artikulua. Atxikipenaren edo konturako sarreraren zenbatekoa.

1. Atxikipenaren zenbatekoa honela kalkulatuko da: atxikipenaren oinarriari hurrengo Kapituluan aurreikusitakoaren arabera dagokion portzentajea aplikatuko zaio. Atxikipenaren oinarria ordaindu edo abonatzen den kopuru osoa izanen da; halere, hurrengo artikuluetan ezarritako hainbat berezitasun ager daiteke.

2. Gauzazko ordainsariengatik egin behar den konturako sarreraren zenbatekoa lortzeko, ordainketa horien balioari III. Kapituluan aurreikusitakoaren arabera dagokion portzentajea aplikatuko zaio. Aipatutako balio hori Erregelamendu honetako arauek zehaztuko dute.

68. artikulua. Atxikipena edo konturako sarrera egiteko betebeharra sortzea.

1. Oro har, dagozkion errentak ordaindu edo abonatzen diren unean sortuko da atxikipena egiteko betebeharra.

2. Higiezinen kapitalaren etekinen kasuan eta talde inbertsioko erakundeen akzio eta partaidetzen eskualdaketa edo itzulketetatik heldu diren ondare gehikuntzen kasuetan, Erregelamendu honetako 77 eta 81. artikuluetan aurreikusitakoa beteko da, hurrenez hurren.

69. artikulua. Atxikipenak edo konturako sarrerak zergaldiari egoztea.

Atxikipenen edo konturako sarreren menpean dauden errentak egozten diren aldiari egotziko dizkiote subjektu pasiboek atxikipenak edo konturako sarrerak, gauzatu diren unea alde batera utzita.

II. KAPITULUA. Atxikipenak kalkulatzea

1. atala. Lan etekinak

70. artikulua. Lan etekinen gaineko atxikipenen zenbatekoa.

Lan etekinen gainean egin behar den atxikipena zein den jakiteko, ordaindutako etekin osoari honako portzentaje hauetatik dagokiona aplikatu beharko zaio:

a) Oro har, etekinen zenbatekoaren arabera eta subjektu pasiboaren egoera pertsonalaren arabera, hurrengo artikuluan jasotako taula eta jarraibideak aplikatuz lortzen dena.

b) Administrazio kontseiluetako kideek, kontseilu horien ordez aritzen diren batzordeetako kideek eta antzeko ordezkaritza organoetako gainerako kideek, izaera hori dela-eta jasotzen dituzten lansarien kasuan, atxikipenaren portzentajea %35ekoa izanen da.

71. artikulua. Atxikipenen portzentaien taula eta horiek aplikatzeko jarraibideak.

Bat.–1. Atxikipen-portzentajeen taula orokorra:

URTEKO ETEKINA, EUROTAN	SEME-ALABEN ETA BESTE ONDORENGO BATZUEN KOPURUA
	Seme-alabarik gabe	1	2	3	4	5	6	7	8	9	10 edo gehiago
11.250 baino gehiago	4	2	0	0	0	0	0	0	0	0	0
12.750 baino gehiago	6	4	2	0	0	0	0	0	0	0	0
14.250 baino gehiago	8	6	4	2	0	0	0	0	0	0	0
16.750 baino gehiago	10	8	6	4	1	0	0	0	0	0	0
19.750 baino gehiago	12	11	9	7	6	4	0	0	0	0	0
23.250 baino gehiago	13	12	11	8	7	5	3	0	0	0	0
25.750 baino gehiago	14	13	12	9	8	7	5	3	0	0	0
28.250 baino gehiago	15	14	13	12	10	8	7	5	3	0	0
32.250 baino gehiago	16	15	14	13	11	9	9	7	6	4	1
35.750 baino gehiago	17	16	16	14	13	12	11	9	8	6	5
41.250 baino gehiago	18	17	17	16	15	14	13	11	10	9	8
48.000 baino gehiago	21	20	20	18	17	17	16	15	14	13	11
55.000 baino gehiago	23	23	23	21	20	20	19	18	17	16	14
62.000 baino gehiago	25	25	24	23	22	22	21	20	19	18	16
69.250 baino gehiago	27	27	26	25	24	24	23	22	21	19	18
75.250 baino gehiago	28	27	27	26	26	25	25	24	23	22	21
82.250 baino gehiago	29	28	28	27	27	26	26	25	25	24	22
94.750 baino gehiago	30	29	29	28	28	27	27	26	26	25	24
107.250 baino gehiago	31	30	30	29	29	28	28	27	27	26	26
120.000 baino gehiago	33	32	31	31	30	29	29	29	28	28	27
132.750 baino gehiago	34	33	33	32	31	30	30	29	29	28	27
146.000 baino gehiago	35	34	34	34	32	31	31	30	30	29	28

2. Desgaitasuna duten jarduneko langileei aurreko 1. idatz-zatian ezarritako taularen arabera dagokien atxikipen portzentajea aplikatuko zaie, baina ondoko eskalan ageri diren puntuak kenduta:

URTEKO ETEKINAK (euroak)		DESGAITASUN GRADUA
Zenbateko honetatik	Zenbateko honetara	100eko 33koa edo handiagoa	100eko 65ekoa edo handiagoa
11.250,01	23.250	5	15
23.250,01	41.250	3	15
41.250,01	94.750	2	8
94.750,01	Hortik gora	2	5

Eskala horretan agertzen diren murrizketak aplikatzearen ondorioz, ezin izanen da zerotik beherako portzentajerik atera.

Bi.-Taula aplikatzeko jarraibide orokorrak.

1. Taula hori aplikatzeko kontuan hartu behar den seme- alaba eta beste ondorengo batzuen kopurua Zergari buruzko Foru Legearen 55. artikuluaren 4. zenbakiko b) letran jasotako kenkaria egiteko eskubidea ematen dutenena izanen da. Ondorio horietarako, familiaren egoera urte natural bakoitzaren lehenbiziko egunean dagoena edo etekinak ordaintzen dituenarekiko harremana hasten denean dagoena izanen da, egun hura baino geroago hasi bada harreman hori.

2. Taula aplikatzeko kontuan hartu behar den ordainsarien zenbatekoa subjektu pasiboak urte naturalean normalean jasoko duen zenbateko osoaren arabera zehaztuko da. Zenbateko hori aplikatzekoak diren kontratu-arau edo _baldintzen eta aurreikus daitezkeen gainerako inguruabarren araberakoa izanen da. Zenbateko horretatik kanpo geratuko dira pentsio planen eta gizarte aurreikuspeneko mutualitateen sustatzaileek eta 3/1988 Foru Legearen 77. artikuluan aurreikusitako moduan enpresek hartutako pentsio-konpromisoak bideratzen dituzten aseguru kolektiboen hartzaileek (enpresen gizarte aurreikuspeneko planak barne) ordaindutako kontribuzio edo ekarpenak, horiek zerga oinarria murrizten badute, bai eta dagozkion zergaldietatik aparte hartutako ordainsariak ere, betiere langileak bere zerbitzuak eman baldin bazituen aldi horretan ordaintzen zuen enpresan. Ondorio horietarako, gauzatan egindako ordainketak euren balioarengatik zenbatuko dira, Zergari buruzko Foru Legearen 16. artikuluak ezarritakoaren arabera zehaztuta, konturako sarreraren kopurua kanpo utzita.

Urtean jasoko den kopuru osoan ordainsari finkoak eta aurreikus daitezkeen aldakorrak sartuko dira.

3. Ordaindu edo abonatzen diren ordainsari guztiei aplikatuko zaie horrela zehaztutako atxikipenaren portzentajea, hura zehazteko baliatu zirenetatik desberdinak badira ere.

Halere, atxikipen tasa erregularizatzen ahal da kasu hauetan:

a) Kontratu batean hasieran aurreikusitako epea bukatzen denean langileak enplegatzaile berarentzat jarraitzen badu zerbitzuak ematen, edo urte naturalaren barnean berriz harentzat lan egiten badu.

b) Urte natural berean, langabeziaren prestazioen kobrantza eten ondoren, kobratzeko eskubidea berreskuratzen bada edo langabeziaren sorospena jasotzen hasten bada.

c) Arau orokorrengatik edo lan hitzarmen kolektiboengatik, urte berean ordainsarien zenbatekoan aldaketak daudenean.

Aurreko kasuetan, atxikipen portzentaje berria kalkulatuko da, kontuan hartuta bai aurretik ordaindutako ordainsariak bai urte natural berean ustez jaso behar dituenak. Portzentaje berri hori aipatutako aldaketak gertatzen direnetik aurrera baizik ez da aplikatuko.

4. Aurreko idatz-zatietan xedatutakoaren ondorioz lortutako atxikipen portzentajea ezin izanen da ehuneko 15 baino txikiagoa izan menpekotasunezko lan harremanetatik heldu diren etekinak direnean, eta ezin izanen da ehuneko 2 baino txikiagoa izan urte bete baino epe laburragoko kontratuak edo harremanak direnean edo jardunaldi osoko kontratu edo harremana ez denean.

Halere, ehuneko 15eko gutxieneko atxikipena, aurreko lerroaldean aipatutakoa, ez da aplikatuko zigor- erakundeetan zigortuta daudenek lortutako etekinetan, ez eta minusbaliatuengan eragina daukaten lan-harreman berezietatik heldu diren etekinetan ere.

Hiru.-Taula aplikatzeko jarraibide berariazkoak.

1. Zergari buruzko Foru Legearen 14.2.a) artikuluak aipatzen dituen prestazio pasiboen kasuan, seme edo alaba bakarra daukaten subjektu pasiboei dagokien zutabean adierazitako atxikipen portzentajeak aplikatuko dira.

Aplikatu beharreko atxikipen portzentajea zehazteko soilik, ekitaldian pentsiodun edo sarrera pasiboen titularraren izaera hartzen dutenek, urte betea osatu arte zenbatu ahal izanen dituzte jasotzen dituzten kopuruak.

Halere, subjektu pasiboak atxikipen-taula orokorra aplikatzea aukeratu ahal izanen du, bere egoera pertsonala zein den kontuan harturik.

2. Gizalan edo eguneko soldaten bidez kobratzen duten esku-langileak direnean, hau da, enplegatzailearekin noizean behingo edo eguneko harremanaren ondorioz, dagokion taula aplikatzeko kontuan hartu behar den ordainsarien zenbatekoa egunean jasotako soldata 100ekin biderkatuz lortuko da.

3. Lan etekinen jasotzaileak, epailearen erabakiaren ondorioz, bere ezkontideari pentsio konpentsatzailea ordaindu behar dionean, atxikipen portzentajea kalkulatzeko kontuan hartu behar den ordainsarien zenbatekoa murriztu ahal izanen du pentsio horren zenbatekoak.

Horretarako, subjektu pasiboak bere ordaintzaileari jakinarazi beharko dio egoera hori, hurrengo artikuluan zehazten den moduan.

Idatz-zati honetan jasotako kasuetan, ateratzen den atxikipen-tasa ehuneko 2 baino txikiagoa bada, azken hori aplikatuko da.

4. Zergari buruzko Foru Legearen 17.2. artikuluan ezarritako murrizketak aplikatu behar direnean, atxikipena ordainsarien zenbateko osoan aplikatuko da, horri murrizketa horiengatik dagokion zenbatekoa kenduta.

Ordaintzen diren lan etekinak aurreko bi zergaldiri baino gehiagori egotzi ahal baldin bazaizkio, edozein kasutan arestiko lerroaldeak aipatzen duen murrizketa aplikatuko da.

Zergari buruzko Foru Legearen 80. artikuluko 9. idatz- zatian aurreikusten diren kasuetan, 4. idatz-zati honetako lehen lerroaldean aipatzen diren murrizketen aplikazioa ere hartuko da kontuan.

5. (kenduta).

72. artikulua. Jakinarazpenak.

1. Subjektu pasiboek beraien egoera pertsonala egiaztatu beharko diote ordaintzaileari, aplikatu beharreko atxikipen portzentajea kalkulatzeko.

Egoera pertsonalak atxikipen portzentajean eragina daukanean, subjektu pasiboak egoera hori egiaztatzeko eman dizkion agiriak gorde beharko ditu ordaintzaileak.

2. Pentsiodunek atxikipenaren taula orokorra aukera dezakete, nahi badute. Aukera hori idatziz egin beharko da dagokion ordaintzaileari edo entitate kudeatzaileari aurkeztuta, urte bakoitzaren abenduan edo pentsioduna edo sarrera pasiboaren titularraren izaera hartu aurreko hilabetean.

3. Subjektu pasiboek aurreko artikuluetan ezarritakoak baino atxikipen-tasa handiagoak aplikatu nahi badituzte, beraien ordaintzaileei eskatu beharko diete, arau hauek betez:

a) Eskaria idatziz egin beharko zaie ordaintzaileei. Horiek, nominak egin baino lehen jasotzen dituzten eskari guztiak aztertu beharko dituzte.

b) Eskatzen den atxikipen-tasa berria ezin izanen da aldatu eskaria egin eta urtearen amaiera bitartean, eta subjektu pasibo horri hurrengo ekitaldietan aplikatuko zaio, ehuneko horri ez badio idatziz uko egiten edo ez badu atxikipen-tasa handiagoa eskatzen, eta atxikipen-taulen arabera ez badago tasa handiagoa ezartzen duen egoera-aldaketarik.

4. Urtean zehar ordainsarien zenbatekoa jaisten bada langilearen kategoria jaisten delako, langileak eskatzen ahal die ordaintzaileei atxikipen portzentaje berria kalkulatzeko, kontuan hartuta bai aurretik ordaindutako ordainsariak bai urte natural horretan berean ustez jaso behar dituenak.

Eskabidea aurreko idatz-zatiaren a) letran aurreikusitako moduan eta ondorioekin eginen da.

72. bis artikulua. Egoitza atzerritik Espainiako lurraldera aldatuz gero, lanaren etekinen gaineko atxikipenak eta konturako sarrerak zehazteko prozedura berezia.

1. Besteren kontura lan egiten dutenek, zerga honen kargapeko subjektu pasibo ez izaki laster izanen direnak, egoitza Espainiako lurraldean kokatuko dutelako, eta haren barruan Nafarroako Foru Komunitatean, Nafarroako Zerga Ogasunari jakinarazi ahal izanen diote Ekonomi eta Ogasun kontseilariak onesten duen berriemate-ereduaren bidez; hark berak adieraziko du nola, non eta zein epetan aurkeztu behar den, bai eta aurkeztu beharreko agiriak ere.

Berriemate horretan langilea eta lanaren etekinak ordaindu dituena identifikatu behar dira, Espainiako lurraldean zein egunetan sartu den eta ordaintzaile horrentzat lanean zein egunetan hasi den adierazi behar da, eta zehaztu behar da lan-harremanak direla eta pentsatzekoa denez Nafarroako lurraldean egoitza lekuz aldatzen duen urte naturalean, edo hurrengoan, bestela, ehun eta laurogeita hiru egun baino gehiago egonen den, Espainiako lurraldean lanean hasten denetik zenbatuta.

2. Nafarroako Zerga Ogasunak, berriematea eta harekin batera aurkeztutako agiriak aztertuta, frogagiria emanen dio langileari, bidezkoa bada, berriematea aurkeztu eta hamar astegun igaro aurretik, hain zuzen ere zerga honen ziozko atxikipenak noiztik aurrera aplikatu zaizkion adierazten duen frogagiria.

3. Langileak Nafarroako Zerga Ogasunak emandako agiri horren ale bat emanen dio lanaren etekinen ordaintzaileari, hark, atxikipenak aplikatzean, zerga honen kargapeko subjektu pasibotzat har dezan bertan adierazitako egunetik aurrera.

4. Agiri hori jasotakoan, atxikipenak aplikatu behar dituenak aplikatu eginen ditu, bertan adierazitako eguna kontuan hartuz eta zerga honi buruzko arauei lotuz.

5. Baldin eta interesduna lekuz aldatzen den urtean ez bada zerga honen subjektu pasibo gertatzen, Ez-egoiliarren Errentaren gaineko Zergaren aitorpenean zerga honen kontura aplikatutako atxikipenak kendu ahal izanen ditu.

Halaber, Ez-egoiliarren Errentaren gaineko Zergari buruzko Legearen Testu Bateginaren 32. artikuluan ezarritakoa aplikatu behar bada, eta langilea atzerrira joan den urtean Ez-egoiliarren Errentaren gaineko Zergaren kargapekoa izan ez bada, zerga horren ziozko atxikipenak eta konturako sarrerak Pertsona Fisikoen Errentaren gaineko Zergaren konturako ordainketatzat hartu beharko dira.

2. atala. Higigarrien kapitalaren etekinak

73. artikulua. Higigarrien kapitalaren etekinen gaineko atxikipenen zenbatekoa.

Higigarrien kapitalaren etekinen gainean aplikatu beharreko atxikipenaren zenbatekoa atxikipen-oinarriari %20ko portzentajea aplikatzearen emaitza izanen da.

74. artikulua. Finantza aktiboen kontzeptua eta sailkapena.

1. Finantza aktiboak dira besteren kapitalak atzitu eta erabiltzea adierazten duten balore negoziagarriak, zein modutan dokumentatzen diren alde batera utzita.

2. Etekin inplizitudun finantza aktiboak izanen dira etekina honela sortzen bada: jaulkipenean, lehen ezarpenean edo endosuan ordaindutako zenbatekoari beren etekina, osorik edo zati batean, besteren baliabideak atzitzeko erabilitako edozein balore higigarriren bidez modu inplizituan ezartzen den eragiketen mugaegunean ordaintzeko hitza eman den kopurua kenduta.

Jaulkipen, amortizazio edo itzulketa primak etekin inplizitutzat joko dira.

Etekin inplizituaren kontzeptutik kanpo geratuko dira ezarpenaren hobariak edo primak, jaulkipenaren prezioaren gainean igorrita, baldintza hauek betetzen badituzte: merkatuaren jardueren barruan egotea eta Erregelamendu honek arautzen dituen finantza aktiboen jaulkipenean eta hedapenean jarduten duen bitartekari, artekari edo finantza ezartzailearentzako dirusarrera izatea osorik.

Etekin inplizitudun finantza aktibotzat hartuko da edozein igorpen-tresna, bai eta merkataritza-eragiketetan sortutakoak ere, endosatzen edo eskualdatzen den momentutik aurrera. Horren salbuespena izanen da endosua edo lagapena hornitzaileen kreditua ordaintzeko bada.

3. Etekin esplizitudun finantza aktiboak izanen dira interesak sortzen dituztenak eta ordaintzeko beste edozein modu, ordainketa mota hori kapital propioak hirugarrenei lagatzearen kontraprestazio modura hitzartu bada eta ez badago aurreko idatz-zatian ezarri den etekin inplizituen kontzeptuaren barruan.

4. Etekin mistodun finantza aktiboek etekin esplizitudun finantza aktiboen araudia erabiliko dute, urtean modu horretan sortzen duten eskudirua jaulkipenaren unean indarra duen erreferentzia-tasaren berdina edo handiagoa denean, nahiz eta jaulkipen, amortizazio edo itzulketaren baldintzetan beste etekin gehigarri bat ezarri, modu inplizituan. Hiruhileko natural bakoitzean, erreferentzia-tasa hori aurreko hiruhilean egindako hiru urteko estatu-bonuen azken enkantean izan den batez besteko prezio ponderatu eta biribilduari dagokion tasa efektiboaren ehuneko 80 izanen da, lau urteko edo gutxiagoko epea daukaten finantza aktiboak izanez gero; bost urteko estatu-bonuen berdina izanen da, lau urte baino gehiago baina zazpi edo gutxiagoko epea daukaten finantza aktiboak izanez gero; 10, 15 edo 30 urteko estatu-obligazioen berdina izanen da, aipatutakoa baino epe luzeagoa daukaten aktiboak izanez gero. Eperen baterako ezin bada erreferentzia-tasa zehaztu, jaulkipen horretatik gertuen dagoen epearena aplikatuko da.

Idatz-zati honetan ezarritakoaren ondorioetarako, etekin aldakorra edo flotatzailea daukaten finantza aktiboen jaulkipenei dagokienez, eragiketaren interes efektibotzat bere barne etekinaren tasa hartuko da. Izaera esplizitua eta kalkulatua daukaten etekinak baino ez dira hartuko, egoki bada, parametroaren hasierako balorazioari dagokionez, horren arabera zehazten bada, aldizka, sortutako etekinen behin betiko zenbatekoa.

Nolanahi ere, etekin mistoa duen zor publikoa baldin bada, zeinaren kupoiak eta amortizazio zenbatekoak prezio indize baten arabera kalkulatzen baitira, lehen lerrokadako portzentajea ehuneko 40koa izanen da.

75. artikulua. Finantza aktiboak eskualdatzeko, itzultzeko eta amortizatzeko betekizun fiskalak.

1. Etekin inplizitua daukaten finantza titulu edo aktiboak eta eskualdaketa, amortizazio edo itzulketaren unean atxikipena izan behar duten etekin esplizitudun finantza aktiboak besterentzeko edo horien itzulketa lortzeko, titulu edo aktibo horiek, atxikipena egin behar duten fede-emaileen edo finantza entitateen parte hartzearekin, aldez aurretik erosi direla egiaztatu beharko da. Halaber, eragiketako prezioa adierazi beharko da.

Igorpen-tresna bat zirkulazioan jarri ondoren finantza aktibo bihurtzen denean, lehen endosua edo lagapena fede- emaile publiko edo finantza entitatearen bitartez egin beharko da, endosatzailea edo eroslea bera finantza entitatea ez bada. Fede-emaileak edo finantza entitateak dokumentuan idatziko dute finantza aktiboa dela eta lehen eroslea edo edukitzailea identifikatu.

2. Aurreko zenbakian ezarritakoaren ondorioetarako, jaulkipena egiten duen pertsonak edo entitateak, haren ordez aritzen den finantza entitateak, erosle edo gordailugilearen ordez aritzen den fede-emaile publikoak edo finantza entitateak, kasuan kasukoak, honakoen egiaztagiriak luzatu beharko dituzte:

a) Eragiketaren data eta aktiboaren identifikazioa.

b) Eroslearen izena.

c) Aipatutako erosle edo gordailugilearen identifikazio fiskaleko zenbakia.

d) Erosketaren prezioa.

Egiaztagiri hori hiru aletan eginen da. Horietatik, bi ale erosleari emanen zaizkio, eta hirugarrena egiaztagiria egin duen pertsona edo entitateak gordeko du.

3. Finantza entitateak eta fede-emaile publikoak ez dira bitarteko izanen eta ez dute esku hartuko aktibo horien eskualdaketan, eskualdatzaileak ez duenean artikulu honetan ezarritakoaren arabera bere erosketa egiaztatzen.

4. Finantza aktiboak jaulkitzen dituzten pertsonek edo entitateek, artikulu honetan aipatzen direnek, ezin izanen dituzte aktibo horiek itzuli edukitzaileak ez badu erosketa agiri egokiaren bidez egiaztatzen, 2. idatz-zatian ezarritakoa betez.

Jaulkitzaileak edo eragiketaz arduratzen diren finantza entitateek, aurreko lerroaldearen arabera ez badiote itzulketa egin behar titulu edo aktiboaren edukitzaileari, zenbateko horren pareko gordailua egin beharko dute, aginte judizialaren eskura egonen dena.

Denbora baino lehen berrerosteak, berreskuratzeak, ixteak edo amortizatzeak finantza entitate edo fede-emaile publiko batek esku hartzea edo bitartekaritzan aritzea eskatuko du. Aktiboa jaulkitzen duen entitatea edo pertsona erosle soila izanen da titulua berriro ateratzen bada.

5. Erosketaren egiaztagiria galdu egiten bada, tituluaren edukitzaileak agiri hori egin zuen pertsona edo entitateari kopia bat luzatzea eskatu ahal izanen dio.

Pertsona edo entitate horrek argi adieraziko du agiri hori kopia bat dela, bai eta luzatu deneko data ere.

6. Artikulu honetan aurreikusitako ondorioetarako, inter vivos irabazizko eskualdaketa denean, eroslea eskualdatzailearen erosketa balioan subrogatzen dela ulertuko da, aipatutako kostuaren justifikazio nahikoa egonez gero.

76. artikulua. Higigarrien kapitalaren etekinen gaineko atxikipen-oinarria.

1. Eska daitekeen kontraprestazio osoa edo ordaindutako kontraprestazioa izanen da, oro har, higigarrien kapitalaren etekinen gaineko atxikipen-oinarria.

2. Finantza aktiboen amortizazio, itzulketa edo eskualdaketaren kasuan, atxikipen oinarria izanen da aktibo horien amortizazio, itzulketa edo eskualdaketaren balioaren eta eskuratze edo harpidetzaren balioaren kendura positiboa. Erosketa baliotzat erosketaren egiaztagirian dagoena hartuko da. Ondorio horietarako, eragiketaren gastu gehigarriak ez dira murriztuko.

Eskualdatzaileari dagokion atxikipena kaltetu gabe, jaulkipena egiten duen entitateak berak jaulkitako aktibo bat erosten badu, tituluaren geroko edozein eskualdaketa- motatan, amortizazioan izan ezik, lortzen duen etekinaren gainean eginen dira atxikipena eta sarrera.

3. Atxikipena egiteko betebeharra Erregelamendu honen 64.3.e) artikuluaren azken lerroaldean aurreikusitakoan sortzen bada, balore eskualdatuaren kupoi jarraituaren baliokidea den prezioaren zatia izanen da atxikipen-oinarria.

4. Zergari buruzko Foru Legearen 30. artikuluko 3. idatz-zatian araututako etekinei Zergari buruzko Foru Legearen 32.2 artikuluan aipatutako murrizketa aplikatu behar bazaie, etekin horien zenbateko osoan aplikatu beharreko murrizketak aplikatuz kalkulatuko da atxikipen-oinarria.

5. Aseguru kontratuetatik datozen diru-jasotzeen kasuan, kapitalen ezarpenetatik datozen biziarteko edo aldi baterako errenten kasuan, eta orobat, kapital soziala murrizten den kasuetan, horrekin batera akzioen jaulkipen primen banaketa eta ekarpenen itzulketa egiten bada 64.3.h) artikuluaren bigarren eta hirugarren paragrafoan ezarritakoari jarraikiz, atxikipenaren oinarria izanen da Zergari buruzko Foru Legearen arabera kalkulatzen den zerga-oinarrian sartu beharreko kopuru bera.

6. Sozietateen gaineko Zergari buruzko abenduaren 30eko 24/1996 Foru Legearen 32.3 artikuluan aurreikusitakoaren ondoriozko doikuntza sekundarioak atxiki beharra sortzen duenean, atxikipenaren oinarria hitzartutako balioaren eta merkatuko balioaren arteko diferentzia izanen da.

77. artikulua. Higigarrien kapitalaren etekinen gainean atxikipena eta konturako sarrera egiteko betebeharra sortzea.

1. Oro har, atxikipena eta konturako sarrera egiteko betebeharra higigarrien kapitalaren etekinak, eskudirutan edo gauzatan, eskatu ahal diren momentuan sortuko da, atxikipena edo konturako sarrera egin behar bada, edo ordaindu edo entregatzen diren momentuan, aldez aurretikoa bada.

Bereziki, interesak eskrituran edo kontratuan kitatzeko edo kobratzeko adierazitako mugaegunean eskatu ahal izanen dira, edo kontuan beste modu batera onartzen direnean, nahiz eta jasotzaileak ez eskatu horiek kobratzerik edo etekinak eragiketaren printzipalari bildu. Dibidenduak, berriz, banaketa-akordioean ezarritako egunean edo hartzen diren egunaren biharamunetik aurrera eskatu ahal izanen dira, ez bada egunik zehazten.

2. Finantza aktiboen eskualdaketa, amortizazio edo itzulketatik heldu diren higigarrien kapitalaren etekinen kasuan, atxikipena egiteko betebeharra eskualdaketa, amortizazio edo itzulketaren momentuan sortuko da.

Eskualdaketa formalizatzen den egunean gauzatuko da atxikipena, kobratzeko hitzartutako baldintzak edozein izanik ere.

3. atala. Enpresa eta lanbide jardueren etekinak

78. artikulua. Enpresa eta lanbide jardueren etekinen gaineko atxikipenen zenbatekoa.

1. Etekinak lanbide jarduera baten kontraprestazio direnean, %15eko atxikipen-tasa aplikatuko da ordaindutako sarrera osoetan.

Hala ere, atxikipen-tasa %7 izanen da honakoei ordaindutako etekinak direnean:

a) Loterías y Apuestas del Estado estatu sozietatearen merkataritza ordezkariak.

b) Udaleko zerga-biltzaileak.

c) Aseguru-artekariak, kanpoko laguntzaileen zerbitzuak erabiltzen dituztenean.

2. Aurreko idatz-zatian ezarritakoaren ondorioetarako, honakoak egonen dira lanbide jardueren etekinen barruan:

a) Oro har, Jarduera Ekonomikoen gaineko Zerga edo Lizentzia Fiskalaren Tarifen bigarren eta hirugarren ataletan jasotako jardueretan aritzetik heldu direnak.

b) Bereziki, honakoek eskuratutakoak hartuko dira lanbide etekintzat:

a') Jabego intelektual edo industrialetik heldu diren lanen egileak edo itzultzaileak. Egileek edo itzultzaileek beraiek argitaratzen dituztenean lanak, haien etekinak enpresa jarduerei dagozkienen barruan sartuko dira.

b') Komisionistak. Halakotzat hartuko dira kontratu bat egiteko interesatuta dauden alderdiak bildu edo gerturatzen dituztenak.

Alderantziz, komisionisten berariazko lanak soilik ez dituztela egiten ulertuko da aurreko lerroaldean deskribatutako eginkizunaz gain merkataritza-eragiketa horien arriskua eta zortea onartzen badute. Kasu horretan, enpresa jarduerei dagozkienen barruan sartuko da etekina.

c') Irakasleak, beraien etxebizitza, etxe partikular edo akademia edo establezimendu irekietan aritzen badira jarduera horretan, eta irakaskuntza mota edozein dela ere. Norberaren akademietan edo establezimenduetan egindako irakaskuntza enpresa jardueratzat joko da.

d') Ikastaroak, hitzaldiak, mahainguruak, mintegiak eta antzekoak ematetik heldu diren etekinak.

3. Ez dira lanbide jardueren etekintzat hartuko enpresa bateko soldatapean egon eta, enpresa horrentzat betetzen dituzten eginkizunengatik, lanbide elkargoetan izena eman behar duten pertsonek jasotzen dituzten zenbatekoak, ez eta, oro har, lan harreman edo menpekotasunezko harreman batetik heldu direnak ere. Zenbateko horiek lan etekinen barruan sartuko dira.

4. Etekinak nekazaritza edo abeltzaintzako jarduera baten kontraprestazioa direnean, honako atxikipen- portzentajeak aplikatuko dira:

a) Txerri-azienda gizentze eta hegazti-hazkuntzako abeltzaintza-jarduerak: ehuneko 1.

b) Gainerako kasuetan: ehuneko 2.

Portzentaje horiek ordaindutako sarrera osoetan aplikatuko dira. Egokia bada, nekazaritza, abeltzaintza eta arrantzako araubide bereziaren konpentsazioa sartuko da, eta dirulaguntza arruntak, kapitaleko laguntzak eta kalteordainen laguntzak kanpoan geratuko dira.

Ondorio horietarako, nekazaritza edo abeltzaintzako jardueratzat hartuko dira ustiategietatik produktu naturalak, landareak edo animaliak, lortzeko balio dutenak, ez badaukate eraldatze, lantze edo manufakturako prozesurik.

Eraldatze, lantze edo manufakturako prozesutzat hartuko da Jarduera Ekonomikoen gaineko Zerga edo Lizentzia Fiskalaren tarifetan industria-jarduerei dagokien epigrafe batean alta emanda eduki behar den jarduera denean.

Nekazaritza eta abeltzaintzako jardueren barruan hauexek ere sartuko dira:

a') Abeltzaintza independentea.

b') Nekazariek edo abeltzainek nekazaritza edo abeltzaintzako lanak edo zerbitzu osagarriak ematea, beraien ustiategietan erabili ohi dituzten baliabideen bitartez.

c') Azienda hazi, gorde eta zaintze zerbitzuak.

5. Irabaziak baso jarduera baten ordainsariak direnean 100eko 2ko atxikipen tasa aplikatuko zaie pagatutako sarrera osoei, horren barne delarik, egokitzen bada, Nekazaritza, Abeltzaintza eta Arrantza araubide bereziaren konpentsazioa eta dirulaguntza arrunt eta kapitalaren gainekoak eta kalteordainak kenduta.

6.

1. Etekinak idatz-zati honetako 2. zenbakian aipatutako enpresa jardueren kontraprestazio gisa lortzen direnean, eta jarduera horien etekin garbia zenbatespen objektiboaren araubideari loturik zehazten bada, %1eko atxikipen-tasa aplikatuko da ordaindutako sarrera osoetan.

2. Idatz-zati honetan xedatutakoa aplikagarria izanen da ondoko jarduera edo jarduera-sektore hauetan:

3. Idatz-zati honetan aurreikusitako atxikipena ez da bidezkoa izanen enpresa jarduera egiten duen subjektu pasiboak ordaintzaileari jakinarazten badio berak zuzeneko zenbatespenaren araubidean, bi modalitateetako edozeinetan, kalkulatzen duela jarduera horren etekin garbia.

Jakinarazpen horretan datu hauek jarriko dira:

a) Jakinarazpena egiten duenaren izena, deiturak, helbide fiskala eta identifikazio fiskaleko zenbakia. Enpresa jarduera errenta-eragozpenaren araubideko entitate baten bitartez egiten bada, jakinarazpena egiten duenak entitate horren izena edo izen soziala eta identifikazio fiskaleko zenbakia ere eman beharko ditu, eta entitatea berak ordezkatzen duela adierazi beharko du.

b) Aurreko 2. zenbakian aipatutako enpresa jardueretatik zein egiten duen. Jarduera Ekonomikoen gaineko Zergaren epigrafea jarri behar du.

c) Jardueraren etekin garbia zuzeneko zenbatespenaren araubideari loturik zehazten duela, araubide horren modalitateetatik edozeinetan.

d) Data eta jakinarazlearen sinadura.

e) Jakinarazpena hartu behar duen pertsona edo entitatearen identifikazioa.

Gerora subjektu pasiboak berriz zehazten baditu jardueraren etekinak zenbatespen objektiboaren araubideari loturik, ordaintzaileari jakinarazi beharko dio aldaketa hori, eta goiko a), b), d) eta e) letretan aipatutako datuak eman, atxikitzeko betebeharra sortu baino lehen.

Betiere ordaintzaileak datuen jakinarazpenak gorde behar ditu, behar bezala sinaturik.

4. Goiko 3. zenbakian aipatzen diren datuak behar bezala jakinarazten ez badira, Tributuei buruzko abenduaren 14ko 13/2000 Foru Lege Orokorrean xedatutakoaren araberako zerga-ondorioak sortuko dira.

5. Zenbatespen objektiboaren araubideari uko egiten bazaio F-65 eredua betez edo Balio Erantsiaren gaineko Zergaren Erregelamenduaren 22. artikuluko 1. zenbakiko laugarren paragrafoan azaltzen den moduan, ulertuko da subjektu pasiboak zuzeneko zenbatespenaren araubideari loturik zehazten duela bere enpresa jardueraren etekin garbia, F-65 eredua edo Balio Erantsiaren gaineko Zergaren aitorpen-likidazioa aurkezten duen egunetik aurrera.

4. atala. Ondare gehikuntzak

79. artikulua. Talde inbertsioko entitateetako akzio eta partaidetzen eskualdaketa edo itzulketek eragindako ondare-gehikuntzen gaineko atxikipenen zenbatekoa.

Talde inbertsioko erakundeen akzio eta partaidetzen eskualdaketek edo itzulketek eragindako ondare-gehikuntzen gainean egin behar den atxikipena atxikipen-oinarriari %20ko portzentajea aplikatzearen emaitza izanen da.

Ez da atxikipenik eginen eskualdaketa edo itzulketa horiek eragindako ondare-gehikuntza kontuan hartu behar ez den kasuetan, Zergari buruzko Foru Legearen 52.1.a) artikuluan ezarritakoaren arabera.

80. artikulua. Talde inbertsioko erakundeen akzio eta partaidetzen eskualdaketa edo itzulketetatik heldu diren ondare-gehikuntzen gaineko atxikipen-oinarria.

1. Talde inbertsioko erakundeetako akzio eta partaidetzen eskualdaketa edo itzulketetatik heldu diren ondare-gehikuntzen gaineko atxikipen-oinarria zerga-oinarrian sartu beharreko zenbatekoa izanen da. Zerga-oinarri hori Pertsona Fisikoen Errentaren gaineko Zerga erregulatzen duen araudiaren arabera kalkulatuko da.

2. Nolanahi ere, Talde Inbertsioko Erakundeei buruzko azaroaren 4ko 35/2003 Legearen bidez araututako inbertsio funtsetako partaidetzen itzulketak direnean, itzulketaren xede diren partaidetzak edukitzeko epean, aldi berean, beste entitate batean erregistratutako partaidetza homogeneoen titular ere izan diren partaideek eginak, edo itzulketaren xede diren partaidetzen jatorria baldin bada beste partaidetza edo akzio batzuen itzulketa edo eskualdaketa bat edo batzuk edo ondoz ondokoak (Zergari buruzko Foru Legearen 52.1.a) artikuluaren bigarren lerrokadan aurreikusitako geroratze araubidea aplikatua dutenak), itzulketa edo eskualdaketa horietakoren bat ere itzulitako edo eskualdatutako partaidetzekin edo akzioekin batera egina bada, atxikipen oinarria hauxe izanen da: itzulketa zer entitaterekin egiten den, entitate horren partaideen erregistroan ageri diren partaidetzen eskualdaketaren balioaren eta erosketa balioaren arteko aldea; erregistro horretan daudenen artean, lehenengoz erositakoen itzulketa egina dela ulertu beharko da. Erregistro horretan geroratze araubidearen aplikaziotik datozen partaidetzak daudenean, eskualdaketan jakinarazitako erosketa data eta balio fiskalak hartuko dira aintzat.

Aurreko lerrokadan aipatzen diren inguruabarrak gertatzen direnean, partaideak atxikipena edo konturako diru-sarrera (itzulketarako erabili dena) egin behar duen entitateari jakinarazi beharko dio, idatziz edo jaso izana frogatzeko moduko beste edozein bitarteko erabiliz, itzulketak atxikipen-oinarririk sortzen ez duen kasuan ere; kasu horretan, entitateak jakinarazpena gorde beharko du zerga administrazioaren eskura, itzulitako partaidetzen homogeneoak diren beste batzuk zergadunaren izenean erregistraturik dituen bitarte osoan, eta preskripzio epean, gutxienez ere.

Idatz-zati honetan xedatutakoa aplikatuko da, halaber, helbidea atzerrian duten talde inbertsioko erakundeen partaidetzak edo akzioak, Espainiako lurraldean merkaturatuak, jarriak edo banatuak, itzultzean edo eskualdatzean, bai eta 35/2003 Legean arautzen diren inbertsio sozietateen akzioen eskualdaketan ere.

81. artikulua. Atxikipena egiteko betebeharra sortzea.

Atxikipena egiteko betebeharra talde inbertsioko erakundeen akzio edo partaidetzen eskualdaketa edo itzulketa formalizatzen den momentuan sortuko da, kobrantza egiteko hitzartu diren baldintzak edozein direla ere.

82. artikulua. Sarien gaineko atxikipenen zenbatekoa.

Eskudirutan ematen diren sarien gainean egin beharreko atxikipena haien zenbatekoaren %20koa izanen da.

5. atala. Beste errenta batzuk

83. artikulua. Higiezinen errentamendu eta azpierrentamenduen gaineko atxikipenen zenbatekoa.

Hirilurreko higiezinen errentamendu eta azpierrentamenduen gainean egin beharreko atxikipena, horien kalifikazioa edozein dela ere, errentatzaileari ordaintzen zaizkion kontzeptu guztien gainean, Balio Erantsiaren gaineko Zerga salbu, %20 aplikatuz kalkulatuko da.

84. artikulua. Irudi eskubideen eta beste errenta batzuen gaineko atxikipenen zenbatekoa.

Irudi eskubidea ustiatzeko eskubidea lagatzeak eragindako etekinen gainean egin beharreko atxikipena, bai eta 64. artikuluko 2. idatz-zatiko b) letran jasotako gainerako kontzeptuetatik heldu diren etekinen gainean egin beharrekoa ere, kalifikazioa gorabehera, ordaindutako diru-sarrera guztiei %20ko atxikipen tasa aplikatuz kalkulatuko da.

III. KAPITULUA. Konturako sarrerak

85. artikulua. Lanaren gauzazko ordainsarien gaineko konturako sarrerak.

1. Gauzazko ordainsariengatik egin beharreko konturako sarreraren zenbatekoa kalkulatzeko, horren balioari, Zergari buruzko Foru Legearen 16. artikuluan jasotako arauen arabera zehaztuta, eta Erregelamendu honen bigarren xedapen gehigarrian aurreikusitako prozedura erabiliz, Erregelamendu honen 70. artikuluan aurreikusitako tasetatik dagokiona aplikatuko zaio.

2. Pentsio planen eta gizarte aurreikuspeneko mutualitateen sustatzaileek eta 3/1988 Foru Legearen 77. artikuluan aurreikusitako moduan enpresek hartutako pentsio-konpromisoak bideratzen dituzten aseguru kolektiboen hartzaileek (enpresen gizarte aurreikuspeneko planak barne) ordaindutako kontribuzioengatik, horiek zerga oinarria murrizten badute, ez da konturako sarrerarik egin beharko.

86. artikulua. Higigarrien kapitalaren gauzazko ordainsarien gaineko konturako sarrerak.

1. Gauzazko ordainketengatik egin beharreko konturako sarreraren zenbatekoa kalkulatzeko, aurreko II. kapituluko 2. atalean xedatutakotik ateratzen den portzentajea aplikatu beharko zaio erosketaren balioa edo ordaintzailearentzako kostua %20 gehitzetik ateratzen den emaitzari.

2. Sozietateen gaineko Zergari buruzko abenduaren 30eko 24/1996 Foru Legearen 32.3 artikuluan aurreikusitakoaren ondoriozko doikuntza sekundarioak konturako sarrera egin beharra sortzen duenean, konturako sarreraren oinarria hitzartutako balioaren eta merkatuko balioaren arteko diferentzia izanen da.

87. artikulua. Enpresa eta lanbide jardueren gauzazko ordainsarien gaineko konturako sarrerak.

Gauzazko ordainketengatik egin beharreko konturako sarreraren zenbatekoa kalkulatzeko, bere merkatu-balioari aurreko II. Kapituluko 3. Atalean xedatutakotik ateratako portzentajea aplikatu beharko zaio.

88. artikulua. Sarien gaineko konturako sarrerak.

Gauzatan ordaindutako sariengatik egin beharreko konturako sarreraren zenbatekoa kalkulatzeko, sari horiek ondare gehikuntza direnean, Erregelamendu honen 82. artikuluan xedatutakotik ateratako portzentajea aplikatu beharko zaio erosketaren balioa edo ordaintzailearentzako kostua ehuneko 20 gehituz ateratzen den emaitzari.

89. artikulua. Beste errenta batzuen gaineko konturako sarrera.

Erregelamendu honen 83 eta 84. artikuluetan aipatzen diren gauzazko errenten gaineko konturako sarreraren zenbatekoa kalkulatzeko, haren merkatu-balioari artikulu horietan aurreikusitako portzentajea aplikatuko zaio.

IV. KAPITULUA. Atxikipenaren egilearen eta konturako sarrera egin behar duenaren betebeharrak

90. artikulua. Atxikipenaren egilearen eta konturako sarrera egin behar duenaren betebehar formalak.

1. Atxikipenaren egileak eta konturako sarrera egin behar duenak Ekonomi eta Ogasun Departamentuan aurkeztu beharko dute urteko hiruhileko natural bakoitzean atxikitako zenbatekoen eta konturako sarreren aitorpena. Era berean, Nafarroako Ogasun Publikoan sartu beharko dituzte kopuru horiek.

Aitorpena eta dirusarrera egiteko epea hiruhileko bakoitzaren hurrengo hileko lehen hogei egun naturalena izanen da. Bigarren eta laugarren hiruhilekoetan, ordea, aitorpena eta dirusarrera abuztuaren 5 eta urtarrilaren 31ra arte egin ahal izanen dira, hurrenez hurren.

Halere, zenbaki honetako lehen lerroaldean aipatutako aitorpena eta dirusarrera hilabete bakoitzaren lehen hogei egun naturaletan eginen dira, aurreko hilabetean atxikitako kopuru eta konturako sarrerei dagokienez, atxikipenaren egile edo behartuek martxoaren 8ko 86/1993 Foru Dekretuaren bidez onartu zen Balio Erantsiaren Zergari buruzko Erregelamenduaren 62. artikuluaren 3. zenbakiko 1. atalean eta 1.bis atalean adierazten dena betetzen dutenenean.

Ekain, uztail eta abenduko aitorpenak abuztuaren 5, irailaren 20 eta urtarrilaren 31ra arte egin ahal izanen dira, hurrenez hurren.

Atxikipenaren egileek edo behartuek aitorpen negatiboa aurkeztuko dute, atxikipenaren edo konturako sarreren menpean dauden errentak ordaindu arren ez denean egokia, zenbatekoarengatik, atxikipen edo konturako sarrerarik egitea. Ez da aitorpen negatiboa egin behar izanen atxikipen edo konturako sarreren menpean dagoen errentarik ordaindu ez bada.

2. Atxikipenaren egileak edo konturako sarrera egitera beharturik dagoenak hurrengo urteko urtarrilean aurkeztu beharko du aurreko urtean egindako atxikipen eta konturako sarreren laburpena. Laburpen horretan, bere identifikazio datuez gain, hartzaileen izenen zerrenda ere jartzeko eskatu ahal izanen da, datu hauekin:

a) Izen-deiturak.

b) Identifikazio fiskaleko zenbakia.

c) Lortutako errenta, kontzeptuen identifikazioa, deskribapena eta izaera adieraziz, bai eta errenta hori zein ekitalditan sortua den ere. Era berean, haien kopurua dela-eta atxikipen edo konturako sarreren menpean ez dauden errentak agertu beharko dira, bai eta zergarik ez daukaten dietak eta salbuetsitako errentak ere.

d) Zergari buruzko Foru Legearen 17.2 eta 32.2 artikuluetan aurreikusitakoaren arabera aplikatutako murrizketak.

e) Zergari buruzko Foru Legearen 18. eta 32.1.a) artikuluetan aipatutako gastu kengarriak, lanbide elkargoei ordaindutako kuotak izan ezik, betiere ordaindutako etekinen ordaintzaileak egin badu horien kenkaria.

f) Ordaintzaileak dagokion atxikipen portzentajea aplikatzeko kontuan hartu dituen inguruabar pertsonalak eta familiarenak.

g) Ezkontideen arteko pentsio konpentsatzaileen zenbatekoa, atxikipenak egiteko kontuan hartu badira.

h) Egindako atxikipena edo konturako sarrera.

i) Ordaintzaileari itzulitako kopuruak, aurreko ekitaldietan sortutako errentetatik heldu direnak.

Aurreko lerroaldeetan ezarritako betebehar berberen menpean daude Espainian egoitza edo ordezkariak dauzkaten entitateak, atxikipenaren menpean dauden errentak beste batzuen kontura ordaintzen badituzte edo balore-errenten gordetzaile badira edo horien kobrantza kudeatzen badute.

3. Atxikipenaren egileak edo konturako sarrera egin behar duenak subjektu pasiboaren aldeko agiria egin beharko du egindako atxikipen edo konturako sarrerak egiaztatuz, bai eta aurreko idatz-zatian aipatutako urteko laburpenean subjektu pasiboari buruz jaso beharreko gainerako datuak ere.

Egiaztagiri hori subjektu pasiboaren eskura jarri beharko da Zerga honen aitorpena egiteko epea hasi baino lehen.

Aurreko idatz-zatietan ezarritako betebehar berberen menpean egonen dira Espainian egoitza edo ordezkariak dauzkaten entitateak, atxikipenaren menpe daude errentak beste batzuen kontura ordaintzen dituztenean edo balore- errenten gordailu izan edo haien kobrantza kudeatzen dutenean.

4. Ordaintzaileek errentak ordaintzen dituzten momentuan jakinarazi beharko diete subjektu pasiboei egindako atxikipena edo konturako sarrera, eta aplikatutako portzentajea adierazi.

5. Artikulu honetan aipatutako aitorpenak egiteko, Ekonomi eta Ogasun Departamentuak errenta-mota bakoitzerako ezarritako ereduak erabiliko dira. Atxikipenaren egileak edo konturako sarrera egitera behartuta dagoenak bere aitorpeneko datu guztiak adierazi beharko ditu.

Aitorpena eta dirusarrera Ekonomi eta Ogasun Departamentuak zehazten duen modu eta lekuan eginen dira.

V. KAPITULUA. Ordainketa zatikatuak

91. artikulua. Ordainketa zatikatua egin behar dutenak.

Enpresa edo lanbide jardueretan aritzen diren subjektu pasiboek ondoko artikuluetan ezarritakoaren ondorioz ateratako emaitza autolikidatu eta Nafarroako Ogasun Publikoan sartu beharko dute, Hitzarmen Ekonomikoan ezarritako irizpideekin bat etorriz, Pertsona Fisikoen Errentaren gaineko Zergaren kontura egindako ordainketa modura.

Aurreko lerroaldean xedatutakoa alde batera utzita, subjektu pasiboek ez dute konturako ordainketa egin beharko erregelamendu honen 78. artikuluko 4., 5. eta 6. idatz-zatietan aipatzen diren nekazaritza, abeltzaintza edo oihangintzako jarduerengatik, salgaien errepideko garraioarengatik edo etxe-aldaketako zerbitzuengatik.

92. artikulua. Zatien zenbatekoa.

Bat.-Aurreko artikuluan aipatu diren subjektu pasiboek, aukeran, ondoko modalitate bietako bat aplikatzetik lortutako kopuruak sartuko dituzte:

Lehena.-Subjektu pasiboak ordainketa zatikatuak egin baino azken-aurreko urtean lortutako enpresa edo lanbide etekin garbi guztien gainean portzentaje hauek aplikatzetik lortzen dena:

a) Etekin garbiak 6.500 eta 12.000 euro bitartekoak izan badira, %6.

b) Etekin garbiak 12.001 eta 12.000 euro bitartekoak izan badira, %12.

c) Etekin garbiak 24.001 eta 36.000 euro bitartekoak izan badira, %18.

d) Etekin garbiak 36.000 eurotik gorakoak izan badira, %24.

Subjektu pasiboek, egoki bada, lanbide eta enpresa jardueren etekinen gainean egin zitzaizkien atxikipenak eta konturako sarrerak kenduko dituzte, etekin horiek ordainketa zatikatuak egin baino azken-aurreko urteari badagozkio.

Aurreko lerroaldeetan xedatutakoa aplikatuz lortutako zenbatekoa lau zati egin eta zatika sartuko da hurrengo artikuluan ezarritako epeetan.

Sartu beharreko kopururik ez dagoenean, subjektu pasiboek ez dute aitorpena aurkeztu beharrik izanen.

Bigarrena.

1. Aurreko modalitatean adierazitako portzentajeak urte horretako enpresa edo lanbide etekin garbiei aplikatzetik lortzen dena.

Portzentaje horiek zehazteko, urtearen lehen hiru hiruhilekoetako bakoitzean, urtearen lehen egunetik ordainketa zatikatuaren hiruhilekoaren azken eguneraino lortutako etekin garbiak urte osokoak direla joko da.

Enpresa edo lanbide jarduera urtarrilaren 1etik aurrera hasten bada, aipatutako zabaltze hori hasiera egunetik eta urte bereko abenduaren 31ra arteko egun naturalen kopuruaren arabera eginen da.

2. Zergak zenbatespen objektiboaren metodoaren bidez ordaintzen dituzten jardueren kasuan, etekin garbiak metodo horretatik lortutakoak izanen dira; behar izanez gero, indize zuzentzaile egokiak ere kontuan hartuko dira.

Urte horretako etekinak zeinu, indize eta moduluen modalitatean zehazteko, subjektu pasiboak urte horretan jardueran aritutako denborari dagozkion zeinu, indize edo moduluen zenbatekoaren batezbestekoa kalkulatu beharko du.

3. Aipatutako portzentajeak urtearen lehen egunetik ordainketa zatikatuaren hiruhilekoaren azken egunera arte eskuratutako etekinei aplikatuz lortutako zenbatekoa hurrengo artikuluan aipatzen diren epeetan sartuko du subjektu pasiboak.

Hiruhileko bakoitzean lortutako kopurutik honakoa kenduko da, egoki bada: lanbide etekinen eta enpresa etekinen gainean egin zaizkien atxikipen eta konturako sarreren zenbatekoa, hiri-ondasun higiezinen alokairutik heldu direnak, eta ordainketa zatikatuen zenbatekoa, aurreko hiruhilekoari edo hiruhilekoei dagokiena.

Subjektu pasiboek horien aitorpena egin beharko dute, sartzeko kopururik egon ez arren.

Bi. Lehenengo modalitatea automatikoki aplikatuko da, salbu eta subjektu pasiboek bigarrena aukeratzen badute eta hala jakinarazten badiote, berariaz, Ekonomia eta Ogasun Departamentuari urteko lehenengo hiruhilekoari dagokion aitorpen-likidazioan, erregelamenduz ezarritako epearen barruan.

Aukera horrek subjektu pasiboak egiten dituen enpresa eta lanbide jarduera guztiak hartuko ditu, eta urte horretako hiruhileko guztietarako ondorioak izanen ditu.

Aurreko paragrafoetan ezarritakoa deusetan galarazi gabe, subjektu pasiboak bigarren modalitatea aurkeztu arren, urte bereko hurrengo hiruhilekoren bati dagokion aitorpen-likidazioa aurkezten ez badu, Ekonomia eta Ogasun Departamentuak behin-behineko likidazioa egiten ahalko du, ez-betetzea gertatu den hiruhilekoari dagokiona, artikulu honen Bat idatz-zatian aipatzen diren modalitateetatik lehenengoa aplikatuz. Egindako likidazioaren jakinarazpena egin ondoren, subjektu pasiboak behin-behineko likidazio horri dagokion hiruhilekoko aitorpen-likidazioa aurkezten badu, egoera erregularizatuko da, betiere berandu aitortutako zenbatekoa, kontuan sartu beharrekoa, Administrazioak likidatutakoa baino handiagoa baldin bada.

Hiru.- Aipatutako portzentajeak urtearen lehen egunetik ordainketa zatikatuaren hiruhilekoaren azken egunera arte eskuratutako etekinei aplikatuz lortutako zenbatekoa hurrengo artikuluan aipatzen diren epeetan sartuko du subjektu pasiboak.

Hiruhileko bakoitzean lortutako kopurutik honakoa kenduko da, egoki bada: enpresa eta lanbide jardueretako etekinen gainean egin zaizkien atxikipen eta konturako sarreren zenbatekoa, eta ordainketa zatikatuen zenbatekoa, aurreko hiruhilekoari edo hiruhilekoei dagokiena.

Subjektu pasiboek horien aitorpena aurkeztu beharko dute, sartzeko kopururik egon ez arren.

Lau.-Subjektu pasiboek adierazitakoak baino portzentaje handiagoak erabili ahal izanen dituzte ordainketa zatikatu bakoitzean.

93. artikulua. Aitorpena eta dirusarrera.

1. Aurreko artikuluak aipatutako subjektu pasiboek hiru hilerik behin aitorpena egin eta Nafarroako Ogasun Publikoan sartu beharko dituzte aurreko artikuluan xedatutakoaren araberako zenbatekoak. Horretarako, hiruhileko natural bakoitzaren hurrengo hilaren lehen hogei egun naturalak izanen dituzte. Bigarren eta laugarren hiruhilekoetan, berriz, abuztuaren 5 eta urtarrilaren 31ra arte egin ahal izanen dira, hurrenez hurren.

2. Ekonomi eta Ogasun Departamentuak artikulu honetan aipatutako epeak luzatzeko aukera izanen du, bai eta sei hileroko sarrerak egiteko kasuak ezartzeko ere, aurreko artikuluan zehaztutako portzentajeak egokituz.

3. Subjektu pasiboek Ekonomi eta Ogasun Departamentuan aurkeztuko dituzte aitorpenak, eta zenbatekoa Nafarroako Ogasun Publikoan sartuko dute.

Aitorpenak baldintza eta betekizunak beteko ditu eta dirusarrera Ekonomi eta Ogasun Departamentuak ezartzen duen modu eta lekuan eginen da.

94. artikulua. Errenta-eratxikipenaren araubidean dauden erakundeak.

Errenta-eratxikipenaren araubidean dauden erakundeek enpresa edo lanbide jarduerak eginez lortzen dituzten etekinak zatika ordainduz gero, bazkide, erkide edo partaide bakoitzari erakundearen errentatik eratxikitzen zaion proportzioan ordainduko zaio, Zergari buruzko Foru Legeko 11. artikuluan eta III. tituluko II. kapituluko 5. ataleko 1. azpiatalean xedatutakoarekin bat etorriz.

Lehenbiziko Xedapen Gehigarria. Erregelamenduan pezetatan adierazitako diru kopuruen aipamenak.

Erregelamendu honetan pezetatan adierazitako diru kopuruen aipamenak eurotan adierazitako diru kopuruaz ere egiten direla ulertuko da. Eurotako zenbatekoa bihurketa tasaren arabera lortuko da eta Euroa sartzeari buruzko abenduaren 17ko 46/1998 Legearen 1. artikuluan xedatutakoari jarraikiz borobilduko, egokia bada. Bi aipamen mote baliozkotasun eta ondorio berberak izanen dituzte.

Bigarren Xedapen Gehigarria. Lan pertsonalaren gauzazko ordainsariak baloratzeko aurretiko akordioak, Pertsona Fisikoen Errentaren gaineko Zergaren konturako sarrera zehazteko.

1. Gauzatan ordaintzen dituzten lan etekinen ondorioz konturako sarrerak egin behar dituzten pertsona edo entitateek zerga arloko administraziori eskatu ahal izanen diote errenta horiek baloratzea, Zergaren arauei jarraikiz, dagokion konturako sarrera zehazteko ondorioetarako, ez bestetarako.

2. Eskabidea idatziz aurkeztu beharko da dagokion ondasunen entrega edo zerbitzuen prestazioa izan baino lehen, eta eskatzaileak baloraziorako egindako proposamen bat erantsiko zaio.

Idazki horretan, gutxienez, honakoa azalduko da:

a) Pertsona edo entitate eskatzailearen identifikazioa.

b) Balorazioa zein ondasun entrega eta zerbitzu prestaziotarako eskatzen den, horien identifikazioa eta deskripzioa.

c) Proposatutako balorazioa, aplikatutako balorazio erregela eta kontuan hartu diren inguruabar ekonomikoak aipatuz.

3. Zerga arloko administrazioak aurreko lerroaldean aipatutako dokumentazioa aztertuko du eta eskatzaileei proposamenarekin zerikusia duten datu, txosten, aurrekin eta ziurtagiri guztiak eskatu ahal izanen dizkie.

Halaber, eskatzaileek, entzutea emateko tramitearen aurretiko prozeduraren edozein unetan alegazioak eta egokitzat jotzen dituzten agiriak eta ziurtagiriak aurkezteko aukera izanen dute.

Zuzenbidean onartutako edozein bitarteko erabiliz egokitzat jotzen dituzten frogak egitea proposatu ahal izanen dute eskatzaileek. Zerga arloko administrazioak ere beharrezkotzat jotzen dituen frogak egin ahal izanen ditu.

Zerga arloko administrazioak eta eskatzaileek balorazio proposamenaren edukiari buruzko peritu txostenak eskatu ahal izanen dituzte.

Behin prozedura izapidaturik eta ebazpen proposamena erredaktatu aurretik, zergaren arloko administrazioak eskatzaileari jakinaraziko dio, egindako frogen eduki eta ondorioekin eta eskatutako txostenekin batera. Azken hauek egokitzat jotzen dituzten alegazioak egin eta agiriak eta ziurtagiriak aurkeztu ahal izanen dituzte hamabost eguneko epean.

Prozedura sei hilabeteren buruan, gehienez, amaitu beharko da, administrazio organo eskudunaren erregistroetan sartzen den egunetik edo zerga arloko administrazioak eskatuta, eskabidea osatu edo zuzentzen den egunetik hasita. Aipatu epean zerga arloko administrazioak ebazpenik ez emateak eskatzaileak proposatutako baloreak ez onartzea ekarriko du.

4. Prozedurari amaiera ematen dion ebazpenak hauxe egin dezake:

a) Eskatzaileek hasiera batez proposatutakoa onetsi.

b) Eskatzaileek prozeduran zehar egindako proposamen alternatiboa onetsi.

c) Eskatzaileek egindako proposamena ezetsi.

Ebazpena arrazoitua izanen da eta, onartzen bada, honako zehaztapen hauek ere bilduko ditu:

a) Formalizazioaren eguna eta lekua.

b) Eskatzaileen identifikazioa.

c) Eragiketen deskripzioa.

d) Balorazio metodoaren deskripzioa, funtsezko elementuak eta bertatik heldu den edo diren balioak adierazita, eta halaber, aplikatzeko orduan oinarrizkotzat jo behar diren inguruabar ekonomikoak, bereziki funtsezko hipotesiak.

e) Proposamena zein denbora-tarteri dagokion. Indarraldia, gehienez, hiru urtekoa izanen da.

f) Zerga arloko administrazioaren arrazoiak edo zergatiak proposamena onartzeko.

g) Balorazioaren izaera loteslea adieraztea.

5. Emanen den ebazpenaren kontra ez da errekurtsorik aurkezterik izanen, ebazpenean ezarritako balioak aplikatzearen ondorioz egiten diren kitapen egintzen kontra errekurtsoak eta erreklamazioak aurkeztea baztertu gabe.

6. Zergaren arloko administrazioak eta eskatzaileek ebazpenean lanaren gauzazko errentetarako onartzen den balorazioa honen indarraldian aplikatu beharko dute, legeria edo baloraziorako oinarri gisa hartu ziren inguruabar ekonomikoak nabarmen aldatzen ez badira.

7. Prozedura ebazteko eskumena Nafarroako Zerga Ogasuna izeneko erakunde autonomoko zuzendari kudeatzaileak izanen du.

Zuzeneko Zerga, Zehapen eta Errekerimenduen Zerbitzuak instruituko du prozedura, eta horretarako Ekonomia eta Ogasun Departamentuko zerbitzuei eta Nafarroako Foru Komunitateko Administrazioko gainerako departamentuei komenigarritzat jotzen dituen txostenak eskatu ahal izanen dizkie.

Hirugarren Xedapen Gehigarria. Ibilgetu materialaren eta higiezinetako inbertsioen elementuak erregistratzeko arauak.

Beren enpresa edo lanbide jardueretako etekin garbiak, 1999. urtetik aurrera, zuzeneko zenbatespeneko araubidearen modalitate erraztua erabiliz zehazten dituzten subjektu pasiboek, jarduera horiei atxikia baldin badute araubide hori aplikatu aurretik eskuratutako ibilgetu materialaren eta higiezinetako inbertsioen elementurik, inbertsio ondasunen erregistro liburua eramatean arau hauek bete beharko dituzte:

1. Elementu horiek identifikatzeko moduan erregistratuko dituzte, eskuraketa eguna eta balioa adierazita.

2. Etekin garbia zenbatespen objektiboaren araubidea erabiliz zehaztu den zergaldiei dagokien amortizazio metatua erregistratzeko, erregelamendu honen 26. artikuluan aurreikusitako gehieneko amortizazio epetik heldu den koefizientea aipatutako zergaldi horietako bakoitzari aplikatuta ateratzen den emaitza kontatuko da.

Laugarren Xedapen Gehigarria. Kreditu erakundeekin lankidetzan aritzeko betebeharrak.

1. Banku edo kreditu jardueretan aritzen diren pertsona fisiko edo juridikoak, hala nola, bankuak, aurrezki kutxak eta kreditu kooperatibak, behartuta daude zerga arloko administrazioari ematera beste pertsona batzuekin dituzten harreman ekonomiko edo finantzarioen inguruko datu, txosten edo aurrekari mota guztiak.

2. Bereziki, pertsona edo entitate horiek beharturik egonen dira, zerga arloko administrazioak hala eskatuta, kontu korronteen, aurrezki eta eperako gordailuen, mailegu eta kreditu kontuen eta erakunde horiek edozein subjektu pasiborekin dituzten gainerako eragiketa aktibo eta pasiboen mugimenduak erakustera.

3. Zenbait pertsona, entitate edo erkidegoren izenean, azken hauek borondatezkoak izan ala ez, dauden kontu bereizgabe edo baterakoen kasuetan, titular anitzeko gordailuetan eta antzekoetan, titularkideetako baten gaineko informazioa eskatzeak kontu, gordailu edo eragiketaren datu eta mugimendu guztiak erabili ahal izatea ekarriko du, baina zergaren arloko Administrazioak ezin izanen du lortutako informazioa erabili beste titular batekiko, dagokion lankidetza prozedurako izapideak, beharrezkoak direnak, aurretik bete gabe.

4. Zerga Ikuskaritzaren informazio jarduketek eta zerga arloko administrazioak kontu eta eragiketen inguruan egindako galdatzeek, aurreko 2. idatz-zatian aipatzen diren horiek, beharrezkoa izanen dute aurretik Ekonomi eta Ogasun kontseilariaren baimena.

Horretarako, zergaren arloko administrazioaren organo jarduleak aginduzko baimenaren eskabideari azalpen txosten bat erantsiko dio, pertsona edo banku edo kreditu entitate horrekiko jarduketa justifikatzen duten arrazoiak bilduko dituena.

 5. Errekerimenduak ikerketaren xede diren kontuak eta eragiketak zein diren zehaztu beharko du, bai eta ukitutako subjektu pasiboak eta ikerketak hartzen duen denbora tartea ere.

Eskatutako datuak honako hauen ingurukoak izan daitezke: kontuen saldo aktibo edo pasiboak; errekerimenduak hartzen duen denbora epean izandako mugimendu guztiak edo haien zati bat, eta izan diren gainerako eragiketak. Era berean, jarduketek eskatutako datuekin zerikusia duten agiriak eta gainerako aurrekariak ere hartu ahal dituzte.

Errekerimenduak, halaber, jarduketak egiteko modua zehaztuko du, hurrengo idatz-zatian xedatutakoarekin bat.

6. Dagokion ebazpena onetsirik eta agintari eskudunak errekerimendua baimenduta, errekerimendua jasoko duen pertsona edo entitateari jakinaraziko zaio.

Jarduketak bi modutan egin ahal izanen dira: errekeritutako pertsona edo entitateari eskatuz errekerimenduaren xede diren datu edo aurrekariak aurkez ditzala dagokion egiaztagirien bidez, edo pertsona edo entitatearen bulegoan agertuz, beharrezkoak diren agiriak aztertzeko.

Errekeritutako pertsona edo entitateak hamabost eguneko epean aurkeztu beharko ditu eskatutako datuak. Epe hori, gutxienez, iragan beharko da errekerimendua jakinarazten denetik pertsona edo entitatearen bulegoetan jarduketak egin bitarte.

7. Errekerimendua, behar bezala baimendua, ukitutako subjektu pasiboari edo atxikitzaileari jakinaraziko zaio, eta honek jarduketetan egoterik izanen du, haren bulegoetan edo banku edo kreditu entitatearenetan egiten direnean.

8. Zerga arloko administrazioaren organo eskudunek haiekin eragiketak egiten dituzten pertsonen edo finantza entitateen egiaztagiriak edo laburpenak eskatu ahal izanen dizkiete subjektu pasiboei, zerga aitorpenetan ezarritako egitateak frogatu edo egiaztatzeko beharrezkoak baldin badira. Interesatuek errekerimendua aintzat hartzen ez badute, dagokion pertsona edo entitateari buruzko informazioa aurreko artikuluetan xedatutakoari jarraikiz eskatu ahal izanen da.

Bosgarren Xedapen Gehigarria.Jarduera Ekonomikoen gaineko Zergaren kuotak.

Zerga batzuk eta zerga-neurri batzuk partzialki aldatu dituen martxoaren 17ko 16/2003 Foru Legearen bederatzigarren xedapen gehigarrian ezarritakoaren arabera, pertsona fisikoek ordaintzen dituzten Pertsona Fisikoen Errentaren gaineko Zergaren kuotak zerga horren konturako ordainketatzat hartuko dira, Zergari buruzko Foru Legearen 85. artikuluko 1. eta 2. idatz-zatietan ezarritakoaren ondorioetarako.

Baldin eta subjektu pasiboak udal kuota batzuk ordaindu baditu, udalerri desberdinetan zein udalerri berean jarduera bera lokal batean baino gehiagotan egiten duelako edo jarduera bat baino gehiago lokal batean, ordaindutako kuota guztiak dira kengarriak, eta bederatzigarren xedapen gehigarrian ezarritako kenkari-muga aplikatuko zaio kuota bakoitzari.

Errenta-egozpenaren araubidean dauden entitateek ordaintzen dituzten Jarduera Ekonomikoen gaineko Zergaren kuoten ziozko kenkariak bazkide, erkide edo partaideek entitatearen errentatik egozten zaien proportzioaren arabera aplikatuko dituzte, Zergari buruzko Foru Legearen 49. artikuluko 2. idatz-zatian xedatutakoarekin bat etorriz.

Kenkari hori errenta-egozpenaren araubidean dagoen entitatearen zergaldiko negozio zifra garbia 2.000.000 euro baino gutxiago izan denean soilik aplikatu ahal izanen da. Negozio zifra kalkulatzeko, Sozietateen gaineko Zergari buruzko Foru Legearen 50. artikuluko 1. idatz-zatiko b) letrako a') azpiletran eta Merkataritzako Kodearen 35.2 artikuluan xedatutakoa aplikatuko da.

Kenkari hau aplikatu ahal izateko, ezinbestekoa da ordaindutako kuotak agiri bidez frogatzea eta kasu bakoitzerako ezarritako gutxieneko udal kuota ez gainditzea.

Seigarren Xedapen Gehigarria. Ziurtagiria ematea.

Aurrezkietatik korrituen bidez lortzen diren etekinen fiskalitateari buruz Kontseiluak 2003ko ekainaren 3an emandako 2003/48/EE Zuzentarauaren 13.1.b) artikuluan aurreikusten den bezala atxikipena kendu ahal izateko, interesatuak hala eskatuz gero, tributu administrazioak ziurtagiria emanen die Pertsona Fisikoen Errentaren gaineko Zergaren kargapekoei, aipatu zuzentarau horren 11. artikuluan ezarritako konturako atxikipena aplikatzen duen Europar Batasuneko herrialderen batetik errentak jasotzen baldin badituzte. Ziurtagiriak honako datuak edukiko ditu:

a) Hartzailearen izena, helbidea eta identifikazio fiskaleko zenbakia.

b) Errentak ordaintzen dituen pertsona edo entitatearen izena eta helbidea.

c) Errenten hartzaileak emandako kontu zenbakia edo, halakorik ezean, kredituaren identifikazioa.

Ziurtagiria eskatu eta 10 egun baliodun iragan aurretik emanen da, eta hiru urterako izanen du indarra, ematen den egunetik hasita.

Zazpigarren Xedapen Gehigarria. Aktiboaren osaera zenbait erakundetan.

62 ter artikuluko 2. idatz-zatiko A) letrako c) azpiletran aipatutako portzentajea ehuneko 25 izanen da 2011ko urtarrilaren 1etik aurrera.

Zortzigarren Xedapen Gehigarria. Europar Batasuneko egoiliarren identifikazioa eta egoitza egiaztatzeko prozeduren aplikazioa.

Identitatea eta egoitza egiaztatzeko 62 ter artikuluan ezarritako prozedurak erabiliko dira, ezertan eragotzi gabe norberaren kapitalak hirugarrenei lagatzean lortzen diren korrituen eta gainerako etekinen salbuespena aplikatzeko Europar Batasuneko egoiliarrentzat aurreikusita dauden egiaztapen bideak arautzen dituzten xedapenetan ezarritakoa.

Bederatzigarren Xedapen Gehigarria. Partaidetzak inbertsio funts kotizatuetan eta akzioak indizeen arabera kotizatutako kapital aldakorreko inbertsio sozietateetan.

Zergari buruzko Foru Legearen 52.1.a) artikuluaren azkeneko paragrafoan aurreikusten den geroratze araubidea ez da aplikagarria izanen eskualdatu edo berreskuratzen dena nahiz, hala badagokio, harpidetu edo eskuratzen dena Inbertsio Kolektiboko Erakundeei buruzko azaroaren 4ko 35/2003 Legearen Erregelamenduak, azaroaren 4ko 1309/2005 Errege Dekretuaren bidez onartuak, 49. artikuluan aipatzen dituen inbertsio funts kotizatuetako ondarearen partaidetzak edo gisa horretako sozietateen akzioak badira.

Hamargarren Xedapen Gehigarria. Etekin garbiak zehaztea zuzeneko zenbatespenaren metodo erraztua erabiliz, nekazaritza eta abeltzaintzako jardueretan, 2006 eta 2007. urteetan.

Nekazaritza eta abeltzaintzako jardueren etekin garbiak zuzeneko zenbatespenaren metodo erraztuaren bitartez zehazteko, 2006 eta 2007. urteetan soilik, eta Pertsona Fisikoen Errentaren gaineko Zergaren Erregelamenduaren (maiatzaren 24ko 174/1999 Foru Dekretuak onetsia) 30. artikuluko 2. idatz-zatian ezarritakoaren ondorioetarako, kendu beharreko portzentajea ehuneko 10 izanen da.

Hamaikagarren Xedapen Gehigarria. Eginkizunak esleitzea.

Erregelamendu honek eta Pertsona Fisikoen Errentaren gaineko Zergari buruzko bestelako arau juridikoek batzuetan Zuzeneko Tributu, Zehapen eta Errekerimenduen Zerbitzuari eta beste batzuetan zuzendariari esleitzen dizkioten eginkizunak, Pertsona Fisikoen Errentaren gaineko Zerga Kudeatzeko Zerbitzuari eta zerbitzu horretako zuzendariari esleitutzat joko dira, hurrenez hurren.

Hamabigarren xedapen gehigarria. Enpresa gazte eta berritzaileetan inbertsioak egiteagatiko kenkariaren aplikazioa.

Ekonomia eta Ogasun Departamentuak egiaztatu ahal izateko Zergari buruzko Foru Legearen 62.11 artikuluan araututako kenkaria egoki aplikatu ote den, inbertsioa gauzatu den sozietateak, kasuan kasuko zergaldiko aitorpena egiteko epea hasi baino lehen, betebeharrak betetzen direla frogatzeko behar diren datuak aurkeztu beharko ditu. Zerga Administrazioak sozietateari jakinarazi ondoren kenkariaren aplikazioarekin ados dagoela, sozietateak inbertsio-egileei jakinaraziko die.

Lehenbiziko Xedapen Iragankorra. Aitorpenak aurkezteko arauen eta Erregelamendu honetan erregulatutako betebehar formalak ezartzen dituztenen indarraldia.

Aitorpenak aurkezteko arauak eta Erregelamendu honetan dauden betebehar formalen ingurukoak aplikatzekoak izanen dira 1999ko urtarrilaren 1ean hasitako zergaldietan, aitorpenak aurkeztu eta kudeatzeko kanpoko lankidetzari dagozkionak izan ezik, 1998ko ekitaldian aplikatuko baitira.

Bigarren Xedapen Iragankorra. 1999ko urtarrilaren 1a baino lehenago eratutako etxebizitza kontuak.

Etxebizitza kontuetan 1999ko urtarrilaren 1a baino lehenago utzitako zenbatekoak, Erregelamendu honen 53. artikuluan aurreikusitakoaren ondorioetarako, 1998ko abenduaren 31n indarra duten arauetan ezarritako baldintza eta betebeharrekin erabiliko dira ohiko etxebizitza erosi edo zaharberritzeko.

Hirugarren Xedapen Iragankorra. Sozietate gardenen mozkinetako partaidetzak eta dibidenduak.

1. Erakunde batek mozkinetako partaidetzak edo dibidenduak banatzen baditu eta horiek zerga-gardentasunaren araubidean egon den zergaldietan sortu badira, ez dauka haien gainean Pertsona Fisikoen Errentaren gaineko Zergaren ziozko atxikipenik edo konturako sarrerarik aplikatu beharrik.

2. Ez da Pertsona Fisikoen Errentaren gaineko Zergaren konturako sarrerarik ez atxikipenik egin beharko, halaber, Zergari buruzko Foru Legearen 28. artikuluko 1. idatz-zatiko a) eta b) letrek aipatutako dibidenduengatik edo mozkinetako partaidetzengatik, zergaldietan horien entitate banatzaileak aplikagarria izan badu ondare sozietateen araubidea, Sozietateen gaineko Zergari buruzko abenduaren 30eko 24/1996 Foru Legearen hogeita seigarren xedapen iragankorrean ezarritakoaren arabera.

Laugarren Xedapen Iragankorra. Uztailaren 4ko 19/2003 Legearen bigarren xedapen iragankorrean aipatutako baloreei dagokien informazio-betebeharra betetzeko prozedura.

Lehentasuneko partaidetzak eta zorra uztailaren 4ko 19/2003 Legearen bigarren xedapen iragankorraren aplikazio eremukoak direnean (kanpokoekiko transakzio ekonomikoen eta kapital mugimenduen araubide juridikoari eta kapital zuriketa eragozteko zenbait neurriri buruzko legea), abuztuaren 2ko 1285/1991 Errege Dekretuan ezarritakoa aplikatuko da, jaulkipenean bitartekari jarduten duten finantza-erakundeei dagokienez.

Bosgarren Xedapen Iragankorra. Errenta finkoko zenbait tresnaren tratamendua, egoitza Europar Batasuneko beste estatu batzuetan duten pertsona fisikoei buruzko informazio-betebeharren ondorioetarako.

1. Obligazio nazional zein nazioartekoetatik eta gainerako zor-tresna negoziagarrietatik sortutako errentak ez dira erregelamendu honen 62 ter artikuluan aurreikusitako informazio-betebeharrari lotuta egonen honako baldintza hauek betetzen badira: jatorrizko jaulkipena 2001eko martxoaren 1a baino lehenagokoa izatea, edo jatorrizko jaulkipen orriak egun hori baino lehen onetsi izana agintari eskudunek, Kontseiluaren 1980ko martxoaren 27ko 80/390/EEE Zuzentarauari jarraituz (balore higigarriak balore-burtsako kotizazio ofizialerako onartzeko argitaratu behar den orria prestatu, kontrolatu eta zabaltzeko baldintzen koordinazioari buruzko zuzentaraua), nahiz hirugarren herrialdeetako agintari arduradunek; eta 2002ko martxoaren 1az gero halako zor-tresna negoziagarrien jaulkipen gehiago egin ez izana.

Gobernu batek edo parekatutako erakunde batek, organismo publiko gisa edo nazioarteko tratatu batean onartutako eginkizunetan diharduela, 2003/48/EE Zuzentarauaren eranskinean xedatutakoaren arabera, aurrean aipatutako zor-tresna negoziagarrien beste jaulkipen bat egiten badu 2002ko martxoaren 1etik aurrera, jatorrizko jaulkipenetik edo hurrengoetatik, oro har, sortutako errentak erregelamendu honen 62 ter artikuluan ezarritako informazio-betebeharrari lotuta egonen dira.

Aurreko paragrafoan aurreikusi gabeko jaulkitzaile batek tresna horien beste jaulkipen bat egiten badu 2002ko martxoaren 1etik aurrera, ondorengo jaulkipen horri dagokionez soilik, balore horietatik sortutako errentak erregelamendu honen 62 ter artikuluan ezarritako informazio-betebeharrari lotuta egonen dira.

2. Aurreko idatz-zatian ezarritakoa 2010eko abenduaren 31n indarrik gabe geratuko da.

Seigarren Xedapen Iragankorra. Landalur birkalifikatuen ondarearen gehikuntza.

Zergari buruzko Foru Legearen hamahirugarren xedapen iragankorrean ezarritakoa 2006ko urtarrilaren 1etik aurrera egindako lur eskualdaketei aplikatu beharrekoa izanen da, baldin eta egun horretatik aurrera lur horiek hirilur edo lur urbanizagarri gisa sailkatu badira edo hirigintzako edozein aprobetxamendu ezarri bazaie.

Baldin eta, arestian aipatu xedapen iragankorreko bigarren paragrafoan xedatutakoa aplikatzearen ondorioz, ondare gehikuntza handiagoa bada, subjektu pasiboak eskualdaketa egin zen zergaldiari egotziko dio gehikuntza hori, eta aitorpen-likidazio osagarria egin beharko du, zehapen, errekargu eta berandutzagatiko korriturik ordaindu behar izan gabe. Aitorpen-likidazio hori aurkezteko epea lur saila hiri lurzoru edo lurzoru urbanizagarri gisa sailkatzen den edo hirigintzako edozein aprobetxamendu ezartzen zaion egunean hasiko da, eta hori gertatu den zergaldiko aitorpena aurkezteko erregelamenduzko epearekin batera amaituko.

Lur sailak hiri lurzoru edo lurzoru urbanizagarri gisa sailkaturik daudela edo hirigintzako edozein aprobetxamendu ezarri zaiela pentsatuko da hirigintzako araudiak hala xedatzen duenean.

Zazpigarren Xedapen Iragankorra. Berrinbertsiorako epea luzatzea, ohiko etxebizitza eskualdatzen denean ohiko etxebizitza berria erosteko edo zaharberritzeko diru kopuruak ordaindu eta gero.

Zergari buruzko Foru Legearen hogeita hamaikagarren xedapen gehigarrian aurreikusten diren kasuetan, zergaduna bere ohiko etxebizitza eskualdatzen ari dela ulertuko da erregelamendu honen 40.6 artikuluan ezarritakoa betetzen denean, eta, era berean, eskualdatzen den etxebizitzak ohiko etxebizitza izateari utzi dionean, etxebizitza berria erosi ondorengo edozein momentutan ohiko bizilekua bertara aldatu delako.

Xedapen Indargabetzaile Bakarra

1.-Foru Dekretu honek indarra hartzen duenean, haren edukiaren kontra doazen maila bereko edo txikiagoko xedapen guztiak indarrik gabe geldituko dira. Bereziki, hauexek:

a) Pertsona Fisikoen Errentaren gaineko Zergaren Erregelamendua, ekainaren 8ko 209/1992 Foru Dekretuaren bidez onetsia.

b) Zuzeneko zenbatespen erraztuaren araubidea erregulatzen duen abenduaren 30eko 370/1998 Foru Dekretua.

c) Pertsona Fisikoen Errentaren gaineko Zergan konturako ordainketak erregulatzen dituen eta Sozietateen gaineko Zergaren Erregelamendua, atxikipen eta konturako ordainketen arloan, aldatzen duen abenduaren 30eko 371/1998 Foru Dekretua, Xedapen Gehigarria eta Iragankorra salbu.

2.-Honakoek, berriz, indarra izaten segituko dute:

a) 1999ko zergaldirako, bateraezintasunak eta 1998ko abenduaren 31n indarra duten enpresa edo lanbide jardueren etekinak zehazteko araubideen koordinazioa erregulatzen dituzten xedapenak.

b) Foru Dekretu honena baino lerrun beheragoko erregelamenduzko arauak, haren kontra ez doazenak Dekretu honetan aurreikusitako gaikuntzak erabiltzen ez diren bitartean.

Azken Xedapenetan Lehenbizikoa. Arauak emateko gaitzea.

Ekonomi eta Ogasun kontseilariari ahalmena ematen zaio Erregelamendu hau aplikatzeko behar diren xedapenak eman ditzan.

Azken Xedapenetan Bigarrena. Indarra hartu eta aplikatzea.

Foru Dekretu honetan xedatutakoak Nafarroako Aldizkari Ofizialean argitaratu eta biharamunean hartuko du indarra eta Pertsona Fisikoen Errentaren gaineko Zergari buruzko abenduaren 30eko 22/1998 Foru legeak zuzentzen dituen zergaldietan izanen da aplikatzekoa, honako hauek salbu:

a) Bateraezintasunak eta enpresa edo lanbide jardueren etekinak zehazteko araubideen koordinazioa erregulatzen dituzten xedapenak, 2.000ko zergalditik aitzinera aplikatuko baitira.

b) Pertsona Fisikoen Errentaren gaineko Zergaren Erregelamenduaren 8. artikulua, Foru Dekretu honek indarra hartzen duen egunetik aitzinera aplikatuko baita.

Jar zaitez gurekin harremanetan | Erabilerraztasuna | Lege abisua | Webaren mapa