navarra.es
Castellano | Euskara | Français | English
Ezagutzera eman
225/2011 Foru Agindua, abenduaren 27koa, Ekonomia eta Ogasuneko kontseilariak emana, baldintzak eta prozedura ezartzen dituena hainbat subjektu pasibok aukera izan dezaten, Pertsona Fisikoen Errentaren gaineko Zergaren subjektu pasibo gisa, ...
225/2011 Foru Agindua, abenduaren 27koa, Ekonomia eta Ogasuneko kontseilariak emana, baldintzak eta prozedura ezartzen dituena hainbat subjektu pasibok aukera izan dezaten, Pertsona Fisikoen Errentaren gaineko Zergaren subjektu pasibo gisa, Ez-egoiliarren Errentaren gaineko Zerga ordaintzeko
(2012ko 16. NAOn argitaratutako testua, urtarrilaren 24an)
Atarikoa
Pertsona Fisikoen Errentaren gaineko Zergari buruzko Foru Legearen Testu Bategineko (ekainaren 2ko 4/2008 Legegintzako Foru Dekretuaren bidez onetsia) 10.2 artikuluak dioenez, batez ere ikerketari eta garapenari zuzenean loturiko lan bereziki kualifikatuetan aritzeko Espainiako lurraldera etorri direlako edo unibertsitateko ospe handiko irakasleak direlako, Nafarroako egoitza fiskala eskuratzen duten pertsona fisikoek, artikulu horretan ezarritako baldintzak betez gero, aukera izanen dute, Pertsona Fisikoen Errentaren gaineko Zergaren subjektu pasibo gisa, Ez-egoiliarren Errentaren gaineko Zerga ordaintzeko egoitza aldaketa egiten den zergaldian eta hurrengo bost zergaldietan.
Orobat, aipatu artikuluak baimena ematen dio Ekonomia eta Ogasuneko kontseilariari aukera hori baliatzeko modua eta prozedura foru agindu baten bidez arautzeko.
Beren arloan kualifikatuak eta adituak diren pertsona horiek, ikerketari eta garapenari zuzenean loturiko lanak egin behar dituztelako, edo unibertsitateko ospe handiko irakasleak direlako, zerga ordaintzeko araubide berezi hori aplikatzen ahalko dute eta, kasu horretan, irizpide hauen arabera zehaztuko dute beren zerga-zorra:
1. Kargaren menpeko errentaren sorrarazpen erabateko edo partzial bakoitzeko zorra zein bere aldetik ordainduko dute, eta ez da zilegi errenta horien arteko konpentsaziorik.
2. Oro har, errenta bakoitzari dagokion zerga-oinarria haren zenbateko osoa izanen da, Pertsona Fisikoen Errentaren gaineko Zergari buruzko Foru Legearen arauei jarraituz zehaztua.
3. Hainbat zerbitzu prestazioren eta jarduera ekonomiko batzuen kasuan, zerga-oinarria kalkulatzeko, diru-sarrera osoei langileen gastuak, obra edo lanetan erabilitako materialak eskuratzekoak eta hornidurakoak kenduko zaizkie.
4. Ondare gehikuntzei dagokienez, zerga-oinarria zehazteko, Pertsona Fisikoen Errentaren gaineko Zergari buruzko Foru Legearen Testu Bategineko III. tituluko II. kapituluko 4. idatz-zatian aurreikusitako arauak aplikatuko zaizkio ondare aldaketa bakoitzari.
5. Kuota osoa finkatzeko, Ez-egoiliarren Errentaren gaineko Zergari buruzko Legearen Testu Bategineko 25.1 artikuluan aurreikusitako karga-tasak aplikatuko zaizkio zerga-oinarriari.
6. Subjektu pasiboaren errenten gainean egindako atxikipenak eta konturako diru-sarrerak, Ez-egoiliarren Errentaren gaineko Zergaren kontura ordaindutako kuotak eta subjektu pasiboaren dohaintzeengatiko kenkariak kuota osotik kenduta ateratzen den emaitza izanen da kuota diferentziala.
Foru aginduak prozedura erraza ezartzen du araubide berezi honen bidez zerga ordaintzeko, baita hari uko egiteko ere. Orobat, araubide berezi horretatik baztertuta gelditzen diren subjektu pasiboek bete beharrekoak finkatzen dira.
Hori horrela, esleituta ditudan baimenez baliaturik, agindu dut:
1. artikulua. Araubide berezia aplikatzeko eremua.
Espainiako lurraldera etorri eta Nafarroako egoitza fiskala eskuratzen duten pertsona fisikoek aukera izanen dute Ez-egoiliarren Errentaren gaineko Zerga Pertsona Fisikoen Errentaren gaineko Zergaren subjektu pasibo gisa ordaintzeko, baldintza hauek betetzen direnean:
a) Batez ere ikerketari eta garapenari zuzenean lotutako lan bereziki kualifikatuetan aritzera etortzea Espainiako lurraldera, edo unibertsitateko ospe handiko irakasleak izatea.
Sozietateen gaineko Zergari buruzko abenduaren 30eko 24/1996 Foru Legean zehazten da zein diren ikerketa eta garapeneko jarduerak.
b) Espainiako lurraldera azken aldiz etorri aurreko bost urtean Espainian egoiliar ez izatea.
c) Lekuz aldatze hori laneko kontratu baten ondorioz gertatzea. Baldintza hori betetzat joko da lan harremana (arrunta edo berezia) edo estatutu baten araberakoa Espainian hasten denean enplegu-emaile batekin, edo horrek aginduta eta agiri bat emanda egiten denean leku aldaketa, eta subjektu pasiboak Espainiako lurraldean den establezimendu iraunkor baten bidez lortutakotzat joko liratekeen errentak eskuratzen ez dituenean.
d) Lanak Espainian egitea. Baldintza hori betetzat joko da, nahiz eta lanen zati bat atzerrian burutu, baldin eta lan horiei dagozkien ordainsariak ez badira urte naturalean lanaren ordainetan jasotakoaren %15 baino gehiago, lan horiek Espainiako lurraldean lortutako errentatzat hartu edo ez Ez-egoiliarren Errentaren gaineko Zergari buruzko Legearen Testu Bategineko 13.1.c) artikuluaren arabera. Lan kontratuan ezarritakoaren ondorioz, subjektu pasiboak taldeko beste enpresa bateko eginkizunak bere gain hartzen dituenean Espainiako lurraldetik kanpo, Merkataritza Kodearen 42. artikuluan ezarritako moduan, aurreko muga %30era igoko da.
Atzerrian egindako lanei dagozkien ordainsarien zenbatekoa ezin frogatu denean, langileak atzerrian emandako egunak hartuko dira kontuan lan horiei dagokien ordainsaria kalkulatzeko.
e) Lan horiek Espainian egoitza duen enpresa edo entitate batentzat egitea, edo Espainiako lurraldean egoitzarik ez duen entitate batek Espainian duen establezimendu iraunkor batentzat. Baldintza hori betetzat joko da zerbitzuak Espainian egoitza duen enpresa edo entitate baten onerako direnean, edo Espainiako lurraldean egoitzarik ez duen entitate batek Espainian duen establezimendu iraunkor baten onerako. Leku aldatzea enpresa talde baten barrenean egiten bada, Merkataritza Kodearen 42. artikuluan ezarritako moduan, eta ondorio horietarako bakarrik, beharrezkoa izanen da Espainian egoitza duen taldeko enpresak kontratatzea langilea edo enplegu-emaileak aginduta etortzea Espainiako lurraldera.
f) Lan harreman horren ondoriozko lan etekinak, Ez-egoiliarren Errentaren gaineko Zerga dela-eta, ordaintzetik salbuetsita ez izatea.
2. artikulua. Ez-egoiliarren Errentaren gaineko Zerga ordaintzeko araubide bereziaren edukia.
1. Ez-egoiliarren Errentaren gaineko Zerga ordaintzeko araubide berezia aplikatzeko, bakarrik Espainiako lurraldean lortutako errentengatik zehaztuko da Pertsona Fisikoen Errentaren gaineko Zergari dagokion zorra, artikulu honetan eta Ez-egoiliarren Errentaren gaineko Zergari buruzko Legearen Testu Bateginean (martxoaren 5eko 5/2004 Legegintzako Errege Dekretuak onetsia) ezarritako arauei jarraituz, establezimendu iraunkor baten bitartekorik gabe lortutako errententzat, aipatu testu bategineko I. kapituluko 5., 6., 8., 9., 10. eta 11. artikuluetan xedatutakoa izan ezik.
2. Bereziki, arau hauek aplikatuko dira:
a) Araubide berezi hau aukeratzen duten subjektu pasiboek zein bere aldetik ordainduko dute kargaren menpeko errentaren sorrarazpen erabateko edo partzial bakoitza, eta ez da zilegi haien arteko konpentsaziorik.
b) Oro har, errenta bakoitzari dagokion zerga-oinarria haren zenbateko osoa izanen da, Pertsona Fisikoen Errentaren gaineko Zergari buruzko Foru Legearen Testu Bategineko (ekainaren 2ko 4/2008 Legegintzako Foru Dekretuak onetsia) arauei jarraituz zehaztua.
c) Zerbitzu prestazioak, laguntza teknikoa, ingeniaritzako kontratuen ondoriozko instalazio edo muntatze lanak eta, oro har, establezimendu iraunkor baten bitartekorik gabe Espainian egindako jarduera edo ustiapen ekonomikoen ondoriozko kasuetan, zerga-oinarria zehazteko, diru-sarrera osoei langileen gastuak, obra edo lanetan erabilitako materialak eskuratzekoak eta hornidurakoak kenduko zaizkie.
d) Ondare gehikuntzei dagokien zerga-oinarria zehazteko, Pertsona Fisikoen Errentaren gaineko Zergari buruzko Foru Legearen testu bategineko III. tituluko II. kapituluko 4. idatz-zatian aurreikusitako arauak aplikatuko zaizkio ondare aldaketa bakoitzari, 39.3 artikuluan xedatutakoa izan ezik. Pertsona Fisikoen Errentaren gaineko Zergari buruzko Foru Lege horren 52. artikuluan ezarritakoa ere aplikatuko da, 1.a) idatz-zatiko bigarren lerroaldean aurreikusitakoa izan ezik.
3. Kuota osoa ateratzeko, Ez-egoiliarren Errentaren gaineko Zergari buruzko Legearen testu bategineko 25.1 artikuluan aurreikusitako karga-tasak aplikatuko zaizkio zerga-oinarriari.
4. Kuota diferentziala ateratzeko, honako zenbateko hauek kenduko dira zergaren kuota osotik:
a) Subjektu pasiboaren errenten gainean egindako atxikipenak eta konturako diru-sarrerak, baita Ez-egoiliarren Errentaren gaineko Zergaren kontura ordaindutako kuotak ere.
b) Dohaintzeengatiko kenkariak, Pertsona Fisikoen Errentaren gaineko Zergari buruzko Foru Legearen Testu Bategineko 62.4 artikuluan ezarritako moduan.
5. Araubide berezi honen konturako ordainketak direla-eta, Ez-egoiliarren Errentaren gaineko Zergaren araudian ezarritakoari jarraituz eginen dira atxikipenak eta konturako diru-sarrerak. Dena dela, Pertsona Fisikoen Errentaren gaineko Zergaren Erregelamenduko (maiatzaren 24ko 174/1999 Foru Dekretuak onetsia) 65.2.a) artikuluan aurreikusitako inguruabarrak gertatuz gero, zein entitate egoiliarretan edo establezimendu iraunkorretan ematen dituzten zerbitzuak subjektu pasiboek, haiek daude behartuta atxikipenak egitera subjektu pasibo horiek Espainiako lurraldean lortzen dituzten errentei dagokienez.
Aurreko lerroaldean aipatu atxikipenak eta konturako diru-sarrerak direla-eta, Zergaren Erregelamenduko 90. artikuluan aurreikusitako betebehar formalak gauzatzeko, Ez-egoiliarren Errentaren gaineko Zergan aurreikusitako aitorpen ereduak erabiliko dira establezimendu iraunkor baten bitartekorik gabe lortutako errententzat.
6. Araubide berezi horren aplikazioa jasotzen duten subjektu pasiboak behartuta daude Pertsona Fisikoen Errentaren gaineko Zergaren aitorpena aurkeztu eta sinatzera Ekonomia eta Ogasuneko kontseilariak onesten duen ereduan, Ez-egoiliarren Errentaren gaineko Zergan aurreikusitako aitorpen ereduei egokitutako edukia duela. Kontseilari horrek ezarriko du eredua nola, non eta zein epetan aurkeztu.
Aitorpena aurkezteko orduan, subjektu pasiboek dagokien zorra zehaztu beharko dute, eta diru-sarrera egin Ekonomia eta Ogasuneko kontseilariak erabakitzen duen tokian, moduan eta epeetan. Diru kopururik itzuli behar bada, Pertsona Fisikoen Errentaren gaineko Zergari buruzko Foru Legearen Testu Bategineko 85. artikuluan adierazitakoaren arabera itzuliko da.
7. Espainiako lurraldean diren ondasun higiezinen eskualdaketei Ez-egoiliarren Errentaren gaineko Zergari buruzko Legearen testu bategineko 25.2 artikuluan aurreikusitakoa aplikatuko zaie, araubide berezi hau aplikatzea aukeratzen duten Pertsona Fisikoen Errentaren gaineko Zergaren subjektu pasiboek egindako eskualdaketak direnean.
3. artikulua. Iraunaldia.
Subjektu pasiboak zein zergalditan eskuratzen duen egoitza fiskala Espainian, hartan eta hurrengo bost zergalditan aplikatuko da araubide berezi hau, 5. eta 6. artikuluetan ezarritakoa ukatu gabe.
4. artikulua. Aukera egitea.
1. Araubide berezi honen bidez ordaintzea aukeratzeko, hau da, 7. artikuluan aipatzen den eredua aurkeztuta, sei hilabeteko epea izanen da gehienez ere, Pertsona Fisikoen Errentaren gaineko Zergari buruzko Foru Legearen Testu Bategineko 10.2.a) artikuluan aipatzen diren jarduerak hasten direnetik; egun horretan altan dagoela agertu beharko du Espainiako Gizarte Segurantzan edo jatorrizko Gizarte Segurantzan jarraitzea baimentzen duen dokumentazioa duela, legeriak altan jarraitzea baimenduz gero.
2. Pertsona Fisikoen Errentaren gaineko Zergaren Erregelamenduko 72 bis artikuluan aurreikusitako lan etekinen gaineko atxikipenak edo konturako diru-sarrerak zehazteko, prozedura berezia hautatzen duten subjektu pasiboek ez dute zilegi aukera hau.
3. Nafarroako Zerga Ogasunak, 7.3 artikuluan xedatutakoari jarraituz, egindako aukera onartuko die beste lurralde batetik etorrita (foruak izan edo arrunta izan) Nafarroako egoitza fiskala eskuratzen duten subjektu pasiboei, baita Nafarroarako egoitza aldaketak ondorioak izan aurreko zergaldian Zergari buruzko Foru Legearen 10.2 artikuluan eta foru agindu honetan araututakoaren pareko araubidearen aplikazioa jaso dutenei ere, haietan aurreikusitako gainontzeko baldintzak betez gero.
3. artikuluan aurreikusitakoak ondorioak izan ditzan araubide bereziaren aplikazioko zergaldiak kontatzeko, edozein lurraldetan (foruak izan edo arrunta izan) foru agindu honetan araututakoaren pareko araubide berezia zein zergalditan aplikatu den hartu beharko da kontuan.
5. artikulua. Araubideari uko egitea.
1. Araubide berezi hau aukeratzen duten subjektu pasiboek uko egiten ahalko diote haren aplikazioari azaroan eta abenduan, uko egite horrek hurrengo urte naturalean ondorioak izanen baditu.
2. Prozedura honi jarraikiz uko eginen da:
a) Lehendabizi, beren egoera jakinarazi eta frogatu beharko dute atxikitzailearen aurrean, aplikatzen ahal den atxikipen portzentajea kalkulatzeko, Pertsona Fisikoen Errentaren gaineko Zergaren Erregelamenduko 72. artikuluan aurreikusitakoari jarraituz. Atxikitzaile horrek jakinarazpenaren kopia bat emanen die, zigilu eta guzti.
b) Bigarrenik, 7. artikuluan aurreikusitako jakinarazpena aurkeztuko diote Nafarroako Zerga Ogasunari, eta aurreko letran aipatu jakinarazpenaren kopia zigilatua erantsiko diote.
3. Araubide berezi honi uko egiten dioten subjektu pasiboek ezin izanen dute berriz haren aplikazioa hautatu.
6. artikulua. Araubidetik baztertzea.
1. Araubide berezi honen aplikazioa hautatu eta gero, haren aplikaziorako erabakigarriak diren baldintzetakoren bat betetzen ez duten subjektu pasiboak araubide horretatik baztertuko dira. Zein zergalditan ez diren baldintzak betetzen, hartan izanen ditu ondorioak bazterketak.
2. Araubidetik baztertutako subjektu pasiboek horren berri eman beharko diote Nafarroako Zerga Ogasunari, aplikazioko baldintzak betetzeari utzi eta hilabeteko epean, 7. artikuluan aipatu den jakinarazpenaren bitartez.
3. Atxikipenak eta konturako diru-sarrerak Pertsona Fisikoen Errentaren gaineko Zergako arauei jarraituz eginen dira, subjektu pasiboak atxikitzaileari araubide berezi hau aplikatzeko baldintzak betetzeari utzi diola jakinarazten dion unetik aurrera, aurreko idatz-zatian aipatu jakinarazpenaren kopia erantsita. Aldi berean, Pertsona Fisikoen Errentaren gaineko Zergaren Erregelamenduko 72. artikuluan aurreikusitako datuen jakinarazpena aurkeztuko dio atxikitzaileari.
Dena dela, atxikitzaileak Zergari buruzko Foru Legearen 10.2 artikuluko d), e) edo f) letretan aurreikusitako baldintzak betetzen ez direla jakiten duenean, Pertsona Fisikoen Errentaren gaineko Zergaren arauei jarraituz eginen dira atxikipenak eta konturako diru-sarrerak, baldintzak betetzen ez direla jakiten duenetik aurrera.
Atxikipen tasa berria kalkulatzeko, Pertsona Fisikoen Errentaren gaineko Zergaren Erregelamenduaren 71. artikuluan ezarritakoari jarraituko zaio.
4. Araubide berezi honetatik baztertutako subjektu pasiboek ezin izanen dute berriz haren aplikazioa hautatu.
7. artikulua. Jakinarazpena zerga administrazioari eta araubidearen egiaztagiria.
1. Nafarroako Zerga Ogasunari jakinarazpena aurkeztuta aukeratuko da araubidearen aplikazioa.
Jakinarazpen horretan, besteak beste, honako hauek adieraziko dira: langilearen identifikazioa, enplegu-emailearena eta, zein den kasua, Espainian egoitza duen enpresa edo entitatearena, edo zerbitzuak hartzen dituen establezimendu iraunkorrarena, noiz sartu zen Espainiako lurraldean eta noiz hasi jarduera, Espainiako Gizarte Segurantzan alta emanda edo jatorrizko Gizarte Segurantzan jarraitzea baimentzen duen dokumentazioa duela, baita garatuko den jardueraren azalpen zehatza ere.
Halaber, dokumentazio hau erantsiko da:
a) Lan harreman bat, arrunta edo berezia, edo estatutu baten araberakoa hasten denean enplegu-emaile batekin Espainian, hark emandako egiaztagiri bat, honako hauek jasotzen dituena: subjektu pasiboak lan harremana edo estatutu baten araberakoa ote duen, 10.2.a) artikuluan aurreikusitako baldintzak betetzen dituela, noiz hasten den jarduera Espainiako Gizarte Segurantzan alta emanda, lantokia eta horren helbidea, lan kontratuaren iraunaldia eta lana Espainian egiten dela.
b) Enplegu-emaileak agindutako lekualdatze bat denean Espainian egoitza duen enpresa edo entitate bati edo Espainiako lurraldean den establezimendu iraunkor bati zerbitzuak egiteko, horiek emandako egiaztagiri bat, honako hauek jasoko dituena: zerbitzuak haientzat egiten direla, zerbitzu horiek emateko Zergari buruzko Foru Legearen 10.2.a) artikuluan aurreikusitako baldintzak betetzen direla, enplegu-emaileak luzatutako lekualdatze agiriaren kopia, noiz hasten den jarduera Espainiako Gizarte Segurantzan alta emanda edo jatorrizko Gizarte Segurantzan jarraitzea baimentzen duen legeriaren dokumentazioa duela, lantokia eta horren helbidea, lekualdatze aginduaren iraunaldia eta lana Espainian eginen dela.
2. Nafarroako Zerga Ogasunak, aurkezten zaion jakinarazpena ikusita eta bidezko bada, egiaztagiri bat luzatuko du, subjektu pasiboak araubide berezi honen aplikazioa aukeratu duela jasotzen duena, komunikazioa aurkeztu eta 10 egun balioduneko epean, gehienez ere.
Egiaztagiri horrek atxikipena edo konturako diru-sarrera egitera behartutako pertsona edo entitateei araubide bereziari lotutako subjektu pasibo izatea frogatzeko balioko du; horretarako, dokumentu horren ale bat emanen zaie.
3. 4.3 artikuluan aipatu moduan, beste lurralde batetik (foruak izan edo arrunta izan) etorri eta Nafarroako egoitza fiskala eskuratzen duten subjektu pasiboak direnean, honako hau frogatu beharko dute:
a) Zein lurraldetatik (foruak izan edo arrunta izan) egiten duten egoitza aldaketa Nafarroara.
b) Nafarroarako egoitza aldaketak ondorioak dituen zergaldiaren aurrekoan Zergari buruzko Foru Legearen 10.2 artikuluan eta foru agindu honetan araututakoaren pareko araubide berezi bat aplikatu izatea, baita zenbat zergalditan aplikatu zaien araubide hori ere.
c) Aurreko letran aipatu arauetan aurreikusitako gainontzeko baldintzak betetzen dituztela.
Azken Xedapen Bakarra. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
